“1 Samuelu 1: ‘Ua Tuuina Mai e le Alii ia te A’u Laʻu Talosaga na ou Ole Atu ai ia te Ia,’” Tusi Lesona a le Faiaoga Seminare o le Feagaiga Tuai (2026)
“1 Samuelu 1: ‘Ua Tuuina Mai e le Alii ia te A’u Laʻu Talosaga na ou Ole Atu ai ia te Ia,’” Tusi Lesona a le Faiaoga Seminare o le Feagaiga Tuai
Ruta; 1 Samuelu 1–7: Lesona 69
1 Samuelu 1
“Ua Tuuina Mai e le Alii ia te A’u La’u Talosaga na Ou Ole Atu ai ia te Ia”
Pe ua e aioi atu ea i le Tama Faalelagi mo se faamanuiaga e foliga mai e manaomia ai lou onosai ma le faatuatua? O Hana, o se fafine Isaraelu amiotonu, sa ia moomoo ina ia maua sana tama. E ui lava o ona manaoga mamalu sa le’i faataunuuina “i lea tausaga ma lea tausaga” (1 Samuelu 1:7), sa faaauau pea ona galue Hana i le faatuatua ma augani atu i le Tama Faalelagi mo lenei faamanuiaga. Na taliina tatalo lotomaulalo a Hana a o ia mauaina le filemu, olioli, ma se tamaitiiti sa ia faaigoaina o Samuelu. E mafai ona fesoasoani lenei lesona i tagata aoga ia malamalama o le a faafofoga mai le Tama Faalelagi i a latou tatalo lotomaulalo ma faamanuia i latou.
Sauniuniga a le tagata aoga: Valaaulia tagata aoga e mafaufau i se aafiaga na latou oo i ai po o se tasi latou te iloa na mauina se tali i se tatalo. E mafai ona saunia tagata aoga e faasoa atu lena aafiaga o se vaega o le gaoioiga suesue.
Gaoioiga e ono Mafai Ona Aoao Ai
Pe a lagona ua le taliina tatalo
O musika faaaloalo e mafai ona valaaulia ai le Agaga Paia i totonu o lou potuaoga ma saunia ai loto ma mafaufau o tagata aoga mo le aafiaga o le aotauina. Mafaufau e amata le vasega i le valaaulia o tagata aoga e filifili se viiga e sili ona fiafia i ai o loo aoao mai ai le mana o le tatalo atu i le Tama Faalelagi. A o lei faia le tatalo amata, e mafai e le vasega ona usu pe faalogologo i le fuaiupu muamua o se pese e pei o le “Tatalo a se Tamaitiiti,” (Tusipese a Tamaiti, 12–13) po o le “Pe Na Faia Sau Tatalo?,” (Viiga, nu. 75). E mafai foi e tagata aoga ona matamata i se vitio talafeagai e pei o le “Are You Really There?” (3:46) po o le “Abide with Me,” (3:08) e maua i le ChurchofJesusChrist.org.
A’o e amataina le vasega, faaali atu le tulaga faataitai lenei po o se mea e talitutusa e talafeagai lelei ma manaoga o lau vasega. Mafaufau e tusi i luga o le laupapa.
I le mae’a ai o se lesona seminare e uiga i le tatalo, sa alu atu se uo ia te oe ma tautino atu, “E fai a’u tatalo, ae ou te le mautinoa pe taliina mai.” A o e tautala, e tolu fesili na ia fai mai.
-
E mafai faapefea ona ou iloa pe faafofoga mai le Tama Faalelagi ma tali mai i a’u tatalo?
-
O a nisi o auala e tali mai ai le Tama Faalelagi i tatalo?
-
O le a se mea e mafai ona ou faia e anoa atili ai a’u tatalo i le Tama Faalelagi?
O le gaoioiga lenei o se iloiloga patino faale-tagata lava ia. O nei avanoa e mafai ai e tagata aoga ona iloilo lo latou malamalamaaga i le taimi nei i upumoni o le a latou suesueina i le vasega. E mafai foi ona fesoasoani i tagata aoga e iloa ai mea atonu latou te moomia pe mananao foi e aoao.
I se fua o le 1 (maualalo) i le 5 (maualuga), faatulaga le mautinoa e te lagona e mafai ona e taliina ai fesili taitasi mai le tulaga faataitai.
Filifili se fesili se tasi e te fia aoao atili i ai i le asō. Tusi lena fesili i lau api talaaga mo suesuega. A o e suesue, saili le taitaiga a le Agaga e fesoasoani e tali ai le fesili na e filifilia.
Ua moomoo Hana mo sana tama
I le nuu o Efaraima, sa nonofo ai se tagata Isaraelu amiotonu e igoa ia Elekana ma ana ava e toalua, o Penina ma Hana (o faaipoipoga autaunonofo sa o se faiga taatele i le taimi lea ma sa taliaina e le Alii).
Faitau le 1 Samuelu 1:1–8 ma vaavaai mo luitau sa feagai ma Hana. (O le “fili” i le fuaiupu 6 atonu o Penina.)
-
O le a se mea na e tau i ai?
-
Afai sa e tauivi ma luitau patino e pei o Hana, o le a sou manatu po o ou lagona?
E ui e matuai eseese lava o latou tulaga masani, ae atonu e te fesili pe faapefea ona fesootai atu tagata aoga ia Hana.
A o suesue e tagata aoga le isi fuaitau o sosoo ai, atonu latou te maitauina i le taimi muamua o Eli, le faitaulaga sili, sa le malamalama i le tatalo lotomaulalo a Hana. Fesoasoani i tagata aoga e taulai atu ia Hana, le auala na ia tali atu ai ia Eli, ma le faamanuiaga na ia maua mai le Alii (tagai fuaiupu 20). Afai e aogā, ia faailoa atu a o laua talanoa faamaoni i le tasi ma le isi, na vave ona faasa’o e Eli lana mea sesē.
E mafai ona matamata tagata aoga i le vitio “Hannah’s Faith” (3:08) e maua i le ChurchofJesusChrist.org ma mulimuli i a latou tusitusiga paia. E mafai ona e taofia i le faailo taimi 1:03 ma valaaulia tagata aoga e faasoa mai o latou manatu e uiga i fuaiupu 9–13 ma toe taofi i le faailo taimi 1:30 e valaaulia ai tagata aoga e faasoa mai o latou manatu e uiga i fuaiupu 14–20.
Faitau le 1 Samuelu 1:9–20 ma le 2:1–2 ma vaavaai mo le mea na faia e Hana e tali atu ai i ona luitau.
-
O le a se mea na e iloa?
-
O le a se mea e mafai ona tatou aoao ai e uiga i le Tama Faalelagi ma le tatalo mai lenei tala?
E ono mafai e tagata aoga ona faasoa mai ni manatu eseese. Faafetai atu ia i latou ma fesili atu pe aisea e taua ai le iloa o mea na latou mauaina. Afai e le o ta’ua e tagata aoga le upumoni lenei, tusi i luga o le laupapa ma fesili atu pe faapefea ona avea le tala a Hana ma faamaoniga o lena mea: A o tatou augani atu i le Tama Faalelagi i le tatalo lotomaulalo, e faafofoga ma faamanuia e Ia i tatou.
-
O a nisi o upu po o fasifuaitau i le 1 Samuelu 1:9–20 e faaalia ai sa lotomaulalo ma anoa tatalo a Hana?
-
E tusa ai ma le fuaiupu 17–18, o le a le faamafanafanaga na tuuina mai e le Alii ia Hana a o faatalitali o ia ina ia faamanuiaina i se tama?
Atonu e fesoasoani le faailoa atu o i tatou, e pei o Hana, atonu e manaomia ona tatou faalagolago i le Alii ma faatalitali ma le onosai mo Ana faamanuiaga. Atonu e le tali mai o Ia i taimi uma i le ala tatou te faamoemoe i ai, ae e mafai ona tatou faatuatua e tali mai o Ia i tatalo e tusa ai ma Lona finagalo ma le mea e sili mo i tatou.
E mafai ona e faasoa atu se faataitaiga o se tatalo lotomaulalo, ma anoa lea sa lei taliina i le ala na faamoemoeina, e pei o le “How I #HearHim: Elder D. Todd Christofferson” (2:25) mai le ChurchofJesusChrist.org po o le “One–on–One (Ministering with Love)” (i le faailo taimi 7:24 i le 9:00). I se isi faiga, e mafai foi ona e faasoa atu se faataitaiga mai lou lava olaga.
E faafofoga mai le Tama Faalelagi i a tatou tatalo ma faamanuia i tatou
E mafai ona e faaaogaina le gaoioiga lenei e faaloloto ai le malamalama o tagata aoga i le upumoni na latou faailoaina i luga ma tali fesili e tolu mai le amataga o le lesona. O se tasi o auala e faia ai lenei mea o le tuuina atu lea pe faaali atu faatonuga o loo i lalo mo fesili taitasi (A, E, ma le I). E mafai ona e tuuina atu i tagata aoga le filifiliga e suesue taitoatasi pe galulue faatasi ma se vaega toalaiti faatasi ma isi tagata aoga o e na filifilia le fesili lava lea e tasi. E mafai foi ona e tuu tagata aoga i ni vaega e taitoatolu, ma o tagata taitoatasi ua filifilia fesili eseese e suesue iai. E mafai ona latou faasoa mai mea na latou maua i le vaega.
Fesili A: E mafai faapefea e le tala ia Hana ona fesoasoani i se tasi e talitonu e faafofoga mai le Tama Faalelagi i a latou tatalo ma faamanuia i latou?
Faaaoga meafaigaluega mo le suesueina o tusitusiga paia e pei o le Taiala o Autu, Taiala i Tusitusiga Paia, ma le Potutusi o le Talalelei e sue ai ni nai fuaitau o mau po o se faamatalaga mai se taitai o le Ekalesia e mafai ona fesoasoani i se tasi ia malamalama ai e tali mai le Tama Faalelagi i tatalo (mo se faataitaiga, Iakopo 1:5–6; Enosa 1:2–10; 3 Nifae 18:20; Mataupu Faavae ma Feagaiga 90:24).
Fesili E:E mafai faapefea e le tala ia Hana ona fesoasoani i se tasi ia malamalama i nisi o auala e tali mai ai le Tama Faalelagi i a latou tatalo?
Faaaoga meafaigaluega mo le suesueina o tusitusiga paia e pei o le Taiala o Autu, Taiala i Tusitusiga Paia, ma le Potutusi o le Talalelei e sue ai ni nai tala o tusitusiga paia po o se faamatalaga mai se taitai o le Ekalesia e mafai ona fesoasoani i se tasi ia malamalama i nisi o auala e tali mai ai le Tama Faalelagi i tatalo (mo se faataitaiga, Luka 22:39–44; 2 Korinito 12:7–9; Mosaea 24:10–16; Mataupu Faavae ma Feagaiga 6:22–23; 8:2–3).
Fesili I:E mafai faapefea e le tala ia Hana ona fesoasoani i se tasi e taumafai ia faia a latou tatalo ia lotomaualalo ma anoa sili atu?
Faaaoga meafaigaluega mo le suesueina o tusitusiga paia e pei o le Taiala o Autu, Taiala i Tusitusiga Paia, ma le Potutusi o le Talalelei e sue ai ni nai fuaitau o mau po o se faamatalaga mai se taitai o le Ekalesia e mafai ona fesoasoani i se tasi ia malamalama ai e tali mai le Tama Faalelagi i tatalo (mo se faataitaiga, Enosa 1:2–10; Alema 5:45–46; Eteru 3:1–5; Mataupu Faavae ma Feagaiga 46:30).
Faataitai le malamalama
Ina ia fesoasoani i tagata aoga e faasoa mai mea ua latou aoaoina ma lagonaina i le aso, e mafai ona latou paga ma se tasi na suesueina se tasi o isi fesili ma aoao e le tasi le isi. E mafai ona e faalolotoina le talanoaga e ala i le valaaulia o tagata aoga e faasoa mai o latou manatu i le vasega ma uunaia tagata aoga o e na suesueina isi fesili e faasoa atu ni malamalamaaga faaopoopo.
A o e faaiuina le vasega, faamautinoa atu i tagata aoga e faapea, ia faapei o Hana, o nisi taimi e tatau ona tatou faatalitali mo le Tama Faalelagi e tali mai i a tatou tatalo. I Lana lava ala ma le taimi, o le Tama Faalelagi e faafofoga i a latou tatalo ma o le a faamanuia i latou.