Եսթեր, Մաս 1

Տասներկու Առաքյալների Քվորումից երեց Ռոնալդ Ա․ Ռասբանդն ուսուցանել է.

Մեր կյանքը նման է շախմատի տախտակի և Տերը մեզ տեղաշարժում է մի տեղից մյուս տեղը, եթե մենք արձագանքում ենք հոգևոր հուշումներին։ Հետ նայելով՝ մենք տեսնում ենք Նրա ձեռքը մեր կյանքում։ («Աստվածային ծրագրի համաձայն», Լիահոնա, նոյ․ 2017, 55)

• Ձեր կարծիքով, ինչո՞ւ է ավելի հեշտ տեսնել Աստծո ազդեցությունը մեր կյանքում՝ նայելով անցյալին, այլ ոչ ներկային:

Եսթերի պատմությունը ցույց է տալիս, թե ինչպես Աստծո ազդեցությունը Եսթերի կյանքում դրեց նրան այնպիսի դիրքում, որ կատարի Նրա աշխատանքը։ Այս դասում դուք կուսումնասիրեք այդ պատմության առաջին մասը: Ուսումնասիրելիս աղոթքով խնդրեք Սուրբ Հոգուն, որ օգնի ձեզ հասկանալ, թե Երկնային Հայրը ինչպես կարող է ձեզ դնել այնպիսի իրավիճակների մեջ, որ դուք օգնեք Նրան կատարել Իր աշխատանքը:

Երբ պարսիկները գրավեցին Բաբելոնը, շատ հրեաներ մնացին Պարսկաստանում, այդ թվում՝ Եսթերը և նրա խնամակալ Մուրթքեն։ Պարսկաստանի թագավոր Ասուերոսը դժգոհ էր իր կնոջից՝ Վաշթիից և բաժանվեց նրանից (տես Եսթեր 1.1–12): Նոր հարսնացու փնտրելով՝ Ասուերոսը հրամայեց Պարսկաստանի բոլոր կանանց բերել իր մոտ (տես Եսթեր 2․1–4)։

Կարդացեք ձեզ հանձնարարված հատվածը՝ տեսնելու, թե ինչ դժվար հանգամանքների բախվեցին Եսթերն ու Մուրթքեն։

Եսթեր 2․5–11, 15–17

Եսթեր 3․1–13

Եսթեր 4․1–9

• Ձեր կարծիքով, Երկնային Հայրը և Հիսուս Քրիստոսն ինչպե՞ս էին վերաբերվում այս հատվածների իրադարձություններին: Ինչպե՞ս էին Նրանք վերաբերվում Մուրթքեին։ Ինչպե՞ս էին Նրանք վերաբերվում Եսթերին։

Կարդացեք Եսթեր 4.10–14 հատվածները՝ փնտրելով, թե ինչպես Մուրթքեն օգնեց Եսթերին տեսնել այն ազդեցությունը, որ Երկնային Հայրն ուներ իր կյանքի հանգամանքների վրա:

Երեց Ռասբանդը վկայել է, որ Աստված իսկապես ազդում է մեր կյանքի հանգամանքների վրա, որպեսզի կատարենք Իր աշխատանքը:

Ես հասկացել եմ, որ Տերն Իր աշխատանքը կատարելու նպատակով կտեղաշարժի մեզ շախմատի երևակայական տախտակի վրայով։ Իրականում, ինչը թվում է զուտ պատահականություն, վերահսկվում է սիրող Երկնային Հոր կողմից, ով կարող է հաշվել յուրաքանչյուր գլխի մազերը։ Նույնիսկ մի ճնճղուկ գետնին չի ընկնում առանց մեր Հոր իմացության։ Տերը վերահսկում է մեր կյանքի յուրաքանչյուր դրվագ, և այդ միջադեպերն ու հնարավորությունները նախապատրաստում են մեզ, որպեսզի մենք բարձրացնենք մեր ընտանիքները՝ Աստծո արքայությունը Երկրի վրա կառուցելիս։ …

Երկնային Հայրը կարող է մեզ դնել այնպիսի իրավիճակներում, որոնք հատուկ մտադրություն են ենթադրում։ Նա այդպես է վարվել իմ կյանքում, Նա անում է դա ձեր կյանքում։ («Աստվածային ծրագրի համաձայն», Լիահոնա, նոյ․ 2017, 55–56)

• Ի՞նչ ճշմարտություններ կարող ենք սովորել Երկնային Հոր մասին Եսթերի և երեց Ռասբանդի պատմությունից:

Օգտակար կլինի նշել, որ Տիրոջ աշխատանքը կատարելը հաճախ շատ տպավորիչ փորձառություն չէ: Այն կարող է լինել փոքր, բայց, այնուամենայնիվ, կարևոր: Այսպիսի փոքր, բայց կարևոր փորձառությունների մի քանի օրինակ բերելու համար կարող եք կիսվել քույր Միշել Քրեյգի պատմությունով՝ «Աչքեր՝ որ տեսնեք» տեսանյութի 2:23-4:54 (Լիահոնա, նոյ. 2020, 16), կամ երեց Բրուք Պ. Հեյլսի պատմությունով՝ «Աղոթքների պատասխանը» տեսանյութի 2:16-4:32: Այս պատմությունների տեսանյութերը կարող եք նաև գտնել ChurchofJesusChrist.org կայքում։

6:27

12:39

• Ինչպե՞ս է Տերը հնարավորություն տվել ձեզ կամ ձեր ծանոթներից մեկին գործիք լինել Իր ձեռքում:

  Կարող եք կիսվել ձեր փորձառությամբ, երբ դուք ճանաչել եք այն հնարավորությունները, որոնք Երկնային Հայրը տվել է ձեզ՝ օգնելու իրականացնել Իր աշխատանքը:

  Որպեսզի օգնեք ուսանողներին խորհել այն մասին, թե ինչպես է Երկնային Հայրը դրել իրենց այնպիսի իրավիճակների մեջ, որ իրենք կատարեն Իր աշխատանքը, կարող եք նրանց ժամանակ տալ՝ լուռ խորհելու հետևյալ հարցի պատասխանների շուրջ: Նրանք կարող են իրենց մտքերը գրել ուսումնասիրության օրագրում:

• Ձեր կարծիքով, Մուրթքեի խոսքերը հատված 14-ում ինչպե՞ս կարող են նկարագրել ձեզ:

Ձեր ուսումնական օրագրում գրեք ձեր կյանքում դեր ունեցող որևէ մեկի անունը (ընտանիքում, դպրոցում, եկեղեցում կամ այլ միջավայրում): Ապա ձեր օրագրում պատասխանեք հետևյալ հարցերից առնվազն մեկին.

• Ի՞նչ ապացույց եք զգացել, որ Երկնային Հայրն այդ մարդուն բերել է ձեր կյանք «մի այսպիսի ժամանակի համար» (Եսթեր 4.14)։

• Ե՞րբ եք զգացել, որ Երկնային Հոր ձեռքը բերում է ձեզ որոշակի մարդկանց շրջապատ կամ դնում է որոշակի իրավիճակների մեջ «մի այսպիսի ժամանակի համար» (Եսթեր 4.14)։