Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĀmosi 8: Ko Hono Ikunaʻi ʻo e Fiekaia Fakalaumālié

“ʻĀmosi 8: Ko Hono Ikunaʻi ʻo e Fiekaia Fakalaumālié,” Fuakava Motuʻá – Tohi Lēsoni ʻa e Faiako Seminelí (2026)

“ʻĀmosi 8: Ko Hono Ikunaʻi ʻo e Fiekaia Fakalaumālié,” Fuakava Motuʻá – Tohi Lēsoni ʻa e Faiako Seminelí

ʻĀmosi; ʻOpataia; Siona: Lēsoni 150

ʻĀmosi 8

Ko Hono Ikunaʻi ʻo e Fiekaia Fakalaumālié

191st Semiannual General Conference: Russell M. Nelson

Kuo tau ongoʻi kotoa pē ʻa e fiekaiá. Fakakaukauloto pe ʻe fēfē nai haʻate faingataʻaʻia ʻi he fiekaia fakalaumālié. Naʻe akoʻi ʻe he ʻEikí ʻa e kakai ʻIsilelí ʻo fakafou ʻia ʻĀmosi ʻo fakaʻaongaʻi ʻa e fakatātā ko ʻení. Naʻe kikiteʻi ʻe ʻĀmosi he ʻikai toe foaki ki hono kakaí ʻa ʻEne folofolá koeʻuhí he naʻa nau fakafisingaʻi ia. ʻE iku ʻa e mole e folofola ʻa e ʻEikí ki ha honge fakalaumālie. ʻE lava ke tokoni ʻa e lēsoni ko ʻení ke fakatupulaki ʻe he kau akó ʻenau loto-falala ʻe lava ke fakafiemālieʻi ʻe he Tamai Hēvaní mo Sīsū Kalaisi ʻenau fiekaia fakalaumālié ʻo fakafou ʻi hono Fakafoki Mai ʻo e ongoongoleleí.

Teuteu ʻa e tokotaha akó: Fakaafeʻi e kau akó ke fakalaulauloto ki he founga naʻe mei kehe ai ʻenau moʻuí kapau naʻe ʻikai ke nau maʻu ʻa e folofolá pe ngaahi lea ʻa e kau palōfitá. ʻE lava ke omi mateuteu e kau akó ki he kalasí ke vahevahe ʻa e meʻa naʻa nau fakakaukau ki aí.

Ngaahi ʻEkitivitī Ako ʻOku Ala Fakahokó

Fiekaia fakalaumālié

Fakakaukau ke kamata e kalasí ʻaki hano fakaʻaliʻali ha fakatātā ʻo ha meʻakai pe ʻomi ha meʻakai faingofua pea fai e ngaahi fehuʻi ko ʻení.

Ko e fē ha taimi kuó ke ongoʻi mātuʻaki fiekaia ai?
ʻE fēfē nai haʻatau fakafōtunga ʻi heʻetau fiekaiá?

ʻE lava ke kau ʻi he ngaahi talí ʻa e ongoʻi loto-ʻitá, siʻi ʻa e iví, pe mātuʻaki vivili ke maʻu ha faʻahinga meʻakai peé.

Hiki ʻa e kupuʻi lea Fiekaia Fakalaumālie ʻi he palakipoé.
Ko e hā nai ha meʻa ʻe fiekaia fakalaumālie ki ai ʻa e kakaí mo fefaʻuhi ke maʻú?

Fakakaukau ke hiki e ngaahi tali ʻa e kau akó ʻi he palakipoé. Mahalo ʻe lea ʻaki ʻe he kau akó ha ngaahi meʻa hangē ko e ʻofa ʻa e ʻOtuá, taumuʻa ʻi heʻenau moʻuí, ʻiloʻi ʻo e moʻoní, fakahinohino ʻi he ngaahi fili faingataʻá, mo e alā meʻa pehē.

Fakaʻaongaʻi ha kiʻi taimi ke ke hiki ai ʻi hoʻo tohinoa akó ha ngaahi founga te ke ongoʻi ai, pe ko ha taha ʻokú ke ʻiloʻi, ʻi he taimí ni ʻa e fiekaia fakalaumālié.

Poupouʻi e kau akó ke nau fekumi ki he Laumālie Māʻoniʻoní he ʻahó ni ʻi heʻenau fakakaukau ki he meʻa te nau lava ʻo fai ke maʻu ai ʻa e fafanga fakalaumālie ʻoku foaki ʻe Sīsū Kalaisí.

Ko ha honge ʻi he fanongoa e ngaahi folofola ʻa e ʻEikí

Naʻe kikiteʻi ʻe he palōfita ko ʻĀmosí ʻa e fiekaia fakalaumālié. Naʻá Ne fakahā e folofola ʻa e ʻEikí ki he kakai ʻo ʻIsilelí, ka naʻe ʻikai ke nau fie fanongo ki ai (vakai, ʻĀmosi 2:12; 7:11–16).

Kapau ʻokú ke ongoʻi ʻe ʻaonga, fakaafeʻi e kau akó ke nau lau ʻa e ʻĀmosi 7:12–13 ke mahino ʻa e founga naʻe tali ʻaki ʻe he kakai ʻIsilelí e folofola ʻa e ʻEikí ʻo fakafou ʻia ʻĀmosí.

Lau ʻa e ʻĀmosi 8:11–12 ʻo kumi e ngaahi nunuʻa ʻo hono fakafisingaʻi ʻe he kakaí e folofola ʻa e ʻEikí.

Kapau ʻe fiemaʻu, fakamatalaʻi ange ko e hongé ko ha nounou ʻaupito ia ʻo e meʻakaí.

Ko e hā ha ngaahi nunuʻa naʻá ke vakai ki ai?

Kapau he ʻikai fakamahinoʻi atu ia ʻe he kau akó, vahevahe ha ngaahi moʻoni hangē ko ʻení: ʻI he taimi ʻoku fakafisingaʻi ai ʻe he kakaí e kau palōfita ʻa e ʻEikí, ʻoku mole meiate kinautolu ʻa e ngaahi tāpuaki ʻo e folofola ʻa e ʻEikí. Ka ʻikai e folofola ʻa e ʻOtuá, te tau fiekaia fakalaumālie.
ʻOkú ke pehē ko e hā ʻoku hoko ai e hongé ko ha fakafehoanaki lelei ki he moʻui taʻe kau ai e folofola ʻa e ʻEikí?
Ko e hā ha ngaahi founga kuo fakahoko ai e kikite ʻa ʻĀmosí?

Kapau ʻe fiemaʻu, vahevahe mo e kau akó ʻoku ʻuhinga ʻa e ongo veesi ko ʻení ki ha vahaʻataimi ʻoku ʻiloa ko ha hē mei he moʻoní. Ko e hē mei he moʻoní ko ha taimi ia ʻoku fakafisingaʻi ʻe ha niʻihi fakafoʻituitui pe kulupu ʻo ha kakai ʻa e ngaahi tefitoʻi moʻoni ʻo e ongoongoleleí pea ʻikai toe fekauʻi ʻe he ʻEikí ha kau palōfita kiate kinautolu. Ko hono fakahoko ʻe taha ʻo e kikite ʻa ʻĀmosí naʻe hoko ia hili e pekia ʻa e kau ʻaposetolo ʻa Kalaisí pea ʻoku ʻiloa ia ko e Hē Fakaʻaufuli mei he Moʻoní. Naʻe hoko ʻa e Hē Fakaʻaufuli mei he Moʻoní ʻo aʻu ki he fakafoki mai ʻe he ʻEikí ʻa ʻEne ongoongoleleí ʻo fakafou ʻi he palōfita ko Siosefa Sāmitá.

Ko hono fakafiemālieʻi ʻo e fiekaia fakalaumālié

ʻI he angaʻofa ʻa e ʻEikí, naʻá Ne fakamahinoʻi ki Hono kakaí ʻo fakafou ʻi Heʻene kau palōfitá te Ne fakahaofi Hono kakaí mei he ngaahi nunuʻa ʻo e hē mei he moʻoní mo tāpuekina Hono kakaí. Naʻe kikiteʻi ʻe he ʻEikí ʻo fakafou ʻia ʻĀmosi te Ne toe tānaki fakataha Hono kakaí ʻi ha ʻaho ʻi he kahaʻú pea te Ne tāpuakiʻi kinautolu ʻi ha ngaahi founga lahi (vakai, ʻĀmosi 9:14–15).

Lau ʻa e ngaahi veesi ko ʻení ʻo kumi e toe meʻa naʻe fakahā ʻe he ʻEikí ʻo fakafou ʻi Heʻene kau palōfitá te Ne fai ʻi he kuonga fakakosipeli fakaʻosí kimuʻa ʻi Heʻene Hāʻele ʻAnga Ua Maí:

Taniela 2:44–45

Ngāue 3:19–21

ʻEfesō 1:3, 10

Tokāteline mo e Ngaahi Fuakava 27:13; 112:30; 128:18

Fakaafeʻi e kau akó ke vahevahe e meʻa ne nau akó pea ʻeke ha ngaahi fehuʻi ʻoku nau maʻu fekauʻaki mo e ngaahi veesi ko ʻení. Ki ha tokoni lahi ange, mahalo te ke fie tataki kinautolu ki he “Fakafoki Mai ʻo e Ongoongoleleí,” ʻi he Ngaahi Tefitó mo e Ngaahi Fehuʻí.

Ko e hā ha ngaahi tāpuaki kuo fakaʻatā ʻe he Tamai Hēvaní mo Sīsū Kalaisi ki ha māmani ʻoku fiekaia fakalaumālie ʻo fakafou ʻi hono Fakafoki Mai ʻo e Ongoongoleleí?

ʻE lava ke lisi ʻe he kau akó e ngaahi kī mo e mafai ʻo e lakanga fakataulaʻeikí, kau palōfitá, ngaahi fakahaá, ngaahi folofolá, ngaahi houalotu ʻo e Siasí, ngaahi ouaú, mo e meʻafoaki ʻo e Laumālie Māʻoniʻoní.

Fakakaukau ki he founga te ke lava ai ʻo tokoniʻi e kau akó ke nau ʻiloʻi e founga ʻe lava ke feau ai ʻe he ngaahi tāpuaki ko ʻení ʻenau ngaahi fiemaʻú mo e ngaahi fiemaʻu ʻa e kakai ʻoku nau ʻofa aí. Ko ha founga ʻeni ʻe taha te ke lava ʻo fakahoko ai ʻeni.

Fakaafeʻi e kau akó ke faʻu ha tūkunga ʻo ha tokotaha fakafoʻituitui ʻoku fiekaia ki ha taha ʻo e ngaahi tefito ʻoku hiki ʻi he palakipoé ʻi lalo ʻi he Fiekaia Fakalaumālié. Te ke lava ʻo ʻai ke tānaki atu ʻe he kau akó ha ngaahi fakaikiiki koeʻuhí ke toe mahino ange ʻa e tūkungá. Te ke lava ʻo vahevahe ʻa e ngaahi meʻá ni fekauʻaki mo Māʻatá ko ha sīpinga. Hili iá, ʻe lava ke ngāue fakataha, fakafoʻituitui, pe fakakulupu iiki ʻa e kau akó ke fai ha tali ki he tūkungá.

Tūkungá: ʻOku taʻu 15 ʻa Māʻata pea ʻoku ʻikai ke ne fiemaʻu ha meʻa lahi ange ka ke kumi e taumuʻa ʻo ʻene moʻuí. ʻOkú ne fefaʻuhi mo e loto-falala fakaekitá, pea ʻoku ʻikai ke ne fakapapauʻi pe ko e hā ʻa e meʻa ʻoku totonu ke ne faí.

Ko e hā ha meʻa te ke lava ʻo vahevahe naʻe fai ʻe he Tamai Hēvaní mo Sīsū Kalaisi ko ha konga ʻo hono Fakafoki Mai ʻo e ongoongoleleí ʻe lava ʻo tokoni ke fakafiemālieʻi ʻa e fiekaia fakalaumālie ʻa Māʻatá?

Fakapapauʻi ʻoku fakakau ʻi hoʻo talí ha ngaahi folofola; ngaahi lea mei he kau taki ʻo e Siasí; pea kapau ʻe lava, ko ha aʻusia fakataautaha pē ʻaʻau.

Ka faingataʻa ke fai ʻe he kau akó ha tali, te ke lava ʻo ʻai ke nau fekumi ʻi he Tohi Fakahinohino ki Hono Fakamālohia ʻo e Toʻu Tupú pe ko ha niʻihi ʻo e ngaahi potufolofola fakataukei fakatokāteliné.

Kapau ʻoku tali ʻe he kau akó e tūkunga ʻo Māʻatá, te ke lava ʻo tataki kinautolu ki he tefito ʻo e konga “Fakahoko ha ngaahi fili ʻoku ueʻi fakalangí” ʻo e Tohi Fakahinohino Ki Hono Fakamālohia ʻo e Toʻu Tupú pe Mōsese 1:39: “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.” ʻE lava ke fakalaulauloto ʻa e kau akó ki he founga ʻe lava ke fakafonu ai ʻe hono ʻiloʻi ʻoku tokanga mai ʻa e ʻEikí kiate kinautolú pea ʻokú Ne fāifeinga ke nau foki ange ki Hono ʻaó, ʻa e fiekaia fakalaumālie ke ongoʻi ʻa e ʻofa ʻa e ʻOtuá pe ongoʻi e taumuʻa ʻo ʻenau moʻuí.

ʻI hono maʻu ʻe he kau akó ha taimi feʻungá, fakaafeʻi ke nau vahevahe ʻa e meʻa naʻa nau teuteú. ʻE lava foki ke nau vahevahe ʻa e meʻa ne nau ako mei he aʻusiá.

Fakakaukau fakatāutahá

Ke fakaʻosí, fakakaukau ke fakaafeʻi ʻa e kau akó ke nau tali e ngaahi fehuʻi ko ʻení ʻi heʻenau tohinoa akó.

Ko e hā ha meʻa kuó ke ako he ʻahó ni ʻokú ne fakatupulaki hoʻo loto-falala ʻe lava ke fakafiemālieʻi ʻe he Tamai Hēvaní mo Sīsū Kalaisi ʻetau fiekaia fakalaumālié?
Ko e hā ha founga ʻe taha te ke fie ngāueʻi ai ʻa e meʻa kuó ke ako pe ongoʻí?

Ngaahi Maʻuʻanga Tokoni Kehé

Ko e hā e ʻuhinga ʻoku mātuʻaki mahuʻinga ai ke ako maʻu pē ʻa e folofolá?

Naʻe akoʻi ʻe ʻEletā Maikolo Sione U. Tei ʻo e Kau Fitungofulú:

ʻOku ou tui ko e taʻe tokanga ko ia ke ako maʻu pē ʻa e folofolá ko ha tuʻunga ia ʻe taha ʻo e fakafefekaʻi hotau lotó. ʻOku ou manavasiʻi kapau te tau tuiaki atu ʻi he hala ko iá, ʻe foaki mai ha konga siʻi ange ʻo e folofolá pea ʻe aʻu ai pē ʻo ʻikai ke tau toe ʻilo ha meʻa ʻi he ngaahi meʻa lilo ʻa e ʻOtuá. ʻI he tafaʻaki e tahá, ʻe tokoniʻi kitautolu ʻe he inu fakaʻaho mei he folofolá ke tau langa ha ivi mo ha ʻilo fakalaumālie, tatala ʻa e ngaahi kākā ʻa e tēvoló, pea mo ʻilo ʻa e ngaahi tauhele kuó ne fanga ke maʻu ai kitautolú. (“Ko e Mālohi ʻo e Folofola ʻa e ʻOtuá,” Liahona, Māʻasi 2013, 23)

Ko e hā ha meʻa ʻokú ne fakafiemālieʻi moʻoni ʻetau fiekaia fakalaumālié?

Naʻe akoʻi ʻe Palesiteni Sefilī R. Hōlani:

ʻOku ou lotua ʻi he pongipongí ni ʻa kinautolu kotoa pē ʻoku fiekaia mo fieinua, pea faʻa hē atú, ke fanongo ki he fakaafe ko ʻení meiate Ia ko e Mā ʻo e Moʻuí, ko e Matavai ʻo e Vai Moʻuí, ko e Tauhi Sipi Lelei ʻo kitautolu kotoá, ko e ʻAlo ʻo e ʻOtuá: “Haʻu kiate au ʻa kimoutolu kotoa pē ʻoku feinga mo mafasiá, … pea te mou ʻilo ai ʻa e fiemālié ki homou laumālié” [Mātiu 11:28–29]. Ko e moʻoni ʻokú Ne fakamākona “ʻa e fiekaiá ʻaki ʻa e ngaahi meʻa leleí” [Luke 1:53], ʻo hangē ko e fakamoʻoni ʻa ʻEne faʻē ko Melé. (“He Hath Filled the Hungry with Good Things,” Ensign, Nov. 1997, 66)

Fēfē kapau ʻoku ʻikai ke u ongoʻi ʻoku ou maʻu ha taimi ke ako e folofolá?

Naʻe fakahoko ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e faleʻi ko ʻení:

ʻOua te ke moʻulaloa ki he loi ʻa Sētané tokua ʻoku ʻikai ke ʻi ai haʻo taimi ke ako e folofolá. Fili ke tuku ha taimi ke ako ai kinautolu. ʻOku mahuʻinga ange ʻa e keinanga ʻi he folofola ʻo e ʻOtuá he ʻaho kotoa peé ʻi he mohé, akó, ngāué, polokalama televīsoné, vaʻinga vitioó pe mītia fakasōsialé. Mahalo ʻoku fiemaʻu ke ke ʻilo e meʻa ʻoku mahuʻinga kiate koé, ke ke tuku ha taimi ke ako e folofola ʻa e ʻOtuá. Kapau ʻoku pehē, fai ia! (“Fakamuʻomuʻa Hoʻo Ngāueʻi e Tuí,” Liahona, Nōvema 2014, 93)

Naʻe fakangata fēfē ʻa e honge fakalaumālie ʻo e hē lahi mei he moʻoní?

Naʻe vahevahe ʻe Palesiteni Sipenisā W. Kimipolo:

Hili ha ngaahi senituli ʻo e fakapoʻuli fakalaumālié, … ʻoku mau fakahā ʻi he loto-māluʻia ki māmani kotoa kuo ngata ʻa e honge fakalaumālié, ʻoku ʻosi ʻa e laʻalaʻā fakalaumālié, pea ʻoku ʻatā ʻa e folofola ʻa e ʻEikí ʻi hono tuʻunga haohaoá mo hono kakató ki he kakai kotoa pē. ʻOku ʻikai fiemaʻu ke toe hē holo ha taha mei he tahi ki he tahi pe mei he tokelaú ki he hahaké, ko e fekumi ki he ongoongolelei moʻoní ʻo hangē ko ia ne kikiteʻi ʻe ʻĀmosí, he kuo maʻu ʻa e moʻoni taʻengatá.” (ʻi he Conference Report, Apr. 1964, 93–94; see also Old Testament Student Manual, 3rd ed. [2003], 94)

Ngaahi ʻEkitivitī Fakalahi ki he Akó

Ko hono fakafiemālieʻi ʻo e fiekaia fakalaumālié

Kapau ʻe fiemaʻu, ke tokoni ke mahino lelei ange ki he kau akó ʻa e founga ʻe lava ke fakafiemālieʻi ai ʻe he folofola ʻa e ʻOtuá ʻa e fiekaia fakalaumālié, te ke lava ʻo huluʻi ʻa e foʻi vitiō “Meʻakai Fakaʻahó: Sīpingá” pea fakaafeʻi e kau akó ke nau kumi ha ngaahi moʻoni kehe fekauʻaki mo e tali ki he fiekaia fakalaumālié.

2:37

Hē mei he Moʻoní ʻi he Fuakava Motuʻá

Ko ha foʻi moʻoni ʻe taha ʻe lava ke ako mei he ʻĀmosi 8:11–12, ʻoku tupu ʻa e hē mei he moʻoní mei hono fakafīsingaʻi e folofola ʻa e ʻEikí. Te ke lava ʻo kole ki he kau akó ke nau aleaʻi ʻa e meʻa ʻoku nau pehē ko e ngaahi faikehekehe mo e ngaahi faitatau ʻi he ngaahi meʻá ni:

Hē fakafoʻituitui mei he moʻoní

Hē fakakulupu mei he moʻoní

Hē fakalūkufua mei he moʻoní

Fakaafeʻi e kau akó ke nau fakakaukau ki he founga ʻe lava ke tokoni ai hano fakafoki mai ʻo e ongoongolelei ʻa Sīsū Kalaisí ke fakaleleiʻi e ngaahi tūkunga ʻo e faʻahinga takitaha ʻo e hē mei he moʻoní.

ʻOku fakatātaaʻi ʻe he foʻi vitiō “The Great Apostasy” ʻa e founga naʻe tokoniʻi ai ʻa Uilifooti Utalafi ʻi heʻene fekumi ki he Siasi moʻoní ke mahino kiate ia ʻa e Hē mei he Moʻoní pea mo e fiemaʻu ke Fakafoki Mai e siasi ʻo Sīsū Kalaisí.

16:32

ʻOku akonaki ʻa e kau palōfitá fekauʻaki mo Kalaisi

Ke tokoni ke mahino lelei ange ki he kau akó ʻa e mahuʻinga ʻo e ngaahi lea ʻa e kau palōfitá, fakakaukau ke lau ʻa e ʻĀmosi 7:11–16 mo e ʻĀmosi 8:11–12, ʻo kumi e founga naʻa nau hokohoko aí. Fakaafeʻi ʻa e kau akó ke fakalaulauloto ki he founga naʻe mei kehe ai ʻenau moʻuí ka ne taʻeʻoua ʻenau fanongo ki he folofola ʻa e ʻEikí ʻo fakafou ʻi he kau palōfitá. Te ke lava ʻo huluʻi ʻa e foʻi vitiō “Why Do We Have Prophets?” ke fakatātaaʻi e founga ʻoku akoʻi ai kitautolu ʻe he folofola ʻa e ʻEikí ʻo fakafou ʻi he kau palōfitá ke tau haʻu kiate Iá. Te ke lava ʻo fakaafeʻi ʻa e kau akó ke kumi e fatongia ʻo e kau palōfitá lolotonga ʻenau sió.

1:37

Ko e hā ʻa e tefitoʻi fatongia ʻo e kau palōfitá?

Te ke lava ʻo vahevahe ʻeni meia ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e fatongia mahuʻinga taha ʻo e palōfita ʻa e ʻEikí ke akoʻi kiate kitautolu ʻa e Fakamoʻuí pea tataki kitautolu kiate Ia. …

ʻOku ʻikai vaetuʻua ʻe ha palōfita ho vā mo e Fakamoʻuí. Ka, ʻokú ne tuʻu ʻi hotau tafaʻakí ʻo fakahonohino mai ʻa e hala ki he Fakamoʻuí. (“Ko e Palōfita ʻa e ʻOtuá,” Liahona, Mē 2018, 25, 27)

ʻE tokoni fēfē ʻa e muimui ki he kau palōfitá ke fakafiemālieʻi ʻa e fiekaia fakalaumālié?

Ko e tāpuaki ʻo e folofolá

ʻI hono fakafehoanaki ki he honge ʻo e folofola ʻa e ʻOtuá (vakai, ʻĀmosi 8:11–12), ʻoku tau maʻu ʻi hotau kuongá ni ha konga lahi ʻo e folofola ʻa e ʻOtuá ʻi he tohi folofolá. Kapau ʻe ʻaonga ke mahino lelei ange ki he kau akó ʻa e tāpuaki ʻo hono maʻu ʻo e folofolá, te ke lava ʻo huluʻi ʻa e foʻi vitiō “Ko e Ngaahi Tāpuaki ʻo e Folofolá” pea fakaafeʻi e kau akó ke kumi ha ngaahi ʻuhinga kehekehe ʻoku ʻikai maʻu ai ʻe he kakaí ʻa e folofola ʻa e ʻOtuá ʻi heʻenau moʻuí.

3:4

ʻE lava ke fehuʻi ki he kau akó pe ko e hā ha meʻa ne nau ako mei he vitioó fekauʻaki mo e ngaahi nunuʻa ʻo e ʻikai ke maʻu e folofola ʻa e ʻOtuá ʻi heʻenau moʻuí pe ko e ngaahi ʻuhinga ʻoku fakamahuʻingaʻi lahi ange ai ʻe ha kakai ʻe niʻihi ʻa e folofolá ʻi ha niʻihi kehe.