« ម៉ូសេ ១:១–១១—‹ យើងមានកិច្ចការសម្រាប់អ្នក … ជាបុត្រយើង › » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
ម៉ូសេ ១; អ័ប្រាហាំ ៣ ៖ មេរៀនទី ៤
ម៉ូសេ ១:១–១១
« យើងមានកិច្ចការសម្រាប់អ្នក … ជាបុត្រយើង »
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ម៉ូសេ « បានឃើញព្រះនៅប្រទល់មុខ ហើយគាត់បានទូលជាមួយនឹងទ្រង់ » ( ម៉ូសេ ១:២ ) ។ ព្រះបានមានបន្ទូលប្រាប់ម៉ូសេថា « អ្នកជាបុត្ររបស់យើង » ( ម៉ូសេ ១:៤ ) និងថា « យើងមានកិច្ចការសម្រាប់អ្នក » ( ម៉ូសេ ១:៦ ) ។ គោលបំណងនៃមេរៀននេះគឺ ដើម្បីជួយអ្នកឲ្យទទួលអារម្មណ៍ថា អ្នកគឺជាបុត្ររបស់ព្រះ ហើយទ្រង់មានកិច្ចការឲ្យអ្នកធ្វើ ។
សិក្សាព្រះគម្ពីរ
តើអ្នកគិតថា មនុស្សអាយុស្រករអ្នកមានអារម្មណ៍យ៉ាងណា ចំពោះសេចក្តីថ្លែងការណ៍ខាងក្រោមនេះ ? ហេតុអ្វី ?
-
ខ្ញុំជឿជាក់លើខ្លួនឯងថាខ្ញុំជានរណា ។
-
ខ្ញុំដឹងពីគោលបំណងក្នុងជីវិតរបស់ខ្ញុំ ។
តើអ្នកមានអារម្មណ៍យ៉ាងណា ចំពោះសេចក្តីថ្លែងការណ៍ទាំងពីរប្រយោគនេះ ?
ព្រះបានរក្សាទុកដំណើររឿងរបស់មនុស្សមួយចំនួននៅក្នុងព្រះគម្ពីរ ដែលអាចមិនមានទំនុកចិត្ត ឬការដឹកនាំនៅក្នុងជីវិតរបស់ពួកគេ ។ គម្ពីរម៉ូសេគឺជាផ្នែកមួយនៃវិវរណៈ ដែលបានផ្តល់ឲ្យព្យាការី យ៉ូសែប ស្ម៊ីធ ខណៈដែលលោកបានធ្វើការលើការកែសម្រួល ឬការបកប្រែព្រះគម្ពីរប៊ីបដ៏បំផុសគំនិត ។ វាមាននូវការយល់ដឹងដ៏មានតម្លៃមួយចំនួនអំពីអន្តរកម្មរបស់ព្រះជាមួយម៉ូសេ ។
ពេញមួយជីវិតរបស់ម៉ូសេ លោកមានគ្រាជាច្រើន ដែលលោកមិនដឹងច្បាស់ពីគោលបំណងរបស់លោក ។ ជាយូរមុនពេលព្រះអម្ចាស់បានជួយម៉ូសេឲ្យដឹកនាំប្រជាជនរបស់លោកចេញពីទាសភាព លោកបានកើតជាសាសន៍អ៊ីស្រាអែល ( សមាជិកម្នាក់នៃប្រជាជនក្នុងសេចក្ដីសញ្ញារបស់ព្រះ ) ។ ប៉ុន្តែកាលនៅជាទារក លោកត្រូវបានសុំមកចិញ្ចឹមដោយគ្រួសាររាជវង្សអេស៊ីព្ទ ។
នៅទីបំផុត លោកត្រូវភៀសខ្លួនពីស្រុកអេស៊ីព្ទទៅកាន់ទឹកដីថ្មីមួយ ដើម្បីរក្សាជីវិតរបស់លោក ដោយត្រូវចាកចេញពីគ្រួសារតែមួយគត់ដែលលោកបានស្គាល់ ។
-
ប្រសិនបើអ្នកស្ថិតក្នុងស្ថានភាពរបស់ម៉ូសេវិញ តើអ្នកអាចនឹងមានគំនិតអ្វីខ្លះអំពីគោលបំណងសម្រាប់ជីវិតរបស់អ្នក ?
មួយរយៈក្រោយពីម៉ូសេបានភៀសខ្លួនចេញពីស្រុកអេស៊ីព្ទ ព្រះអង្គសង្គ្រោះបានបង្ហាញព្រះកាយនៅ « ប្រទល់មុខ » ម៉ូសេ ( ម៉ូសេ ១:២ ) ។
ដោយសារព្រះយេស៊ូវគ្រីស្ទមានព្រះរាជបំណងតែមួយជាមួយព្រះវរបិតាសួគ៌ នោះនៅពេលទ្រង់មានបន្ទូល យើងអាចយល់កាន់តែច្បាស់អំពីព្រះវរបិតាផងដែរ ( សូមមើល យ៉ូហាន ១០:២៥, ៣០; នីហ្វៃទី៣ ១១:២៧ ) ។
ដើម្បីជួយអ្នកឲ្យសិក្សាព្រះគម្ពីរ សូមគូរតារាងខាងក្រោមដាក់នៅក្នុងសៀវភៅកត់ចំណាំរបស់អ្នក ។ ឬអ្នកអាចប្រើពណ៌ ឬរចនាប័ទ្មខុសគ្នា ដើម្បីគូសសម្គាល់នៅក្នុងព្រះគម្ពីរនូវអ្វីដែលអ្នកបានរៀនអំពីព្រះវរបិតាសួគ៌ ព្រះយេស៊ូវគ្រីស្ទ និងម៉ូសេ ។
|
ព្រះវរបិតាសួគ៌ និងព្រះយេស៊ូវគ្រីស្ទ |
ម៉ូសេ |
|---|---|
ព្រះវរបិតាសួគ៌ និងព្រះយេស៊ូវគ្រីស្ទ | ម៉ូសេ |
សូមអាន ម៉ូសេ ១:១–១១ ឬសូមមើលវីដេអូខាងក្រោមនេះ ។ សូមស្រមៃថា តើការមានបទពិសោធន៍នេះនឹងមានលក្ខណៈយ៉ាងដូចម្ដេច ។ នៅលើតារាង សូមសរសេរអ្វីដែលខគម្ពីរទាំងនេះបង្រៀនអំពីព្រះវរបិតាសួគ៌ ព្រះយេស៊ូវគ្រីស្ទ និងម៉ូសេ ។
សូមពិនិត្យមើលអ្វីដែលអ្នកបានរកឃើញ ។ តើមានពាក្យ ឬឃ្លាណាមួយ ដែលជួយអ្នកឲ្យមានអារម្មណ៍ថា អ្នកមានទំនាក់ទំនងកាន់តែល្អប្រសើរជាមួយព្រះវរបិតាសួគ៌ និងព្រះយេស៊ូវគ្រីស្ទដែរឬទេ ? សូមធ្វើការកត់ចំណាំនៅក្បែរខគម្ពីរទាំងនោះ ដែលជួយអ្នកឲ្យយល់ពីទំនាក់ទំនងរបស់អ្នកជាមួយទ្រង់ទាំងទ្វេបានកាន់តែប្រសើរ ។
សូមគូររូបមនុស្សចង្កឹះចំនួនពីរ ។ សូមជ្រើសរើសមនុស្សពីរនាក់ ក្នុងចំណោមមនុស្សខាងក្រោមនេះយកមករៀនសូត្រ ។ សូមរកមើលកិច្ចការដែលព្រះមានសម្រាប់មនុស្សម្នាក់ៗ ។ សូមសរសេរចម្លើយរបស់អ្នកចំពោះសំណួរខាងក្រោមនេះនៅជាប់រូបនីមួយៗ ។
-
តើបុគ្គលនោះបានធ្វើអ្វីខ្លះដើម្បីជួយដល់អ្នកដទៃ ហើយនាំពួកគេមករកព្រះយេស៊ូវគ្រីស្ទ ?
-
ហេតុអ្វីបានជាព្រះដែលពេញដោយក្ដីស្រឡាញ់ អាចនឹងចង់ឲ្យពួកគេធ្វើកិច្ចការនេះ ?
-
តើព្រះបានរៀបចំពួកគេឲ្យជួយយ៉ាងដូចម្តេច ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។ បន្ទាប់មក សូមបញ្ចប់ផ្នែក ឥឡូវត្រូវធ្វើដូចម្តេចទៀត ? នៅចុងបញ្ចប់នៃមេរៀននេះ ។
ជម្រើស ក
ម៉ូសេ
សូមរកមើលពាក្យ « Moses/ម៉ូសេ » នៅក្នុង Bible Dictionary ឬ សេចក្ដីណែនាំដល់បទគម្ពីរទាំងឡាយ ។
ជម្រើស ខ
ហ្គីរីស
ហ្គីរីសគឺជាបុរសម្នាក់ដែលកើត និងធំធាត់នៅប្រទេសនេប៉ាល់ ដែលបានរកឃើញដំណឹងល្អ ហើយនៅទីបំផុតបានផ្លាស់ទៅនៅរដ្ឋយូថាហ៍ ។ សូមអានអត្ថបទខាងក្រោម ឬមើលវីដេអូ « I Have a Work for Thee » ពីនាទីទី ០:១៨ ដល់ ១:១២ ។
ជាច្រើនឆ្នាំក្រោយមក នៅពេលជនភៀសខ្លួនជាង១៥០០នាក់មកពីជំរុំនៅប្រទេសនេប៉ាល់ត្រូវបានផ្លាស់ទីទៅរដ្ឋយូថាហ៍ ហ្គីរីសទទួលអារម្មណ៍បំផុសគំនិតឲ្យជួយពួកគេ ។ ដោយចេះនិយាយភាសាកំណើតបានស្ទាត់ និងយល់ដឹងអំពីវប្បធម៌ផងនោះ ហ្គីរីសបានបម្រើការជាអ្នកបកប្រែ គ្រូបង្រៀន និងអ្នកប្រឹក្សា ។ … សាខាមួយដែលប្រើភាសានេប៉ាល់ត្រូវបានបង្កើតឡើង ហើយក្រោយមក ហ្គីរីសបានបម្រើជាប្រធានសាខានោះ ។ គាត់ក៏បានជួយនៅក្នុងការបកប្រែព្រះគម្ពីរមរមនទៅជាភាសានេប៉ាល់ផងដែរ ។ ( ចន ស៊ី ភីងគ្រី ជុញ្ញ័រ « I Have a Work for Thee » Liahona ខែវិច្ឆិកា ឆ្នាំ២០១៧ ទំព័រ៣២ )
ជម្រើស គ
បងស្រីដែលបាក់ទឹកចិត្តម្នាក់
អែលឌើរ ចន ស៊ី ភីងគ្រី ជុញ្ញ័រ ក្នុងពួកចិតសិបនាក់បានចែកចាយ ៖
ថ្ងៃមួយមានបងស្រីដែលបាក់ទឹកចិត្តម្នាក់បានទូលអង្វរថា « ឱ! ព្រះអម្ចាស់អើយ តើការងារបម្រើផ្ទាល់របស់ខ្ញុំគឺជាអ្វីទៅ ? » ទ្រង់បានតបថា « សូមយកចិត្តទុកដាក់លើមនុស្សដទៃ » ។ … ចាប់តាំងពីពេលនោះមក គាត់បានរកឃើញអំណរជាប្រចាំ ក្នុងការយកចិត្តទុកដាក់លើអស់អ្នកដែលត្រូវបានគេបំភ្លេចចោល ហើយព្រះបានធ្វើការតាមរយៈគាត់ដើម្បីប្រទានពរដល់មនុស្សជាច្រើន ។ ( « I Have a Work for Thee » Liahona ខែវិច្ឆិកា ឆ្នាំ២០១៧ ទំព័រ៣៣–៣៤ )
ឥឡូវត្រូវធ្វើដូចម្តេចទៀត ?
សូមគូររូបមនុស្សចង្កឹះថែមមួយទៀត ហើយសរសេរឈ្មោះរបស់អ្នកនៅខាងក្រោមវា ។
អែលឌើរ ចន ស៊ី ភីងគ្រី ជុញ្ញ័រ ក្នុងពួកចិតសិបនាក់បានថ្លែងទីបន្ទាល់ ៖
ព្រះបានថ្លែងទៅម៉ូសេថា « យើងមានកិច្ចការសម្រាប់អ្នក » ( ម៉ូសេ ១:៦ ) ។ តើបងប្អូនធ្លាប់ឆ្ងល់ទេថា តើព្រះវរបិតាសួគ៌មានកិច្ចការសម្រាប់បងប្អូនឬអត់ ? តើមានអ្វីសំខាន់ៗដែលទ្រង់បានរៀបចំឲ្យបងប្អូន—គឺសម្រាប់បងប្អូនជាពិសេស—ដើម្បីសម្រេចឲ្យបានឬទេ ? ខ្ញុំសូមថ្លែងទីបន្ទាល់ថា ចម្លើយនោះគឺថា ពិតជាមានមែន ! ( « I Have a Work for Thee » Liahona ខែវិច្ឆិកា ឆ្នាំ២០១៧ ទំព័រ៣២ )
សូមចំណាយពេលបន្តិចដើម្បីអធិស្ឋាន ។ សូមទូលសួរព្រះវរបិតាសួគ៌ ដើម្បីជួយអ្នកឲ្យមើលឃើញថា តើទ្រង់មានកិច្ចការអ្វីខ្លះសម្រាប់អ្នក ។ អ្នកអាចសរសេរកំណត់ចំណាំមួយនៅក្នុងព្រះគម្ពីររបស់អ្នក ( នៅក្បែរ ខទី ៦ ) អំពីចំណាប់អារម្មណ៍របស់អ្នក ។ ការកត់ត្រាចំណាប់អារម្មណ៍ខាងវិញ្ញាណរបស់អ្នក អាចជួយដល់អ្នកបាននៅពេលឥឡូវនេះ ហើយអាចជួយដល់អ្នកនៅក្នុងពេលអនាគតឲ្យស្គាល់ព្រះហស្ដរបស់ទ្រង់នៅក្នុងជីវិតរបស់អ្នកបានផងដែរ ។ សំណួរខាងក្រោមនេះអាចជួយអ្នកឲ្យគិតអំពីកិច្ចការរបស់ទ្រង់ដែលមានសម្រាប់អ្នក ។
-
តើខ្ញុំកំពុងធ្វើអ្វីរួចទៅហើយ ដែលអាចជាផ្នែកនៃកិច្ចការរបស់ព្រះសម្រាប់ខ្ញុំក្នុងជីវិតនេះ ?
-
តើព្រះអាចនឹងសព្វព្រះទ័យចង់ឲ្យខ្ញុំធ្វើកិច្ចការរបស់ទ្រង់ក្នុងគ្រួសាររបស់ខ្ញុំ ? នៅក្នុងវួដឬសាខារបស់ខ្ញុំដោយរបៀបណា ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យដឹងថា អ្នកគឺជាបុត្ររបស់ព្រះ ហើយទ្រង់មានកិច្ចការឲ្យអ្នកធ្វើ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អត្ថន័យនៃការធ្វើជាបុត្ររបស់ព្រះជាមួយនឹងកិច្ចការដែលត្រូវធ្វើ ចំពោះអ្នក ។ សូមរួមបញ្ចូលបទគម្ពីរមកពីការសិក្សារបស់អ្នក ដែលជួយអ្នកឲ្យមានអារម្មណ៍ដូច្នេះ ។
-
អ្វីដែលអ្នកបានរៀនអំពីកិច្ចការរបស់ព្រះសម្រាប់បុត្រាបុត្រីរបស់ទ្រង់នៅលើផែនដី ។ អ្វីដែលអ្នកកំពុងធ្វើរួចហើយ ដើម្បីធ្វើជាផ្នែកមួយនៃកិច្ចការរបស់ទ្រង់ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?