Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sakalaia 10–14: ʻOku Ofi ʻa e ʻAho ʻo e ʻEikí

“Sakalaia 10–14: ʻOku Ofi ʻa e ʻAho ʻo e ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“Sakalaia 10–14: ʻOku Ofi ʻa e ʻAho ʻo e ʻEikí,” Fuakava Motuʻá – Tohi Lēsoni ʻa e Faiako Seminelí

Hakeai 1–2; Sakalaia 1–4; 10–14: Lēsoni 157

Sakalaia 10–14

ʻOku Ofi ʻa e ʻAho ʻo e ʻEikí

"He Comes Again to Rule and Reign" by Mary R. Sauer. Jesus Christ is descending to Earth at his Second Coming. There are men, women, and children surrounding him. He is wearing a red robe and is looking down at those who are gathering.

ʻOku fakahā ʻe he ʻEikí ʻo fakafou ʻi Heʻene kau palōfitá ha ngaahi fakaikiiki fekauʻaki mo e ngaahi meʻa ʻe hoko ʻi he kahaʻú koeʻuhí ke tau lava ʻo ʻiloʻi mo hanganaki atu ki ai ʻi he loto-falala. Naʻe kikiteʻi ʻe Sakalaia ʻe liuaki mai ʻa e Fakamoʻuí pea maluʻi Hono kakaí mei he ngaahi puleʻanga kuo fakataha ke tauʻi kinautolú. ʻE lava ke tokoni ʻa e lēsoni ko ʻení ke ongoʻi falala ʻa e kau akó ʻe ʻiate kinautolu ʻa e Fakamoʻuí lolotonga e ngaahi meʻa ʻe hoko kimuʻa ʻi he Hāʻele ʻAnga Ua Maí.

Teuteu ʻa e tokotaha akó: Fakaafeʻi e kau akó ke lau ʻa e “Hāʻele ʻAngaua Mai ʻa Sīsū Kalaisí” ʻi he Ngaahi Tefitó mo e Ngaahi Fehuʻí (Gospel Library). Poupouʻi kinautolu ke omi mateuteu ki he kalasí ke vahevahe ʻa e meʻa naʻa nau akó pe ngaahi fehuʻi ʻoku nau maʻú.

Ngaahi ʻEkitivitī Ako ʻOku Ala Fakahokó

Ko e Hanganaki Atu ki he Hā‘ele ‘Anga Ua Mai ʻa e Fakamoʻuí

Fakakaukau ke kamata e kalasí ʻaki haʻo kole ki he kau akó ke nau fakakaukau ki ha ngaahi meʻa lalahi ʻoku nau ʻamanaki ki ai ʻi he kahaʻú, hangē ko e ʻalu ʻo mālōlō ʻeveʻeva, ngāue fakafaifekau, pe mali. Fakaafeʻi ke nau vahevahe ʻenau ongo fekauʻaki mo e ngaahi meʻá ni.

Fakaʻaliʻali leva ha fakatātā ʻo e Hāʻele ʻAnga Ua Mai ʻa e Fakamoʻuí. Fakaafeʻi e kau akó ke hiki ha ngaahi foʻi lea ʻi he palakipoé te ne lava ʻo fakafofongaʻi ʻa e ongo ʻe ala maʻu ʻe he niʻihi fakafoʻituituí fekauʻaki mo e meʻa ko ʻení. ʻE lava ke kau ʻi he lisí e ngaahi lea hangē ko e fiefiá, mateuteú, loto-falalá, nonga, toputapu, taʻepauʻia, ilifia, pe veiveiua.

Ke vakaiʻi e ongo ʻoku nau maʻu fekauʻaki mo e Hāʻele ʻAnga Ua Mai ʻa e Fakamoʻuí, ʻe lava ke fai ʻe he kau akó ʻa e ngaahi meʻá ni.

Tali ‘a e ngaahi fehuʻi ko ‘ení ‘i hoʻo tohinoa ako folofolá:

Ko e ngaahi lea fē ʻokú ne fakamatalaʻi hoʻo ongo fekauʻaki mo e Hāʻele ʻAnga Ua Mai ʻa e Fakamoʻuí?
Ko e hā ʻokú ne tākiekina hoʻo ongo fekauʻaki mo e meʻa ko ʻení?

Hiki ha faʻahinga fehuʻi pē ʻokú ke maʻu fekauʻaki mo e Hāʻele ʻAnga Ua Mai ʻa e Fakamoʻuí.

ʻI hoʻo ako ʻa e ngaahi meʻa ʻoku fekauʻaki mo e Hāʻele ʻAnga Ua Maí, fakafanongo ki ha ngaahi ueʻi mei he Laumālié ke ke ʻiloʻi ʻa e founga te ke lava ai ʻo ongoʻi falala ange ʻe ʻiate koe ʻa e Fakamoʻuí lolotonga e ngaahi meʻa ko ʻení.

Te ke lava ke fakaafeʻi ha kau ako ʻe niʻihi ke vahevahe e meʻa ne nau hikí. Poupouʻi e kau akó ke kumi ha ngaahi tali ki he ngaahi fehuʻi ko ʻení ʻi heʻenau ako ʻa e Sakalaiá.

Fakatokangaʻi ange: ʻOku ʻikai fiemaʻu ke ke tali ʻa e fehuʻi kotoa pē fekauʻaki mo e Hāʻele ʻAnga Ua Mai ʻa e Fakamoʻuí. Kapau ʻoku fie ʻilo lahi ange ʻa e kau akó, te nau lava ʻo ako ʻa e ngaahi maʻuʻanga tokoni hangē ko e “Hāʻele ʻAngaua Mai ʻa Sīsū Kalaisí” ʻi he Ngaahi Tefitó mo e Ngaahi Fehuʻí (Gospel Library).

Naʻe kikiteʻi ʻe Sakalaia ʻa e Hāʻele ʻAnga Ua Mai ʻa e Fakamoʻuí

Ke tokoni ke mahino ki he kau akó e ngaahi kikite ʻa Sakalaia fekauʻaki mo e Hāʻele ʻAnga Ua Mai ʻa e Fakamoʻuí, te ke lava ʻo lau pe fakamatalaʻi fakanounou ʻa e palakalafi ko ʻení. ʻE lava foki ke lau ʻe he kau akó ʻa e ngaahi ʻuluʻi fakamatala ki he Sakalaia 10; 12–14.

Naʻe kikiteʻi ʻe Sakalaia ʻe hoko ʻi he ngaahi ʻaho fakaʻosí, ha tau lahi, ʻa ia ʻoku ʻiloa ko e tau ʻa ʻAmaketoné (vakai, Fakahā 16:16), ʻo ofi ki Selusalema. ʻE fakatahataha ʻa e ngaahi puleʻanga kotoa pē ʻo e māmaní ke tauʻi ʻa Selusalema (vakai, Sakalaia 12:2–3). ʻE kau ʻi he taú hano kapa ʻo Selusalema ʻi hono kāpui ʻe he kau taú ʻa e koló (vakai, Sakalaia 14:2). ʻE hā leva ʻa e Fakamoʻuí ʻi he Moʻunga ʻŌlivé (vakai, Sakalaia 14:4).

Hili hono fakakakato ʻe he kau akó ʻa e laʻipepa tufá, fakaafeʻi kinautolu ke ʻeke ha ngaahi fehuʻi fekauʻaki mo e meʻa naʻa nau akó. Kapau ʻoku ʻikai ke ke fakapapauʻi ha tali, talaange ʻoku ʻikai ke ke ʻilo. Fakaafeʻi kinautolu ke fekumi ki ha tali. Te ke lava foki ʻo fekumi ki ha tali mo kinautolu ʻi loto pe ʻi tuʻa mei he kalasí.

ʻE lava ke tokoni ʻa e fehuʻi ko ʻení ke ʻiloʻi ʻe he kau akó ʻa e ngaahi moʻoni mei he ngaahi akonaki ʻa Sakalaiá.

Ko e hā ʻoku akoʻi atu ʻe he ngaahi potufolofola ko ʻení fekauʻaki mo Sīsū Kalaisí?

Fakaafeʻi e kau akó ko ha konga ʻo e fealēleaʻakí, ke nau fakamatalaʻi fakanounou ʻa e meʻa ne nau ako fekauʻaki mo e Fakamoʻuí ʻi ha fakamatala mahinongofua ʻo e moʻoní. Mahalo ʻe vahevahe ʻe he kau akó ha ngaahi tali kehekehe, kau ai ʻa e: ʻE liuaki mai ʻa Sīsū Kalaisi ʻi he ngaahi ʻaho fakaʻosí pea tānaki, fakahaofi, mo maluʻi Hono kakaí.

ʻOku maʻu ʻa e mālohí ʻi he taimi ʻoku fakatokangaʻi ai ʻe he kau akó ko e ngaahi moʻoni ʻoku nau ako mei he folofolá ko ha fakamoʻoni ia ʻo e ʻofa, mālohi, mo e ʻaloʻofa ʻa e Tamai Hēvaní mo Sīsū Kalaisi ʻi heʻenau moʻuí. ʻE lava ke tokoni ʻa e ʻilo ko ʻení ke ongoʻi ʻe he kau akó ha fehokotaki vāofi ange mo Kinaua.

ʻE lava ke tokoni ʻa e ngaahi fehuʻi ko ʻení ke maʻu ʻe he kau akó ʻa e mahino ko ʻení.

(Ki ha ako lahi ange ʻi hono ʻeke ha ngaahi fehuʻi ʻoku nau fakafehokotaki e ʻofa, mālohi mo e ʻaloʻofa ʻa e ʻEikí ki he ngaahi moʻoni naʻe akoʻi ʻi he folofolá, vakai ki he “Tokoniʻi ʻa e kau akó ke ʻilo ʻa e ʻofa, mālohi mo e ʻaloʻofa ʻa e ʻEikí ʻi heʻenau moʻuí” ʻi he Fakatupulaki ʻa e Ngaahi Taukei ʻa e Faiakó.)
ʻE tokoniʻi fēfē kitautolu ʻi hono ʻiloʻi e moʻoni ko ʻeni fekauʻaki mo Sīsū Kalaisí ke tau fehangahangai mo ʻEne Hāʻele ʻAnga Ua Maí ʻi he loto-falala?
Ko e hā ha ngaahi founga ʻoku tānaki, fakahaofi, mo maluʻi ai ʻe Sīsū Kalaisi Hono kakaí he ʻahó ni?

ʻE lava ke kau ʻi he ngaahi tali ki he fehuʻi kimuʻá ʻa e: ʻOku fakahoko ʻe Sīsū Kalaisi ʻa e tānaki fakatahá ʻaki hono fakaafeʻi e taha kotoa ke haʻu kiate Ia, muimui ki Heʻene ongoongoleleí, pea maʻu e ngaahi tāpuaki ʻo e temipalé. ʻOkú Ne fakahaofi ʻaki ʻEne foaki ʻa e meʻaʻofa ʻo ʻEne Fakaleleí mo e ngaahi ouau ʻo e ongoongoleleí. ʻOkú Ne maluʻi ʻaki hono fakahā Hono finangaló ʻo fakafou ʻi he kau palōfita moʻuí mo e folofolá.

Fakahaaʻi ʻa e meʻa ʻokú ke ʻiló

Lau ʻa e fakalea ʻo e himi “Haʻu ʻa e Tuʻi ʻo e Ngaahi Tuʻi” (Ngaahi Himí, fika 23). Hili iá pea hiki mo ha toe veesi kehe ki he himí. Fakakau ai e ngaahi akonaki ʻa Sakalaia fekauʻaki mo e meʻa naʻe talaʻofa ʻe he Fakamoʻuí ke fai maʻa Hono kakaí lolotonga ʻEne Hāʻele ʻAnga Ua Maí, pea mo e founga ʻoku tokoniʻi ai koe ʻe he ngaahi talaʻofa ko ʻení ke ke ongoʻi falala ʻe nofo ʻa e Fakamoʻuí mo Hono kakaí ʻi he ngaahi ʻaho fakaʻosí.

Fakaafeʻi e kau akó ke vahevahe e fakalea ne nau tohí.

Mahalo te mou fakakaukau ke hivaʻi fakataha mo e kalasí ʻa e himí, kau ai ha veesi ʻe taha pe lahi ange naʻe tohi ʻe he kau akó.

Ke fakaʻosí, te ke lava ʻo vahevahe hoʻo fakamoʻoni ki he Fakamoʻuí mo e founga ʻokú Ne tokoniʻi ai koe ke ke hanganaki atu ki Heʻene Hāʻele ʻAnga Ua Maí ʻi he loto-falalá.

Ngaahi Maʻuʻanga Tokoni Kehé

Ko e hā kuo akoʻi ʻe he kau palōfita ʻo onopōní fekauʻaki mo e Hāʻele ʻAnga Ua Mai ʻa e Fakamoʻuí?

Naʻe akonaki ʻa Palesiteni Lāsolo M. Nalesoni ʻo pehē:

ʻE liuaki e ʻEikí ki he fonua naʻá Ne fakamāʻoniʻoniʻi ʻi Heʻene ngāue fakafaifekau ki ai ʻi he māmaní. Te Ne toe hāʻele mai ʻi he ikuna ki Selusalema. Te Ne toe liuaki ki he Kolo Māʻoniʻoní ʻi he ngaahi kofu kulokula fakaʻeiʻeiki ke fakataipe Hono taʻataʻá, ʻa ia naʻe tafe mei he ava kotoa pē (vakai, Tokāteline mo e Ngaahi Fuakava 133:46–48). ʻI he feituʻu ko iá mo e ngaahi feituʻu kehe “ʻe fakahā ʻa e nāunau ʻo [e ʻEikí], pea ʻe mamata ki ai ʻa e kakai kotoa pē” (ʻĪsaia 40:5; vakai foki ki he Tokāteline mo e Ngaahi Fuakava 101:23). ʻE ui Hono “huafá ko Fakaofo, ko Akonaki, ko e ʻOtua Māfimafi, ko e Tamai Taʻengata, ko e ʻEiki ʻo e Melinó” (ʻĪsaia 9:5).

Te Ne pule mei ha ongo kolo lalahi ʻe ua: taha ʻi Selusalema motuʻa (vakai, Sakalaia 14) pea ko e taha ʻi he Selusalema Foʻou ʻe “langa ia ʻi he konitinēniti ʻo ʻAmeliká” (Ngaahi Tefito ʻo e Tuí 1:10). Mei he ongo senitā ko ʻení te Ne puleʻi mei ai e ngaahi ngāue ʻa Hono Siasí mo e puleʻangá. ʻE langa mo ha temipale ʻe taha ʻi Selusalema. Mei he temipale ko iá, te Ne ʻafio ai ʻo taʻengata ko e ʻEiki ʻo e Ngaahi ʻEikí. ʻE tafe e vaí mei he lalo temipalé. ʻE fakamoʻui e ngaahi vai ʻo e Tahi Maté. (Vakai, ʻIsikeli 47:1–8.)

Te Ne maʻu ʻi he ʻaho ko iá ha ngaahi huafa foʻou pea ʻe takatakaiʻi Ia ʻe ha Kāingalotu makehe. ʻE ʻiloa ia ko e “ʻEiki ʻo e Ngaahi ʻEikí mo e Tuʻi ʻo e ngaahi tuʻí: pea ko kinautolu [ʻe] ʻiate iá [ko kinautolu ia ʻoku] ui, mo fili, mo angatonu” (Fakahā 17:14) ki heʻenau falalá ʻi he māmaní. Pea te Ne “pule ia ʻo taʻengata pea taʻengata” (Fakahā 11:15).

ʻE toe fakafoki e māmaní ki hono tuʻunga fakapalataisí pea hoko ʻo foʻou. ʻE ʻi ai ha langi mo ha māmani foʻou (vakai, Fakahā 21:1; ʻEta 13:9; Tokāteline mo e Ngaahi Fuakava 29:23–24).

Ko hotau fatongiá ia—ko hotau faingamālie ia—ke tokoni ki hono teuteuʻi ʻo e māmaní ki he ʻaho ko iá. (“Ko e Kahaʻu ʻo e Siasí: Ko Hono Teuteu ʻo e Māmaní ki he Hāʻele ʻAnga Ua Mai ʻa e Fakamoʻuí,” Liahona, ʻEpeleli 2020, 10–11)

Ko e hā ha ngaahi ongo te tau lava ʻo aʻusia ʻi heʻetau teuteu ki he liuaki mai ʻa e Fakamoʻuí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:55

ʻI hoʻo moʻui angatonu ʻi he taʻu takitaha, ʻoku ou fakapapauʻi atu ʻe toutou fakamahino kiate koe ʻe hoʻo aʻusiá ko Sīsū ʻa e Kalaisí. ʻE fefeka mo tuʻu maʻu ange ʻa e maka fakalaumālie ʻokú ke tuʻu aí. Te ke fiefia kuo ʻomai koe ʻe he ʻOtuá ko e konga ʻo e teuteu fakaʻosi ki he liuaki nāunauʻia mai ʻa Kalaisí. (“Ngaahi Faingataʻa Fakalaumālié,” Liahona, Mē 2014, 21)

Ki ha faleʻi lahi ange ki he founga ke aʻusia ai ʻa e ʻamanaki leleí ʻi heʻetau teuteu ki he toe hāʻele mai ʻa e Fakamoʻuí, vakai ki he fakamatala ʻa Palesiteni Nalesoni “Ko e Kahaʻu ʻo e Siasí: Ko Hono Teuteu ʻo e Māmaní ki he Hāʻele ʻAnga Ua Mai ʻa e Fakamoʻuí” (Liahona, ʻEpeleli 2020, 7–11).

Ko e fē te u lava ʻo ako lahi ange ai fekauʻaki mo e tau ʻa ʻAmaketoné?

Ki ha fealeaʻaki fakaikiiki fekauʻaki mo e tau ʻa ʻAmaketoné, vakai ki he The Battle of Armageddon: A Prophetic View (Old Testament Student Manual 1 Kings–Malachi [2003], 291–95). Te ke lava foki ʻo ako fekauʻaki mo e fepaki fakamāmani lahi ko ʻení ʻi he ʻIsikeli 38–39; Sakalaia 12–14; Fakahā 11; Tokāteline mo e Ngaahi Fuakava 45:47–53; mo e Fakahinohino ki he Ngaahi Folofolá, “ʻAmaketone” (Gospel Library).

Ngaahi ʻEkitivitī Fakalahi ki he Akó

Sakalaia 9:9. Kikite ʻo e hū ikuna ʻa Kalaisí

Te ke lava ʻo fakamatalaʻi ange naʻe ʻikai ngata pē ʻi he ngaahi kikite ki he Hāʻele ʻAnga Ua Mai ʻa e Fakamoʻuí, ka naʻe kikiteʻi ʻe Sakalaia ha meʻa ʻe hoko lolotonga e ngāue fakafaifekau ʻa Kalaisi ʻi he māmaní.

Fakaafeʻi e kau akó ke nau lau ʻa e Sakalaia 9:9, ʻo kumi e kikite fekauʻaki mo Sīsū Kalaisí. Fakaafeʻi leva kinautolu ke lau ʻa e Mātiu 21:4–11, ʻo kumi e founga naʻe fakahoko ʻaki ʻe Sīsū Kalaisi ʻa e kikite ko ʻení. Ke tokoni ke fakakaukauloto ʻa e kau akó ki he meʻa naʻe hokó, te ke lava ʻo huluʻi ʻa e “Ko e Hū Ikuna ʻa e ʻEikí ki Selusalemá” (1:22).

1:9

Hili iá, te mou lava ʻo aleaʻi ʻa e founga ʻoku fakahā mai ai ʻe he ʻEikí ʻa e ngaahi moʻoni fekauʻaki mo e ngaahi meʻa ʻe hoko ʻi he kahaʻú ki Heʻene kau palōfitá pea mo e meʻa ʻokú ne akoʻi mai kiate kitautolu fekauʻaki mo e ʻEikí. ʻE lava ke lisi ʻe he kau akó ha ngaahi sīpinga kehe mei he folofolá naʻe kikiteʻi ai ʻe he kau palōfitá ʻa Sīsū Kalaisi. Hili iá te nau lava ʻo aleaʻi e founga ʻoku fakamālohia ai ʻe he ngaahi kikite ko iá ʻetau fakamoʻoni kiate Iá.

Ko e mateuteu ki he Hāʻele ʻAnga Ua Mai ʻa e Fakamoʻuí

Ke tokoni ke ongoʻi mateuteu ʻa e kau akó ki he Hāʻele ʻAnga Ua Mai ʻa e Fakamoʻuí, te ke lava ʻo huluʻi ha taha pe fakatouʻosi ʻo e ongo vitiō ko ʻení:

Israel, Israel, God is Calling—Highlight 1 (1:53): Ko e vahevahe ʻe Palesiteni Sefilī R. Hōlani ha ngaahi fakakaukau fekauʻaki mo ʻene fiemaʻu ke maʻu ia ʻi he liuaki mai ʻa e Fakamoʻuí.

1:53

The Righteous Need Not Fear (1:06): Ko e akoʻi ʻe Palesiteni Tāleni H. ʻOakesi ʻoku ʻikai fiemaʻu ke manavahē ʻa e kau māʻoniʻoní ʻi he hāʻele mai ʻa e Fakamoʻuí.

1:8

Ko hono kumi ha ngaahi tali ki he ngaahi fehuʻi fekauʻaki mo e Hāʻele ʻAnga Ua Maí ʻi he Folofolá

Ke tokoni ke fakaʻaongaʻi ʻe he kau akó ʻa e folofolá ke maʻu e tali ki he ngaahi fehuʻi ʻoku nau maʻu fekauʻaki mo e Hāʻele ʻAnga Ua Maí, te ke lava ʻo fokotuʻutuʻu ʻa e kalasí ki ha fanga kiʻi kulupu iiki ki he ʻekitivitī ko ʻení. Vahe ki he kulupu takitaha ha taha ʻo e ngaahi fehuʻi ko ʻení mo e ngaahi veesi folofola ʻoku ʻoatu fakataha mo iá. Fakaafeʻi e kau akó ke nau ako ha niʻihi pe kotoa ʻo e ngaahi vēsí pea teuteuʻi ha kiʻi fakamatala nounou fekauʻaki mo e meʻa ʻoku nau ʻiló. Fakaafeʻi ʻa e kulupu takitaha ke vahevahe mo e kalasí ʻa e meʻa naʻa nau akó.

Ko e hā ʻe hoko ki he kau māʻoniʻoní mo e angahalá ʻi he Hāʻele ʻAnga Ua Maí?
Te u ʻi ai nai ʻi he taimi ʻe liuaki mai ai ʻa e Fakamoʻuí?
ʻOku tau ʻilo nai ʻa e taimi ʻe Hāʻele ʻAnga Ua Mai ai ʻa e Fakamoʻuí?
Ko e hā nai mo ha toe ngaahi fakaʻilonga kehe ʻo e Hāʻele ʻAnga Ua Mai ʻa e Fakamoʻuí?