« ការរៀបចំខ្លួនចូលព្រះវិហារបរិសុទ្ធដោយមានភាពស័ក្តិសម ៖ ប័ណ្ណចូលព្រះវិហារបរិសុទ្ធ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការរៀបចំខ្លួនចូលព្រះវិហារបរិសុទ្ធដោយមានភាពស័ក្តិសម ៖ ប័ណ្ណចូលព្រះវិហារបរិសុទ្ធ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការរៀបចំខ្លួនទៅព្រះវិហារបរិសុទ្ធ ៖ មេរៀនទី ២០៣
ការរៀបចំខ្លួនចូលព្រះវិហារបរិសុទ្ធដោយមានភាពស័ក្តិសម
ប័ណ្ណចូលព្រះវិហារបរិសុទ្ធ
នៅប៉ុន្មានឆ្នាំថ្មីៗនេះ ព្រះអម្ចាស់បានពន្លឿនការសាងសង់ព្រះវិហារបរិសុទ្ធនៅទូទាំងពិភពលោក ។ ដោយមិនធ្លាប់មានពីមុនមក ឥឡូវនេះសមាជិកនៃសាសនាចក្ររបស់ទ្រង់មានឱកាសកាន់តែច្រើនដើម្បីចូលទៅក្នុងដំណាក់ដ៏បរិសុទ្ធរបស់ទ្រង់ នៅពេលពួកគេត្រៀមខ្លួន និងមានភាពស័ក្តិសមដើម្បីចូលទៅក្នុងព្រះវិហារបរិសុទ្ធ ។ មេរៀននេះអាចជួយសិស្សឲ្យគិតពិចារណាអំពីភាពស័ក្ដិសមរបស់ពួកគេដើម្បីចូលទៅក្នុងព្រះវិហារដ៏បរិសុទ្ធរបស់ព្រះវរបិតាសួគ៌ និងព្រះយេស៊ូវគ្រីស្ទ ។
ការរៀបចំសិស្ស ៖ ដើម្បីជួយសិស្សឲ្យរៀបចំខ្លួនដើម្បីស្វែងយល់បន្ថែមអំពីបទដ្ឋានដែលព្រះអម្ចាស់បានកំណត់ដើម្បីចូលទៅក្នុងព្រះវិហារបរិសុទ្ធ សូមអញ្ជើញពួកគេឲ្យអានសំណួរសម្រាប់ទទួលប័ណ្ណចូលព្រះវិហារបរិសុទ្ធដែលមាននៅក្នុងឧបសម្ព័ន្ធនៃ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ។ អញ្ជើញពួកគេឲ្យមកថ្នាក់រៀនជាមួយនឹងសំណួរទាំងឡាយដែលពួកគេអាចមានអំពីបទដ្ឋានទាំងនេះ ។
សកម្មភាពរៀនសូត្រដែលអាចមាន
ត្រូវបានផ្ដល់អនុសាសន៍ដល់ព្រះអម្ចាស់
ដើម្បីជួយសិស្សពិចារណាអំពីបទដ្ឋានរបស់ព្រះអម្ចាស់ដើម្បីចូលក្នុងដំណាក់របស់ទ្រង់ អ្នកអាចអញ្ជើញពួកគេឲ្យគិតអំពីការឆ្លើយតបរបស់ពួកគេចំពោះស្ថានភាពមួយ ឬច្រើនដូចខាងក្រោម ៖
-
តើអ្នកនឹងណែនាំអ្នកណាឲ្យ ៖
-
ទាត់គ្រាប់បាល់ដ៏សំខាន់មួយ ? ហេតុអ្វី ?
-
ជួយអ្នកសិក្សាសម្រាប់ការប្រឡងនៅពេលខាងមុខ ? ហេតុអ្វី ?
-
ច្រៀងទោល ? ហេតុអ្វី ?
-
ផ្ដល់ការណែនាំដល់អ្នក ? ហេតុអ្វី ?
-
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់បានចែកចាយបទពិសោធន៍មួយដែលគាត់បានទៅសួរសុខទុក្ខឪពុកក្មេករបស់គាត់នៅជិតចុងបញ្ចប់នៃជីវិតរបស់ឪពុកក្មេកគាត់ ។ ខណៈពេលដែលអែលឌើរ រ៉ាសបាន បានទៅដល់ ប៊ីស្សពរបស់ឪពុកក្មេកគាត់កំពុងរៀបចំចាកចេញ ។ លោកពន្យល់ពីអ្វីដែលបានកើតឡើងក្រោយមកទៀត ៖
ខ្ញុំបានថ្លែងទៅកាន់ ប្លេន [ ឪពុកក្មេករបស់គាត់ ] ថា « ជាការល្អណាស់ដែលប៊ីស្សពបានមកលេង » ។
ប្លេន បានមើលមកខ្ញុំ ហើយបានឆ្លើយថា « វាហួសពីល្អទៅទៀតកូន ។ ប៉ាបានសូមឲ្យប៊ីស្សពមក ដោយសារប៉ាចង់មានការសម្ភាសទទួលបណ្ណចូលព្រះវិហារបរិសុទ្ធរបស់ប៉ា ។ ប៉ាចង់ទៅដោយត្រូវបានផ្ដល់អនុសាសន៍ដល់ព្រះអម្ចាស់ » ។ ហើយគាត់បានធ្វើមែន ! ( « Recommended to the Lord » Liahona ខែវិច្ឆិកា ឆ្នាំ២០២០ ទំព័រ ២៣ )
-
តើអ្នកគិតថា « ត្រូវបានផ្ដល់អនុសាសន៍ដល់ព្រះអម្ចាស់ » មានអត្ថន័យយ៉ាងដូចម្តេច ?
ប្រសិនបើសិស្សមិនលើកឡើងពីវាទេ អ្នកអាចចែកចាយថា ជាផ្នែកនៃផែនការដ៏ពេញដោយសេចក្តីស្រឡាញ់របស់ព្រះវរបិតាសួគ៌សម្រាប់បុត្រាបុត្រីរបស់ទ្រង់ ទ្រង់ និងព្រះអង្គសង្គ្រោះ ព្រះយេស៊ូវគ្រីស្ទ បានបង្កើតបទដ្ឋានដើម្បីចូលព្រះវិហារបរិសុទ្ធ ។ ការធ្វើតាមបទដ្ឋានទាំងនេះធានាថាយើងមានភាពស័ក្ដិសមដើម្បីចូលនៅក្នុងដំណាក់របស់ទ្រង់ទាំងទ្វេ ។
នៅពេលយើងសិក្សាថ្ងៃនេះ សូមយកចិត្តទុកដាក់ទៅលើអារម្មណ៍ និងគំនិតដែលអាចចូលមកក្នុងដួងចិត្ត និងគំនិតរបស់អ្នកតាមរយៈព្រះវិញ្ញាណបរិសុទ្ធ ( សូមមើល គោលលទ្ធិ និងសេចក្តីសញ្ញា ៨:២–៣ ) ។ នេះគឺជារបៀបដែលព្រះវិញ្ញាណបរិសុទ្ធអាចជួយអ្នកឲ្យដឹងទាំងអ្វីដែលអ្នកកំពុងធ្វើបានល្អ និងរបៀបដែលអ្នកអាចពង្រឹងការខិតខំប្រឹងប្រែងរបស់អ្នកដើម្បីធ្វើតាមបទដ្ឋានរបស់ទ្រង់ទាំងទ្វេដើម្បីមានភាពស័ក្ដិសមចូលទៅក្នុងដំណាក់របស់ទ្រង់ទាំងទ្វេ ។
ការចូលទៅក្នុងព្រះវិហារបរិសុទ្ធដើម្បីថ្វាយបង្គំព្រះអម្ចាស់
សេចក្តីថ្លែងការណ៍ និងសេចក្តីយោងបទគម្ពីរខាងក្រោមអាចជួយសិស្សឲ្យយល់ថា ព្រះអម្ចាស់បានបង្កើតបទដ្ឋានដើម្បីចូលទៅក្នុងដំណាក់ដ៏បរិសុទ្ធរបស់ទ្រង់ ។ សូមពិចារណារៀបចំសិស្សជាក្រុមដែលមានគ្នាបីនាក់ ហើយចាត់តាំងសមាជិកម្នាក់ៗក្នុងក្រុមឲ្យអានបទគម្ពីរយោងមួយ ។
សូមអានសេចក្ដីថ្លែងការណ៍ខាងក្រោមពីអែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ និងបទគម្ពីរដែលមានរៀបរាប់ខាងក្រោម ដោយរកមើលអ្វីដែលអ្នកអាចរៀនអំពីការចូលទៅក្នុងដំណាក់របស់ព្រះអម្ចាស់ ៖
ព្រះវិហារបរិសុទ្ធគឺជាដំណាក់របស់ព្រះអម្ចាស់ និងជាជម្រកពីពិភពលោកនេះ ។ ព្រះវិញ្ញាណរបស់ទ្រង់គ្របដណ្តប់ការពារអស់អ្នកដែលថ្វាយបង្គំនៅក្នុងអគារដ៏ពិសិដ្ឋទាំងនោះ ។ ទ្រង់ដាក់បទដ្ឋានឲ្យយើងធ្វើតាម ពេលយើងចូលជាភ្ញៀវរបស់ទ្រង់ ។ ( « Recommended to the Lord » Liahona ខែវិច្ឆិកា ឆ្នាំ២០២០ ទំព័រ ២៣ )
ទំនុកដំកើង ២៤:៣–៤ ( « ភ្នំនៃព្រះយេហូវ៉ា » អាចតំណាងឲ្យព្រះវិហារបរិសុទ្ធ )
យេរេមា ៧:១–៣ ( យេរេមាគឺជាព្យាការីនៅអំឡុងពេលកើតមានអំពើទុច្ចរិតនៅក្នុងស្រុកយូដា ) ។
អេសេគាល ៤៤:៤–៥, ៩ ( ផ្ចង់ចិត្ត » នៅក្នុង ខទី ៥ អាចមានន័យថា « យកចិត្តទុកដាក់ » ។ « កាត់ស្បែកខាងចិត្ត » នៅក្នុង ខទី ៩ អាចមានន័យមិនបំបែកខ្លួនពួកគេចេញពីអំពើបាប និងពិភពលោក )
-
តើសេចក្ដីពិតអ្វីខ្លះអំពីការចូលទៅក្នុងដំណាក់របស់ព្រះអម្ចាស់ដែលយើងអាចរៀនចេញពីសេចក្ដីថ្លែងការណ៍របស់អែលឌើរ រ៉ាសបាន និងវគ្គបទគម្ពីរទាំងនេះ ?
សិស្សអាចរកឃើញសេចក្ដីពិតជាច្រើនដូចជា ៖
ព្រះអម្ចាស់បានកំណត់បទដ្ឋាននៃភាពស័ក្ដិសមដើម្បីចូលក្នុងដំណាក់របស់ទ្រង់ ។
ព្រះអម្ចាស់បានណែនាំដល់ថ្នាក់ដឹកនាំបព្វជិតភាពឲ្យធានាថាយើងចូលក្នុងដំណាក់របស់ទ្រង់ដោយមានភាពស័ក្តិសម ។
អ្នកអាចពន្យល់ថា ខណៈមនុស្សគ្រប់គ្នាត្រូវបានអញ្ជើញឲ្យរៀបចំខ្លួនទៅព្រះវិហារបរិសុទ្ធ នោះយើងត្រូវតែបំពេញតាមបទដ្ឋាននៃភាពស័ក្តិសមរបស់ព្រះអម្ចាស់ដើម្បីចូលទៅក្នុងដំណាក់របស់ទ្រង់ ។
-
តើបទដ្ឋានរបស់ព្រះអម្ចាស់ដើម្បីចូលក្នុងព្រះវិហារបរិសុទ្ធរបស់ទ្រង់ជាភស្ដុតាងនៃសេចក្តីស្រឡាញ់ និងបំណងប្រាថ្នារបស់ទ្រង់សម្រាប់យើងយ៉ាងដូចម្ដេច ?
នៅពេលសិស្សឆ្លើយសំណួរមុននេះ សូមជួយពួកគេឲ្យដឹងថា ការរស់នៅតាមបទដ្ឋានរបស់ព្រះអម្ចាស់ជួយយើងឲ្យប្រែក្លាយដូចជាទ្រង់ ធ្វើឲ្យយើងអាចមើលឃើញនូវអ្វីដែលយើងកំពុងធ្វើបានល្អក្នុងការខិតខំរបស់យើងដើម្បីមករកទ្រង់ ហើយប្រទានពរដល់យើងដោយនូវព្រះវិញ្ញាណ និងសេចក្តីសុខសាន្តរបស់ទ្រង់ ។
សំណួរសម្រាប់ទទួលប័ណ្ណចូលព្រះវិហារបរិសុទ្ធ
ដើម្បីជួយសិស្សវាយតម្លៃពីអ្វីដែលពួកគេដឹងអំពីការទាមទាររបស់ព្រះអម្ចាស់ដើម្បីចូលទៅក្នុងដំណាក់របស់ទ្រង់ សូមអញ្ជើញសិស្សឲ្យមើលសំណួរសម្ភាសទទួលប័ណ្ណចូលព្រះវិហារបរិសុទ្ធ នៅក្នុងឧបសម្ព័ន្ធនៃ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] នៅក្នុងបណ្ណាល័យដំណឹងល្អ ។ ជាជម្រើសមួយផ្សេងទៀត អ្នកអាចចែកចាយច្បាប់ចម្លងនៃសៀវភៅណែនាំនេះ ទំព័រ ៣៦–៣៧ មកពីសៀវភៅណែនាំ ដើម្បីកម្លាំងនៃយុវជន ឬសរសេរសំណួរនៅលើក្ដារខៀនដោយផ្ទាល់ ។
សូមបើកទៅសំណួរសម្ភាសទទួលប័ណ្ណចូលព្រះវិហារបរិសុទ្ធដែលមាននៅក្នុងឧបសម្ព័ន្ធ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] និងធ្វើដូចខាងក្រោម ៖
-
សូមអានសំណួរសម្ភាសទទួលប័ណ្ណចូលព្រះវិហារបរិសុទ្ធទាំងអស់ ហើយជញ្ជឹងគិត (១) ថាតើអ្នកយល់ពីអ្វីដែលសំណួរកំពុងសួរឬទេ និង (២) តើការរស់នៅតាមបទដ្ឋានទាំងនេះអាចរៀបចំយើងឲ្យចូលទៅក្នុងដំណាក់ដ៏បរិសុទ្ធរបស់ព្រះអម្ចាស់ដោយរបៀបណា ។
-
សូមជ្រើសរើសសំណួរមួយក្នុងចំណោមសំណួរទាំងនេះដែលអ្នកចង់ស្វែងយល់បន្ថែមអំពីវា ។
ចែកចាយសំណៅមេរៀនដែលមានចំណងជើងថា « សំណួរសម្ភាសទទួលប័ណ្ណចូលព្រះវិហារបរិសុទ្ធ » ដល់សិស្សម្នាក់ៗ ។ អញ្ជើញពួកគេឲ្យសរសេរសំណួរដែលពួកគេបានរកឃើញនៅក្នុងប្រអប់នៅផ្នែកខាងលើនៃសំណៅមេរៀននេះ ។ បន្ទាប់មក សិស្សអាចបំពេញសំណៅមេរៀនដែលនៅសេសសល់ ។ ជំនួយបន្ថែមដើម្បីយល់អំពីសំណួរមួយចំនួននេះ គឺមាននៅក្នុងផ្នែកធនធានបន្ថែមទាំងឡាយនៃមេរៀននេះ នៅលើបណ្ណាល័យដំណឹងល្អ ។
សូមផ្តល់ឱកាសឲ្យសិស្សចែកចាយការយល់ដឹងដែលពួកគេទទួលបានពីព្រះវិញ្ញាណបរិសុទ្ធនៅក្នុងការសិក្សារបស់ពួកគេ ។ អ្នកអាចធ្វើការណ៍នេះដោយរៀបចំពួកគេជាក្រុមតូចៗ ហើយអញ្ជើញបុគ្គលម្នាក់ៗឲ្យចែកចាយអ្វីមួយដែលពួកគេបានរៀនចេញពីការសិក្សារបស់ពួកគេ ។ ពួកគេអាចពន្យល់ពីរបៀបដែលអ្វីដែលពួកគេបានរកឃើញជួយពួកគេយល់ពីបទដ្ឋានរបស់ព្រះអម្ចាស់ដើម្បីចូលក្នុងដំណាក់របស់ទ្រង់ ។ សូមលើកទឹកចិត្តសិស្សឲ្យកត់ត្រាការយល់ដឹងដែលពួកគេបានរៀនពីមិត្តរួមថ្នាក់របស់ពួកគេនៅខាងក្រោយសំណៅមេរៀនរបស់ពួកគេ ។
-
តើការរស់នៅតាមបទដ្ឋានរបស់ព្រះអម្ចាស់ដើម្បីចូលក្នុងដំណាក់របស់ទ្រង់ អាចជួយយើងឲ្យប្រែក្លាយកាន់តែដូចទ្រង់បានយ៉ាងដូចម្ដេច ?
-
តើបទដ្ឋានទាំងនេះជាភស្ដុតាងនៃសេចក្តីស្រឡាញ់របស់ទ្រង់ដោយរបៀបណា ?
ការពិចារណាផ្ទាល់ខ្លួន
នៅពេលសិស្សគិតពិចារណាអំពីភាពស័ក្ដិសមរបស់ពួកគេដើម្បីចូលទៅក្នុងព្រះវិហារបរិសុទ្ធ សូមពិចារណាពីអារម្មណ៍របស់សិស្សរបស់អ្នក ។ តើអ្វីខ្លះដែលអាចជាកង្វល់របស់ពួកគេ ? តើអ្នកអាចរៀបចំដើម្បីជួយពួកគេឲ្យទទួលអារម្មណ៍នៃសេចក្តីស្រឡាញ់របស់ព្រះវរបិតាសួគ៌ និងការធានារបស់ព្រះអង្គសង្គ្រោះថា តាមរយៈទ្រង់ ពួកគេអាចមានភាពស័ក្ដិសមដោយរបៀបណា ? ការអានសេចក្ដីថ្លែងការណ៍ខាងក្រោមនេះ គឺជារបៀបមួយដើម្បីជួយសិស្សឲ្យទទួលអារម្មណ៍នូវសេចក្ដីសង្ឃឹមថា ពួកគេអាចចូលក្នុងដំណាក់របស់ព្រះអម្ចាស់ដោយភាពស័ក្ដិសមដោយមានជំនួយរបស់ព្រះអង្គសង្គ្រោះ ។
អែលឌើរ ផាទ្រីក ខៀរ៉ុន ក្នុងកូរ៉ុមនៃសាវកដប់ពីរនាក់បានបង្រៀនពីបំណងប្រាថ្នារបស់ព្រះវរបិតាសួគ៌ចំពោះបុត្រាបុត្រីរបស់ទ្រង់នៅក្នុងការចូលទៅក្នុងនគររបស់ទ្រង់ ។ សូមពិចារណាអំពីអ្វីដែលលោកចែកចាយអាចអនុវត្តចំពោះព្រះរាជបំណងរបស់ទ្រង់សម្រាប់បុត្រាបុត្រីរបស់ទ្រង់ដើម្បីចូលក្នុងដំណាក់ដ៏បរិសុទ្ធរបស់ទ្រង់ ។
មិត្តខ្ញុំអើយ យើងជាពួកសិស្សដើរនៅលើផ្លូវនៃជីវិតរមែងស្លាប់ ផែនការរបស់ព្រះវរបិតាយើងល្អណាស់ គឺជាផែនការ « ដ៏អស្ចារ្យ » ត្រូវបានរៀបចំឡើងដើម្បីនាំបងប្អូនទៅផ្ទះវិញ ពុំមែន ឲ្យបងប្អូននៅខាងក្រៅផ្ទះនោះទេ ។ គ្មាននរណាម្នាក់ដាក់របាំងបិទផ្លូវ ហើយឈរនៅទីនោះដើម្បីដេញបងប្អូនឲ្យថយទៅក្រោយវិញឡើយ ។ តាមពិត វាផ្ទុយស្រឡះ ។ ព្រះខិតខំឲ្យមានទំនាក់ទំនងជាមួយបងប្អូនដោយឥតឈប់ឈរ ។ ទ្រង់ « សព្វព្រះទ័យចង់ឲ្យបុត្រាបុត្រីទ្រង់ជ្រើសរើសត្រឡប់ទៅកាន់ទ្រង់វិញ » ហើយទ្រង់បង្កើតគ្រប់វិធានការតាមដែលអាចធ្វើទៅបានដើម្បីនាំបងប្អូនឲ្យត្រឡប់មកវិញ ។ ( « ព្រះរាជបំណងរបស់ព្រះគឺដើម្បីនាំបងប្អូនទៅផ្ទះវិញ » លីអាហូណា ខែឧសភា ឆ្នាំ២០២៤ ទំព័រ ៨៧ ) ( នាទីទី ២:១៦ ដល់ ៣:០១ )
សូមប្រាកដថា សិស្សមានពេលគ្រប់គ្រាន់ដើម្បីធ្វើការគិតពិចារណាដូចខាងក្រោម ។
គិតពិចារណាអំពីភាពស័ក្ដិសមផ្ទាល់ខ្លួនរបស់អ្នកដើម្បីចូលក្នុងដំណាក់របស់ព្រះអម្ចាស់ ។ របៀបមួយដែលអ្នកអាចធ្វើបានគឺអានសំណួរសម្ភាសទទួលប័ណ្ណចូលព្រះវិហារបរិសុទ្ធឡើងវិញ ហើយឆ្លើយសំណួរនីមួយៗដោយស្ងៀមស្ងាត់សម្រាប់ខ្លួនឯង ។ នៅក្នុងសៀវភៅកំណត់ហេតុការសិក្សារបស់អ្នក ឬនៅខាងក្រោយសំណៅមេរៀនរបស់អ្នក សូមឆ្លើយតបទៅនឹងសំណួរខាងក្រោមនេះ ៖
-
តើអ្នកគិតថាព្រះវរបិតាសួគ៌ និងព្រះយេស៊ូវគ្រីស្ទសព្វព្រះទ័យឲ្យអ្នកដឹង ទទួលអារម្មណ៍ ឬធ្វើអ្វី ?
លើកទឹកចិត្តសិស្សឲ្យខិតខំមានភាពស័ក្តិសម ឬបន្តមានភាពស័ក្ដិសមដើម្បីចូលព្រះវិហារបរិសុទ្ធ និងដឹងពីព្រះឆន្ទៈរបស់ព្រះអង្គសង្គ្រោះក្នុងការជួយយើងរៀបចំខ្លួនចូលក្នុងដំណាក់របស់ទ្រង់ ។