« នៅក្នុងព្រះវិហារបរិសុទ្ធ យើងធ្វើសេចក្ដីសញ្ញាដើម្បីគោរពតាមក្រឹត្យវិន័យនៃការគោរពប្រតិបត្តិ និងការពលិកម្ម ៖ សេចក្ដីសញ្ញាដើម្បីគោរពតាមព្រះ ហើយធ្វើការពលិកម្មសម្រាប់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« នៅក្នុងព្រះវិហារបរិសុទ្ធ យើងធ្វើសេចក្ដីសញ្ញាដើម្បីគោរពតាមក្រឹត្យវិន័យនៃការគោរពប្រតិបត្តិ និងការពលិកម្ម ៖ សេចក្ដីសញ្ញាដើម្បីគោរពតាមព្រះ ហើយធ្វើការពលិកម្មសម្រាប់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការរៀបចំខ្លួនទៅព្រះវិហារបរិសុទ្ធ ៖ ក្រឹត្យវិន័យនៃការគោរពប្រតិបត្តិ និងការពលិកម្ម
នៅក្នុងព្រះវិហារបរិសុទ្ធ យើងធ្វើសេចក្ដីសញ្ញាដើម្បីគោរពតាមក្រឹត្យវិន័យនៃការគោរពប្រតិបត្តិ និងការពលិកម្ម
សេចក្ដីសញ្ញាដើម្បីគោរពតាមព្រះ ហើយធ្វើការពលិកម្មសម្រាប់ទ្រង់
ព្រះវរបិតាសួគ៌ស្រឡាញ់បុត្រាបុត្រីរបស់ទ្រង់ទាំងអស់ ។ របៀបមួយក្នុងចំណោមរបៀបដែលព្រះវរបិតាសួគ៌បង្ហាញសេចក្ដីស្រឡាញ់របស់ទ្រង់ គឺដោយការអញ្ជើញបុត្រាបុត្រីរបស់ទ្រង់ឲ្យធ្វើសេចក្ដីសញ្ញាជាមួយទ្រង់ក្នុងព្រះវិហារបរិសុទ្ធ ។ សេចក្ដីសញ្ញាទាំងនេះរួមបញ្ចូលទាំងការសន្យារបស់យើងក្នុងការគោរពតាមក្រឹត្យវិន័យនៃការគោរពប្រតិបត្តិ និងក្រឹត្យវិន័យនៃការពលិកម្ម ។ មេរៀននេះអាចជួយសិស្សឲ្យយល់ពីក្រឹត្យវិន័យនៃការគោរពប្រតិបត្តិ និងការពលិកម្ម ដែលយើងធ្វើសេចក្តីសញ្ញាថានឹងរក្សានៅក្នុងពិធីអំណោយទានពិសិដ្ឋ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីសំណួរនេះមុនពេលមកថ្នាក់ ៖ តើការធ្វើសេចក្ដីសញ្ញាបន្ថែមជាមួយព្រះវរបិតាសួគ៌នឹងប្រទានពរដល់ជីវិតខ្ញុំយ៉ាងដូចម្ដេច ?
សកម្មភាពរៀនសូត្រដែលអាចមាន
គោលបំណងនៃព្រះវិហារបរិសុទ្ធ
ចាប់ផ្តើមមេរៀននេះដោយជួយសិស្សឲ្យស្គាល់ពីមូលហេតុដែលពួកគេចង់ធ្វើសេចក្តីសញ្ញាជាមួយព្រះវរបិតាសួគ៌ និងព្រះយេស៊ូវគ្រីស្ទ ។ ខាងក្រោមនេះគឺជាវិធីមួយដើម្បីធ្វើកិច្ចការនេះ ។ អ្នកអាចចាប់ផ្តើមដោយការស្វែងរកកាលៈទេសៈលំបាកមួយចំនួនដែលមនុស្សអាចប្រឈមមុខក្នុងជីវិត ដែលអាចនាំពួកគេឲ្យឃ្លាតឆ្ងាយពីព្រះ ។ គំនិតមួយចំនួនអាចជាការលែងលះ ជំងឺ ឬការបាត់បង់ការងារ ។
-
ហេតុអ្វីបានជាកាលៈទេសៈលំបាកៗមួយចំនួនដែលមនុស្សប្រឈមមុខធ្វើឲ្យពួកគេឃ្លាតឆ្ងាយពីព្រះ ?
-
ហេតុអ្វីបានជាវាសំខាន់ខ្លាំងម៉្លេះដែលយើងនៅជិតព្រះ ជាជាងនៅឆ្ងាយពីទ្រង់ នៅក្នុងកាលៈទេសៈទាំងនេះ ?
សូមជញ្ជឹងគិតពីរបៀបដែលយើងអាចរៀបចំខ្លួនសម្រាប់បញ្ហាប្រឈមក្នុងជីវិត ដើម្បីឲ្យយើងនៅជិតព្រះ ហើយទទួលជំនួយ និងព្រះចេស្ដារបស់ព្រះ ។
យកកៅស៊ូហាត់ប្រាណចំនួនបីទៅថ្នាក់រៀន ។ សូមអញ្ជើញសិស្សបីនាក់ឲ្យឡើងមកខាងមុខថ្នាក់ ឬបង្ហាញរូបភាពដែលភ្ជាប់មកជាមួយ ហើយពិពណ៌នាអំពីអ្វីដែលកំពុងកើតឡើង ។ រុំកៅស៊ូហាត់ប្រាណនៅជុំវិញកដៃសិស្សទីមួយ ។ រុំកៅស៊ូហាត់ប្រាណពីរជុំនៅជុំវិញកដៃសិស្សទីពីរ ។ បន្ទាប់មករុំកៅស៊ូហាត់ប្រាណបីជុំនៅជុំវិញកដៃសិស្សទីបី ។
សូមអញ្ជើញសិស្សម្នាក់ក្នុងចំណោមសិស្សទាំងបីនាក់ឲ្យត្រដាងដៃចេញពីគ្នា ដើម្បីមើលថាតើអ្នកណាអាចត្រដាងដៃបានស្រួលជាងគេ ។ អ្នកក៏អាចសួរសិស្សក្នុងថ្នាក់ថាតើក្នុងចំណោមសិស្សទាំងបីនាក់នេះ ម្នាក់ណាដែលពួកគេគិតថាអាចដកដៃចេញពីកៅស៊ូបានស្រួលជាងគេ ។
ជាជម្រើសមួយផ្សេងទៀត អ្នកអាចចែកចាយវីដេអូនេះ « Stronger and Closer Connection to God Through Multiple Covenants » ចាប់ពីនាទីទី ៤:១៣ ដល់ ៥:៤៤ ដែលអែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានបង្ហាញមេរៀនអំពីមេរៀនដែលប្រើវត្ថុនេះជាមួយយុវមជ្ឈិមវ័យបីនាក់ ។
-
តើមេរៀនដែលប្រើវត្ថុនេះអាចបង្រៀនយើងអ្វីខ្លះអំពីការធ្វើ និងការរក្សាសេចក្តីសញ្ញាជាមួយព្រះ ?
អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានចែកចាយពីរបៀបដែលការធ្វើសេចក្តីសញ្ញាជាមួយព្រះអាចផ្ដល់ពរដល់យើង ៖
សេចក្ដីសញ្ញានីមួយៗបន្ថែមចំណងមួយ ដោយនាំឲ្យយើងកាន់តែខិតជិត និងពង្រឹងទំនាក់ទំនងរបស់យើងជាមួយព្រះ ។
… នៅពេលយើងប្រឈមមុខនឹងឧបសគ្គក្នុងជីវិត លទ្ធភាពដែលយើងធ្វើឲ្យយើងឃ្លាតឆ្ងាយពីព្រះគឺនឹងថយចុះ ។ ( « Stronger and Closer Connection to God Through Multiple Covenants » [ ការប្រជុំធម្មនិដ្ឋាននៅសាកលវិទ្យាល័យព្រិកហាំយ៉ង់ ថ្ងៃទី៥ ខែមីនា ឆ្នាំ២០២៤ ] ទំព័រ ២, ៣ នៅលើគេហទំព័រ speeches.byu.edu )
អ្នកអាចសុំឲ្យសិស្សស្វែងរកសេចក្ដីសញ្ញាមួយចំនួនដែលយើងធ្វើជាមួយនឹងព្រះ ។
យើងធ្វើសេចក្ដីសញ្ញាជាមួយនឹងព្រះវរបិតាសួគ៌នៅក្នុងព្រះវិហារបរិសុទ្ធ ជាផ្នែកនៃអំណោយទានពិសិដ្ឋនៅក្នុងព្រះវិហារបរិសុទ្ធ ។ ដោយជាផ្នែកនៃអំណោយទានពិសិដ្ឋ នោះយើងបានធ្វើសេចក្ដីសញ្ញាដើម្បីគោរពតាមក្រឹត្យវិន័យនៃការគោរពប្រតិបត្តិ និងការពលិកម្ម ដំណឹងល្អនៃព្រះយេស៊ូវគ្រីស្ទ ព្រហ្មចារីភាព និងការថ្វាយ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ២៧.២ ) ។ មេរៀននេះផ្តោតលើក្រឹត្យវិន័យនៃការគោរពប្រតិបត្តិ និងការពលិកម្ម ។
សូមពិចារណាអញ្ជើញសិស្សឲ្យសរសេរដូចខាងក្រោមនេះនៅក្នុងសៀវភៅកំណត់ហេតុរបស់ពួកគេ ៖ ដោយជាផ្នែកនៃពិធីអំណោយទានពិសិដ្ឋនៅក្នុងព្រះវិហារបរិសុទ្ធ យើងធ្វើសេចក្តីសញ្ញាជាមួយព្រះវរបិតាសួគ៌ និងព្រះយេស៊ូវគ្រីស្ទដើម្បីរស់នៅតាមក្រឹត្យវិន័យនៃការគោរពប្រតិបត្តិ និងក្រឹត្យវិន័យនៃការពលិកម្ម ។
ក្រឹត្យវិន័យនៃការគោរពប្រតិបត្តិ និងការពលិកម្ម
សំណៅមេរៀនដែលភ្ជាប់មកជាមួយ « ក្រឹត្យវិន័យនៃការគោរពប្រតិបត្តិ និងការពលិកម្ម » គឺត្រូវបានរៀបចំឡើងដើម្បីជួយសិស្សឲ្យយល់កាន់តែស៊ីជម្រៅពីក្រឹត្យវិន័យទាំងនេះ ។ ខាងក្រោមនេះគឺជារបៀបមួយចំនួនដែលសិស្សអាចបំពេញសំណៅមេរៀននេះ ៖
១. សិស្សអាចធ្វើការជាគូ ដោយដៃគូម្នាក់ៗយកផ្នែកមួយដើម្បីបំពេញ ។ បន្ទាប់មកពួកគេអាចចែកចាយជាមួយគ្នាទៅវិញទៅមកនូវអ្វីដែលពួកគេបានរៀន ។
២. សិស្សអាចធ្វើការរៀងៗខ្លួន ហើយជ្រើសរើសផ្នែកមួយដែលពួកគេចង់បំពេញ ។ បន្ទាប់ពីបំពេញផ្នែកទាំងនេះ ពួកគេអាចស្វែងរកនរណាម្នាក់ដែលសិក្សាផ្នែកផ្សេង ហើយចែកចាយអ្វីដែលពួកគេបានរៀន ។
៣. អាចរៀបចំសិស្សជាក្រុមដែលមានគ្នាបីនាក់ ។ បន្ទាប់មក អាចចាត់សំណួរមួយនៃសំណួរទាំងបីអំពីការគោរពប្រតិបត្តិទៅសិស្សម្នាក់ៗដើម្បីឆ្លើយ ។ បន្ទាប់ពីពិភាក្សាអំពីអ្វីដែលពួកគេបានរៀនអំពីការគោរពប្រតិបត្តិ ពួកគេអាចធ្វើដូចគ្នាសម្រាប់ការពលិកម្ម ។
អ្វីដែលខ្ញុំបានរៀន
ព្រះវិញ្ញាណបរិសុទ្ធអាចបញ្ជាក់ពីសេចក្តីពិតដែលសិស្សបានរៀន នៅពេលពួកគេចែកចាយបទពិសោធន៍ និងទីបន្ទាល់ ។ សូមអញ្ជើញសិស្សឲ្យចែកចាយបទពិសោធន៍ផ្ទាល់ខ្លួន ឬគិតអំពីនរណាម្នាក់ដែលជាគំរូនៃការគោរពប្រតិបត្តិ ឬដែលមានឆន្ទៈដើម្បីធ្វើការពលិកម្មសម្រាប់កិច្ចការរបស់ព្រះអម្ចាស់ ។ វាអាចមានប្រយោជន៍ក្នុងការចែកចាយបទពិសោធន៍ ឬឧទាហរណ៍ផ្ទាល់ខ្លួន ។ សំណួរខាងក្រោមអាចប្រើប្រាស់បាននៅពេលដែលសិស្សចែកចាយបទពិសោធន៍ ដែលជាផ្នែកមួយនៃការពិភាក្សាក្នុងថ្នាក់ ឬសម្រាប់សិស្សដើម្បីឆ្លើយនៅក្នុងសៀវភៅកំណត់ហេតុការសិក្សារបស់ពួកគេ ។
-
តើការគោរពតាមក្រឹត្យវិន័យនៃការគោរពប្រតិបត្តិ និងការពលិកម្មអាចជួយយើងឲ្យប្រែក្លាយកាន់តែដូចជាព្រះយេស៊ូវគ្រីស្ទបានយ៉ាងដូចម្ដេច ?
-
តើការធ្វើសេចក្ដីសញ្ញាដើម្បីគោរពតាមក្រឹត្យវិន័យទាំងពីរនេះនៅក្នុងព្រះវិហារបរិសុទ្ធអាចជួយយើងខិតទៅជិត និងពង្រឹងទំនាក់ទំនងរបស់យើងជាមួយព្រះបានយ៉ាងដូចម្ដេច ?