Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sosiua 1: He ʻIkai Fakatukutukuʻi Pe Siʻaki Kitautolu ʻe he ʻEikí

“Sosiua 1: He ʻIkai Fakatukutukuʻi Pe Siʻaki Kitautolu ʻe he ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“Sosiua 1: He ʻIkai Fakatukutukuʻi Pe Siʻaki Kitautolu ʻe he ʻEikí,” Fuakava Motuʻá – Tohi Lēsoni ʻa e Faiako Seminelí

Sosiua 1–8; 23–24: Lēsoni 61

Sosiua 1

He ʻIkai Fakatukutukuʻi Pe Siʻaki Kitautolu ʻe he ʻEikí

ʻI he hoko ʻa Sosiua ko e palōfita kuo fili ʻe he ʻEikí, naʻe fakanofo ia ʻe Mōsese ke ne tataki ʻa ʻIsileli ki he fonua ʻo e talaʻofá. Neongo naʻe ngali fakalotosiʻi ʻa e ngāué ni, ka naʻe fekauʻi ʻe he Fakamoʻuí ʻa Sosiua ke mālohi mo loto-toʻa, ʻaki ha talaʻofa he ʻikai ke Ne fakatukutukuʻi pe siʻaki ʻEne palōfitá (vakai, Sosiua 1:5–6). ʻE lava ke tokoni ʻa e lēsoni ko ʻení ke fakatupulaki e loto-falala ʻa e kau akó ʻe lava ke tokoniʻi kinautolu ʻe he ʻEikí ke nau mālohi mo loto-toʻa ʻi he taimi ʻoku nau fehangahangai ai mo e ngaahi faingataʻá.

Teuteu ʻa e tokotaha akó: Fakaafeʻi e kau akó ke fakakaukau ki ha ngaahi tūkunga ʻe ala fiemaʻu ai ke fakahaaʻi ʻe ha toʻu tupu ha loto-toʻa. ʻE lava ke kole ʻe he kau akó ki ha mēmipa ʻo e fāmilí pe kaungāmeʻa ha ngaahi aʻusia kuo nau maʻu ʻa ia ʻoku fiemaʻu ki ai ʻa e loto-toʻá.

Ngaahi ʻEkitivitī Ako ʻOku Ala Fakahokó

Loto-toʻa ʻi he fehangahangai mo e ngaahi faingataʻá

Ke kamata ʻa e kalasí, fakakaukau ke hiki ʻa e foʻi lea Loto-toʻá ʻi he palakipoé. ʻI he tali ʻa e kau akó ki he ongo fehuʻi ko ʻení, fakaafeʻi kinautolu ke hiki ʻenau ngaahi talí ʻi he palakipoé.

Naʻe hoko fēfē nai ʻa Sīsū Kalaisi ko ha sīpinga ʻo e loto-toʻá?
Ko e hā ha ngaahi tūkunga ʻe ala fehangahangai mo ha toʻu tupu ʻe fiemaʻu ai ha loto-toʻa?

Hiki ʻi hoʻo tohinoa akó ha niʻihi ʻo e ngaahi faingataʻa ʻokú ke fehangahangai mo ia he taimí ni pe te ke fehangahangai mo ia ʻi he kahaʻú ʻoku fiemaʻu ki ai ʻa e loto-toʻá.

ʻE lava ke tokoni e siviʻi fakaekitá ke vakaiʻi ʻe he kau akó honau tūkunga lolotongá pea ʻoange ha faingamālie ki he Laumālie Māʻoniʻoní ke feau ʻenau ngaahi fiemaʻu fakafoʻituituí lolotonga e lēsoní. Ko e founga ʻe taha ʻe lava ke fakahoko ai ʻení ko hono fakaafeʻi e kau akó ke tali e ngaahi fakakaukau ko ʻení ʻi heʻenau tohinoa akó.

ʻI he taimi ʻoku kole mai ai ke u fai ha meʻa ʻoku ngali faingataʻá, ʻoku ou faʻa ongoʻi .
ʻI he meʻafua 1 (maʻulalo) ki he 5 (māʻolunga), ʻoku fēfē ʻeku loto-falala ʻe tokoniʻi au ʻe he Tamai Hēvaní mo Sīsū Kalaisi ke u fehangahangai loto-toʻa mo hoku ngaahi faingataʻaʻiá? Ko e hā hono ʻuhingá?

ʻI hoʻo ako he ʻaho ní, tokanga ki he ngaahi ueʻi mei he Laumālie Māʻoniʻoní ʻe lava ʻo tokoni atu ke ke loto-toʻa mo fakatupulaki hoʻo loto-falala ʻoku ʻiate koe ʻa e ʻEikí.

Ko e fakanofo ʻa Sosiua ke ne tataki e fānau ʻa ʻIsilelí

Fakakaukau ke fakaʻaliʻali ha fakatātā ʻo hono fakanofo ʻe Mōsese ʻa Sosiuá, hangē ko e laʻiʻata mei he kamataʻanga ʻo e lēsoni ko ʻení (vakai, Teutalōnome 34:9).

Neongo kuo feʻao ʻa Mōsese mo e fānau ʻa ʻIsilelí talu mei hono fakahaofi kinautolu mei ʻIsipité, ka naʻe ui ʻe he ʻEikí ʻa Sosiua kene tataki kinautolu ki he fonua ʻo e talaʻofá.

Ko e hā ha niʻihi ʻo e ngaahi faingataʻa naʻe mei fehangahangai mo Sosiua ʻi heʻene hoko ko e palōfita ʻa e ʻEikí mo e taki fakakautau ʻo ʻIsilelí?

Tokoni ke mahino ki he kau akó ʻe maʻu ʻe Sosiua ʻa e fatongia ʻo e taki fakalaumālie ʻo ʻIsilelí. Naʻe hoko foki ʻa Sosiua ko e ʻeikitau fakakautaú pea te ne tataki ʻa ʻIsileli ke nau ikunaʻi ʻa e fonuá mei he kau Kēnani naʻe kakato ʻenau faiangahalá (vakai, 1 Nīfai 17:31–40). Naʻe talaʻofa ʻe he ʻEikí ʻa e fonuá ni kia ʻĒpalahame mo hono hako angatonú (vakai, Sosiua 1:1–4).

Lau ʻa e Sosiua 1:5–9, ʻo fakaʻilongaʻi ʻa e ngaahi talaʻofa mo e ngaahi fakahinohino mei he ʻEikí naʻe mei lava ʻo tokoni kia Sosiua ke tokanga taha kiate Ia ʻi he taimi ʻoku fehangahangai ai mo e ngaahi faingataʻá.

Ko e hā ha meʻa ʻokú ke maʻu ʻoku mahuʻinga mei he ngaahi veesi ko ʻení?
Te ke fakamatalaʻi fakanounou fēfē ha foʻi moʻoni ke tokoni ki ha taha ʻokú ne foua ha ngaahi faingataʻá?

ʻI hono vahevahe ʻe he kau akó ha ngaahi moʻoni kuo nau ʻiló, tokoni ke nau ʻiloʻi ʻi he taimi ʻoku tau ʻiloʻi ai ʻoku ʻiate kitautolu ʻa e ʻEikí, te tau lava ʻo maʻu ha mālohi mo e loto-toʻa. Te ke lava ʻo fakaʻaongaʻi ha niʻihi pe kotoa ʻo e ngaahi fehuʻi ko ʻení ke tokoni ke mahino ki he kau akó ʻa e foʻi moʻoni ko ʻení. ʻE lava ke ngāue ʻa e kau akó mo ha hoa pe kulupu tokosiʻi pea vahevahe ʻa e meʻa naʻa nau aleaʻí mo e kalasí.

Fakakaukau ki he ngaahi tūkunga faingataʻa ʻoku hiki ʻi he palakipoé pea ʻi hoʻo tohinoá.

ʻE fēfē nai ʻa e mālohí mo e loto-toʻá ʻi he taimi ʻoku tau fehangahangai ai mo e ngaahi faingataʻa ko ʻení?
Ko e hā e meʻa ʻokú ke ʻilo fekauʻaki mo e ʻEikí ʻe lava ʻo tokoni ki ha taha ke mālohi mo loto-toʻa? ʻOku fēfē hoʻo ʻilo ʻení?

Lau ʻa e Tokāteline mo e Ngaahi Fuakava 84:88, ʻo kumi ha ngaahi founga ʻoku tau kau fakataha ai mo e ʻEikí.

Ngaahi founga ke fakaafeʻi ai e tokoni ʻa e ʻEikí

ʻE lava ke tokoni ʻa e ongo ʻekitivitī ko ʻení ki he kau akó ke nau ʻiloʻi ha ngaahi founga ke fakaafeʻi ai ʻa e tokoni ʻa e ʻEikí ʻi he taimi ʻoku fiemaʻu ai ke nau mālohi mo loto-toʻá. Fakaafeʻi e kau akó ke fili ha taha ʻo e ongo ʻekitivitií. Hili ha taimi feʻunga, ʻe lava ke vahevahe ʻe he kau akó ʻa e meʻa naʻa nau akó mo kinautolu naʻa nau fili ʻa e ʻekitivitī ʻe tahá.

Te ke lava ʻo ʻoange ha taha ʻo e ongo fakamatala ʻoku maʻu ʻi he Ngaahi Maʻuʻanga Tokoni Kehé ke ako ʻe he kau akó ʻi he ʻekitivitī takitaha.

ʻEkitivitī A: Talangofua ki he fono ʻa e ʻOtuá

Lau ʻa e Sosiua 1:7 mo ha taha ʻo e ngaahi potufolofola ko ʻení pe ha ngaahi potufolofola lahi ange: Sione 15:10; 1 Nīfai 3:7; Mōsaia 2:41; Tokāteline mo e Ngaahi Fuakava 93:20.

Ko e hā ha ngaahi fehokotaki ʻokú ke vakai ki ai ʻi he talangofua ki he ngaahi fekau ʻa e ʻOtuá mo e mālohí mo e loto-toʻá?
Ko e hā ha ngaahi founga ʻe lava ke tāpuekina ai kitautolu ʻe he Tamai Hēvaní mo Sīsū Kalaisi koeʻuhí ko ʻetau talangofuá?

ʻEkitivitī E: Fakalaulauloto ki he folofola ʻa e ʻOtuá

Lau ʻa e Sosiua 1:8 mo ha taha ʻo e ngaahi potufolofola ko ʻení pe ha ngaahi potufolofola lahi ange: 2 Tīmote 3:15–17; 2 Nīfai 31:20; 32:3.

Ko e hā e meʻa ʻokú ne tokoniʻi koe ke fakalaulauloto ki he folofolá?
ʻOkú ke pehē ʻe tokoni fēfē hoʻo fakalaulauloto ki he folofola ʻa e ʻOtuá ke ke ongoʻi ofi ai kiate Iá?

Two people sitting at a table. Text boxes representing communication.

Ko hono manatuʻi ʻoku ʻiate kitautolu ʻa e ʻEikí

Ko e hā ha ngaahi founga kuó ke ongoʻi ai ʻokú ke kau mo e ʻEikí lolotonga hoʻo ngaahi faingataʻaʻiá?

ʻOange ha faingamālie ki he kau akó ke nau fakakaukau ai ki he meʻa kuo nau ako mo ongoʻi he ʻaho ní. Te nau lava ʻo fakaafeʻi ʻa e Laumālié ke tokoniʻi kinautolu ke vakai ki he founga kuo fakatupulaki ai ʻe heʻenau ngaahi feingá ʻenau falala ʻe ʻiate kinautolu ʻa e ʻEikí.

ʻI hoʻo tohinoa akó, fakakaukau ki he ngaahi faingataʻa ʻokú ke fehangahangai mo ia he taimí ni pe te ke fehangahangai mo ia ʻi he kahaʻú.

Ko e hā ha meʻa kuó ke ako pe ongoʻi fekauʻaki mo e Tamai Hēvaní mo Sīsū Kalaisi ʻe lava ʻo tokoni atu ke ke mālohi mo loto-toʻa ʻi he taimi ʻokú ke fehangahangai ai mo e ngaahi faingataʻá?
Mei he meʻa naʻá ke ako pe ongoʻi fekauʻaki mo e Tamai Hēvaní mo Sīsū Kalaisí, ko e hā ʻokú ke fie manatuʻi ʻi he taimi hoko te ke ongoʻi veiveiua ai fekauʻaki mo hoʻo malava ke matuʻuaki ha tūkunga faingataʻá?

Fakakaukau ke vahevahe hoʻo fakamoʻoní ʻe tauhi ʻe he ʻEikí ʻEne talaʻofa ke Ne ʻiate kitautolu maʻu ai peé, ʻo ʻikai teitei fakatukutuku pe siʻaki ai kitautolu, ʻo hangē pē ko ʻEne talaʻofa kia Sosiuá.

Ngaahi Maʻuʻanga Tokoni Kehé

Ko e hā ʻoku mahino kiate kitautolu fekauʻaki mo e pekia ʻa Mōsesé? (Teutalōnome 34:5–7; Sosiua 1:1–2)

Neongo ʻoku talanoa ha ngaahi veesi lahi ʻi he Fuakava Motuʻá ki he pekia ʻa Mōsesé, ka ʻoku tau ʻilo mei hono fakafoki mai ʻo e folofolá naʻe ʻikai foua ʻe Mōsese ʻa e maté (vakai, ʻAlamā 45:19) ka naʻe liliu ia. ʻOku ʻikai aʻusia ʻe he kakai ʻoku liliú ʻa e mamahí pe maté lolotonga e toenga taimi ʻo ʻenau ʻi he moʻui fakamatelié. Pea ʻoku nau toetuʻu leva ki he moʻui taʻe-faʻa-maté (vakai, 3 Nīfai 28:8). ʻOku fakahoko ʻe he kakai sino liliú ha ngaahi ngāue pau ʻoku fiemaʻu ki ai ha sino fakamatelie. Naʻe hā ʻa Mōsese ʻi he Moʻunga ʻo e Liliú kimuʻa ʻi he Toetuʻu ʻa Sīsuú (Maʻake 9:2–4). Kapau ko ha laumālie pē ʻa Mōsese, naʻe ʻikai ke ne mei lava ʻo foaki ʻa e ngaahi kī ʻo e lakanga fakataulaʻeikí ki he kau tangata fakamatelie ko Pita, Sēmisi, mo Sioné ʻi he moʻungá (vakai, “Mōsese” ʻi he Fakahinohino ki he Ngaahi Folofolá).

ʻOku hoko fēfē ʻa Sosiua ko ha fakataipe ʻo Kalaisí?

ʻI he hoko ʻa Sosiua ko e taki fakatuʻasino mo fakalaumālie ʻo e kakai ʻIsilelí, ʻokú ne toe hoko foki ko ha fakataipe mo ha ʻata ʻo Sīsū Kalaisi. Ko e huafa Sīsuú ko e “tohi faka-Kaliki ia ʻo e hingoa Sosiuá pe Sesuá, ‘Ko e ʻOtuá ko e tokoni’ pe ‘Fakamoʻui’” (Bible Dictionary, “Jesus”). ʻE hoko ʻa Sosiua/Sesua/Sīsū ko e tokotaha ke ne tataki ʻa ʻIsileli ki he fonua ʻo e talaʻofá.

ʻE fakatupulaki fēfē ʻe he talangofuá ʻetau falala ki he ʻEikí?

Naʻe fakamatala ʻa Brother M. Siosefa Palau ʻo e Kau Palesitenisī Lahi ʻo e Kau Talavoú ʻo pehē:

ʻI homau fāmilí, ʻoku ʻi ai haʻamau kiʻi lea kuo hoko ko ha meʻa mahuʻinga ʻo ʻemau ngāue fakafaifekaú. Kuo fuoloa hono akoʻi ʻe Palesiteni Lāsolo M. Nalesoni ʻa e kupuʻi lea ko iá. Naʻá ne fai ia ʻi he founga ko ʻení: “ʻOku ʻomi ʻe he talangofuá e lavameʻá; pea ʻomi ʻe he talangofua kakató ha ngaahi mana.” (R. Scott Lloyd, “Elder Nelson Delivers Spiritual Thanksgiving Feast to MTCs,” newsroom.ChurchofJesusChrist.org)

ʻOku ʻikai mahino lelei kiate au ʻa e ʻuhinga ʻo e talangofua kakató, ka ko e meʻa ʻeni kuo mahino kiate aú. ʻOku ʻikai ko ʻeku ʻuhingá ʻoku mau talangofua kakato he taimí ni ʻi he ngaahi meʻa kotoa pē, neongo te tau lava pē ke tau talangofua kakato ki ha ngaahi fekau lahi ʻa e ʻEikí. Ko ia ai, ʻoku hoko e fakatomalá ko ha konga mahuʻinga ʻo e talangofua kakató. ʻOku fiemaʻu ʻe he talangofua kakató ʻa e līʻoa ki he ngaahi fakatokanga mo e ngaahi ueʻi mo e ngaahi fekau kotoa pē ʻoku ʻomi ʻe he Tamai Hēvaní. (“Ko ha Kihiʻi Leʻo Siʻi ʻi ha Ngaahi Fili Lalahi,” Liahona, Tīsema 2018, 44)

ʻE fakatupulaki fēfē ʻe he ako folofolá ʻetau falala ki he ʻEikí?

Naʻe pehē ‘e Palesiteni Lāsolo M. Nalesoni:

ʻI heʻeku fakakaukau ki he Tohi ʻa Molomoná, ʻoku ou fakakaukau ki he foʻi lea ko e mālohi. ʻOku maʻu ʻe he ngaahi moʻoni ʻo e Tohi ʻa Molomoná ʻa e mālohi ke fakamoʻui, fakanonga, fakafoki, tokoniʻi, fakamālohia, fakafiemālieʻi, mo fakafiefiaʻi hotau laumālié. …

ʻOku ou palōmesi atu ʻi hoʻo ako ʻi he faʻa lotu ʻa e Tohi ʻa Molomoná ʻi he ʻaho kotoa peé, ʻe toe lelei ange ai hoʻo fai tuʻutuʻuní—he ʻaho kotoa pē. ʻOku ou palōmesi atu ʻi hoʻo fakalaulauloto ki he meʻa ʻokú ke akó, ʻe fakaava mai ʻa e ngaahi matapā ʻo e langí, pea te ke maʻu ha ngaahi tali ki hoʻo ngaahi fehuʻí mo ha fakahinohino ki hoʻo moʻuí. ʻOku ou palōmesi atu ʻi hoʻo fakaʻutumauku fakaʻaho ʻi he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá. (“Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?” Liahona, Nōvema 2017, 62–63)

Ngaahi ʻEkitivitī Fakalahi ki he Akó

Akoako “fakakaukauloto” ʻi he ngaahi folofola ʻa Kalaisí

Kapau ʻe ʻaonga ki he kau akó ha faingamālie ke akoako fakakaukauloto pe fakalaulauloto ki ha potufolofola, te ke lava ʻo vahevahe ʻa e lea ko ʻení meia ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

11:21

ʻI heʻeku pehē “akó,” ʻoku ou ʻuhinga ki ha meʻa ʻoku toe mahulu ange ʻi he laukongá ʻataʻatā pē. Ko ha meʻa lelei ʻi he taimi ʻe niʻihi ke lau ha tohi folofola ʻi ha vahaʻa taimi tukupau ke ʻiloʻi fakalūkufua ʻene pōpoakí, ka ko e uluí, ʻoku totonu ke ke tokanga ki he lahi ʻo e taimi ʻokú ke fakaʻaongaʻi ʻi he folofolá ʻo laka ange ʻi he lahi ʻo e meʻa ʻokú ke lau ʻi he taimi ko iá. ʻOku ou ʻilo ʻokú ke faʻa lau ha ngaahi veesi ʻi he taimi ʻe niʻihi, pea kiʻi mālōlō ʻo fakalaulauloto ki ai, pea toe lau fakalelei ange ʻa e ngaahi vēsí, pea ʻi hoʻo fakakaukau ko ia ki hono ʻuhingá, mo lotua ke mahinó, pea mo fehuʻi ʻi ho ʻatamaí, mo tatali ki ha ueʻi fakalaumālié, pea mo hiki ʻa e ngaahi ongo mo e ngaahi ʻilo ʻoku hokó, koeʻuhi ke ke lava ʻo manatuʻi mo ako lahi ange ai. ʻI hoʻo ako ʻi he founga ko ʻení, mahalo he ʻikai te ke lau ha ngaahi vahe pe veesi lahi ʻi ha haafe houa, ka te ke fakaʻataʻatā ai ha potu ʻi ho lotó maʻá e folofola ʻa e ʻOtuá, pea te Ne folofola atu kiate koe. (“When Thou Art Converted,” Liahona, Mē 2004, 11)

Fakaafeʻi e kau akó ke fili ha potufolofola ke akoako fakalaulauloto ki ai. Teuteuʻi e lokí, toʻo e ngaahi meʻa te ne tohoakiʻi e tokangá ki he lahi taha ʻe lavá.

ʻE lava ke faʻu ʻe he kau akó ha lisi ʻo e ngaahi meʻa te nau lava ʻo fai ʻo makatuʻunga ʻi he lea ʻa ʻEletā Kulisitofasoní. Kapau te nau fiemaʻu ha tokoni lahi ange, te ke lava ʻo ʻoange ha niʻihi ʻo e ngaahi meʻá ni:

Toutou lau ʻa e potufolofola naʻá ke filí ʻaki ʻa e loto-holi ke ako mei ai kae ʻikai ko hono fakakakato pē.
Fakakaukau ki he meʻa ʻokú ke laú, ʻuhinga ʻo e ngaahi leá, mo e founga ʻoku ʻaonga ai kiate koé. Toutou fakakaukau ki ai.
Feinga ke ke faʻa fakakaukau ki ai ʻi ha founga longomoʻui, fekumi fakaʻatamai mo fakakaukau ki he folofolá, ngaahi leá mo e kupuʻi leá, mo e founga ʻe lava ke tokoniʻi ai koe ʻe he pōpoaki ʻo e vēsí.
Hiki ha faʻahinga fakakaukau pe ongo pē ʻoku maʻu ʻi hoʻo akoakó.

Hili ha taimi pau, fakamālō fakamātoato ki he kau akó ʻi heʻenau loto-fiemālie ke kau ʻi he ʻekitivitií. Te ke lava ʻo fakamanatu ange kiate kinautolu ko e founga mo e taimi ʻoku tāpuekina ai kitautolu ʻe he ʻEikí ʻi heʻetau feinga ke fakalaulauloto ki Heʻene folofolá ʻoku ʻAʻana pē ia. Fakaafeʻi kinautolu ke hokohoko atu ʻenau fekumi ki ha ngaahi faingamālie ke akoako fakahoko ai e taukei ko ʻení ko ha konga ʻo ʻenau ako maʻu pē ʻa e ongoongoleleí.

Ngaahi sīpinga ʻo e loto-toʻá mo e loto-falala ki he ʻEikí

Kapau ʻe ʻaonga ki he kau akó ha sīpinga ʻo hono fakatupulaki ʻe he ʻEikí ʻetau loto-toʻá mo e loto-falalá, te ke lava ʻo huluʻi ʻa e foʻi vitiō “Pole ke Tuʻu Toko Taha” (4:20). ʻOku hā ʻi he vitiō ko ʻení ʻa e talanoa ʻo Palesiteni Monisoní, ʻa ia naʻá ne maʻu ha loto-falala ki he ʻEikí ʻi heʻene ongoʻi naʻá ne tuʻu toko tahá.

4:20

ʻE lava ke fakaʻaongaʻi ʻa e vitiō “Your Great Adventure: Overcoming Life’s Obstacles” mei he taimi 5:48 ki he 8:19 ke fakatātaaʻi e founga naʻe fakatupulaki ai ʻe he ʻEikí ʻa e loto-toʻa mo e loto-falala ʻa ha talavou ke fehangahangai mo e ngaahi faingataʻa ʻo e moʻuí.

9:44