Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Siope 21–24; 38–40; 42: Ko e Vakai ki he Ngaahi Faingataʻá ʻaki ha Fakakaukau ʻOku Taʻengatá

“Siope 21–24; 38–40; 42: Ko e Vakai ki he Ngaahi Faingataʻá ʻaki ha Fakakaukau ʻOku Taʻengatá,” Fuakava Motuʻá – Tohi Lēsoni ʻa e Faiako Seminelí (2026)

“Siope 21–24; 38–40; 42: Ko e Vakai ki he Ngaahi Faingataʻá ʻaki ha Fakakaukau ʻOku Taʻengatá,” Fuakava Motuʻá – Tohi Lēsoni ʻa e Faiako Seminelí

Siope 1–3; 12–14; 19; 21–24; 38–40; 42: Lēsoni 99

Siope 21–24; 38–40; 42

Ko e Vakai ki he Ngaahi Faingataʻá ʻaki ha Fakakaukau ʻOku Taʻengatá

Job and His Friends by Ilya Repin. Job's wife grieves behind him, while his friends, Eliphaz, Bildad, and Zophar, observe his impoverished condition.

Kuó ke fifili nai pe ko e hā e ʻuhinga ʻoku fakaʻatā ai ʻe he ʻOtuá ʻa e faingataʻaʻiá? ʻOku ʻi ai mo ha ngaahi fehuʻi kehe kuó ke ʻeke lolotonga hoʻo ngaahi faingataʻaʻiá? Naʻe taʻeʻaonga e feinga ʻa Siope mo hono ngaahi kaungāmeʻá ke fakapapauʻi e ngaahi ʻuhinga ki he faingataʻaʻia ʻa Siopé. Neongo naʻe ʻikai ʻomi ʻe he ʻOtuá ha ʻuhinga, ka naʻá Ne tokoniʻi ʻa Siope ke ne vakai ki hono ngaahi ʻahiʻahí ʻi ha founga māʻolunga mo māʻoniʻoni ange. ʻE lava ke ʻoange ʻe he lēsoni ko ʻení ha faingamālie ki he kau akó ke tokoniʻi e niʻihi kehé ke nau vakai ki honau ngaahi faingataʻaʻiá ʻaki ha fakakaukau ʻoku taʻengatá.

Teuteu ʻa e tokotaha akó: ʻOange ki he kau akó ʻa e fehuʻi “Ko e hā e ʻuhinga ʻoku tuku ai ʻ.e he ʻOtuá ke tau aʻusia ʻa e ngaahi faingataʻá?” Fakaafeʻi kinautolu ke kumi e ngaahi talí ʻo fakaʻaongaʻi e ngaahi maʻuʻanga tokoni kuo fokotuʻu fakalangí, hangē ko e folofolá, ngaahi akonaki mei he kau taki ʻo e Siasí, pe ko ʻenau mātuʻá. Te nau lava foki ʻo ʻeke ki honau fāmilí pe ngaahi kaungāmeʻá pe te nau tali fēfē ʻa e fehuʻí.

Ngaahi ʻEkitivitī Ako ʻOku Ala Fakahokó

Ko e hā e ʻuhinga ʻoku hoko ai e ngaahi meʻa fakamamahí?

Fakakaukau ke kamata ʻa e kalasí ʻaki hano hiki e ngaahi fehuʻi ko ʻení ʻi he palakipoé. Fakaafeʻi e kalasí ke nau faʻu ha toe fehuʻi ʻe ua pe lahi ange ʻe ala ʻeke ʻe he kakaí lolotonga ʻenau feinga ke mahino kiate kinautolu honau ngaahi faingataʻaʻiá. Tānaki atu e ongo fehuʻi ko ʻení ki he palakipoé pea fakafika kinaua ko e 5 mo e 6. ʻE fakaʻaongaʻi ʻa e ngaahi fehuʻi ko ʻení ʻi he kotoa ʻo e lēsoní.

“ʻOku pau pē ʻoku fehalaaki ʻeku meʻa kotoa ʻoku faí. Ko e hā mo ha toe ʻuhinga ʻoku faingataʻa ai ʻa e moʻuí kiate aú?”
“Kapau ʻoku ou muimui ki he ongoongoleleí, ko e hā e ʻuhinga ʻoku ʻikai ke u lava ai ʻo fakaʻehiʻehi mei he ngaahi faingataʻá mo e mamahí?”
“Naʻá ku pehē naʻe ʻofa ʻa e ʻOtuá ʻiate au. Ko e hā e ʻuhinga ʻokú Ne ʻai ai ʻeku moʻuí ke fuʻu faingataʻá?”
“Kapau ʻoku moʻoni ʻa e ʻOtuá, ko e hā e ʻuhinga ʻoku ʻikai ke Ne taʻofi ai e faingataʻaʻia ʻa e kakaí?”

ʻE ala tokoni ke fakahaaʻi ʻe lava ke fai ʻe ha kau ako ʻe niʻihi ha ngaahi fehuʻi tatau lolotonga e ngaahi faingataʻá. Poupouʻi e kau akó ke nau angaʻofa mo fakaʻapaʻapa ʻi heʻenau aleaʻi e fehuʻi ko ʻení.

Ko e hā ha ngaahi mahalo ʻe ala maʻu ʻe he kakaí ʻi he taimi ʻoku nau ʻeke ai ha ngaahi fehuʻi hangē ko ʻení?

Hili e fealeaʻakí te ke lava ʻo fakaafeʻi e kau akó ke fakalaulauloto ki he fehuʻi ko ʻení. ʻE lava ke nau tohi ʻenau ngaahi talí ʻi heʻenau tohinoa akó.
ʻOkú ke pehē te ke lava ʻo tokoniʻi ha taha ke tafoki ki he ʻEikí pea maʻu e tali ki he faʻahinga fehuʻi pehení? Ko e hā hono ʻuhingá?

ʻE lava ke fakaafeʻi ʻa e Laumālie Māʻoniʻoní ki heʻetau akó ʻi hono ako ʻo e ngaahi maʻuʻanga tokoni kuo fokotuʻu fakalangí. Tokanga ki he ngaahi fakakaukau te Ne ala akoʻi atu ʻi hoʻo lau e folofolá mo e ngaahi fakamatala ʻi he lēsoni ko ʻení. Fakakaukau ki he founga ʻe lava ke tokoni ai e ngaahi fakakaukau ko ʻení ki he niʻihi kehé ke tali e ngaahi fehuʻi fekauʻaki mo honau ngaahi faingataʻaʻiá. ʻE ala tokoni hoʻo fai iá ke ke maʻu ha mahino lahi ange ki hoʻo ngaahi faingataʻaʻiá.

Siope mo hono ngaahi kaungāmeʻá

Fakakaukau ke fakaʻaliʻali ha fakatātā ʻo Siope, hangē ko ia ʻi he kamataʻanga ʻo e lēsoní. Fakaafeʻi e kau akó ke aleaʻi nounou mo hanau hoa ʻa e meʻa ʻoku nau manatuʻi fekauʻaki mo e talanoa ʻo Siopé. Hili iá, te ke lava ʻo vahevahe ʻa e ngaahi meʻá ni:

Lolotonga e ngaahi faingataʻaʻia ʻo Siopé naʻe ʻaʻahi ange hano kaungāmeʻa ʻe toko tolu kiate ia. Naʻe feinga ʻa Siope mo hono ngaahi kaungāmeʻá ke ʻiloʻi ʻa e ngaahi ʻuhinga ki heʻene faingataʻaʻiá. Naʻe hoko e fakangatangata ʻenau fakakaukaú ke nau maʻu ai ha ngaahi fakakaukau hala.

ʻI hono fakaʻaongaʻi e ngaahi veesi ʻi laló, fakakaukau ke fakaafeʻi e tafaʻaki toʻohema ʻo e kalasí ke nau ako e meʻa naʻe tui ki ai ʻa Siope fekauʻaki mo ʻene faingataʻaʻiá pea mo e tafaʻaki toʻomataʻú ke nau ako e meʻa naʻe tui ki ai e kaungāmeʻa ʻo Siope ko ʻElifasí. Pe ko hoʻo fakamatalaʻi fakanounou ʻa e ngaahi veesi ko ʻení pea hoko atu ki he ʻuluʻi tohi “Ko ha fakakaukau ʻoku taʻengatá.” ʻI hono fakamatalaʻi fakanounouʻí, ʻe maʻu ai ʻe he kau akó ha taimi lahi ange ke nau ako e fakaʻosinga ʻo e talanoa ʻo Siopé pea mo aleaʻi ʻa e laʻipepa tufá.

Lau ʻa e Siope 19:6–11, ʻo kumi e meʻa naʻe mahalo ki ai ʻa Siope fekauʻaki mo e ʻOtuá.
Lau ʻa e Siope 22:5–10, ʻo kumi e meʻa naʻe mahalo ki ai ʻa ʻElifasi fekauʻaki mo Siopé.

Ko e hā ʻa e ngaahi fakakaukau hala naʻe maʻu ʻe he tokotaha takitaha?

Kapau ʻoku fiemaʻu tokoni e kau akó ke mahino ʻa e meʻa ne nau laú, te ke lava ʻo fakamatalaʻi ange naʻe ongoʻi ʻe Siope naʻe fakatupu ʻe he ʻOtuá hono ngaahi faingataʻaʻiá pea naʻá ne liʻaki ia. Naʻe tukuakiʻi hala ʻe ʻElifasi ʻa Siope ki hono ngaohikovia ʻo e niʻihi kehe. Naʻá ne tui ko e mamahi ʻa Siopé ko ha ola ia ʻo e faiangahalá.

Ko ha fakakaukau ʻoku taʻengatá

ʻI he hokohoko atu e fefaʻuhi ʻa Siope mo hono ngaahi faingataʻaʻiá, naʻe folofola ʻa e ʻOtuá kiate ia. Naʻe ʻeke ʻe he ʻOtuá kia Siope ha ngaahi fehuʻi lahi fekauʻaki mo hono fakatupu ʻo e māmaní, ʻa ia naʻe ʻikai lava ʻe Siope ʻo tali (vakai, Siope 38–41).

Lau ʻa e Siope 38:4–7, ʻo kumi ha ngaahi sīpinga ʻo e ngaahi fehuʻi ne ʻeke ʻe he ʻOtuá kia Siopé.

Naʻe fakamatalaʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e tali ʻa e ʻOtuá ki he ʻikai malava ʻe Siope ʻo fai ha tali kiate Iá:

Naʻe hangē naʻe folofola ʻa e ʻOtuá ʻi he faʻa kātaki mo e angaʻofa kia Siope, “Kapau ʻoku ʻikai te ke lava ʻo tali ha taha ʻo ʻeku ngaahi fehuʻi fekauʻaki mo e māmani kuó u fakatupú, ʻoku malava nai ke ʻi ai ha ngaahi fono taʻengata ʻoku ʻikai mahino kiate koe? ʻOku ʻi ai nai ha ngaahi mahalo kuó ke fai ʻoku hala? ʻOku mahino nai kiate koe ʻeku ngaahi taumuʻá mo e founga ʻoku ngāue ai ʻeku palani ʻo e fakamoʻuí mo e hakeakiʻí? Pea ʻokú ke lava nai ʻo tomuʻa ʻiloʻi ho ikuʻanga he kahaʻú?”

ʻOku ʻafioʻi ʻe he ʻOtuá ʻi Hono potó ko ha konga mahuʻinga ʻo ʻetau aʻusia fakamatelié ko e ʻikai ke tau ʻiloʻi ʻa e meʻa kotoa peé. ʻOku ʻi ai ha meʻa fekauʻaki mo e falala kiate Iá ʻokú ne fakaʻatā kitautolu ke tau fakalakalaka ke hoko ʻo hangē ko Iá. (“Trust God and Let Him Prevail,” Liahona, Aug. 2022, 5)

Ko e hā e meʻa ʻoku tokoni ai ʻa e fakamatala ko ʻení ke mahino kiate koe fekauʻaki mo e ʻOtuá mo e ngaahi faingataʻá?

ʻI he tali ʻa e kau akó, fakakaukau ke fakamahinoʻi ange naʻe ʻikai ʻomi ʻe he ʻOtuá ha ʻuhinga ki he faingataʻaʻia ʻa Siopé.

Lau ʻa e Siope 42:1–6, ʻo kumi e tali ʻa Siope ki he ʻEikí.

Ko e hā e meʻa ʻoku makehe kiate koe mei he tali ʻa Siopé?
Ko e hā ha meʻa kuó ke ako mei he talanoa ʻo Siopé ʻe lava ʻo tokoni ke mahino lelei ange kiate kitautolu hotau ngaahi faingataʻaʻiá?

Mahalo ʻe ʻiloʻi ʻe he kau akó ha ngaahi moʻoni lahi, kau ai ʻa e malava ke tokoniʻi kitautolu ʻe he ʻOtuá ke tau vakai ki hotau ngaahi faingataʻaʻiá ʻaki ha fakakaukau ʻoku taʻengatá.

Naʻe fakahaaʻi ʻe Siope ʻa e fakangatangata ʻene mahinó ʻi hono fakafehoanaki mo e ʻilo ʻa e ʻOtuá, pea naʻe liliu ʻe Siope e anga ʻo ʻene vakai ki hono ngaahi faingataʻaʻiá. Naʻe fakaʻau ʻo ne ʻiloʻi ko ʻene mamahí naʻe ʻikai ko ha ola ia ʻo ha angahala pe tautea fakalangi. Naʻe tāpuekina lahi ʻe he ʻOtuá ʻa Siope ʻi he fakaʻosinga ʻo ʻene moʻuí (vakai, Siope 42:12–13).

Ko e mahino ʻa e ngaahi faingataʻá

Mahalo he ʻikai mahino maʻu pē kiate kitautolu ʻa e ngaahi ʻuhinga ki hotau ngaahi faingataʻaʻiá. Ka neongo ia, kuo ʻomi ʻe he ʻEikí ha ngaahi maʻuʻanga tokoni fakalangi ʻe lava ʻo tokoni ke tau vakai ki hotau ngaahi faingataʻá ʻaki ha fakakaukau ʻoku taʻengatá.

ʻI hono fakakakato ʻe he kau akó ʻa e laʻipepa tufá, fakakaukau ke fakaafeʻi kinautolu ke toe lau ʻa e ngaahi fehuʻi ʻe ono fekauʻaki mo e ngaahi faingataʻá ʻa ia naʻe hiki ʻi he palakipoé ʻi he kamataʻanga ʻo e kalasí. Te ke lava ʻo tataki ha alēlea fakakalasi ʻaki ha ngaahi fehuʻi hangē ko ʻení:

Ko e hā e meʻa naʻá ke ako ʻe lava ʻo tokoni ki ha taha ʻokú ne maʻu e ngaahi fehuʻi ko ʻení ke vakai ki heʻene ngaahi ʻahiʻahí ʻaki ha fakakaukau ʻoku taʻengatá?
Kuó ke mamata fēfē ki hono moʻoni ʻo e ngaahi akonaki naʻá ke akó ʻi hoʻo ngaahi faingataʻaʻiá?
Ko e hā e meʻa ʻokú ke ako fekauʻaki mo e Tamai Hēvaní mo Sīsū Kalaisi ʻi hoʻo fakafanongo ki he meʻa ʻoku vahevahe ʻe he niʻihi kehé?

Fakaʻosí

Tuku ke fakatulamaʻi ʻe he kau akó hono tokoniʻi e niʻihi kehé ke nau vakai ki honau ngaahi faingataʻaʻiá ʻaki ha fakakaukau ʻoku taʻengatá. Te ke lava ʻo fai ʻeni ʻaki hano fakahoa e kau akó. ʻOange ki he hoa takitaha ha foʻi lulu tafaʻaki ʻe ono. Fakaʻaliʻali e ngaahi fakahinohino ko ʻení. Te ke lava ʻo liliu ʻa e ngaahi fakahinohinó kapau ʻoku ʻikai maʻu ha foʻi lulu.

Vakai ki he fehuʻi ʻe ono fekauʻaki mo e ngaahi faingataʻaʻiá ne hiki ʻi he palakipoé ʻi hoʻo fakakakato mo ho hoá ʻa e ʻekitivitī ko ʻení:

Fili ha toko taha ke ne tekaʻi e foʻi lulú.
Kapau naʻá ke tekaʻi e foʻi lulú, ʻeke ki ho hoá ʻa e fehuʻi ʻi he palakipoé ʻoku fekauʻaki mo e mataʻifika naʻá ke tekaʻí. (Hangē ko ʻení, kapau naʻá ke tekaʻi ʻo maʻu ʻa e tahá te ke fehuʻi, “ʻOku pau pē ʻoku fehalaaki ʻeku meʻa kotoa ʻoku faí. Ko e hā mo ha toe ʻuhinga ʻoku faingataʻa ai ʻa e moʻuí kiate aú?”)
Kapau naʻe ʻikai te ke tekaʻi ʻa e foʻi lulú, tali ʻa e fehuʻi naʻe fai atu ʻe hoʻo hoá. Fakaʻaongaʻi ha ngaahi fakakaukau naʻá ke maʻu mei he kalasí ke tokoni ki ho hoá ke vakai ki honau ngaahi faingataʻaʻiá ʻaki ha fakakaukau ʻoku taʻengatá. Fakakau ai ha ngaahi fakakaukau pe ongo ʻokú ke maʻu fekauʻaki mo e Tamai Hēvaní pe ko Sīsū Kalaisi.
Fetongi e ngaahi fatongiá pea toe fai pē ʻa e ʻekitivitií. Kapau ʻe tekaʻi ʻo toe maʻu pē ʻa e fika tatau, toe tekaʻi pē.

Fakakaukau ke fakaʻosi ʻaki hano tānaki atu hoʻo fakamoʻoní ki he ngaahi meʻa kuo vahevahe ʻe he kau akó he ʻaho ní.

Ngaahi Maʻuʻanga Tokoni Kehé

Ko e hā e ʻuhinga ʻoku tuku ai ʻe he ʻOtuá ke hoko ʻa e ngaahi meʻa ʻoku koví kiate kitautolú?

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí:

18:56

Hili e fakatomala ʻa Siope pea hoko ʻo māʻoniʻoni angé, ne tāpuekina ia ʻe he ʻEikí ʻo lahi ange ʻi he meʻa kotoa ne mole meiate iá. Kae mahalo ko e tāpuaki maʻongoʻonga taha kia Siopé ko hono fakatupulaki e māʻoniʻoní ʻi he faingataʻá mo e fakatomalá. Naʻá ne feʻunga ke maʻu ha fiefia lahi ange ʻi he toenga ʻo ʻene moʻuí.

He ʻikai hoko mai e māʻoniʻoni angé ʻi hano kole pē. ʻE hoko mai ia ʻi hono fai e meʻa ʻoku fiemaʻu ke liliu ai kitautolu ʻe he ʻOtuá. (“Māʻoniʻoní mo e Palani ʻo e Fiefiá,” Liahona, Nōvema 2019, 102–103)

Naʻe vahevahe ‘e Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

12:10

Ko e ʻahiʻahí mo e ngaahi faingataʻá ko ha ngaahi aʻusia angamaheni ia ʻo e moʻui fakamatelié. Ko e fehangahangaí ko ha konga mahuʻinga ia ʻo e palani fakalangi ki hono tokoniʻi kitautolu ke tau tupulakí [vakai, 2 Nīfai 2:11], pea ʻi he lotolotonga ʻo e tupulaki ko iá, ʻoku tau maʻu ai ʻa e fakapapau ʻa e ʻOtuá ʻi he fakakaukau ʻoku taʻengatá he ʻikai tuku ke ikunaʻi kitautolu ʻe he fehangahangaí. Te tau ikuna ʻi Heʻene tokoní mo ʻetau faivelengá mo e kātakí. ʻOku fakataimi ʻa e ngaahi faingataʻa kotoa pē ʻo hangē ko e moʻui fakamatelie ʻoku hoko aí. (“Ke Mou Fiefia,” Liahona, Nōvema 2020, 70)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 122:7. “ʻE foaki ʻe he ngaahi meʻá ni kotoa pē ʻa e potó kiate koe”

Kapau ʻe vahevahe ʻe he kau akó ha ngaahi fakakaukau naʻa nau maʻu mei he Tokāteline mo e Ngaahi Fuakava 122:7, te ke lava ʻo fakaafeʻi kinautolu ke fakafehokotaki ʻa e kupuʻi lea ngaahi meʻá ni ki he fakamatala ko ʻení.

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE lava ʻe heʻetau aʻusia tonu e ngaahi meʻa ko ʻení ʻo fakakoloaʻi kitautolu ʻaki ha loto faka-Kalaisi kiate kinautolu ʻoku faingataʻaʻiá. Naʻe pehē ʻe Siosefa ʻi he lolotonga ʻo ʻene ʻi he fale fakapōpulá, “ʻE ʻiʻī maʻu pē hoku mafú ʻi he ʻosi ʻa e meʻá ni ʻo laka ange ʻi ha toe taimi ki muʻa.” Naʻá ne fakaʻānaua ke ʻi he Kāingalotú ke ne fakafiemālieʻi kinautolu. Naʻá ne fakamatala ai, “Kuo teʻeki ai ke u ongoʻi pehē ʻo hangē ko e taimi ní, ka ne taʻeʻoua ʻeku tofanga ʻi he ngaahi faihala ne u tofanga aí” [“Letter to Presendia Huntington Buell, 15 March 1839,” [1], josephsmithpapers.org]. (“Hono ʻIkai Lahi e ʻAloʻofa ʻa e ʻEikí,” Liahona, ʻOkatopa 2018, 63)

Ko e hā e meʻa ʻoku mahuʻinga kiate koe mei he fakamatala ko ʻení?
Kuo teuteuʻi fēfē koe ʻe hoʻo ngaahi faingataʻaʻiá ke fakahaaʻi ha manavaʻofa faka-Kalaisi ki he niʻihi kehé?

Ko e moʻui ʻi he maama fakalaumālié

Fakamatalaʻi ange naʻe fai ʻe he ʻOtuá ha ngaahi fehuʻi kia Siope fekauʻaki mo ha ngaahi meʻa lahi, kau ai ʻa e moʻui ʻi he maama fakalaumālié, ke tokoni ke maʻu ʻe Siope ha fakakaukau ʻoku taʻengatá.

ʻI hono lau ʻe he kau akó ʻa e Siope 38:4–7, kole ange ke nau kumi e meʻa ʻe lava ke akoʻi mai ʻe he ngaahi veesi ko ʻení fekauʻaki mo e moʻui ʻi he maama fakalaumālié.

ʻOkú ke pehē ko e hā e ʻuhinga naʻe mei tokoni ai e ngaahi fehuʻi ko ʻení ke fakakaukau ki ai ʻa Siopé?

Naʻe akoʻi ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

11:28

Mahalo ʻe fehuʻi ʻe ha niʻihi he taimi ʻoku nau faingataʻaʻia pehē aí, pe ʻoku anga fēfē hono tuku ʻe he ʻOtua Māfimafí ke hoko ʻení? Pea hoko mai ai mo e fehuʻi mahino ko ia, ko e hā ʻoku hoko ai ʻeni kiate aú? Ko e hā kuo pau ke tau aʻusia ai ʻa e mahamahakí mo e ngaahi meʻa ʻokú ne fakafaingataʻaʻiaʻi pe ui vave atu ai ha mēmipa mahuʻinga ʻo e fāmilí ki ʻapi pe tuku ke nau kei feʻao fuoloa ai pē mo e mamahí? Ko e hā e meʻa ʻe maʻu he loto-mamahí?

Te tau lava he ngaahi momeniti pehení ʻo tafoki ki he palani lahi ʻo e fiefiá naʻe faʻu ʻe heʻetau Tamai Hēvaní. Naʻe hanga ʻe he palani ko iá, ʻi hono foaki mai kiate kitautolu he maama fakalaumālié, ʻo fakatupu haʻatau kalanga fiefia [vakai, Siope 38:7]. Ko hono ʻai mahinó, ko e moʻuí ni ko ha akoʻanga pē ia ki he hakeakiʻi taʻengatá pea ʻoku pau ke fou ia ʻi ha ngaahi sivi mo e ʻahiʻahi. Kuo hoko pehē maʻu pē ia pea ʻoku ʻikai hao ha taha mei ai. (“Ngaahi Lēsoni Makehé,” Liahona, Mē 2012, 80)

ʻI he taimi ʻoku tau fehangahangai ai mo e ngaahi faingataʻá, ko e hā e ʻuhinga ʻe ala tokoni ai ke tau manatuʻi naʻa tau fiefia ʻi he faingamālie ke aʻusia ʻa e moʻui ʻi he māmaní?

Sio nounou fakalaumālie

Hili hono aleaʻi ʻe he kau akó ʻa e laʻipepa tufá, fakakaukau ke mamata ʻi he “Tuku ke Lāngilangiʻia ʻa e ʻOtuá” mei he taimi 5:50 ki he 8:25. Fakaafeʻi e kau akó ke nau kumi ha ngaahi fakakaukau naʻe vahevahe ʻe Palesiteni Lāsolo M. Nalesoni fekauʻaki mo e vakai ki hotau ngaahi ʻahiʻahí ʻaki ha fakakaukau ʻoku taʻengatá.

18:51

Ko hono maʻu ʻo e ʻilo fakalaumālié

Kapau toe ha taimi ʻi he fakaʻosinga ʻo e kalasí, te ke lava ʻo fakaafeʻi e kau akó ke nau toe vakaiʻi e talanoa ʻo Siopé, ʻo kumi e ngaahi founga naʻá ne fakaʻaongaʻi ai e ngaahi tefitoʻi moʻoni ki hono maʻu ʻo e ʻilo fakalaumālié.

Vahevahe e kau akó ki ha kulupu ʻe tolu. Kole ki he kulupu takitaha ke nau lau ha tefitoʻi moʻoni kehe ʻo e Ko hono Maʻu ʻo e ʻIlo Fakalaumālié ʻi he Fakamatala ki he ʻElito ʻo e Fakataukei Fakatokāteliné (2023). ʻAi ke nau kumi ʻa e ngaahi meʻa ko ʻení:

Ngaahi foʻi lea pe kupuʻi lea ʻi hoʻo palakalafi ne vahe atú ʻokú ne fakamanatu atu ʻa Siope.
Founga naʻe fakaʻaongaʻi ai ʻe Siope ʻa e ngaahi tefitoʻi moʻoni ko iá lolotonga ʻene kātakiʻi hono ngaahi faingataʻaʻiá.