“Pagbansay 6 sa Doktrinal nga Kahanas: Pagsabot sa mga Tudling sa Kasulatan sa Doktrinal nga Kahanas ug sa Paggamit sa mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Daang Tugon (2026)
“Pagbansay 6 sa Doktrinal nga Kahanas: Pagsabot sa mga Tudling sa Kasulatan sa Doktrinal nga Kahanas ug sa Paggamit sa mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Daang Tugon
2 Mga Hari 16–25: Leksiyon 89
Pagbansay 6 sa Doktrinal nga Kahanas
Pagsabot sa mga Tudling sa Kasulatan sa Doktrinal nga Kahanas ug sa Paggamit sa mga Baroganan sa Pag-angkon og Espirituhanong Kahibalo
Ang doktrinal nga kahanas makatabang sa mga estudyante sa pagtukod sa ilang kinabuhi diha sa pundasyon ni Jesukristo ug sa Iyang ebanghelyo. Kini nga leksiyon makatabang sa mga estudyante nga makasabot sa mga tudling sa doktrinal nga kahanas ug magamit ang mga baroganan sa pag-angkon og espirituhanong kahibalo.
Pagpangandam sa estudyante: Ikonsiderar ang pagdapit sa mga estudyante sa pagpili og tudling sa doktrinal nga kahanas nga gusto nilang mas masabtan. Awhaga sila nga pangitaon sa mga footnote o sa paggamit og diksyonaryo aron makit-an ang mga pulong diha sa tudling. Ang Doktrinal nga Kahanas nga app usa ka mapuslanon nga kapanguhaan. Ang mga estudyante makapangita og lista sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas (2022).
Posibleng mga Kalihokan sa Pagkat-on
Rebyo sa doktrinal nga kahanas: Pagsabot
Pwede nimong sugdan ang klase pinaagi sa paghisgot sa unsay buhaton sa mga estudyante kon dili sila makasabot sa mga tudling sa kasulatan.
-
Nakabasa na ba kamo og kasulatan ug naglibog kon unsay gipasabot niini—tingali bisan human sa pagbasa niini og sobra sa kausa?
-
Unsa ang inyong reaksiyon kon kini mahitabo kaninyo?
-
Ngano kaha sa inyong hunahuna nga ang Langitnong Amahan ug si Jesukristo malipay kon kita maningkamot sa pagsabot sa kasulatan?
Tabangi ang mga estudyante nga makita nga normal lang nga dili masabtan ang tanan diha sa mga kasulatan. Ipasabot nga sa kadugayan ug uban sa pagbansay gamit ang mga kahanas sa pagtuon sa kasulatan, ang atong abilidad sa pagsabot sa mga kasulatan molambo.
Ipakita ang lista sa mga tudling sa doktrinal nga kahanas nga gitun-an sa mga estudyante atol sa Daang Tugon. Dapita ang mga estudyante sa pagpili og tudling nga gusto nilang mas masabtan. Dayon hangyoa ang mga estudyante sa pagkompleto sa usa sa mosunod nga mga kalihokan.
Kalihokan A: Mga Cross-reference
Pangita og laing mga kasulatan nga tingali makapalambo sa inyong pagsabot sa tudling sa doktrinal nga kahanas. Pwede ninyong gamiton ang mga footnote sa tudling. Pwede usab ninyong mailhan ang doktrina nga gitudlo diha sa tudling ug gamiton ang Giya ngadto sa mga Kasulatan aron makakita og mga kasulatan nga mas makatudlo bahin niana nga doktrina. Ikonsiderar ang pag-link o pag-cross-reference sa ubang mga kasulatan nga inyong makit-an sa tudling sa inyong doktrinal nga kahanas.
Mahimo usab ninyong irekord sa inyong journal sa pagtuon o diha sa Librarya sa Ebanghelyo kon sa unsang paagi ang paggamit niini nga mga kapanguhaan makatabang nga molambo ang inyong pagsabot sa tudling sa doktrinal nga kahanas.
Kalihokan B. Hatagi og kahulogan ang mga pulong
Ilha ang mga pulong diha sa tudling sa doktrinal nga kahanas nga inyong dili masabtan. Pangita og mga kahulogan niadtong mga pulong nga anaa sa mga kapanguhaan. Pwede ninyong susihon ang Giya ngadto sa mga Kasulatan, o sa kinatibuk-ang diksyonaryo. Irekord ang mga kahulogan nga inyong nadiskobrehan diha sa inyong journal sa pagtuon, sa mga kilid sa inyong kasulatan, o sa Librarya sa Ebanghelyo. Basaha pag-usab ang tudling sa kasulatan gamit ang mga kahulogan nga inyong nakit-an.
Human sa igo nga panahon, hangyoa ang pipila ka estudyante sa pagpakigbahin kon sa unsang paagi ang ilang pagsabot sa tudling sa doktrinal nga kahanas milambo. Mahimo kang mangutana nga sama sa:
-
Sa unsang paagi ang mga cross-reference nga inyong nakit-an nakadugang sa inyong pagsabot sa tudling sa doktrinal nga kahanas?
-
Sa unsang paagi ang paghatag og kahulogan sa mga pulong nakatabang ninyo nga makita kini nga mga kasulatan sa lahi nga paagi?
Pwede ninyong dapiton ang mga estudyante sa paggamit niining mga kahanas sa pagtuon sa kasulatan atol sa ilang personal o pamilya nga pagtuon sa kasulatan.
Pagkat-on ug paggamit sa mga baroganan sa pag-angkon og espirituhanong kahibalo
Ang pagrebyo sa mga baroganan sa pag-angkon og espirituhanong kahibalo makaandam sa mga estudyante sa ilang paggamit sa tinuod nga kinabuhi nga sitwasyon. Pagpili og usa sa mga kalihokan gikan sa “Mga Kalihokan sa Pagrebyo sa Doktrinal nga Kahanas,” nga nahimutang diha sa apendiks. Makapangita ang mga estudyante og mga paghulagway niini nga mga baroganan diha sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2023).
Ang mga estudyante wala makakat-on og bag-ong tudling sa doktrinal nga kahanas sukad sa Josue 24:15. Ang mosunod nga kalihokan gituyo aron tabangan ang mga estudyante nga magamit ang sulod nga bag-ohay lang nilang gitun-an, nga tingali naglakip sa 1 Samuel 3:4–10 o 1 Mga Hari 19:9–13. Aron maapil ang mga tudling sa doktrinal nga kahanas, mahimo ninyong dapiton ang mga estudyante sa pag-ila sa mga tudling sa doktrinal nga kahanas gikan sa ubang mga basahon sa kasulatan nga makatabang niini nga senaryo. Ang mga ehemplo naglakip sa Santiago 1:5–6; 2 Nephi 28:30; ug Doktrina ug mga Pakigsaad 8:2–3.
Gamita o ipahiangay ang mosunod nga senaryo sa pagtabang sa mga estudyante sa paggamit sa mga baroganan sa pag-angkon og espirituhanong kahibalo.
Atol sa bag-ohay nga miting sa klase sa Young Women, si Kelly nakadungog og daghang batan-ong mga babaye nga mipakigbahin og personal nga mga kasinatian sa dihang ang Dios migiya kanila pinaagi sa Espiritu Santo. Nalipay si Kelly para nila, apan wala siya mobati nga nakadawat siya og personal nga direksyon gikan sa Espiritu Santo. Iyang gibati nga aduna siyay importante nga mga desisyon nga himoon ug nagkinahanglan og langitnon nga giya.
-
Unsa ang pipila ka rason nga mahimong lisod alang ni Kelly sa pag-ila og personal nga pagpadayag?
Ang mga estudyante mahimong molista og lain-laing mga indibidwal nga maduolan ni Kelly alang sa tabang. Ang mga ehemplo naglakip sa usa ka ginikanan, usa ka lider sa Simbahan, usa ka igsoon, o usa ka higala. Dapita ang mga estudyante nga ang matag usa mopili og papel. Hangyoa sila nga mangandam sa pagtabang kang Kelly nga mogamit sa mga baroganan sa pag-angkon og espirituhanong kahibalo gamit niana nga papel.
Mahimo nimong pundokon ang mga estudyante ngadto sa mga grupo sumala sa mga papel nga ilang gipili. Aron malikayan ang dagko nga grupo, pwede kang maghimo og daghang grupo nga sama og papel.
-
Unsa ang pwede ninyong ipakigbahin ngadto Kelly? Unsaon ninyo siya pag-awhag nga mogamit sa mga baroganan sa pag-angkon og espirituhanong kahibalo?
Kon ang mga estudyante nagkinahanglan og tabang, dapita sila sa pagpangita og piho nga mga pamahayag gikan sa mga parapo 5–12 diha sa Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Mahimo usab silang magtuon sa “Ilha Nga ang Pagpadayag Usa ka Proseso” diha sa “Pagpangita sa mga Tubag sa Imong mga Pangutana” nga seksiyon sa Mga Hilisgotan sa Ebanghelyo diha sa Librarya sa Ebanghelyo.
Ang mosunod nga mga pangutana makatabang usab sa mga estudyante nga makaandam og tubag.
-
Unsa kaha ang buhaton ni Kelly aron makalihok inubanan sa hugot nga pagtuo aron makadawat og direksyon gikan sa Dios? Sa unsang paagi makatabang kaniya ang pagbuhat niini?
-
Unsa kaha ang nahibaloan na ni Kelly mahitungod sa Langitnong Amahan, sa Iyang plano, ug sa unsang paagi Siya manggilabot sa Iyang mga anak? Unsaon ninyo pagtabang si Kelly nga mogamit niini nga kahibalo sa iyang sitwasyon karon?
-
Unsa nga kasulatan, pamahayag gikan sa usa ka lider sa Simbahan, o ubang mga kapanguhaan sa ebanghelyo ang inyong ipakigbahin kang Kelly? Sa inyong hunahuna sa unsang paagi kini nga kapanguhaan makatabang kaniya?
Human ang mga estudyante nakagahin og panahon sa pag-andam og tubag, dapita ang usa ka estudyante nga magpakaaron-ingnon nga siya si Kelly. Hangyoa siya sa pagpili sa matang sa tawo nga iyang maduolan alang sa tabang. Dapita ang mga estudyante nga mipili niana nga papel sa pagpakigbahin sa unsay ilang giandam. Pananglitan, kon ang estudyante nga nagrepresentar kang Kelly miingon nga siya modangop sa iyang mga ginikanan, ang mga estudyante nga nag-andam sa pagtubag isip usa ka ginikanan mahimong mopakigbahin sa unsay ilang giandam kang Kelly.
Kon itugot sa panahon, balika ang pagbansay uban sa laing estudyante nga nagrepresentar ni Kelly. Kini nga estudyante makapili og laing papel aron ipakigbahin ang ilang giandam nga mga tubag.
Human sa pagdrama-drama, ikonsiderar ang pagpangutana sa mosunod nga mga pangutana aron matabangan ang mga estudyante sa pagproseso sa unsay ilang nakat-onan.
-
Unsa ang inyong nakat-onan mahitungod sa pagdawat sa balaanong giya pinaagi sa Espiritu Santo?
-
Unsa ang inyong nakat-onan mahitungod sa paggamit sa mga baroganan sa pag-angkon og espirituhanong kahibalo?
Mahimo nimong dapiton ang mga estudyante sa pagpamalandong og sitwasyon nga ilang giatubang. Dapita sila sa pagbuhat og usa ka butang karon aron magamit ang usa o daghan pa sa mga baroganan sa pag-angkon og espirituhanong kahibalo ngadto niana nga sitwasyon. Ikonsidear ang pagpakigbahin sa imong pagpamatuod kon sa unsang paagi ang Langitnong Amahan ug si Jesukristo motabang sa mga estudyante sa personal nga mga hagit samtang sila mangita Kanila alang sa direksiyon.