“Jeremias 36: Ang Pulong sa Dios,” Manwal alang sa Magtutudlo sa Seminary sa Daang Tugon (2026)
“Jeremias 36: Ang Pulong sa Dios,” Manwal alang sa Magtutudlo sa Seminary sa Daang Tugon
Jeremias 31–33; 36–38; Mga Pagbangotan 1; 3: Leksiyon 135
Jeremias 36
Ang Pulong sa Dios
Ang mga kasulatan mao ang importanteng bahin sa atong koneksiyon ngadto ni Jesukristo. Ang pagkat-on gikan sa mga kasulatan nagtudlo sa atong mga hunahuna ug sa atong mga kasingkasing ngadto Kaniya, diin nagdapit sa Iyang gahom ngadto sa atong kinabuhi. Atol sa usa ka panahon sa apostasiya, ang Ginoo misugo ni propeta Jeremias sa pagsulat ug pagpadala sa mga pulong sa Ginoo sa katawhan sa Juda nga sila unta mobalik Kaniya ug mapasaylo. Kini nga leksiyon makatabang sa mga estudyante nga makasabot sa unsang paagi ang mga kasulatan makapabalik kanila ngadto ni Jesukristo aron mapasaylo sa ilang sala.
Pagpangandam sa estudyante: Ikonsiderar ang pagdapit sa mga estudyante sa pagrebyo sa ilang personal nga mga tumong sa pagtuon sa kasulatan ug sa pag-uswag sa gikinahanglan nga pagbasa alang sa tuig. Mahimo usab nimong dapiton ang mga estudyante sa pagpamalandong kon sa unsang paagi ang ilang pagtuon sa kasulatan nagtabang nila nga modangop sa Ginoo.
Posibleng mga Kalihokan sa Pagkat-on
Sulti
Paghunahuna og paagi sa pagtabang sa mga estudyante sa pag-andam aron makat-on mahitungod kon sa unsang paagi gigamit sa Ginoo ang mga kasulatan sa pagkorehir sa mahigugmaong paagi ug pagdala nato balik Niya. Usa ka paagi sa paghimo niini mao nga maghunahuna ang mga estudyante og mga sitwasyon nga tingali dili komportable nga mosulti. Kon gikinahanglan, pwede nimong gamiton ang mosunod nga summary.
-
Unsaon tingali pagtubag sa imong kaila nga nagpakabana nimo ang mosunod nga mga pangutana?
-
Human pagkaon sa paniudto, ang imong higala nakabantay nga adunay pagkaon sa imong ngipon.
-
Gidapit ka sa usa ka party nga adunay dili angay nga mga kalihokan. Ang imong higala nasayod sa mga kalihokan apan nasayod nga naghinamhinam ka sa pag-adto.
-
-
Unsa tingali ang magdasig sa usa ka tawo nga mosulti niini nga mga sitwasyon?
-
Unsa tingali ang resulta sa pagsulti sa usa ka butang o magpakahilom lang?
Ang Langitnong Amahan ug si Jesukristo nasayod ug nakakita sa mga butang nga dili nato mahimo. Sila nagtinguha sa labing maayo alang kanato, ug sila namulong kanato pinaagi sa mga kasulatan (tan-awa sa 2 Nephi 32:3; Doktrina ug mga Pakigsaad 1:37–38). Samtang kamo magtuon karon, pamalandongi ang mga paagi nga ang mga kasulatan mopanalangin sa imong kinabuhi. Ikonsiderar sa unsang paagi kini nga mga ideya makaimpluwensya sa imong personal nga pagtuon.
Ang katuyoan sa kasulatan
Basaha ang Jeremias 36:1–3, nga mangita kon ngano ang Ginoo mimando ni Jeremias sa pagsulat sa Iyang mga pulong alang sa katawhan sa Juda.
-
Unsay gusto sa Ginoo alang sa katawhan sa Juda?
-
Unsa ang gitudlo niini nga mga bersikulo kanato mahitungod sa pipila ka katuyoan sa kasulatan?
Tingali mailhan sa mga estudyante ang usa ka kamatuoran sama sa ang mga kasulatan motabang kanato nga mobalik sa Ginoo ug makadawat sa Iyang kapasayloan.
Pwede nimong dapiton ang mga estudyante sa pagmarka sa mga hugpong sa mga pulong nga “aron sila mobalik ang tagsatagsa kanila gikan sa dautan niyang dalan” ug “aron ako mopasaylo sa ilang pagkadautan ug sa ilang sala” (beresikulo 3). Mahimo silang mosulat sa kamatuoran nga ilang nadiskobrehan duol niini nga mga hugpong sa mga pulong sa ilang mga kasulatan.
-
Sa unsang paagi makatabang ang mga kasulatan nga kita makabalik sa Ginoo ug makadawat sa Iyang kapasayloan?
Ikonsiderar ang paglista sa mga tubag sa mga estudyante diha sa pisara. Samtang mopakigbahin ang mga estudyante, mahimo silang motan-aw sa mga ideya nga makita sa mosunod nga mga kasulatan. Tingali gusto nimong mapamilyar niini nga mga kasulatan aron makaabli sa kasulatan samtang ang mga estudyante mopakigbahin. Ang laing alternatibo, human ang mga estudyante mopakigbahin sa pipila ka tubag sa nangagi nga pangutana, mahimo nimong ihatag ang mosunod nga mga instruksiyon ug padungagi nila ang mga ideya diha sa pisara.
Basaha ang mosunod nga mga tudling sa kasulatan, nga mangita og laing mga paagi nga ang mga kasulatan makatabang kanato sa pagbalik ngadto sa Ginoo ug mapasaylo sa atong mga sala.
2 Timoteo 3:16
Ang mga pangutana nga makatabang sa mga estudyante nga masukod ang ilang nakat-onan makatabang sa magtutudlo sa pag-ila kon ang mga estudyante andam ba nga mopadayon sa sunod leksiyon. Pananglitan, mahimo kang mangutana sama sa mosunod:
-
Unsay inyong nakat-onan?
-
Unsa ang imong mga pangutana mahitungod sa imong gibasa?
Ang mga tubag sa mga estudyante mahimong makatabang sa pagdapit sa Espiritu Santo aron sa pagtabang sa pag-ila kon unsaon sa pagtubag ang ilang mga panginahanglan.
Para sa dugang nga pagbansay sa pangutana aron mosukod sa nakat-onan, tan-awa sa “Pangandam kanunay sa pagtubag sa espirituhanong mga pag-aghat mahitungod sa mga panginahanglan sa mga tigkat-on” diha sa Pagpalambo sa mga Kahanas sa Magtutudlo.
Ang hari ug ang linukot nga basahon
Tingali pwede nimong i-summarize o basahon ang mosunod nga parapo.
Gibuhat ni Jeremias kon unsa ang gimando sa Ginoo ug mihangyo sa usa ka tawo nga ginganlan og Baruc sa pagsulat sa mga pulong sa Ginoo diha sa linukot nga basahon. Tungod kay si Jeremias gipriso, mihangyo siya ni Baruc sa pagbasa sa mga pulong sa Ginoo alang sa katawhan sa Juda, lakip na ang pipila ka prinsipe. Human sa pagbuhat sa ingon, si Baruc mihatag sa linukot nga basahon ngadto sa mga prinsipe aron basahon ngadto ni Joacim, ang hari sa Juda (tan-awa sa Jeremias 36:4–10, 14–15, 20–21).
Basaha ang Jeremias 36:20–24, nga mangita kon unsay reaksiyon ni Hari Joacim nga nakadungog sa mga pulong diha sa linukot nga basahon. Sa bersikulo 23, “siya” nagpasabot ni Hari Joacim.
-
Sa inyong hunahuna ngano kaha nga ingon niini ang reaksiyon sa hari?
Basaha ang Jeremias 36:25, nga mangita kon giunsa sa piho nga mga prinsipe sa pagsulay sa pag-impluwensya ang hari.
Dapita ang mga estudyante sa paghanduraw nga sila ang mga prinsipe sa bersikulo 25. Gamit ang atong nakat-onan karon, hangyoa ang mga estudyante sa pag-andam og usa ka tubag ngadto sa hari nga makatabang niya sa pagsabot sa unsang paagi makapanalangin ang mga kasulatan sa iyang kinabuhi.
Usa ka paagi sa pagbuhat niini nga kalihokan mao ang pagbahin sa klase ngadto sa tulo ka grupo. Ang matag estudyante mahimong magrepresentar sa usa sa mga prinsipe, uban sa mga grupo nga dungang mag-andam sa ilang mga tubag. Dayon mahimo nimong dapiton ang usa ka grupo sa pagduol sa atubangan sa klase ug idrama ang ilang pakigsulti ngadto sa hari. Mahimo nimong dapiton ang laing estudyante sa pagdrama sa papel sa hari o ikaw ingon nga usa ka magtutudlo mohimo sa tahas. Mahimo kang mosugyot nga idrama sa mga estudyante nga lahi ang kataposan sa istorya diin ang hari danihon nga dili sunogon ang linukot nga basahon.
-
Unsa ang modernong sitwasyon diin ang mga pagtulun-an gikan sa imong tubag tingali makatabang sa usa ka batan-on?
Pamalandongi ang unsay imong nakat-onan
Mahimo nimong ipakigbahin ang mosunod nga pamahayag aron makatabang sa mga estudyante nga makapamalandong sa ilang nakat-onan gikan sa ilang pagtuon sa Jeremias 36.
Si Elder D. Todd Christofferson sa Korum sa Napulog Duha ka Apostoles mitudlo:
Pinaagi sa mga kasulatan, ang Dios sa tinuoray “makapakita sa iyang gahom” [tan-awa sa Alma 37:14] aron sa pagluwas ug pagbayaw sa Iyang mga anak. Pinaagi sa Iyang pulong … Siya mopatubo sa atong panumdoman, mokorehir sa dili tinuod ug sa sayop, ug mogiya kanato ngadto sa paghinulsol ug sa pagmaya diha ni Jesukristo, nga atong Manunubos. (“Ang Panalangin sa Kasulatan,” Liahona,, Mayo 2010, 33)
Makatabang tingali ang paghatag og panahon sa mga estudyante nga pamalandongan o isulat ang ilang mga tubag sa mosunod nga pangutana sa dili pa sila mopakigbahin diha sa klase.
-
Sa unsang paagi kaha makaapekto sa inyong personal nga pagtuon ang pagkahibalo sa mga kasulatan nga makatabang ninyo sa pagbalik ngadto sa Ginoo ug makaangkon sa Iyang kapasayloan ug giya?
Kini mahimong maayong kahigayonan alang sa mga estudyante sa pagpamalandong sa ilang personal nga mga tumong sa pagtuon ug ang gikinahanglang pagbasa alang sa kredito sa seminary. Ikonsiderar ang pagdapit sa mga estudyante sa pagrebyo sa ilang mga tumong ug sa paghunahuna sa unsang paagi sila mas makatutok sa pagbalik ngadto ni Jesukristo isip bahin sa ilang personal nga pagtuon sa kasulatan.