« ម៉ូសេ ៤:៥–៣២; ៥:១–១៥ ផ្នែកទី ១—‹ ស្រាប់តែភ្នែករបស់អ្នកទាំងពីរបានភ្លឺឡើង › » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
លោកុប្បត្តិ ៣–៤; ម៉ូសេ ៤–៥ ៖ មេរៀនទី ១១
ម៉ូសេ ៤:៥–៣២; ៥:១–១៥ ផ្នែកទី ១
« ស្រាប់តែភ្នែករបស់អ្នកទាំងពីរបានភ្លឺឡើង »
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ការធ្លាក់របស់លោកអ័ដាម និងនាងអេវ៉ាប៉ះពាល់ដល់ពួកយើងទាំងអស់ ។ តាមពិតទៅ បើគ្មានការធ្លាក់នេះទេ នោះយើងក៏នឹងមិនចាប់កំណើតមកដែរ ។ មេរៀននេះអាចជួយអ្នកឲ្យយល់ពីឥទ្ធិពលនៃការធ្លាក់នៅក្នុងផែនការរបស់ព្រះវរបិតាសួគ៌ និងក្នុងជីវិតរបស់អ្នកផ្ទាល់ ។
គន្លឹះក្នុងការសិក្សា ។ ការកត់ត្រាអ្វីដែលអ្នកកំពុងរៀន អាចជួយអ្នកឲ្យយល់ពីអ្វីដែលអ្នកសិក្សា ។ វាក៏អាចជួយអ្នកឲ្យចងចាំអ្វីដែលអ្នករៀនផងដែរ ។ ការកត់ត្រាអាចធ្វើឡើងដោយការសរសេរ ការគូរ ឬសូម្បីតែការប្រើទម្រង់ឌីជីថល ដូចជាការថតសំឡេង ឬវីដេអូជាដើម ។ នៅពេលអ្នកសិក្សា សូមពិចារណាកត់ត្រាមេរៀនសំខាន់ៗដែលអ្នកចង់យល់កាន់តែច្បាស់ និងចងចាំវា ។
សិក្សាព្រះគម្ពីរ
នៅក្នុងចំណោមសេចក្ដីពិតដ៏សំខាន់បំផុតដែលយើងដឹងគឺថា ព្រះវរបិតាសួគ៌ស្រឡាញ់យើង ។ ជាការពិត ព្រះស្រឡាញ់យើងយ៉ាងខ្លាំង រហូតដល់ទ្រង់បានបញ្ជូនព្រះយេស៊ូវគ្រីស្ទឲ្យមកក្នុងពិភពលោកនេះដើម្បីជួយដល់យើង ( សូមមើល យ៉ូហាន ៣:១៦ ) ។
តើអ្នកធ្លាប់គិតថា ហេតុអ្វីបានជាព្រះវរបិតាសួគ៌ជាទីស្រឡាញ់ បានអនុញ្ញាតឲ្យរឿងលំបាកៗ ដូចជាការស្លាប់ ការងារ ទុក្ខសោក និងអំពើបាបចូលមកក្នុងពិភពលោកនេះដែរឬទេ ? ការយល់ដឹងពីរឿងនេះអាចជួយអ្នកឲ្យស្រឡាញ់ទ្រង់កាន់តែខ្លាំងឡើងបាន ! ប៉ុន្ដែដើម្បីយល់ពីការណ៍នេះ អ្នកត្រូវដឹងពីការធ្លាក់របស់លោកអ័ដាម និងនាងអេវ៉ាសិន ។ តើអ្នកដឹងអ្វីខ្លះអំពីការធ្លាក់ ?
ប្រសិនបើមាន សូមមើលវីដេអូ « Adam and Eve » ( ១:៥៣ ) ។
សូមអាន ម៉ូសេ ៤:៦–១៣, ២២–២៥; ៥:១០–១១ ។ សូមរកមើលអ្វីដែលបានកើតឡើងដោយសារតែការធ្លាក់ ។ អ្នកអាចគូសចំណាំអ្វីដែលអ្នករកឃើញ ។ វាក៏អាចមានប្រយោជន៍ផងដែរក្នុងការដាក់ស្លាកវគ្គបទគម្ពីរទាំងនេះនូវចំណងជើងថា « ការធ្លាក់ » ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។
ជម្រើស ក
តើមានអ្វីបានកើតឡើងដោយសារតែការធ្លាក់របស់អ័ដាម និងអេវ៉ា ?
ដើម្បីជួយអ្នកឲ្យរៀបចំអ្វីដែលអ្នករៀនអំពីការធ្លាក់ សូមបង្កើតកូនសៀវភៅមួយដោយប្រើការណែនាំខាងក្រោមនេះ ។ សូមស្រមៃថា អ្នកនឹងប្រើកូនសៀវភៅនេះដើម្បីបង្រៀនអ្នកដទៃអំពីការធ្លាក់ និងអំពីមូលហេតុដែលវាចាំបាច់នៅក្នុងផែនការរបស់ព្រះវរបិតាសួគ៌ ។ សូមមានភាពច្នៃប្រឌិដ្ឋក្នុងការបង្កើតកូនសៀវភៅតាមទម្រង់ផ្ទាល់ខ្លួនរបស់អ្នក ។
-
សូមបត់ក្រដាសជាពីរ ។ សូមបង្កើតទំព័រក្របមុខដោយដាក់ចំណងជើងដូចជា « សារៈសំខាន់នៃការធ្លាក់នៅក្នុងផែនការរបស់ព្រះវរបិតាសួគ៌ » ។ សូមបន្ថែមគំនូរ ឬរូបភាពដែលរំឭកអ្នកអំពីការធ្លាក់ ដូចជា ដើមឈើហូបផ្លែ ឬផ្លែឈើមួយផ្លែ ។
-
នៅក្នុងកូនសៀវភៅនេះ សូមដាក់ចំណងជើងនៅទំព័រខាងឆ្វេងថា « ឥទ្ធិពលនៃការធ្លាក់ » ។
-
សូមសិក្សា ម៉ូសេ ៤:១៣–១៦, ២២–២៥, ២៨–២៩; ៥:១–៤ ។ សូមសរសេរ ឬគូររូបភាពនៃឥទ្ធិពលនៃការធ្លាក់នេះមកលើបុត្រាបុត្រីរបស់ព្រះ ។ សូមសរសេរខគម្ពីរដែលអ្នកបានរៀនអំពីឥទ្ធិពលនីមួយៗទៅក្នុងកូនសៀវភៅរបស់អ្នក ។
ជម្រើស ខ
តើការធ្លាក់របស់លោកអ័ដាម និងនាងអេវ៉ា ជះឥទ្ធិពលលើការរីកចម្រើនដ៏អស់កល្បជានិច្ចរបស់ខ្ញុំយ៉ាងដូចម្តេច ?
សូមស្រមៃថា អ្នកត្រូវបានសុំឲ្យបង្រៀនមេរៀនខ្លីមួយដល់កុមារថ្នាក់អង្គការបឋមសិក្សា អំពីរបៀបដែលការធ្លាក់របស់លោកអ័ដាម និងនាងអេវ៉ា ត្រូវគ្នានឹងផែនការរបស់ព្រះវរបិតាសួគ៌សម្រាប់ពួកយើង ។
-
សូមសិក្សាធនធានខាងក្រោមនេះ ៖
-
នីហ្វៃទី២ ២:២២–២៥ ( យ៉ាកុបបានពន្យល់ពីមូលហេតុដែលការធ្លាក់គឺជារឿងល្អ )
ប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានពន្យល់ពីមូលហេតុដែលការធ្លាក់គឺចាំបាច់នៅក្នុងជីវិតរបស់យើង ៖
ការធ្លាក់គឺជាផ្នែកមួយដ៏ចាំបាច់នៃផែនការដ៏ទេវភាពរបស់ព្រះវរបិតាសួគ៌ ។ បើគ្មានការធ្លាក់ទេ នោះក៏គ្មានកូនចៅរមែងស្លាប់ណាម្នាក់អាចកើតមកពីលោកអ័ដាម និងនាងអេវ៉ាឡើយ ហើយនឹងគ្មានក្រុមគ្រួសារមនុស្សណាមួយអាចដកបទពិសោធន៍ភាពផ្ទុយគ្នា និងការលូតលាស់ សិទ្ធិជ្រើសរើសខាងសីលធម៌ និងសេចក្ដីអំណរនៃដំណើររស់ឡើងវិញ សេចក្ដីប្រោសលោះ និងជីវិតដ៏នៅអស់កល្បជានិច្ចបានដែរ ។ ( Christ and the New Covenant: The Messianic Message of the Book of Mormon [ ឆ្នាំ១៩៩៧ ] ទំព័រ២០៧ )
អ្នកអាចចម្លងសេចក្តីថ្លែងការណ៍របស់ប្រធាន ហូឡិន ទៅក្នុងបទគម្ពីរ ឬសៀវភៅកំណត់ចំណាំរបស់អ្នកបាន ។ ឬអ្នកអាចដាក់តំណភ្ជាប់សេចក្តីថ្លែងការណ៍នេះនៅក្នុងបណ្ណាល័យដំណឹងល្អទៅកាន់ នីហ្វៃទី២ ២:២២–២៥ ហើយដាក់ស្លាកវាថា « ការធ្លាក់ » ។
-
-
សូមពិចារណាសំណួរខាងក្រោម ដែលអាចជួយអ្នករៀបចំគម្រោងមេរៀនរបស់អ្នកបាន ។
-
តើការរីកចម្រើនដ៏អស់កល្បជានិច្ចរបស់អ្នកបានរងឥទ្ធិពលជាវិជ្ជមានដោយសារតែការធ្លាក់យ៉ាងដូចម្ដេច ?
-
តើផលប៉ះពាល់នៃការធ្លាក់មួយណា ដែលអ្នកត្រូវការជំនួយដើម្បីយកឈ្នះ ?
-
-
សូមបង្កើតគម្រោងមេរៀនមួយ ដែលអាចជួយអ្នកឲ្យពន្យល់ពីការធ្លាក់ និងរបៀបដែលវាជួយយើងឲ្យក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់អំពីឥទ្ធិពលនៃការធ្លាក់ក្នុងផែនការរបស់ព្រះវរបិតាសួគ៌ និងក្នុងជីវិតរបស់អ្នកផ្ទាល់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
កូនសៀវភៅដែលអ្នកបានបង្កើត ។
-
គម្រោងមេរៀនរបស់អ្នក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?