« វាយតម្លៃការរៀនសូត្ររបស់អ្នកទី ១០ ៖ អេម៉ុស–ម៉ាឡាគី » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« វាយតម្លៃការរៀនសូត្ររបស់អ្នកទី ១០ ៖ អេម៉ុស–ម៉ាឡាគី » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ម៉ាឡាគី ៖ មេរៀនទី ១៦០
វាយតម្លៃការរៀនសូត្ររបស់អ្នកទី ១០
អេម៉ុស–ម៉ាឡាគី
ការពិចារណា និងការវាយតម្លៃពីការរៀនសូត្រខាងវិញ្ញាណរបស់យើង អាចជួយយើងឲ្យខិតទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ មេរៀននេះអាចជួយសិស្សគិតពិចារណាពីគោលដៅដែលពួកគេបានដាក់ និងការរីកចម្រើនដែលពួកគេបានដកពិសោធន៍ក្នុងអំឡុងពេលការសិក្សាថ្មីៗរបស់ពួកគេអំពីព្រះគម្ពីរសញ្ញាចាស់ ។
ការរៀបចំសិស្ស ៖ សូមអញ្ជើញសិស្សឲ្យមករៀន ដោយបានត្រៀមខ្លួនដើម្បីចែកចាយរូបភាពដែលតំណាងឲ្យទេពកោសល្យ ឬជំនាញដែលពួកគេបានអភិវឌ្ឍ របៀបដែលពួកគេរីកចម្រើន ឬបទពិសោធន៍ដែលពួកគេមានកាលពីឆ្នាំមុន ឬឆ្នាំមុនៗនេះបន្តិច ។ ប្រសិនបើពួកគេមិនអាចរកឃើញរូបភាពទេ ពួកគេអាចមានឧទាហរណ៍មួយដើម្បីចែកចាយ ។
សកម្មភាពរៀនសូត្រដែលអាចមាន
ថ្នាក់របស់អ្នកប្រហែលជាផ្តោតទៅលើលទ្ធផលផ្សេងៗគ្នានៅក្នុងអេម៉ុសតាមរយៈម៉ាឡាគីពីលទ្ធផលដែលបានវាយតម្លៃនៅក្នុងមេរៀននេះ ។ បើដូច្នេះ សូមបត់បែនសកម្មភាពនេះដើម្បីវាយតម្លៃពីការរីកចម្រើនដែលសិស្សបានដកពិសោធន៍ចេញពីលទ្ធផលដែលអ្នកបានជ្រើសរើស ។ ដូចគ្នានេះដែរ អ្នកមិនត្រូវបានរំពឹងថានឹងធ្វើគ្រប់សកម្មភាពទាំងអស់នោះទេ ។ អ្នកអាចជ្រើសរើសសកម្មភាពដែលអ្នកមានអារម្មណ៍ថាទាក់ទងជាពិសេស ឬមានប្រយោជន៍សម្រាប់សិស្សរបស់អ្នក ។
នៅក្នុងមេរៀននេះ សិស្សនឹងមានឱកាសវាយតម្លៃការរីកចម្រើនរបស់ពួកគេដូចខាងក្រោម ៖
-
ពន្យល់អំពីតួនាទីរបស់ពួកព្យាការី ។ ( កំណត់ចំណាំ សកម្មភាពនេះគឺផ្អែកលើការបង្រៀនពីមេរៀនទី ១៣៨ ៖ អេសេគាល ៣ និងមេរៀនទី ១៤៩ ៖ « អេម៉ុស ៣; ៧ » ) ។
-
ពន្យល់ព្រះបរមងារ តួនាទី គុណលក្ខណៈ និងនិមិត្តសញ្ញានៃព្រះយេស៊ូវគ្រីស្ទ ។ ( កំណត់ចំណាំ ៖ សកម្មភាពនេះទាញចេញពីការសិក្សាទូទៅរបស់សិស្សអំពីព្រះគម្ពីរសញ្ញាចាស់ ) ។
-
រក្សាព្រះបញ្ញត្តិដើម្បីគោរពតាមពាក្យសម្ដីនៃប្រាជ្ញាវាងវៃ ។ ( កំណត់ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ១៤២ ៖ « ដានីយ៉ែល ១ » ) ។
អ្នកអាចជំនួសសកម្មភាពទាំងនេះជាមួយនឹងសកម្មភាពវាយតម្លៃសម្រាប់មេរៀននៃការរៀបចំជីវិត ។ ការវាយតម្លៃសម្រាប់មេរៀននៃការរៀបចំជីវិតមាននៅក្នុង ឧបសម្ព័ន្ធ នេះ ។
របៀបដែលអ្នករីកចម្រើន
ដើម្បីចាប់ផ្តើមមេរៀននេះ សូមអញ្ជើញសិស្សឲ្យបង្ហាញរូបភាពដែលតំណាងឲ្យទេពកោសល្យ ឬជំនាញដែលពួកគេបានអភិវឌ្ឍ របៀបដែលពួកគេរីកចម្រើន ឬបទពិសោធន៍ដែលពួកគេមានកាលពីឆ្នាំមុន ឬឆ្នាំមុនៗនេះបន្តិច ។ ប្រសិនបើសិស្សមិនមានរូបភាពទេ ពួកគេអាចចែកចាយឧទាហរណ៍មួយ ។ ពិចារណាបង្ហាញរូបភាពដែលបង្ហាញពីរបៀបដែលអ្នករីកចម្រើនក្នុងជីវិតរបស់អ្នក ។
-
ហេតុអ្វីបានជាល្អក្នុងការផ្អាកម្តងម្កាល ហើយចំណាំនូវអ្វីដែលយើងបានរៀន ឬរបៀបដែលយើងរីកចម្រើន ?
សូមអញ្ជើញសិស្សឲ្យជញ្ជឹងគិតពីរបៀបដែលពួកគេបានរីកចម្រើនខាងវិញ្ញាណ ហើយចូលមកកាន់តែជិតព្រះវរបិតាសួគ៌ និងព្រះយេស៊ូវគ្រីស្ទពេញមួយឆ្នាំចុងក្រោយនេះ ។ សូមអញ្ជើញសិស្សឲ្យគូរប្រអប់ពីរដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ៖
នៅក្នុងប្រអប់នីមួយៗសូមគូរ ឬសរសេរវិធីមួយដែលអ្នកមានអារម្មណ៍ថាអ្នកបានរីកចម្រើន ឬចូលមកជិតព្រះវរបិតាសួគ៌ និងព្រះយេស៊ូវគ្រីស្ទពេញមួយឆ្នាំនេះ ។ វាអាចដូចជា « រូបភាព » ពីបទពិសោធន៍របស់អ្នក ។ វាអាចរួមមាន ៖
-
វិធីដែលអ្នកកំពុងព្យាយាមប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវ គ្រីស្ទ ។ វាអាចរួមបញ្ចូលគោលដៅ និងផែនការដែលអ្នកបានដាក់ពេញមួយឆ្នាំ ។ ប្រសិនបើអ្នកបានដាក់ផែនការមួយ ពេលអ្នកបានសិក្សាព្រះគម្ពីរ សូមពិចារណាបញ្ចូលបទគម្ពីរទាំងនោះ ។
-
បទគម្ពីរ ឬការបង្រៀនដែលបានជួយ ឬពង្រឹងអ្នក ។ អ្នកប្រហែលជាចង់បញ្ចូលខគម្ពីរ ឬជំពូកនានាដើម្បីចែកចាយជាមួយអ្នកដទៃ ។
-
បទពិសោធន៍រីកចម្រើនដែលអ្នកបានមាន ដូចជាការឆ្លើយតបចំពោះការអធិស្ឋាន ការបម្រើអ្នកដទៃ មានអារម្មណ៍ថាមានជំនួយរបស់ព្រះអម្ចាស់ក្នុងការសាកល្បង ឬត្រូវបានបំផុសគំនិតដោយគំរូពីព្រះគម្ពីរ ឬមិត្តរួមថ្នាក់ ។
សូមអញ្ជើញឲ្យសិស្សចែកចាយអ្វីដែលពួកគេបានគូរ ឬសរសេរ ។ ដោយសារនេះជាការបញ្ចប់វគ្គសិក្សានេះ វាអាចជាជំនួយដើម្បីមានសិស្សច្រើននាក់ចែកចាយ ។
នៅពេលសិស្សចែកចាយ សូមរកមើលវិធីដើម្បីជួយពួកគេដឹងថាអ្នកឲ្យតម្លៃលើការឆ្លើយតបរបស់ពួកគេ ។ មុនពេលសិស្សចែកចាយ អ្នកអាចនិយាយរឿងដូចជា « យើងចូលចិត្តស្តាប់អូលីវីយ៉ា » ឬ « ខ្ញុំពិតជាចូលចិត្តគំនិត និងបទពិសោធន៍របស់យ៉ូសែបណាស់ » ។ វាមានប្រយោជន៍ក្នុងការប្រឈមនឹងសិស្ស និងធ្វើទំនាក់ទំនងតាមកែវភ្នែកជាមួយពួកគេនៅពេលពួកគេចែកចាយ ។ បន្ទាប់ពីពួកគេចែកចាយ ពាក្យ « អរគុណ » ដោយស្មោះ ឬ « ខ្ញុំចូលចិត្តស្តាប់គំនិតរបស់អ្នកណាស់ » ក៏អាចមានប្រយោជន៍ផងដែរ ។ សម្រាប់ការបំពាក់បំប៉នអំពីកិច្ចការនេះ សូមមើល « បង្កើតបរិយាកាសមួយ ដែលមនុស្សទាំងអស់ទទួលបានការគោរព ហើយដឹងថា ការរួមចំណែករបស់ពួកគេមានតម្លៃ » នៅក្នុង ជំនាញការអភិវឌ្ឍគ្រូបង្រៀន ។
ប្រសិនបើអ្នកមានអារម្មណ៍ថា សកម្មភាពនេះនឹងក្លាយជាការប្រើប្រាស់ពេលវេលាដ៏ល្អសម្រាប់មេរៀនភាគច្រើន អ្នកអាចផ្តល់ឱកាសដល់សិស្សគ្រប់រូបដើម្បីចែកចាយរឿងមួយដែលពួកគេគូរ ឬសរសេរ ។ ឧទាហរណ៍ អ្នកអាចរៀបចំតុជារង្វង់ ហើយសុំឲ្យសិស្សស្ម័គ្រចិត្តទៅមុន ។ បន្ទាប់មកដើរជុំវិញរង្វង់អញ្ជើញសិស្សផ្សេងទៀតឲ្យចែកចាយ ។ អនុញ្ញាតឲ្យសិស្សរំលង ប្រសិនបើពួកគេមិនចង់ចែកចាយទេ ។ នៅពេលពួកគេចែកចាយ សូមរកមើលវិធីដើម្បីទទួលស្គាល់ការខិតខំរបស់សិស្ស ថ្លែងទីបន្ទាល់អំពីព្រះអង្គសង្គ្រោះ និងបញ្ជាក់អំពីអំណាចនៃព្រះគម្ពីរ ។
សូមពន្យល់ពីតួនាទីនៃពួកព្យាការីរបស់ព្រះអម្ចាស់
សិស្សប្រហែលជាបានរៀនអំពីតួនាទីរបស់ព្យាការីរបស់ព្រះអម្ចាស់នៅក្នុងមេរៀនទី ១៣៨ ៖ « អេសេគាល ១–៣; ៣៣ » និងមេរៀនទី ១៤៩ ៖ « អេម៉ុស ៣, ៧ » ។ សូមពិចារណាឲ្យសិស្សប៉ុន្មាននាទីដើម្បីពិនិត្យមើលអ្វីដែលពួកគេបានរៀននៅក្នុងមេរៀនទាំងនេះ ។ ពួកគេអាចធ្វើការណ៍នេះដោយពិនិត្យមើល អេសេគាល ៣:១០–១១, ១៦–១៧, អាម៉ុស ៣:៧ រួមជាមួយនឹងកំណត់ចំណាំណាមួយដែលពួកគេបានធ្វើនៅក្នុងបទគម្ពីរ ឬសៀវភៅកំណត់ហេតុរបស់ពួកគេអំពីតួនាទីរបស់ពួកព្យាការី ។
ដើម្បីណែនាំសកម្មភាពខាងក្រោម អ្នកអាចពន្យល់ថា សាសនាចក្រដាក់ធនធានលើអនឡាញសម្រាប់អ្នកដែលចង់រៀនអំពីប្រធានបទមួយចំនួន ។ ធនធានមួយគឺ ប្រធានបទ និងសំណួរ នៅក្នុងបណ្ណាល័យដំណឹងល្អ ។
សូមប្រើការណែនាំខាងក្រោមដើម្បីសរសេរអត្ថបទជាប្រយោគបីប្រយោគអំពីព្យាការី ដែលអាចត្រូវបានប្រើនៅក្នុងបណ្ណាល័យដំណឹងល្អ ៖
-
សូមសរសេរប្រយោគដំបូងរបស់អ្នកដោយប្រើអ្វីដែលអ្នករៀនអំពីតួនាទីរបស់ពួកព្យាការីមកពី អេសេគាល ៣:១០–១១, ១៦–១៧ ។
-
សូមសរសេរប្រយោគទីពីរ ដោយផ្អែកលើអ្វីដែលអ្នករៀនអំពីតួនាទីរបស់ព្យាការីមកពី អេម៉ុស ៣:៧ ។
-
សូមសរសេរប្រយោគទីបីដោយផ្អែកលើអ្វីផ្សេងទៀតដែលអ្នកបានរៀននៅក្នុងការសិក្សារបស់អ្នកអំពីព្រះគម្ពីរសញ្ញាចាស់អំពីតួនាទីរបស់ពួកព្យាការី ។
បន្ទាប់ពីសិស្សបានសរសេរអត្ថបទរបស់ពួកគេហើយ អ្នកអាចបង្ហាញផ្នែកខាងក្រោមនៃអត្ថបទអំពី ពួកព្យាការី ពីប្រធានបទ និងសំណួរ ។ សូមអញ្ជើញសិស្សឲ្យអានវា ហើយមើលថាតើមានអ្វីដែលពួកគេចង់បន្ថែមទៅក្នុងអត្ថបទរបស់ពួកគេឬអត់ ។
ក៏ដូចជាពួកព្យាការីពីបុរាណដែរ នោះពួកព្យាការីសម័យបច្ចុប្បន្នថ្លែងទីបន្ទាល់អំពី ព្រះយេស៊ូវគ្រីស្ទ ហើយបង្រៀន ដំណឹងល្អ របស់ទ្រង់ ។ ពួកលោកបង្ហាញឲ្យស្គាល់នូវព្រះហឫទ័យ និងលក្ខណៈពិតរបស់ព្រះ ។ ពួកលោកមានប្រសាសន៍យ៉ាងក្លាហាន និងច្បាស់លាស់ ដោយថ្កោលទោសចំពោះអំពើបាប និងព្រមានអំពីផលវិបាកទាំងឡាយរបស់អំពើបាប ។ ពេលខ្លះ ពួកលោកអាចនឹងត្រូវបានបំផុសគំនិត ឲ្យព្យាករអំពីព្រឹត្តិការណ៍នាពេលអនាគត សម្រាប់ជាប្រយោជន៍ដល់យើង ។ ( Topics and Questions « Prophets » បណ្ណាល័យដំណឹងល្អ )
សូមពិចារណាដាក់សិស្សជាក្រុមតូចៗ ដើម្បីចែកចាយអ្វីដែលពួកគេបានសរសេរ ។ អ្នកអាចអញ្ជើញសិស្សពីរបីនាក់ដែលស្ម័គ្រចិត្តឲ្យចែកចាយប្រយោគមួយ ឬច្រើនជាមួយនឹងសិស្សក្នុងថ្នាក់ ។
ព្រះបរមងារ តួនាទី និងនិមិត្តសញ្ញានៃព្រះយេស៊ូវគ្រីស្ទ
បង្ហាញរូបភាពជាច្រើននៃព្រឹត្តិការណ៍ព្រះគម្ពីរនៅក្នុងព្រះគម្ពីរសញ្ញាចាស់ ដែលបង្ហាញពីព្រះអង្គសង្គ្រោះ ឬព្រះចេស្ដារបស់ទ្រង់ ។ រូបភាពខាងក្រោមនេះគឺជាឧទាហរណ៍ខ្លះៗ ៖
-
តើរូបភាពនីមួយៗទាំងនេះបង្រៀនអ្វីខ្លះដល់យើងអំពីព្រះយេស៊ូវគ្រីស្ទ ?
រូបភាពទាំងនេះបង្ហាញពីរបៀបដែលព្រះអង្គសង្គ្រោះបានបង្កើតពិភពលោក បានប្រោសមនុស្សដែលបានមើលសត្វពស់នៅលើដំបង គាំទ្រដល់សាដ្រាក់ មែសាក់ និងអ័បេឌ-នេកោ នៅក្នុងគុកភ្លើង ហើយបិទមាត់តោ ។ ប្រសិនបើមានប្រយោជន៍ សូមរំឭកសិស្សថា សត្វពស់នៅលើដំបង គឺជានិមិត្តសញ្ញានៃព្រះអង្គសង្គ្រោះនៅលើឈើឆ្កាង ( សូមមើល យ៉ូហាន ៣:១៤ ) ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេររឿងមួយ ឬពីរដែលអ្នកបានរៀនអំពីព្រះអង្គសង្គ្រោះនៅឆ្នាំនេះ ដែលមានសារៈសំខាន់សម្រាប់អ្នក ។ រឿងទាំងនេះអាចមកពីរឿងក្នុងព្រះគម្ពីរសញ្ញាចាស់ ឬវាអាចជាព្រះបរមងារមួយរបស់ព្រះអង្គសង្គ្រោះ និមិត្តសញ្ញារបស់ទ្រង់ ឬតួនាទីមួយរបស់ទ្រង់ ។ ប្រសិនបើអាច សូមបញ្ចូលសេចក្តីយោងបទគម្ពីរជាមួយការយល់ដឹងរបស់អ្នក ។ ពន្យល់ពីមូលហេតុដែលការយល់ដឹងនេះមានអត្ថន័យសម្រាប់អ្នក ។
សូមអញ្ជើញសិស្សមួយចំនួនឲ្យចែកចាយ ។ រកមើលវិធីដើម្បីជួយសិស្សថ្លែងទីបន្ទាល់អំពីព្រះអង្គសង្គ្រោះ និងតួនាទីជាច្រើនដែលទ្រង់បំពេញនៅក្នុងជីវិតរបស់យើង ។
ការគោរពតាមពាក្យសម្ដីនៃប្រាជ្ញាវាងវៃរបស់ព្រះអម្ចាស់
សូមពិចារណាពីការបង្ហាញរូបភាពខាងក្រោម ហើយសួរសិស្សនូវអ្វីដែលពួកគេចងចាំពីដំណើររឿងដែលមាននៅក្នុង ដានីយ៉ែល ១ ។ ឬអ្នកអាចអញ្ជើញសិស្សឲ្យពិនិត្យមើលប័ណ្ណប្រកាសអំពីពាក្យសម្ដីនៃប្រាជ្ញាវាងវៃ ដែលពួកគេបានបង្កើតនៅក្នុងមេរៀនទី ១៤២ ៖ « ដានីយ៉ែល ១ » ឬដើម្បីព្យាយាមចងចាំនូវអ្វីដែលពួកគេបានរួមបញ្ចូលនៅលើប័ណ្ឌនោះ ។
-
តើអ្នកនៅចាំអ្វីខ្លះអំពីរឿងនេះ ?
នៅក្នុងមេរៀនទី ១៤២ ៖ « ដានីយ៉ែល ១ » សិស្សបានរៀនថា ការគោរពតាមពាក្យសម្ដីនៃប្រាជ្ញាវាងវៃរបស់ព្រះអម្ចាស់នាំមកនូវពរជ័យខាងរូបកាយ និងខាងវិញ្ញាណ ។ ដោយជាផ្នែកនៃមេរៀននោះ អ្នកអាចនឹងអញ្ជើញសិស្សឲ្យបំពេញប្រយោគខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ៖ « រឿងមួយដែលខ្ញុំអាចធ្វើបានដែលនឹងជួយខ្ញុំឲ្យគោរពតាមពាក្យសម្ដីនៃប្រាជ្ញាវាងវៃគឺ … »
ដើម្បីជួយសិស្សវាយតម្លៃការខិតខំប្រឹងប្រែងរបស់ពួកគេ អ្នកអាចអញ្ជើញពួកគេឲ្យពិនិត្យមើលពីរបៀបដែលពួកគេបានបញ្ចប់សេចក្តីថ្លែងការណ៍នោះ ។ បន្ទាប់មកបង្ហាញសំណួរខាងក្រោមនេះមួយ ឬច្រើន ។
សូមឆ្លើយសំណួរមួយ ឬច្រើនខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកបានខិតខំអ្វីខ្លះដើម្បីគោរពតាមពាក្យសម្ដីនៃប្រាជ្ញាវាងវៃ ?
-
តើអ្នកមានបទពិសោធន៍អ្វីខ្លះ ពេលព្យាយាមគោរពតាមពាក្យសម្ដីនៃប្រាជ្ញាវាងវៃ ?
-
តើអ្នកបានឃើញព្រះប្រទានពរដល់អ្នក ឬអ្នកដទៃខាងរូបកាយ ឬខាងវិញ្ញាណតាមរយៈការគោរពតាមពាក្យសម្ដីនៃប្រាជ្ញាវាងវៃដែរឬទេ ?
សូមពិចារណាអញ្ជើញសិស្សស្ម័គ្រចិត្តឲ្យចែកចាយគំនិតរបស់ពួកគេ ។ អ្នកក៏អាចនឹងលើកទឹកចិត្តសិស្សឲ្យកែសម្រួលការខិតខំឬ ការតាំងចិត្តរបស់ពួកគេដើម្បីគោរពតាមពាក្យសម្ដីនៃប្រាជ្ញាវាងវៃ តាមការចាំបាច់ ។