“Pag-organisar sa mga Buluhaton ug mga Prayoridad: Makatabang Nato ang Ehemplo sa Manluluwas aron Mahapsay ang Atong Kinabuhi,” Manwal sa Magtutudlo sa Seminary sa Daang Tugon (2026)
“Pag-organisar sa mga Buluhaton ug mga Prayoridad: Makatabang Nato ang Ehemplo sa Manluluwas aron Mahapsay ang Atong Kinabuhi,” Manwal sa Magtutudlo sa Seminary sa Daang Tugon
Magmalamposon sa Pag-eskwela: Leksiyon 195
Pagbuntog sa Paglangaylangay
Pagkat-on nga Malikayan ang Kalangan sa Buluhaton sa Eskwelahan
Unsa ka sagad nimong mabantayan ang imong kaugalingon nga dili humanon ang gikinahanglang mga buluhaton ug mga asaynment? Bisan tuod kitang tanan nakigbisog sa pagkalangan, pwedeng mahimong komon nga tintasyon ang paglangaylangay sa buluhaton sa eskwelahan. Dihang maningkamot kita nga mabuntog nato kini nga posibilidad, usa kini ka paagi nga atong matuman ang mga pasidaan sa Manluluwas nga likayan ang paglangay-angay (tan-awa ang Mateo 25:1–13). Kini nga leksiyon makatabang sa mga estudyante sa pag-ila sa mga paagi aron mabuntog ang tentasyon nga maglangaylangay sa buluhaton sa eskwelahan.
Pagpangandam sa estudyante: Dapita ang mga estudyante nga mosulod sa klase nga andam sa pipila ka rason sa mga tin-edyer kon nganong maglangaylangay sila sa ilang buluhaton sa eskwelahan. Awhaga sila nga mangandam sa pagpakigbahin sa ilang gihimo aron kanunay nga dili maulahi sa ilang mga buluhaton ug asaynment sa eskwelahan.
Posibleng mga Kalihokan sa Pagkat-on
Ang hugot nga pagtuo diha kang Jesukristo mosangpot sa paglihok
Sa pagsugod sa klase, ikonsiderar ang kinatibuk-ang paghisgot bahin sa tentasyon nga maglangaylangay. Pwede nimong ipangutana ang mosunod.
-
Unsang pipila ka kasagaran nga butang diin maglangaylangay tingali ang mga tin-edyer?
-
Unsa tingali ang pipila ka rason sa mga tin-edyer kon nganong naglangaylangay sila aning mga butanga? Unsa tingali ang mga sangpotanan ani?
Human sa panaghisgot, pwede nimong ipakigbahin nga makabaton og kahigayonan karon ang mga estudyante nga tutokan ang pagbuntog sa tentasyon nga maglangaylangay sa ilang buluhaton sa eskwelahan.
-
Unsay pipila ka rason kon nganong lisod ang pagsugod o paghuman sa mga buluhaton o mga asaynment?
Dayon, pwede nimong ipakita ang usa ka litrato sa mga Israelita nga nagkuha og mana. Kon natun-an na sa mga estudyante ang Leksiyon 47: “Exodo 16,” ikonsiderar ang pagdapit sa mga estudyante nga ipakigbahin ang ilang nahinumdoman. Kon wala pa nila matun-i kini nga asoy, pwede nimong ipakigbahin kadiyot ang mosunod nga summary.
Lisod ang pagtigom og pagkaon diha sa kamingawan para sa mga Israelita. Mimata sila usa niana ka buntag nga naa nay milagrosong gitagana ang Ginoo nga pagkaon nila kada adlaw nga tawgon sa mga Israelita og mana.
Basaha ang Exodo 16:4–5, 14–15, nga pangitaon ang instruksiyon sa Ginoo kon unsaon pagkuha ang mana.
-
Unsay gitudlo niini nga mga milagro kanato bahin sa Ginoo?
Basaha ang Exodo 16:18–22, 27, nga pangitaon ang mga sangpotanan sa paglangaylangay sa pagkuhag mana o dili pagkuha og dobleng gidaghanon sa adlaw una pa ang Igpapahulay.
-
Unsay mipatigbabaw diha kanimo?
Pwedeng ipakigbahin sa mga estudyante nga kon magbilin ang mga Israelita og mana sa yuta hangtod sa sunod nga adlaw, kini “giulod kini ug nabaho” (bersikulo 20). Kon dili sila magkuha inigkabuntag, malanay ni (bersikulo 21). Walay itagana nga mana sa Igpapahulay, mao nga kon dili sila magkuha og dobleng gidaghanon sa adlaw una pa ang Igpapahulay, magutman sila (bersikulo 27).
-
Sa unsang paagi kini nga asoy magamit sa tintasyon sa tin-edyer nga maglangaylangay sa ilang buluhaton sa eskwelahan?
Ipasabot tingali sa mga estudyante nga sama ra nga mapan-os o malanay ang mana kon maglangaylangay ang katawhan sa pagkuha niini, ang paglangay-langay sa buluhaton sa eskwelahan adunay negatibong mga sangpotanan o gani mapalta nga mga oportunidad.
-
Unsa ang pipila ka sangpotanan sa paglangay-langay sa buluhaton sa eskwelahan nga nakita nimo o sa imong kaila?
Ayaw usiki ang imong oras
Aron tabangan kitang masabtan ang kaimportante sa pagbuntog sa tentasyon sa paglangaylangay, si Elder Randall K. Bennett sa Seventy miingon:
[K]inahanglang atong batukan ang kalagmitan sa kinaiyanhong tawo nga maglangay-langay o moundang.
Samtang nag-uswag kita diha sa dalan sa pakigsaad, kita makahimo og mga sayop, ang uban sa makadaghang higayon. … Apan ang hugot nga pagtuo diha sa Langitnong Amahan ug ni Jesukristo usa ka baroganan sa lihok ug gahum. Kon kita andam nga molihok, kita hatagan sa kalig-on nga maghinulsol ug kalig-on nga mag-usab.
Mapakyas lamang kita kon kita mapakyas sa paghimo og laing matinud-anong lakang sa pagpadayon. Dili kita mapakyas, dili gayud, kon kita matinud-anong nakayugo ngadto sa Maluluwas sa kalibutan—Kaniya kinsa dili gayud mapakyas ug dili mopakyas kanato! (“Ang Inyong Sunod nga Lakang,” Liahona, Nob. 2015, 75) (time code 7:37 hangtod 8:31)
-
Unsaon nimo pag-summarize ang gitudlo ni Elder Bennett bahin sa pagbuntog sa paglangaylangay?
Tabangi ang mga estudyante nga mailhan ang kamatuoran nga sama sa samtang molihok kita uban ang hugot nga pagtuo Kaniya, tabangan kita sa Manluluwas nga mabuntog ang tentasyon nga maglangaylangay. Aron tabangan ang mga estudyante nga masabtan kini nga kamatuoran, pwede nimong ipangutana ang mosunod:
-
Sa unsang paagi ang pagsabot niini nga kamatuoran motabang sa usa ka tawo kinsa naningkamot sa pagbuntog sa tentasyon nga maglangay-langay sa ilang buluhaton sa eskwelahan?
Mainampoong ikonsiderar kon unsa ka kamaayo sa pagkompleto sa mga buluhaton sa eskwelahan ug mga asaynment sa hustong panahon. Dayon tiwasa ang mosunod nga pahayag diha sa inyong journal sa pagtuon.
Ako (kanunay, usahay, panagsa ra kaayo, ug uban pa) nga maglangaylangay sa akong buluhaton sa eskwelahan. Ang rason nga maglangaylangay ko mao ang .
Tabangi ang mga estudyante nga masabtan nga ang pag-ila kon nganong maglangay-langay kita makatabang aron masakto nato ang dili makatabang nga kinaiya o malikayan nga maugmad kini. Mahimo nimong ipasalig sa mga estudyante nga misaad ang Langitnong Amahan ug si Jesukristo nga tabangan kitang makalikay sa mga tentasyon nga atong giatubang (tan-awa ang 1 Mga Taga-Corinto 10:13).
Bisag komon nga pakigbisog ang paglangay-langay, molihok kita uban ang hugot nga pagtuo sa Manluluwas dihang maningkamot tkia nga mabuntog kini nga tentasyon. Dapita ang Espiritu Santo nga tabangan kang mailhan ang mga paagi diin mapauswag sa Langitnong Amahan ug ni Jesukristo ang innyong mga paningkamot nga mabuntog ang tentasyon nga maglangay-langay sa inyong buluhaton sa eskwelahan.
Dugangi ang imong abilidad nga mabuntog ang paglangay-langay
-
Unsa ang pipila ka estratehiya ang imong nasulayan aron matabangan kang masuklan ang tentasyon nga maglangay-langay sa inyong buluhaton sa eskwelahan?
Ikonsiderar ang pagdapit sa mga estudyante nga maghimo og listahan diha sa pisara. Kon kinahanglan silag tabang, pwede nimong ipakigbahin ang pipila sa mosunod nga mga estratehiya.
-
Paggahin og pipila ka panahon kada adlaw nga mag-ampo sa Langitnong Amahan, nga mohangyo sa Iyang gahom nga motabang ninyo nga mahinumdom ug mahuman ang mga buluhaton sa eskwelahan.
-
Paggahin og regular nga panahon kada adlaw para sa buluhaton sa eskwelahan.
-
Paggahin og mubo, regular nga mopahuway aron mapresko ang imong hunahuna ug maka-pokus pag-usab.
-
Ilha ang mga makabalda ug ipalayo kini. Apil tingali ani ang selpon, computer, o basahon.
-
Pag-organisar og grupo sa pagtuon uban ang mga classmate kinsa adunay parehas nga asaynment sa eskwelahan.
-
Pangitag mingaw nga lugar para magtrabaho. Makaapektar ang atong palibot sa atong abilidad nga magpunting.
-
Pagpilig kasaligan ninyong tawo nga makatabang ninyo nga magpabiling nakapunting ug makompleto ang mga asaynment.
-
Pagplano og ganti dihang mahuman ninyo ang pihong buluhaton aron masaulog ang imong kalamposan ug paningkamot.
Human mailhi sa mga estudyante ang pipila ka estratehiya sa aron mabuntog ang paglangaylangay, ikonsiderar ang pagpakita sa mosunod nga senaryo ug mga instruksiyon. Pwede nimong hatagan og mga art supply ang mga estudyante nga gamiton para sa ilang display.
Naglangaylangay si Max sa (pagtuon para sa eksamin, pagkompleto sa asaynment o proyekto, ug uban pa) kay .
Paghimo og poster o infographic nga makatabang aron madasig ang usa ka estudyante nga parehas ni Max nga mabuntog ang tentasyon sa paglangay-langay. Apila ang mosunod diha sa inyong poster.
-
Usa ka doktrinal nga kahanas o uban pang tudling sa kasulatan nga makatabang kang Max nga mosalig sa Langitnong Amahan ug ni Jesukristo alang sa tabang aron mabuntog kini nga tentasyon.
-
Usa o kapin pang estratehiya nga para ninyo makatabang nga himoon ni Max samtang gibuntog ang paglangay-langay.
Kon nagkinahanglan og tabang ang mga estudyante sa pagpangitag tudling sa kasulatan, pwede nimong ipakigbahin ang mga ehemplo nga sama sa Josue 24:15; Mga Panultihon 3:5–6; Doktrina ug mga Pakigsaad 58:26–27; 88:124. O pwede nilang idrowing ang usa ka asoy sa kasulatan nga magpakita sa mga sangpotanan sa paglangay-langay, sama sa istorya sa mga Israelita nga nagkuhag mana o si Noe nga nagtukod og arka (Genesis 7:1–10).
Makasugod kita karon
Hatagig panahon ang mga grupo nga ipakigbahin ang ilang poster ngadto sa klase. Pwede nimong dapiton ang mga estudyante nga ipakigbahin ang ilang mga kasinatian sa pagpaningkamot nga mabuntog ang tentasyon sa paglangaylangay.
Pamalandongi ang pipila sa mga paagi nga mabuntog ang paglangay-langay nga atong gipakigbahin karon. Mainampoong magpili og estratehiya nga para ninyo makatabang sa sunod nga panahon nga matental kamo sa paglangay-langay sa inyong buluhaton sa eskwelahan. Isulat kini nga estratehiya diha sa inyong journal sa pagtuon o sa sticky note o i-text kini sa inyong kaugalingon.
Pwede nimong hatagan og higayon ang mga estudyante nga andam ipakigbahin ang usa ka butang nga gibati nila nga sulayan.
Makatabang tingali ang pagpahinumdom sa mga estudyante nga bisan unsang paningkamot nga mouswag maoy pagpakita sa ilang hugot nga pagtuo diha ni Jesukristo. Tabangi silang ilhon nga tabangan kita sa Langitnong Amahan ug ni Jesukristo sa atong mga paningkamot, bisag maglisod kita.