“Isaias 11–12: ‘Usa ka Bandila alang sa mga Nasod,’” Manwal sa Magtutudlo sa Seminary sa Daang Tugon (2026)
“Isaias 11–12: ‘Usa ka Bandila alang sa mga Nasod,’” Manwal sa Magtutudlo sa Seminary sa Daang Tugon
Isaias 1–12: Leksiyon 116
Isaias 11–12
“Usa ka Bandila alang sa mga Nasod”
Ang mga anak sa Dios nagkatibulaag sa espirituwal, ug gusto Niyang pundokon sila diha sa kaluwasan sa Iyang ebanghelyo. Gamit ang ilustrasyon sa usa ka kahoy ug usa ka bandila, gipanagna ni Isaias ang pagpundok sa Israel. Kini nga leksiyon makatabang sa mga estudyante aron mas madasig sila sa pagpakigbahin sa ebanghelyo ngadto sa uban.
Pagpangandam sa estudyante: Ikonsiderar ang paghatag sa matag estudyante og duha sa pangutana sa pagtimbangtimbang sa kaugalingon nga gikan sa sinugdanan sa leksiyon ug pagdapit nila sa pagpamalandong kon unsaon nila kini pagtubag.
Posibleng mga Kalihokan sa Pagkat-on
Unsay imong gibati bahin sa pagpakigbahin sa ebanghelyo?
Ikonsiderar ang pag-andam sa usa sa mosunod ug, samtang maminaw ang mga estudyante, dapita ang mga estudyante sa pagpamalandong sa ilang gibati bahin sa pagpakigbahin sa ebanghelyo:
-
Usa ka asoy gikan sa usa ka estudyante mahitungod sa dihang sila, o ang ilang kaila, mipakigbahin sa ebanghelyo (Pwede kang mangutana kon gusto ba ang estudyante nga mokigbahin sa kasinatian niining puntoha sa leksiyon, o pwede nimo kining saboton daan.)
-
Usa sa imong mga kasinatian
-
Usa sa mosunod nga mga istorya gikan kang Elder Gary E. Stevenson, “Paghigugma, Pagpaambit, Pagdapit,” Mayo 2022
Dapita ang mga estudyante sa pagpamalandong kon ipakigbahin ba nila ang ebanghelyo. Makatabang tingali nga tubagon nila ang mosunod diha sa ilang mga journal sa pagtuon:
-
Unsay imong gibati bahin sa pagpakigbahin sa ebanghelyo?
-
Nganong ingon niana man ang imong gibati?
Kon komportable ang mga estudyante, pwede nilang ipahayag ang pipila sa ilang gihunahuna o mga pagbati ngadto sa klase.
Samtang magtuon ka karon, tinguhaa ang tabang sa Espiritu Santo aron modako ang imong tinguha sa pagpakigbahin sa ebanghelyo. Tinguhaa usab ang tabang sa bisan unsang mga pangutana o imong gikabalak-an.
Panagna ni Isaias
Ikonsiderar ang pagdrowing o pagpakita og sama sa mosunod, pero ayaw iapil ang mga nakasulat. Kon gusto nimo, dapita ang mga estudyante nga sundogon kini nga drowing diha sa ilang mga journal.
Sa Isaias 11, mitudlo si Isaias pinaagi sa simbolo gamit ang mga parte sa kahoy.
Basaha ang Isaias 11:1 ug sulati ang drowing. (Makatabang tingali ang pagkahibalo nga ang tuod pwede pod nga hubaron nga punuan ug turok sama sa gamay nga sanga o udlot.)
-
Unsang mga himan ug kahanas ang imong magamit aron mahibaloan kon kinsa o unsa ang gisimbolohan sa tuod?
Ang pipila sa posibleng mga tubag anaa sa ulohan sa kapitulo ug mga footnote. Tabangi ang mga estudyante sa paggamit niini aron mahibaloan ang gisimbolohan. Pananglitan, footnote 1c motugma ngadto sa mosunod nga mga bersikulo sa Doktrina ug mga Pakigsaad.
Basaha ang Doktrina ug mga Pakigsaad 113:1–2, nga pangitaon ang dinasig nga mga tubag kon unsay gisimbolohan sa tuod.
Diha sa pisara, sulati ang tuod o punoan nga Jesukristo. Pwede usab nga isulat sa mga estudyante diha sa ilang mga kasulatan tupad sa Isaias 11:1.
-
Kon ang Manluluwas mao ang punuan, unsa tingali ang gisimbolohan sa parte sa kahoy nga giputol?
Usa sa posibleng tubag mao nga nag Manluluwas nagtukod og dakong gingharian o kahoy pinaagi ni David (ang anak ni Jesse), pero nahimo silang daotan, nabahinbahin sa mga gingharian, ug sa kataposan napildi (sama sa usa ka kahoy nga giputol). Pero, ang Manluluwas nahinumdom sa Iyang pakigsaad ug motabang sa mga kaliwat ni David nga molambo, nga nagsaad nga pundokon sila pag-usab.
Dayon gipanagna ni Isaias ang Manluluwas pinaagi sa Ikaduhang Pag-anhi ug ang Milenyum. Basaha ang usa o duha sa mosunod nga mga hugpong sa bersikulo, nga pangitaon ang mga paghulagway sa Manluluwas ug ang Iyang impluwensiya.
-
Isaias 11:2–5.
-
Isaias 11:6–9. (Timan-i: Gihulagway niini nga mga bersikulo ang Milenyum ug kon sa unsang paagi ang pagkasayod sa Ginoo makakapekto sa kalibotan. Ang asp ug cockatrice nagpasabot sa lala nga mgabitin.)
-
Isaias 12:1–6.
Dapita ang mga estudyante sa pagpakigbahin sa nakaplagan nilang hugpong sa mga pulong bahin sa Manluluwas o sa Iyang impluweniya nga nagdasig nila nga tinguhaon nga mas maduol sa Manluluwas, o tabangan ang uban nga mapundok ngadto Kaniya. Kon kinahanglan, ikonsiderar ang pagpasabot nga gipakita sa Isaias 11:6–9 ang kalinaw nga dala sa Manluluwas dinhi sa kalibotan.
Ang panangna ni Joseph Smith
Ipakita ang hulagway ni Moroni nga nagpakita atubangan sa batan-ong si Joseph Smith ug ipasabot ang mosunod:
Kadaghang gikutlo ni Moroni ang Isaias 11 ngadto kang Joseph Smith (tan-awa sa Joseph Smith—Kasaysayan 1:40, 45–46, 49). Wala lang gipanagna ni Isaias ang Manluluwas sa kataposang mga adlaw, apil usab si Joseph Smith. Pwede nimong isulat ang Joseph Smith tupad sa “tuod” sa Isaias 11:1 ug sa “gamot” sa Isaias 11:10. (Tan-awa usab ang Doktrina ug mga Pakigsaad 113:3–6.)
Basaha ang Isaias 11:10–12, nga pangitaon ang buluhaton nga buhaton sa Ginoo pinaagi sa Propetang Joseph Smith.
Paminaw pag-ayo samtang ipakigbahin sa mga estudyante ang ilang nakaplagan. Kon mapuslanon, ipasabot ang mosunod:
-
Ang hugpong sa mga pulong nga “gamiton na usab sa Ginoo ang iyang gahom aron pagtigom sa nahibilin niyang katawhan” (Isaias 11:11) nagpasabot sa pagpundok sa Israel sa ulahing mga adlaw (tan-awa sa Doktrina ug mga Pakigsaad 137:6).
-
Ang bandila usa ka bandera o banner nga ang mga sundalo mahimong magpundok o magmartsa ubos niini.
-
Ang “bandila alang sa mga nasod” (Isaias 11:12) nagtumong sa Pagpahiuli sa Ang Simbahan ni Jesukristo sa mga Santos sa Ulahing mga Adlaw, lakip ang tanang ordinansa ug pakigsaad niini (tan-awa sa Doktrina ug mga Pakigsaad 45:9).
Isulat ang mosunod nga hugpong sa mga pulong diha sa pisara: Ang gipahiuli nga Simbahan sa Ginoo mao ang usa ka bandila sa pagpundok sa mga tawo ngadto sa ebanghelyo ni Jesukristo.
Usa ka bandila alang sa mga nasod
Aron tabangan ang mga estudyante nga mas masabtan kini nga baroganan, iapod-apod ang handout nga “Usa ka Bandila alang sa mga nasod.” Ipakita ang mosunod nga mga instruksiyon ug dapita ang mga estudyante nga ibutang kini ngadto sa handout nga silasila ra o uban ang gamayng mga grupo.
Pangutana 1: Nganong gusto sa uban nga mapundok ngadto sa Manluluwas ug sa Iyang Simbahan?
Diha sa bandera, isulat ang pipila ka butang nga imong nahibaloan bahin kang Jesukristo ug sa Iyang gipahiuli nga Simbahan nga para nimo makadani sa uban sa pagpundok ngadto Kaniya ug sa pag-apil sa Iyang Simbahan. Pwede nimong iapil ang mga butang nga talagsaon sa Ang Simbahan ni Jesukristo sa mga Santos sa Ulahing mga Adlaw (sama sa Basahon ni Mormon, modernong mga propeta, ang pagkapari sa Dios, ug mga templo sa ulahing mga adlaw). Isulat kon sa unsang paagi kita napanalanginan sa Ginoo pinaagi niining mga butanga.
Pangutana 2: Nganong angay kitang magpundok ngadto sa Ginoo uban ang ubang tawo?
Tupad sa hulagway sa mga tawo nga nagpundok libot sa bandera, isulat ang pipila sa mga panalangin nga atong madawat samtang nagpundok kita uban ang ubang tawo ngadto sa Ginoo. Pwede nimong hunahunaon ang mga kaayohan sa kasundalohan nga nagpundok nga magkauban ug kon sa unsang paagi kini magamit kanato, kon sa unsang paagi mapalig-on ang lainlaing mga tawo sa imong ward o branch ang matag usa, o kon sa unsang paagi gipakita sa Moises 7:18 ang pipila sa mga kaayohan.
Pangutana 3: Unsaon nato pagdapit ang uban nga modangop sa Manluluwas?
Ubos sa hulagway sa mga tawo nga nagpundok libot sa bandera, isulat ang pipila ka paagi nga atong mapakigbahin ang ebanghelyo ni Jesukristo ngadto sa uban. Pwede nimong ilakip ang mga paagi nga nasulayan na nimo.
Human makompleto ang handout, dapita ang mga estudyante nga ipakigbahin ang ilang gisulat diha sa handout ug ang ilang gibati bahin sa gisulat nila. Kon dili nila natural nga mahimo, dapita sila sa pagpakigbahin kon sa unsang paagi makatabang nila ang ilang nakat-onan karon aron mas madasig sa pagpakigbahin sa ebanghelyo.