Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Siope 1–3; 12–13: “Te u Falala pē Kiate Ia”

“Siope 1–3; 12–13: ‘Te u Falala pē Kiate Ia,’” Fuakava Motuʻá – Tohi Lēsoni ʻa e Faiako Seminelí (2026)

“Siope 1–3; 12–13: ‘Te u Falala pē Kiate Ia,’” Fuakava Motuʻá – Tohi Lēsoni ʻa e Faiako Seminelí

Siope 1–3; 12–14; 19; 21–24; 38–40; 42: Lēsoni 97

Siope 1–3; 12–13

“Te u Falala pē Kiate Ia”

The Old Testament prophet Job depicted kneeling on the ground looking up to the light of the Lord. His friends are in the background of the painting. Job has one hand stretched toward the light. (Job 42:1-8)

Kuó ke fāifeinga nai ke tauhi faivelenga ki he ʻOtuá lolotonga e ngaahi taimi faingataʻá? Ko Siopé ko ha tangata angatonu ia naʻá ne maʻu ha moʻui mohu tāpuekina. Ne taʻeʻamanekina e mole e koloa, fānau, mo e moʻui lelei ʻa Siopé. Ka neongo ia, naʻe ʻikai mole ai e tui ʻa Siope kia Sīsū Kalaisí. ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke falala ki he Tamai Hēvaní mo Sīsū Kalaisi lolotonga e ngaahi ʻahiʻahí.

Teuteu ʻa e tokotaha akó: Fakaafeʻi e kau akó ke nau fakakaukau ki he founga kuo nau tali ʻaki honau ngaahi ʻahiʻahí. Kole ke nau omi mateuteu ki he kalasí ke aleaʻi ʻenau ngaahi aʻusiá.

Ngaahi ʻEkitivitī Ako ʻOku Ala Fakahokó

Kimuʻa pea kamata e lēsoni ʻo e ʻaho ní, ʻe ala tokoni ke talaange ki he kau akó ʻoku ʻiloa ʻa e ngaahi tohi hono hokó (Siope–Hiva ʻa Solomoné) ko e ngaahi tohi fakapunaké pe faʻu tohi potó. ʻOku hiki ʻa e ngaahi tohí ni ʻi ha founga fakapunake pea ʻoku ʻikai fakataumuʻa ia ke ne fakahā ʻa e hisitōliá. Hangē ko e ngaahi folofola kehé, ʻe lava ke tataki kitautolu ʻe he ʻū tohí ni kia Sīsū Kalaisi mo tokoni ke tau muimui kiate Ia. (Fakatokangaʻi ange: Naʻe fakamatalaʻi ʻe Siosefa Sāmita ʻa e Hiva ʻa Solomoné ko ha “ngaahi tohi naʻe ʻikai ueʻi fakalaumālie” [Joseph Smith Translation, note on Song of Solomon].)

Founga ʻetau tali ʻa e ngaahi ʻahiʻahí

Fakakaukau ke kamata e kalasí ʻaki hano hiki ʻi he palakipoé ʻa e “Tokotaha A” mo e “Tokotaha E.” Fakaafeʻi e kau akó ke nau faʻu ha tūkunga maʻá e tokotaha takitaha, ko e taha ʻokú ne fakamatalaʻi ha ʻahiʻahi taimi lōloa pea ko e taha ʻokú ne fakamatalaʻi ha ʻahiʻahi taimi nounou. ʻE ala tokoni ʻa e ngaahi fakakaukau ko ʻení.

Talu mei he kei siʻi ʻa Tokotaha A, naʻá ne fefaʻuhi mo e …
ʻOku fakaʻau ke toe kovi ange ʻa e ʻahó ni kia Tokotaha E. Naʻe kamatá ʻi he …

Hili hono faʻu ʻe he kau akó e ongo tūkungá, fakaafeʻi kinautolu ke aleaʻi e ngaahi fehuʻi ko ʻeni kia “Tokotaha A” mo “Tokotaha E.” Te nau lava ʻo fakahoko ʻeni ʻi ha ngaahi hoa pe fakakulupu iiki.

ʻE fēfē nai kapau naʻe ʻikai tali lelei ʻe he tokotahá ni ʻa e ‘ahiʻahi ko ʻení?
ʻE fēfē nai kapau naʻe tali lelei ʻe he tokotahá ni ʻa e ʻahiʻahi ko ʻení?
ʻE fēfē nai kapau naʻe tali ʻe he tokotahá ni ʻa e ʻahiʻahi ko ʻení ʻi he falala ki he Tamai Hēvaní?

Hili hono maʻu ʻe he kau akó ha taimi ke alēlea aí, tokoni ke nau fakakaukau ki he founga ʻoku nau tali ʻaki honau ngaahi ʻahiʻahí. Ko ha founga ʻeni ʻe taha te ke lava ʻo fakahoko ai ʻeni.

ʻI ha meʻafua ʻo e 1–5 (1 ʻoku ʻikai moʻoni ia kiate koe pea 5 ʻoku moʻoni ʻaupito kiate koe), fakakaukau ki he moʻoni ʻo e ngaahi fakamatala ko ʻení fekauʻaki mo koé:

ʻOku ou fehangahangai lelei mo e ngaahi ʻahiʻahí.
ʻOku ou maʻu ha mālohi mei he Tamai Hēvaní mo Sīsū Kalaisi lolotonga e ngaahi ʻahiʻahí.

Loto tauʻatāina ke ongoʻi pe ako ha ngaahi meʻa fekauʻaki mo e Tamai Hēvaní mo Sīsū Kalaisi ʻe lava ʻo tokoni atu ke ke fehangahangai mo ho ngaahi ʻahiʻahí ʻi ha falala lahi ange kiate kinaua.

Moʻui ʻa Siopé

Lau ʻa e Siope 1:1–3, ʻo kumi ʻa e meʻa ʻokú ke ako fekauʻaki mo Siopé. (Fakatokangaʻi ange: ʻoku liliu ʻa e foʻi lea haohaoá ki he “kātoi, kakato mo e angatonu.”)

Ko e hā ʻa e meʻa naʻá ke maʻú?

ʻE lava ke ke hiki e tali ʻa e kau akó ʻi he palakipoé. Kimuʻa pea hoko atu e talanoa ʻo Siopé, fakakaukau ke lau pe fakamatalaʻi fakanounou e ngaahi meʻá ni.

ʻOku mahuʻinga ke mahino ko Siopé ko ha tokotaha moʻoni ia (vakai, Tokāteline mo e Ngaahi Fuakava 121:10), ka ʻoku fakamatalaʻi e moʻui ʻa Siopé ʻo fakaʻaongaʻi ha faʻunga fakapunake. Hangē ko ʻení, ʻi he kamata e talanoa ʻo Siopé, ʻoku fakamatalaʻi ʻa e ʻEikí mo Sētane ko ha fepōtalanoaʻaki ʻe ua. ʻOku ʻikai ko ha ngaahi fepōtalanoaʻaki moʻoni ʻeni ʻi he vahaʻa ʻo e ʻEikí mo Sētane ka ʻokú ne fakatātaaʻi ʻa e fatongia ʻo Sētane ko hotau filí. ʻE lava ke hoko ia ko ha founga fakapunake ki hono teuteuʻi ʻo e tokotaha laukongá ki he ngaahi meʻa ʻe hoko mai ʻi he moʻui ʻa Siopé—ʻa hono ngaahi faingataʻaʻiá, ngaahi ʻahiʻahí, mo e mole ʻa e ngaahi koloa fakaemāmaní.

Ke tokoni ke mahino ki he kau akó ʻa e ʻuluaki fepōtalanoaʻakí, te ke lava ʻo kole ki ha kau ako ʻe toko tolu ke nau lau. ʻE lava ke lau ʻe ha tokotaha ʻa e ngaahi lea ʻa e tokotaha fakamatalá, tokotaha ke ne lau e folofola ʻa e ʻEikí, pea tokotaha hono tolú ke ne lau e ngaahi lea ʻa Sētané. Kole ki he kau akó ke nau lau e ngaahi foʻi leá ʻo ʻikai fakatātaaʻi kinautolu ʻi ha faʻahinga founga. Fakakaukau ke fakaʻaliʻali e ngaahi fehuʻi ko ʻení ke fakakaukau ki ai e kau akó lolotonga ʻenau fakafanongó.

Lau ʻa e Siope 1:6–12, ʻo kumi ha ngaahi tali ki he ongo fehuʻi ko ʻení:

Ko e hā e lau naʻe fai ʻe Sētane fekauʻaki mo e anga-māʻoniʻoni ʻa Siopé?
Ko e hā e meʻa naʻe fiemaʻu ʻe Sētane ke hoko kia Siopé?

Fakaʻatā e kau akó ke vahevahe ʻenau ngaahi talí. Kapau ʻe fiemaʻu, tokoni ke mahino ki he kau akó naʻe tala ʻe Sētane ko e māʻoniʻoni pē ʻa Siopé ko hono tāpuakiʻi ia ʻe he ʻEikí. Naʻe fiemaʻu ʻe Sētane ke toʻo e ngaahi tāpuaki ʻa Siopé ke fakamoʻoniʻi ʻaki ʻene tala ko iá.

Sīpinga ʻa Sēkopé

ʻI he konga hono hoko ʻo e talanoa ʻa Siopé, te ke lava ʻo faʻu ha saati hangē ko ʻení ʻi he palakipoé. Te ke lava leva ʻo vahevahe e kau akó ki ha ngaahi hoa pe kulupu iiki ke fakakakato ʻa e sātí. Kole ki he ngaahi kulupú ke aleaʻi e ngaahi fehuʻi ʻoku muimui maí. Mahalo ʻe tokoni ke luelue holo ke tokoni mo poupouʻi e kau akó. (Fakatokangaʻi ange: Ko e hangatāmakí ko ha pala ia he kilí ʻoku mātuʻaki mamahi ʻaupito. Naʻe “haehae” ʻe Siope hono valá pea tele hono ʻulú ko ha fakaʻilonga ʻo ʻene mamahí.)

Ko e hā e meʻa naʻe faingataʻaʻia ai ʻa Siopé?	Naʻe tali fēfē ia ʻe Siopé?
Ko e hā e meʻa naʻe faingataʻaʻia ai ʻa Siopé? Lau ʻa e Siope 1:13–19; 2:7.	Naʻe tali fēfē ia ʻe Siopé? Lau ʻa e Siope 1:20–22; 2:9–10; 13:15; 23:10.

Ko e hā e meʻa ʻoku makehe kiate koe ʻi he tali ʻa Siopé?
Ko e hā e meʻa naʻe mahino kia Siope fekauʻaki mo e ʻOtuá ke ne fakahoko ai ha tali ʻi he founga naʻá ne fakahokó?

ʻE lava ke fakamahinoʻi ʻe he kau akó naʻe fakahā ʻe Siope naʻe haʻu hono ngaahi tāpuakí mei he ʻOtuá (vakai, Siope 1:21), mahino ko e ngaahi faingataʻá ko ha konga ia ʻo e palani ʻa e ʻOtuá (vakai, Siope 2:10), pea mo ʻilo naʻe ʻafioʻi ia ʻe he ʻOtuá pea ʻe fakaleleiʻi ia ʻe hono ngaahi faingataʻaʻiá (vakai, Siope 23:10).

Hili hono fakakakato ʻe he kau akó ʻa e ʻekitivitií, tokoni ke nau ʻiloʻi ha foʻi moʻoni ʻaki hano fai ange ha fehuʻi hangē ko ʻení.
Ko e hā ha meʻa te tau lava ʻo ako mei he sīpinga ʻa Siopé ʻe lava ʻo tokoni kiate kitautolu lolotonga hotau ngaahi ʻahiʻahí?

Makehe mei he ngaahi tali kehé, ʻe lava ke ʻiloʻi ʻe he kau akó ha meʻa hangē ko ʻení: te tau lava ʻo fili ke falala ki he ʻOtuá lolotonga hotau ngaahi ʻahiʻahí.

Fakakaukau ke fakaafeʻi e kau akó ke kumi mo fakaʻilongaʻi e feituʻu ʻoku nau vakai ai ki he foʻi moʻoni ko ʻení ʻi he Siope 13:15.

Ngaahi sīpinga ʻi he folofolá

Fakakaukau ki ha ngaahi founga te ke lava ai ʻo tokoniʻi e kau akó ke fakatupulaki ʻenau falala ki he Tamai Hēvaní lolotonga honau ngaahi ʻahiʻahí. Ko e founga ʻe taha ko hono ʻai ke kumi ʻe he kau akó ha ngaahi potufolofola ʻa ia naʻe fakamatalaʻi ai ʻe he kakaí ʻenau ngaahi ʻuhinga ki he falala ki he ʻOtuá lolotonga ha ʻahiʻahí. ʻE lava ke fakahoko ʻe he kau akó ʻa e ʻekitivitī ko ʻení.

Kumi ha sīpinga ʻi he folofolá ʻa ia naʻe fili ai ha taha ke falala ki he ʻOtuá lolotonga hono ngaahi ʻahiʻahiʻí.
Fakaʻilongaʻi ha ngaahi foʻi lea pe kupuʻi lea ʻokú ne fakamatalaʻi ʻa e ʻuhinga naʻe falala ai ʻa e tokotahá ni ki he ʻOtuá.
Teuteu ke fakamatalaʻi ʻa e founga kuo tokoni pe ʻe lava ke tokoniʻi ai koe ʻe he ngaahi fakakaukau naʻá ke fakaʻilongaʻí ke ke falala ki he ʻOtuá.

Fakaʻosí

Te ke lava ʻo fakaʻosi e kalasí ʻaki hano fakaafeʻi e kau akó ke nau faitohi pē kiate kinautolu pe ‘ave ha pōpoaki telefoni kiate kinautolu pē ʻo tali ʻa e fehuʻi ko ʻení. Kapau te nau fai ha kiʻi tohi, fakaafeʻi kinautolu ke pelupelu ia ʻo faʻo ʻi honau kató pe ʻi ha feituʻu te nau sio ki ai ʻamui ange ʻi he ʻaho ko iá. Te ke lava ʻo tā ha fasi leʻosiʻi ʻi he taimi ʻoku tohi ai ʻa e kau akó.

Ko e hā ha meʻa naʻá ke ongoʻi he ʻahó ni kuó ne tokoniʻi koe ke ke fie falala ki he Tamai Hēvaní mo Sīsū Kalaisi lolotonga e ngaahi ʻahiʻahí?

Ngaahi Maʻuʻanga Tokoni Kehé

ʻE tokoniʻi fēfē kitautolu ʻe he Fakamoʻuí lolotonga e ngaahi faingataʻá?

Naʻe tohi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

ʻOku finangalo ʻa Sīsū Kalaisi ke fakafoki mai ʻa e meʻa he ʻikai ke tau lava ʻo fakafoki maí, fakamoʻui e ngaahi kafo he ʻikai ke tau lava ʻo fakamoʻuí, fakaleleiʻi e meʻa ʻoku maumauʻi taʻe toe lava ʻo fakaleleiʻí, pea totongi huhuʻi ha faʻahinga taʻetotonu kuo tau kātekina. Ko hono moʻoní, kapau te tau fakaʻatā Ia, te Ne fakatapui ʻetau faingataʻaʻiá ki heʻetau leleí pea fakamāʻoniʻoniʻi maʻatautolu ʻetau faingataʻaʻia lahi tahá. He ʻikai ngata pē ʻi Heʻene fakafiemālieʻi mo fakafoki mai ʻa e meʻa naʻe molé (vakai, Siope 42:10, 12–13), ka te Ne fakaʻaongaʻi hotau ngaahi ʻahiʻahí ke ʻaonga kiate kitautolu.

ʻOku maʻu ʻe he Fakamoʻuí ʻa e mālohi ke fakaleleiʻi ʻa e meʻa kotoa pē pea ʻokú Ne fakaʻānaua ke fakahoko ia. ʻOkú Ne finangalo ke fakaleleiʻi fakaʻaufuli e ngaahi loto kuo maumaú (vakai, Saame 147:3). Ko e lēsoni taupotu taha ʻo e tohi ʻa Siopé ko e lava ke tau takitaha fili ke moʻui ʻo falala ki he ʻOtuá mo ʻEne palaní, ʻo tatau ai pē pe ko e hā. (“Trust God and Let Him Prevail,” Liahona, Aug. 2022, 7)

ʻE lava fēfē ke hoko e ngaahi ʻahiʻahí ko ha tāpuakí?

Naʻe pehē ʻe ʻEletā ʻAisake K. Molisoni ʻo e Kau Fitungofulú:

10:53

ʻOku tau maʻu ha ngaahi talanoa fakafolofola ʻo ha kau taki maʻongoʻonga mo fakaʻeiʻeiki, hangē ko Selemaia, Siope, Siosefa Sāmita pea mo Nīfai, ʻa ia ne ʻikai te nau hao mei he ngaahi faingataʻa mo e ngaahi pole ʻo e moʻui fakamatelié. Ko ha kau tangata pē kinautolu ne nau ako ke talangofua ki he ʻEikí ʻo aʻu ki he ngaahi tūkunga fakamamahí. …

ʻI heʻeku fakakaukau ki heʻeku ngaahi aʻusiá, ʻoku ou ʻiloʻi kuó u ako ha konga ʻo ʻeku ngaahi lēsoni mahuʻinga tahá lolotonga e ngaahi taimi faingataʻa taha ʻi heʻeku moʻuí, ʻa e ngaahi taimi ne u mavahe ai mei he fakafiefiemālié. Kuo teuteuʻi au ki hoku kahaʻú ʻe he ngaahi faingataʻa ne u foua ko ha toʻu tupú, ngaahi faingataʻa lolotonga ʻeku ako fekauʻaki mo e Siasí ʻi he seminelí, ʻi heʻeku hoko ko ha papi ului foʻoú, pea ʻi heʻeku hoko ko ha faifekau taimi kakató pea mo e ngaahi pole ne u fepaki mo ia ʻi heʻeku akó, ʻi heʻeku feinga ke fua hoku ngaahi fatongiá pea ʻi hono ohi hake ha fāmilí. Ko e lahi ange ʻeku tali fiefia e ngaahi tūkunga faingataʻá ʻi he tui ki he ʻEikí, ko e tupulaki ange ia hoku tuʻunga fakaākongá.

ʻOku ʻikai totonu ke foʻou kiate kitautolu e ngaahi faingataʻa ʻi heʻetau moʻuí ʻi he taimi ʻoku tau hū ai ki he hala fāsiʻi mo lausiʻí. Naʻe ako ʻe Sīsū Kalaisi ʻa e “talangofuá [ʻi] he ngaahi meʻa naʻá ne kātakiʻí.” ʻI heʻetau muimui ʻiate Iá, tautefito ki hotau ngaahi taimi faingataʻá, te tau lava ʻo tupulaki pea hoko ʻo hangē ko Iá. (“ʻOku Tau Lava ʻo Fakahoko Ha Ngaahi Meʻa Faingataʻa ʻo fakafou ʻIate Ia,” Liahona, Nōvema 2022, 116)

ʻOku tokoniʻi fēfē nai kitautolu ʻe he Fakamoʻuí ke kātekina hotau ngaahi faingataʻaʻiá?

Naʻe pehē ʻe ʻEletā Sione A. Makiune ʻo e Kau Fitungofulú:

9:10

ʻI heʻetau hoko ko e kau muimui ʻo Kalaisí, he ʻikai ke tau hao mei he ngaahi polé mo e ngaahi faingataʻá ʻi heʻetau moʻuí. ʻOku faʻa fiemaʻu ke tau fakahoko ha ngaahi meʻa ʻoku faingataʻa, ʻo kapau te tau feinga ke tau fakahoko toko taha ia, ʻe lava ke lōmekina kitautolu pea mahalo ʻe ʻikai malava. ʻI heʻetau tali ʻa e fakaafe ʻa e Fakamoʻuí ke “haʻu kiate aú,” [Mātiu 11:28], te Ne ʻomi ʻa e poupou, fakafiemālie, mo e nonga ʻoku fiemaʻú. … Naʻa mo e taimi te tau aʻusia ai ʻa e ngaahi meʻa faingataʻa tahá, te tau lava ʻo ongoʻi ʻa e māfana ʻo ʻEne ʻofá ʻi he taimi ʻoku tau falala ai kiate Ia mo tali Hono finangaló. Te tau lava ʻo aʻusia ʻa e fiefia ʻoku fakatatali maʻa ʻEne kau ākonga faivelengá, he “ko Kalaisi ʻa e fiefiá” [Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 82]. (“Haʻu kia Kalaisi—Moʻui ko ha Kau Māʻoniʻoni ʻi he Ngaahi ʻAho Kimui Ní,” Liahona, Mē 2020, 36)

Ngaahi ʻEkitivitī Fakalahi ki he Akó

Loto-mamahí mo e mamahí

ʻE ala ʻaonga ki he kau akó ha alēlea fekauʻaki mo e fefaʻuhi mo e loto-mamahí mo e mamahí. Kapau ko ia, fakaafeʻi kinautolu ke lau ʻa e Siope 3:23–25, ʻo kumi e ongo naʻe maʻu ʻe Siope hili e mole hono fāmilí, koloá, mo e moʻui leleí. ʻE ala tokoni ʻa e ngaahi fehuʻi ko ʻení ke fakahoungaʻi ʻe he kau akó ʻa e ngaahi lea ʻa Siopé:

Te ke fakamatalaʻi fēfē ʻa e ngaahi ongo ʻa Siope fekauʻaki mo hono ngaahi ʻahiʻahí?
Ko e hā nai ʻa e faikehekehe ʻi he ongoʻi mamahí mo e ongoʻi siva e ʻamanakí?
Te tau lava fēfē ʻo fakaafeʻi ʻa e Tamai Hēvaní mo Sīsū Kalaisi ke tokoniʻi kitautolu ke tau ngāueʻi ʻa e ngaahi ongo peheé?

Ko hono fakafiemālieʻi ʻa kinautolu ʻoku fiemaʻu ha fakafiemālié

ʻE ala tokoni ki he kau akó ke nau fakakaukau ki hono fakafiemālieʻi ʻo Siope ʻe hono ngaahi kaungāmeʻá. Neongo naʻe faifai pea nau tukuakiʻi ʻa Siope ki he faiangahalá, ka naʻe fuofua haʻu hono ngaahi kaungāmeʻá ke tangi fakataha mo Siope pea fakafiemālieʻi ia. ʻE lava ke lau ʻe he kau akó ʻa e Siope 2:11–13, ʻo kumi e meʻa ʻoku ongo kiate kinautolu fekauʻaki mo e ngaahi kaungāmeʻa ʻo Siopé. ʻE lava ke fakafekauʻaki ʻe he kau akó e ngaahi veesi ko ʻení mo e Mōsaia 18:8–10, ʻo kumi ha faleʻi faitatau ʻoku ʻomi ʻi he Tohi ʻa Molomoná.

Ko e fē ha taimi kuo tāpuekina ai koe ʻe ha feinga ʻa ha taha ke fakafiemālieʻi pe kaungā-tengihia mo koé?

Fakakaukau ke fakaafeʻi e kau akó ke nau fakakaukau ki ha taha te ne ala fiemaʻu ʻenau tokangá. Fekau ke nau hiki e hingoa ʻo e tokotahá ni. Hili iá ʻe lava ke hiki ʻe he kau akó ha meʻa te nau lava ʻo fai ke tokoniʻi pe fakafiemālieʻi ʻa e tokotahá ni.

Ngaahi lēsoni naʻe ako ʻe Siope ʻi heʻene faingataʻaʻiá

Tokoni ke mahino ki he kau akó, lolotonga e faingataʻaʻia ʻa Siopé, naʻe faifai pea fokotuʻu ange ʻe hono ngaahi kaungāmeʻá pau pē ʻoku tauteaʻi ʻe he ʻOtuá ʻa Siope koeʻuhí ko e angahalá. ʻI he fefaʻuhi ʻa Siope mo e tukuakiʻi ko ʻení mo ʻene ngaahi fakakaukaú, naʻá ne fakahaaʻi ʻa e meʻa naʻá ne ʻilo fekauʻaki mo e ʻOtuá.

Lau ʻa e Siope 12:9–13, 16; 13:15–16 pea fakaʻilongaʻi ʻa e meʻa naʻe ongoʻi mo ako ʻe Siope fekauʻaki mo e ʻOtuá.

Ko e hā e meʻa naʻá ke fakaʻilongaʻí? Ko e hā e ʻuhinga ʻoku ngali mahuʻinga ai iá?
Te ke fakamatalaʻi fakanounou fēfē e ngaahi ongo ʻa Siopé ʻi he taimi ko ʻení?

Ko hono ikunaʻi ʻo e ngaahi fakafeʻātungiá

Hili hono maʻu ʻe he kau akó ha ngaahi potufolofola ʻa ia naʻe falala ai ʻa e kakaí ki he ʻEikí, ʻe lava ke mou sio ʻi he “Crossing the Finish Line: A Story of Overcoming Obstacles” (11:53). Fakaafeʻi e kau akó ke kumi e meʻa naʻe ʻilo ʻe Tāleni naʻe tokoni kiate ia ke falala kia Sīsū Kalaisi lolotonga ʻene ngaahi polé.

11:52