“Pagsusi sa mga Hilisgotan ug mga Pangutana sa Ebanghelyo inubanan sa Mahangtorong Panglantaw: Pagpaningkamot sa Paglantaw sa mga Butang Sumala sa Panglantaw sa Ginoo Kanila,” Manwal sa Magtutudlo sa Seminary sa Daang Tugon (2026)
“Pagsusi sa mga Hilisgotan ug mga Pangutana sa Ebanghelyo inubanan sa Mahangtorong Panglantaw: Pagpaningkamot sa Paglantaw sa mga Butang Sumala sa Panglantaw sa Ginoo Kanila,” Manwal sa Magtutudlo sa Seminary sa Daang Tugon
Doktrinal nga Kahanas: Pagpangitag mga Tubag sa Akong mga Pangutana: Leksiyon 164
Pagsusi sa mga Hilisgotan ug mga Pangutana sa Ebanghelyo inubanan sa Mahangtorong Panglantaw
Pagpaningkamot sa Paglantaw sa mga Butang Sumala sa Panglantaw sa Ginoo Kanila
Dili nato kanunayng makita dayon ang mga tubag sa atong mga pangutana o ang mga solusyon sa atong mga problema, ug okay ra na. Kini nga mga panahon mga oportunidad sa pagsalig sa Langitnong Amahan ug ni Jesukristo. Makita Nila ang dili nato makita. Nahibalo Sila sa wala nato mahibaloi. Samtang naningkamot kita sa paglantaw sa mga butang sumala sa Ilang panglantaw, magsugod kita sa atong mga pangutana ug mga kabalaka sa lahi nga paagi. Kini nga leksiyon makatabang sa mga estudyante sa pagsusi sa mga konsepto ug mga pangutana uban ang mahangtorong panglantaw.
Pagpangandam sa estudyante: Dapita ang mga estudyante sa paghimo og leksiyon nga gigamitan og butang o analohiya nga magpakita kon nganong importante ang paglantaw sa mga butang sa laing paagi. Pwede silang hatagan og kahigayonan sa pagpakigbahin sa ilang mga ideya sa sinugdanan sa klase.
Posibleng mga Kalihokan sa Pagkat-on
Panglantaw
Ikonsiderar ang pagdapit sa mga estudyante nga maghunahuna og leksiyon nga gigamita og butang o analohiya nga magpakita sa bilo sa mga butang gikan sa lahi nga panglantaw. Dapita sila nga ipakigbahin ang ilang mga ideya ngadto sa klase. O pwede nimong ipakita ang gilakip nga mga hulagway nga nag-ulohang “Mga Balay–Limitadong Panglantaw” ug dapita ang mga estudyante nga hisgotan ang mosunod nga mga pangutana uban ang ilang partner:
-
Kon papilion kag usa ka balay nga kapuy-an, hain ang imong pilion? Ngano man?
Ipakita ang ikaduhang bahin sa gilakip nga mga hulagway nga nag-ulohang “Mga Balay–Detalyadong Panglantaw” ug dapita ang mga estudyante nga hisgotan ang mosunod nga pangutana.
-
Sa unsang paagi nakaimpluwensiya sa imong pagpili ang gidugang nga panglantaw?
-
Unsang mga kahimtanga ang maatubang tingali nato nga makatabang nato kon atong lantawon ang mga butang sa laing paagi?
Handurawa nga kining mga balaya nagrepresentar sa atong mga pangutana sa ebanghelyo o mga kahimtang sa kinabuhi.
-
Nganong delikado ang paghusga sa atong mga pangutana o mga kahimtang kon wala pa nato lantawa ang katibuk-ang kahimtang?
Sa tibuok kurso sa seminary, nailhan na tingali sa mga estudyante ang personal nilang mga pangutana o kabalaka sa ebanghelyo. Kon anaa, dapita silang hunahunaon ang usa sa ilang mga pangutana. Kon wala, pwede nimo silang dapiton nga mogahin og panahon karon aron konsiderahon ang mga pangutana o gikabalak-an nila o sa uban. Dapita ang mga estudyante nga mainampoong mamalandong sa tibuok sa leksiyon kon sa unsang paagi makatabang nila ang mahangtorong panglantaw aron makaplagan ang mga tubag, mga resolusyon, o bisag makabaton man lang og dugang kalinaw.
Basaha ang parapo 8–10 sa seksiyong Pag-angkon og Espirituhanong Kahibalo sa Mahinungdanon nga Dokumento sa Doktrinal nga Kahanas (2023), nga pangitaon kon unsay imong nakat-onan sa pagsusi sa mga konsepto ug mga pangutana uban ang mahangtorong panglantaw.
Dihang mahuman na og basa ang mga estudyante, dapita sila sa pagpakigbahin sa ilang nakat-onan. Samtang makigbahin sila, pwede nimong isukna ang usa o duha ka follow-up nga pangutana nga sama sa:
-
Unsay imong nahibaloan bahin sa Langitnong Amahan ug ni Jesukristo nga nakapadasig nimo nga sulayan sa paglantaw ang mga butang sumala sa Ilang panglantaw?
-
Unsay imong ikatambag sa mga tawo aron ilang tan-awon ang ilang mga pangutana o kahimtang uban ang mahangtorong panglantaw?
-
Unsa nga doktrinal nga kahanas ug uban pang tudling sa kasulatan ang makatabang nimo aron imong tan-awon ang mga butang uban ang mahangtorong panglantaw?
Pwede nimong dapiton ang mga estudyante nga pangitaon ang listahan sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas aron tabangan sila sa pagtubag sa naunang pangutana.
Human niini nga panaghisgot, hatagig usa ka pirasong papel ang matag estudyante. Dapita ang mga estudyante nga magsulat og usa ka kapahayag nga summary sa ilang nakat-onan bahin sa pagsusi sa mga konsepto ug mga pangutana uban ang mahangtorong panglantaw. Dihang aduna na silay nasulat, dapita ang mga estudyante nga makigbaylo og papel sa mas daghang estudyante kutob sa mahimo sulod sa 10 ka segundo hangtod nga moingon kag “hunong na.”
Pagtawag og pipila ka estudyante aron basahon ang kapahayag nga nasulat sa papel nga ilang nadawat. Sa katibuk-an, masulti tingali sa mga estudyante ang sama sa: Ang pagsusi sa atong mga pangutana uban ang mahangtorong panglantaw motabang nato nga lantawon kini sumala sa panglantaw sa Ginoo.
Sultihi ang mga estudyante nga gunitan usa ang papel nga ilang nadawat. Gamiton unya kini sa ulahing bahin sa leksiyon.
Mga ehemplo sa mahangtorong panglantaw
Pagpilig usa sa mosunod nga mga ehemplo gikan sa mga kasulatan. Pangitaa kon sa unsang paagi ang mahangtorong panglantaw moimpluwensiya sa panglantaw niini nga mga indibidwal.
Sa dili pa sugdan sa mga estudyante ang ilang pagtuon, pwede kang mohatag og dugang konteksto para sa matag ehemplo. Alang niadtong nakabasa sa asoy ni Adan ug Eva, mapasabot nimo nga ang panglantaw sa ubang tawo negatibo ang Pagkapukan kay miresulta kini og sala, kamatayon, ug mga pagsulay sa kalibotan. Kon bahin kang Job, pwede nimong ipakigbahin nga daghang sakop sa iyang pamilya ang namatay, nawala ang iyang mga kabtangan, ug nakasinati siya og grabeng problema sa panlawas.
-
Gipasabot ni Adan ug Eva ang Pagkapukan. Moises 5:10–11
-
Mipakigbahin og pamatuod si Job panahon sa iyang mga pagsulay. Job 19:25–26
-
Unsang mga ebidensiya ang imong nakita nga gitan-aw niining tawhana ang iyang sitwasyon base sa konteksto sa plano sa kaluwasan sa Langitnong Amahan?
-
Sa unsang paagi nga ang pagpamatuod niini nga tawo mahitungod ni Kristo nakaimpluwensiya sa ilang panglantaw sa sitwasyon?
Human ipakigbain sa mga estudyante ang ilang nakaplagan, ikonsiderar ang pagpangutana:
-
Unsa ang pipila ka ehemplo gikan sa kinabuhi ni Jesukristo diin giatubang Niya ang sitwasyon uban ang mahangtorong panglantaw?
Kon nagkinahanglan silag tabang sa pagpangitag ehemplo, pwede nimong dapiton ang mga estudyante nga basahon ang Isaias 53:3–5, 10 ug hisgotan kon ngano, gikan sa mahangtorong panglantaw, nga “kabubut-on ang pagpaantos ug pagsakit kaniya” (Isaias 53:10). (Bisag naguol ang Langitnong Amahan nga makita nga nag-antos si Jesukristo, ang Iyang mahangtorong panglantaw nagtugot Niya nga masabtan nga ang Pag-ula sa Iyang Anak maoy importanteng bahin sa plano sa kaluwasan para sa tanan Niyang anak.)
Pamalandongi kon aduna ka bay giatubang nga sitwasyon diin makatabang nimo ang pagsunod sa mga ehemplo sa Langitnong Amahan ug ni Jesukristo aron tan-awon ang mga butang uban ang mahangtorong panglantaw.
Makabenepisyo usab tingali ang mga estudyante sa pagkakita og modernong mga ehemplo sa usa ka tawo nga gitan-aw ang ilang mga pangutana ug kahimtang uban ang mahangtorong panglantaw. Ikonsiderar ang pagtan-aw sa “Pagsusi sa mga Pangutana uban ang Mahangtorong Panglantaw” (2:56), nga anaa sa ChurchofJesusChrist.org. Niini nga bidyo, gisusi sa usa ka batan-ong babaye ang pangutana nga, “Kon naay mahigugmaong Dios, nganong gitugotan niyang mag-antos ang mga tawo?” Human sa bidyo, pwedeng ipakigbahin sa mga estudyante ang dugang mga panglantaw nga ilang nakuha bahin sa paglantaw sa mga butang uban ang mahangtorong panglantaw.
Pagpraktis
Para sa sunod nga kalihokan, pwedeng gamiton sa mga estudyante ang mao ra nga papel nga ilang nadawat human gipasa ang usa ka kapahayag nga summary sa mahangtorong panglantaw.
Pagsulat og usa ka pangutana o kahimtang nga tingali giatubang sa usa ka tin-edyer nga makatabang sa paglantaw uban ang mahangtorong panglantaw.
Human makasulat ang kada estudyante, dapita sila pag-usab nga padayong makigbaylo og mga papel sulod sa 10 ka segundo hangtod nga moingon kag “hunong na.” Dayon, pwedeng parespareson ang mga estudyante para sa nahibiling bahin sa kalihokan.
Uban ang usa ka kapares, hisgoti ang usa o duha sa mosunod nga mga pares sa pangutana samtang konektado kini sa nasulat sa papel nga imong nadawat. Hinumdomi nga ang unang pangutana sa matag pares naggikan sa parapo 8 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas.
-
Unsay nahibaloan na nako bahin sa Langitnong Amahan, sa Iyang plano, ug kon giunsa Niya pagpakiglabot sa Iyang mga anak?
Sa unsang paagi mabag-o niini ang paagi sa paglantaw sa pangutana o sitwasyon?
-
Unsa nga mga pagtulun-an sa ebanghelyo ang may kalambigitan o naghatag og katin-awan niini nga konsepto o isyu?
Unsang kasulatan o pahayag gikan sa lider sa Simbahan ang nagsuportar niini nga pagtulun-an?
Human mahisgoti ang inyong mga tubag, pagsulat og mubong tubag diha sa inyong mga papel.
Kon mahuman na ang mga estudyante, hangyoa ang pipila ka boluntaryo nga basahon ngadto sa klase ang pangutana o sitwasyon diha sa ilang papel dayon ipakigbahin ang mga tubag nga ilang gisulat. Pwede nimong pangayoan ang klase og dugang panglantaw nga makatabang sa usa ka tin-edyer nga tan-awon ang pangutana o sitwasyon uban ang mahangtorong panglantaw.
Ipakigbahin ang imong pamatuod nga matabangan ta sa Langitnong Amahan nga lantawon ang mga butang sumala sa Iyang panglantaw samtang modangop kita Kaniya. Pwede usab nimong ipakigbahin nga dihang mobati kita nga wala pa nato makita ang Iyang nakita, makasalig gihapon kita Niya (tan-awa ang Mga Panultihon 3:5–6). Dasiga ang mga estudyante nga padayong maningkamot sa pagsusi sa ilang mga pangutana ug sitwasyon uban ang mahangtorong panglantaw.