« យ៉ូប ១–៣; ១២–១៣ ៖ ‹ គង់តែខ្ញុំនឹងទុកចិត្តដល់ទ្រង់ដែរ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« យ៉ូប ១–៣; ១២–១៣ ៖ ‹ គង់តែខ្ញុំនឹងទុកចិត្តដល់ទ្រង់ដែរ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
យ៉ូប ១–៣; ១២–១៤; ១៩; ២១–២៤; ៣៨–៤០; ៤២ ៖ មេរៀនទី ៩៧
យ៉ូប ១–៣; ១២–១៣
« គង់តែខ្ញុំនឹងទុកចិត្តដល់ទ្រង់ដែរ »
តើអ្នកធ្លាប់ពុះពារធ្វើជាមនុស្សស្មោះត្រង់ចំពោះព្រះក្នុងអំឡុងពេលលំបាកដែរឬទេ ? យ៉ូបជាបុរសស្មោះត្រង់ម្នាក់ដែលរីករាយនឹងជីវិតដែលមានពរ ។ ដោយមិននឹកស្មានដល់ យ៉ូបបានបាត់បង់ទ្រព្យសម្បត្តិ កូនៗ និងសុខភាពរបស់លោក ។ ទោះជាយ៉ាងណាក៏ដោយ យ៉ូបមិនបានបាត់បង់ជំនឿរបស់លោកទៅលើព្រះយេស៊ូវគ្រីស្ទឡើយ ។ មេរៀននេះអាចជួយសិស្សឲ្យមានអារម្មណ៍មានបំណងប្រាថ្នាកាន់តែខ្លាំងក្នុងការទុកចិត្តលើព្រះវរបិតាសួគ៌ និងព្រះយេស៊ូវគ្រីស្ទ អំឡុងពេលមានការសាកល្បង ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតអំពីរបៀបដែលពួកគេបានឆ្លើយតបចំពោះការសាកល្បងរបស់ពួកគេ ។ សូមឲ្យពួកគេមកថ្នាក់រៀនរៀបចំដើម្បីពិភាក្សាអំពីបទពិសោធន៍របស់ពួកគេ ។
សកម្មភាពរៀនសូត្រដែលអាចមាន
មុននឹងចាប់ផ្តើមមេរៀនថ្ងៃនេះ វាអាចជួយបានដើម្បីប្រាប់សិស្សថា គម្ពីរជាច្រើនបន្ទាប់ ( យ៉ូប–បទចម្រៀងសាឡូម៉ូន ) ត្រូវបានស្គាល់ថាជាគម្ពីរនៃកំណាព្យ ឬអក្សរសិល្ប៍ប្រាជ្ញា ។ គម្ពីរទាំងនេះត្រូវបានសរសេរជាកំណាព្យ ហើយមិនមានបំណងចង់បង្ហាញពីប្រវត្តិសាស្ត្រទេ ។ ដូចជាព្រះគម្ពីរផ្សេងទៀតដែរ គម្ពីរទាំងនេះអាចចង្អុលយើងឆ្ពោះទៅព្រះយេស៊ូវគ្រីស្ទ ហើយជួយយើងឲ្យធ្វើតាមទ្រង់ ។ ( ចំណាំ ៖ យ៉ូសែប ស្ម៊ីធ បានពិពណ៌នាអំពីបទចម្រៀងសាឡូម៉ូនថាជា « ការសរសេរដែលមិនបានបំផុសគំនិត » [ Joseph Smith Translation, note on Song of Solomon ] ) ។
របៀបដែលយើងឆ្លើយតបទៅនឹងការសាកល្បងទាំងឡាយ
សូមពិចារណាចាប់ផ្តើមថ្នាក់ដោយសរសេរនៅលើក្ដារខៀន « បុគ្គល-ក » និង « បុគ្គល-ខ » ។ សូមអញ្ជើញសិស្សឲ្យបង្កើតសាច់រឿងមួយសម្រាប់មនុស្សម្នាក់ៗ ម្នាក់ពិពណ៌នាអំពីការសាកល្បងរយៈពេលវែង និងម្នាក់ទៀតពិពណ៌នាអំពីការសាកល្បងរយៈពេលខ្លី ។ ការបំផុសគំនិតនៅខាងក្រោមនេះអាចជាជំនួយ ។
-
តាំងពីបុគ្គល-ក នៅក្មេង ពួកគេត្រូវប្រឈមនឹង …
-
សព្វថ្ងៃកាន់តែធ្ងន់ធ្ងរទៅៗសម្រាប់បុគ្គល-ខ ។ វាបានចាប់ផ្តើមជាមួយ …
បន្ទាប់ពីសិស្សបានបង្កើតសាច់រឿងទាំងពីររួចហើយ សូមអញ្ជើញពួកគេឲ្យពិភាក្សាអំពីសំណួរខាងក្រោមសម្រាប់ « បុគ្គល-ក » និង « បុគ្គល-ខ » ។ ពួកគេអាចធ្វើបែបនេះជាដៃគូ ឬជាក្រុមតូចៗ ។
-
តើវានឹងមានលក្ខណៈយ៉ាងណា ប្រសិនបើបុគ្គលរូបនេះឆ្លើយតបនឹងការសាកល្បងនេះមិនល្អ ?
-
តើវានឹងមានលក្ខណៈយ៉ាងណា ប្រសិនបើបុគ្គលរូបនេះឆ្លើយតបនឹងការសាកល្បងនេះបានល្អ ?
-
តើវានឹងមានលក្ខណៈយ៉ាងណា បើបុគ្គលរូបនេះឆ្លើយតបនឹងការសាកល្បងនេះដោយមានទំនុកចិត្តលើព្រះវរបិតាសួគ៌ ?
បន្ទាប់ពីសិស្សមានពេលគ្រប់គ្រាន់ក្នុងការពិភាក្សាហើយ សូមជួយពួកគេគិតអំពីរបៀបដែលពួកគេឆ្លើយតបនឹងការសាកល្បងរបស់ពួកគេផ្ទាល់ ។ ខាងក្រោមនេះគឺជារបៀបមួយដែលអ្នកអាចធ្វើការណ៍នេះបាន ។
តាមរង្វាស់ ១–៥ ( ១ មិនពិតចំពោះអ្នកទាល់តែសោះ និង ៥ ជាការពិតខ្លាំងចំពោះអ្នក ) សូមគិតថាសេចក្តីថ្លែងការណ៍ខាងក្រោមនេះពិតសម្រាប់អ្នកប៉ុនណាដែរ ៖
-
ខ្ញុំឆ្លើយតបយ៉ាងល្អចំពោះការសាកល្បងទាំងឡាយ ។
-
ខ្ញុំរកឃើញកម្លាំងពីព្រះវរបិតាសួគ៌ និងព្រះយេស៊ូវគ្រីស្ទ អំឡុងពេលនៃការសាកល្បង ។
សូមបើកចិត្តឲ្យទូលាយចំពោះអារម្មណ៍ ឬរៀនអ្វីៗអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកឲ្យប្រឈមមុខនឹងការសាកល្បងរបស់អ្នកដោយបង្កើនការទុកចិត្តលើទ្រង់ ។
ជីវិតរបស់យ៉ូប
សូមអាន យ៉ូប ១:១–៣ ដោយរកមើលអ្វីដែលអ្នករៀនអំពីយ៉ូប ។ ( ចំណាំ ៖ ពាក្យ ល្អឥតខ្ចោះ ប្រែថា « ធ្វើឲ្យជា ពេញលេញ មានសុចរិតភាព » )
-
តើអ្នកបានរកឃើញអ្វីខ្លះ ?
អ្នកអាចសរសេរចម្លើយរបស់សិស្សនៅលើក្ដារខៀន ។ មុននឹងបន្តដំណើររឿងរបស់យ៉ូប សូមពិចារណាអាន ឬសង្ខេបដូចខាងក្រោម ។
វាជាការសំខាន់ក្នុងការយល់ថា យ៉ូបគឺជាមនុស្សពិតប្រាកដ ( សូមមើល គោលលទ្ធិ និងសេចក្តីសញ្ញា ១២១:១០ ) ប៉ុន្តែជីវិតរបស់យ៉ូបត្រូវបានប្រាប់ដោយប្រើធាតុកំណាព្យមួយចំនួន ។ ឧទាហរណ៍ នៅពេលដែលដំណើររឿងរបស់យ៉ូបចាប់ផ្តើម ព្រះអម្ចាស់ និងសាតាំងត្រូវបានពិពណ៌នាថាមានការសន្ទនាពីរ ។ ការសន្ទនាទាំងនេះមិនមែនជាការប្រាស្រ័យទាក់ទងពិតប្រាកដរវាងព្រះអម្ចាស់ និងសាតាំងទេ ប៉ុន្តែបង្ហាញពីតួនាទីរបស់សាតាំងជាមារសត្រូវ ឬសត្រូវរបស់យើង ។ ការសន្ទនារបៀបជាកំណាព្យមួយក្នុងការរៀបចំអ្នកអានសម្រាប់អ្វីដែលកើតឡើងក្នុងជីវិតរបស់យ៉ូប—ពោលគឺសេចក្ដីវេទនា ការល្បួង និងការបាត់បង់ទ្រព្យសម្បត្តិខាងលោកិយរបស់លោក ។
ដើម្បីជួយសិស្សឲ្យយល់ពីការសន្ទនាដំបូង អ្នកអាចសុំសិស្សស្ម័គ្រចិត្តបីនាក់ឲ្យអាន ។ សិស្សស្ម័គ្រចិត្តម្នាក់អាចអានពាក្យសម្ដីរបស់អ្នកពោល ម្នាក់ទៀតអាចព្រះបន្ទូលរបស់ព្រះអម្ចាស់ និងអ្នកទីបីអានពាក្យរបស់សាតាំង ។ សុំឲ្យសិស្សអានពាក្យទាំងនោះ ដោយមិនចាំបាច់បញ្ចេញបញ្ចូលពាក្យអ្វីឡើយ ។ សូមពិចារណាបង្ហាញសំណួរខាងក្រោមនេះដើម្បីឲ្យសិស្សគិតនៅពេលពួកគេស្តាប់ ។
សូមអាន យ៉ូប ១:៦–១២ ដោយស្វែងរកចម្លើយចំពោះសំណួរខាងក្រោមនេះ ៖
-
តើសាតាំងបានអះអាងអ្វីអំពីសេចក្ដីសុចរិតរបស់យ៉ូប ?
-
តើសាតាំងចង់ឲ្យមានអ្វីកើតឡើងដល់យ៉ូប ?
អនុញ្ញាតឲ្យសិស្សចែកចាយចម្លើយរបស់ពួកគេ ។ ប្រសិនបើចាំបាច់ សូមជួយសិស្សឲ្យយល់ថា សាតាំងបានអះអាងថា យ៉ូបគ្រាន់តែជាមនុស្សសុចរិតប៉ុណ្ណោះ ដោយសារព្រះអម្ចាស់បានប្រទានពរដល់លោក ។ សាតាំងចង់ឲ្យពរជ័យរបស់យ៉ូបបាត់ ដើម្បីបញ្ជាក់ការអះអាងនោះ ។
គំរូរបស់យ៉ូប
សម្រាប់ផ្នែកបន្ទាប់នៃដំណើររឿងរបស់យ៉ូប អ្នកអាចបង្កើតតារាងដូចខាងក្រោមនៅលើក្តារខៀន ។ បន្ទាប់មក អ្នកអាចរៀបចំសិស្សជាគូៗ ឬក្រុមតូចៗ ដើម្បីបំពេញតារាងនោះ ។ ឲ្យក្រុមពិភាក្សាលើសំណួរដែលមានបន្ទាប់ ។ វាអាចមានប្រយោជន៍ក្នុងការដើរចុះឡើងដើម្បីជួយ និងលើកទឹកចិត្តសិស្ស ។ ( ចំណាំ ៖ បូសគឺជាដំបៅស្បែកដ៏ឈឺចាប់ ។ យ៉ូប « ហែក » សម្លៀកបំពាក់របស់លោក ហើយកោរសក់ក្បាលជាសញ្ញានៃការទួញសោក ) ។
|
តើយ៉ូបបានរងទុក្ខអ្វីខ្លះ ? |
តើយ៉ូបបានឆ្លើយតបយ៉ាងដូចម្ដេច ? |
|---|---|
តើយ៉ូបបានរងទុក្ខអ្វីខ្លះ ? សូមអាន យ៉ូប ១:១៣–១៩; ២:៧ ។ | តើយ៉ូបបានឆ្លើយតបយ៉ាងដូចម្ដេច ? សូមអាន យ៉ូប ១:២០–២២; ២:៩–១០; ១៣:១៥; ២៣:១០ ។ |
-
តើការឆ្លើយតបអ្វីរបស់យ៉ូបដែលអ្នកចាប់អារម្មណ៍ ?
-
តើយ៉ូបអាចយល់យ៉ាងណាអំពីព្រះដើម្បីឆ្លើយតបតាមរបៀបដែលលោកបានធ្វើ ?
សិស្សអាចចង្អុលបង្ហាញថា យ៉ូបបានដឹងថាពរជ័យរបស់លោកបានមកពីព្រះ ( សូមមើល យ៉ូប ១:២១ ) បានយល់ថាការសាកល្បងគឺជាផ្នែកមួយនៃផែនការរបស់ព្រះ ( សូមមើល យ៉ូប ២:១០ ) ហើយបានដឹងថាព្រះបានជ្រាបដឹងអំពីលោក ហើយថាការសាកល្បងរបស់លោកនឹងកែលម្អលោក ( សូមមើល យ៉ូប ២៣:១០ ) ។
បន្ទាប់ពីសិស្សបានធ្វើសកម្មភាពនេះរួចរាល់ហើយ សូមជួយពួកគេស្វែងរកសេចក្តីពិតដោយការសួរសំណួរដូចខាងក្រោម ។
-
តើយើងអាចរៀនអ្វីខ្លះពីគំរូរបស់យ៉ូប ដែលអាចជួយយើងក្នុងអំឡុងពេលការសាកល្បងនានា ?
ក្នុងចំណោមចម្លើយផ្សេងទៀត សិស្សអាចរកឃើញអ្វីមួយដូចជា ៖ យើងអាចជ្រើសរើសទុកចិត្តលើព្រះក្នុងអំឡុងពេលការសាកល្បងរបស់យើង ។
សូមពិចារណាអញ្ជើញសិស្សឲ្យស្វែងរក ហើយគូសចំណាំកន្លែងដែលពួកគេឃើញសេចក្ដីពិតនេះនៅក្នុង យ៉ូប ១៣:១៥ ។
គំរូក្នុងព្រះគម្ពីរ
សូមគិតអំពីរបៀបដែលអ្នកអាចជួយសិស្សបង្កើនការទុកចិត្តរបស់ពួកគេលើព្រះវរបិតាសួគ៌អំឡុងពេលការសាកល្បងរបស់ពួកគេ ។ របៀបមួយគឺឲ្យសិស្សរកមើលព្រះគម្ពីរដែលមនុស្សបានពន្យល់ពីហេតុផលរបស់ពួកគេសម្រាប់ការទុកចិត្តលើព្រះអំឡុងពេលសាកល្បង ។ សិស្សអាចធ្វើសកម្មភាពខាងក្រោមនេះ ។
-
ស្វែងរកគំរូមួយនៅក្នុងព្រះគម្ពីរដែលនរណាម្នាក់បានជ្រើសរើសទុកចិត្តលើព្រះក្នុងអំឡុងពេលនៃការសាកល្បងរបស់ពួកគេ ។
-
គូសចំណាំពាក្យ ឬឃ្លាដែលពន្យល់ពីមូលហេតុដែលបុគ្គលរូបនេះទុកចិត្តលើព្រះ ។
-
រៀបចំដើម្បីពន្យល់ពីរបៀបដែលគោលគំនិតដែលអ្នកបានគូសចំណាំបានជួយ ឬអាចជួយអ្នកឲ្យជឿទុកចិត្តលើព្រះ ។
ប្រសិនបើសិស្សត្រូវការជំនួយក្នុងការរកមើលដំណើររឿងក្នុងព្រះគម្ពីរ អ្នកអាចអញ្ជើញពួកគេឲ្យស្វែងរក « ការទុកចិត្ត » នៅក្នុងបណ្ណាល័យដំណឹងល្អបាន ។ ឬអ្នកអាចផ្តល់ឧទាហរណ៍ដូចជា ៖
ដានីយ៉ែល ២:១៩–២៣—ដានីយ៉ែលបានប្រឈមមុខនឹងការបញ្ជារបស់ស្ដេចនេប៊ូក្នេសា ដែលថាអ្នកប្រាជ្ញទាំងអស់ក្នុងនគរ ( រួមទាំងដានីយ៉ែល ) នឹងត្រូវសម្លាប់ ប្រសិនបើគ្មានអ្នកណាអាចបកស្រាយសុបិនរបស់ទ្រង់បានទេ ។
នីហ្វៃទី២ ៤:១៧–២៣—នីហ្វៃបានទួញសោកចំពោះភាពទន់ខ្សោយរបស់លោក ហើយមានអារម្មណ៍ថាខ្វះសមត្ថភាព ។
បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សឲ្យចែកចាយជាក្រុមតូចៗ ឬដល់សិស្សក្នុងថ្នាក់នូវអ្វីដែលពួកគេបានរកឃើញ ។ អ្នកក៏អាចបង្ហាញសិស្សនូវ « Mountains to Climb » ( ៥:០៥ ) ដែលមានលើគេហទំព័រ ChurchofJesusChrist.org ។ សូមឲ្យពួកគេស្វែងរកអ្វីដែលប្រធាន អាវរិង បានចែកចាយដែលអាចបង្កើនការទុកចិត្តរបស់ពួកគេលើព្រះវរបិតាសួគ៌ និងព្រះយេស៊ូវគ្រីស្ទ អំឡុងពេលមានការសាកល្បង ។
សេចក្ដីបញ្ចប់
អ្នកអាចបញ្ចប់ថ្នាក់ដោយអញ្ជើញសិស្សឲ្យសរសេរសំបុត្រទៅខ្លួនពួកគេ ឬផ្ញើអត្ថបទទៅខ្លួនពួកគេដោយឆ្លើយសំណួរខាងក្រោមនេះ ។ ប្រសិនបើពួកគេសរសេរសំបុត្រ សូមអញ្ជើញពួកគេឲ្យបត់ក្រដាស ហើយដាក់វានៅក្នុងហោប៉ៅរបស់ពួកគេ ឬកន្លែងណាមួយដែលពួកគេនឹងឃើញវានៅពេលក្រោយនៅថ្ងៃនោះ ។ អ្នកអាចចាក់តន្រ្តីជាសំឡេងឧបករណ៍ដែលស្រទន់ នៅពេលសិស្សសរសេរ ។
-
តើអ្វីទៅជាអារម្មណ៍របស់អ្នកទទួលបាននៅថ្ងៃនេះ ដែលបានជួយអ្នកចង់ទុកចិត្តព្រះវរបិតាសួគ៌ និងព្រះយេស៊ូវគ្រីស្ទ អំឡុងពេលមានការសាកល្បង ?