Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sakalaia 1–8: “Tafoki Mai ʻa Kimoutolu Kiate Au”

“Sakalaia 1–8: ‘Tafoki Mai ʻa Kimoutolu Kiate Au,’” Fuakava Motuʻá – Tohi Lēsoni ʻa e Faiako Seminelí (2026)

“Sakalaia 1–8: ‘Tafoki Mai ʻa Kimoutolu Kiate Au,’” Fuakava Motuʻá – Tohi Lēsoni ʻa e Faiako Seminelí

Hakeai 1–2; Sakalaia 1–4; 10–14: Lēsoni 156

Sakalaia 1–8

“Tafoki Mai ʻa Kimoutolu Kiate Au”

A young man walks with the good shepherd, Jesus, away from the thorns that had held him bound.

Hili ha taʻu ʻe 50 ʻo e nofo pōpula ʻi Pāpilone mo Peasiá, naʻe toe foki ha toenga ʻo e fale ʻo ʻIsilelí ki honau fonua tapú, ka naʻa nau kei mamaʻo fakalaumālie pē mei he ʻEikí. Naʻe fakafou ʻe he Fakamoʻuí ʻi he palōfita ko Sakalaiá hono fakafoʻou ʻEne fakaafé, “tafoki mai ʻa kimoutolu kiate au” (Sakalaia 1:3), mo e talaʻofa te Ne “nofo ʻi [he] lotolotonga ʻo [Hono kakaí]” (Sakalaia 2:10). ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi founga te nau lava ai ʻo tafoki ki he ʻEikí.

Teuteu ʻa e tokotaha akó: Fakaafeʻi e kau akó ke fakalaulauloto ki he meʻa te nau lea ʻaki ki ha kaungāmeʻa ʻokú ne ongoʻi mamaʻo mei he ʻofa ʻa e ʻEikí. ʻE lava leva ke teuteu ʻa e kau akó ke vahevahe ʻenau ngaahi faleʻí mo e kalasí. ʻE lava ke fehuʻi ʻe he kau akó ki ha kaungāmeʻa falalaʻanga pe mātuʻa pe ko e hā ha faleʻi te nau fai ʻi he tūkunga ko ʻení.

Ngaahi ʻEkitivitī Ako ʻOku Ala Fakahokó

Ko e hā ʻoku tafoki ai ha kakai ʻe niʻihi meia Sīsū Kalaisí?

Fakakaukau ke kamata e kalasí ʻaki hono fakaʻaliʻali ha fakatātā ʻo e Fakamoʻuí ʻi he tafaʻaki ʻo ha fakatātā faingofua ʻo ha tangata mo ha foʻi tao ʻoku tuhu mamaʻo meiate ia.

Ko e hā ha ngaahi ʻuhinga ʻe ala tafoki ai ʻa e toʻu tupú mei he ʻEikí?

Fakamanatu ki he kau akó naʻe fakahā ʻe he kau palōfitá ʻi he kotoa ʻo e Fuakava Motuʻá e fakaafe ʻa e Fakamoʻuí ke tafoki pe foki kiate Ia neongo pe ko e hā e ʻuhinga ne nau mavahe aí (vakai, Teutalōnome 4:30–31; Nehemaia 1:9). Ko e taimi ʻe niʻihi ʻoku tau tafoki ʻo ʻikai ʻiloʻi ʻoku tau hē.

Fakaafeʻi e kau akó ke nau fakakaukau pe ʻoku nau tafoki pe ko e kakai ʻoku nau ʻofa aí mei he ʻEikí. Te ke lava ʻo fakaafeʻi e kau akó ke fakakaukau ki he sivi fakaekita ko ʻení.

Ko e fē ʻi he ngaahi fakamatala ko ʻení ʻokú ke ongoʻi ʻoku moʻoní?

ʻOku ou fie tokoni ki he kakai ʻoku ou ʻofa aí ʻa ia ʻoku nau tafoki mei he ʻEikí.
Kuo teʻeki ai ke u fuʻu fakakaukau ki he tuʻunga ʻo ʻeku ofi ki he ʻEikí.
ʻOku ou ongoʻi ʻoku ʻahiʻahiʻi au ke u tafoki mei he ʻEikí.
ʻOku ou fai hoku lelei tahá ke ofi ki he ʻEikí mo ʻamanaki te u lava ʻo tuʻu maʻu.

ʻI hoʻo ako ʻa e Sakalaiá, fekumi ki ha ueʻi mei he Laumālie Māʻoniʻoní ke tokoniʻi koe ʻi ho ngaahi tūkunga fakatāutahá.

Ko e tafoki ki he ʻEikí

Hili ha taʻu ʻe 50 ʻo e nofo pōpulá, naʻe faifai pea foki ha kau ʻIsileli tokolahi ki Selusalema mo e ngaahi feituʻu takatakai aí. Naʻa nau toe langa foʻou ʻa e koló pea kamata hono toe langa e temipale ʻo e ʻEikí (vakai, ʻĒsela 5:1–2; 6:14). Neongo naʻa nau foki fakatuʻasino ki Selusalema, ka naʻe kei mamaʻo fakalaumālie pē ha kakai tokolahi mei he ʻEikí. Naʻá Ne fekauʻi mai ʻa e palōfita ko Sakalaiá ke tokoni ki he kakaí ke nau tafoki kiate Ia koeʻuhí ke Ne lava ʻo “nofo ʻi [honau] lotolotongá” (Sakalaia 2:10).

Lau ʻa e Sakalaia 1:1–3, ʻo kumi e meʻa naʻe fakahinohino ʻe he ʻEikí ke fai ʻe Hono kakaí.

Tā ha kōlomu ʻe fā ʻi he palakipoé. Hiki pe ʻai ha tokotaha ako ke ne hiki ʻa e foʻi moʻoni taʻekakato ko ʻení ʻi he palakipoé ʻi ʻolunga ʻi he ngaahi kōlomú: ʻOku tau tafoki ki he ʻEikí ʻaki …

Te ke lava ʻo hiki ʻa e ngaahi potufolofola ko ʻení ʻi he palakipoé, pea taha ʻi he kōlomu takitaha. Vahevahe ʻa e kau akó ki ha ngaahi kulupu tautau toko fā pea fakaafeʻi ʻa e mēmipa takitaha ʻo e kulupú ke nau ako ha taha ʻo e ngaahi potufolofolá. Hili iá ʻe lava ke fakakakato ʻe he kau akó ʻa e fakamatala ʻo e moʻoní ʻo fakaʻaongaʻi ʻenau potufolofolá.

Sakalaia 1:4
Sakalaia 3:7 (ʻE lava ke ʻuhinga ʻa e “te u vaheʻi ha ngaahi potu ke ke ʻeveʻeva fakataha ai mo kinautolu ʻoku tau tutuʻu aí” ki he ongoʻi maʻa mo taau ʻi he ʻao ʻo e kau talafekau fakalangí.)
Sakalaia 7:9–10
Sakalaia 8:16–17 (fakatokangaʻi ʻa e kupuʻi lea “melino ʻi homou ngaahi matapaá”)

Vahevahe ʻa e meʻa kuó ke akó

Fakaafeʻi e ngaahi kulupú ke vahevahe ʻa e meʻa ne nau akó. Ko e founga ʻe taha ke fai ai ʻení ko hono fakaafeʻi ʻa e kulupu takitaha ke hiki ʻenau ngaahi tali ki he fehuʻi 2 pe 3 ki ha taha ʻo e ngaahi tūkungá ʻi he kōlomu totonu ʻi he palakipoé.

ʻI he ʻosi e vahevahe ʻa e kau akó, tokoni ke nau fakakaukau ki he meʻa kuo nau akó ʻaki hono fakaafeʻi kinautolu ke fakahoko ʻení.

Hiki ʻi hoʻo tohinoa akó ha meʻa ʻe taha pe ua ʻokú ke ongoʻi ʻe lava ʻo tokoni atu ke ke tafoki ai ki he ʻEikí. Fakaafeʻi hoʻo Tamai Hēvaní ʻi he faʻa lotu ke tokoni atu ʻi hoʻo ngaahi feingá.

Te ke lava ʻo fakaʻosi ʻaki hoʻo fakamoʻoni ki he ʻofa ʻoku maʻu ʻe he Tamai Hēvaní mo Sīsū Kalaisi maʻatautolú pea mo ʻEna fakaafe angaʻofa maʻu pē ke tafoki kiate Kinauá.

Ngaahi Maʻuʻanga Tokoni Kehé

Ko e hā te u lava ʻo fai ke tafoki ai mei he koví?

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:45

Ko e ʻuluaki mo e ikuʻanga fakanatula ʻo e falala ki he Fakamoʻuí, ko e fakatomalá mo tafoki mei he koví. ʻI heʻetau fakahaaʻi ʻetau tui ki he ʻEikí, ʻoku fakanatula ai ʻetau tafoki, haʻu, mo fakafalala kiate Iá. Ko ia ko e fakatomalá ko e falala mo e fakafalala ki he Huhuʻí ke Ne fai maʻatautolu e meʻa he ʻikai ke tau malava ‘o fai maʻatautolú. Kuo pau ke tau takitaha “[falala] kakato ki he ngaahi lelei ʻaʻana ʻa ia ʻokú ne māfimafi ke fakamoʻuí” [2 Nīfai 31:19] he ʻoku tuʻunga pē ʻi he “ngaahi ngāue māʻoniʻoní, mo e ʻaloʻofá mo e manavaʻofa ʻa e Mīsaia Māʻoniʻoní” [2 Nīfai 2:8] ʻe lava ke tau hoko ai ko ha kakai foʻou ʻia Kalaisí pea tau toe foki ai ʻo nofo ʻi he ʻao ʻo e ʻOtuá. (“Tānaki Fakataha ʻa e Meʻa Kotoa Pē ʻia Kalaisi,” Liahona, Nōvema 2018, 23)

Ko e hā ha meʻa te u lava ʻo fai ke manavaʻofa mo angaʻofa ai ki he niʻihi kehé?

Naʻe pehē ‘e Palesiteni Lāsolo M. Nalesoni:

ʻI heʻetau hoko ko e kau ākonga ʻa Sīsū Kalaisí, kuo pau ke tau hoko ko e sīpinga ʻo e founga feohi mo e niʻihi kehé—tautautefito ki he taimi ʻoku kehekehe ai ʻetau fakakaukaú. Ko e taha ʻo e founga faingofua taha ke ʻilo ai ha tokotaha muimui moʻoni ʻo Sīsū Kalaisí ko e manavaʻofa ʻa e tokotaha ko iá ki he kakai kehé. …

Siʻoku ngaahi tokoua mo e tuofāfine ʻofeina, ʻoku mahuʻinga moʻoni ʻa e founga ʻetau fetauhiʻakí! ʻOku mahuʻinga ʻaupito ʻa e anga ʻo ʻetau talanoa ki he niʻihi kehé pea fekauʻaki mo kinautolu ʻi ʻapi, ʻi he lotú, ʻi he ngāué, pea ʻi he ʻinitanetí. ʻI he ʻaho ní, ʻoku ou kole atu kiate kitautolu ke tau feohi mo e niʻihi kehé ʻi ha founga māʻolunga mo māʻoniʻoni ange. Kātaki ʻo fakafanongo fakalelei. “Kapau ʻoku ai ha meʻa ʻoku māʻoniʻoni, fakaʻofoʻofa, pe ongoongo lelei pe feʻunga mo hono vikivikiʻí” [Ngaahi Tefito ʻo e Tui 1:13] ʻa ia te tau lava ʻo lea ʻaki ki ha taha—ʻo tatau ai pē pe kiate ia tonu pe ʻi he ʻikai ke ne ʻi aí—ʻoku totonu ke hoko ia ko ʻetau tuʻunga moʻui ʻo e fetuʻutakí. (“Fiemaʻu ha Kau Faʻa Fakalelei,” Liahona, Mē 2023, 98, 99–100)

Te u lava fēfē ʻo hoko ko ha tokotaha faʻa fakaleleí?

Naʻe pehē ‘e Palesiteni Lāsolo M. Nalesoni:

ʻOku ʻikai ke tau lava ʻo puleʻi ʻa e ngaahi puleʻangá, pe ngaahi tōʻonga ʻa e niʻihi kehé, pe naʻa mo e kau mēmipa ʻo hotau ngaahi fāmilí. Ka te tau lava ʻo mapuleʻi pē kitautolu takitaha. Siʻoku kāinga ʻofeina, ko ʻeku kole atu ʻi he ʻaho ní, ke fakangata ʻa e ngaahi fepakipaki ʻoku ʻikai mapuleʻi ʻi homou lotó, homou ʻapí, pea mo hoʻomou moʻuí. Tanu ha faʻahinga pea mo e ngaahi loto kotoa pē ke fakamamahiʻi ʻa e niʻihi kehé—ʻo tatau ai pē pe ko e ngaahi meʻatau ko iá ko ha loto-ʻita vave, faʻa fakaanga pe lauʻikoviʻi, pe ko ha fehiʻa ki ha tokotaha kúo ne toutou fakamamahiʻi koe. Naʻe fekauʻi mai ʻe he Fakamoʻuí ke tau fulihi atu ʻa e kouʻahe ʻe tahá, ke ʻofa ki hotau ngaahi filí, pea hūfia ʻa kinautolu ʻoku nau fai kovi mo fakatangaʻi kitautolú. …

Ko e kau muimui kitautolu ʻo e Pilinisi ʻo e Melinó. ʻOku tau fiemaʻu ʻi he taimí ni ʻo lahi ange ʻi ha toe taimi, ʻa e melino ko Ia toko taha pē te Ne lava ʻo ʻomí. ʻE lava fēfē nai ke tau ʻamanaki ki ha melino ʻi he māmaní, ka ʻoku ʻikai ke tau feinga fakafoʻituitui kitautolu ke maʻu ʻa e melinó mo e maʻumaʻulutá? … ʻOku ou kōlenga atu ke mou fai ʻa e meʻa kotoa ʻe malavá ke fakangata ai ʻa e ngaahi fekeʻikeʻi fakataautaha ʻoku lolotonga hoko ʻi homou lotó mo hoʻomou moʻuí. (“Ko e Mālohi ʻo e Ivi Fakalaumālié,” Liahona, Mē 2022, 97)

Fēfē kapau te u kei fai pē ha ngaahi fehalaaki ʻokú ne fakatafoki au mei he ʻEikí?

Naʻe akoʻi ʻe Sisitā Soi D. Sōnasi, ko e Palesiteni Lahi mālōlō ʻo e Palaimelí ʻo pehē:

Feinga ke [ako ʻo lahi] ange ʻi he ʻaho kotoa pē. ʻOku ʻikai ʻamanaki e Tamai Hēvaní ke ke fakahoko fakaʻangataha ʻa e meʻa kotoa pē. Ko e moʻuí ʻoku fekauʻaki ia mo e akó kae pehē ki he tupulaki māmālie peé. ʻOkú Ne finangalo ke ke feinga pē. Pea ʻokú Ne finangalo ke ke fiefia ʻi hoʻo tupulakí!

Ko e taimi ʻe niʻihi ʻoku tau fakamaauʻi fefeka kitautolu. ʻOku tau pehē, “Kuó u tōnounou. He ʻikai te u lavaʻi ia,” pea tau foʻi leva. Ka ʻoku folofola mai e Fakamoʻuí, “Feinga pē. ʻOku ou ʻi heni ke tokoniʻi koe!” Koeʻuhí ko Sīsū Kalaisi, he ʻikai ke tau tuenoa. Te tau lava ʻo tuʻu hake pea toe feinga pē ʻi Heʻene tokoní. Ko e taumuʻa ia ʻo e moʻuí ni. (“Toe Kiʻi Lelei Ange he ʻAho Kotoa Pē,” Liahona, Sānuali 2020, 20)

Naʻe akoʻi ʻe ʻEletā ʻAlani D. Haini ʻo e Kau Fitungofulú ʻo pehē:

ʻOku ou fakamoʻoni ʻe ʻikai tafoki ʻetau Fakamoʻuí meiate kitautolu kapau te tau loto-fakatōkilalo ke fekumi kiate Ia ka tau lava ʻo fakatomala; ʻe ʻikai loto e Fakamoʻuí ke tau hē; pea he ʻikai ke Ne pehē, “ʻOiauē, ʻikai ko koe ai pē”; pea ʻe ʻikai te Ne liʻaki ʻa kitautolu koeʻuhí ko e ʻikai mahino kiate kitautolu ʻa hono faingataʻa ʻo e fakaʻehiʻehi mei he angahalá. ʻOku mahino kotoa ia kiate Ia, kau ai ʻa e loto-mamahí, maá, mo e ʻita koeʻuhí ko e nunuʻa ʻo e angahalá.

ʻOku moʻoni ʻa e fakatomalá pea ʻoku ʻaonga ia. (“Ko e Manatu Kiate Ia ʻOku Tau Falalaʻiá,” Liahona, Nōvema 2015, 123)

Ngaahi ʻEkitivitī Fakalahi ki he Akó

Sakalaia 3:1–7. Kuo pau ke tau maʻa ke nofo ʻi he ʻao ʻo e ʻOtuá

ʻE ala tokoni ke ako ʻe he kau akó ʻa e mata meʻa-hā-mai naʻe foaki ʻe he ʻEikí kia Sakalaia kau kia Sōsiua, ko e taulaʻeiki lahi ʻo hono kuongá. Naʻe fakahā ʻe he ʻEikí kia Sakalaia ʻa e founga naʻe fakamaʻa ai ʻa Sōsiua mei he angahalá koeʻuhí ke ne lava ʻo ʻi he ʻao ʻo e ʻEikí mo ʻEne kau talafekau fakalangí ʻi heʻene ngāue ʻi he temipalé. Te ke lava ʻo fakaafeʻi e kau akó ke ako ʻa e Sakalaia 3:1–7 pea aleaʻi ʻa e ʻuhinga ʻoku mahuʻinga ai ke tau maʻa ʻi heʻetau tuʻu ʻi he ʻao ʻo e ʻEikí.

Hili iá, ʻe lava ke fakakaukauloto ʻa e kau akó ʻoku faingataʻa ki ha taha ke ne ongoʻi taau ke ʻi he ʻao ʻo e ʻEikí. ʻE lava ke hohaʻa ʻa e tokotahá ni he ʻikai ke ne toe ongoʻi maʻa. Fakaafeʻi e kau akó ke nau aleaʻi e faleʻi te nau fai ki ha kaungāmeʻa naʻá ne ongoʻi peheni.

ʻE lava leva ke fakafekauʻaki ʻe he kau akó ʻa e Sakalaia 3:4, ʻĪsaia 1:18, mo e 3 Nīfai 27:19. Fokotuʻutuʻu ʻa e kau akó ki ha ngaahi hoa pea fakaafeʻi kinautolu ke akoako fakamatalaʻi ʻa e founga ʻe lava ke tokoni ai ʻa e ngaahi veesi ko ʻení ki honau kaungāmeʻá.

Kapau ʻe ʻaonga ki he kau akó ha mahino kiate kinautolu e founga ʻoku tokoni ai ʻa e maʻa fakalaumālié ke nau ongoʻi loto-falala ʻi he ʻao ʻo e kau talafekau māʻoniʻoní (vakai, Sakalaia 3:7), te ke lava ʻo huluʻi ʻa e vitiō “Preparation of Joseph F. Smith: I Am Clean” (2:16). ʻOku vahevahe ʻe he vitiō ko ʻení ha fakamatala ki ha meʻa-hā-mai naʻe maʻu ʻe Palesiteni Siosefa F. Sāmita ʻi heʻene mamata ki he tokoua ʻene tamaí, ʻa e Palōfita ko Siosefa Sāmitá. ʻOku lave ʻa e fakamatalá ki he ongoʻi loto-falala ʻa Siosefa F. ke ʻi he ʻao ʻo e kau mēmipa hono fāmili kuo pekiá.

2:16

Sakalaia 7:4–6. Ko hono fai ha ngaahi meʻa maʻatautolu pe maʻá e ʻEikí

Koeʻuhí naʻe teʻeki ai tafoki kakato e kau ʻIsileli ʻi he kuonga ʻo Sakalaiá ki he ʻEikí, naʻa nau fakahoko ha ngaahi ngāue fakalotu hangē ko e ʻaukaí ʻi ha ngaahi ʻuhinga hala. Fakaafeʻi e kau akó ke lau ʻa e Sakalaia 7:4–6, ʻo kumi ha ngaahi fehuʻi naʻe fai ʻe he ʻEikí.

Ko e founga ʻe taha ke tokoni ke mahino ki he kau akó ko hono tā ha kōlomu ʻe ua ʻi he palakipoé ʻo fakahingoa ko e Maʻatautolu mo e Maʻá e ʻEikí. Fakaafeʻi e kau akó ke fili ha ngaahi fekau ʻe niʻihi ʻoku tokoni ke tau tafoki ki he ʻEikí.

ʻE fēfē nai kapau te tau tauhi ʻa e fekau ko iá “Maʻatautolu”? ʻE fēfē nai kapau ko ʻetau talangofuá “maʻá e ʻEikí”?

Hili hono hiki ʻe he kau akó ha niʻihi ʻo e ngaahi fekaú mo e ngaahi talí ʻi he palakipoé, poupouʻi ha fealēleaʻaki fakakalasi mo ha fehuʻi hangē ko ʻení:

ʻOkú ke pehē ko e hā ʻoku mahuʻinga ai e ngaahi meʻa ʻokú ne fakaʻaiʻai kitautolu ke tau tauhi e ngaahi fekau ʻa e ʻEikí?