« ម៉ូសេ ៦:១–៣៩——ការហៅរបស់ហេណុក » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
លោកុប្បត្តិ ៥; ម៉ូសេ ៦ ៖ មេរៀនទី ១៣
ម៉ូសេ ៦:១–៣៩
ការហៅរបស់ហេណុក
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ហេណុកបានមានអារម្មណ៍ថាមិនល្អគ្រប់គ្រាន់ នៅពេលលោកត្រូវបានហៅឲ្យផ្សព្វផ្សាយអំពីការប្រែចិត្តទៅកាន់ប្រជាជនទុច្ចរិតមួយក្រុម ។ ព្រះអម្ចាស់បានពង្រឹងលោកឲ្យសម្រេចនូវអ្វីដែលលោកគិតថា លោកមិនអាចធ្វើបាន ។ មេរៀននេះអាចជួយអ្នកឲ្យមានអារម្មណ៍ជឿជាក់លើព្រះអម្ចាស់ និងព្រះចេស្ដារបស់ទ្រង់ក្នុងការជួយដល់អ្នក និងពង្រឹងអ្នក ។
សិក្សាព្រះគម្ពីរ
តើអ្នកធ្លាប់មានអារម្មណ៍ថា ព្រះវរបិតាសួគ៌ប្រទានកម្លាំងឲ្យអ្នកធ្វើកិច្ចការបានច្រើនជាងអ្វីដែលអ្នកគិតថា អ្នកអាចធ្វើបានដោយខ្លួនឯងដែរឬទេ ? តើអ្នកធ្លាប់ឮពីអ្នកដទៃដែលទទួលបានកម្លាំងបែបនេះមកពីព្រះដែរឬទេ ?
ផ្ទុយទៅវិញ តើអ្នកធ្លាប់មានគំនិតដូចជា « ខ្ញុំមិនអាចធ្វើបានទេ » ឬ « វាពិបាកខ្លាំងណាស់ » ដែរឬទេ ? ហេតុអ្វីបានជាអ្នកគិតថា យើងមានអារម្មណ៍ទាំងនេះថាខ្លួនឯងមិនល្អគ្រប់គ្រាន់ ?
ប្រធាន ហែនរី ប៊ី អាវរិង នៃគណៈប្រធានទីមួយ បានពន្យល់ ៖
អ្នកនឹងមានពេលខ្លះ ដែលអ្នកនឹងមានអារម្មណ៍ថាសន្ធប់ ។ វិធីមួយក្នុងចំណោមវិធីដែលអ្នកនឹងរងការវាយប្រហារ គឺជាមួយនឹងអារម្មណ៍ថា អ្នកមិនល្អគ្រប់គ្រាន់នោះទេ ។ មែនហើយ អ្នកមិនល្អគ្រប់គ្រាន់ដើម្បីឆ្លើយតបការហៅឲ្យធ្វើជាអ្នកតំណាងព្រះ ដោយប្រើតែអំណាចរបស់ខ្លួនឯងផ្ទាល់នោះទេ ។ ប៉ុន្ដែអ្នកមានសិទ្ធិប្រើសមត្ថភាពដែលលើសពីសមត្ថភាពធម្មជាតិរបស់អ្នក ហើយអ្នកមិនធ្វើការតែម្នាក់ឯងនោះទេ ។ ( « Rise to Your Call » Liahona ខែវិច្ឆិកា ឆ្នាំ២០០២ ទំព័រ៧៦ )
ប៉ុន្មានជំនាន់ក្រោយបន្ទាប់ពីលោកអ័ដាម កូនចៅជំនាន់ក្រោយរបស់លោកម្នាក់ដែលមានឈ្មោះថាហេណុក បានរស់នៅក្នុងចំណោមប្រជាជនដ៏ទុច្ចរិត និងមានចិត្តរឹងរូស ។
សូមអាន ម៉ូសេ ៦:២៦–២៨ ។ សូមគូសសម្គាល់ពាក្យ ឬឃ្លាទាំងឡាយដែលពិពណ៌នាពីប្រជាជនដែលហេណុក ត្រូវបានហៅឲ្យបង្រៀន ។
ប្រសិនបើអ្នកជាហេណុកវិញ តើអ្នកមានអារម្មណ៍យ៉ាងណាដែរ ? ហេតុអ្វី ?
ទោះបីជាហេណុកបានមានអារម្មណ៍ថាលើសលប់ដោយសារការហៅរបស់គាត់ក្ដី ក៏ « គាត់បានដើរជាមួយនឹងព្រះ » ដែរ ( សូមមើល ម៉ូសេ ៦:៣៧–៣៩ ) ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។
ជម្រើស ក
តើខ្ញុំជាមនុស្សតែម្នាក់គត់ដែលមានអារម្មណ៍លើសលប់ និងបាក់ទឹកចិត្តមែនទេ ?
ពួកសិស្ស និងពួកព្យាការីជាច្រើនរបស់ព្រះ ដូចជាហេណុកជាដើម បានមានអារម្មណ៍ថាលើសលប់ដោយសារអ្វីដែលព្រះបានសុំឲ្យពួកលោកធ្វើ ។
សូមអាន ម៉ូសេ ៦:៣១ ហើយរកមើលការឆ្លើយតបរបស់ហេណុកចំពោះការហៅរបស់លោក ។ អ្នកអាចដាក់ស្លាកវគ្គបទគម្ពីរនេះជាមួយអារម្មណ៍ដែលអ្នកគិតថា លោកអាចមាន ដូចជា « លើសលប់ » ឬ « មិនល្អគ្រប់គ្រាន់ » ។
សូមស្រមៃថា អ្នកទើបតែទទួលបានការហៅមកពីព្រះ ដូចហេណុកបានទទួលដែរ ។ សូមអាន ម៉ូសេ ៦:៣២–៣៤ ហើយគូសសម្គាល់ពាក្យ ឬឃ្លាដែលអ្នកគិតថា នឹងបង្កើនទំនុកចិត្តរបស់អ្នក ។
សូមសិក្សាដំណើររឿងពីរ ខាងក្រោមនេះ ។ អ្នកអាចដាក់ស្លាកវគ្គបទគម្ពីរទាំងនេះជាមួយអារម្មណ៍ដែលអ្នកគិតថា មនុស្សម្នាក់ៗអាចមាននៅពេលនោះ ។
-
នីហ្វៃ និងគ្រួសាររបស់លោក ( នីហ្វៃទី១ ៥:៧–៨; ៧:១៦–១៨; ១៧:១–៣; ១៨:១–៤ )
-
អាលម៉ាជាឪពុក ( ម៉ូសាយ ២៤:១០–២២ )
-
យ៉ូសែប ស្ម៊ីធ ( គោលលទ្ធិ និងសេចក្តីសញ្ញា ១២១:១–១០; ១២២:៧–៩ )
ប្រសិនបើមាន សូមមើលវីដេអូ « Becoming True Millennials » ចាប់ពីនាទីទី ៩:០៥ ដល់ ១២:២៩ ។
សូមសរសេរកំណត់ចំណាំមួយនៅជាប់នឹង ម៉ូសេ ៦:៣១ ជាមួយនឹងចម្លើយរបស់អ្នកចំពោះសំណួរខាងក្រោមនេះ ៖
-
តើការដឹងថា អ្នកដទៃបានយកឈ្នះលើអារម្មណ៍នៃភាពមិនល្អគ្រប់គ្រាន់ ដោយការងាកទៅរកព្រះគ្រីស្ទ ជួយពង្រឹងអ្នកយ៉ាងដូចម្តេច ?
ជម្រើស ខ
តើព្រះអាចជួយខ្ញុំឲ្យសម្រេចបានអ្វីដែលមិនអាចធ្វើទៅបានដោយរបៀបណា ?
ម៉ូសេ ៦:៣១–៣៤ បង្ហាញពីរបៀបដែលហេណុកបានឆ្លើយតបទៅនឹងការហៅរបស់លោកជាលើកដំបូង ។ សូមគូសសម្គាល់កង្វល់នីមួយៗរបស់ហេណុកដោយពណ៌ ឬរចនាប័ទ្មមួយ ហើយគូសសម្គាល់ការអញ្ជើញ ឬការសន្យានីមួយៗរបស់ព្រះអម្ចាស់ដោយពណ៌ ឬរចនាប័ទ្មមួយទៀត ។
ដូចជាហេណុកដែរ អ្នកអាចមានអារម្មណ៍ថាលើសលប់ ដោយសារអ្វីដែលព្រះអម្ចាស់បានសុំឲ្យអ្នកធ្វើ ។ សេចក្តីថ្លែងការណ៍ខាងក្រោមមកពីគណៈប្រធានទីមួយ អាចផ្តល់នូវការលួងលោម ៖
ប្រហែលជាមានពេលខ្លះអ្នកមិនមានអារម្មណ៍រឹងមាំ ឬមានសមត្ថភាពឡើយ ។ នោះជារឿងធម្មតាទេ ។ ជាពិសេសនៅក្នុងគ្រាទាំងនោះ សូមងាកទៅរកព្រះអង្គសង្រ្គោះ ។ ទ្រង់គឺជា « កម្លាំងនៃយុវជន » ។ ( « សារលិខិតមកពីគណៈប្រធានទីមួយ » ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ទំព័រ២ )
អ្នកក៏អាចទទួលបានការលួងលោមមកពីប្រសាសន៍របស់អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ផងដែរ ៖
ខ្ញុំជឿថា ព្រះអង្គសង្រ្គោះព្រះយេស៊ូវគ្រីស្ទសព្វព្រះទ័យឲ្យអ្នកមើលឃើញ ទទួលអារម្មណ៍ និងដឹងថា ទ្រង់ជាកម្លាំងរបស់អ្នក ។ ដោយមានជំនួយរបស់ទ្រង់ នោះនឹងគ្មានដែនកំណត់ចំពោះអ្វីដែលអ្នកអាចសម្រេចបាននោះទេ ។ ដោយមានជំនួយរបស់ទ្រង់ សក្តានុពលរបស់អ្នកគឺគ្មានដែនកំណត់ឡើយ ។ ទ្រង់សព្វព្រះទ័យឲ្យអ្នកមើលឃើញខ្លួនឯងដូចដែលទ្រង់ទតឃើញអ្នក ។ ដែលវាខុសពីគ្នាយ៉ាងខ្លាំងពីរបៀបដែលពិភពលោកមើលឃើញអ្នក ។ ( « ព្រះយេស៊ូវគ្រីស្ទគឺជាកម្លាំងនៃយុវជន » លីអាហូណា ខែវិច្ឆិកា ឆ្នាំ២០២២ ទំព័រ៩ )
សូមគូរ ឬថតរូបនៃអ្វីមួយនៅក្នុងបន្ទប់របស់អ្នក ផ្ទះរបស់អ្នក ឬនៅក្បែរផ្ទះរបស់អ្នក ដែលបង្រៀនជានិមិត្តរូបអំពីសេចក្ដីពិតមួយ ដែលអ្នកបានរៀនមកពីបទពិសោធន៍របស់ហេណុក ។ សូមបន្ថែមការពន្យល់អំពីរូបភាពរបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យមានអារម្មណ៍ជឿជាក់លើព្រះអម្ចាស់ និងព្រះចេស្ដារបស់ទ្រង់ក្នុងការជួយដល់អ្នក និងពង្រឹងអ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ដំណើររឿងមួយដែលបានជួយពង្រឹងការប្តេជ្ញាចិត្តរបស់អ្នក ដើម្បីងាកទៅរកព្រះគ្រីស្ទ នៅពេលអ្នកមានអារម្មណ៍ថាលើសលប់ ។
-
រូបថតដែលអ្នកបានថត ឬគូរ និងការពន្យល់អំពីរបៀបដែលវាបង្រៀនអំពីបទពិសោធន៍របស់ហេណុក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?