និក្ខមនំ ១–៦; មេរៀនទី ៣៩
និក្ខមនំ ២–៤
« យើងនឹងនៅជាមួយនឹងមាត់ឯង »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅពេលយើងប្រឈមមុខនឹងការលំបាក ព្រះអម្ចាស់នឹងដឹកនាំយើងដោយសេចក្តីស្រឡាញ់ តាមរយៈពួកព្យាការីរបស់ទ្រង់ ។ នៅក្រោមរជ្ជកាលរបស់ផារ៉ោន កូនចៅអ៊ីស្រាអែលបានពុះពារក្នុងសេវកភាព ហើយបានអំពាវនាវដល់ព្រះអម្ចាស់ ។ ព្រះអម្ចាស់បានឮការអំពាវនាវរបស់ពួកគេ ហើយបានហៅម៉ូសេ ដែលជាព្យាការីឲ្យជួយពួកគេ ។ មេរៀននេះអាចជួយអ្នកឲ្យទុកចិត្ត និងធ្វើតាមព្យាការីដែលនៅរស់របស់ព្រះអម្ចាស់ ។
សិក្សាព្រះគម្ពីរ
គេឧស្សាហ៍ដកស្រង់ ឬលើកឡើងអំពីព្យាការីម៉ូសេនៅក្នុងព្រះគម្ពីរណាស់ ។ នីហ្វៃបានក្រើនរំឭកពួកបងប្រុសរបស់លោកឲ្យ « មានកម្លាំងខ្លាំងដូចលោកម៉ូសេ » ( នីហ្វៃទី១ ៤:២ ) ។ ព្រះអម្ចាស់បានរៀបចំ និងហៅម៉ូសេជាព្យាការី ដើម្បីជួយរំដោះពួកសាសន៍អ៊ីស្រាអែល ។
អែលឌើរ អាឡែន ឌី ហៃនី នៃពួកចិតសិបនាក់ បានពន្យល់ ៖
ព្យាការីគឺជាមនុស្សម្នាក់ដែលព្រះបានរៀបចំ បានហៅ បានកែតម្រូវ បានបំផុសគំនិត បានបន្ទោស បានបន្សុទ្ធ និងបានគាំទ្រដោយផ្ទាល់ ។ ( « ព្យាការីដែលនៅរស់សម្រាប់ថ្ងៃចុងក្រោយ » លីអាហូណា ខែឧសភា ឆ្នាំ២០២៣ ទំព័រ២៥ )
-
និក្ខមនំ ២:១–៦
-
និក្ខមនំ ២:១០
-
និក្ខមនំ ៣:១–៦
បរិបទ ។ ការបកប្រែដោយ យ៉ូសែប ស្ម៊ីធ នៃ និក្ខមនំ ៣:២ ផ្លាស់ប្ដូរឃ្លា « ទេវតានៃព្រះយេហូវ៉ា » ទៅជា « វត្តមាននៃព្រះអម្ចាស់ » ។ នោះគឺជាព្រះយេស៊ូវគ្រីស្ទ [ ព្រះយេហូវ៉ា ] នៅក្នុងសណ្ឋានមុនព្រះជន្មលើផែនដីរបស់ទ្រង់ ដែលបានយាងមកជួប និងមានបន្ទូលជាមួយម៉ូសេ ។
សូមគិតពីរបៀបដែលរឿងទាំងនេះបានជួយម៉ូសេឲ្យរៀបចំខ្លួន ដើម្បីជួយរំដោះកូនចៅអ៊ីស្រាអែលពីផារ៉ោន ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក ឥឡូវត្រូវធ្វើដូចម្តេចទៀត ? នៅចុងបញ្ចប់នៃមេរៀននេះ ។
ជម្រើស ក
តើពាក្យសម្ដីរបស់ព្យាការីភ្ជាប់ខ្ញុំទៅនឹងព្រះយេស៊ូវគ្រីស្ទយ៉ាងដូចម្តេច ?
នៅក្នុង និក្ខមនំ ៤:១៥ ព្រះអម្ចាស់បានសន្យាថា ទ្រង់នឹងប្រទានព្រះបន្ទូលរបស់ទ្រង់ដល់ម៉ូសេ ។ ការណ៍នេះជួយយើងឲ្យឃើញថា ព្រះអម្ចាស់ថ្លែងព្រះបន្ទូលរបស់ទ្រង់តាមរយៈព្យាការីរបស់ទ្រង់ ។
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានចែកចាយ ៖
ព្យាការីពុំឈរនៅចន្លោះរវាងបងប្អូន និងព្រះអង្គសង្គ្រោះទេ ។ ផ្ទុយទៅវិញ លោកឈរនៅក្បែរបងប្អូន ហើយចង្អុលបង្ហាញផ្លូវឆ្ពោះទៅរកព្រះអង្គសង្គ្រោះ ។ ( « The Prophet of God » Liahona ខែឧសភា ឆ្នាំ២០១៨ ទំព័រ ២៧ )
សូមជញ្ជឹងគិតពីរបៀបដែលការដឹងពីរឿងនេះអំពីព្យាការី ជួយអ្នកទុកចិត្តលើការដឹកនាំរបស់ពួកលោក ។
ជម្រើស ខ
តើខ្ញុំអាចពង្រឹងទីបន្ទាល់របស់ខ្ញុំដោយរបៀបណាថា ព្រះអម្ចាស់ដឹកនាំព្យាការីរបស់ទ្រង់ ?
ព្រះបរមងារមួយរបស់ព្រះយេស៊ូវគ្រីស្ទគឺ « យើងជាព្រះដ៏ជាព្រះ » ( និក្ខមនំ ៣:១៤ ) ។ វាមានឫសពាក្យដូចគ្នានឹងព្រះយេស៊ូវដែរ ។ ពាក្យនេះបកប្រែថា « ទ្រង់ជាព្រះដ៏ជាព្រះ » ឬ « ពិតជាមានព្រះជន្មនៅ » ( Bible Dictionary « Jehovah » ) ។ តួនាទីមួយក្នុងចំណោមតួនាទីជាច្រើនរបស់ព្យាការី គឺដើម្បីថ្លែងទីបន្ទាល់ថា ពិតជាមានព្រះគ្រីស្ទ ហើយថាទ្រង់ស្រឡាញ់យើង ។ ហេតុអ្វីបានជាវាមានអត្ថប្រយោជន៍ក្នុងការដឹងថា ពិតជាមានព្រះអម្ចាស់ ហើយទ្រង់មានវត្តមានគង់នៅជានិច្ច ?
ប្រធាន រ័សុល អិម ណិលសុន បានប្រកាស ៖
ព្រះអម្ចាស់ព្រះយេស៊ូវគ្រីស្ទ ដែលសាសនាចក្រនេះគឺជារបស់ទ្រង់ ចាត់តាំងពួកព្យាការី និងពួកសាវកឲ្យចែកចាយសេចក្ដីស្រឡាញ់របស់ទ្រង់ ហើយបង្រៀនក្រឹត្យវិន័យរបស់ទ្រង់ ។ …
សូមទូលសួរដល់ព្រះវរបិតាសួគ៌របស់បងប្អូន ថាបើពួកយើងពិតជាសាវក និងព្យាការីរបស់ព្រះអម្ចាស់មែនឬទេ ។ សូមទូលសួរថាតើយើងបានទទួលវិវរណៈអំពីរឿងនេះ និងរឿងផ្សេងទៀតដែរឬទេ ។ ( « The Love and Laws of God » [ ការប្រជុំធម្មនិដ្ឋាននៅសាកលវិទ្យាល័យ ព្រិកហាំ យ៉ង់ ថ្ងៃ១៧ ខែកញ្ញា ឆ្នាំ២០១៩ ] ទំព័រ៣, ៥ នៅលើគេហទំព័រ speeches.byu.edu )
សូមពិចារណាពីទីបន្ទាល់ផ្ទាល់ខ្លួនរបស់អ្នកអំពីព្យាការីរបស់ព្រះអម្ចាស់ ។
ឥឡូវត្រូវធ្វើដូចម្តេចទៀត ?
សូមអាន និក្ខមនំ ៤:៣០–៣១ ហើយរកមើលរបៀបដែលប្រជាជនបានឆ្លើយតបនឹងព្រះបន្ទូលរបស់ព្រះអម្ចាស់តាមរយៈព្យាការីរបស់ទ្រង់ ។
ប្រធាន អិម រ័សុល បាឡឺដ ( ឆ្នាំ១៩២៨–២០២៣ ) ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ ៖
នៅពេលយើងស្ដាប់ដំបូន្មានរបស់ព្រះអម្ចាស់ ដែលបង្ហាញតាមរយៈប្រសាសន៍របស់ប្រធាននៃសាសនាចក្រ នោះការឆ្លើយតបរបស់យើងគួរតែវិជ្ជមាន និងឆាប់រហ័ស ។ ( « His Word Ye Shall Receive » Ensign ខែឧសភា ឆ្នាំ២០០១ ទំព័រ៦៥ )
សូមស្វែងរកសារលិខិតបច្ចុប្បន្នមកពីព្យាការី និងពួកសាវក ( ការចុះផ្សាយតាមប្រព័ន្ធផ្សព្វផ្សាយសង្គម សុន្ទរកថាសន្និសីទទូទៅ និងផ្សេងៗទៀត ) ។ សូមស្វែងរកការបង្រៀននានាដែលមានសារៈសំខាន់ចំពោះអ្នក ។ សូមចែកចាយការបង្រៀននោះជាមួយមនុស្សជាទីស្រឡាញ់ ។ សូមពន្យល់ពីរបៀបដែលវាបំផុសគំនិតអ្នកឲ្យទុកចិត្ត និងធ្វើតាមព្យាការីដែលនៅរស់របស់ព្រះអម្ចាស់ ។
-
ការអនុវត្តតាមដំបូន្មានជាក់លាក់របស់ព្យាការីមកពីសុន្ទរកថាសន្និសីទទូទៅថ្មីៗនេះ ។
-
ការសិក្សាប្រសាសន៍ទាំងឡាយរបស់ពួកព្យាការីកាន់តែញឹកញាប់ ដូចជាការស្តាប់សុន្ទរកថាសន្និសីទទូទៅរាល់ព្រឹក ខណៈពេលរៀបចំខ្លួនទៅសាលារៀន ។
-
ការបង្កើតផែនការសិក្សាសុន្ទរកថាសន្និសីទទូទៅថ្មីៗបំផុតរបស់សមាជិកម្នាក់ៗក្នុងគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។ ( ប្រសិនបើអ្នកមានលទ្ធភាពប្រើឌីជីថល អ្នកអាចប្រើមុខងារ ផែនការសិក្សា នៅលើកម្មវិធីបណ្ណាល័យដំណឹងល្អបាន ) ។
ជាផ្នែកមួយនៃផែនការរបស់អ្នក សូមកត់ត្រានូវឧបសគ្គដែលអ្នកគិតថា អ្នកអាចនឹងប្រឈមមុខ ។ សម្រាប់ឧបសគ្គនីមួយៗ សូមសរសេរពីរបៀបដែលអ្នកអាចនឹងយកឈ្នះលើឧបសគ្គនោះបាន ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យទុកចិត្ត និងធ្វើតាមព្យាការីដែលនៅរស់របស់ព្រះអម្ចាស់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ផែនការរបស់អ្នកដើម្បីស្ដាប់ ហើយអនុវត្តព្រះបន្ទូលរបស់ព្រះអម្ចាស់តាមរយៈពួកព្យាការីរបស់ទ្រង់នៅក្នុងជីវិតរបស់អ្នកផ្ទាល់ ។
-
ឃ្លា ឬការបង្រៀនដែលអ្នកបានរកឃើញមកពីព្យាការី និងពួកសាវក ។ សូមពន្យល់ពីរបៀបដែលវាបំផុសគំនិតអ្នកឲ្យធ្វើតាមព្យាការី ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?