នាងអេសធើរ ៖ មេរៀនទី ៩៥
នាងអេសធើរ ផ្នែកទី ២
« បើខ្ញុំត្រូវស្លាប់ ក៏ស្លាប់ទៅចុះ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ក្នុងនាមជាអ្នកដើរតាមព្រះយេស៊ូវគ្រីស្ទ នៅពេលខ្លះ អ្នកនឹងត្រូវបង្ហាញភាពក្លាហាន ។ នៅក្នុងការប្រឈមមុខនឹងការស្លាប់ នាងអេសធើរបានបង្ហាញភាពក្លាហាន និងបានពឹងផ្អែកលើព្រះអម្ចាស់ ដើម្បីជួយសង្គ្រោះប្រជាជនរបស់នាង ។ មេរៀននេះអាចជួយអ្នកឲ្យធ្វើសកម្មភាពដោយភាពក្លាហាន ដើម្បីធ្វើតាមព្រះឆន្ទៈរបស់ព្រះអម្ចាស់ ។
សិក្សាព្រះគម្ពីរ
ប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) បានចែកចាយដំណើររឿងដូចខាងក្រោម ៖
ពេលកំពុងបម្រើជាកងនាវិកសហរដ្ឋក្នុងសង្គ្រាមលោកលើកទី២ ខ្ញុំបានរៀនអំពីសកម្មភាពក្លាហាន ឧទាហរណ៍អំពីភាពក្លាហាន និងគំរូនៃភាពក្លាហាន ។ ឧទាហរណ៍មួយដែលខ្ញុំមិនអាចបំភ្លេចបាននោះ គឺភាពក្លាហានបែបស្ងាត់ស្ងៀមរបស់នាវិកដែលមានអាយុ១៨ឆ្នាំម្នាក់—ដែលមិនមែនជាសមាជិកយើងទេ—បានអធិស្ឋានដោយគ្មានភាពខ្មាស់អៀន ។ ក្នុងចំណោមបុរស២៥០នាក់នៃកងនាវិកនោះ គាត់ជាបុរសតែម្នាក់គត់ ដែលបានលុតជង្គង់ចុះអធិស្ឋានរាល់យប់ ជិតគ្រែខ្លួន ខណៈដែលពួកអ្នកដែលមិនជឿបានចំអក និងបង្អាប់គាត់ ។ គាត់បានអធិស្ឋានដល់ព្រះ ដោយការឱនក្បាល ។ គាត់ពុំដែលរេរាឡើយ ។ គាត់មិនដែលរអាក់រអួលទេ ។ គាត់មានភាពក្លាហាន ។ ( « Be Strong and of a Good Courage » Liahona ខែឧសភា ឆ្នាំ២០១៤ ទំព័រ ៦៧ )
សូមអានសេចក្តីសង្ខេបខាងក្រោម ឬពិចារណាមើលវីដេអូ « For Such a Time as This » ( ១៣:៤៤ ) ដើម្បីរំឭកពីដំណើររឿងរបស់នាងអេសធើរ ។
នាងអេសធើរបានក្លាយជាអគ្គមហេសីរបស់ស្តេចអ័ហាស៊ូរុសនៃស្រុកពើស៊ី ។ ម៉ាដេកាយ ដែលជាអាណាព្យាបាលរបស់នាងអេសធើរ មិនព្រមក្រាបថ្វាយបង្គំហាម៉ាន ដែលជាទីប្រឹក្សារបស់ស្ដេចឡើយ ។ ហាម៉ានបានខឹង ហើយបានទទួលការអនុញ្ញាតពីស្តេចឲ្យបំផ្លាញពួកសាសន៍យូដាទាំងអស់ក្នុងនគរ ។ ម៉ាដេកាយបានសុំនាងអេសធើរឲ្យស្វែងរកការអន្តរាគមន៍ពីស្តេច ដោយប្រាប់នាងថា ប្រហែលជាព្រះបានដាក់នាងឲ្យនៅក្នុងស្ថានភាពនេះ « សម្រាប់ពេលនេះឯង » ( នាងអេសធើរ ៤:១៤ ) ។
សូមអាន នាងអេសធើរ ៤:១៥–១៧ ហើយរកមើលរបៀបដែលនាងអេសធើរបង្ហាញភាពក្លាហាន នៅពេលនាងរៀបចំខ្លួនដើម្បីចូលគាល់ស្តេច ។
ទោះជាការចូលទៅក្នុងដំណាក់របស់ស្ដេចដោយគ្មានការអញ្ជើញគឺត្រូវដាក់ទោសដល់ស្លាប់ក្ដី ក៏នាងអេសធើរនៅតែដើរចូលដោយភាពក្លាហានដែរ ។ សំណាងល្អ ស្តេចបានសម្រេចព្រះទ័យដើម្បីស្តាប់សំណើរបស់នាងអេសធើរ ( នាងអេសធើរ ៥:១–៤ ) ។ នាងអេសធើរបានពន្យល់ពីស្ថានភាពទាំងទឹកភ្នែក ហើយបានស្នើសុំឲ្យស្តេចបញ្ឈប់ព្រះរាជបញ្ជាឲ្យបំផ្លាញពួកសាសន៍យូដាទៅ ( សូមមើល នាងអេសធើរ ៧:៣–៤; ៨:៣–៦ ) ។
សូមអាន នាងអេសធើរ ៧:៥–៦; ៩–១០ ដើម្បីមើលពីរបៀបដែលស្តេចអ័ហាស៊ូរុសបានឆ្លើយតបនឹងសំណើរបស់នាងអេសធើរ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើនាងអេសធើរបានពង្រឹងភាពក្លាហានរបស់នាងដោយរបៀបណា ?
សូមអានឡើងវិញក្នុង នាងអេសធើរ ៤:១៥–១៧ ហើយបង្កើតស្លាកមួយ ដែលប្រាប់ពីអ្វីដែលនាងអេសធើរ និងសហគមន៍ និងមិត្តភក្តិរបស់នាងបានធ្វើ មុនពេលនាងដើរទៅមុខស្តេចយ៉ាងក្លាហាន ។
ប្រធាន រ័សុល អិម ណិលសុន បានបង្រៀន ៖
គោលលទ្ធិនៃការតមអាហារគឺមានពីបុរាណមក ។ វាត្រូវបានវីរបុរសក្នុងគម្ពីរប៊ីបអនុវត្តតាមចាប់តាំងពីជំនាន់ដើមបំផុត ។ ម៉ូសេ អែសរ៉ា នេហេមា អេសធើរ អេសាយ ដានីយ៉ែល យ៉ូអែល និងមនុស្សដទៃទៀតជាច្រើនបានតមអាហារ និងបានផ្សាយអំពីការតមអាហារ ។ តាមរយៈការសរសេររបស់អេសាយ ព្រះអម្ចាស់បានមានបន្ទូលថា ៖ តើមិនមែនជាការតមអត់យ៉ាងនេះវិញ ដែលយើងពេញចិត្តទេឬអី ? គឺឲ្យដោះច្រវាក់ដែលឯងដាក់គេដោយអំពើអាក្រក់ ឲ្យស្រាយចំណងដែលឯងបានចងគេ ហើយឲ្យអ្នកដែលឯងបានសង្កត់សង្កិនបានរួចចេញទទេ ?
សាវកប៉ុលបានព្រមានដល់ពួកបរិសុទ្ធនៅកូរិនថូសឲ្យ « ប្រគល់ខ្លួនទៅក្នុងការតមអាហារ និងអធិស្ឋាន » ។ ព្រះអង្គសង្គ្រោះផ្ទាល់បានប្រកាសថា រឿងជាក់លាក់ « ពុំបាច់ចេញទៅទេ ប៉ុន្តែដោយការអធិស្ឋាន និងតមអាហារ » ។ ( « Opening the Heavens for Help » Liahona ខែឧសភា ឆ្នាំ២០២០ ទំព័រ ៧៣ )
បទគម្ពីរខាងក្រោមនេះគឺជាឧទាហរណ៍ដែលប្រធាន ណិលសុន បានលើកឡើងនៅក្នុងសុន្ទរកថារបស់លោក ។ សូមអានវគ្គបទគម្ពីរចំនួនបួន ឬច្រើនជាងនេះ ហើយដាក់ស្លាកវាថា « ការតមអាហារ » ។
-
និក្ខមនំ ៣៤:២៨—ម៉ូសេទទួលបានក្រឹត្យវិន័យដប់ប្រការ ។
-
អែសរ៉ា ៨:២១–២៣—អែសរ៉ាស្វែងរកការការពារសម្រាប់ខ្លួនលោក និងគ្រួសាររបស់លោក ។
-
នេហេមា ១:៤—នេហេមាតមអាហារ ក្រោយពីកំផែងក្រុងយេរូសាឡិមបានរលំ ។
-
អេសាយ ៥៨:៦—អេសាយបង្រៀនពីគោលបំណងនៃការតមអាហារ ។
-
ដានីយ៉ែល ៩:៣—ដានីយ៉ែលស្វែងរកជំនួយពីព្រះអម្ចាស់ ។
-
យ៉ូអែល ១:១៤—យ៉ូអែលបង្រៀនប្រជាជនឲ្យទៅកាន់ព្រះវិហារបរិសុទ្ធ និងតមអាហារ ។
-
ម៉ាថាយ ១៧:២១—ព្រះយេស៊ូវពន្យល់ពីតម្រូវការក្នុងការធ្វើការតមអាហារ ដើម្បីធ្វើការព្យាបាលមួយចំនួន ។
-
កូរិនថូសទី ទី១ ៧:១៥—ប៉ុលប្រាប់ពួកកូរិនថូសឲ្យតមអាហារ ។
ដោយផ្អែកលើបទពិសោធន៍របស់អ្នក និងអ្វីដែលអ្នកបានអាន តើអ្នកគិតថា ហេតុអ្វីបានជាការតមអាហារគឺជាផ្នែកមួយដ៏សំខាន់នៃដំណឹងល្អ ?
ជម្រើស ខ
តើវានឹងមានសភាពយ៉ាងដូចម្តេចសម្រាប់ខ្ញុំ ដើម្បីមានភាពក្លាហានដូចជានាងអេសធើរ ?
ខាំមៀល អិន ចនសុន ប្រធានសមាគមសង្គ្រោះទូទៅបានពន្យល់ ៖
នាងអេសធើរគឺជាគំរូដ៏ប្រពៃមួយទៀត នៃការទុកឲ្យព្រះឈ្នះ ។ ជាជាងប្រកាន់ខ្ជាប់នឹងដំណើររឿងដ៏ប្រុងប្រយ័ត្នដើម្បីការពារខ្លួនឯង នាងបានអនុវត្តសេចក្ដីជំនឿ ដោយទុកចិត្តលើព្រះអម្ចាស់ទាំងស្រុង ចំពោះអ្វីដែលនឹងកើតឡើងក្នុងជីវិតនាង ។ …
នាងអេសធើរបានស្ម័គ្រចិត្តអនុញ្ញាតឲ្យព្រះអង្គសង្គ្រោះនិពន្ធដំណើររឿងរបស់នាង ទោះជាតាមទស្សនវិស័យជីវិតរមែងស្លាប់ ទីបញ្ចប់រឿងអាចនឹងយំសោកក្ដី ។ ដោយមានពរជ័យ ស្ដេចបានទទួលនាងអេសធើរ នោះពួកសាសន៍យូដានៅស្រុកពើស៊ីត្រូវបានសង្គ្រោះ ។
ពិតណាស់ យើងកម្រនឹងត្រូវគេសុំឲ្យមានកម្រិតសេចក្ដីក្លាហានដូចនាងអេសធើរណាស់ ។ ប៉ុន្ដែការទុកឲ្យព្រះឈ្នះ ការអនុញ្ញាតឲ្យទ្រង់ធ្វើជាមេផ្តើម ហើយជាមេសម្រេចដំណើររឿងរបស់យើង ពិតជាតម្រូវឲ្យយើងកាន់តាមព្រះបញ្ញត្តិរបស់ទ្រង់ និងសេចក្ដីសញ្ញាដែលយើងបានចុះ ។ គឺតាមរយៈការរក្សាព្រះបញ្ញត្តិ និងសេចក្ដីសញ្ញារបស់យើង ទើបបើកឲ្យមានការប្រាស្រ័យទាក់ទងមួយសម្រាប់យើង ដើម្បីទទួលបានវិវរណៈតាមរយៈព្រះវិញ្ញាណបរិសុទ្ធ ។ ហើយតាមរយៈការបើកសម្ដែងនៃព្រះវិញ្ញាណ ទើបយើងស្គាល់ព្រះហស្ដរបស់លោកចៅហ្វាយ ដែលកំពុងនិពន្ធដំណើររឿងរបស់យើងជាមួយយើង ។ ( « សូមយាងព្រះគ្រីស្ទឲ្យនិពន្ធដំណើររឿងរបស់បងប្អូន » លីអាហូណា ខែវិច្ឆិកា ឆ្នាំ២០២១ ទំព័រ ៨១ )
ប្រសិនបើមាន សូមមើលវីដេអូ « Have Courage and Trusting the Lord » ( ៣:១៨ ) ដើម្បីមើលឧទាហរណ៍សម័យទំនើបអំពីការបង្ហាញភាពក្លាហាន ។
នៅក្នុង នាងអេសធើរ ៤:១៦ នាងអេសធើរប្តេជ្ញាចិត្តដើម្បីបង្ហាញភាពក្លាហាន ។ សូមសរសេរកំណត់ចំណាំមួយនៅក្បែរសេចក្តីថ្លែងការណ៍របស់នាង ដែលបង្ហាញពីរបៀបដែលអ្នកនឹងបង្ហាញភាពក្លាហាន ។ សូមពិចារណាប្រើពាក្យរបស់នាងអេសធើរ ធ្វើជាគំរូសម្រាប់សេចក្តីថ្លែងការណ៍របស់អ្នក ។
-
ដូច្នេះហើយ ខ្ញុំនឹង ( សកម្មភាពដែលអ្នកចង់ធ្វើដើម្បីបង្ហាញភាពក្លាហាន ) ៖ ហើយប្រសិនបើ ( ផលវិបាកដែលអាចកើតមាន ) ខ្ញុំ ( អ្វីមួយដែលអ្នកនឹងធ្វើដើម្បីពឹងផ្អែកលើព្រះអម្ចាស់ ) ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យធ្វើសកម្មភាពដោយភាពក្លាហាន ដើម្បីធ្វើតាមព្រះឆន្ទៈរបស់ព្រះអម្ចាស់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
វគ្គបទគម្ពីរមួយដែលអ្នកបានដាក់ស្លាកថា « ការតមអាហារ » និងអ្វីដែលអ្នកបានរៀនអំពីសារៈសំខាន់របស់វា ។
-
កំណត់ចំណាំដែលអ្នកបានសរសេរនៅជាប់នឹង ខទី ១៦ ( ប្រសិនបើរឿងនេះជារឿងផ្ទាល់ខ្លួនពេក សូមពិចារណាធ្វើជម្រើសផ្សេង ) ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?