Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Teutalōnome 6:1–6: Ko e ʻOfa ki he ʻOtuá ʻaki Ho Lotó Kotoa

“Teutalōnome 6:1–6: Ko e ʻOfa ki he ʻOtuá ʻaki Ho Lotó Kotoa,” Fuakava Motuʻá – Tohi Lēsoni ʻa e Faiako Seminelí (2026)

“Teutalōnome 6:1–6: Ko e ʻOfa ki he ʻOtuá ʻaki Ho Lotó Kotoa,” Fuakava Motuʻá – Tohi Lēsoni ʻa e Faiako Seminelí

Teutalōnome 6–8; 15; 18; 29–30; 34: Lēsoni 58

Teutalōnome 6:1–6

Ko e ʻOfa ki he ʻOtuá ʻaki Ho Lotó Kotoa

Hili hono tataki ʻe Mōsese e kakai ʻIsilelí ʻi ha taʻu ʻe 40 ʻi he toafá, naʻá ne vahevahe ʻene faleʻi fakaʻosí mo kinautolu kimuʻa pea fekauʻi ʻe he ʻEikí ʻa Sōsiua ke tataki kinautolu ki he fonua ʻo e talaʻofá. Ko ha konga mahuʻinga ʻo e pōpoaki fakaepalōfita ʻa Mōsesé ko e “ʻofa ki [he ʻEiki] ko ho ʻOtuá ʻaki ho lotó kotoa” (Teutalōnome 6:5). ʻE lava ke tokoni ʻa e lēsoni ko ʻení ke mahino ki he kau akó ʻa e founga te nau lava ai ʻo fakahaaʻi ʻenau ʻofa ki he ʻOtuá.

Teuteu ʻa e tokotaha akó: Fakaafeʻi e kau akó ke nau kole ki ha mātuʻa, tauhi fānau, pe taki ʻo e Siasí ke vahevahe ha niʻihi ʻo e ngaahi founga ʻoku nau saiʻia taha ai hono fakahaaʻi ʻenau ʻofa ʻi ha tahá kae ʻikai leá. Mahalo ʻe tokoni ke talaange ki he kau akó ʻe nofotaha ʻa e lēsoní ʻi he ngaahi founga te tau lava ai ʻo fakahaaʻi ʻetau ʻofa ki he ʻOtuá.

Ngaahi ʻEkitivitī Ako ʻOku Ala Fakahokó

Ko hono fakahaaʻi ʻo e ʻOfá

Fakakaukau ke fakaʻaongaʻi ʻa e ʻekitivitī ko ʻení ke tokoni ki he kau akó ke hiki e ngaahi fakakaukau ʻo ha ngaahi founga kehekehe te nau lava ai ʻo fakahaaʻi ʻa e ʻofá.

Hiki ʻi hoʻo tohinoa akó ʻa e hingoa ʻo ha mēmipa ʻo e fāmilí ʻokú ke ʻofa ai.
ʻI ha sekoni ʻe 60, hiki ki he lahi taha te ke lavá ʻi lalo ʻi honau hingoá ha ngaahi founga makehe ke fakahaaʻi ai hoʻo ʻofa kiate kinautolú.

Kole ki ha niʻihi ʻe loto-fiemālié ke vahevahe e hingoa ne nau tohí mo ha ngaahi fakakaukau ne nau maʻu ki hono fakahaaʻi ʻo e ʻofá.

ʻI he ʻosi e vahevahe ʻa e kau akó, fakaafeʻi kinautolu ke lau ʻa e Teutalōnome 6:5 pea vahevahe ʻa e meʻa ʻoku nau akó. (Mahalo ʻe vahevahe ʻe he kau akó ʻi he lea pē ʻanautolu ha moʻoni hangē ko e: ʻOku fekauʻi kitautolu ʻe he ʻOtuá ke tau ʻofa kiate Ia ʻaki hotau lotó, laumālié, mo e iví kotoa.) Te ke lava ʻo fokotuʻu ange ke fakafehokotaki pe fakafekauʻaki ʻe he kau akó ʻa e veesi ko ʻení ki he potufolofola fakataukei fakatokāteline Mātiu 22:36–39, ʻa ia naʻe fakamamafaʻi ai ʻe Sīsū Kalaisi hono mahuʻingá.

Fakakaukau ke hiki ʻa e Tamai Hēvaní mo Sīsū Kalaisi ʻi lotomālie ʻi he palakipoé. ʻOange ha miniti ʻe ua ki he kau akó ke nau omi ki he palakipoé pea hiki ha ngaahi founga kehekehe te tau lava ai ʻo fakahaaʻi ʻetau ʻofa kiate Kinauá.

Hili iá pea poupouʻi e kau akó ke vahevahe pe ko e fē ʻi he ngaahi fakakaukau ʻa honau kaungāakó ʻoku makehe kiate kinautolú pea mo hono ʻuhingá.

Fakalaulauloto ki he ngaahi fehuʻi ko ʻení.

Ko e hā hoʻo ngaahi ongo moʻoni ki he Tamai Hēvaní mo Sīsū Kalaisí? Ko e hā ʻa e ʻuhinga ʻokú ke ongoʻi pehē aí?
Ko e hā ha niʻihi ʻo e ngaahi founga ʻokú ke fakahaaʻi ai kiate Kinaua ʻa e ongo ʻokú ke maʻú?

ʻI hoʻo ako e tohi Teutalōnomé ʻi he uike ní, tokanga ki he ngaahi ueʻi mei he Laumālie Māʻoniʻoní. ʻE lava ʻe Hono ivi tākiekiná ʻo fakaloloto ange hoʻo ʻofa ki he Tamai Hēvaní mo Sīsū Kalaisí, pea akoʻi atu ha ngaahi founga te ke lava ai ʻo fakahaaʻi ʻa e ʻofa ko iá kiate Kinaua.

ʻOku ʻofa ʻa e ʻOtuá ʻiate kitautolu ʻaki Hono lotó kotoa

Ke tokoni ki he kau akó ke nau ako mei he sīpinga ʻa e ʻOtuá, ʻe lava ke fakaafeʻi kinautolu ke fakafehokotaki pe fakafekauʻaki ʻa e Teutalōnome 6:5 ki he 1 Sione 4:19. Hili hono lau e veesi 19, te ke lava ʻo kole ki he kau akó ke vahevahe e ngaahi founga kuo fakahaaʻi ai ʻe he ʻOtuá ʻEne ʻofa ki he tokotaha kotoa pē pe kiate kinautolu fakatāutahá.

ʻE lava ke tokoni ʻa e fakamatala ko ʻení ki he kau akó ke nau fakakaukau ki he sīpinga haohaoa ʻa e ʻOtuá ke ʻofa ʻiate kitautolu ʻaki Hono lotó kotoa. Fakakaukau ke fakaʻaliʻali mo fakaafeʻi ha tokotaha ako ke ne lau leʻolahi ia. Hili iá pea hoko atu ke fakaʻaliʻali ia lolotonga hono aleaʻi ʻe he kau akó ʻenau tali ki he ngaahi fehuʻi ʻi laló.

Naʻe tokoni ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ke fakamahino lelei ange kiate kitautolu ʻa e ʻulungaanga totonu ʻo e ʻOtuá.

19:25

Ko e ʻuluaki fekau lahi taha ʻo ʻitānití ke ʻofa ki he ʻOtuá ʻaki e kotoa hotau lotó, iví, ʻatamaí, mo e mālohí—ko e ʻuluaki fekau lahí ia. Ka ko e ʻuluaki foʻi moʻoni maʻongoʻonga ʻo ʻitānití ko e ʻofa ʻa e ʻOtuá ʻiate kitautolú ʻaki e kotoa Hono lotó, iví, ʻatamaí, mo e mālohí. Ko e ʻofa ko iá, ko e makatuʻunga ia ʻo ʻitānití, pea ʻoku totonu ke hoko ko e makatuʻunga ʻo ʻetau moʻui fakaʻahó. ʻIo, ʻoku tau toki lava pē ʻi he māfana ʻa e ongo fakapapau ko iá ʻi hotau lotó ke tau lotolahi, ke kei feinga ke fakalakalaka, ke kei feinga ke fakamolemoleʻi ʻetau angahalá, pea mo kei feinga ke aʻu e ʻaloʻofa ko iá ki hotau kaungāʻapí. (“ʻE Fai ʻe [he ʻEikí] ha Ngaahi Mana ʻIate Kimoutolu ʻApongipongí na,” Liahona, Mē 2016, 127)

Ko e hā e meʻa ʻokú ke ako mei he fakamatala ʻa Palesiteni Hōlaní te ne lava ʻo fakaʻaiʻai kitautolu ke fakahaaʻi ʻetau ʻofa ki he ʻOtuá?
Ko e hā ha ngaahi sitepu ʻe lava ke fakahoko ʻe ha taha ke ʻofa ai ki he ʻOtuá “ʻaki [hono] mālohí kotoa” kapau ʻoku ʻikai ke ne ongoʻi mālohi feʻunga ke fai ia?

Ko e talangofuá ko hano fakahaaʻi ia ʻo e ʻofá

Ke ʻoange ki he kau akó ha puipuituʻa nounou ʻo e tohi Teutalōnomé, fakakaukau ke fakaʻaliʻali ʻa e fakatātā ʻo Mōsesé mei he kamataʻanga ʻo e lēsoní ʻi hoʻo fakamatalaʻi fakanounoú pe fakaafeʻi ha tokotaha ako ke lau leʻolahi ʻa e palakalafi ko ʻení.

Hili e hoko ʻa Mōsese ko ha palōfita ʻa e ʻOtuá ʻi ha taʻu ʻe 40, naʻá ne fakahinohinoʻi ʻa e kakai ʻIsilelí ke nau ʻapitanga ʻi he kauʻāfonua ʻo e fonua ʻo e talaʻofá. ʻE vavé ni pē hano tataki kinautolu ʻe Sōsiua ʻo kolosi ʻi he kauʻāfonuá (vakai, Teutalōnome 31:23). Naʻe lava ʻa Mōsese ʻo mamata ki he fonua ʻo e talaʻofá mei he tumutumu ʻo e moʻungá kimuʻa pea liliu ia ʻe he ʻEikí, pe ʻave ʻa Mōsese kiate Ia ʻo ʻikai foua ai ʻe Mōsese ʻa e maté (vakai, Teutalōnome 34:1–6; ʻAlamā 45:18–19). ʻOku ʻi he tohi Teutalōnomé ʻa e faleʻi fakaʻosi ʻa Mōsese ki he kakaí, kau ai ha faleʻi fakalaumālie fekauʻaki mo e ʻofa ki he ʻOtuá mo e talangofua ki Heʻene ngaahi fekaú.

Lau e ngaahi potufolofola ko ʻení, ʻo kumi e ngaahi faitatau ʻi he meʻa naʻe akoʻi ʻe Mōsese ki hono kakaí pea mo e meʻa naʻe akoʻi ʻe Sīsū ki Heʻene kau ākongá fekauʻaki mo e founga ke fakahaaʻi ai ʻetau ʻofa ki he ʻOtuá.

Teutalōnome 6:1–6; 30:16

Sione 14:15, 21–24

Ko e hā naʻá ke ako fekauʻaki mo hono fakahaaʻi ʻetau ʻofa ki he ʻOtuá?

Kapau kuo ʻosi hiki ʻe ha tokotaha ako ʻa e “tauhi e ngaahi fekaú” ʻi he palakipoé ko ha founga ia ʻe taha ke fakahaaʻi ai ʻetau ʻofa ki he ʻOtuá, fakakaukau ke fakamahinoʻi ia. Kapau naʻe ʻikai, fakakaukau ke tānaki ia ki he palakipoé.
ʻOkú ke pehē ko e hā ʻoku hoko ai hono tauhi e ngaahi fekaú ko ha founga mahuʻingamālie ke fakahaaʻi ai ki he Tamai Hēvaní mo Sīsū Kalaisi ʻoku tau ʻofa ʻiate Kinauá?

Ko e ʻOfa ki he ʻOtuá ʻi heʻetau moʻui fakaʻahó

Fili ha taha ʻo e ngaahi tūkunga angamaheni ko ʻení: ʻi he ngāué, ʻi he akó, ʻi he seminelí, ʻi he lotú, ʻi ʻapi, ʻi he akoako sipotí, mo e ngaahi kaungāmeʻá, ʻi he mītia fakasōsialé. Te ke tali fēfē ʻa e ngaahi fehuʻi ko ʻení mei hoʻo aʻusia ʻi hoʻo fakakaukau ki he tūkunga ko ʻení?

ʻI he tūkunga ko ʻení, kuó ke mamata fēfē nai ki hano fakahaaʻi ʻe ha taha ʻene ʻofa ki he ʻOtuá?
Ko e hā ha ngaahi founga lelei ke fakahaaʻi ai hoʻo ʻofa ki he ʻOtuá ʻi he tūkunga ko ʻení?
ʻOku ʻi ai nai ha meʻa te ne ala ʻai ke faingataʻa hono fakahaaʻi e ʻofa ki he ʻOtuá ʻi he tūkunga ko ʻení? Kapau ko ia, te tau ikunaʻi fēfē ia?

Fakaʻosi

Ke fakaʻosí, mahalo te ke fie fakahaaʻi hoʻo ʻofa ki he Tamai Hēvaní mo Sīsū Kalaisí.

Makehe mei hoʻo fakamoʻoní, mahalo te ke fie vahevahe foki mo e fakamatala ko ʻení pea fakaafeʻi e kau akó ke fakahaaʻi ʻenau ongo ki he Tamai Hēvaní mo Sīsū Kalaisí ʻi heʻenau tohinoa akó. Poupouʻi kinautolu ke nau ngāueʻi ha faʻahinga ongo pē kuo nau maʻu mei he Laumālié lolotonga e lēsoní.

Naʻe fai ʻe ʻEletā K. Peleti Netelesi ʻo e Kau Fitungofulú ha ngaahi fehuʻi mahuʻinga ke tau fakalaulauloto fakataautaha ki ai.

ʻOku ou fakamoʻoni ko ʻetau Tamai Hēvaní ʻokú Ne manatuʻi maʻu pē kitautolu pea ʻokú Ne ʻofa haohaoa ʻiate kitautolu. Ko ʻeku fehuʻí leva ʻeni: ʻOku tau manatuʻi ʻapē Ia? Pea ʻoku tau ʻofa nai ʻiate Ia? (“Kuo Fakamolemoleʻi Moʻoni Nai Au?,” Liahona, Mē 2023, 68–69)

Ngaahi Maʻuʻanga Tokoni Kehé

Naʻe tokoni fēfē ki he Fakamoʻuí ʻEne ʻofa ki he ʻOtuá ke kātekina ʻEne feilaulau fakaleleí?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kapau ʻoku tau ʻofa ki he ʻOtuá ʻaki e kakato hotau lotó, laumālié, ʻatamaí, mo e mālohí, ʻe tukutaha ʻetau tokanga ʻi he moʻuí ke fakahoko ʻEne ngaahi fakaʻamú. Ko e moʻoni, kuo teʻeki ai ha taha kuó ne fakahoko kakato mo haohaoa ange ia ʻi hotau faʻifaʻitakiʻanga ko Sīsū Kalaisí, ʻa ia naʻá Ne pehē, “ʻOku ʻikai siʻaki au ke toko taha pē ʻe he Tamaí; he ʻoku ou fai maʻu ai pē ʻa e ngaahi meʻa ʻoku lelei ai iá.” Pea naʻe muʻomuʻa taha kiate Ia ʻa hono fakalāngilangiʻi ʻa e Tamaí.

Ko e meʻa mahuʻinga taha ko iá, mo e māteakiʻi māʻolunga taha ko iá, naʻe lava ai ʻa Sīsū ʻo fakahoko ʻEne Fakaleleí ʻo aʻu ki heʻene ʻosí, ke inu ʻa e ipu [kona] taha ʻi he ngaahi ipú kotoa, ʻo aʻu ki he tulutā fakaʻosí. …

ʻI hono tautau ʻa Kalaisi ʻi he kolosí, naʻe taʻepau hotau ikuʻangá, ʻetau moʻui taʻe-faʻa-maté, mo ʻetau moʻui taʻengatá, ka ko e meʻa naʻá ne ʻai ke ola lelei kiate kitautolu pe ʻe ʻi ai hano ʻaonga ʻo ʻetau moʻuí, ko e ʻofa ʻa Sīsū Kalaisi ki he Tamaí ʻaki e kotoa Hono lotó, laumālié, ʻatamaí, mo e mālohí. (D. Todd Christofferson, “The First Commandment First” [Fakataha lotu ʻa e ʻUnivēsiti Pilikihami ʻIongí, 22 Māʻasi 2022])

“Ko e fekau fē … ʻoku lahí?” (Mātiu 22:36)

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻI he taimi naʻe fehuʻi ai kia Sīsū pe ko e fekau fē ʻoku lahí, naʻá Ne ʻoange ha fekau ʻe ua. ʻUluakí ke ʻofa ki he ʻOtuá, ʻa ia ʻoku tau fakahaaʻi ʻaki ʻetau tauhi ʻEne ngaahi fekaú. Ko hono uá ke ʻofa ki hotau kaungāʻapí. Kuo pau ke tau fakahoko fakatouʻosi kinaua, pea ʻoku ʻikai faingofua. Ko e tokolahi ʻo kitautolú ʻoku siʻi ʻetau tokanga ke ʻofa ki hotau kaungāʻapí pea fakamamafaʻi ʻo fuʻu tōtuʻa ʻa hono tauhi ʻo e fonó (ngaahi fekaú). Ko e meʻa ia ʻoku ou fakahehema ki aí koeʻuhí ko ʻeku ako fakalaó. He ko hono moʻoní, ko e ʻofa ki he ʻOtuá mo hono fakahaaʻi ʻetau ʻofa ki he ʻOtuá ʻaki ʻetau tauhi ʻEne ngaahi fekaú ʻa e ʻuluaki fekau ʻoku lahí. Pea ko e moʻoni, ʻoku faingofua ange ke tau fakamaauʻi kitautolu mo e niʻihi kehé pe ʻoku tau talangofua ki he fonó pe ʻikai. Ka neongo ia, ʻoku mahuʻinga foki ke tau takitaha tauhi e fekau hono uá, ʻa ia ʻoku “tatau mo iá,” ke ʻofa ki hotau kaungāʻapí ʻi he founga ʻoku ʻofa ai ʻa Sīsū kiate kitautolú. (“Taukaveʻi ʻa e Moʻoní” [fakataha lotu fakaemāmani lahi maʻá e kakai lalahi kei talavoú, 21 Mē 2023], Gospel Library)

Ko e hā ha meʻa te tau lava ʻo fai ke fakaloloto ʻetau ʻofa ki he ʻOtuá?

ʻOku ʻi ai ha ngaahi fakakaukau ʻi he fakamatala “3 Ways to Develop Genuine Love for God” ki he founga te tau lava ai ʻo fakatupulaki ʻetau ʻofa ki he ʻOtuá ʻi he fakalau ʻa e taimí.

Ngaahi ʻEkitivitī Fakalahi ki he Akó

Founga ʻe taha ke kamata ʻaki e lēsoní ke tokoni ke mahino ki he kau akó ʻa e puipuituʻa ʻo e Teutalōnomé

Te ke lava ʻo kamata e lēsoní ʻaki hono tokoniʻi e kau akó ke fakafekauʻaki ki hono fai ʻe Mōsese ʻene faleʻi fakaʻosi ki he kakai naʻá ne ʻofa aí. ʻE tokoni foki ʻeni ki he kau akó ke nau fakakaukau ki he meʻa ʻoku mahuʻinga taha kiate kinautolú.

Te ke lava ʻo fai ʻeni ʻaki hano fakaʻaliʻali ʻa e ngaahi fakahinohino ko ʻení pea ʻoange ki he kau akó ha miniti ʻe ua ki he tolu ke nau fakalaulauloto pe hiki ai ʻenau ngaahi fakakaukaú. Fakaafeʻi leva ha niʻihi ʻo e kau akó ke vahevahe ha ngaahi fakakaukau ʻoku ʻikai fuʻu fakataautaha.

Fakakaukauloto te ke mavahe mei he niʻihi ʻokú ke ʻofa aí ʻi ha vahaʻataimi lōloa pe mahalo ʻo taʻengata. Te ke lava ʻo ʻoange ha kiʻi faleʻi nounou ʻe taha maʻanautolu kimuʻa peá ke mavahé.

Ko e hā ha faleʻi te ke vahevahe mo kinautolu? (Mahalo te ke fie fakakau e meʻa ʻokú ke ʻamanaki te nau fai pe ʻikai fai ʻi he kahaʻú, meʻa ʻokú ke ʻamanaki te nau fakamuʻomuʻa ʻi heʻenau moʻuí, pe ongo ʻokú ke maʻu fekauʻaki mo Sīsū Kalaisi mo ʻEne ongoongoleleí.)

Tokoni leva ke mahino ki he kau akó ʻa e puipuituʻa ʻo e tohi Teutalōnomé ʻaki hono vahevahe ʻa e palakalafi puipuituʻa mei he lēsoní ʻa ia ʻoku maʻu ʻi lalo ʻi he ʻuluʻi tohi “Ko e talangofuá ko hano fakahaaʻi ia ʻo e ʻofá.”

Ngaahi sīpinga ʻo hono fakamuʻomuʻa ʻo e ʻOtuá ʻi heʻetau moʻuí

Naʻe ʻomi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi sīpinga ʻo hono fakamuʻomuʻa e ʻofa ʻa e ʻOtuá ʻi heʻetau moʻuí ʻi heʻene lea “Fakamuʻomuʻa ʻa e ʻUluaki Fekaú” (fakataha lotu ʻa e ʻUnivēsiti Pilikihami ʻIongí, 22 Māʻasi 2022).

Fakakaukau ke paaki ha ngaahi tatau ʻo e ngaahi konga ʻo ʻene leá ʻi lalo ʻi he ʻuluʻi tohi ʻe fā ko ʻení. Fakaafeʻi ha fanga kiʻi kulupu iiki ke nau ako ha konga ʻe taha pea teuteu ke vahevahe ha ngaahi fakakaukau ki he founga te tau lava ai ʻo ʻuluaki fokotuʻu ʻetau ʻofa ki he ʻOtuá ʻi heʻetau moʻuí.

Ko Hono Fakamuʻomuʻa ʻo e ʻUluaki Fekaú: “Tauhi ʻEku Ngaahi Fekaú”

Ko Hono Fakamuʻomuʻa ʻo e ʻUluaki Fekaú: “Fafanga ʻEku Fanga Sipí”

Ko Hono Fakamuʻomuʻa ʻo e ʻUluaki Fekaú: Ui kiate Ia; Keinanga ʻi Heʻene Ngaahi Folofolá

Ko Hono Fakamuʻomuʻa ʻo e ʻUluaki Fekaú: Haʻisia ki he ʻOtuá

Mātiu 22:36–39: “Ko e fekau lahí”

Ke fakafeʻiloaki e kau akó ki he Teutalōnome 6:5 ʻi ha founga ʻe tokoni ke mahino kiate kinautolu hono mahuʻingá, kole ange ke nau vahevahe vave mo hanau hoa ʻa e meʻa te nau pehē ʻoku lelei taha ʻi he ngaahi kulupu ko ʻení (pe ngaahi kulupu kehe te ke ala filí).

Heleʻuhila

Feituʻu ke folau ʻeveʻeva ki ai

Fakaneifua

Himi

Fakaafeʻi leva e kau akó ke lau ʻa e Mātiu 22:36–39, ʻo kumi e founga naʻe tali ʻaki ʻe Sīsū Kalaisi ha fehuʻi tatau.

Fehuʻi ki he kau akó pe ʻoku nau ʻilo ʻa e feituʻu te tau lava ʻo maʻu ai ʻa e ʻuluaki fekau lahi naʻe ʻuhinga ki ai ʻa Sīsuú. Fakaafeʻi ke nau fakaʻilongaʻi ʻa e Teutalōnome 6:5 pea fakafekauʻaki pe fakafehokotaki ia ki he Mātiu 22:36–39.