Բ Մնացորդաց 17–20

• Եթե դուք մագլցեք ժայռն ի վեր, ի՞նչ սարքավորումներ ձեզ անհրաժեշտ կլինեն:

• Ինչո՞ւ է անհրաժեշտ այդ սարքավորումը:

• Եթե ​​համեմատենք մեր կյանքը ժայռն ի վեր մագլցելու հետ, ի՞նչ է տվել ձեզ Տերը, որպեսզի օգնի անվտանգ բարձրանալ։

Տասներկու Առաքյալների Քվորումից երեց Ռիչարդ Գ. Սքոթն (1928–2015) ուսուցանել է.

Դուք և ես կարող ենք վստահ լինել, որ կհասնենք կյանքի արժանի նպատակների՝ հասկանալով և հետևողականորեն հետևելով ճիշտ սկզբունքներին, որոնք արմատավորված են բացահայտված ճշմարտության վրա:

Սկզբունքները անվտանգության խարիսխներն են: Նրանք նման են պողպատե խարիսխների, որոնք լեռնագնացներն օգտագործում են անառիկ ժայռերը նվաճելու համար: Նրանք կօգնեն ձեզ վստահություն ունենալ նոր և անծանոթ հանգամանքներում: Նրանք ձեզ պաշտպանություն կտան կյանքի դժվարությունների փոթորիկների ժամանակ: («The Power of Correct Principles», Լիահոնա, մայիս 1993, 32)

Եղանակներից մեկը, որով Երկնային Հայրը սիրով մեզ տվել է ճշմարիտ սկզբունքները, սուրբ գրությունների միջոցով է։ Երբ մենք ուսումնասիրում ենք սուրբ գրությունները, ձգտում ենք բացահայտել այդ սկզբունքները կամ ճշմարտություն պարունակող արտահայտությունները, որոնք կարող են օգնել մեզ մեր կյանքում:

Մի քանի րոպե տրամադրեք և խորհեք հետևյալ հարցերի շուրջ.

• Որքանո՞վ եմ ես վստահ սկզբունքները բացահայտելու իմ ունակության մեջ:

• Որքանո՞վ եմ ես հասկանում, թե ինչպես կարող են սկզբունքներն օգնել ինձ իմ կյանքում:

Հովսափատի կյանքի վերաբերյալ այս դասն ուսումնասիրելիս խնդրեք Սուրբ Հոգու օգնությունը՝ բացահայտելու ճշմարիտ սկզբունքները, որոնք կարող են օգնել ձեզ:

Հոր մահից հետո Հովսափատը դարձավ Հուդայի թագավոր։ Եվ Իսրայելը, և Հուդան հեռացել էին Տեր Հիսուս Քրիստոսից: Նրանք երկրպագում էին կեղծ աստվածներին։

Կարդացեք Բ Մնացորդաց 17․3–4; 19․4 հատվածները և նշեք, թե ինչ եք սովորում Հովսափատի մասին։ (Նշում. Բաաղիմ նշանակում է կեղծ աստվածներ:)

• Ի՞նչն է ձեզ առավել տպավորում Հովսափատի մասին պատմության մեջ։

Երբ Հովսափատը եկավ իշխանության, նրա ժողովուրդը ուրացության մեջ էր։ Հովսափատն իր թագավորության ընթացքում շատ ջանքեր գործադրեց՝ օգնելու իր ժողովրդին հետևել Եհովային (Հիսուս Քրիստոսին)։ Այդ ընթացքում Հովսափատի թշնամիները դուրս եկան պատերազմի նրա ժողովրդի դեմ։ Այն, ինչ տեղի ունեցավ այդ հանգամանքներում, ցուցադրում է մի շարք սկզբունքներ:

Սկզբունքը բացահայտելու եղանակներից մեկը փնտրելն է, թե ինչպես են երկու բան կապված իրար հետ: Օրինակ՝ Ա-ի հետևանքով տեղի է ունենում Բ-ն: Կամ քանի որ մարդը անում է Ա-ն, Տերը խոստանում կամ տալիս է Բ-ն:

Կարդացեք Բ Մնացորդաց 17․6 և 19․3 հատվածները՝ փնտրելով սկզբունքները Հովսափատի կյանքում։ (Նշում․ բարձրադիր վայրերն ու պուրակները կեղծ աստվածներին երկրպագելու վայրեր էին։)

• Ինչո՞ւ են այս սկզբունքներն օգտակար:

Կարդացեք Բ Մնացորդաց 20․1–9, 14–17, 20–22 հատվածները՝ փնտրելով այլ ճշմարիտ սկզբունքներ:

Ընտրեք մի սկզբունք, որի մասին կցանկանայիք ավելին իմանալ: Պատրաստեք երկու րոպեանոց ելույթ այդ ճշմարտության վերաբերյալ, որը կներառի հետևյալը.

• Հատված կամ հատվածներ տվյալ սկզբունքի մասին, որ դուք կարդացել եք Բ Մնացորդաց գրքում, և այն, թե ինչու եք ընտրել այդ հատվածը (հատվածները)

• Այլ սուրբ գրություններ կամ մարգարեների խոսքեր, որոնք օգնում են ձեզ հասկանալ տվյալ սկզբունքը

• Դեպք, երբ Փրկիչը կամ մեկ ուրիշը սուրբ գրություններում կամ Եկեղեցու պատմության մեջ այդ սկզբունքի օրինակ է հանդիսացել, (դրսևորել է այդ սկզբունքը)

• Այն, թե ձեր կարծիքով ինչպես կարող է Տիրոջ այս սկզբունքն օգնել մեզ կամ պաշտպանել մեզ

• Փորձառություն, երբ դուք կամ ձեր ծանոթներից մեկը գործել եք այս սկզբունքի համաձայն, և այն օրհնությունները, որոնք ստացել եք Տիրոջ կողմից

  Ուսանողները կարող են կիսվել իրենց ելույթներով դասընկերոջ կամ փոքր խմբի հետ: Կամ մի քանի պատրաստակամ ուսանողի, որոնք ուսումնասիրել են տարբեր սկզբունքներ, կարող եք առաջարկել կիսվել իրենց ելույթներով դասարանի հետ: Յուրաքանչյուր ուսանողի ելույթից հետո կարող եք առաջարկել դասարանին կիսվել իրենց մեկնաբանություններով կամ հարցերով ուսանողի նշած սկզբունքի վերաբերյալ:

  Բավարար ժամանակ տրամադրեք ուսանողներին՝ պատրաստվելու և կիսվելու իրենց երկու րոպեանոց ելույթներով:

• Ինչո՞ւ է օգտակար ձգտել այսօրվա սովորածից գտնել այն սկզբունքները, որոնք Տերը տվել է մեզ սուրբ գրություններում:

• Ինչպե՞ս կարող եք օգտագործել այն, ինչ այսօր սովորեցիք, ձեր ընտանեկան և անհատական ուսումնասիրության մեջ: