Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Siope 14; 19: “ʻOku Ou ʻIlo ʻOku Moʻui ʻa Hoku Huhuʻí”

“Siope 14; 19: ‘ʻOku Ou ʻIlo ʻOku Moʻui ʻa Hoku Huhuʻí,’” Fuakava Motuʻá – Tohi Lēsoni ʻa e Faiako Seminelí (2026)

“Siope 14; 19: ‘ʻOku Ou ʻIlo ʻOku Moʻui ʻa Hoku Huhuʻí,’” Fuakava Motuʻá – Tohi Lēsoni ʻa e Faiako Seminelí

Siope 1–3; 12–14; 19; 21–24; 38–40; 42: Lēsoni 98

Siope 14; 19

“ʻOku Ou ʻIlo ʻOku Moʻui ʻa Hoku Huhuʻí”

The resurrected Jesus Christ (dressed in white robes) standing at the entrance to the Garden Tomb. Christ is portrayed looking toward the heavens.

ʻE ala faingataʻa ke maʻu ha ʻamanaki lelei lolotonga e ngaahi faingataʻá, kau ai e pekia ʻa e niʻihi ʻoku tau ʻofa aí. Naʻe fekauʻi mai ʻe he Tamai Hēvaní ʻa Hono ʻAló ke fakahoko ʻa e Fakaleleí, ʻa ia naʻe fakaʻosi ʻaki e Toetuʻu ʻa e Fakamoʻuí mei he fonualotó. Koeʻuhí ko e Toetuʻu ʻa Sīsū Kalaisí, te tau lava ʻo maʻu ha ʻamanaki lelei. ʻE lava ke tokoni ʻa e lēsoni ko ʻení ke mahino ki he kau akó ʻa e ʻamanaki lelei ʻoku maʻu ʻi he Toetuʻu ʻa Sīsū Kalaisí.

Teuteu ʻa e tokotaha akó: Fakaafeʻi e kau akó ke nau fanongo pe lau e fakalea ʻo e himi “ʻOku Moʻui Hoku Huhuʻí.” Te nau lava ʻo fili ha kupuʻi lea manako mei he himí te ne lava ʻo ʻomi ha ʻamanaki lelei ki ha taha ʻokú ne foua ha ngaahi faingataʻa.

Ngaahi ʻEkitivitī Ako ʻOku Ala Fakahokó

Ko e meʻa maʻongoʻonga taha naʻe hoko ʻi he hisitōliá

Fakaʻaliʻali e fehuʻi ko ʻení pea fakaafeʻi e kau akó ke aleaʻi ia ʻi ha ngaahi kulupu iiki.

Ko e hā ha ngaahi meʻa ne hoko ʻe ala pehē ʻe he kakaí ʻoku mahuʻinga taha ʻi he hisitōlia ʻo e tangatá? Ko e hā hono ʻuhingá?

Naʻe vahevahe ʻe Palesiteni ʻEselā Tafu Penisoni (1899–1994) ʻa e meʻá ni:

Ko e ngaahi meʻa maʻongoʻonga taha kuo hoko he hisitōliá, ʻa ē ʻokú ne faitokonia e tokolahi taha ʻo e kakaí ʻi he ngaahi vahaʻataimi lōloa tahá. ʻI he tuʻunga ko ʻení, kuo ʻikai mo ha toe meʻa kuo hoko ʻe toe mahuʻinga ange ki he fakafoʻituituí pe ngaahi puleʻangá ʻi he toetuʻu ʻa e ʻEikí. (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 111)

Fakaʻaongaʻi ha kiʻi taimi ke fakalaulauloto ai ki he meʻa ʻokú ke ʻilo fekauʻaki mo e Toetuʻu ʻa e Fakamoʻuí mo e ʻuhinga ʻoku mahuʻinga ai kiate koé. Mahalo te ke fakakaukau foki ki he ʻuhinga ʻe lava ke lau ai e Toetuʻu ʻa e Fakamoʻuí ko e meʻa mahuʻinga taha ia ne hoko ʻi he hisitōliá.

Poupouʻi e kau akó ke fakaafeʻi ʻa e Laumālie Māʻoniʻoní ke tokoni ke mahino lelei ange kiate kinautolu ʻa e Toetuʻu ʻa Sīsū Kalaisí pea mo e ʻamanaki lelei te ne lava ʻo ʻomí.

Ngaahi fehuʻi ʻa Siopé

Kapau naʻá ke akoʻi ʻa e Lēsoni 97: “Siope 1–3; 12–13,” ʻe lava ke vahevahe ʻe he kau akó ʻa e meʻa ʻoku nau manatuʻi fekauʻaki mo e ngaahi ʻahiʻahi ʻo Siopé. Pe ko ʻenau lau ʻa e palakalafi ko ʻení.

Ko Siopé ko ha tangata angatonu ia naʻá ne foua ha ngaahi faingataʻa lahi. Naʻe mole kotoa ʻene koloá, mate kotoa ʻene fānau ʻe toko 10 ʻi he holofa ha fale ʻiate kinautolu, pea naʻá ne tofanga ʻi ha mamahi fakaesino fakalilifu.

Ko e hā ha ngaahi fehuʻi naʻá ke mei maʻu kapau ko Siope koe?

Lau ʻa e Siope 14:7–14, ʻo fakaʻilongaʻi ʻa e ongo fehuʻi naʻe maʻu ʻe Siope ʻi heʻene fekumi ki ha ʻamanaki lelei ʻi hono ngaahi faingataʻaʻiá.

Kapau ʻoku fiemaʻu tokoni ʻa e kau akó ke mahino ʻa e fehuʻi ʻa Siope ʻi he veesi 10, te ke lava ʻo fakamatalaʻi ange ʻoku fehuʻi ʻe Siope, “Te tau ʻalú ki fē ʻi he taimi te tau mate aí?”

Ko e fē ha taimi kuó ke fanongo pe fai ai ha ngaahi fehuʻi tatau?

Naʻe fakapoongi ʻa ʻAfa Peitoni, ko e taha ʻo e ngaahi kaungāmeʻa ʻo Palesiteni Tōmasi S. Monisoni (1927–2018) ʻi heʻene kei siʻí, ʻi he Tau Lahi ʻa Māmani Hono II. Naʻe vahevahe ʻe Palesiteni Monisoni ʻene aʻusia ʻi heʻene ʻaʻahi ki he ʻapi ʻo ʻAfá hili ʻene ongona e ongoongó:

Ne u lotu loto pē ʻi heʻeku fakaofi atu ki he kiʻi hala he ʻapi ʻo Peitoní, mo u fifili loto pē pe ko e hā e faʻahinga lea fakafiemālie ʻe lava ke lea ʻaki ʻe ha kiʻi tamasiʻi kei talavou.

Ne fakaava mai ʻa e matapaá, pea naʻe fāʻofua mai ʻa Mīsisi Peitoni kiate au ʻo hangē haʻane fāʻofua ki hono fohá. …

[Hili ʻema lotu fakatahá], naʻe sio fakamamaʻu ʻa Mīsisi Peitoni ki hoku matá mo ne pehē mai: “ʻE Tomi, ʻoku ʻikai ke u kau ki ha siasi ʻo hangē ko koé. Talamai angé, ʻe toe moʻui nai ʻa ʻAfa?” (“Mrs. Patton—The Story Continues,” Liahona, Nōvema 2007, 22)

Fakakaukauloto naʻá ke ʻi he tūkunga ʻo Palesiteni Monisoní. Hiki ʻi hoʻo tohinoa akó ha kiʻi palakalafi nounou ke tali ʻaki e fehuʻi ʻa Mīsisi Peitoní.

Poupouʻi e kau akó ke tānaki atu ki he meʻa kuo nau tohí ʻi he hokohoko atu ʻenau ako fekauʻaki mo e Toetuʻu ʻa Sīsū Kalaisí.

“ʻOku ou ʻilo ʻoku moʻui ʻa hoku Huhuʻí”

Lau ʻa e Siope 19:23–27, ʻo kumi e tali naʻe fai ʻe Siope ki heʻene ngaahi fehuʻí.

Ko e hā e meʻa naʻe ʻilo ʻe Siope ʻoku moʻoní?

Mahalo ʻe vahevahe ʻe he kau akó ha meʻa hangē ko e koeʻuhí ko Sīsū Kalaisí, te tau toetuʻu pea toe mamata ki he ʻOtuá.
Ko e hā e meʻa ʻe lava ke akoʻi mai ʻe he veesi 23–24 fekauʻaki mo e ongo naʻe maʻu ʻe Siope fekauʻaki mo e moʻoni ko ʻení?
Naʻe mei tākiekina fēfē nai ʻe he ʻilo ko ʻeni fekauʻaki mo Sīsū Kalaisí ʻa Siope ʻi heʻene kātekina hono ngaahi faingataʻaʻiá?
ʻE tokoniʻi fēfē kitautolu ʻe he ʻilo ko ʻení?

ʻE lava ke lau ʻe he kau akó ʻa e fakamatala ko ʻení ʻiate kinautolu pē pea vahevahe ʻa e meʻa ʻoku makehe kiate kinautolu mei aí.

Naʻe vahevahe ʻe Palesiteni Tāleni H. ʻOakesi ʻo e Kau Palesitenisī ʻUluakí ha niʻihi ʻo e ngaahi founga ʻe lava ke ʻomi ai ʻe heʻetau ʻilo ki he Toetuʻu ʻa Sīsū Kalaisí ha ʻamanaki leleí:

Ko e toetuʻu mei he maté ko ha fakamahino fakataautaha ia ʻo ʻetau tuí. ʻOkú ne tānaki mai ha mahino ki heʻetau tokāteliné, ha fakaivia ki hotau ʻulungāngá, mo ha ʻamanaki lelei ki hotau kahaʻú. …

ʻOku ʻomi ʻe he toetuʻú ʻa e fakakaukau mo e ivi ke kātekina ʻa e ngaahi faingataʻa fakamatelie ʻoku fepaki mo kitautolu takitaha pea mo kinautolu ʻoku tau ʻofa aí. ʻOkú ne ʻomi ha founga foʻou ke vakai ʻaki ki he ngaahi tōnounou fakatuʻasino, fakaeʻatamai, pe fakaeloto ʻoku tau maʻu ʻi hotau fanauʻí pe maʻu ʻi he lolotonga ʻo e moʻui fakamatelié. ʻOkú ne ʻomi ha ivi ke tau kātekina ʻa e mamahí, ngaahi tōnounoú, mo e ngaahi loto-taʻefiemālié. Koeʻuhí kuo pau ke tau takitaha toetuʻu, ʻoku tau ʻilo leva ko e ngaahi tōnounou mo e ngaahi fakafepaki fakamatelié ni ʻoku fuonounou pē. (“Ko e Hā Kuo Fai ʻe Hotau Fakamoʻuí Maʻatautolú?,” Liahona, Mē 2021, 75)

Ko e fē ha taimi kuó ke mamata ai ki ha taha ʻokú ne maʻu ha ʻamanaki lelei ʻo fakafou ʻi heʻene tui kia Sīsū Kalaisi mo ʻEne Toetuʻú?

Ko e Mahino Kau ki he Toetuʻú

Kimuʻa pea fakaʻaliʻali e ngaahi fakahinohino ko ʻení, ʻe lava ke mou aleaʻi ʻa e founga te tau lava ai ʻo fakamālohia ʻa e ngaahi lea ʻoku tau lea ʻaki pe tohí ʻaki hano fakafehokotaki kinautolu mo e ngaahi folofola ʻa e Fakamoʻuí mo e lea ʻEne kau palōfitá. Ko e founga ʻe taha ʻe lava ke tau fai ai ʻení ko hono lea ʻaki e ngaahi kupuʻi lea mei he folofolá.

Fai ʻa e ngaahi meʻá ni ki he palakalafi naʻá ke tohi ko e tali ki he fehuʻi ʻa Mīsisi Peitoní:

Tānaki atu ha sētesi ʻe taha pe ua ʻo fakaʻaongaʻi ha meʻa naʻá ke ako pe ongoʻi he ʻahó ni fekauʻaki mo Sīsū Kalaisi pea mo e ʻamanaki lelei ʻe lava ke tau maʻu koeʻuhí ko ʻEne Toetuʻú. Fakakau ha kupuʻi lea mei he Siope 19:25–27.
Tānaki atu ha sētesi ʻe taha pe ua ʻo fakaʻaongaʻi ha ngaahi foʻi lea pe kupuʻi lea mei ha ngaahi potufolofola pe fakamatala kehe mei he kau taki ʻo e Siasí. Ke fai ʻení, te ke lava ʻo kumi ʻa e “Toetuʻú” ʻi he Gospel Library, Fakahinohino ki he Ngaahi Folofolá, pe Ngaahi Tefitó mo e Ngaahi Fehuʻí. Te ke lava foki ʻo vakaiʻi ʻa e peesi 48, 55–56, mo e 58 ʻo e Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí (2023).

Ngaahi Maʻuʻanga Tokoni Kehé

Ko e hā e meʻa ʻoku akoʻi mai ʻe he Toetuʻu ʻa Sīsū Kalaisí kiate kitautolú?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

13:21

ʻOku fakamoʻoniʻi ʻe he Toetuʻu ʻa Sīsū Kalaisí ʻa Hono tuʻunga fakalangí pea kuó Ne ikunaʻi ʻa e meʻa kotoa pē. ʻOku fakamoʻoniʻi ʻe Heʻene Toetuʻú, te tau lava foki ʻo ikunaʻi ʻa e meʻa kotoa pē pea hoko ʻo taha, ʻi hono haʻi kitautolu kiate Ia ʻi he fuakavá. ʻOku fakamoʻoniʻi ʻe Heʻene Toetuʻú ʻoku moʻoni ʻa e moʻui taʻe-faʻa-maté mo e moʻui taʻengatá ʻo fakafou ʻiate Ia. (“Taha ʻia Kalaisi,” Liahona, Mē 2023, 79–80)

ʻOku hoko fēfē ʻa e ngaahi temipalé ko ha fakamoʻoni ʻo ʻetau tui ki he Toetuʻú?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

18:29

ʻOku hoko hotau ngaahi temipalé ko ha ngaahi fakamoʻoni moʻui mo ngāue ki heʻetau tui ki he moʻoni ʻo e toetuʻú. ʻOku nau ʻomi ha ngaahi feituʻu toputapu ʻe lava ke fakahoko ai ʻe he kau fakafofonga moʻuí ʻa e ngaahi ouau kotoa pē ʻoku fiemaʻu ʻi he moʻui fakamatelié maʻanautolu ʻoku nofo ʻi he maama tataliʻanga ʻo e ngaahi laumālié. He ʻikai mahuʻinga ha taha ʻo e ngaahi meʻá ni kapau naʻe ʻikai ke tau maʻu ʻa e fakapapau ʻo e moʻui taʻe-faʻa-mate fakamāmani lahí mo e faingamālie ki he moʻui taʻengatá koeʻuhí ko e Toetuʻu ʻa hotau ʻEiki mo e Fakamoʻui ko Sīsū Kalaisí. (“Resurrection,” Ensign, Mē 2000, 16)

ʻE ʻomi fēfē ʻe he Toetuʻú ha ʻamanaki lelei ki he kakai ʻoku mahamahaki mo faingataʻaʻia fakaesinó?

Naʻe fakamoʻoni ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:11

ʻOku ou fakamoʻoni ki he Toetuʻu māʻoniʻoni naʻe fakahokó, ʻa e meʻafoaki ʻo e makatuliki taʻe-mafakamatalaʻi ko ia ko e Fakalelei ʻa e ʻEiki ko Sīsū Kalaisí! … ʻOku ou fakamoʻoni ʻe ʻi ai e ʻaho ʻe tuʻu ai ʻa hotau ngaahi ʻofaʻanga ne tau ʻiloʻi ne faingataʻaʻia fakaesino ʻi he matelié, ʻi hotau ʻaó kuo nāunauʻia mo fakaʻeiʻeiki ʻi he sino mo e ʻatamai haohaoa. Ko ha momeniti fakafiefia moʻoni ia! ʻOku ʻikai ke u ʻiloʻi pe te tau fiefiá koeʻuhí ko ʻetau mātā tonu ha meʻa peheé, pe ko ʻetau fiefiá koeʻuhí te nau haohaoa kakato pea “faifaiangé kuo nau tauʻatāina.” (“Hangē ha Ipu Kuo Maumaú,” Liahona, Nōvema 2013, 42)

Ngaahi ʻEkitivitī Fakalahi ki he Akó

Siope 14:10. “Ko fē ia?”

Mahalo ʻe ʻi ai ha ngaahi fehuʻi ʻa e kau akó fekauʻaki mo e meʻa ʻoku hoko ʻi he vahaʻa ʻo e maté mo e toetuʻú. Ke tokoni ke nau akó, te ke lava ʻo hiki ʻa e ngaahi fehuʻi mo e ngaahi fakamoʻoni fakafolofola ko ʻení ʻi he palakipoé. Te ke lava ʻo fakakulupu ʻa e kau akó, ʻo vahe ki he kulupu takitaha ha fehuʻi ke nau ako. Hili iá, ʻe lava ke vahevahe ʻe he ngaahi kulupú ʻa e meʻa ne nau akó mo e kalasí.

Ko e hā e meʻa ʻe hoko kiate kitautolu hili ʻetau maté? (Luke 23:43; ʻAlamā 40:11)
ʻOku fōtunga fēfē nai hotau laumālié? (ʻAlamā 34:34; ʻEta 3:16)
ʻOku fēfē ʻa e maama tataliʻanga ʻo e ngaahi laumālié? (1 Pita 3:18–20; ʻAlamā 40:12; Tokāteline mo e Ngaahi Fuakava 138:50)

Kapau ʻoku ʻi ai ha ngaahi fehuʻi lahi ange ʻa e kau akó fekauʻaki mo e maama tataliʻanga ʻo e ngaahi laumālié, te nau lava ʻo vakai ki he ngaahi konga ʻo e lea “Falala ki he ʻEikí” naʻe fai ʻe Palesiteni Tāleni H. ʻOakesi.

Pe ko hoʻo huluʻi ʻa e “What Happens after We Die?” (1:40). Fakaafeʻi e kau akó ke vahevahe ʻa e meʻa ʻoku nau ako ʻokú ne tali e fehuʻi ʻa Siopé.

1:41

Vai Moʻuí

Ke vakai ki he tefitoʻi fatongia ʻo Sīsū Kalaisi ʻi heʻetau toetuʻú, ʻe lava ke lau ʻe he kau akó ʻa e Siope 14:1–2, 7–10, ʻo kumi e founga ʻoku fakafehoanaki ai ʻe Siope ʻa e kakaí ki he ʻakaú.

ʻOku akoʻi ʻe Siope ʻa e meʻa ʻokú ne fakafoki mai ʻa e ʻakaú ke moʻuí (veesi 9). Fakamatalaʻi ange ko e huafa ʻe taha ʻo Sīsū Kalaisí ko e Vai Moʻuí ( vakai, Sione 4). Hili iá, ʻe lava ke lau ʻe he kau akó ʻa e Sione 11:25 pea fakafehokotaki pe fakafekauʻaki ia ki he fehuʻi ʻa Siope ʻi he Siope 14:14.

“ʻOku ʻIkai ha Mālohi ʻo e Faʻitoká”

Ke tokoni ke tali ʻe he kau akó ʻa e ngaahi fehuʻi ʻa Siope ʻi he Siope 14:10, 14, te ke lava ʻo huluʻi ʻa e “ʻOku ʻIkai ha Mālohi ʻo e Faʻitoká” mei he taimi 4:21 ki he 4:49. ʻE lava ke aleaʻi ʻe he kau akó ʻa e founga te nau ala tali ʻaki e ngaahi fehuʻi ʻa Sisitā ʻApetó.

9:19

Hili iá, te ke lava ʻo mamata ʻi he founga naʻe ʻomi ai ʻe he tokāteline ʻo e Toetuʻú ʻa e ʻamanaki lelei ʻa Sisitā ʻApetó mo tali ʻene ngaahi fehuʻí. Mamata ʻi he vitiō tatau mei he taimi 4:49 ki he 6:51.

9:19

Pe ko hoʻo huluʻi ʻa e “Reyna Aburto’s Story—Part 1: Heartbreak and Hope” (9:12). Te ke lava ʻo taʻofi fakataimi e vitioó ʻi he 5:38 ke aleaʻi ʻene ngaahi fehuʻí. Hili iá, te ke lava ʻo mamata ʻi he toenga ʻo e vitioó ke ʻiloʻi ʻa e founga naʻe ʻomi ai ʻe he Toetuʻú ʻa e ʻamanaki lelei ʻa Sisitā ʻApetó.

9:12

Koeʻuhí ʻoku moʻui ʻa Sīsū Kalaisi, te tau toe moʻui kotoa pē

Fakakaukau ke sio ʻi he “He Lives Again and So Will You” (2:28) ke fakaʻosi e kalasí. ʻI he mamata ʻa e kau akó, te nau lava ʻo fakakaukau ki he meʻa kuo nau ako fekauʻaki mo e Toetuʻu ʻa Sīsū Kalaisí. Hili iá, te nau lava ʻo vahevahe ha ngaahi fakakaukau lahi ange ʻoku nau ako mei he vitioó.

2:25