ទំនុកដំកើង ១០២–១០៣; ១១០; ១១៦–១១៩; ១២៧–១២៨; ១៣៥–១៣៩; ១៤៦–១៥០ ៖ មេរៀនទី ១០៨
ទំនុកដំកើង ១៣៦
« ឱសូមអរព្រះគុណដល់ព្រះយេហូវ៉ា »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ដូចជាទំនុកតម្កើងជាច្រើនដែរ គម្ពីរទំនុកដំកើងរំឭកយើងឲ្យដឹងគុណក្នុងគ្រប់ការណ៍ទាំងអស់ ។ ការបង្ហាញការដឹងគុណដោយស្មោះចំពោះព្រះវរបិតាសួគ៌ និងព្រះយេស៊ូវគ្រីស្ទ អាចបើកភ្នែក និងដួងចិត្តរបស់អ្នកចំពោះសេចក្ដីស្រឡាញ់ និងសេចក្ដីមេត្តាករុណារបស់ទ្រង់ទាំងទ្វេ ។ វានឹងអនុញ្ញាតឲ្យសេចក្ដីស្រឡាញ់របស់អ្នកចំពោះទ្រង់ទាំងទ្វេរីកចម្រើនឡើង ។ មេរៀននេះអាចជួយអ្នកឲ្យទទួលស្គាល់សេចក្តីស្រឡាញ់ និងសេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នកបង្ហាញការដឹងគុណចំពោះទ្រង់ទាំងទ្វេ ។
សិក្សាព្រះគម្ពីរ
អ្នកអាចរកឃើញសេចក្តីស្រឡាញ់របស់ព្រះ មិនថាអ្នកនៅទីណានោះទេក្នុងពិភពលោកនេះ ។ សូមជញ្ជឹងគិតពីលើកចុងក្រោយ ដែលអ្នកពិតជាទទួលអារម្មណ៍យ៉ាងពិតប្រាកដពីសេចក្តីស្រឡាញ់របស់ព្រះ ។ តើវានៅថ្មីៗនេះឬ ? តើអ្វីទៅដែលបាននាំមកនូវអារម្មណ៍ទាំងនោះ ? តើនឹងមានអ្វីកើតឡើង ប្រសិនបើអ្នករកឃើញថា ពេលខ្លះវាពិបាកដើម្បីស្គាល់សេចក្តីស្រឡាញ់របស់ទ្រង់ចំពោះអ្នកវិញនោះ ?
ប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) បានពន្យល់ពីអ្វីមួយដែលយើងអាចធ្វើបាន ដើម្បីទទួលអារម្មណ៍នៃសេចក្តីស្រឡាញ់របស់ព្រះ ៖
បងប្អូនប្រុសស្រីរបស់ខ្ញុំអើយ តើយើងចងចាំថាត្រូវថ្លែងអំណរគុណចំពោះពរជ័យដែលយើងទទួលឬទេ ? ការអរព្រះគុណដោយស្មោះមិនត្រឹមតែជួយយើងឲ្យស្គាល់ពរជ័យរបស់យើងប៉ុណ្ណោះទេ ប៉ុន្តែវាក៏ជួយបើកទ្វារស្ថានសួគ៌ និងជួយយើងឲ្យទទួលអារម្មណ៍នៃសេចក្ដីស្រឡាញ់របស់ព្រះផងដែរ ។ ( « The Divine Gift of Gratitude » Liahona ខែវិច្ឆិកា ឆ្នាំ២០១០ ទំព័រ ៨៧ )
តើអ្នកគិតថា ហេតុអ្វីបានជាការបង្ហាញការដឹងគុណចំពោះពរជ័យរបស់យើង ជួយយើងឲ្យទទួលអារម្មណ៍ពីសេចក្តីស្រឡាញ់របស់ព្រះ ? សូមគិតពីបទពិសោធន៍របស់អ្នកកាលពីសប្តាហ៍មុន ។ សូមជញ្ជឹងគិតពីរបៀបដែលអ្នកនឹងឆ្លើយសំណួរខាងក្រោមនេះ ដោយប្រើឃ្លា មិនដែលសោះ ម្តង ឬពីរដង ពីរបីដង ឬ ជាច្រើនដង ។
-
តើអ្នកស្គាល់ពរជ័យជាក់លាក់មួយមកពីព្រះអម្ចាស់ក្នុងជីវិតរបស់អ្នកញឹកញាប់ប៉ុនណា ?
-
តើអ្នកបានបង្ហាញការដឹងគុណចំពោះព្រះអម្ចាស់ញឹកញាប់ប៉ុនណាសម្រាប់ពរជ័យរបស់អ្នក ?
-
តើអ្នកទទួលអារម្មណ៍នៃសេចក្តីស្រឡាញ់ទ្រង់ញឹកញាប់ប៉ុនណា ?
នៅពេលអ្នកគិតពិចារណាពីចម្លើយរបស់អ្នក ព្រះវិញ្ញាណបរិសុទ្ធអាចជួយអ្នកឲ្យរៀន និងកែលម្អឲ្យប្រសើរឡើងបាន ។ នៅពេលអ្នកសិក្សានៅថ្ងៃនេះ សូមស្តាប់តាមការណែនាំមកពីព្រះវិញ្ញាណបរិសុទ្ធ អំពីរបៀបដែលអ្នកអាចស្គាល់ពរជ័យកាន់តែច្បាស់ និងបង្ហាញការដឹងគុណចំពោះព្រះវរបិតាសួគ៌ និងព្រះយេស៊ូវគ្រីស្ទបានកាន់តែប្រសើរ ។
សូមអាន ទំនុកដំកើង ១៣៦:១–៣, ២៦ ។ សូមគូសសម្គាល់មូលហេតុម្តងហើយម្តងទៀត ដែលអ្នកនិពន្ធគម្ពីរទំនុកដំកើងចែកចាយអំពីការបង្ហាញការដឹងគុណ ។
តើសេចក្តីសប្បុរសគឺជាអ្វី ? រាល់ពេលដែលអ្នកនិពន្ធទំនុកដំកើងស្គាល់សេចក្តីសប្បុរសរបស់ព្រះនៅក្នុង ទំនុកដំកើង ១៣៦ គាត់បង្ហាញការដឹងគុណ ។ នៅក្នុងភាសាហេព្រើរពាក្យថា សេចក្តីសប្បុរសនៅក្នុងខគម្ពីរទាំងនេះគឺ hesed ( ហេសិដ ) ដែលមានន័យថា « សេចក្ដីស្រឡាញ់ និងសេចក្ដីមេត្តាករុណាដ៏ពិសេសមួយ ដែលព្រះមានព្រះទ័យ និងសព្វព្រះទ័យប្រទានដល់អស់អ្នកដែលបានចុះសេចក្ដីសញ្ញាជាមួយទ្រង់ » ( រ័សុល អិម ណិលសុន « សេចក្តីសញ្ញាដ៏នៅអស់កល្បអស់កាលជានិច្ច » លីអាហូណា ខែតុលា ឆ្នាំ២០២២ ទំព័រ ៦ ) ។
នៅជាប់នឹងពាក្យ សេចក្តីសប្បុរស នៅក្នុង ទំនុកដំកើង ១៣៦:១ សូមសរសេរកំណត់ចំណាំដូចតទៅនេះ ៖ សេចក្តីសប្បុរស = សេចក្ដីស្រឡាញ់របស់ព្រះក្នុងសេចក្ដីសញ្ញា ឬ កាលខ្ញុំស្គាល់ពរជ័យ និងសេចក្តីសប្បុរសរបស់ព្រះនៅក្នុងជីវិតរបស់ខ្ញុំ ខ្ញុំគួរតែបង្ហាញការដឹងគុណរបស់ខ្ញុំចំពោះទ្រង់ ។
សូមអាន ទំនុកដំកើង ១៣៦:៤–៩, ២៥ និង ទំនុកដំកើង ១០០:៣ ។ សូមរកមើលអ្វីដែលព្រះបានធ្វើ ដែលអ្នកអាចបង្ហាញការដឹងគុណបាន ។ នៅក្នុងសៀវភៅកត់ចំណាំ ឬរឹមទំព័រព្រះគម្ពីររបស់អ្នក សូមគូរការបង្កបង្កើតរបស់ព្រះអម្ចាស់ចំនួនបី ដែលអ្នកមានការដឹងគុណ ។
សូមអាន ទំនុកដំកើង ១៣៦:២៤ ហើយរកមើលអ្វីផ្សេងទៀតដែលព្រះអង្គសង្គ្រោះធ្វើសម្រាប់យើង ។ អ្នកអាចសរសេរកំណត់ចំណាំមួយនៅជាប់នឹងខគម្ពីរនេះ ជាមួយនឹងអ្វីផ្សេងទៀតដែលព្រះអង្គសង្គ្រោះបានធ្វើ ដែលអ្នកមានការដឹងគុណ ។
ប្រសិនបើមាន សូមមើល « President Russell M. Nelson on the Healing Power of Gratitude » ( ពីនាទីទី ២:៤៥ ដល់នាទីទី ៤:២៧ ) ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
ហេតុអ្វីបានជាខ្ញុំគួរមានអំណរគុណ សូម្បីតែចំពោះការសាកល្បងរបស់ខ្ញុំក៏ដោយ ?
សូមអាន ទំនុកដំកើង ១៣៦:១០–១៦ ហើយរកមើលអ្វីផ្សេងទៀតដែលព្រះអម្ចាស់បានធ្វើសម្រាប់រាស្រ្តរបស់ទ្រង់ ។
ប្រធាន ដាល្លិន អេក អូក ក្នុងគណៈប្រធានទីមួយ បានបង្រៀន ៖
វិវរណៈដែលយើងមានអំណរគុណ បង្ហាញថាយើងគួរតែថ្លែងអំណរគុណចំពោះទុក្ខវេទនារបស់យើង ដោយសារវាបង្វែរចិត្តយើងទៅរកព្រះ ហើយផ្តល់ឱកាសដល់យើងដើម្បីរៀបចំខ្លួនសម្រាប់អ្វីដែលព្រះចង់ឲ្យយើងប្រែក្លាយ ។ … នៅកណ្តាលនៃការបៀតបៀនដែលពួកបរិសុទ្ធថ្ងៃចុងក្រោយកំពុងរងទុក្ខនៅរដ្ឋមិសសួរី ព្រះអម្ចាស់បានប្រទានការបង្រៀន និងការសន្យាស្រដៀងគ្នានេះ ៖ « យើងប្រាប់អ្នកជាប្រាកដថា កុំខ្លាចឡើយ ចូរមានចិត្តក្សាន្តចុះ មែនហើយ ចូរអរសប្បាយជានិច្ច ហើយនូវគ្រប់អ្វីៗទាំងអស់ ចូរថ្លែងអំណរគុណ … ហើយគ្រប់ការណ៍ទាំងអស់ដែលអ្នកត្រូវបានរងទុក្ខ នោះនឹងផ្សំគ្នាសម្រាប់សេចក្ដីល្អដល់អ្នក » ( គោលលទ្ធិ និងសេចក្ដីសញ្ញា ៩៨:១, ៣ ) ។ ហើយចំពោះព្យាការី យ៉ូសែប ស្ម៊ីធ នៅក្នុងទុក្ខវេទនានៅគុកលិបើទី ៖ « បុត្រយើងអើយ ចូរអ្នកដឹងថា គ្រប់ការណ៍ទាំងនេះនឹងផ្ដល់ការពិសោធន៍ដល់អ្នក ហើយនឹងទៅជាការល្អដល់អ្នកទៅវិញ » ( គោលលទ្ធិ និងសេចក្ដីសញ្ញា ១២២:៧ ) ។ ( « Give Thanks in All Things » Liahona ខែឧសភា ឆ្នាំ២០០៣ ទំព័រ ៩៦ )
សូមចែកចាយជាមួយសមាជិកគ្រួសារ ឬមិត្តភក្ដិម្នាក់នូវដំណើររឿងមួយចេញពីព្រះគម្ពីរ ពីជីវិតរបស់អ្នកផ្ទាល់ ឬជីវិតរបស់នរណាម្នាក់ដែលអ្នកស្គាល់ ដែលព្រះអម្ចាស់បានជួយនរណាម្នាក់ឲ្យឆ្លងកាត់ការសាកល្បង ។
ជម្រើស ខ
តើព្រះគម្ពីរអាចជួយខ្ញុំឲ្យទទួលអារម្មណ៍នៃសេចក្ដីស្រឡាញ់របស់ព្រះបានយ៉ាងដូចម្តេច ?
សូមអាន ទំនុកដំកើង ១៣៦:២៣ ។ សូមរកមើលគ្រាដែលព្រះចងចាំយើង ។
ប្រធាន ហែនរី ប៊ី អាវរិង ក្នុងគណៈប្រធានទីមួយ បានចែកចាយ ៖
ខ្ញុំព្យាយាមចងចាំការលះបង់របស់ព្រះអង្គសង្គ្រោះ និងសេចក្តីស្រឡាញ់របស់ទ្រង់ចំពោះខ្ញុំ ។ បន្ទាប់មក នៅពេលខ្ញុំអធិស្ឋានទៅកាន់ព្រះវរបិតាសួគ៌ដើម្បីថ្លែងអំណរគុណ ខ្ញុំមានអារម្មណ៍ថាទទួលបានក្តីស្រឡាញ់ និងការអះអាងថា ទ្រង់ឮការអធិស្ឋានខ្ញុំ ហើយថាខ្ញុំនឹងទទួលបានអ្វីដែលល្អបំផុតសម្រាប់ខ្ញុំ និងអស់អ្នកដែលខ្ញុំស្រឡាញ់ ។ វាពង្រឹងដោយទីបន្ទាល់ខ្ញុំ ។ ( « គូកនយើងជានិច្ច » លីអាហូណា ខែវិច្ឆិកា ឆ្នាំ២០២៣ ទំព័រ ៩៤ )
ប្រសិនបើមាន សូមមើល « Principles of Peace: Gratitude » ( ២:៣២ ) ។
សូមរកមើលវគ្គបទគម្ពីរចំនួនបី ឬច្រើន ដែលជួយអ្នកឲ្យទទួលអារម្មណ៍នៃសេចក្តីស្រឡាញ់របស់ព្រះ នៅពេលអ្នកក្រៀមក្រំចិត្ត ។ សូមដាក់ស្លាកវគ្គបទគម្ពីរនីមួយៗថា « សេចក្តីស្រឡាញ់របស់ព្រះ » « ចំណូលចិត្ត » ឬស្លាកផ្សេងទៀត ។
ឥឡូវត្រូវធ្វើដូចម្តេចទៀត ?
សូមជ្រើសរើសជម្រើសមួយក្នុងចំណោមជម្រើសខាងក្រោម ដើម្បីបង្ហាញពីអំណរគុណរបស់អ្នកចំពោះព្រះវរបិតាសួគ៌ និងព្រះយេស៊ូវគ្រីស្ទ ។ សូមយកចិត្តទុកដាក់ចំពោះសេចក្តីស្រឡាញ់ ដែលអ្នកប្រហែលជាទទួលអារម្មណ៍ពីទ្រង់ទាំងទ្វេ នៅពេលអ្នកធ្វើការណ៍នេះ ។
-
សូមបង្ហាញអំណរគុណរបស់អ្នកចំពោះព្រះវរបិតាសួគ៌ និងព្រះយេស៊ូវគ្រីស្ទ នៅក្នុងការចុះផ្សាយនៅលើប្រព័ន្ធផ្សព្វផ្សាយសង្គម ឬដោយការសរសេរនៅក្នុងសៀវភៅកំណត់ហេតុរបស់អ្នក ។
-
សូមធ្វើបញ្ជីនៃអ្វីៗដែលអ្នកមានអំណរគុណចំពោះ ។ សូមចងចាំថាត្រូវបញ្ចូលអ្វីៗទាំងនោះនៅក្នុងការអធិស្ឋានបន្ទាប់របស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យទទួលអារម្មណ៍ពីសេចក្តីស្រឡាញ់ និងសេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នកបង្ហាញការដឹងគុណចំពោះទ្រង់ទាំងទ្វេ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
បទពិសោធន៍ដែលព្រះអម្ចាស់បានជួយដល់អ្នក ឬអ្នកផ្សេងទៀតតាមរយៈការសាកល្បង ។
-
ការចុះផ្សាយលើប្រព័ន្ធផ្សព្វផ្សាយសង្គមរបស់អ្នក ឬបញ្ជីនៃអ្វីៗដែលអ្នកដឹងគុណដល់ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?