« អេសាយ ៥១–៥២ ៖ ‹ ចូរប្រុងស្តាប់តាមយើង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ៥១–៥២ ៖ ‹ ចូរប្រុងស្តាប់តាមយើង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ៥០–៥៧ ៖ មេរៀនទី ១២៣
អេសាយ ៥១–៥២
« ចូរប្រុងស្តាប់តាមយើង »
តាមរយៈអេសាយ ព្រះអម្ចាស់បានមានព្រះបន្ទូលទៅកាន់រាស្ត្រក្នុងសេចក្ដីសញ្ញារបស់ទ្រង់ ទាំងកាលពីបុរាណ និងនៅសម័យនេះ ។ ទ្រង់បានបន្តការសន្យាដ៏ថ្លៃថ្លាដល់ពួកគេ ប្រសិនបើពួកគេជ្រើសរើសស្តាប់តាមការអញ្ជើញដែលពេញដោយក្តីស្រឡាញ់របស់ទ្រង់ ។ ក្នុងនាមជារាស្ត្រក្នុងសេចក្ដីសញ្ញារបស់ទ្រង់ ព្រះអម្ចាស់បានបន្តការសន្យា និងការអញ្ជើញដូចគ្នាទាំងនេះដល់យើងដែរ ។ មេរៀននេះអាចជួយសិស្សស្តាប់តាមការអញ្ជើញរបស់ព្រះអង្គសង្គ្រោះ ។
ការរៀបចំសិស្ស ៖ អញ្ជើញសិស្សឲ្យជញ្ជឹងគិតនៅពេលដែលពួកគេ ឬនរណាម្នាក់ដែលពួកគេស្គាល់បានគោរពតាមការអញ្ជើញ ឬបទបញ្ញត្តិណាមួយរបស់ព្រះអម្ចាស់ ហើយបានទទួលពរ ។ មេរៀននេះនឹងផ្តល់ឱកាសដល់សិស្សដែលស្ម័គ្រចិត្តចែកចាយ ។
សកម្មភាពរៀនសូត្រដែលអាចមាន
តើអ្នកស្តាប់តាមនរណា ?
សូមពិចារណាសរសេរលើក្ដារខៀនអំពីបុគ្គលដែលរៀបរាប់ខាងក្រោមនេះ ឬអ្នកផ្សេងទៀតដែលអ្នកមានអារម្មណ៍ថាមានឥទ្ធិពលសម្រាប់ក្មេងវ័យជំទង់ ។
ឪពុក ឬម្តាយ មិត្តភក្តិ គ្រូបង្រៀន គ្រូបង្វឹក អ្នកមានឥទ្ធិពលលើបណ្តាញសង្គម តារាល្បី
-
តើអ្នកគិតថានរណាដែលក្មេងវ័យជំទង់ទំនងជាស្ដាប់ និងធ្វើតាមដំបូន្មានរបស់ពួកគេ ? ហេតុអ្វី ?
-
ហេតុអ្វីបានជានរណាដែលយើងស្តាប់ និងធ្វើតាមមានសារៈសំខាន់ ?
នៅពេលដែលសិស្សអានខគម្ពីរខាងក្រោម នោះអ្នកប្រហែលជាចង់ចង្អុលបង្ហាញថា អ្នកសរសេរព្រះគម្ពីរតែងតែនិយាយពាក្យគន្លឹះ និងគំនិតដដែលៗ ដើម្បីបញ្ជាក់ពីគំនិតសំខាន់ៗ ។ សិស្សរបស់អ្នកអាចអនុវត្តការស្វែងរកពាក្យគន្លឹះ និងឃ្លាដដែលៗជាមួយនឹងខគម្ពីរខាងក្រោម ។
សូមអាន អេសាយ ៥១:១, ៤, ៧ ដោយរកមើលថាតើនរណាដែលព្រះអម្ចាស់បានទូន្មានរាស្ត្រក្នុងសេចក្ដីសញ្ញារបស់ទ្រង់ឲ្យស្តាប់ និងធ្វើតាម ។ អ្នកអាចគូសចំណាំអ្វីដែលអ្នករកឃើញ ។
សូមអញ្ជើញសិស្សឲ្យចែកចាយនូវអ្វីដែលពួកគេបានរកឃើញ ។ ប្រសិនបើសិស្សត្រូវការជំនួយដើម្បីយល់ដឹងពីពាក្យ ស្ដាប់តាម សូមពិចារណាពន្យល់ថា ប្រធាន រ័សុល អិម ណិលសុន បានបង្រៀនថា ពាក្យស្តាប់តាម មានន័យថា « ស្ដាប់ដោយបំណងចិត្តគោរពតាម » ( « Hear Him » Liahona ខែឧសភា ឆ្នាំ២០២០ ទំព័រ ៨៩ ) ។
-
ហេតុអ្វីបានជាមាននរណាម្នាក់ចង់ស្តាប់ ហើយធ្វើតាមការទូន្មានរបស់ព្រះអង្គសង្គ្រោះជាជាងអ្នកដទៃ ?
សូមជញ្ជឹងគិតអំពីបញ្ហាប្រឈម ការព្រួយបារម្ភ ឬសំណួរទាំងឡាយដែលអ្នកប្រហែលជាមាននៅក្នុងជីវិតរបស់អ្នក ។ សូមពិចារណាពីវិធីដែលអ្នកអាចទទួលបានអត្ថប្រយោជន៍ពីការស្តាប់តាមដំបូន្មាន និងការអញ្ជើញរបស់ព្រះអង្គសង្គ្រោះ នៅពេលអ្នកសិក្សា អេសាយ ៥១–៥២ ។
« ចូរប្រុងស្តាប់តាមយើង »
សូមអាន អេសាយ ៥១:១–២ ដោយរកមើលរូបភាព និងនិមិត្តរូបដែលអេសាយបានប្រើដើម្បីពិពណ៌នាអំពីការអញ្ជើញពីព្រះអម្ចាស់ ។
សូមអញ្ជើញសិស្សឲ្យចែកចាយនូវអ្វីដែលពួកគេបានរកឃើញ និងអ្វីដែលពួកគេមានអារម្មណ៍ថារូបភាពទាំងនេះមានអត្ថន័យ ។
សូមពន្យល់ថា ឃ្លាដើម្បី « ចូរមើលចំទៅឯថ្មដា ជាទីដែលបានដាប់ឯងរាល់គ្នាចេញមក » និងដើម្បីមើលទៅអ័ប្រាហាំ និងសារ៉ា ( អេសាយ ៥១:១–២ ) សំដៅទៅលើការអញ្ជើញរបស់ព្រះអម្ចាស់ឲ្យចងចាំអ័ប្រាហាំ និងសារ៉ា ដែលព្រះបានធ្វើសេចក្ដីសញ្ញារបស់ទ្រង់ ( ឬហៅម្យ៉ាងទៀតថា សេចក្ដីសញ្ញាអ័ប្រាហាំ ) ។ ការណ៍នេះបញ្ជាក់ថា យើងគួរចងចាំដើម្បីរក្សាសេចក្ដីសញ្ញាដូចគ្នានេះជាមួយនឹងព្រះ ។
អ្នកអាចអញ្ជើញសិស្សឲ្យសរសេរសេចក្ដីថ្លែងការណ៍មិនពេញលេញខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ៖ នៅពេលយើងរក្សាសេចក្ដីសញ្ញារបស់យើងជាមួយព្រះអម្ចាស់ នោះទ្រង់នឹង … ។
-
តើវាមានន័យយ៉ាងណាចំពោះអ្នកក្នុងការរក្សាសេចក្ដីសញ្ញារបស់យើងជាមួយព្រះអម្ចាស់ ?
សូមអាន អេសាយ ៥១:៣ ដោយរកមើលពរជ័យដែលព្រះអង្គសង្គ្រោះបានសន្យា ប្រសិនបើយើងស្តាប់តាមទ្រង់ ដើម្បីរក្សាសេចក្តីសញ្ញារបស់យើង ។
-
តើអ្នកបានរកឃើញអ្វីខ្លះ ?
សិស្សអាចបន្ថែម …ប្រទានពរដល់យើងដោយការលួងលោម អំណរ និងសេចក្តីរីករាយ ចំពោះសេចក្តីថ្លែងការណ៍មិនពេញលេញនេះ ។
-
តើអ្នកគិតថាការរក្សាសេចក្ដីសញ្ញារបស់យើងជាមួយព្រះអម្ចាស់ជួយយើងឲ្យទទួលបានការលួងលោម អំណរ និងសេចក្តីរីករាយរបស់ទ្រង់យ៉ាងដូចម្ដេច ?
ការអញ្ជើញ និងពរជ័យ
សូមបង្កើត ឬបង្ហាញតារាងខាងក្រោមនៅលើក្ដារខៀន ។ សិស្សក៏អាចចម្លងវាចូលនៅក្នុងសៀវភៅកំណត់ហេតុការសិក្សារបស់ពួកគេផងដែរ ។ ជាឧទាហរណ៍ អ្នកប្រហែលជាចង់បន្ថែមអ្វីដែលសិស្សបានរកឃើញនៅក្នុង អេសាយ ៥១:១–៣ ។ ឧទាហរណ៍ អ្នកអាចបន្ថែម « រក្សាសេចក្ដីសញ្ញារបស់យើងជាមួយនឹងព្រះអម្ចាស់ » ទៅនឹងជួរឈរខាងឆ្វេង និង « ប្រទានពរដល់ពួកយើងដោយការលួងលោម អំណរ និងសេចក្តីរីករាយ » ទៅនឹងជួរឈរខាងស្តាំ ។
អេសាយបានកត់ត្រាការអញ្ជើញ និងការសន្យាជាច្រើនពីព្រះអម្ចាស់នៅក្នុង អេសាយ ៥១–៥២ ។ កត់ត្រាការអញ្ជើញ និងការសន្យាដែលអ្នករកឃើញនៅក្នុងសៀវភៅកំណត់ហេតុរបស់អ្នក នៅពេលអ្នកសិក្សាជំពូកទាំងនេះ ។
|
ការអញ្ជើញរបស់ព្រះអម្ចាស់ទៅកាន់រាស្ត្រក្នុងសេចក្ដីសញ្ញារបស់ទ្រង់ |
ការសន្យារបស់ព្រះអម្ចាស់ទៅកាន់រាស្ត្រក្នុងសេចក្ដីសញ្ញារបស់ទ្រង់ |
|---|---|
ការអញ្ជើញរបស់ព្រះអម្ចាស់ទៅកាន់រាស្ត្រក្នុងសេចក្ដីសញ្ញារបស់ទ្រង់ | ការសន្យារបស់ព្រះអម្ចាស់ទៅកាន់រាស្ត្រក្នុងសេចក្ដីសញ្ញារបស់ទ្រង់ |
សំណៅមេរៀន ៖ « ការអញ្ជើញ និងការសន្យារបស់ព្រះអម្ចាស់ចំពោះរាស្ត្រក្នុងសេចក្ដីសញ្ញារបស់ទ្រង់ »អាចជួយសិស្សឲ្យស្គាល់ និងយល់ពីការអញ្ជើញ និងពរជ័យរបស់ព្រះអម្ចាស់មកកាន់យើង ។
វិធីមួយដើម្បីជួយសិស្សសិក្សាសំណៅមេរៀនគឺត្រូវរៀបចំពួកគេជាក្រុមតូចៗ ។ ក្រុមនីមួយៗអាចជ្រើសរើសផ្នែកមួយនៃសំណៅមេរៀននេះដើម្បីសិក្សា និងរៀបចំចែកចាយអ្វីដែលពួកគេបានរៀន ។ បន្ទាប់ពីផ្ដល់ពេលគ្រប់គ្រាន់ហើយ សូមរៀបចំថ្នាក់ជាក្រុមថ្មីៗជាមួយនឹងសិស្សដែលបានសិក្សាបណ្ដុំខគម្ពីរផ្សេងៗគ្នា ។ បន្ទាប់មក សិស្សម្នាក់ៗអាចចែកចាយអ្វីដែលពួកគេបានរៀនជាមួយក្រុមថ្មីរបស់ពួកគេ ។
នៅពេលដែលក្រុមពិភាក្សាអំពីអ្វីដែលពួកគេបានរកឃើញ សូមអញ្ជើញពួកគេឲ្យបន្ថែមទៅក្នុងតារាងនៅលើក្តារខៀន ។ សូមពិចារណាពិភាក្សាអំពីការអញ្ជើញ ឬពរជ័យជាក់លាក់ដែលសិស្សគិតថាមានអត្ថន័យ ។ សំណួរដូចខាងក្រោមអាចជួយបាន ៖
-
តើការអញ្ជើញទាំងនេះបង្រៀនអ្នកអ្វីខ្លះអំពីអត្ថន័យនៃការរក្សាសេចក្ដីសញ្ញារបស់អ្នក ?
-
តើពរជ័យណាមួយរបស់ព្រះអម្ចាស់ដែលអ្នកពិតជាចង់បាន ? ហេតុអ្វី ?
-
តើការអញ្ជើញរបស់ព្រះអម្ចាស់មួយណាដែលអ្នកគិតថានឹងជួយអ្នកទទួលបានពរជ័យដែលអ្នកស្វែងរក ?
នៅពេលសិស្សឆ្លើយតប សូមស្តាប់ដោយយកចិត្តទុកដាក់នូវអ្វីដែលពួកគេនិយាយ ហើយគិតអំពីវិធីដើម្បីឲ្យសិស្សចូលរួមនៅក្នុងការពិភាក្សាកាន់តែច្រើន ។ នៅពេលដែលគ្រូបង្រៀនព្យាយាមទប់ខ្លួនឯងកុំឲ្យឆ្លើយតបទៅនឹងរាល់មតិយោបល់ និងសំណួរ ហើយផ្ទុយទៅវិញ អញ្ជើញសិស្សក្នុងថ្នាក់ឲ្យឆ្លើយតប នោះពួកគេអាចជួយបង្កើតទម្លាប់មួយដែលសិស្សឆ្លើយតបគ្នាទៅវិញទៅមក ។ ការណ៍នេះអាចជួយឲ្យបន្តការផ្តោតអារម្មណ៍លើសិស្ស និងបង្កើនការចូលរួមរបស់សិស្ស ។
វិធីមួយក្នុងការធ្វើកិច្ចការនេះ គឺដោយការសួរសំណួរតាមដានដូចជា ៖
-
តើនរណាមានបទពិសោធន៍ទាក់ទងនឹងអ្វីដែលបានចែកចាយ ?
-
តើអ្វីដែលអ្នកចាប់អារម្មណ៍ចំពោះមតិយោបលនោះ ?
( សម្រាប់ការបំពាក់បំប៉នបន្ថែមលើការព្យាយាមទប់ខ្លួនឯងកុំឲ្យឆ្លើយតបទៅនឹងរាល់មតិយោបល់ និងសំណួរ សូមមើល៖ « ព្យាយាមទប់ខ្លួនឯងកុំឲ្យឆ្លើយតបទៅនឹងរាល់មតិយោបល់ និងសំណួរ ហើយអញ្ជើញសិស្សក្នុងថ្នាក់ឲ្យឆ្លើយតបវិញ » នៅក្នុង ជំនាញអភិវឌ្ឍន៍គ្រូបង្រៀន ) ។
ការស្តាប់តាមព្រះអម្ចាស់
សូមអញ្ជើញសិស្សឲ្យគិតអំពីអ្វីដែលពួកគេបានរៀនពីព្រះវរបិតាដែលគង់នៅស្ថានសួគ៌តាមរយៈព្រះវិញ្ញាណបរិសុទ្ធអំពីមេរៀននេះ ។ ខាងក្រោមនេះគឺជារបៀបមួយដែលអ្នកអាចធ្វើការណ៍នេះបាន ។
សូមជញ្ជឹងគិតពីអ្វីដែលអ្នកបានរៀននៅថ្ងៃនេះ និងការអញ្ជើញ ឬការប្រឹក្សាណាមួយដែលអ្នកទទួលអារម្មណ៍ថា ព្រះវរបិតាសួគ៌ និងព្រះយេស៊ូវគ្រីស្ទបានប្រទានដល់អ្នកតាមរយៈព្រះវិញ្ញាណបរិសុទ្ធ ។ នៅក្នុងសៀវភៅកំណត់ហេតុការសិក្សារបស់អ្នក សូមពិចារណាពីសំណួរដូចខាងក្រោមនេះ ៖
-
តើអ្នកមានអារម្មណ៍យ៉ាងណាដែលព្រះអម្ចាស់កំពុងអញ្ជើញអ្នកឲ្យធ្វើអ្វីដើម្បីទទួលបានជំនួយរបស់ទ្រង់ជាមួយនឹងបញ្ហាប្រឈម កង្វល់ ឬសំណួរទាំងឡាយរបស់អ្នក ?