Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

1 Samuela 1: “Kuo Tuku Mai ʻe [he ʻEikí] ʻa ʻEku Kole ʻA Ia Ne U Fai Kiate Iá”

“1 Samuela 1: ‘Kuo Tuku Mai ʻe [he ʻEikí] ʻa ʻEku Kole ʻA Ia Ne U Fai Kiate Iá,’” Fuakava Motuʻá – Tohi Lēsoni ʻa e Faiako Seminelí (2026)

“1 Samuela 1: ‘Kuo Tuku Mai ʻe [he ʻEikí] ʻa ʻEku Kole ʻA Ia Ne U Fai Kiate Iá,’” Fuakava Motuʻá – Tohi Lēsoni ʻa e Faiako Seminelí

Lute; 1 Samuela 1–7: Lēsoni 69

1 Samuela 1

“Kuo Tuku Mai ʻe [he ʻEikí] ʻa ʻEku Kole ʻA Ia Ne U Fai Kiate Iá”

Kuó ke fakatokangaʻi nai ʻokú ke tautapa ki he Tamai Hēvaní ki ha tāpuaki ʻoku ngali fiemaʻu ki ai hoʻo kātakí mo hoʻo tuí? Naʻe fakaʻamu ʻa ʻAna, ko ha fefine ʻIsileli angatonu, ke ʻi ai haʻane fānau. Neongo naʻe ʻikai fakahoko ʻene ngaahi holi fakaʻeiʻeikí “ʻi he taʻu kotoa pē” (1 Samuela 1:7), ka naʻe kei ngāue pē ʻa ʻAna ʻi he tui mo kole ki he Tamai Hēvaní ke maʻu ʻa e tāpuaki ko ʻení. Naʻe tali e ngaahi lotu fakatōkilalo ʻa ʻAná ʻi heʻene maʻu ʻa e nongá, fiefiá, mo ha kiʻi tamasiʻi naʻá ne fakahingoa ko Samuela. ʻE lava ke tokoni ʻa e lēsoni ko ʻení ke mahino ki he kau akó ʻe fanongo ʻa e Tamai Hēvaní ki heʻenau ngaahi lotu fakatōkilaló mo tāpuakiʻi kinautolu.

Teuteu ʻa e tokotaha akó: Fakaafeʻi e kau akó ke nau fakakaukau ki ha aʻusia ʻi ha taimi ne nau maʻu ai pe ko ha taha ʻoku nau ʻilo ha tali ki he lotú. ʻE lava ke teuteu ʻa e kau akó ke vahevahe ʻa e aʻusia ko iá ko ha konga ʻo e ʻekitivitī akó.

Ngaahi ʻEkitivitī Ako ʻOku Ala Fakahokó

ʻI he taimi ʻoku ongoʻi taʻetali ai e ngaahi lotú

Hili ha lēsoni semineli fekauʻaki mo e lotú, ʻoku haʻu haʻo kaungāmeʻa ʻo pehē atu, “ʻOku ou fai ʻeku lotú, ka ʻoku ʻikai ke u fakapapauʻi pe ʻoku tali kinautolu.” ʻI hoʻomo talanoá, ʻokú ne ʻeke atu ha fehuʻi ʻe tolu.

Te u lava fēfē ʻo tala pe ʻoku fanongo mo tali mai ʻe he Tamai Hēvaní ʻeku ngaahi lotú?
Ko e hā ha niʻihi ʻo e ngaahi founga ʻoku tali ai ʻe he Tamai Hēvaní e ngaahi lotú?
Ko e hā ha meʻa te u lava ʻo fai ke toe mahuʻingamālie ange ai ʻa ʻeku ngaahi lotu ki he Tamai Hēvaní?

Ko e ʻekitivitī ko ʻení ko ha sivi fakaekita ia. ʻOku fakaʻatā ʻe he ngaahi faingamālie ko ʻení ʻa e kau akó ke vakaiʻi ʻenau mahino lolotonga ki he ngaahi moʻoni te nau ako ʻi he kalasí. ʻE lava foki ke tokoni ia ke ʻilo ʻe he kau akó ʻa e meʻa te nau ala fiemaʻu pe fie akó.

ʻI ha meʻafua ʻo e 1 (maʻulalo) ki he 5 (māʻolunga), fakafuofuaʻi ʻa e tuʻunga falala ʻoku ke ongoʻi te ke lava ai ʻo tali ʻa e fehuʻi takitaha mei he tūkungá.

Fili ha fehuʻi ʻe taha ʻokú ke fie ako lahi ange ki ai ʻi he ʻahó ni. Hiki ʻa e fehuʻi ko iá ʻi hoʻo tohinoa akó. ʻI hoʻo akó, fekumi ki he fakahinohino ʻa e Laumālié ke tokoni ki hono tali e fehuʻi naʻá ke filí.

ʻOku fakaʻānaua ʻa ʻAna ki haʻane tama

ʻI he fonua ko ʻIfalemí, naʻe nofo ha tangata ʻIsileli angatonu ko ʻElikena mo hono ongo uaifí ko Penina mo ʻAna (naʻe ʻikai ko ha meʻa foʻou ʻa e mali tokolahí ʻi he taimi ko ʻení pea naʻe tali ia ʻe he ʻEikí).

Lau ʻa e 1 Samuela 1:1–8 ʻo kumi e ngaahi faingataʻa naʻe fehangahangai mo ʻAná. (Mahalo ko e “filí” ʻi he veesi 6 ko Penina.)

Ko e hā e meʻa naʻá ke maʻú?
Kapau naʻá ke fefaʻuhi mo ha ngaahi faingataʻa fakataautaha hangē ko ʻAná, ko e hā e meʻa te ke fakakaukau ki ai pe ongoʻí?

Lau ʻa e 1 Samuela 1:9–20 mo e 2:1–2 ʻo kumi e meʻa naʻe fai ʻe ʻAna ko e tali ki heʻene ngaahi faingataʻaʻiá.

Ko e hā e meʻa naʻá ke ʻiló?
Ko e hā ha meʻa te tau lava ʻo ako fekauʻaki mo e Tamai Hēvaní mo e lotú mei he talanoa ko ʻení?

ʻE lava ke vahevahe ʻe he kau akó ha ngaahi fakakaukau kehekehe. Fakamālō ange pea fehuʻi ange pe ko e hā e ʻuhinga ʻoku mahuʻinga ai ke ʻiloʻi e meʻa ne nau ʻiló. Kapau he ʻikai talaatu ʻe he kau akó ʻa e moʻoni ko ʻení, hiki ia ʻi he palakipoé pea fehuʻi ange pe ʻoku hoko fēfē ʻa e talanoa ʻo ʻAná ko ha fakamoʻoni ki ai: ʻI heʻetau tautapa ki he Tamai Hēvaní ʻi he lotu fakatōkilaló, ʻokú Ne fanongo mo tāpuakiʻi kitautolu.
Ko e hā ha niʻihi ʻo e ngaahi foʻi lea pe kupuʻi lea ʻi he 1 Samuela 1:9–20 ʻokú ne fakahaaʻi naʻe loto-fakatōkilalo mo mahuʻingamālie ʻa e ngaahi lotu ʻa ʻAná?
Fakatatau ki he veesi 17–18, ko e hā e fakafiemālie naʻe foaki ʻe he ʻEikí kia ʻAna lolotonga ʻene tatali ke tāpuekina ʻaki ia ha kiʻi tamasiʻí?

ʻOku fanongo mai ʻa e Tamai Hēvaní ki heʻetau ngaahi lotú mo tāpuakiʻi kitautolu

Te ke lava ʻo fakaʻaongaʻi ʻa e ʻekitivitī ko ʻení ke fakaloloto ʻa e mahino ʻa e kau akó ki he moʻoni naʻa nau ʻiloʻi ʻi ʻolungá pea tali ʻa e ngaahi fehuʻi ʻe tolu mei he kamataʻanga ʻo e lēsoní. Ko e founga ʻe taha ke fai ai ʻení ko hono ʻomi pe fakaʻaliʻali ʻa e ngaahi fakahinohino ʻi laló ki he fehuʻi takitaha (A, E, mo e F). Te ke lava ʻo tuku ke fili e kau akó pe te nau ako fakafoʻituitui pe ngāue ʻi ha kiʻi kulupu tokosiʻi mo e kau ako kehe naʻa nau fili ʻa e fehuʻi tataú. Te ke lava foki ʻo fakakulupu tautau toko tolu ʻa e kau akó, pea fili ʻe he tokotaha takitaha ha fehuʻi kehe ke ako. Te nau lava ‘o vahevahe ʻa e meʻa ʻoku nau ‘iló mo e kulupú.

Fehuʻi A: ʻE tokoni fēfē nai e talanoa ʻo ʻAná ki ha taha ke tui ʻoku fanongo ʻa e Tamai Hēvaní ki heʻenau ngaahi lotú mo tāpuakiʻi kinautolú?

Fakaʻaongaʻi e ngaahi meʻangāue ki he ako folofolá hangē ko e Fakahinohino ki he Ngaahi Folofolá, pea mo e Gospel Library ke kumi ha ngaahi potufolofola pe fakamatala mei ha taki ʻo e Siasí ʻe lava ʻo tokoni ke mahino ki ha taha ʻoku tali ʻe he Tamai Hēvaní ʻa e ngaahi lotú (hangē ko ʻení, Sēmisi 1:5–6; ʻĪnosi 1:2–10; 3 Nīfai 18:20; Tokāteline mo e Ngaahi Fuakava 90:24).

Fehuʻi E:ʻE tokoni fēfē nai ʻa e talanoa ʻo ʻAná ke mahino ki ha taha ha niʻihi ʻo e ngaahi founga ʻoku tali mai ai ʻe he Tamai Hēvaní ʻenau ngaahi lotú?

Fakaʻaongaʻi e ngaahi meʻangāue ki he ako folofolá hangē ko e Fakahinohino ki he Ngaahi Folofolá, pea mo e Gospel Library ke kumi ha ngaahi fakamatala fakafolofola pe fakamatala mei ha takimuʻa ʻo e Siasí ʻe lava ʻo tokoni ke mahino ki ha taha ha niʻihi ʻo e ngaahi founga ʻoku tali ai ʻe he Tamai Hēvaní ʻa e ngaahi lotú (hangē ko ʻení, Luke 22:39–44; 2 Kolinitō 12:7–9; Mōsaia 24:10–16; Tokāteline mo e Ngaahi Fuakava 6:22–23; 8:2–3).

Fehuʻi F:ʻE tokoni fēfē nai ʻa e talanoa ʻo ʻAná ki ha taha ke feinga ke toe loto-fakatōkilalo mo mahuʻingamālie ange ʻenau ngaahi lotú?

Fakaʻaongaʻi ʻa e ngaahi meʻangāue ki he ako folofolá hangē ko e Fakahinohino ki he Ngaahi Folofolá, pea mo e Gospel Library ke kumi ha ngaahi potufolofola pe fakamatala mei ha taki ʻo e Siasí ʻe lava ʻo tokoni ki ha taha ʻokú ne fie ʻai ʻenau ngaahi lotú ke toe loto-fakatōkilalo mo mahuʻingamālie ange (hangē ko ʻení, ʻĪnosi 1:2–10; ʻAlamā 5:45–46; ʻEta 3:1–5; Tokāteline mo e Ngaahi Fuakava 46:30).

Fakahaaʻi ʻa e mahinó

Ke tokoni ke vahevahe ʻe he kau akó ʻa e meʻa kuo nau ako mo ongoʻi ʻi he ʻaho ní, te nau lava ʻo hoa mo ha taha naʻá ne ako ha taha ʻo e ngaahi fehuʻi kehé pea nau feakoʻiʻaki. Te ke lava ʻo fakaloloto e fealeaʻakí ʻaki hono fakaafeʻi e kau akó ke vahevahe ʻenau ngaahi fakakaukaú mo e kalasí pea poupouʻi e kau ako ne nau ako e ngaahi fehuʻi kehé ke tānaki atu ha ngaahi fakakaukau kehe.

ʻI hoʻo fakaʻosi e kalasí, fakapapauʻi ange ki he kau akó, hangē ko ʻAná, kuo pau ke tau tatali ʻi he taimi ʻe niʻihi ki he Tamai Hēvaní ke tali ʻetau ngaahi lotú. ʻI Heʻene foungá mo ʻEne taimí, ʻoku fanongo mai ʻa e Tamai Hēvaní ki heʻenau ngaahi lotú pea te Ne tāpuakiʻi kinautolu.

Ngaahi Maʻuʻanga Tokoni Kehé

Te tau lava fēfē ʻo ʻai ʻetau ngaahi lotú ke mahuʻingamālie angé?

Naʻe akonaki ʻa Palesiteni Lāsolo M. Nalesoni ʻo pehē:

20:28

Ko e hā e poto ʻokú ke masiva aí? Ko e hā ʻokú ke ongoʻi ko ha meʻa mahuʻinga ʻoku fiemaʻu ke ke ʻilo pe mahino kiate koé? Muimui ki he tā sīpinga ʻa e Palōfita ko Siosefa Sāmitá. Kumi ha feituʻu longonoa te ke lava ʻo toutou ʻalu ki ai. Fakavaivaiʻi koe ʻi he ʻao ʻo e ʻOtuá. Fakahā hake ho lotó ki hoʻo Tamai Hēvaní. Tafoki kiate Ia ke maʻu ha ngaahi tali mo ha fakafiemālie.

Lotu ʻi he huafa ʻo Sīsū Kalaisí fekauʻaki mo hoʻo ngaahi hohaʻá, manavasiʻí, mo ho ngaahi vaivaí—ʻio, ʻa e ngaahi fakaʻānaua ʻo ho lotó. Peá ke fakafanongo leva! Tohi ʻa e ngaahi fakakaukau ʻoku haʻu ki ho ʻatamaí. Hiki e ngaahi meʻa ʻokú ke ongoʻí pea fakahoko ʻa e meʻa naʻe ueʻi koe ke ke faí. ʻI hoʻo toutou fai ʻeni ʻi he ʻaho ki he ʻaho, māhina ki he māhina, taʻu ki he taʻú, te ke “tupulaki ʻi he tefitoʻi moʻoni ʻo e fakahaá.”

ʻOku fiemaʻu moʻoni nai ʻe he ʻOtuá ke folofola atu kiate koe? ʻIo! (“Fakahā maʻá e Siasí, Fakahā ki Heʻetau Moʻuí,” Liahona, Mē 2018, 95)

Naʻe fakamatala ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:40

ʻI heʻetau fakakaukau ki he angalelei ʻa ʻetau Tamai Hēvaní mo Sīsū Kalaisí, ʻoku tupulaki ʻa ʻetau falala kiate Kinauá. ʻOku liliu ʻetau ngaahi lotú he ʻoku tau ʻiloʻi ko e ʻOtuá ʻa ʻetau Tamaí pea ko ʻEne fānau kitautolu. ʻOku ʻikai ke tau feinga ke liliu ʻa Hono finangaló ka ke fakafenāpasi hotau lotó mo Hoʻoná pea maʻu maʻatautolu e ngaahi tāpuaki ʻokú Ne finangalo ke foakí, ʻo makatuʻunga ʻi heʻetau kolea kinautolú. ʻOku tau fakaʻamua ke tau angavaivai ange, toe maʻa ange, tuʻu taʻeueʻia ange, pea anga faka-Kalaisi ange. ʻOku fakafeʻungaʻi kitautolu ʻe he ngaahi liliú ni ke tau maʻu ha toe ngaahi tāpuaki fakalangi. (“Fakakaukau ki he Angalelei mo e Māfimafi ʻo e ʻOtuá,” Liahona, Mē 2020, 43)

Naʻe fakamanatu mai ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:11

ʻOua ʻaupito naʻá ke tālafili [ki he ʻofa ʻa e ʻOtuá maʻaú], pea ʻoua ʻaupito naʻá ke fakafefeka ho lotó. Tulifua faivelenga ki he ngaahi founga fakalotu ʻoku nau ʻomi ʻa e Laumālie ʻo e ʻEikí ki hoʻo moʻuí. Kumi faleʻi mei he niʻihi ʻoku nau maʻu ʻa e ngaahi kī ki hoʻo lelei fakalaumālié. Kole peá ke mataʻikoloaʻaki ʻa e ngaahi tāpuaki ʻo e lakanga fakataulaʻeikí. Maʻu fakauike ʻa e sākalamēnití peá ke pikitai ki he ngaahi talaʻofa haohaoa ʻo e Fakalelei ʻa Sīsū Kalaisí. Tui ki he ngaahi maná. Kuo lahi ha ngaahi mana kuó u mātā neongo hono talamai he ʻikai toe felave ha meʻá. ʻOku ʻikai mole ia. Kapau he ʻikai hoko mai leva mo kakato e ngaahi mana ko iá pe hangehangē ka ʻikai pē ke hoko maí, manatuʻi ʻa e sīpinga ne tā ʻe he Fakamoʻuí Heʻene mamahí: kapau he ʻikai fakalaka ʻa e ipu mahí meiate koe, inu ia peá ke toʻa, ʻo falala ʻoku ʻi ai ha ngaahi ʻaho fakafiefia ʻoku toka mei muʻa. (“Hangē ha Ipu Kuo Maumaú,” Liahona, Nōvema 2013, 40–41)

Ngaahi ʻEkitivitī Fakalahi ki he Akó

Ongoʻi e mālohi ʻo e lotú

ʻE lava ke tokoni ʻa e foʻi vitiō “I Pray When … #didyouthinktopray” (1:56) ke fakalaulauloto ʻa e kau akó ki he taimi ʻoku nau fakakaukau ai ke lotú. Fakakaukau ke ʻoange ha pepa mo ha ngaahi peni fakaʻilonga pea fakaafeʻi e kau akó ke faʻu haʻanau laʻipepa #didyouthinktopray pē ʻanautolu. ʻE lava ke faʻu ʻe he kau akó ha vitiō kuo fakatahatahaʻi ʻo e kalasí pea tuku hake ia ʻi he mītia fakasōsialé.

1:56

ʻE lava ke tokoni ʻa e foʻi vitiō “God Wants You to Pray” (3:28) ke mahino ki he kau akó ʻoku ʻikai ʻaupito ha meʻa te nau lava ʻo fai te ne ʻai kinautolu ke nau taʻetaau ke lotu ki he Tamai Hēvaní.

3:29

ʻOku fakatapui ʻe ʻAna ʻa Samuela ki he ʻEikí

Mahalo ʻe ngali kehe ki he kau akó e palōmesi ʻa ʻAna te ne foaki ki he ʻEikí hono foha ko Samuelá. Tokoni ke mahino ki he kau akó ʻa e tefitoʻi moʻoni ʻo e fakatapuí, ʻa ia ko ʻetau palōmesi ia ke foaki kiate Ia ʻa e meʻa kotoa pē kuo tāpuekina ʻaki kitautolu ʻe he Tamai Hēvaní koeʻuhí ko ʻEne ngaahi taumuʻá (vakai, “Consecration,” ʻi he Topics and Questions). Te ke lava ʻo fakaafeʻi e kau akó ke hiki ha lisi ʻi he palakipoé ʻo e ngaahi tāpuaki kuo foaki ange ʻe he ʻEikí kiate kinautolú. Fakaafeʻi leva e kau akó ke aleaʻi e founga te nau lava ai ʻo foaki pe fakatapui e meʻa takitaha ki he ʻEikí ke fakahoko ʻEne ngaahi taumuʻá. Hili iá, ʻe lava ke ako ʻe he kau akó ʻa e 1 Samuela 2:18–21, ʻo kumi e founga naʻe tāpuekina ai ʻe he ʻEikí ʻa ʻAna mo ʻElikena ʻi heʻena loto-fiemālie ke foaki ʻa Samuela ki he ʻEikí. ʻE hoko ʻa Samuela ko e palōfita ʻa e ʻEikí ki ʻIsileli.

1 Samuela 2:1–10: Saame ʻa ʻAná

Ke tokoni ke fakahaaʻi ʻe he kau akó ʻenau mahino ʻoku tali ʻe he Tamai Hēvaní ʻa e ngaahi lotú, te ke lava ʻo fakaafeʻi e kau akó ke nau ako ʻa e saame ʻa ʻAná ʻi he 1 Samuela 2:1–10. ʻE lava ke kumi ʻe he kau akó ha ngaahi foʻi lea mo ha ngaahi kupuʻi lea ʻoku nau fakahaaʻi ʻa e meʻa naʻe ako ʻe ʻAna fekauʻaki mo e ʻEikí ʻo fakafou ʻi heʻene aʻusiá. Hili iá pea fakaafeʻi e kau akó ke faʻu ʻenau saame pē ʻanautolu ʻi heʻenau tohinoa akó. ʻE lava ke hiki ʻe he kau akó ʻa e meʻa kuo nau ako fekauʻaki mo e Tamai Hēvaní, Sīsū Kalaisi, mo e mālohi ʻo e lotú.