« អេសាយ ៥ ៖ ‹ វេទនាដល់ពួកអ្នកដែលរាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ៥ ៖ ‹ វេទនាដល់ពួកអ្នកដែលរាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ១–១២ ៖ មេរៀនទី ១១៥
អេសាយ ៥
« វេទនាដល់ពួកអ្នកដែលរាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ »
តាមរយៈព្យាការីអេសាយ ព្រះអម្ចាស់បានព្រមានអ៊ីស្រាអែលប្រឆាំងនឹងការជ្រើសរើសដ៏ខុសឆ្គងរបស់ពួកគេ រួមទាំងការហៅ « សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ » ( អេសាយ ៥:២០ ) ។ សព្វថ្ងៃនេះ មានគំនិតបំផ្លិចបំផ្លាញ និងការអនុវត្តជាច្រើនដែលហាក់ដូចជាល្អ ។ មេរៀននេះអាចបង្កើនសមត្ថភាពរបស់សិស្សក្នុងការមើលឃើញរវាងល្អ និងអាក្រក់ ។
ការរៀបចំសិស្ស ៖ សូមអញ្ជើញសិស្សឲ្យមករៀនដោយត្រៀមខ្លួនចែកចាយគំរូមួយពីអ្វីមួយដែលសន្មតថាគ្មានគ្រោះថ្នាក់ ឬសូម្បីតែល្អ ដែលនៅទីបំផុតត្រូវបានបង្ហាញថា មានគ្រោះថ្នាក់ ។
សកម្មភាពរៀនសូត្រដែលអាចមាន
គំនិត និងសកម្មភាពគ្រោះថ្នាក់ខាងវិញ្ញាណ
សូមពិចារណាចាប់ផ្តើមថ្នាក់ដោយការបង្ហាញរូបភាពខ្លារខិនបន្លំខ្លួន ដូចជារូបភាពនៅដើមមេរៀននេះ ។ បន្ទាប់មក អ្នកអាចសួរសំណួរខាងក្រោម ហើយបង្ហាញសេចក្តីថ្លែងការណ៍ដោយអែលឌើរ ដេវីឌ អេ បែដណា ។
-
តើអ្វីទៅដែលធ្វើឲ្យខ្លារខិនមានគ្រោះថ្នាក់ដល់ការចាប់ចំណីរបស់វា ?
អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានប្រៀបធៀបខ្លារខិនទៅនឹងគំនិត និងសកម្មភាពដែលមានគ្រោះថ្នាក់ ។
ចំពោះខ្ញុំ ខ្លារខិនគឺជាសត្វដែលមានរោមរលោង ហើយទាក់ទាញ ។ រោមពណ៌លឿងលាយស្នាមអុជខ្មៅរបស់ខ្លារខិនជួយឲ្យវាងាយលាក់ខ្លួន ដែលធ្វើឲ្យសត្វទាំងនេះស្ទើរតែបំបាំងខ្លួនបាន នៅពេលវាលបចាប់ចំណីរបស់វានៅលើវាលស្មៅទ្វីបអាហ្វ្រិក ។
ស្រដៀងគ្នានេះដែរ គំនិត និងសកម្មភាពដ៏គ្រោះថ្នាក់ខាងវិញ្ញាណ ជារឿយៗអាចមានភាពគួរឲ្យទាក់ទាញ គួរឲ្យចង់បាន ឬគួរឲ្យរីករាយ ។ ដូច្នេះហើយនៅក្នុងពិភពលោកបច្ចុប្បន្នរបស់យើងយើងម្នាក់ៗចាំបាច់ត្រូវប្រុងប្រយ័ត្នចំពោះការក្លែងបន្លំរឿងអាក្រក់ថាជារឿងល្អ ។ ( « Watchful unto Prayer Continually » Liahona ខែវិច្ឆិកា ឆ្នាំ២០១៩ ទំព័រ ៣៣ )
-
តើឧទាហរណ៍ស្រដៀងគ្នាមួយចំនួននៃ « គំនិត និងសកម្មភាពដ៏គ្រោះថ្នាក់ខាងវិញ្ញាណ » ដែល « អាចមានភាពគួរឲ្យទាក់ទាញ គួរឲ្យចង់បាន ឬគួរឲ្យរីករាយ » មានអ្វីខ្លះ ?
វានឹងមានប្រយោជន៍ដើម្បីសរសេរចម្លើយរបស់សិស្សនៅលើក្ដារខៀន ។ សិស្សអាចនិយាយអ្វីមួយដូចជា « វាជារូបកាយរបស់ខ្ញុំ ។ ខ្ញុំអាចធ្វើអ្វីដែលខ្ញុំចង់ធ្វើជាមួយរូបកាយខ្ញុំ » ឬ « មិនថ្វីទេ ដរាបណាគេចាប់ខ្ញុំមិនបាន » ។ អ្នកនឹងយោងទៅគំនិតទាំងនេះនៅលើក្ដារខៀនក្រោយមកនៅក្នុងមេរៀននេះ ។
-
ហេតុអ្វីបានជាវាសំខាន់សម្រាប់អ្នកដើម្បីស្គាល់ការបោកប្រាស់មិនល្អដែលសម្តែងធ្វើជាល្អ ?
ការពន្យល់ និងការអញ្ជើញខាងក្រោមអាចជួយសិស្សចាប់ផ្តើមមើលឃើញពីរបៀបដែលពួកគេនឹងសិក្សានៅក្នុងមេរៀននេះមានសារៈសំខាន់នៅក្នុងជីវិតរបស់ពួកគេ ។
វាអាចពិបាកក្នុងការស្គាល់គំនិត និងសកម្មភាពបោកបញ្ឆោតទាំងនេះ ជាពិសេសនៅពេលដែលយើងអាចទទួលឥទ្ធិពលពីវា ។ យើងម្នាក់ៗគិត ឬប្រព្រឹត្តតាមរបៀបដែលមិនត្រូវគ្នាទាំងស្រុងនឹងការបង្រៀនរបស់ព្រះយេស៊ូវគ្រីស្ទ ( សូមមើល រ៉ូម ៣:២៣ ) ។ ព្រះវរបិតាសួគ៌ និងព្រះយេស៊ូវគ្រីស្ទនឹងជួយយើងឲ្យស្គាល់ការណ៍នេះនៅក្នុងខ្លួនយើង នៅពេលយើងស្វែងរកជំនួយរបស់ទ្រង់ទាំងទ្វេតាមរយៈព្រះវិញ្ញាណបរិសុទ្ធ ។ នៅពេលអ្នកសិក្សានៅថ្ងៃនេះ សូមយកចិត្តទុកដាក់ទៅលើរបៀបដែលព្រះវិញ្ញាណបរិសុទ្ធអាចនឹងជួយអ្នកឲ្យយល់ដឹងពីខុស និងត្រូវ ។
ការបោកប្រាស់ក្លែងបន្លំ
សូមសង្ខេបកថាខណ្ឌខាងក្រោម ដើម្បីណែនាំសិស្សអំពីសារលិខិតរួមនៃ អេសាយ ៥ ។
នៅក្នុង អេសាយ ៥ ព្រះអម្ចាស់បានបង្រៀនពួកសាសន៍អ៊ីស្រាអែលអំពីសេចក្តីស្រឡាញ់របស់ទ្រង់ចំពោះពួកគេ និងលទ្ធផលនៃការជ្រើសរើសដ៏ខុសឆ្គងរបស់ពួកគេ តាមរយៈការប្រៀបធៀបពីចម្ការទំពាំងបាយជូរ ។ ទោះបីជាព្រះអម្ចាស់បានព្យាយាមជួយពួកគេឲ្យរីកចម្រើនក្តី ក៏ការជ្រើសរើសដ៏ខុសឆ្គងរបស់ពួកសាសន៍អ៊ីស្រាអែលបាននាំពួកគេឲ្យក្លាយជា « ទំពាំងបាយជូរព្រៃ » ( សូមមើល អេសាយ ៥:២ ) និមិត្តរូបសម្រាប់អំពើពុករលួយ និងជូរចត់របស់ពួកគេ ។ ដោយសារពួកគេបានជ្រើសរើស « បានលះចោល » ហើយមើលងាយព្រះអម្ចាស់ និងការបង្រៀនរបស់ទ្រង់ ( សូមមើល អេសាយ ៥:២៤ ) ពួកគេនឹងត្រូវចាកចេញដោយគ្មានជំនួយពីព្រះអម្ចាស់ឡើយ ។
អ្នកអាចអញ្ជើញសិស្សឲ្យមើលនៅ អេសាយ ៥:៨–២៣ ហើយរាប់ចំនួនពេលដែលព្រះអម្ចាស់បានប្រើពាក្យ « វេទនា » ( ប្រាំមួយដង ) ។ សូមពន្យល់ថា « វេទនា » មានន័យថាទុក្ខព្រួយ ឬការរងទុក្ខយ៉ាងខ្លាំង ។ ព្រះអម្ចាស់បានព្យាយាមបង្រៀនពួកសាសន៍អ៊ីស្រាអែលថា ការជ្រើសរើសដ៏ខុសឆ្គងរបស់ពួកគេកំពុងបង្វែរពួកគេចេញពីទ្រង់ ហើយនាំទៅរកទុក្ខព្រួយ ឬការរងទុក្ខ ។
ខណៈពេលដែលមានសេចក្តីពិតជាច្រើនដែលមេរៀននេះអាចផ្តោតលើ មេរៀនដែលនៅសល់នឹងផ្តោតលើវគ្គចំណេះចំណានខាងគោលលទ្ធិ អេសាយ ៥:២០ ។
អេសាយ ៥:២០ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យពិចារណាគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីពួកគេអាចងាយរកវាឃើញ ។
សូមអាន អេសាយ ៥:២០ ដោយរកមើលអ្វីដែលនាំឲ្យវេទនា ឬទុក្ខព្រួយ និងការរងទុក្ខ ។
-
តើអ្នកបានរកឃើញអ្វីខ្លះ ?
សូមជួយសិស្សស្វែងរកសេចក្តីពិត ដូចជា ប្រសិនបើហៅសេចក្តីអាក្រក់ថាល្អ និងសេចក្តីល្អថាអាក្រក់វិញ នៅទីបំផុតយើងនឹងដកពិសោធន៍ទុក្ខព្រួយ និងការរងទុក្ខ ។ អ្នកអាចអញ្ជើញសិស្សឲ្យពិចារណាគូសចំណាំទាំងបីគូនៅក្នុងខគម្ពីរ សេចក្តីអាក្រក់ និង សេចក្តីល្អ សេចក្តីងងឹត និង ពន្លឺ និង សេចក្តីជូរចត់ និង ផ្អែម ។ សូមពន្យល់ថា អេសាយជាញឹកញយបានផ្តល់ឧទាហរណ៍ជាច្រើនដើម្បីជួយនាំមកនូវភាពកាន់តែច្បាស់លាស់ដល់ការបង្រៀនរបស់លោក ។
-
តើការហៅសេចក្តីអាក្រក់ថាល្អ និងសេចក្តីល្អថាអាក្រក់ នៅទីបំផុតនាំឲ្យមានទុក្ខព្រួយ និងការរងទុក្ខដោយរបៀបណា ?
ការស្គាល់ការលំបាកក្នុងការដឹងពីការបោកបញ្ឆោតទាំងនេះអាចជួយសិស្សឲ្យមានអារម្មណ៍យល់ ស្គាល់ឧបសគ្គ និងមើលឃើញថា ពួកគេត្រូវការទ្រង់ ។
សូមយោងទៅបញ្ជីនៃ « គំនិត និងសកម្មភាព ដ៏គ្រោះថ្នាក់ខាងវិញ្ញាណ » នៅលើក្ដារខៀន ហើយសួរសំណួរដូចខាងក្រោម ។
-
តើអ្វីអាចធ្វើឲ្យពិបាកក្នុងដឹងពីគំនិត និងសកម្មភាពដ៏គ្រោះថ្នាក់ខាងវិញ្ញាណទាំងនេះ ?
សូមគិតប្រសិនបើមានគំនិត ឬសកម្មភាពដែលគ្រោះថ្នាក់ខាងវិញ្ញាណ ដែលអ្នកប្រហែលជាមើលឃើញថាគួរឲ្យទាក់ទាញ គួរឲ្យចង់បាន ឬគួរឲ្យរីករាយ ។
ព្រះយេស៊ូវគ្រីស្ទគឺជាសេចក្តីពិត
បន្ទាប់ពីស្វែងរកការលំបាក ជួយសិស្សមើលឃើញព្រះយេស៊ូវគ្រីស្ទជាដំណោះស្រាយ ។
សូមអាន យ៉ូហាន ១៤:៦ ដោយរកមើលអ្វី ដែលព្រះយេស៊ូវបានមានព្រះបន្ទូលអំពីទ្រង់ជានរណា ។
-
តើអ្នកគិតថា ព្រះយេស៊ូវមានន័យយ៉ាងណា ពេលទ្រង់មានព្រះបន្ទូលថាទ្រង់ជាសេចក្តីពិត ?
-
តើព្រះវរបិតាសួគ៌ និងព្រះយេស៊ូវគ្រីស្ទបានប្រទានអ្វីខ្លះ ដើម្បីជួយយើងឲ្យស្គាល់គំនិត និងសកម្មភាពបោកប្រាស់ដែលយើងបានរាយបញ្ជីពីមុន ?
ទោះបីជានេះមិនមែនជាបញ្ជីធំដុំក៏ដោយ ក៏សិស្សអាចចែកចាយរឿងមួយចំនួនដូចជា ៖
-
ព្រះវិញ្ញាណ ( សូមមើល គោលលទ្ធិ និងសេចក្តីសញ្ញា ១១:១២–១៣ )
-
ពន្លឺនៃព្រះគ្រីស្ទ ( សូមមើល មរ៉ូណៃ ៧:១៦–១៩ )
-
ពួកព្យាការី ( សូមមើល គោលលទ្ធិ និងសេចក្តីសញ្ញា ២១:១, ៤–៦ )
-
បទគម្ពីរ ( សូមមើល ធីម៉ូថេ ទី២ ៣:១៥–១៧ )
ប្រសិនបើអ្នកយល់ឃើញពីតម្រូវការក្នុងសិស្សរបស់អ្នក នោះអ្នកអាចអាន និងពិភាក្សាអំពីបទគម្ពីរមួយចំនួនដែលបានផ្ដល់ឲ្យ ។
សកម្មភាពបន្ទាប់ផ្តល់ឲ្យសិស្សនូវឱកាសមួយដើម្បីសិក្សាការបង្រៀនរបស់ព្រះអង្គសង្គ្រោះដើម្បីជួយពួកគេឲ្យស្គាល់សេចក្តីពិតរបស់ទ្រង់ ។ សូមយោងសិស្សទៅបញ្ជីនៃគំនិត ឬសកម្មភាពដែលមានគ្រោះថ្នាក់ខាងវិញ្ញាណ នៅលើក្តារខៀន ។ សូមដាក់បង្ហាញសេចក្តីណែនាំដូចខាងក្រោម ។
ដើម្បីជួយយើងឲ្យយល់ដឹងពីសេចក្តីពិតពីកំហុស យើងអាចងាកទៅរកការបង្រៀនរបស់ព្រះយេស៊ូវគ្រីស្ទ និងព្យាការីរបស់ទ្រង់ ។ កន្លែងមួយដែលយើងអាច « រកឃើញការបង្រៀនជាច្រើនរបស់ព្រះយេស៊ូវគ្រីស្ទ និងព្យាការីទាំងឡាយរបស់ទ្រង់ » គឺនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ធ្វើការជ្រើសរើសដែលបំផុសគំនិត » ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ) ។
ជ្រើសរើសគំនិតមួយ ឬសកម្មភាពដែលសេចក្ដីអាក្រក់សម្តែងធ្វើជាល្អ ឬសេចក្ដីល្អដែលត្រូវបានបង្ហាញជា ឬដាក់ស្លាកថា អាក្រក់ ។ សិក្សាសេចក្តីណែនាំ ដើម្បីកម្លាំងនៃយុវជន ដោយរកមើលការបង្រៀនរបស់ព្រះយេស៊ូវគ្រីស្ទ និងពួកព្យាការីរបស់ទ្រង់ ដែលអាចជួយអ្នកជ្រើសរើសដើរតាមព្រះយេស៊ូវគ្រីស្ទ ជំនួសឲ្យសារលិខិតបោកប្រាស់របស់អារក្ស ។ សូមសរសេរពីរបៀបដែលការបង្រៀនរបស់ព្រះអង្គសង្គ្រោះកែតម្រូវគំនិតមិនពិត ។
សូមឲ្យសិស្សចែកចាយអ្វីដែលពួកគេបានរកឃើញ ។ ដើម្បីធ្វើដូច្នេះ សិស្សអាចជ្រើសរើសគំនិត ឬសកម្មភាពពីក្ដារខៀន ។ សូមឲ្យសិស្សក្នុងថ្នាក់ពន្យល់ពីរបៀបដែលអ្វីមួយដែលពួកគេបានរៀន បង្ហាញពីគំនិត ឬសកម្មភាពនោះថា ជាការបំផ្លិចបំផ្លាញខាងវិញ្ញាណ ។ ឧទាហរណ៍ ប្រសិនបើសិស្សជ្រើសរើស « មិនថ្វីទេ ដរាបណាគេចាប់ខ្ញុំមិនបាន » សិស្សអាចចែកចាយអ្វីមួយដែលពួកគេបានរៀននៅក្នុងផ្នែក « សេចក្តីពិតនឹងធ្វើឲ្យអ្នកមានសេរីភាព » នៅក្នុងសេចក្តីណែនាំ ដើម្បីកម្លាំងនៃយុវជន ដូចជាកថាខណ្ឌដែលចាប់ផ្ដើម « ការរស់នៅដោយទៀងត្រង់មានន័យថា អ្នកស្រឡាញ់សេចក្តីពិតអស់ពីចិត្ត » ឬ « ស្រឡាញ់សេចក្តីពិត » ។
ការជញ្ជឹងគិតអំពីការរៀនសូត្រ
ផ្តល់ឲ្យសិស្សនូវឱកាសមួយដើម្បីឆ្លុះបញ្ចាំងពីអ្វីដែលពួកគេបានរៀនដោយបង្ហាញសំណួរដូចខាងក្រោម ។
សូមសរសេរចម្លើយរបស់អ្នកចំពោះសំណួរខាងក្រោមនេះ នៅក្នុងសៀវភៅកំណត់ហេតុការសិក្សារបស់អ្នក ។
-
តើអ្នកបានរៀនអ្វីខ្លះនៅថ្ងៃនេះ ដែលអាចជួយអ្នកឲ្យស្គាល់សេចក្ដីពិត ហើយដើរតាមព្រះយេស៊ូវគ្រីស្ទបានកាន់តែល្អ ?
អ្នកអាចអញ្ជើញសិស្សឲ្យចែកចាយអារម្មណ៍ និងទីបន្ទាល់របស់ពួកគេ ដោយការចែកចាយអ្វីដែលពួកគេបានសរសេរ ។ សូមពិចារណាថ្លែងទីបន្ទាល់អំពីព្រះយេស៊ូវគ្រីស្ទ និងព្រះបរមងាររបស់ទ្រង់ថា ជាសេចក្តីពិត ។
ទន្ទេញ
អ្នកអាចចង់ជួយសិស្សឲ្យទន្ទេញវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះសម្រាប់ អេសាយ ៥:២០ គឺជា « វេទនាដល់ពួកអ្នកដែលរាប់សេចក្ដីអាក្រក់ថាជាល្អ ហើយសេចក្ដីល្អថាជាអាក្រក់វិញ » ។ គំនិតសម្រាប់សកម្មភាពទន្ទេញមាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។