“Pagbuntog sa mga Babag sa Pagpadayon sa Edukasyon: Paggamit sa Tanang Anaa nga mga Kapanguhaan,” Manwal sa Magtutudlo sa Seminary sa Daang Tugon (2026)
“Pagbuntog sa mga Babag sa Pagpadayon sa Edukasyon: Paggamit sa Tanang Anaa nga mga Kapanguhaan,” Manwal sa Magtutudlo sa Seminary sa Daang Tugon
Pagpangandam alang sa Umaabot nga Edukasyon ug Pagpanarbaho: Leksiyon 190
Pagbuntog sa mga Babag sa Pagpadayon sa Edukasyon
Paggamit sa Tanang Anaa nga mga Kapanguhaan
Ang Ginoo mitudlo nga “ang himaya sa Dios mao ang kinaadman” (Doktrina ug mga Pakigsaad 93:36). Dugang pa, balikbalik nga gitudlo sa mga lider sa Simbahan ang kaimportante sa edukasyon. Pero, usahay ang mga babag makapalisod sa pagpadayon sa atong edukasyon. Kini nga leksiyon makatabang sa mga estudyante sa pag-ila sa anaa nga mga kapanguhaan aron mabuntog ang mga babag sa pagpadayon sa ilang edukasyon.
Pagpangandam sa estudyante: Dapita ang mga estudyante sa paghimog listahan sa mga babag nga mopugong tingali sa mga tin-edyer nga mopadayon sa ilang edukasyon human og high school. Pasudla sila sa klase nga andam ipakigbahin ang listahan ngadto sa klase.
Posibleng mga Kalihokan sa Pagkat-on
Pag-ila sa mga babag
Timan-i: Sa tibuok kalibotan, managlahi ang mga babag sa pagpadayon sa edukasyon. Kinahanglan tingali nimong ipahaom ang mga senaryo o posibleng mga babag base sa inyong dapit ug sa panginahanglan sa imong mga estudyante.
Ikonsiderar ang pagsugod sa klase pinaagi sa pagdrowing o pagpakita og usa ka imahe sa usa ka tin-edyer nga nagtan-aw sa tabok sa sapa nga nagrepresentar sa umaabot nga edukasyon sama sa anaa sa ubos. Dayon ipakigbahin ang mosunod nga senaryo.
Sa bag-ohay lang nga leksiyon sa seminary, gipakigbahin sa magtutudlo ni Liam ang pipila sa mga pahayag gikan sa mga lider sa Simbahan bahin sa kaimportante sa edukasyon inigkahuman og high school. Nagtuo si Liam niining tambaga ug gusto niya kining sundon. Pero samtang naghunahuna siya sa umaabot, napuno ang iyang hunahuna sa mga babag nga nagpugong niya sa pagkab-ot sa iyang tumong.
Human ipakigbahin ang kasinatian ni Liam, pwede nimong dapiton ang mga estudyante nga ilista ang posibleng mga babag diha o duol sa imahe sa sapa nga tingali nagpugong kang Liam o sa ubang tin-edyer sa pagpadayon sa ilang edukasyon. Kon gihimo sa mga estudyante ang pagpangandam sa estudyante, pwede nimo silang dapiton nga ipakigbahin ang pipila ka babag diha sa ilang listahan.
Awhaga ang mga estudyante nga ikonsiderar ang panggawas ug pangsulod nga mga babag. Apil tingali sa mga panggawas nga babag mao ang limitasyon sa pinansyal, mugbong grado, o walay akses sa edukasyon. Apil tingali sa mga pangsulod nga babag mao ang kakulang sa kompiyansa o kawalay paglaom o tinguha.
Aron tabangan ang mga estudyante nga maghunahuna bahin sa posibleng mga babag sa pagpadayon sa ilang edukasyon, pwede nimo silang dapiton nga himoon ang mosunod.
Sa imong journal sa pagtuon, tubaga kining mga pangutanaha:
-
Hain sa mga babag (diha sa pisara o gikan ang uban) ang gikabalak-an ninyong mopugong sa pagpadayon sa inyong edukasyon?
-
Unsa ka dako ang inyong pagsalig nga mabuntog ninyo kini nga mga babag?
-
Sa unsang paagi kamo tabangan sa Manluluwas aron mabuntog kini nga mga babag?
Sa leksiyon karong adlawa, tinguhaa ang mga impresyon gikan sa Espiritu aron tabanagan kamong mailhan ang pihong mga paagi aron mabuntog ang inyong mga babag sa edukasyon.
Pagtabok sa Suba sa Jordan
Aron tabangan ang mga estudyante nga gamiton ang mga kasulatan sa pagkat-on kon unsaon pagbuntog ang mga babag sa ilang edukasyon, ikonsiderar ang paghisgot sa mosunod nga asoy ni Josue ug sa mga anak sa Israel nga motabok sa Suba sa Jordan (tan-awa ang Leksiyon 62: “Josue 2–4” para sa dugang detalye). Pwede nimong basahon o i-summarize ang mosunod nga parapo, kon kinahanglan.
Dihang naabot sa Canaan si Josue ug ang mga anak sa Israel, misaad ang Ginoo nga ihatag kanila ang tanang yuta tabok sa Suba sa Jordan (tan-awa ang Josue 1:1–7). Pero, nag-atubang silag mga babag sa pagtabok sa nag-awas nga suba aron makab-ot ang ilang tumong (tan-awa ang Josue 3:15).
Pwede nimong parespareson ang mga estudyante aron basahon ug hisgotan ang mosunod nga mga bersikulo. Makatabang tingali ang pagpatin-aw nga ang hugpong sa mga pulong nga “mopundo sa usa ka dapit” (bersikulo 13) ug “mipundo ang tubig sa ibabaw” (bersikulo 16) nagpasabot nga mohunong ang pag-agas sa tubig sa Suba sa Jordan.
Basaha ang Josue 3:6–8, 13–17, nga pangitaon ang mosunod:
-
Ang matinud-anong mga aksyon sa mga pari aron makatabok sa Suba sa Jordan ang mga anak sa Israel
-
Ang tabang sa Dios aron makatabok sa Suba sa Jordan ang mga anak sa Israel
Pwedeng ipakigbahin sa mga estudyante sa ilang mga kapares ang ilang nakaplagan. Pwede nilang hisgotan kon sa unsang paagi ang matinud-anong mga aksyon sa mga pari ug ang tabang sa Ginoo nakahimo nga mabuntog sa mga anak sa Israel ang babag.
Dayon, pwede nimong ipangutana sa klase ang mosunod:
-
Sa unsang paagi kini nga asoy makatabang sa usa ka tin-edyer nga nag-atubang og mga babag nga makadayon sa iyang edukasyon?
Sa inyong journal sa pagtuon, pagsulat og usa ka pahayag sa kamatuoran base sa inyong nakat-onan nga magamit aron mabuntog ang mga babag sa pagpadayon sa inyong edukasyon.
Gamiton tingali sa mga estudyante ang kaugalingon nilang mga pulong aron ipakigbahin ang kamatuoran nga sama sa: Samtang mopadayon kita uban ang hugot nga pagtuo diha ni Jesukristo, Siya motabang nato nga mabuntog ang mga babag nga atong giatubang.
-
Ngano kahang ang pagpadayon uban ang hugot nga pagtuo diha ni Jesukristo (paghimo sa tanang butang sumala sa atong makaya) gikinahanglan aron mabuntog ang mga babag sa edukasyon?
-
Nganong gikinahanglan ang matinud-anong pagtinguha sa tabang sa Dios aron mabuntog ang mga babag sa edukasyon?
Pwede nimong pahinumdoman ang mga estudyante nga ang pagpadayon uban ang hugot nga pagtuo diha ni Jesukristo naglakip sa bisan unsang paningkamot nga ilang himoon. Pananglitan, ang pagpakig-istorya sa usa ka magtatambag, pagpangitag kwarta, ug matinud-anong pagbayag og ikapulo mao ang tanang mga paagi aron makapadayon uban ang hugot nga pagtuo diha ni Jesukristo aron mabuntog ang mga babag sa edukasyon.
Kapraktisan nga senaryo
Ang mosunod nga kalihokan motabang sa mga estudyante sa pagpraktis sa kritikal nga paghunahuna. Pwede nimong ipasabot sa mga estudyante nga ang kritikal nga paghunahuna mao ang usa ka kahanas nga makatabang nato sa paghimog maayong mga desisyon. Lakip niini ang (1) pag-obserbar ug pagpundok sa impormasyon bahin sa desisyon, (2) pagpangutana bahin sa imong giobserbaran, (3) paghisgot sa imong mga naobserbahan ngadto sa uban, ug (4) pagsulbad og mga problema base sa imong nakat-onan. Pwede nimong ipakompleto sa mga estudyante ang kada lakang ingon nga bahin niini nga kalihokan.
Dapita ang mga estudyante sa paghimo og senaryo diha sa usa ka pirasong papel bahin sa usa ka babag nga giatubang sa usa ka tin-edyer. Kon nagkinahanglan silag tabang, pwede nilang kompletohon ang mga blangko sa mosunod nga kapahayag.
Nahibalo si (ngalan sa tin-edyer) nga importante ang edukasyon inigkahuman og high school. Pero nakababag sa pagpadayon sa ilang edukasyon ang (ihulagway ang usa ka babag).
Dayon, pwede nimong kolektahon ang nakompletong mga senaryo, sagolsagolon kini, ug iapod-apod kinig balik sa klase.
Pwedeng gamiton sa mga estudyante ang handout nga “Pagkuhag Impormasyon aron Mabuntog ang mga Babag sa Edukasyon” ug ang mga leksiyon nga ilang nakat-onan gikan sa Josue 3 aron tabangan silang matubag ang mga pangutana sa ubos bahin sa senaryo nga ilang nadawat. Pwede nilang isulat ang ilang mga tubag sa likod sa papel sa senaryo.
-
Unsa kaha nga mga pangutana ang ipangutana niini nga tawo samtang ilang gikonsiderar ang magamit nga mga kapanguhaan? Kang kinsa nila mahisgotan ang pipila sa ilang mga pangutana?
-
Unsang mga aksiyon ang mahimo niini nga tawo aron makapadayon uban ang hugot nga pagtuo diha kang Jesukristo aron mabuntog ang ilang mga babag?
-
Sa unsang paagi tabangan sa Dios kininga tawo aron mabuntog ang ilang babag?
Pwede nimong dapiton ang mga estudyante nga andam ipakigbahin ang ilang senaryo ug tambag diha sa klase. Ingon nga bahin sa imong panaghisgot, pwede nimong dapiton ang mga estudyante nga ipakigbahin ang mga kasinatian diin sila o ang ilang kaila gitabangan sa Dios nga mabuntog ang babag sa pagpadayon sa ilang edukasyon. O pwede nimong ipakigbahin ang ehemplo gikan sa “Mga Komentaryo ni Elder ug Sister Gilbert,” gikan sa time code 3:25 hangtod 5:48 diha sa Mayo 2024 nga tibuok kalibotan nga debosyonal alang sa mga young adult.
Panapos
Pwede nimong dapiton ang mga estudyante nga rebyohon ang listahan sa personal nga mga babag nga ilang giila sa sinugdanan sa klase. Awhaga sila nga tinguhaon ang giya gikan sa Espiritu samtang ilang tubagon ang mosunod nga pangutana diha sa ilang journal.
-
Unsang mga kapanguhaan ang inyong magamit gikan sa panaghisgotan karon aron mabuntog ang mga babag ug makapangandam para sa umaabot nga edukasyon?
-
Unsang matinud-anon nga mga aksiyon ang inyong mahimo aron matabangan kamo sa Langitong Amahan ug ni Jesukristo nga mabuntog ang mga babag?
Pwede nimong taposon pinaagi sa pagpamatuod nga samtang malipayon natong himoon ang tanang butang kutob sa atong mahimo, tabangan kita sa Langitnong Amahan ug ni Jesukristo nga mabuntog ang atong mga babag aron sa pagpadayon sa atong edukasyon.