Jeremia 16

• Cilat mendon se janë disa nga mrekullitë ose manifestimet më të mëdha të fuqisë të Perëndisë?

Mendo rreth mrekullive të mahnitshme që ka bërë Perëndia në të kaluarën ndërsa lexon thënien vijuese nga Presidenti Rasëll M. Nelson:

“Shumë gjëra të bukura na presin. Në ditët e ardhshme, ne do të shohim shfaqjet më madhështore të fuqisë së Shpëtimtarit që ka parë ndonjëherë bota.” (“Mundeni Botën dhe Gjeni Prehje”, Liahona, nëntor 2022, f. 95)

Lexo te Jeremia 16:14–15, duke kërkuar diçka që do të bëjë Shpëtimtari në ditët e fundit, që do të jetë edhe më monumentale sesa çlirimi që Ai i bëri Izraelit nga Egjipti.

• Çfarë zbulove?

  Nëse nxënësve u nevojitet ndihmë, mund të shpjegoni se në këto vargje Jeremia profetizoi për mbledhjen e Izraelit në ditët e mëvonshme.

  Sipas nevojës, shpjegoni se Presidenti Nelson dha mësimin se mbledhja e Izraelit nënkupton “që ungjilli i Jezu Krishtit t’u ofrohet në të dyja anët e velit fëmijëve të Perëndisë” (te Rasëll M. Nelson dhe Uendi W. Nelson, “Shpresa e Izraelit” [takim shpirtëror mbarëbotëror për rininë, 3 qershor 2018], Gospel Library [Biblioteka e Ungjillit]). Ky mësim do të përqendrohet në mbledhjen e Izraelit në këtë anë të velit.

• Kur mendon rreth planit të Perëndisë për fëmijët e Tij, përse mund të jetë mbledhja e Izraelit një mrekulli edhe më e madhe se çlirimi i Izraelit nga Egjipti?

Përsiat mendimet e tua rreth pyetjes vijuese:

• A është mbledhja e Izraelit e rëndësishme për ty? Përse po ose përse jo?

• Çfarë mendon në lidhje me pjesëmarrjen në të?

Ashtu siç bëri nëpërmjet Moisiut, Shpëtimtari mund ta manifestojë fuqinë e Tij mrekullibërëse nëpërmjet teje ndërsa ti merr pjesë në mbledhjen e Izraelit. Ndërsa studion te Jeremia 16 sot, kushtoji vëmendje çdo mbrese që merr nga Fryma e Shenjtë. Përsiat mënyrën se si Shpëtimtari mund të të përdorë në këtë mbledhje të madhe.

Te Jeremia 16:10–18, Zoti e frymëzoi Jeremian të profetizonte për shkatërrimin e izraelitëve, që erdhi për shkak të rebelizmit të tyre. Zoti u mësoi atyre se “paudhësitë e tyre nuk mbet[ë]n të fshehura para syve të [Tij]” (vargu 17) dhe që Ai do t’u dërgonte një ndëshkim të drejtë nëse vazhdonin të rebeloheshin.

Lexo te Jeremia 16:13, duke kërkuar pasojat që do të përjetonin izraelitët për shkak të paudhësisë së tyre.

Te Jeremia 16:14–15, Jeremia profetizoi më pas se në ditët e mëvonshme Shpëtimtari do të tregonte fuqinë e Tij për ta mbledhur Izraelin sërish tek Ai dhe Kisha e Tij.

Lexo te Jeremia 16:16, duke kërkuar krahasimet që bëri Zoti lidhur me njerëzit që ndihmojnë të mblidhet Izraeli.

• Përse mund të jenë peshkimi dhe gjuetia krahasime të mira për njerëzit që ndihmojnë të mblidhet Izraeli?

• Çfarë mëson rreth rolit tonë në mbledhjen e Izraelit?

Plaku Ronald A Rasband, i Kuorumit të Dymbëdhjetë Apostujve, dha mësim sa vijon rreth kësaj mbledhjeje të madhe:

13:47

“Mbledhja është pranimi përfundimtar se ‘vlera e shpirtrave është e madhe në sytë e Perëndisë’ [Doktrina e Besëlidhje 18:10]. Kaq e thjeshtë është. Ne po i mbledhim fëmijët e Perëndisë në këto ditë të fundit që ata të mund të kenë ‘bekime [që] derdh[en] mbi kokat e tyre’ [3 Nefi 10:18] dhe premtimet e ‘pasuri[ve të] përjetësisë’ [Doktrina e Besëlidhje 78:18]. Nga kjo rrjedh se, për ta mbledhur Izraelin, ne kemi nevojë për misionarë.” (“Sa i Madh do të Jetë Gëzimi Juaj”, Liahona, nëntor 2023, f. 52)

• Çfarë të mëson thënia e Plakut Rasband rreth Atit Qiellor dhe Jezu Krishtit?

• Çfarë shqetësimesh mund të kenë adoleshentët shenjtorë të ditëve të mëvonshme rreth shpërndarjes së ungjillit të Shpëtimtarit dhe mbledhjes së Izraelit?

Zgjidh një nga mundësitë vijuese të studimit. Përgatitu të thuash se cilin shqetësim ose shqetësime mendon se i trajton më mirë fragmenti i shkrimit të shenjtë dhe pse.

1. Lexo te Jeremia 1:6–9, duke kërkuar atë që tha Zoti kur e thirri Jeremian për të shpërndarë ungjillin.

2. Lexo te Doktrina e Besëlidhje 123:12, 16–17 duke kërkuar atë që Jozef Smithi ua dha mësim shenjtorëve të hershëm të ditëve të mëvonshme që lidhet me shpërndarjen e ungjillit.

3. Lexo te Moisiu 6:32–34, duke kërkuar atë që tha Zoti kur Ai e thirri Enokun për të shpërndarë ungjillin.

4. Gjej një tjetër shkrim të shenjtë që ti mendon se ndihmon me ndonjë nga shqetësimet në tabelë.

• Çfarë mësove rreth Shpëtimtarit ndërsa studiove dhe u përpoqe të zgjidhje një shqetësim në tabelë?

• Si mund të ndikojë ajo që mësove rreth Tij në dëshirën për t’ua shpërndarë ungjillin e Tij të tjerëve?

Përgatitini nxënësit të bëjnë një plan për shpërndarjen e ungjillit. Për shembull, mund të shfaqni një material filmik të tillë si “Simple Ways to Love, Share, and Invite” [“Mënyra të Thjeshta për të Dhënë Dashuri, Treguar dhe Ftuar”] (2:50), në dispozicion në ChurchofJesusChrist.org. Nxënësit mund të kërkojnë mënyra se si mund ta shpërndajnë ungjillin. Ata mund të thonë më pas mënyra shtesë që u vijnë në mendje.

2:52

• Çfarë përvojash ke pasur ti ose njerëzit që ti njeh me shpërndarjen e ungjillit të Shpëtimtarit tek të tjerët?

Presidenti Rasëll M. Nelson dha ftesën vijuese:

“Nuk ka asgjë që po ndodh në këtë tokë, që është më e rëndësishme sesa mbledhja e Izraelit për Të. Bëjani të ditur Atit tuaj Qiellor se dëshironi të ndihmoni. Kërkojini Atij që t’ju vërë në punë në këtë kauzë të lavdishme.” (“Zgjedhjet për Përjetësinë” [takim shpirtëror mbarëbotëror për të rinjtë e të rejat në moshë madhore, 15 maj 2022], Gospel Library [Biblioteka e Ungjillit])

Në ditarin tënd të studimit, bëj një plan vetjak për shpërndarjen e ungjillit të Shpëtimtarit tek të tjerët. Para se ta bësh këtë plan, mund të ndjekësh ftesën e Presidentit Nelson duke shprehur me lutje dëshirën tënde për të ndihmuar që të mblidhet Izraeli për Atin Qiellor.

Merre parasysh të përfshish në planin tënd çdo mbresë që mund të kesh marrë nga Fryma e Shenjtë. Për shembull, mund të përfshish kujt do të doje t’ia shpërndarje ungjillin, të tillë si individëve që nuk janë anëtarë të Kishës ose që nuk po marrin pjesë në mënyrë aktive në Kishë. Merre parasysh të përfshish edhe mënyrën dhe kohën kur mund t’ua shpërndash.