Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Teutalōnome 15: “Mafola Ke Lahi Ho Nimá Kiate Ia”

“Teutalōnome 15: ‘Mafola Ke Lahi Ho Nimá Kiate Ia,’” Fuakava Motuʻá – Tohi Lēsoni ʻa e Faiako Seminelí (2026)

“Teutalōnome 15: ‘Mafola Ke Lahi Ho Nimá Kiate Ia,’” Fuakava Motuʻá – Tohi Lēsoni ʻa e Faiako Seminelí

Teutalōnome 6–8; 15; 18; 29–30; 34: Lēsoni 60

Teutalōnome 15

“Mafola Ke Lahi Ho Nimá Kiate Ia”

ʻOku kau ʻi he ngaahi fekau ʻa e Fakamoʻuí ki he kakai ʻIsileli ʻi he Teutalōnomé ʻa hono fakamolemoleʻi ʻo e kau fakamoʻuá, tukuange ʻo e kakai nofo pōpulá, pea mo hono fakamaʻamaʻa e kavenga ʻa e masivá. ʻI heʻetau hoko ko Hono kakaí, ʻoku tau maʻu foki ha fatongia fuakava ke vahevahe tauʻatāina ʻa e meʻa kuo foaki mai ʻe he Fakamoʻuí ke fakamaʻamaʻa ʻaki e kavenga ʻa e masivá. ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke muimui ki he fekau ʻa e Fakamoʻuí ke vahevahe ʻa e meʻa kuó Ne foaki kiate kinautolú.

Teuteu ʻa e tokotaha akó: Fakaafeʻi e kau akó ke nau hivaʻi ʻi he faʻa lotu pe ako e fakalea ʻo e himi “Kuo Lahi Hoku Tāpuakí” (Ngaahi Himi, fika 126) pe Mātiu 25:31–40. ʻE lava ke kole ʻe he kau akó ki he Tamai Hēvaní ke tokoniʻi kinautolu ke nau vakai ki ha ngaahi founga te nau lava ai ʻo vahevahe mo e niʻihi kehé ʻa e meʻa kuó Ne foaki maʻanautolú.

Ngaahi ʻEkitivitī Ako ʻOku Ala Fakahokó

Kau muimui moʻoni ʻo Sīsū Kalaisí

Ke kamata e kalasí, fakakaukau ke fakaʻaliʻali e fakatātā ʻo Sīsū Kalaisi ʻokú ke saiʻia taha aí. Te ke lava ʻo hiki ʻi he palakipoé ʻa e fakamatala taʻekakato ko ʻeni meia Palesiteni Nalesoní. ʻE lava ke ke fakamahinoʻi ange ʻe lava ke lahi ha ngaahi founga totonu ke fakaʻosi ʻaki e fakamatalá.

Naʻe akonaki ʻa Palesiteni Lāsolo M. Nalesoni ʻo pehē:

Ko e taha ʻo e ngaahi founga faingofua taha ke ʻiloʻi ai ha tokotaha muimui moʻoni ʻo Sīsū Kalaisí ko e . (“Fiemaʻu Ha Kau Faʻa Fakalelei,” Liahona, Mē 2023, 98)

Ko e hā ha ngaahi founga te tau lava ai ʻo fakakakato e fakamatala ʻa Palesiteni Nalesoní?

Hili e tali ʻa e kau akó, fakaafeʻi kinautolu ke vahevahe ʻa e ʻuhinga ʻoku nau ongoʻi ai ʻoku fakakakato ʻe heʻenau talí ʻa e fakamatalá. Te ke lava ʻo poupouʻi mo fakapapauʻi e meʻa ʻoku vahevahe ʻe he kau akó. Hili iá pea fakaʻaliʻali leva e fakamatala ʻa Palesiteni Nalesoni kuo fakakakató.

Ko e taha ʻo e ngaahi founga faingofua taha ke ʻiloʻi ai ha tokotaha muimui moʻoni ʻo Sīsū Kalaisí, ko e lahi ʻo e angaʻofa ʻa e tokotaha ko iá ki he kakai kehé. (“Fiemaʻu Ha Kau Faʻa Fakalelei,” Liahona, Mē 2023, 98)

Ko e hā ʻoku hoko ai ʻeni ko ha founga lelei ke ʻiloʻi ʻa e kau muimui moʻoni ʻo Sīsū Kalaisí?
Ko e hā ha ngaahi founga ʻe lava ke angaʻofa ai e kau ākonga ʻa Sīsū Kalaisí ki he kakaí?

Ke tokoni ke fakafuofuaʻi ʻe he kau akó e tuʻunga lelei ʻo ʻenau fakafeangai ki he niʻihi kehé, te ke lava ʻo vahevahe ha niʻihi pe kotoa ʻo e ngaahi fakamatala ko ʻení pea fakaafeʻi e kau akó ke fakalaulauloto ki he tuʻunga lelei ʻo e fakamatala takitaha kiate kinautolú.
ʻOku fakahaaʻi ʻe he founga ʻeku fakafeangai ki he niʻihi kehé ko ha tokotaha muimui au ʻo Sīsū Kalaisi.
ʻOku ou manavaʻofa ki he niʻihi kehé pea ʻoku ou loto ke fai e meʻa te u lavá ke tokoniʻi kinautolu.
ʻOku ou ongoʻi loto-fiemālie ke vahevahe ʻa e meʻa kuo foaki mai ʻe he ʻEikí kiate au mo e niʻihi kehé.

ʻI hoʻo ako he ʻaho ní, fekumi ki he fakahinohino ʻa e Laumālie Māʻoniʻoní ke tokoniʻi koe ke ke ongoʻi ʻa e mahuʻinga ʻo e muimui ki he fekau ʻa e Fakamoʻuí ʻi he founga hoʻo fakafeangai ki he kakai kehé.

Ko hono tokangaʻi ʻo e kakai ʻoku faingataʻaʻiá

Kimuʻa pea lau ʻe he kau akó ʻa e potufolofola ko ʻení, te ke lava ʻo fakamatalaʻi ange ko ha konga ʻo e ngaahi fakahinohino naʻe ʻomi ʻi he Teutalōnomé, naʻe fekau ʻe he ʻEikí ke fakamolemoleʻi ʻa e ngaahi moʻua kotoa pē ʻi he taʻu hono fitu kotoa pē.

Lau ʻa e Teutalōnome 15:7–11, ʻo kumi e founga ʻoku finangalo ai e ʻEikí ke tau fakafeangai ai ki he kakai ʻoku tau feohí.

Ko e hā e meʻa naʻá ke ʻiló?

Lolotonga e vahevahe ʻa e kau akó, tokoni ke nau fakatokangaʻi ha foʻi moʻoni hangē ko e ʻoku fekau kitautolu ʻe he ʻEikí ke tau vahevahe ʻa e ngaahi tāpuaki kuó Ne foaki mai maʻatautolú.

ʻE ala tokoni ke fakaʻaongaʻi ha kiʻi lēsoni fakataumuʻa faingofua ke tokoni ke mahino ki he kau akó ʻa e ʻuhinga ke “mafola ke lahi ho nimá” ki he niʻihi kehé (veesi 8 mo e 11). Ke fai ʻení, ʻai ha poulu siuliolo, piini, pe kiʻi foʻi lole ʻi muʻa ʻi he lokí. Fakaafeʻi ha ongo tamaiki ako ke na fakatātaaʻi e kupuʻi lea ko ʻení. ʻE lava ke faluku fonu ʻe he tokotaha ako ʻe taha hono nimá pea puke ia ʻi ʻolunga ʻi he nima ʻo e tokotaha ako ʻe tahá. Kole ki he tokotaha akó ke fakaava hono nimá “siʻisiʻi,” pea “toe kiʻi lahi ange,” ʻo fakaʻatā ha kiʻi meʻa siʻisiʻi pē ke tō ki he nima ʻo e tokotaha ako ʻe tahá. Fakaʻosí, fakaafeʻi e kau akó ke nau toe lau ʻa e veesi 8 pea tuku ki he tokotaha akó ke ne fakatātaaʻi ʻa e lēsoni fakataumuʻá “ke mafola ke lahi ho nimá.”
ʻOkú ke pehē ʻoku ʻuhinga ki he hā ke mafola ke lahi hotau nimá ʻi hono tokangaʻi e masivá?
Ko e hā te tau lava ʻo ako fekauʻaki mo e Fakamoʻuí mei Heʻene fekaú? ʻOkú ne fakamafola fēfē nai Hono toʻukupú ʻo lahi kiate kitautolú?
Ko e hā ha ngaahi tūkunga ʻe ala ʻahiʻahiʻi ai kitautolu ke tau taʻofi hotau nimá mei he masivá?

Kimuʻa pea lau ʻe he kau akó ʻa e potufolofola ko ʻení, te ke lava ʻo fakamatalaʻi ange naʻe fekauʻi foki ʻe he ʻEikí ke tukuange ha faʻahinga sevāniti pē naʻá ne fie maʻu ke tauʻatāina mei he nofo pōpulá ʻi he taʻu ʻe fitu kotoa pē.

Lau ʻa e Teutalōnome 15:12–15, ʻo kumi e founga naʻe fakahā ai ʻe he ʻEikí ki he kakai ʻIsilelí ʻoku totonu ke nau fakafeangai ai ki ha sevāniti naʻe holi ke fakatauʻatāinaʻi mei he nofo pōpulá.

Mei he meʻa kuó ke ako fekauʻaki mo e kakai ʻIsilelí, kuo nau hoko fēfē ʻo pōpula fakatuʻasino mo fakalaumālié? ʻE fēfē nai ha nofo pōpula fakalaumālie ha taha he ʻahó ni?
ʻE liliu fēfē ʻe he manatu ki he founga kuo fakahaofi ai kitautolu ʻe he Fakamoʻuí mei he pōpula fakalaumālie mo fakatuʻasinó ʻa e founga ʻo ʻetau fakafeangai ki he niʻihi kehé?

“ʻIkai ko e kau paea kotoa pē ʻa kitautolu?”

Fakaafeʻi e kau akó ke nau fakakaukau pe ʻe mei fēfē nai ki ha toʻu tupu ʻoku “masiva” ʻo ʻikai ke ngata pē ʻi he meʻa fakapaʻangá ka ʻi he fakalaumālié, fakatuʻasinó, fakaelotó, mo fakasōsialé foki.

Te tau lava fēfē ʻo fakamafola lahi hotau nimá ki ha taha ʻoku faingataʻaʻia ʻi he ngaahi founga takitaha ko ʻení?

Fakaʻaongaʻi e ngaahi meʻangāue ako folofolá ke kumi ha potufolofola pe fakamatala mei ha taki ʻo e Siasí ʻe ala tokoni ki ha taha ke muimui ki he fekau ʻa e Fakamoʻuí ke tokangaekina ʻa e masivá

Kapau ʻoku fie maʻu ʻe he kau akó ha tokoni lahi ange, te ke lava ʻo fokotuʻu ange ha ngaahi potufolofola hangē ko e Luke 6:30–38; Mōsaia 4:16–27; Tokāteline mo e Ngaahi Fuakava 104:15–18; Mōsese 7:18. ʻE lava foki ke fekumi ʻa e kau akó ʻi he Gospel Library ki ha ngaahi foʻi lea hangē ko e “masiva.”

Hili hono maʻu ʻe he kau akó ha taimi ke kumi ha potufolofola pe fakamatalá, fakaafeʻi ke nau vahevahe ʻa e meʻa ne nau maʻú mo hanau hoa pe ʻi ha kiʻi kulupu tokosiʻi. ʻE lava foki ke aleaʻi ʻe he kau akó e ngaahi fehuʻi ko ʻení.

ʻE lava fēfē ke fakaʻaongaʻi ʻa e potufolofola pe fakamatala ko ʻení ki he founga ʻoku tau tokangaekina ai ha taha ʻoku “masiva” fakapaʻanga, fakalaumālie, fakatuʻasino, fakaeloto, pe fakasōsiale?
Ko e fē ha taimi kuó ke aʻusia ai hano tāpuekina koe ʻe he angaʻofa ʻa e niʻihi kehé?

Fakatupulaki ʻetau holi ke vahevahe mo e niʻihi kehé

Lau ʻa e Mātiu 25:31–40, ʻo kumi ki he ongo ʻoku maʻu ʻe he Fakamoʻuí fekauʻaki mo ʻetau ngaahi feinga ke tokangaekina ʻa e kakai faingataʻaʻiá.

Ko e hā kuó ke ako pe ongoʻi he ʻahó ni kuo tokoni ke fakatupulaki hoʻo holi ke hoko ko ha tokotaha muimui moʻoni ʻo Sīsū Kalaisi ʻaki haʻo foaki ʻofa ki he niʻihi kehé?
Ko e hā ha meʻa kuó ke ongoʻi naʻe ueʻi koe ke ke fakahoko?

Fakakaukau ke vahevahe ha taimi kuo tāpuekina ai hoʻo moʻuí ʻe he angaʻofa ʻa e niʻihi kehe naʻa nau feinga ke hoko ko e kau muimui moʻoni ʻo Sīsū Kalaisí. Te ke lava ʻo fakaafeʻi e kau akó ke nau fekumi ki he fakahinohino ʻa e Tamai Hēvaní ke kumi ha taha ke tokoniʻi pea mo e founga ke fakahoko ai iá.

Ngaahi Maʻuʻanga Tokoni Kehé

Ko e hā ʻoku mahuʻinga ai ke tokangaekina ʻa e masivá?

Naʻe fakamanatu mai ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI he hisitōliá kotoa, kuo lau e masivá ko e pole lahi taha ʻoku mafola taha ʻi he faʻahinga ʻo e tangatá. ʻOku mahino ko hono ngaahi faingataʻaʻiá ʻoku fakaesino, ka ko e maumau fakalaumālie mo fakaeloto te ne lava ʻo fakahokó mahalo ʻe toe fakamamahi ange. Neongo ia, kuo teʻeki fai ʻe he Huhuʻí ha ui vivili ange ka ke tau kau mo Ia ʻi hono toʻo e kavenga mafasiá ni mei he kakaí. …

ʻI he teʻeki aʻu e Siasi ʻo Sīsū Kalaisi kuo fakafoki mai ʻi hotau kuongá ki he ʻuluaki taʻú, kuo fekau ʻe he ʻEikí hono kāingalotú ke nau “tokangaʻi ʻa e masivá mo e … faingataʻaʻiá, pea tokoniʻi ʻa kinautolu koeʻuhí ke ʻoua te nau faingataʻaʻia” [Tokāteline mo e Ngaahi Fuakava 38:35]. Fakatokangaʻi e lea-ngāue mamafa ʻi he fakamatala ko iá—“ke ʻoua te nau faingataʻaʻiá.” Ko e lea ʻeni ʻoku fakaʻaongaʻi ʻe he ʻOtuá ʻi he taimi ʻoku fakamātoato aí. …

ʻOku ou fakamoʻoni ki he ngaahi maná, fakalaumālie mo fakatuʻasino fakatouʻosi, ʻa ia ʻoku maʻu ʻe kinautolu ʻoku nau moʻui ʻaki e fono ʻo e ʻaukaí ʻo laka hake ʻi he tuʻo tahá. … Fakamahuʻingaʻi muʻa e faingamālie toputapu ko iá he māhina kotoa pē, pea foaki lahi ʻi hoʻomou ʻaukaí pea mo e ngaahi foaki ʻofa fakaetangata, fakaako, mo fakaefaifekau kotoa pē ʻo fakatatau mo homou ngaahi tūkungá. ʻOku ou palōmesi atu ʻe ʻofa lahi ʻa e ʻOtuá kiate koe, pea ʻe ui ho hingoá ko e monūʻia ʻo lauikuonga, ʻe kinautolu ʻoku maʻu tokoni meiate koé. …

[N]eongo ʻoku ʻikai ko e tauhi au hoku tokouá, ka ko e tokoua au ʻo hoku tokouá, pea “[koeʻuhí kuo foaki lahi kiate au, kuo pau ke u foaki].” (“ʻIkai ko e Kau Kolekole Kotoa pē Kitautolu?.” Liahona, Nōvema 2014, 40, 42)

Te tau lava fēfē ʻo fakamaʻamaʻa e kavenga ʻa e niʻihi kehé?

Naʻe akoʻi ʻe Sisitā Seiloni ʻIupangikē ʻo e Kau Palesitenisī Lahi mālōlō ʻo e Fineʻofá ʻo pehē:

Kapau te tau liliu ʻetau fakakaukaú koeʻuhí ke siʻisiʻi ange hono tufa ha meʻa ʻi hono tokangaʻi ʻo e masivá mo e faingataʻaʻiá kae lahi ange ki he fetalanoaʻaki ʻoku mahuʻingamālié, mo faʻu ha ngaahi vā fetuʻutaki ʻoku leleí, ʻe lava leva ʻe he ʻEikí ʻo fekauʻi kitautolu ki ha feituʻu. …

Manatuʻi, ʻi he founga tatau pē hangē ko e Fakamoʻuí, ʻokú ke hoko ko e taha ʻo e ngaahi meʻaʻofa lelei taha te ke lava ʻo foaki ki he kakai kehe ʻoku faingataʻaʻiá. (“Turning Enemies into Friends” [Brigham Young University forum, Jan. 23, 2018], 6–7, speeches.byu.edu)

Ngaahi ʻEkitivitī Fakalahi ki he Akó

Teutalōnome 14:22, 28–29: ʻOku fakaʻaongaʻi ʻe he ʻEikí ʻetau ngaahi foakí ke tāpuekina ʻa e masivá

Mahalo ʻe ʻaonga ki he kau akó hono fakakaukauʻi e ngaahi founga lahi ʻoku fakaʻaongaʻi ai e ngaahi foakí ke tāpuekina e fānau ʻa e Tamai Hēvaní. ʻE lava ke ako ʻe he kau akó ʻa e Teutalōnome 14:22, 28–29, ʻo kumi e ngaahi tāpuaki naʻe talaʻofa ʻe he ʻEikí ki he kakai naʻa nau foaki lahí. Mahalo ʻe tokoni ke fakamatalaʻi ange, naʻe kau ʻi he fono ʻa Mōsesé, hono fekauʻi e kau ʻIsilelí ke nau fakaʻaongaʻi kotoa ʻenau paʻanga ne foakí ke tāpuekina ʻaki e masivá ʻi he taʻu hono tolu kotoa pē (veesi 28–29). ʻI hotau kuongá, ʻoku fakatāpui ʻa e foaki ʻaukaí ke fakafiemālieʻi e kavenga ʻa e masivá ʻi he māhina kotoa pē.

Teutalōnome 15:1–5, 12–15: Ko e veteange ki he ʻEikí

Mahalo ʻe ʻaonga ki he kau akó ha mahino lahi ange ki he fekau ʻa e Fakamoʻuí ki he kakai ʻIsilelí ke fakatauʻatāinaʻi ha taha fakamoʻua pea ʻoange ki he kau sevāniti kotoa pē ke nau fili ki he tauʻatāiná ʻi he taʻu hono fitu kotoa pē. Fakakaukau ke fakaafeʻi e kau akó ke aleaʻi e founga ʻoku tukuange ai kitautolu ʻe he Fakamoʻuí mei he moʻua ʻo e angahalá mo e ongoʻi halaiá. Hili iá ʻe lava ke mou sio ʻi he “Handel’s Messiah: Debtor’s Prison” (3:35). ʻOku fakaʻaongaʻi ʻe Palesiteni Nalesoni ʻi he foʻi vitiō ko ʻení hono tukuange ʻo e kau pōpula ko ʻení ke fakataipe hotau huhuʻí ʻo fakafou ʻia Sīsū Kalaisi.

3:35

Foaki lahi ki he kakai faingataʻaʻiá

Ke tokoni ke mahino ki he kau akó ʻa e founga te nau lava ai ʻo tāpuekina e kakai faingataʻaʻiá, te ke lava ʻo fakaafeʻi ke nau toe vakaiʻi ha niʻihi ʻo e ngaahi faingamālie ke tokoni ai ʻi homou koló. ʻE lava ke kau ʻi he lisi ko ʻení ʻa e:

Ngaahi ngāue ki he ngāue fakaetauhí
ʻAukaí mo e tokoni ki he ngaahi foaki ʻaukaí
Kau ʻi he ngaahi ngāue tokoni ʻofa fakaetangata ʻa e Siasí
Fakaʻaongaʻi lelei e ngaahi faingamālie fakalotofonua ʻoku maʻu ʻi he polokalama JustServe, ʻi he feituʻu ʻoku maʻu aí

ʻE lava ke maʻu ha ngaahi fakakaukau lahi ange ʻi he Ko Hono Tokangaekina ʻo Kinautolu ʻOku Faingataʻaʻiá ʻi he ChurchofJesusChrist.org.

ʻE lava ke ʻiloʻi ʻe he kau akó ha faingamālie fakalotofonua ke ngāue ai ʻi homou feituʻú pea fokotuʻu ha taumuʻa ke fai ha meʻa ke tokoniʻi e kakai faingataʻaʻiá. Kapau ʻe fie ako lahi ange e kau akó ki he ngaahi ngāue tokoni ʻofa fakaetangata ʻa e Siasí, te ke lava ʻo toe vakaiʻi ʻa e lipooti fakataʻu ʻo e Ko Hono Tokangaekina ʻo Kinautolu ʻOku Faingataʻaʻiá ki he taʻu fakamuimuitahá.

Ko hono tokoniʻi e niʻihi kehe ʻoku faingataʻaʻiá

ʻOku vahevahe ʻe he “Be the Someone” (4:18) ha talanoa ʻo ha fefine naʻe liliu ʻene moʻuí ʻe ha kakai ne nau tokoniʻi ia ʻi heʻene kumi hūfangá.

4:18

ʻOku fakamatalaʻi ʻe he “Joseph Millett Story” (taimi 2:36 ki he 6:08) ʻa e ongoʻi ʻe Siosefa Milileti naʻe tāpuekina ia ʻe he ʻEikí ʻi he fakafalala ange ke ne tokoniʻi ha fāmili faingataʻaʻiá.

6:14

ʻOku vahevahe ʻe he “That We Might Be One: The Story of the Dutch Potato Project” (taimi 0:00 ki he 8:57) e talanoa ʻo e Kāingalotu ʻi Netaleni ne nau feilaulauʻi loto-fiemālie ʻenau meʻakaí maʻa honau ngaahi fili kimuʻá hili e Tau Lahi Hono II ʻa Māmaní. Te ke lava ʻo fakaafeʻi e kau akó ke nau kumi e founga naʻe tāpuakiʻi ai ʻe he Fakamoʻuí ʻa e Kāingalotu Netalení ʻi heʻenau ngaahi feinga faka-Kalaisi ke ngāue tokoní.

11:57