« ម៉ូសេ ៧:១–២១—‹ ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន › » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
ម៉ូសេ ៧ ៖ មេរៀនទី ១៦
ម៉ូសេ ៧:១–២១
« ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន »
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅក្នុងប្រវត្តិសាស្រ្តទាំងមូល មនុស្សបានព្យាយាមស្ថាបនាសង្គម ដែលគ្មានភាពក្រីក្រ ឬអំពើហិង្សា ។ ព្រះអម្ចាស់បានហៅសង្គមបែបនេះថា ស៊ីយ៉ូន ( សូមមើល ម៉ូសេ ៧:១៨ ) ។ ប្រហែលជារបៀបដ៏ល្អបំផុតដើម្បីសង់ក្រុងស៊ីយ៉ូន គឺត្រូវចាប់ផ្ដើមនៅក្នុងជីវិតរបស់យើងផ្ទាល់ ។ មេរៀននេះអាចជួយអ្នកឲ្យអភិវឌ្ឍគុណលក្ខណៈដូចជាព្រះគ្រីស្ទ ដែលហេណុក និងប្រជាជនរបស់លោកមាន ។
សិក្សាព្រះគម្ពីរ
ដើមឈើខ្ពស់ជាងគេបំផុតនៅលើពិភពលោក គឺដើមរេដវូដ ។ វាអាចលូតបានដល់កម្ពស់ជាង ៣០០ ហ្វីត ( ៩២ ម៉ែត្រ ) ។
សូមកត់សម្គាល់កម្ពស់របស់ស្ត្រីនៅក្នុងរូបភាពនេះ ប្រៀបធៀបទៅនឹងដើមរេដវូដ ។
គួរឲ្យភ្ញាក់ផ្អើល ឫសដើមរេដវូដមានជម្រៅត្រឹមតែ ៣–៦ ហ្វីត ( ១–២ ម៉ែត្រ ) ប៉ុណ្ណោះ ។ ទោះជាយ៉ាងណាក៏ដោយ ឫសទាំងនេះបានលាតសន្ធឹងជាច្រើនរយហ្វីត ( លើសពី១០០ម៉ែត្រ ) ហើយបានប្រទាក់ជាប់នឹងឫសនៃដើមឈើផ្សេងៗទៀត ។ ការចាក់ឫសភ្ជាប់គ្នានេះហើយ ធ្វើឲ្យដើមរេដវូដឈរយ៉ាងរឹងមាំរយៈពេលរាប់រយឆ្នាំតទល់នឹងខ្យល់ និងទឹកជំនន់ ( សូមមើល រីឆាត អេក វីងគ្លីល « Web of Friendship » New Era ខែសីហា ឆ្នាំ២០០៣ ទំព័រ១០–១១ ) ។
សូមចំណាយពេលមួយនាទី ហើយគិតអំពីគ្រួសារ វួដ ឬសាខារបស់អ្នក ។ តើពួកគេអាចប្រៀបធៀបទៅនឹងដើមរេដវូដយ៉ាងដូចម្តេច ? តើមនុស្សនៅជុំវិញអ្នកអាចជួយអ្នកឲ្យចូលទៅកាន់តែជិតព្រះអង្គសង្គ្រោះដោយរបៀបណា ?
នៅពេលអ្នកសិក្សា សូមឆាប់ដឹងពីចំណាប់អារម្មណ៍ដែលមកពីព្រះវិញ្ញាណបរិសុទ្ធ ។ ទ្រង់អាចបង្រៀនអ្នកពីរបៀបដើម្បីបង្កើនកម្លាំង ដែលអ្នកទទួលអារម្មណ៍ពីព្រះ និងពីមនុស្សជុំវិញអ្នក ។
កម្លាំងនៅស៊ីយ៉ូន
នៅក្នុងការនិមិត្តមួយ ព្រះអម្ចាស់បានហៅព្យាការីហេណុកឲ្យផ្សាយអំពីការប្រែចិត្ត និងពិធីបុណ្យជ្រមុជទឹកទៅកាន់ទីក្រុងមួយចំនួន ។ ប្រជាជនដែលបានដើរតាមហេណុក បានមកជួបជុំគ្នា ។
សូមអាន ម៉ូសេ ៧:១៣, ១៦–១៧ ដោយស្វែងរកភាពផ្ទុយគ្នារវាងប្រជាជនដែលកំពុងព្យាយាមធ្វើតាមព្រះអម្ចាស់ និងប្រជាជនដែលបានប្រឆាំងនឹងពួកគេ ។
តើអ្នកស្ងើចសរសើរអ្វីខ្លះ អំពីពរជ័យដែលព្រះអម្ចាស់បានប្រទានដល់ប្រជាជន ដែលបានព្យាយាមដើរតាមទ្រង់ ?
ដើម្បីយល់កាន់តែច្បាស់អំពីអ្វីដែលធ្វើឲ្យប្រជាជនរបស់ព្រះអម្ចាស់ខុសប្លែកពីគេនោះ សូមអាន ម៉ូសេ ៧:១៨–២១ ។ អ្នកអាចគូសសម្គាល់បុគ្គលិកលក្ខណៈដែលប្រជាជនរបស់ព្រះអម្ចាស់មាន ។ ( កំណត់ចំណាំ ៖ វាអាចមានប្រយោជន៍ក្នុងការដឹងថា ការ ត្រូវបណ្តាសា មានន័យថា ការត្រូវបានបង្ខាំងពីពរជ័យដោយសារតែភាពទុច្ចរិត ។ សូមមើល « បណ្តាសា បណ្តាសាទាំងឡាយ » នៅក្នុងសេចក្ដីណែនាំដល់បទគម្ពីរទាំងឡាយ ) ។
ម៉ូសេ ៧:១៨ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាដាក់ស្លាកវគ្គបទគម្ពីរចំណេះចំណានខាងគោលលទ្ធិ ជាមួយនឹងប្រធានបទដែលវាបង្រៀន ដើម្បីអ្នកអាចងាយនឹងរកវាឃើញនៅពេលក្រោយ ។ ឃ្លាបទគម្ពីរគន្លឹះសម្រាប់ ម៉ូសេ ៧:១៨ គឺ « ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន ពីព្រោះពួកគេមានចិត្តតែមួយ និងគំនិតតែមួយ » ។ សូមហាត់ទន្ទេញឃ្លាបទគម្ពីរគន្លឹះ និងសេចក្ដីយោង ដោយការអានវាឮៗបីបួនដង ។ រាល់ពេលដែលអ្នកអាន សូមបាំងពីរបីពាក្យ ។ សូមមើលថា តើនៅទីបំផុត អ្នកអាចបាំងពាក្យទាំងអស់បានដែរឬទេ ។
នៅពេលមនុស្សមួយក្រុមអភិវឌ្ឍបុគ្គលិកលក្ខណៈទាំងនេះ នោះព្រះអម្ចាស់ប្រទានពរជ័យដល់ពួកគេ ( សូមមើល នីហ្វៃទី៤ ) ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។
ជម្រើស ក
តើខ្ញុំអាចស្ថាបនាសាមគ្គីភាពជាមួយអ្នកដទៃតាមរបៀបណា ?
-
តើអ្នកគិតថា វាមានលក្ខណៈបែបណាដើម្បីមានសាមគ្គីភាពជាមួយអ្នកដទៃ ?
-
ហេតុអ្វីបានជាវាអាចជារឿងពិបាកដើម្បីស្ថាបនាសាមគ្គីភាព ?
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានចែកចាយ ៖
ពួកយើងចម្រុះគ្នាច្រើន ហើយជួនកាលយើងមិនចុះសម្រុងគ្នា ពុំអាចមករួមគ្នាតែមួយតាមមូលដ្ឋានគ្រឹះផ្សេង ឬនៅក្រោមឈ្មោះផ្សេងនោះទេ ។ … មានតែនៅក្នុង និងតាមរយៈភាពស្មោះត្រង់ និងសេចក្តីស្រឡាញ់របស់យើងម្នាក់ៗចំពោះព្រះយេស៊ូវគ្រីស្ទប៉ុណ្ណោះ ទើបយើងអាចមានសង្ឃឹមថា រួមមកតែមួយបាន ។ ( « រួមមកតែមួយនៅក្នុងព្រះគ្រីស្ទ » លីអាហូណា ខែឧសភា ឆ្នាំ២០២៣ ទំព័រ៧៨–៧៩ )
តើអ្នកគិតថា សេចក្ដីស្រឡាញ់របស់យើងចំពោះព្រះយេស៊ូវគ្រីស្ទ ជួយយើងឲ្យមានសាមគ្គីភាពកាន់តែខ្លាំងជាមួយអ្នកដទៃយ៉ាងដូចម្ដេច ?
សូមគិតអំពីរបៀបដែលអ្នកអាចកាន់តែមានសាមគ្គីភាពជាមួយអ្នកដទៃ ។ នេះអាចជាគ្រួសាររបស់អ្នក សមាជិកសាសនាចក្រ ឬអ្នកដទៃ ។ សូមជ្រើសរើសរឿងមួយ ដែលអ្នកអាចធ្វើបាននៅថ្ងៃនេះ ហើយរៀបចំផែនការដើម្បីធ្វើវា ។
ជម្រើស ខ
តើខ្ញុំអាចធ្វើតាមគំរូដ៏សុចរិតរបស់ព្រះយេស៊ូវគ្រីស្ទដោយរបៀបណា ?
សេចក្តីសុចរិតគឺជាលក្ខណៈដូចព្រះគ្រីស្ទ ដែលរួមមាន « យុត្តិធម៌ បរិសុទ្ធ គុណធម៌ ស្មោះត្រង់ ប្រកបដោយការគោរពតាមព្រះបញ្ញត្តិទាំងឡាយរបស់ព្រះ ប្រកបដោយការចៀសវាងពីអំពើបាប » ( សេចក្ដីណែនាំដល់បទគម្ពីរទាំងឡាយ « សុចរិត សេចក្តីសុចរិត » បណ្ណាល័យដំណឹងល្អ ) ។
ប្រធាន រ័សុល អិម ណិលសុន បានចែកចាយពីរបៀបដែលព្រះអង្គសង្គ្រោះប្រទានពរដល់យើង នៅពេលយើងព្យាយាមធ្វើជាមនុស្សសុចរិត ។
នៅពេលយើងព្យាយាមរស់នៅតាមក្រឹត្យវិន័យកាន់តែខ្ពស់របស់ព្រះយេស៊ូវគ្រីស្ទ នោះដួងចិត្ត និងធម្មជាតិជាមនុស្សរបស់យើងនឹងចាប់ផ្តើមផ្លាស់ប្តូរ ។ ព្រះអង្គសង្គ្រោះ លើក យើងឡើងផុតពីឥទ្ធិពលនៃពិភពលោកដ៏ធ្លាក់នេះ ដោយប្រទានពរដល់យើងឲ្យមានសេចក្តីសប្បុរស ភាពរាបសា ចិត្តល្អ ចេះលត់ដំខ្លួន មានភាពសុខសាន្ត និង សេចក្តីសម្រាក ។ ( « ឈ្នះលោកិយ ហើយបានសេចក្តីសម្រាក » លីអាហូណា ខែវិច្ឆិកា ឆ្នាំ២០២២ ទំព័រ៩៧ )
ហេតុអ្វីវាគឺជាពរជ័យមួយ ពេលរស់នៅជាមួយមនុស្សដែលព្យាយាមរស់នៅដូចជាប្រជាជនរបស់ហេណុក ? តើការសម្រេចចិត្តមិនសុចរិតអាចមានឥទ្ធិពលដល់ទំនាក់ទំនងរបស់យើងយ៉ាងដូចម្ដេច ?
សូមគិតអំពីអ្វីដែលអ្នកអាចធ្វើបាន ដើម្បីកាន់តែមានភាពសុចរិត ។ សូមជ្រើសរើសកិច្ចការមួយ ហើយដាក់ផែនការដើម្បីធ្វើវា មុនពេលអ្នកចូលគេងនៅយប់នេះ ។
ជម្រើស គ
តើខ្ញុំអាចធ្វើតាមព្រះអម្ចាស់ និងថែទាំដល់អ្នកក្រីក្រដោយរបៀបណា ?
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានចែកចាយដូចខាងក្រោមនេះ ៖
នៅពេលយើងខិតខំធ្វើតាមបុព្វហេតុនៃទីក្រុងស៊ីយ៉ូន យើងម្នាក់ៗគួរតែពិចារណាដោយការអធិស្ឋានថា តើយើងកំពុងធ្វើ … អ្វីៗទាំងអស់ដែលគាប់ព្រះទ័យនៅក្នុងព្រះនេត្រព្រះអម្ចាស់ចំពោះជនក្រីក្រ និងខ្វះខាតដែរឬទេ ។ ( « Come to Zion » Liahona ខែវិច្ឆិកា ឆ្នាំ២០០៨ ទំព័រ៣៩ )
ក្រៅពីខាងហិរញ្ញវត្ថុ តើមនុស្សក្រីក្រ ឬអ្នកខ្វះខាតត្រូវការអ្វីខ្លះទៀត ? តើព្រះអម្ចាស់អាចសព្វព្រះទ័យឲ្យអ្នកថែទាំនរណាម្នាក់ដែលនៅក្នុងស្ថានភាពបែបនេះយ៉ាងដូចម្តេច ?
សូមគិតអំពីអ្វីដែលអ្នកអាចធ្វើបាននៅថ្ងៃនេះ ដើម្បីជួយបុត្រាបុត្រីរបស់ព្រះអម្ចាស់ម្នាក់ ឬច្រើននាក់ ។ សូមដាក់ផែនការដើម្បីធ្វើវា មុនចុងបញ្ចប់នៅថ្ងៃនេះ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យអភិវឌ្ឍគុណលក្ខណៈដូចជាព្រះគ្រីស្ទ ដែលហេណុក និងប្រជាជនរបស់លោកមាន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
បុគ្គលិកលក្ខណៈនៃស៊ីយ៉ូន ដែលអ្នកបានជ្រើសរើសដើម្បីអភិវឌ្ឍ រួមទាំងអ្វីដែលអ្នកដាក់ផែនការដើម្បីធ្វើនៅថ្ងៃនេះផងដែរ ។
-
បុគ្គលិកលក្ខណៈមួយដែលអ្នកបានសិក្សា រួមទាំងរបៀបដែលបុគ្គលិកលក្ខណៈនេះអាចជួយអ្នក និងអ្នកដទៃឲ្យក្លាយដូចជាប្រជាជននៃក្រុងស៊ីយ៉ូនផងដែរ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?