Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Siona: “Ko e ʻOtua Angaʻofa Koe, Pea Faʻa ʻAloʻofa”

“Siona: ‘Ko e ʻOtua Angaʻofa Koe, Pea Faʻa ʻAloʻofa,’” Fuakava Motuʻá – Tohi Lēsoni ʻa e Faiako Seminelí (2026)

“Siona: ‘Ko e ʻOtua Angaʻofa Koe, Pea Faʻa ʻAloʻofa,’” Fuakava Motuʻá – Tohi Lēsoni ʻa e Faiako Seminelí

ʻĀmosi; ʻOpataia; Siona: Lēsoni 151

Siona

“Ko e ʻOtua Angaʻofa Koe, Pea Faʻa ʻAloʻofa”

The Old Testament prophet Jonah depicted lying on the beach at Nineveh after having survived being swallowed by a whale. The ocean and a whale are depicted in the background. The image depicts Jonah being returned to preach at Nineveh.

Naʻe fakamafao atu ʻe he ʻEikí Hono toʻukupu ʻaloʻofá kia Siona mo e kakai ʻo Ninivé, neongo ʻa e ngaahi fehalaaki lahi ne nau faí. ʻI heʻetau ʻiloʻi ʻoku aʻu mai ʻa e ʻofa mo e ʻaloʻofa tatau ko ʻení kiate kitautolú, te tau lava foki ʻo talaki ko e ʻEikí “ko ha ʻOtua ʻangaʻofa, pea faʻa ʻaloʻofa, ʻo tuai ki he houhaú, pea angalelei ʻaupito” (Siona 4:2). ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻofa mo e ʻaloʻofa ʻa e ʻEikí kiate kinautolu mo e niʻihi kehé.

Ngaahi ʻEkitivitī Ako ʻOku Ala Fakahokó

Ko ʻetau fakakaukaú

Fakakaukau ke kamata e kalasí ʻaki hano tā ʻa e meʻafua ko ʻení ʻi he palakipoé fakataha mo e ngaahi lea ʻoku ʻoatu ʻi he ongo tafaʻakí. ʻI hoʻo fehuʻi ki he kau akó pe ʻe fēfē ha vakai ʻa e niʻihi kehé ki he Tamai Hēvaní mo Sīsū Kalaisí, te ke lava ʻo fokotuʻu ha ngaahi laine kehekehe ʻi ha ngaahi feituʻu kehekehe ʻi he meʻafuá ke fakafofongaʻi ʻenau ngaahi talí.

Fakakaukauloto ʻoku fakafofongaʻi ʻe he meʻafua ko ʻení ʻa e founga ʻe lava ke mamata ai ha taha ki he Tamai Hēvaní mo Sīsū Kalaisí.

Ko e hā e ʻuhinga ka lau ai ʻe ha kakai ʻe niʻihi ʻokú Na ʻofa, ʻaloʻofa, mo angaʻofa kae ʻikai fakakaukau pehē ha niʻihi ia?

Ke tokoni ke vakaiʻi ʻe he kau akó ʻa e founga ʻoku nau ʻiloʻi ai ʻa e Tamai Hēvaní mo Sīsū Kalaisí, fakakaukau ke fakaafeʻi kinautolu ke fakakaukauloto ki he ngaahi meʻá ni.

Fakalaulauloto ki he feituʻu ʻi he lainé te ke fokotuʻu ai e anga hoʻo vakai ki he Tamai Hēvaní mo Sīsū Kalaisí. Fakakaukau ki he ʻuhinga naʻá ke fili ai ʻa e feituʻu ko iá ʻi he lainé.

Fakakaukauloto leva ʻoku fakafofongaʻi ʻe he meʻafua ko ʻení ʻa e anga hoʻo fakakaukau pe feohi mo e niʻihi kehé.

Ko e hā ha ngaahi ʻuhinga ʻe malava ke kehekehe ai ʻetau fakafeangai ki ha kakai ʻe niʻihi pea kehe ʻaupito ia ki ha niʻihi?

ʻI hoʻo ako ʻa e talanoa kia Sioná, fekumi ki he Laumālie Māʻoniʻoní ke tokoni atu ke ke ʻiloʻi ʻa e natula totonu ʻo e Tamai Hēvaní mo Sīsū Kalaisí. Fakakaukau ki he founga ʻe lava ke liliu ai ʻe he meʻa ʻokú ke ako fekauʻaki mo Kinauá ʻa e anga hoʻo vakai, fakakaukau, pe feohi mo e niʻihi kehé.

Ko e talanoa ʻo Sioná

Lau ʻa e Siona 1:1–3, ʻo kumi ʻa e ngaahi fakahinohino ʻa e ʻEikí kia Sioná mo e tali ʻa Sioná.

Ko e hā e meʻa ʻoku fakahaaʻi atu ʻe he tali ʻa Sioná fekauʻaki mo e ongo naʻá ne maʻu fekauʻaki mo e ngaahi fakahinohino ʻa e ʻEikí ke malanga ki he kakai ʻo Ninivé?

Hili hono ʻoange ha taimi ki he kau akó ke fakakakato ʻa e ngāué, fakaafeʻi kinautolu ke fai ha ngaahi fehuʻi ʻoku nau maʻu pe vahevahe ha ngaahi fakakaukau ne nau maʻu mei hono ako ʻo e talanoa ko ʻení.

Kapau ʻe fiemaʻu, fakamatalaʻi ange ʻoku hā ʻi he Siona 4 neongo naʻe houngaʻia ʻa Siona ʻi he ʻaloʻofa mo e fakamolemole ʻa e ʻEikí kiate iá, ka naʻe ʻikai ke ne fiemālie ʻi hono fakahaaʻi ʻe he ʻEikí e ngaahi ʻulungaanga ko iá ki he kakai ʻo Ninivé. Naʻe akoʻi ʻe he ʻEikí ʻa Siona naʻe mahuʻinga lahi ʻa e kakai ʻo Ninivé kiate Ia, ʻo mahulu hake ia ʻi ha ʻakau.

Fakakaukau ke hiki ʻa e ngaahi moʻoni taʻekakato ko ʻení ʻi he palakipoé. Fakaafeʻi e kau akó ke fakakakato ʻa e ngaahi moʻoní ʻo fakaʻaongaʻi e meʻa ne nau toki ako mei he talanoa ʻo Sioná.

Ko e ʻEikí ʻoku …

Ke hoko ʻo hangē ko e ʻEikí, kuo pau ke tau …

Fakakaukau ke fakakakato ʻa e ongo fakamatala ʻi he palakipoé ʻaki e ngaahi foʻi lea pe kupuʻi lea ʻoku vahevahe ʻe he kau akó, hangē ko e:

ʻOku ʻaloʻofa, manavaʻofa mo faʻa fakamolemole ʻa e ʻEikí.

Ke hoko ʻo hangē ko e ʻEikí, kuo pau ke tau angaʻofa, manavaʻofa mo faʻa fakamolemole ʻo hangē ko Iá.

Te ke lava ʻo fakaafeʻi ʻa e kau akó ke vahevahe ha ngaahi sīpinga pau mei he fakamatala ʻa Sioná ʻokú ne fakatātaaʻi e ngaahi moʻoni ko ʻení. Te nau lava foki ʻo vahevahe ʻa e ʻuhinga ʻoku nau ongoʻi ai ʻoku mahuʻinga ke nau ʻiloʻi ʻa e ngaahi foʻi lea pe kupuʻi lea ne nau filí.

Ko e hā e ʻuhinga ʻe lava ke faingataʻa ai kiate kitautolu ʻi he taimi ʻe niʻihi ke tau ʻofa pe manavaʻofa ki he niʻihi kehé?
ʻE uesia fēfē ʻe he ako fekauʻaki mo e ʻaloʻofa mo e ʻofa ʻa e ʻEikí ʻa e anga ʻo ʻetau vakai, fakakaukau, pe feohi mo e niʻihi kehé?

Hoko ʻo hangē ko e ʻEikí

Mahalo kuo ʻiloʻi ʻe he kau akó ha ngaahi moʻoni kehe mei he ngaahi moʻoni ʻoku hiki atu ʻi ʻolungá. Kapau ko ia, fakakaukau ki ha ngaahi founga ke fakaloloto ai e mahino ʻa e kau akó ki he ngaahi moʻoni naʻa nau ʻiló. ʻE lava ke tokoni ʻa e ngaahi ʻekitivitī ko ʻení ke mahino lelei ange ki he kau akó ʻa e ngaahi moʻoni ʻi ʻolungá mo ongoʻi ʻa e ʻofa ʻa e ʻEikí kiate kinautolu mo e niʻihi kehé.

Te ke lava ʻo vahevahe ʻa e kau akó ki ha ngaahi hoa pea tuku ke fakakakato fakafoʻituitui ʻe he tokotaha ako takitaha ha taha ʻo e ngaahi ʻekitivitií. Hili iá, ʻe lava ke nau feakoʻiʻaki ʻa e meʻa ne nau ʻiló. Pe ko hono fakakakato ʻe he ngaahi hoá ʻa e ʻekitivitī tatau pea fevahevaheʻaki ʻa e meʻa ʻoku nau akó.

Fili ha taha ʻo e ongo tūkunga ko ʻení:

Tūkunga A. Fakakaukauloto ʻoku ʻi ai haʻo kaungāmeʻa ʻokú ne ongoʻi ʻoku angakovi, taʻeʻofa, pe ʻikai faʻa fakamolemole ʻa e Tamai Hēvaní mo Sīsū Kalaisi.

Tūkunga E. Fakakaukauloto ʻoku ʻi ai haʻo kaungāmeʻa ʻokú ne faingataʻaʻia ke angaʻofa, manavaʻofa, pe fakamolemoleʻi ha taha kehe.

Fai ʻa e ngaahi meʻa ko ʻení:

Kumi ha veesi mei he talanoa ʻo Sioná te ke vahevahe mo hoʻo kaungāmeʻá. (Te ke lava foki ʻo maʻu ha ngaahi potufolofola kehe ʻe ala tokoni.)
Fakakaukau ki ha aʻusia ʻe ala tokoni. Ki he tūkunga A: fakakaukau ki he taimi kuo fakahaaʻi ai ʻe he ʻEikí ha ʻofa pe ʻaloʻofa kiate koe pe ko ha taha ʻokú ke ʻilo. Ki he tūkunga E: fakakaukau ki he taimi naʻe tokoniʻi ai koe ʻe he ʻEikí pe ko ha taha ʻokú ke ʻilo ke fakahaaʻi ha ʻofa pe ʻaloʻofa ki he niʻihi kehé.

Ko e hā e meʻa naʻá ke akó?

Ke tokoni ke ʻilo mo ongoʻi ʻe he kau akó e ʻofa mo e ʻaloʻofa ʻa e ʻEikí kiate kinautolu mo e niʻihi kehé, fakakaukau ke fakaafeʻi kinautolu ke tā ha meʻa ʻi heʻenau tohinoa akó ʻe lava ʻo fakamanatu ange kiate kinautolu ʻa e talanoa ʻo Sioná, hangē ko ha tofuaʻa pe ko ha fuʻu ʻakau lahi. Hili iá, ʻe lava ke nau hiki ʻenau tali ki ha taha ʻo e ngaahi fehuʻi ʻi laló, ʻi loto, pe ʻi he tafaʻaki ʻo ʻenau fakatātaá.

Fakakaukau ke tali ha taha ʻo e ongo fehuʻi ko ʻení ʻi hoʻo tohinoa akó:

Ko e hā e meʻa naʻá ke ako he ʻahó ni ʻokú ne tokoniʻi koe ke ke ongoʻi ʻoku ʻaloʻofa, angaʻofa, mo faʻa fakamolemole ʻa e Tamai Hēvaní mo Sīsū Kalaisi?
Ko e hā e meʻa naʻá ke aʻusia ʻi he ʻahó ni ʻokú ne tokoniʻi koe ke ke ongoʻi ʻEna ʻofa kiate kinautolu ʻokú ke fāifeinga ke ʻofa pe fakamolemoleʻí?

Ngaahi Maʻuʻanga Tokoni Kehé

Ko e hā ha meʻa ʻe lava ʻo tokoni ke mahino kiate au ʻa e natula totonu ʻo e Tamai Hēvaní mo Sīsū Kalaisí?

Naʻe fakamoʻoni ʻa ʻEletā Lōpeti M. Teini ʻo e Kau Fitungofulú ʻo pehē:

10:23

Hangē ko e meʻa naʻe akoʻi ʻe Palesiteni Nalesoní, “Ko e lahi ange hoʻo ako ʻo kau ki he Fakamoʻuí, ko e faingofua ange ia hoʻo falala ki Heʻene ʻaloʻofá, ko ʻEne ʻofa taʻe-fakangatangatá.” Pea ko e lahi ange ai pē ia hoʻo falala mo hoʻo ʻofa ki hoʻo Tamai Hēvaní.

Kuo akoʻi mai ʻe ʻEletā Sefilī R. Hōlani, naʻe hāʻele mai ʻa Sīsū ke “fakahā mai … kiate kitautolu ʻa e tuʻunga ʻo e ʻOtua ko ʻetau Tamai Taʻengatá, pea mo e founga ʻokú Ne līʻoa kakato ai ki Heʻene fānaú ʻi he kuonga mo e fonua kotoa pē.”

ʻOku pehē ʻe Paula ko e ʻOtuá ko e “Tamai ʻa e ngaahi ʻaloʻofa [kotoa pē], mo e ʻOtua ʻo e fiemālie kotoa pē.”

Kapau ʻoku kehe ʻa e anga hoʻo vakai kiate Iá, kātaki ʻo toutou feinga pē. (“ʻEiki, ʻOku Mau Fie Mamata kia Sīsū,” Liahona, Nōvema 2023, 14)

Ko e hā ʻa e meʻa ʻoku totonu ke tau fai ʻi he taimi ʻoku tau vakai ai ki hono tāpuakiʻi ʻe he ʻOtuá ʻa e niʻihi kehé, tautautefito ki he taimi ʻoku tau ongoʻi ai ʻoku ʻikai totonu ke nau maʻu iá?

Naʻe pehē ʻe ʻEletā Lekalanite R. Kētisi ko e Siʻí ʻo e Kau Fitungofulú:

ʻOku ʻikai ha ngataʻanga ʻo e ʻofa ʻa e Tamai Hēvaní ki Heʻene fānaú kotoa, pea ʻoku ʻikai fiemaʻu ke tau fehiʻa ki he ʻofa ko iá ʻi he taimi ʻoku fakahaaʻi ai ʻi he moʻui ʻa e niʻihi kehé. ʻOku lahi fau ha ʻofa maʻatautolu, pea ʻoku tau vahevahe kakato ange ʻa e ʻofa ko iá ʻo ʻikai ngata pē ʻi heʻetau fakafiefiaʻi ʻa e foki ʻa e foha maumau koloá ka ke tokoni foki ki he tokolahi taha ʻe lavá ke foki ki he tākangá ʻi he “moʻui lelei” (Luke 15:27). (“He Ran, and Fell on His Neck, and Kissed Him,” Ensign, Jan. 2015, 47)

Naʻe akoʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:23

ʻE ʻi ai ha ngaahi taimi ʻi heʻetau moʻuí ʻe maʻu ai ʻe ha taha ha tāpuaki taʻe-ʻamanekina pe fakalāngilangi makehe. Tuku muʻa ke u kole atu ke ʻoua naʻa tau loto-mamahi—pea ʻoua muʻa naʻa tau loto-meheka—he taimi ʻoku hoko mai ai ha meʻa lelei ki ha taha. ʻOku ʻikai holo hotau mahuʻingá ʻi he taimi ʻoku tāpuekina lahi ange ai ha tahá. ʻOku ʻikai ke tau feʻauhi mo e niʻihi kehé pe ko hai ʻe tuʻumālie tahá pe talēnitiʻia tahá [pe fakaʻofoʻofa tahá] pe monūʻia tahá. Ko e lova ʻoku tau lolotonga kau moʻoni ki aí, ʻa e lova ko ia mo e angahalá, pea ko e moʻoni ʻoku kau ʻa e meheká he meʻa ʻoku lahi taha ʻene hoko ʻi he māmaní. (“Ko e Kau Ngāue ʻi he Ngoue Vainé,” Liahona, Mē 2012, 31)

Koeʻuhí ʻoku ʻaloʻofa mo ʻofa lahi ʻa e ʻOtuá, ʻoku fiemaʻu moʻoni nai ke u fakatomala?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

13:11

Koeʻuhí ʻoku kāpui ʻe he ʻofa ʻa e ʻOtuá ʻa e meʻa kotoa pē, ʻoku pehē ai ʻe ha niʻihi ʻoku “taʻe-filifilimānako” ia, pea ʻi heʻenau fakakaukaú, ʻe lava ke nau aofangatuku ʻo fakaʻuhingaʻi ko e ngaahi tāpuaki ʻa e ʻOtuá ʻoku “taʻe-filifilimānako” ia pea ko e fakamoʻuí ʻoku “taʻe-filifilimānako” mo ia. Ka ʻoku ʻikai. ʻOku faʻa pehē ʻe ha niʻihi, “ʻOku ʻofa ʻa e Fakamoʻuí ʻiate au ʻi he tuʻunga pē ʻoku ou ʻi aí,” pea ʻoku moʻoni ʻaupito ia. Ka he ʻikai ke Ne lava ʻo ʻave hatau taha ki Hono puleʻangá ʻi he tuʻunga pē ʻoku tau ʻi aí, “he ʻoku ʻikai lava ke nofo ʻi ai ha meʻa ʻoku taʻemaʻa, pe nofo ʻi hono ʻaó” (vakai, Mōsese 6:57). Kuo pau ke tau tomuʻa fakatomala mei heʻetau ngaahi angahalá. (“Ko e ʻOfa ʻa e ʻOtuá,” Liahona, Nōvema 2021, 16)

Ngaahi ʻEkitivitī Fakalahi ki he Akó

Fakakaukauloto ki he talanoa ʻo Sioná

Kapau ʻe tokoni ki hoʻo kau akó, fakakaukau ke huluʻi ʻa e “Jonah the Prophet” (2:30). ʻE lava ke tokoni ʻa e vitiō ko ʻení ki hoʻo kau akó ke nau fakakaukauloto ki he talanoa ʻo Sioná kimuʻa pe hili ʻenau fakakakato ʻa e laʻipepa tufá.

2:30

Ko ha sīpinga fakaonopooni ʻo Siona

Ke fetongi e foʻi vitiō ʻi he konga “Hoko ʻo hangē ko e ʻEikí,” te ke lava ʻo vahevahe ha talanoa mei he fakamatala “ʻOku ʻIkai Fuʻu Tōmui ki ha Toe Faingamālie ʻe Taha”. ʻOku kau heni ha fakamatala ʻo ha finemui naʻe mole kotoa ʻene ʻamanaki lelei ke lavameʻa ʻi he akó ka naʻá ne maʻu ha fakafiemālie mo ha ʻamanaki lelei ʻo fakafou ʻi heʻene tamaí. Hili hono vahevahe ʻo e talanoá, te ke lava ʻo kole ki he kau akó ke vahevahe ʻa e founga ʻoku tatau ai ʻa e tamai ʻi he talanoá mo ʻetau Tamai Hēvaní. Hili iá te nau lava ʻo vahevahe ha ngaahi aʻusia fakataautaha ʻo ha taimi ne nau ongoʻi ai ʻoku fakahaaʻi ʻe he Tamai Hēvaní ha ʻaloʻofa pe ʻofa ʻi heʻenau moʻuí.

Ko hono fakahaaʻi ʻo e ʻofá mo e ʻaloʻofá ki he niʻihi kehé

Ke fetongi ʻaki ʻa e foʻi vitiō ʻi he konga “Hoko ʻo hangē ko e ʻEikí” fakakaukau ke huluʻi ʻa e foʻi vitiō “President Uchtdorf: Forgiveness” (3:40). ʻE lava ke fakaʻaongaʻi ʻa e vitiō ko ʻení ke tokoni ki he kau akó ke nau vakai ki hono mahuʻinga ʻo e manavaʻofá mo e faʻa fakamolemolé ʻo hangē ko e ʻaloʻofa ʻa e ʻEikí kiate kitautolú. ʻE lava ke mamataʻi ʻe he kau akó ʻa e foʻi vitioó mo fakakaukau ki ha taha ʻoku ngali faingataʻa ke nau saiʻia ai pe fakamolemoleʻi.

3:40

Siona 2. Ko hono aʻusia e ʻaloʻofa ʻa e ʻEikí ʻo fakafou ʻi he fakatomalá

Kapau ʻokú ke pehē ʻe ʻaonga ki he kau akó hano fakaʻaongaʻi ha taimi lahi ange ke aleaʻi ʻa e mahuʻinga ʻo e fakatomalá, te ke lava ʻo fakaafeʻi e kau akó ke nau ako tautau toko ua ʻa e Siona 2:1–10. Te nau lava ʻo kumi ha ngaahi kupuʻi lea ʻi he lotu ʻa Sioná ʻokú ne fakahaaʻi e holi fakamātoato ʻa Siona ke fakatomalá.

Te ke lava ʻo ʻeke ki he kau akó pe ko e hā ha fakamoʻoni mei he fakamatala ʻa Sioná ʻokú ne fakahaaʻi naʻe fakamolemoleʻi ia ʻe he ʻEikí koeʻuhí naʻá ne fakatomala. Te ke lava leva ʻo tokoni ke ʻiloʻi ʻe he kau akó ha ngaahi sīpinga kehe mei he folofolá naʻe aʻusia ai ʻe ha niʻihi fakafoʻituitui ʻa e ʻaloʻofa ʻa e ʻEikí ʻi he fakatomala fakamātoató.