“Pagtinguha og Personal nga Pagpadayag para sa Akong mga Pangutana: Pagsabot Kon sa Unsang Paagi Makig-istorya Nimo ang Ginoo,” Manwal sa Magtutudlo sa Seminary sa Daang Tugon (2026)
“Pagtinguha og Personal nga Pagpadayag para sa Akong mga Pangutana: Pagsabot Kon sa Unsang Paagi Makig-istorya Nimo ang Ginoo,” Manwal sa Magtutudlo sa Seminary sa Daang Tugon
Doktrinal nga Kahanas: Pagpangitag mga Tubag sa Akong mga Pangutana: Leksiyon 162
Pagtinguha og Personal nga Pagpadayag alang sa Akong mga Pangutana
Pagsabot Kon sa Unsang Paagi Makig-istorya Nimo ang Ginoo
Ang Langitnong Amahan gusto nga ipadayag ang Iyang hunahuna ug kabubut-on ngadto sa Iyang mga anak. Makatabang ang pagkahibalo niini samtang mangita kita og mga tubag sa atong mga pangutana, maghimo og importanteng mga desisyon, ug maningkamot nga mahimong mas maayong mga disipulo ni Jesukristo. Kini nga leksiyon makatabang sa mga estudyante nga masabtan kon sa unsang paagi sila makadawat og giya ug pagpadayag gikan sa Langitnong Amahan pinaagi sa Espiritu Santo.
Posibleng mga Kalihokan sa Pagkat-on
Pag-ila sa mga tingog
Samtang mosulod ang mga estudyante sa klase, pag-asayn og lainlaing numero ngadto kanila uban ang mosunod nga instruksiyon: “Kon tawagon nako ang imong numero, pag-ingon og, ‘Ang Ginoo nakig-istorya nato pinaagi sa Espiritu Santo.’” Ipasabot nga kon matawag ang ilang numero, pwede nilang isulti nga pinahunghong o isulti sa natural nga paagi ang hugpong sa mga pulong.
Aron sugdan ang klase, dapita ang mga estudyante nga mopiyong. Ipasabot nga tag-anon nila kon kinsa sa ilang mga classmate ang nisulti pinaagi sa pagpaminaw sa ilang tingog. Usa-usahag tawag ang lainlaing numero. Human matawag ang numero sa matag estudyante isulti niya ang hugpong sa mga pulong, dapita ang klase nga iisa ang ilang kamot kon nakaila sila kon kinsay misulti.
Dayon ipangutana ang mosunod:
-
Sayon ra ba o lisod ang pag-ila kon kinsay misulti? Ngano man?
-
Nganong lisod tingali para sa usa ka bisita sa atong klase nga ilhon kon kinsay misulti?
Ipakita ang mosunod nga pagsusi sa kaugalingon ug dapita ang mga estudyante nga hunahunaon ang ilang mga tubag.
Pamalandongi ang imong mga tubag sa mosunod nga mga pangutana. Pwede nimong irekord ang pipila sa imong hunahuna diha sa imong journal sa pagtuon.
-
Unsa ko ka masaligon nga nailhan nako ang tingog sa Ginoo sa akong kinabuhi?
-
Unsay mga pangutana bahin sa pagdawat og pagpadayag gikan sa Langitnong Amahan ang naa ko?
Ikonsiderar ang pagpamatuod nga gusto sa Langitnong Amahan nga makig-istorya sa matag usa sa Iyang mga anak. Ipasabot nga samtang nagtinguha kita og pagpadayag, tabangan kita Niya nga modako ang atong pagsalig nga mailhan ang Iyang tingog ug madawat ang Iyang mga tubag ug paggiya.
Hinay, malumong tingog
Samtang miikyas sa mga tawo nga gustong mopatay niya, mitago sa Elias sa usa ka langob (tan-awa ang 1 Mga Hari 19:1–10). Samtang naa didto, ang Ginoo nakigsulti kaniya.
Basaha ang 1 Mga Hari 19:9–12, nga mangita kon unsay nakat-onan ni Elias bahin kon sa unsang paagi makig-istorya ang Ginoo kanato.
-
Unsay imong nakat-onan bahin sa Ginoo gikan sa kasinatian ni Elias?
Tabangi ang mga estudyante nga mailhan nga ang usa sa mga paagi nga makig-istorya ang Ginoo kanato pinaagi sa hinay, malumong tingog sa Espiritu Santo.
Maghunahuna tingali ang pipila ka estudyante kon istoryahon ba gyod sila sa Dios ug wala tingali mahibalo kon unsaon pag-ila kon himoon Niya kini. Ang mosunod nga pamahayag ug kalihokan sa pagtuon para sa 3 Nephi 11 motabang nga matubag kini nga mga kabalaka.
Si Presidente Russell M. Nelson mitudlo:
Maka-ampo kita sa atong Langitnong Amahan ug makadawat og giya ug direksyon…. Kon kita tinuoray nga modawat sa Espiritu Santo ug magkat-on sa pag-ila ug pagsabot sa Iyang mga pag-aghat, magiyahan kita sa mga sitwasyon nga dagko ug gagmay.
…Ang Dios buot ba gayod makigsulti kaninyo? Oo! (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 94–95)
Ikonsiderar ang pagparespares sa mga estudyante aron basahon ang mosunod nga mga bersikulo. Aron tabangan ang mga estudyante nga magtuon, dapita sila nga mohunong kadiyot human mabasa ang matag bersikulo ug hisgotan uban sa ilang kapares sa pagbasa kon unsay ilang nakaplagan nga motabang nato nga madungog ug mailhan ang pagpadayag gikan sa Dios.
Basaha ang 3 Nephi 11:1–7, nga mangita kon unsay atong makat-onan bahin sa pagkadungog ug pag-ila sa pagpadayag gikan sa Dios.
-
Unsay imong nakat-onan bahin sa pagdawat og pagpadayag gikan niini nga asoy?
Pag-ila sa pagpadayag gikan sa Dios
Ipasabot nga usa sa mga paagi nga makakat-on kita sa pag-ila sa tingog sa Ginoo sa atong mga kinabuhi mao ang pagsabot sa lainlaing paagi nga makig-istorya Siya kanato. Aron tabangan ang mga estudyante nga makakat-on kon sa unsang paagi makig-istorya nato ang Ginoo, ikonsiderar ang pagpakita nila og usa ka smartphone o pagpakita og hulagway niini ug isulat ang mosunod nga pangutana diha sa pisara.
-
Unsa ang pipila ka paagi nga makadawat kag mensahe gamit ang smartphone?
Apil sa posibleng mga tubag ang tawag, text message, in-app messaging, ug bisan ang pinaagi sa mga hulagway nga gipili natong ipakita diha sa atong mga selpon. Human ang mubong panaghisgot sa pangutana sa itaas, papasa ang hugpong sa mga pulong nga “smartphone” ug pulihi kini og “Espiritu Santo.”
-
Unsa ang pipila ka paagi nga makadawat kag mensahe pinaagi sa Espiritu Santo?
-
Unsay mga kalainan sa pagdawat og mensahe gikan sa Espiritu Santo gikan sa pagdawat og mensahe sa smartphone?
Kon sa imong hunahuna maglisod ang imong mga estudyante sa mosunod nga kalihokan sa pagtuon sa kasulatan, pwede nimong basahon ang unang tudling ug pangutan-on ang klase kon unsay gitudlo sa bersikulo bahin sa mga paagi aron makaila kita dihang makig-istorya nato ang Dios pinaagi sa Espiritu Santo. Kon imong basahon ang tudling, matabangan nimo ang mga estudyante nga makita niini nga bersikulo nga atong mailhan kon nakig-istorya Siya nato pinaagi sa Espiritu Santo dihang modako ang atong kaalam, pagsabot, ug kahibalo. Dayon pwedeng tun-an sa mga estudyante ang pipila sa uban pang nagsunod nga kasulatan uban ang ilang kapares o sa gagmayng grupo. Dili kinahanglang tun-an sa mga estudyante kining tanang kasulatan.
Tun-i ang pipila sa mosunod nga mga pakisayran sa kasulatan. Para sa matag pakisayran, ilha ang mga paagi aron atong mailhan dihang nakig-istorya nato ang Dios pinaagi sa Espiritu Santo. Isulat ang mga pakisayran nga imong gitun-an ug kon unsay inyong nakat-onan diha sa imong journal sa pagtuon.
Exodo 31:3
Juan 14:26–27
Juan 16:13
Mga Taga-Galacia 5:22–23
Doktrina ug mga Pakigsaad 6:21–23
Doktrina ug mga Pakigsaad 8:2–3
Doktrina ug mga Pakigsaad 11:12–13
Joseph Smith—Kasaysayan 1:11–12
Usa ka paagi nga mahimo nimo ang nag-unang kalihokan mao ang pagprinta og pipila ka kopya sa kauban nga handout ug guntinga ang indibidwal nga mga hulagway sa mga smartphone. Pagsulat og managlahing pakisayran sa kasulatan diha sa kada smartphone ug ibutang kini sa tibuok classroom. Dapita ang mga estudyante nga liboton ang classroom ug tun-an ang pipila niini.
Pwede usab nimong ikonsiderar ang pagbutang og mugbong pamahayag sa pipila sa mga smartphone bahin kon sa unsang paagi makig-istorya nato ang Langitnong Amahan. Ang posibleng mga pamahayag naa sa Dugang nga mga Kapanguhaan niini nga leksiyon diha sa Librarya sa Ebanghelyo.
Bahina ang mga estudyante sa gagmayng grupo og dapita sila sa pagpakigbahin sa kon unsay mipatigbabaw nila gikan sa mga pakisayran sa kasulatan nga ilang gitun-an. Pwede usab nilang ipakigbahin ang bisan unsa nilang kasinatian sa dihang ilang nadungog ang tingog sa Ginoo pinaagi sa Espiritu Santo. Kini pwede nga maglakip sa mga tubag sa ilang mga pangutana, o uban pang mensahe sa paghupay o direksiyon. Pahinumdomi sila nga dili ipakigbahin ang mga detalye sa balaan ug personal ra kaayo nga mga kasinatian.
Kon makatabang, pwede ninyong tan-awon ang “Pagdawat og Pagpadayag” (4:17), gikan sa time code 0:00–2:18 nga anaa sa ChurchofJesusChrist.org. Niini nga bidyo, pipila ka tawo ang mitubag sa pangutana nga “Sa unsang paagi ka gipadalhan og pagpadayag sa Espiritu Santo?”
-
Sa unsang paagi ang pagsabot sa lainlaing paagi sa pagpakig-istorya kanato sa Langitnong Amahan pinaagi sa Espiritu Santo motabang nimo nga mailhan ang pagpadayag nga gikan Kaniya?
Ang Dios nakigsulti nimo
Aron tabangan ang mga estudyante sa pagpakigbahin sa ilang tubag sa mosunod nga senaryo, pwede nilang tubangon ang pangutana sa ubos uban ang ilang kapares. Kini maghatag og higayon sa matag estudyante nga ipakigbahin ang ilang nakat-onan.
Ingon nga alternatibo, pwede nimong dapiton ang duha ka estudyante nga moadto atubangan sa klase aron idrama ang senaryo. Pwede nga ipakigbahin sa usa ka estudyante ang iyang tubag. Dayon pwedeng mopili ang duha ka estudyante og laing duha ka estudyante nga modrama sa senaryo. Pwede nimo kining balikon og pila ka higayon.
Handurawa nga mahitabo ang mosunod nga senaryo karong Dominggo:
Panahon sa miting sa sakramento, usa ka mamumulong ang mikutlo ni Presidente Russell M. Nelson dihang siya miingon, “Ang Dios buot ba gyod nga makigsulti kaninyo? Oo!” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95). Samtang paingon na kang mobiya sa chapel human sa miting, miingon ang imong higala: “Gusto kaayo nakong mailhan ang giya ug pagpadayag gikan sa Dios sa akong kinabuhi, pero wala ko mahibalo kon unsaon.”
-
Base sa imong nakat-onan gikan ug bahin sa Espiritu Santo karon, unsay imong isulti sa imong higala?
Ikonsiderar ang pagpakigbahin sa imong pamatuod bahin sa tinguha sa Ginoo nga makig-istorya nato pinaagi ang hinay, malumong tingog sa Espiritu Santo.