« ម៉ូសេ ៤:១–៤—‹ សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ផងព្រះអង្គរហូត › » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
លោកុប្បត្តិ ៣–៤; ម៉ូសេ ៤–៥ ៖ មេរៀនទី ១០
ម៉ូសេ ៤:១–៤
« សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ផងព្រះអង្គរហូត »
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅក្នុងជីវិតមុនផែនដី ព្រះវរបិតាសួគ៌បានជ្រើសរើសព្រះយេស៊ូវគ្រីស្ទឲ្យធ្វើជាព្រះអង្គសង្គ្រោះនៅក្នុងផែនការរបស់ទ្រង់ ។ ព្រះយេស៊ូវគ្រីស្ទគោរពប្រតិបត្តិតាមព្រះហឫទ័យរបស់ព្រះវរបិតាសួគ៌យ៉ាងខ្ជាប់ខ្ជួន ទោះបីជាវាលំបាកយ៉ាងណាក៏ដោយ ។ មេរៀននេះអាចជួយអ្នកឲ្យចង់ក្លាយដូចជាព្រះយេស៊ូវគ្រីស្ទ និងគោរពប្រតិបត្តិតាមព្រះវរបិតាសួគ៌ ដូចទ្រង់ធ្វើដែរ ។
សិក្សាព្រះគម្ពីរ
ប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) បានតំណាលពីមេរៀនមួយ ដែលលោកបានរៀនពីយុវវ័យរបស់លោក ។ សូមមើលវីដេអូខាងក្រោមអំពីដំណើររឿងរបស់ប្រធាន ម៉នសុន ។ ឬសូមអានដំណើររឿងសង្ខេប ដែលមានបន្ទាប់ពីវីដេអូនេះ ។
ដំណើររឿងសង្ខេប ៖ នៅពេលប្រធាន ថូម៉ាស អេស ម៉នសុន អាយុប្រាំបីឆ្នាំ លោក និងមិត្តម្នាក់ចង់សម្អាតស្មៅនៅក្បែរផ្ទះតូចរបស់គ្រួសារពួកគេ ដោយការដុតស្មៅទាំងនោះ ។ ដោយមានឈើគូសក្នុងដៃ ដែលពួកគេមិនគួរមាននោះ ពួកគេបានដុតស្មៅ ដោយជឿថា វានឹងឆេះតែកន្លែងដែលពួកគេចង់ឲ្យវាឆេះប៉ុណ្ណោះ ។ ជាអកុសល ភ្លើងបានរាលដាលយ៉ាងរហ័ស ដែលបង្កគ្រោះថ្នាក់ដល់តំបន់ ដើមឈើ និងផ្ទះតូចៗនៅជុំវិញនោះ ។ ពេលដឹងថា ពួកគេត្រូវការជំនួយ ពួកគេបានរត់ទៅរកគ្រួសារ និងអ្នកជិតខាង ដែលបានជួយពន្លត់ភ្លើង ហើយជួយសង្គ្រោះតំបន់ជុំវិញនោះ ។
ប្រធាន ម៉នសុន បានពន្យល់ពីមេរៀនដែលលោកបានរៀនពីបទពិសោធន៍របស់លោក ៖
ខ្ញុំបានរៀននូវមេរៀនពិបាកៗជាច្រើន ប៉ុន្តែជាមេរៀនសំខាន់នាគ្រានោះ—ផ្នែកដែលសំខាន់គឺសារៈសំខាន់នៃការគោរពប្រតិបត្តិ ។
មានច្បាប់ និងក្រឹត្យក្រមដើម្បីជួយយើងឲ្យប្រាកដថា មានសុវត្ថិភាពខាងរូបកាយ ។ ក៏ដូចជាព្រះអម្ចាស់ បានប្រទានការណែនាំ និង បទបញ្ញត្តិដើម្បីជួយយើងឲ្យប្រាកដថា យើងមានសុវត្ថិភាពខាងវិញ្ញាណ ដើម្បីយើងអាចបត់ចង្កូតដោយជោគជ័យនៅក្នុងជីវិតរមែងស្លាប់ដែលប្រកបដោយគ្រោះថ្នាក់នេះ ហើយត្រឡប់ទៅជួបព្រះវរបិតាសួគ៌យើងវិញនៅទីបំផុត ។ ( « Obedience Brings Blessings » Liahona ខែឧសភា ឆ្នាំ២០១៣ ទំព័រ៩០ )
ហេតុអ្វីបានជាអ្នកគិតថា ការគោរពប្រតិបត្តិសំខាន់ខ្លាំងម៉្លេះចំពោះផែនការរបស់ព្រះវរបិតាសួគ៌ ?
យើងបានរស់នៅក្នុងជីវិតមុនផែនដីជាមួយនឹងព្រះវរបិតាសួគ៌របស់យើង ។ ពេលនៅទីនោះ យើងបានរៀនពីផែនការរបស់ទ្រង់ ដើម្បីជួយយើងឲ្យប្រែក្លាយដូចជាទ្រង់ ។ ម៉ូសេ ៤:១–៤ មាននូវដំណើររឿងអំពីក្រុមប្រឹក្សានៅស្ថានសួគ៌ នៅពេលព្រះយេស៊ូវគ្រីស្ទត្រូវបានជ្រើសរើសឲ្យធ្វើជាព្រះអង្គសង្គ្រោះរបស់យើង ។ នៅក្នុងខគម្ពីរទាំងនេះ យើងឃើញពីបុគ្គលិកលក្ខណៈរបស់ព្រះយេស៊ូវគ្រីស្ទ និងរបស់សាតាំង នៅពេលទ្រង់ និងសាតាំងឆ្លើយតបនឹងព្រះហឫទ័យរបស់ព្រះវរបិតាសួគ៌តាមរបៀបផ្សេងគ្នា ។
សូមអាន ម៉ូសេ ៤:១–៤ ដោយរកមើលអ្វីដែលអ្នកអាចរៀនបានអំពីការជំរុញចិត្ត និងអាកប្បកិរិយារបស់ព្រះយេស៊ូវគ្រីស្ទ និងរបស់សាតាំង ។ សូមគូសសម្គាល់អ្វីដែលអ្នករកឃើញអំពីសាតាំងដោយពណ៌មួយ ។ សូមជ្រើសរើសពណ៌មួយទៀត ដើម្បីគូសសម្គាល់ការជំរុញចិត្ត និងអាកប្បកិរិយារបស់ព្រះយេស៊ូវគ្រីស្ទ ។
ទាក់ទងនឹងផែនការដែលបានស្នើឡើងរបស់សាតាំង អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
វាមិនមែនជាករណីធម្មតាទេ ដែលព្រះយេស៊ូវគាំទ្រដល់ផែនការរបស់ព្រះវរបិតា ហើយសំណើរបស់លូស៊ីហ្វើរហាក់បីដូចជាខុសគ្នាតែបន្តិចប៉ុណ្ណោះ ។ សំណើរបស់លូស៊ីហ្វើរនឹងបំផ្លាញផែនការនេះ តាមរយៈការលុបចោលឱកាសរបស់យើងក្នុងការធ្វើសកម្មភាពដោយឯករាជ្យ ។ ផែនការរបស់លូស៊ីហ្វើរមានមូលដ្ឋានលើការបង្ខិតបង្ខំ ដែលធ្វើឲ្យបុត្រាបុត្រីផ្សេងទៀតទាំងអស់របស់ព្រះ—យើងទាំងអស់គ្នា—ចាំបាច់ត្រូវក្លាយជាអាយ៉ងរបស់វា ។ …
ហើយសូមឲ្យយើងចាំថា សាតាំងមិនបានស្ម័គ្រចិត្តធ្វើជាព្រះអង្គសង្រ្គោះរបស់យើងទេ ។ វាមិនចាប់អារម្មណ៍នឹងទុក្ខវេទនា ឬសេចក្ដីស្លាប់ដើម្បីនរណាម្នាក់ឡើយ ។ វានឹងមិនបង្ហូរឈាមរបស់វាទេ ។ វាចង់បានសិរីរុងរឿង កិត្តិយស និងព្រះចេស្ដារបស់ព្រះ ដោយមិនចំណាយអ្វីទាំងអស់ ។ ( « A Message at Christmas » [ ការប្រជុំធម្មនិដ្ឋាននៅសាកលវិទ្យាល័យ ព្រិកហាំ យ៉ង់ ថ្ងៃទី១២ ខែធ្នូ ឆ្នាំ២០១៧ ] ទំព័រ៣–៤ នៅលើគេហទំព័រ speeches.byu.edu )
សូមជញ្ជឹងគិតពីអ្វីដែលអ្នកអាចរៀនបាន មកពីការស្ម័គ្រព្រះទ័យរបស់ព្រះគ្រីស្ទក្នុងការគោរពប្រតិបត្តិតាមព្រះវរបិតាសួគ៌ និងមកពីការទទូចរបស់សាតាំងអំពីការធ្វើការតាមវិធីផ្ទាល់ខ្លួនរបស់វា ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។
ជម្រើស ក
នៅអំឡុងព្រះជន្មរបស់ទ្រង់ តើព្រះគ្រីស្ទបានគោរពប្រតិបត្តិតាមរបៀបណាខ្លះ?
ដំណើររឿងខាងក្រោមនេះអាចជួយអ្នកឲ្យរៀនចេញពីគំរូរបស់ព្រះយេស៊ូវបាន ។ វគ្គបទគម្ពីរនីមួយៗបង្ហាញពីរបៀបដែលព្រះយេស៊ូវបានគោរពប្រតិបត្តិតាម សូម្បីតែនៅពេលដែលវាពិបាកក្ដី ។ នៅពេលអ្នកអានវគ្គបទគម្ពីរខាងក្រោមនេះ សូមគូសសម្គាល់ឃ្លា ដែលបង្ហាញថា ព្រះយេស៊ូវបានគោរពប្រតិបត្តិតាមព្រះវរបិតារបស់ទ្រង់ ។
-
លូកា ២:៤៩ ( កាលអាយុ១២ឆ្នាំ )
-
យ៉ូហាន ៨:២៨–២៩ ( ជាមជ្ឈិមវ័យ )
-
ម៉ាថាយ ២៦:៣៦–៣៩ ( នៅក្នុងសួនច្បារគែតសេម៉ានី )
-
នីហ្វៃទី៣ ១១:១០–១១ ( ពេលធ្វើដង្វាយធួនសម្រាប់អំពើបាប )
សូមកត់ត្រាគំនិតរបស់អ្នកអំពីអ្វីខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើព្រះយេស៊ូវគ្រីស្ទបានមានបន្ទូលអ្វីខ្លះ ឬបានធ្វើអ្វីខ្លះ ដែលអាចបំផុសគំនិតនរណាម្នាក់ឲ្យជ្រើសរើសគោរពប្រតិបត្តិតាមព្រះវរបិតាសួគ៌ ទោះបីជាពេលមានការលំបាកក៏ដោយនោះ ?
ជម្រើស ខ
តើខ្ញុំអាចប្រើសិទ្ធិជ្រើសរើសរបស់ខ្ញុំ ដើម្បីកាន់តែមានភាពជិតស្និទ្ធនឹងព្រះគ្រីស្ទដោយរបៀបណា ?
ដោយសារសាតាំង « បានខំរកបំផ្លាញសិទ្ធិជ្រើសរើសរបស់មនុស្ស » ( ម៉ូសេ ៤:៣ ) វាមិនអាចនៅក្នុងវត្តមានរបស់ព្រះវរបិតាសួគ៌បានទេ ។ ព្រះយេស៊ូវគ្រីស្ទបានបន្តគោរពប្រតិបត្តិតាម ។ អ្នកអាចប្រើសិទ្ធិជ្រើសរើសរបស់អ្នក ដើម្បីធ្វើតាមគំរូរបស់ព្រះអង្គសង្គ្រោះ តាមរយៈការគោរពប្រតិបត្តិតាម ។
អែលឌើរ រ៉ូបឺត ឌី ហែល ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ ៖
សិទ្ធិជ្រើសរើស—សមត្ថភាពរបស់យើងក្នុងការជ្រើសរើស និងប្រព្រឹត្តសម្រាប់ខ្លួនយើង—គឺជាធាតុសំខាន់នៃផែនការនេះ ។ បើគ្មានសិទ្ធិជ្រើសរើសទេ នោះយើងនឹងមិនអាចធ្វើការជ្រើសរើសបានត្រឹមត្រូវ និងរីកចម្រើនទៅមុខបានទេ ។ ប៉ុន្តែដោយមានសិទ្ធិជ្រើសរើស យើងក៏អាចនឹងធ្វើការជ្រើសរើសខុស ប្រព្រឹត្តអំពើបាប និងបាត់បង់ឱកាសនៅជាមួយព្រះវរបិតាសួគ៌ម្តងទៀតផងដែរ ។ ដោយហេតុនេះហើយ ទើបត្រូវមានព្រះអង្គសង្រ្គោះមួយអង្គ ដើម្បីមករងទុក្ខសម្រាប់អំពើបាបរបស់យើង ហើយប្រោសលោះយើង ប្រសិនបើយើងនឹងប្រែចិត្ត ។ តាមរយៈដង្វាយធួនដ៏និរន្តររបស់ទ្រង់ ទ្រង់បាននាំមកនូវ « ផែនការនៃសេចក្ដីមេត្តាករុណា ដើម្បីធ្វើឲ្យស្កប់ស្កល់ដល់ការទាមទារនូវសេចក្ដីយុត្តិធម៌ » [ អាលម៉ា ៤២:១៥ ] ។ ( « Agency: Essential to the Plan of Life » Liahona ខែវិច្ឆិកា ឆ្នាំ២០១០ ទំព័រ២៤ )
ព្រះអម្ចាស់បានប្រទានឧបករណ៍ជាច្រើនឲ្យអ្នក ដើម្បីជួយអ្នកឲ្យប្រើសិទ្ធិជ្រើសរើសរបស់អ្នក ដើម្បីប្រែក្លាយដូចជាទ្រង់ ។ ឧបករណ៍មួយក្នុងចំណោមឧបករណ៍ទាំងនោះគឺសៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ។
សូមជ្រើសរើសផ្នែកមួយមកពីសៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ។ សូមសិក្សាផ្នែកនោះ ។ សូមរកមើលការអញ្ជើញដែលអាចជួយអ្នកឲ្យប្រើសិទ្ធិជ្រើសរើសរបស់អ្នក ដើម្បីខិតកាន់តែជិតព្រះ ។ សូមគូសសម្គាល់អ្វីដែលអ្នករកឃើញ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យចង់ក្លាយដូចជាព្រះយេស៊ូវគ្រីស្ទ និងគោរពប្រតិបត្តិតាមព្រះវរបិតាសួគ៌ ដូចទ្រង់ធ្វើដែរ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អ្វីដែលអ្នកបានរៀនមកពីខគម្ពីរទាំងនេះអំពីព្រះយេស៊ូវគ្រីស្ទ ដែលអាចជួយអ្នកឲ្យគោរពប្រតិបត្តិតាមព្រះវរបិតាសួគ៌ សូម្បីតែនៅពេលទ្រង់បង្គាប់ឲ្យអ្នកធ្វើកិច្ចការលំបាកៗក៏ដោយ ។
-
អ្វីដែលអ្នកបានរៀនមកពី ដើម្បីកម្លាំងនៃយុវជន ៖ សេចក្ដីណែនាំដើម្បីធ្វើការជ្រើសរើស ដែលនឹងជួយអ្នកឲ្យក្លាយកាន់តែដូចជាព្រះយេស៊ូវគ្រីស្ទ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?