Tusi Lesona a le Faiaoga Seminare o le Feagaiga Tuai

Anotusi
Itulau Autu
Faatomuaga i le Tusi Lesona a le Faiaoga
Lesona o le Feagaiga Tuai
- Faafeiloai Atu Mai le Feagaiga Tuai
- Mose 1; Aperaamo 3
- Kenese 1–2; Mose 2–3; Aperaamo 4–5
- Kenese 3–4; Mose 4–5
- Kenese 5; Mose 6
- Mose 7
- Kenese 6–11; Mose 8
- Kenese 12–17; Aperaamo 1–2
- Kenese 18–23
- Kenese 24–33
- Kenese 37–41
- Kenese 42–50
- Esoto 1–6
- Eseta
- Esoto 7–13
- Esoto 14–18
- Esoto 19–20; 24; 31–34
- Esoto 35–40; Levitiko 1; 4; 16; 19
- Numera 11–14; 20–24; 27
- Teuteronome 6–8; 15; 18; 29–30; 34
- Iosua 1–8; 23–24
- Faamasino 2–4; 6–8; 13–16
- Ruta; 1 Samuelu 1–7
- 1 Samuelu 8–10; 13; 15–16
- 1 Samuelu 17–18; 24–26; 2 Samuelu 5–7
- 2 Samuelu 11–12; 1 Tupu 3; 6–9; 11
- 1 Tupu 12–13; 17–22
- 2 Tupu 2–7
- 2 Tupu 16–25
- 2 Nofoaiga a Tupu 14–20; 26; 30
- Esera 1; 3–7; Neemia 2; 4–6; 8
- Eseta
- Iopu 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Fa’ataoto 1–4; 15–16; 22; 31; Failauga 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Ieremia 1–3; 7; 16–18; 20
- Ieremia 31–33; 36–38; Auega 1; 3
- Esekielu 1–3; 33–34; 36–37; 47
- Tanielu 1–7
- Hosea; Ioelu
- Amosa; Opetaia; Iona
- Mika; Nauma; Sapakuka; Sefanaia
- Hakai 1–2; Sakaria 1–4; 7–14
- Malaki
Lesona o Sauniuniga mo le Olaga
- Atamai i Aoaoga Faavae: Mauaina o Tali i A’u Fesili
- Tomai i Suesuega o Tusitusiga Paia
- Taiala Mo Le Malosi o le Autalavou
- Atinaega o le Ola Tutoatasi o le Tagata Lava Ia
- Soifua Maloloina Faaletino ma Faalelagona
- Sauniuni mo Aoaoga ma Galuega i le Lumanai
- Faamanuiaina i le Aoga
- Sauniuniga Faafaifeautalai
- Sauniuniga mo le Malumalu
- Aoaoga a Taitai o le Ekalesia
Faaopoopoga

1 Samuelu 25: E Fesoasoani le Faaola ia i Tatou e Faamagalo Atu

“1 Samuelu 25: E Fesoasoani le Faaola ia i Tatou e Faamagalo Atu,” Tusi Lesona a le Faiaoga Seminare o le Feagaiga Tuai (2026)

“1 Samuelu 25: E Fesoasoani le Faaola ia i Tatou e Faamagalo Atu,” Tusi Lesona a le Faiaoga Seminare o le Feagaiga Tuai

1 Samuelu 17–18; 24–26; 2 Samuelu 5–7: Lesona 75

1 Samuelu 25

E fesoasoani le Faaola ia i Tatou e Faamagalo Atu.

Painting of Jesus Christ in America, greeting Nephites.

I o tatou olaga atoa, atonu o le a faatiga pe faatausuai isi tagata ia i tatou. Na faalumaina Tavita e se alii e igoa iā Napalu. I le avea ai ma se ituaiga o Iesu Keriso, sa ’ai’oi atu le faletua o Napalu, o Apikaila, ma fesoasoani ia Tavita e faamagalo atu. E mafai ona tatou aoao atili e uiga ia Iesu Keriso ma le fesoasoani e tuuina mai e Ia ia i tatou e ala i le faatusatusaina o Apikaila ia te Ia. E mafai ona fesoasoani lenei lesona i tagata aoga ia malamalama i le auala e mafai ai e Iesu Keriso ona fesoasoani ia i latou e faamagalo atu i isi.

Sauniuniga a le tagata aoga: Valaaulia tagata aoga e faitau, matamata, pe faalogologo i le “Beauty for Ashes: The Healing Path of Forgiveness” saunia e Sister Kristin M. Yee (Liahona, Nov. 2022, 36–38). E mafai ona latou suesue i le tautalaga atoa po o vaega na e muai filifilia. Valaaulia tagata aoga e o mai i le vasega ua saunia e faasoa mai ni malamalamaaga latou te maua e uiga i le mauaina o le fesoasoani a le Faaola e faamagalo atu ai i isi.

Gaoioiga e Ono Mafai Ona Aoao Ai

O Le Togiola a Iesu Keriso

Mafaufau e fa’aali atu se ata o Iesu Keriso, e pei o le ata i le amataga o lenei lesona. Tusi le faamatalaga le mae’a lenei i luga o le laupapa. Valaaulia tagata aoga e faaaoga a latou api talaaga mo suesuega e lisi ai ni auala e mafai ona latou faamae’aina ai. E mafai ona e taina musika faaaloalo a o mafaufau ma tusitusi tagata aoga.

Ona o Iesu Keriso, ua mafai ai ona ou …

A uma se taimi talafeagai, valaaulia ni nai tagata aoga e faasoa mai pe na faapefea ona latou faamae’aina le faamatalaga. E mafai foi ona latou faailoa atu o latou lagona po o talitonuga e uiga i mea latou te faasoa atu. Faaali atu le faamatalaga lenei e lagolago ai pe faaopoopo i lisi na fatuina e tagata aoga.

Na faamatala e Peresitene Russell M. Nelson se mea e mafai ona tatou faia uma ona o Iesu Keriso:

15:3

‟E ala i le Togiola lē i’u [a le Faaola], e mafai ai ona e faamagalo atu ia i latou o ē ua faatiga ia te oe ma ē atonu latou te lē taliaina lava le tiutetauave mo lo latou agaleaga ia te oe.

E masani lava ona faigofie ona faamagalo atu i le tasi o loo saili ma le faamaoni ma le lotomaualalo i lau faamagaloga. Ae o le a faamatuu atu e le Faaola ia te oe le gafatia e faamagalo atu i soo se tasi na agaleaga ia te oe i soo se auala. Ona le toe mafai lea e a latou faatinoga tiga ona faatama’i i lou agaga. (“O Meaalofa e Fa ua Ofo Mai e Iesu Keriso ia te Oe” [Faigalotu o le Kerisimasi a le Au Peresitene Sili, 2 Tes., 2018], Gospel Library.)

O le a le mea na mafai ona faia e Iesu Keriso e ala i Lana Togiola?

Faatumu le faamatalaga o loo i luga o le laupapa i le upumoni lenei: Ona o Iesu Keriso, ua mafai ai ona ou faamagalo atu i tagata o e na faatiga ia te au. E mafai ona e valaaulia tagata aoga e faaopoopo lenei upumoni i a latou api talaaga pe afai e le o se vaega o la latou uluai lisi.

Tavita ma Napalu

O le1 Samuelu 25 o loo i ai se tala lea e mafai ona faatusatusa ai faatinoga a le faletua o Napalu, o Apikaila, ia Iesu Keriso. O lenei faatusatusaga e fesoasoani ia i tatou e aoao atili ai e uiga ia te Ia. O nei ituaiga o faatusatusaga e ta’ua i nisi taimi o ituaiga o Iesu Keriso. Uunaia tagata aoga e valaaulia le Agaga Paia e fesoasoani ia i latou ia malamalama i le ituaiga o Keriso o loo i lenei mataupu. Atonu e aoga le aoteleina o le tala atoa a o lei amata ona suesue tagata aoga ina ia mafai ona latou taulai atili atu i le vaavaai mo mea o loo aoao mai e lenei tala e uiga ia Keriso.

A o malaga Tavita ma ana tagata i le vao, sa latou feiloa’i i auauna a se tagata e igoa iā Napalu. I taimi o taua, e masani ona solia e fitafita ua vaivai le tulafono ina ia maua ai mea latou te mana’omia. Sa mana’omia e Tavita ma ana tagata le fesoasoani ma le lagolagosua. O Napalu o se tagata mau’oa ma e tele ana fagaga ma lafu manu. Nai lo le faia o auauna a Napalu ma le saua ma ave mea sa latou manaomia, sa agalelei Tavita ma ana fitafita i nei auauna ma sa leai se mea na latou aveesea mai ia i latou (tagai 1 Samuelu 25:7, 15–16). Na auina atu e Tavita ni ana auauna se toa 10 e ole atu ma le filemu ia Napalu mo ni meaai ma ni sapalai sa matuai manaomia lava (tagai 1 Samuelu 25:5–9). Na faalumaina e Napalu ia Tavita ma musu e fesoasoani ia te ia ma lana autau (tagai 1 Samuelu 25:10–11).

I lalo o le faamatalaga ua maea i luga o le laupapa, e mafai ona e tusia ai ni foliga se lua. Faaigoa le tasi Tavita ma le isi Napalu. Tuu se avanoa e tusi ai se foliga lona tolu i le va o le lua i se taimi mulimuli ane o le lesona. I lalo o foliga e faatusa ia Tavita, e mafai ona e tusia ai: Agalelei i auauna a Napalu; Saili le fesoasoani mai ia Napalu. I lalo o foliga e faatusa ia Napalu, e mafai ona e tusia: Faalumaina Tavita; Musu e fesoasoani. E mafai ona e valaaulia tagata aoga e sui lagona o foliga a o latou faitauina fuaiupu o loo i lalo.

Valaaulia le afa o le vasega e faitau e uiga ia Napalu ae o le isi afa e faitau e uiga ia Tavita. Afai e manaʻomia, faasino atu tagata aʻoga i vaefaamatalaga mo se malamalamaaga lelei sili atu.

Faitau le 1 Samuelu 25:3, 14, 17, 25, ma vaavaai mo uiga o Napalu.
Faitau le 1 Samuelu 25:13, 21–22,vaavaai mo le tali atu a Tavita i upu faalumaluma a Napalu ma le musu e fesoasoani atu.

Fai atu i se volenitia mai vaega taitasi e tusi i luga o le laupapa mea na latou aoaoina e uiga i la latou tagata na atofa atu. Mo se faataitaiga, i lalo o Napalu e mafai ona latou tusia Le Mafaufau; Amioleaga; Le magafagafa. I lalo o Tavita e mafai ona latou tusia Ita; Lagonaina le leaga o le faiga o ia; Saili le tauimasui. E mafai e tagata aoga ona suia lagona i foliga taitasi e atagia ai mea na latou aoaoina.

Tuu atu i tagata aoga se avanoa e mafaufau ai i o latou lava tulaga. Faamautinoa atu ia i latou o le a latou le faasoaina atu a latou tali i lenei iloiloga faaletagata lava ia.

Mafaufau i au tali i fesili nei:

O le a se taimi na le agalelei ai se tasi ia te oe?
O a ni taumafaiga, manuia, po o ni tauiviga na e faia pe na ia te oe i le faamagaloina ai o lenei tagata mo a latou faiga leaga?

Apikaila o se faatusa o Keriso

Saunia tagata aoga e suesue e uiga ia Apikaila e ala i le faailoaina atu o le tomai suesue o le sailia o ituaiga o Keriso. Faamalamalama atu e mafai e tagata aoga ona vaavaai mo mea na fai mai ai Apikaila pe faia e faamanatu ai ia i latou ia Iesu Keriso, Ana matafaioi, ma Lana misiona i le fuafuaga a le Tama Faalelagi.

Na molimauina e se auauna a Napalu le feteena’iga i le va o lona matai ma Tavita. Sa ta’u atu e le auauna ia Apikaila, le faletua o Napalu (tagai 1 Samuelu 25:14–17). Ina ua iloa e Apikaila lenei feteenaiga, sa ia augani atu mo Napalu ma talosaga atu ia Tavita e faamagalo o ia (tagai 1 Samuelu 25:18–20, 23–28). O Apikaila e mafai ona vaaia o se ituaiga o Keriso: E mafai ona tatou maua ituaiga o Keriso a o tatou suesue i tusitusiga paia ma vaavaai pe faapefea e tagata taitoatasi, mea faitino, po o mea na tutupu ona fesoasoani ia i tatou e mafaufau ai ia Keriso.

I luga o le laupapa, tusi se foliga i le va o Tavita ma Napalu. Faaigoa le foliga lenei Apikaila. Tuu atu i tagata aoga se taimi ia lava e suesue ai taitoatasi pe i ni vaega toalaiti ia mea nei.

Faitau le 1 Samuelu 25:18–19, 23–28, 31, vaavaai mo soo se mea na fai mai ai pe faia e Apikaila e talitutusa lava ma se mea na fetalai pe faia e Iesu Keriso. Mafaufau e faailoga mea ua e mauaina.

I lalo o foliga e faatusa ia Apikaila, fai se lisi o mea na maua e tagata aoga. O tali e ono i ai e mafai ona: Tuuina atu le lagolagosua tele (fuaiupu 18); Na ia tauaveina i ona luga mea sese a Napalu (fuaiupu 24); Na talosaga atu ia Tavita e faamagalo o ia mo mea sese a Napalu (fuaiupu 28); Galue e aveese le faanoanoa ma le faatausuai mai le loto o Tavita (fuaiupu 31).

E faapefea ona avea Apikaila ma se faatusa o Iesu Keriso?

Na faasoa mai e Sister Kristin M. Yee o le Au Peresitene Aoao o le Aualofa ni malamalamaaga i le gafatia o le Faaola e fesoasoani ia i tatou e faamagalo atu.

I lenei tala, e mafai ona vaai ia Apikaila o se ituaiga mamana po o se faatusa o Iesu Keriso. E ala i Lana taulaga togiola, e mafai ai e Ia ona tatala i tatou mai le agasala ma avega mamafa o se loto ita ma aumaia le tausiga lagolago tatou te manaomia.

E pei lava ona naunau ia Apikaila e tauave le agasala a Napalu i ona lava luga, sa faapena foi le Faaola—i se ala e le mafuatiaina—na Ia tauave ai i Ona luga a tatou agasala ma agasala a i latou e faatiga ma faatausuai ia i tatou. …

O le aumaia e Apikaila o le tele o meaai ma mea e moomia e mafai ona aoao ai i tatou faapea, ua ofoina mai e le Faaola ia i latou o e na tiga ma faamanu’alia, o meaai ma le fesoasoani tatou te manaomia e faamaloloina ma faaatoatoaina ai. …

E pei lava ona sa fesoasoani Apikaila ia Tavita ia aua nei i ai se “tiga o le finagalo” [1 Samuelu 25:31] ma ia maua le fesoasoani sa ia manaomia, o le a fesoasoani foʻi le Faaola ia te oe. (“Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 36–37)

Valaaulia tagata aoga e faasoa mai se mea na anoa ia i latou mai faamatalaga a Sister Yee. A o faasoa mai tagata aoga, e mafai ona e suia foliga e faatusa ia Apikaila i le faatusa o Iesu Keriso na e faaalia i le amataga o le lesona, ma tuu le faatusa o le Faaola i le va o foliga o Napalu ma Tavita.

E faapefea ona fesoasoani le Faaola ia i tatou ia faamagalo atu i isi?

Faitau le 1 Samuelu 25:32–35, vaavaai pe na faapefea ona aafia Tavita i amioga a Apikaila.

O a ni o tatou lagona talitutusa pe a tatou maua le fesoasoani a le Faaola e faamagalo atu ai i isi?

Faaali atu le malamalama

Tuu atu i tagata aoga se avanoa e faailoa atu ai mea ua latou malamalama i ai e uiga i le gafatia e le Faaola e fesoasoani ai ia i latou e faamagalo atu i isi. O se tasi nei o auala e mafai ona e faatinoina ai lenei mea.

Faamaea le mea lenei i lau api talaaga mo suesuega:

Tusi se foliga e faatusa i ou lagona pe a faatiga pe faatausuai se tasi ia te oe.
I autafa o lena ata, tusi se foliga e faatusa i se tagata atonu na faatiga ia te oe.
I le va o ata e lua, fai se lisi o mea ua e malamalama ai e uiga i le Faaola lea e mafai ona fesoasoani ia te oe e faamagalo atu ai i isi.

Mafaufau e valaaulia tagata aoga e faasoa mai mea latou te iloa e uiga i le Faaola. E mafai foi ona e uunaia i latou e faasoa atu mea ua latou aoaoina ma isi i fafo atu o le vasega. Faaopoopo atu lau molimau i le fesoasoani ua ofoina mai e le Faaola ia i tatou a o tatou taumafai e faamagalo atu i isi.

O Punaoa Faaopoopo

O le a se mea e mafai ona ou faia pe a faafaigata ona ou faamagalo atu?

Na aoao mai Peresitene Russell M. Nelson:

E ono faigata matuitui le lafoaia o le ita lea e lagonaina le matua tauamiotonuina. E foliga mai e ono le mafai ona faamagalo i latou o a latou amioga faataumaoi ua manunua ai e ta’umamaina. Ae peitai, sa apoapoai mai le Faaola ia i tatou ia “faamagalo atu i tagata uma” [Mataupu Faavae ma Feagaiga 64:10]. …

Afai e foliga mai e faafaigata ona faamagalo atu, aioi atu mo le mana e ala i le toto togiola o Iesu Keriso e fesoasoani ia te oe. A e faia lenei mea, ou te folafola atu le filemu patino ma se puna tele o le malosiaga faaleagaga.

Ina ua togiola le Faaola mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, faamalosiau, ma le togiola. (“O Le Mana o le Malosiaga Faaleagaga,” Liahona, Me 2022, 97, 100)

Na aoao mai Sister Kristin M. Yee o le Au Peresitene Aoao a le Aualofa:

10:7

Ia i latou uma o e loto momomo, faapagotaina, faasauaina, ma atonu ua faatauasoina i le tiga po o le agasala, ua Ia ofoina mai le faamalologa, faafoisia le malosi, ma le laveaiga. Ou te molimau atu e moni le faamalologa ma le faafoisia o le malosi ua Ia ofoina mai. O le taimi o lena faamalologa e eseese mo tagata taitoatasi, ma e le mafai ona tatou faamasinoina le taimi o le isi. E taua lo tatou faatagaina mo i tatou lava o le taimi e tatau ai ona faamalolo ai ma ia agalelei ia i tatou lava i le faagasologa. E alofa mutimutivale pea lava le Faaola ma e gauai mai, ma e tulai saunia e tuuina mai le fesoasoani tatou te moomia [tagai i le Alema 7:11–12]. (“Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 38)

Gaoioiga Faaopoopo e Aoao Ai

O le auala e fesoasoani ai le Faaola ia te au e faamagalo atu

Mafaufau pe faapefea ona fesoasoani i tagata aoga ia iloa ni auala patino e mafai ona fesoasoani ai le Faaola ia i latou e faamagalo atu. E mafai ona e fesoasoani i tagata aoga e sue mau e faamautu ai e mafai e le Faaola ona faia mo i tatou le mea na faia e Apikaila mo Tavita. O nisi o mau e mafai ona e faaaogaina o loo lisiina i lalo.

Apikaila	O Le Faaola
Apikaila Tuuina mai le lagolagosua tele (1 Samuelu 25:18)	O Le Faaola Fesoasoani mai ia i tatou i o tatou manaoga (Alema 7:11–12; Mataupu Faavae ma Feagaiga 62:1)
Apikaila Na ia tauaveina i ona luga mea sese a Napalu (1 Samuelu 25:24)	O Le Faaola Ave agasala a le lalolagi i Ona lava luga (Alema 7:13; 3 Nifae 11:11)
Apikaila Na talosaga atu ia Tavita e faamagalo o ia mo mea sese a Napalu (1 Samuelu 25:28)	O Le Faaola Aioi atu i lo tatou faamoemoe i luma o le Tama e avea ma o tatou Fautua (Mataupu Faavae ma Feagaiga 45:3–5)
Apikaila Galue e aveese le faanoanoa ma le faatausuai mai le loto o Tavita (1 Samuelu 25:31)	O Le Faaola Valaaulia Ona soo e faamagalo atu i isi (Mataupu Faavae ma Feagaiga 64:8–11)

Faatasi ai ma auala taitasi e lisi ai lau vasega, fesoasoani i tagata aoga e talanoa pe faapefea e le iloaina o mea o loo aoao mai e nei mau e uiga i le Faaola ona fesoasoani ia i tatou e faamagalo atu ai i isi.

Faataitaiga i onapo nei

Ina ia faaali atu i tagata aoga se faataitaiga o le auala e fesoasoani ai le Faaola ia i tatou e faamagalo atu, e mafai ona e matamata i le “Faamagaloga: Na Faamamaina Lau Avega” mai le faailo taimi 2:44 i le 4:04. I le vitio lenei, sa faasoa mai ai e se alii na maliu lona toalua ma nisi o le fanau i se faalavelave tau taavale le auala na fesoasoani ai le Faaola ia te ia e faamagalo le tagata na mafua ai le faalavelave.

8:24

O le isi filifiliga e mafai ona matamata le “Fiafia ma Faavavau” mai le faailo taimi 2:32 i le 4:23. I lenei tala, na faasoa mai ai e Elder Gerrit W. Gong o le Korama a le Au Aposetolo Toasefululua le auala na fesoasoani ai le Faaola i se uo e faamagalo lona tama ua maliu a’o ia anapogi, tatalo ma faia ona sauniga o le malumalu.

13:21

1 Samuelu 25:35. “Ua ou faalogo i lou siufofoga”

Nai lo le valaauliaina o tagata aoga e faaiu i atatusi i a latou api talaaga, e mafai ona e tuuina atu faatonuga nei:

Faitau le 1 Samuelu 25:32–35, vaavaai mo lagona o Tavita ia Apikaila ma ana taumafaiga e fesoasoani ia te ia e faamagalo atu ia Napalu.

O a upu po o fasifuaitau na faagaeetia ai oe?

Vaai faalemafaufau na e maua se avanoa e ta’u atu ai ia Iesu Keriso ou lagona e uiga ia te Ia i le fesoasoani ai ia te oe e faamagalo atu i isi. I lau api talaaga mo suesuega, tusi ai se faataitaiga puupuu o mea e ono mafai ona e fai atu ai ia te Ia.

2 Samuelu 5. Saili ma mulimuli ai i faatonuga faalelagi

Afai e i ai sou taimi faaopoopo i le vasega, atonu e aoga le talanoaina o upumoni faaopoopo mai faitauga o le vaiaso lenei o le Sau, Mulimuli Mai ia te Au .

Valaaulia tagata aoga e faasoa mai ni aafiaga na latou maua lea latou te le iloa ai le mea e fai. O faataitaiga e mafai ona aofia ai faaiuga faigata, taimi o le fefe, po o lagona o le le agavaa.

Faamalamalama atu ina ua uma ona faapaleina Tavita o le tupu o Isaraelu, atonu na oo foi ia te ia ni lagona faapena a o osofaia o ia e Filisitia i le tele o taimi.

Faitau le 2 Samuelu 5:17–25, vaavaai mo mea na faia e Tavita i taimi uma e osofaia ai e Filisitia.

O a ni mea na e aoaoina mai le faataitaiga a Tavita e mafai ona fesoasoani ia te oe i tulaga faigata?

Mafaufau e valaaulia tagata aoga e faailoga le fasifuaitau fai soo i le fuaiupu 19 ma le 23 faatasi ai ma le laina muamua i le fuaiupu 25. Fesoasoani ia i latou e faailoa mai e faapea, pe a tatou ole atu i le Tama Faalelagi mo se fesoasoani ma mulimuli i Ana faatonuga, e mafai ona tatou manuia.