Хуучин Гэрээний семинарын багшийн гарын авлага

Контент
Нүүр хуудас
Багшийн гарын авлагын танилцуулга
Хуучин Гэрээний хичээлүүд
- Хуучин Гэрээний ангид тавтай морилно уу
- Мосе 1; Абрахам 3
- Эхлэл 1–2; Мосе 2–3; Абрахам 4–5
- Эхлэл 3–4; Мосе 4–5
- Эхлэл 5; Мосе 6
- Moсе 7
- Эхлэл 6–11; Мосе 8
- Эхлэл 12–17; Абрахам 1–2
- Эхлэл 18–23
- Эхлэл 24–33
- Эхлэл 37–41
- Эхлэл 42–50
- Гэтлэл 1–6
- Христийн амилсны баяр
- Гэтлэл 7–13
- Гэтлэл 14–18
- Гэтлэл 19–20; 24; 31–34
- Гэтлэл 35–40; Леви 1; 4; 16; 19
- Тооллого 11–14; 20–24; 27
- Дэд хууль 6–8; 15; 18; 29–30; 34
- Иошуа 1–8; 23–24
- Шүүгчид 2–4; 6–8; 13–16
- Рут; 1 Самуел 1–7
- 1 Самуел 8–10; 13; 15–16
- 1 Самуел 17–18; 24–26; 2 Самуел 5–7
- 2 Самуел 11–12; 1 Хаад 3; 6–9; 11
- 1 Хаад 12–13; 17–22
- 2 Хаад 2–7
- 2 Хаад 16–25
- 2 Шастир 14–20, 26, 30
- Езра 1, 3–7; Нехемиа 2, 4–6, 8
- Естер
- Иов 1–3; 12–14; 19; 21–24; 38–40; 42
- Дуулал 1–2; 8; 19–33; 40; 46
- Дуулал 49–51; 61–66; 69–72; 77–78; 85–86
- Дуулал 102–103; 110; 116–119; 127–128; 135–139; 146–150
- Сургаалт үгс 1–4; 15–16; 22; 31; Номлогчийн үгс 1–3; 11–12
- Исаиа 1–12
- Исаиа 13–14; 22; 24–30; 35
- Исаиа 40–49
- Исаиа 50–57
- Исаиа 58–66
- Иеремиа 1–3, 7, 16–18, 20
- Иеремиа 31–33; 36–38; Гашуудал 1, 3
- Езекиел 1–3; 33–34; 36–37; 47
- Даниел 1–7
- Хосеа; Иоел
- Амос; Обадиа; Иона
- Мика; Нахум; Хабаккук; Зефаниа
- Хаггаи 1–2; Зехариа 1–4, 7–14
- Малахи
Амьдралд бэлтгэх хичээл
- Төгс эзэмших сургаал: Асуултдаа хариулт олох
- Судар судлах ур чадвар
- Өсвөр үеийнхний бат бөх байдлын төлөө удирдамж
- Бие даах чадвартай болох
- Бие махбод, сэтгэл санааны эрүүл мэнд
- Ирээдүйн боловсрол, ажилд бэлтгэх
- Сургуульд амжилттай сурах
- Номлолд бэлтгэх
- Ариун сүмд бэлтгэх
- Сүмийн удирдагчдын зааврууд
Хавсралт

Дэд хууль 6:1–6: Бүх зүрх сэтгэлээрээ Бурханыг хайрлах

“Дэд хууль 6:1–6: Бүх зүрх сэтгэлээрээ Бурханыг хайрлах,” Хуучин Гэрээний семинарын багшийн гарын авлага (2026)

“Дэд хууль 6:1–6: Бүх зүрх сэтгэлээрээ Бурханыг хайрлах,” Хуучин Гэрээний семинарын багшийн гарын авлага

Дэд хууль 6–8; 15; 18; 29–30; 34: 58-р хичээл

Дэд хууль 6:1–6

Бүх зүрх сэтгэлээрээ Бурханыг хайрлах

Мосе израилчуудыг цөлд 40 жил удирдсаныхаа дараа, Их Эзэнийг Иошуад тэднийг амлагдсан нутаг руу авч явахыг тушаахаас өмнө сүүлчийн зөвлөгөөгөө тэдэнтэй хуваалцжээ. Мосегийн бошиглолын захиасны нэг чухал хэсэг бол “өөрийн Бурхан Эзэнээ бүх зүрх сэтгэлээрээ хайрла” (Дэд хууль 6:5) гэсэн захиас байв. Энэ хичээл нь Бурханд хайраа хэрхэн харуулахыг суралцагчдад ойлгуулна.

Суралцагчийн бэлтгэл: Хэн нэгэнд хайраа үгээр бус үйлдлээрээ харуулах арга замаасаа хуваалцахыг эцэг эх, асран хамгаалагч эсвэл Сүмийн удирдагчаасаа хүсэхэд суралцагчдыг урь. Энэ хичээл нь Бурханд хайраа харуулах арга зам дээр төвлөрнө гэдгийг суралцагчдад хэлэх нь тус болж болох юм.

Боломжит суралцах үйл ажиллагаа

Хайраа үзүүлэх

Хайраа үзүүлэх янз бүрийн арга замын талаар оюунаа уралдуулан хэлэлцэхэд суралцагчдад туслахын тулд дараах үйл ажиллагааг ашиглах талаар бодож үз.

Гэр бүлийнхээ хайртай гишүүний нэрийг судлах тэмдэглэлдээ бич.
Бичсэн нэрийнхээ доор тэдэнд хайраа харуулах хэд хэдэн онцгой санааг 60 секундэд багтаан бич.

Бичсэн нэр болон хайраа харуулах санаануудаа сайн дураараа хуваалцахыг хэдэн суралцагчаас хүс.

Суралцагчдыг хуваалцаж дуусмагц Дэд хууль 6:5-ыг уншаад, сурч мэдсэн зүйлээ хуваалцахад урь. (Суралцагчид өөрсдийн үгээр Бурхан бидэнд Өөрийг нь бүх зүрх, бүх сэтгэл, бүх хүч чадлаараа хайрлахыг тушаасан гэх мэт үнэнийг хуваалцаж болно.) Та Есүс Христийн онцолсон төгс эзэмших сургаалын судрын хэсэг болох Матай 22:36–39-тэй холбох эсвэл холбогдох эшлэл болгохыг суралцагчдад санал болгож болно.

Самбарын голд Тэнгэрлэг Эцэг, Есүс Христ хоёр гэж бичих талаар бодож үз. Суралцагчдад хоёр минут гаргаж өгөөд, Тэдэнд хайраа илэрхийлэх янз бүрийн санааг самбарт жагсаан бичихэд тэднийг урь.

Дараа нь ангийнхны аль санаа анхаарлыг нь татсан, яагаад гэдгийг хуваалцахад суралцагчдыг урамшуулан дэмж.

Дараах асуултуудыг тунгаан бод.

Та нар Тэнгэрлэг Эцэг, Есүс Христ хоёрын талаар чин сэтгэлээсээ юу гэж боддог вэ? Ямар учраас ингэж боддог вэ?
Та нар Тэдэнд өөрсдийн бодол санааг ямар ямар арга замаар үзүүлдэг вэ?

Энэ долоо хоногт Дэд хууль номыг судлахдаа Ариун Сүнсний өдөөлтөд анхаарлаа төвлөрүүл. Ариун Сүнсний нөлөө Тэнгэрлэг Эцэг, Есүс Христ хоёрыг хайрлах хайрыг тань гүнзгийрүүлж, хайраа Тэдэнд илэрхийлэх арга замуудыг та нарт заана.

Есүс биднийг бүх зүрх сэтгэлээрээ хайрладаг

Бурханы үлгэр жишээнээс суралцахад нь суралцагчдад туслахын тулд тэднийг Дэд хууль 6:5-ыг 1 Иохан 4:19-тэй холбох эсвэл холбогдох эшлэл болгоход урьж болно. 19-р шүлгийг уншиж дуусмагц та Бурхан хүн нэг бүрд эсвэл тэдэнд хайраа үзүүлж байсан арга замуудыг хуваалцахыг суралцагчдаас хүсэж болно.

Дараах мэдэгдэл нь биднийг бүх зүрх сэтгэлээрээ хайрласан Бурханы төгс үлгэр жишээг эргэцүүлэн бодоход суралцагчдад тусалж болох юм. Мэдэгдлийг үзүүлээд, чанга уншихад нэг суралцагчийг урих талаар бодож үз. Дараа нь суралцагчдыг доорх асуултуудад өгөх хариултаа ярилцаж байх хооронд үүнийг үргэлжлүүлэн үзүүл.

Арван хоёр төлөөлөгчийн чуулгын ерөнхийлөгч Жэффри Р.Холланд Бурханы жинхэнэ зан чанарыг илүү сайн ойлгоход бидэнд тусалсан.

19:25

Үүрд мөнх оршихуйн хамгийн эхний агуу зарлиг бол Бурханыг бүх зүрх сэтгэлээрээ, өөрийн бүх хүчин чадал, оюун ухаан хийгээд чадлаараа хайрлах ёстой гэсэн тушаал байдаг. Гэхдээ мөнх оршихуйн хамгийн эхний агуу үнэн бол Бурхан биднийг бүх зүрх сэтгэлээрээ, өөрийн бүх хүчин чадал, оюун ухаан хийгээд чадлаар хайрладаг явдал юм. Энэ хайр бол мөнх оршихуйн суурь бөгөөд бидний өдөр тутмын амьдралын ч суурь болох ёстой. Бидний бодгальд энэхүү баталгаа гал мэт асаж байх үед л бид үргэлж итгэж, сайжрахыг хичээн, нүглийнхээ өршөөлийг эрэлхийлж мөн тэрхүү ач ивээлийг хөршдөө түгээх итгэл үнэмшилтэй байна. (“Маргааш Эзэн та нарын дунд гайхамшигт зүйлсийг хийх болно,” 2016 оны 4-р сарын Ерөнхий чуулган, 114)

Ерөнхийлөгч Холландын хэлсэн мэдэгдлээс Бурханыг хайрлах хайраа харуулах сэдлийг бидэнд төрүүлэх ямар зүйлийг та нар мэдэж авсан бэ?
Хэрэв Бурханыг “бүхий л чадлаараа” хайрлах хангалттай хайрыг мэдрэхгүй байвал үүний тулд тухайн хүн ямар ямар алхам хийж болох вэ?

Дуулгавартай байх нь хайрын илрэл юм

Дэд хууль номын товч агуулгыг суралцагчдад өгөх үүднээс хичээлийн эхэнд Мосегийн зургийг үзүүлээд, дараах догол мөрийг өөрөө товч хураангуйл эсвэл нэг суралцагчийг чанга уншихад урих талаар бодож үз.

Мосе Бурханы бошиглогчоор 40 жил үйлчилснийхээ дараа израилчуудад амлагдсан нутгийн хил дээр буудаллахыг зааварлажээ. Иошуа удалгүй тэднийг хилийн цаана удирдаж авчрах байв (Дэд хууль 31:23-ыг үзнэ үү). Мосег Их Эзэн дээш авч одохоос эсвэл үхүүлэлгүйгээр Өөртөө авахынх нь өмнө тэр уулын орой дээрээс амлагдсан нутгийг харсан (Дэд хууль 34:1–6; Алма 45:18–19-ийг үзнэ үү). Дэд хуульд Мосегийн хүмүүстээ өгсөн сүүлчийн, түүний дотор Бурханыг хайрлаж, Түүний зарлигуудыг дуулгавартай дагах тухай сүнслэгээр өдөөгдсөн зөвлөгөө багтсан байдаг.

Дараах судрын хэсгүүдийг уншаад, Бурханд хэрхэн хайраа үзүүлэх талаар Мосегийн хүмүүстээ заасан зүйлс болон Есүсийн шавь нартаа заасан зүйлсийн хоорондох ижил төстэй талуудыг олж хар.

Дэд хууль 6:1–6; 30:16

Иохан 14:15, 21–24

Бурханд хайраа үзүүлэх талаар та нар юу олж мэдсэн бэ?

Хэрэв суралцагч аль хэдийн самбарт “зарлигуудыг сахих” гэдгийг Бурханд хайраа үзүүлэх нэг арга зам гэж бичсэн бол үүнийг нь онцлохыг бод. Бичээгүй байвал самбарт нэмж бичих талаар бодож үз.
Та нар яагаад зарлигуудыг сахих нь Тэнгэрлэг Эцэг, Есүс Христ хоёрт хайраа үзүүлэх утга учиртай арга зам гэж бодож байна вэ?

Өдөр тутмын амьдралдаа Бурханыг хайрлах

Ажил, сургууль, семинар, сүм, гэр орон болон давтлага дээр мөн найз нөхөдтэйгөө, сошиал медиа дээр гэх зэрэг нийтлэг орчин нөхцөлийн аль нэгийг сонго. Та нар тухайн орчин нөхцөлийг бодож үзээд дараах асуултад юу гэж хариулах вэ?

Тухайн орчинд хэн нэгэн Бурханд хайраа үзүүлж байхыг та нар хэзээ харсан бэ?
Тэнд Бурханд хайраа үзүүлэх ямар ямар тохиромжтой арга зам байдаг вэ?
Тухайн орчинд Бурханд хайраа илэрхийлэхэд юу саад болдог вэ? Хэрэв тийм бол бид үүнийг хэрхэн даван туулж болох вэ?

Дүгнэлт

Төгсгөлд нь та Тэнгэрлэг Эцэг, Есүс Христ хоёрт хайраа илэрхийлснээр хичээлээ дуусгаж болно.

Гэрчлэлээсээ гадна та дараах мэдэгдлийг хуваалцаж, судлах тэмдэглэлдээ Тэнгэрлэг Эцэг, Есүс Христ хоёрын талаар бодол санаагаа илэрхийлэхэд суралцагчдыг урьж болно. Хичээлийн үеэр Сүнснээс хүлээн авсан аливаа мэдрэмжийнхээ дагуу үйлдэхэд тэднийг урамшуулан дэмж.

Далын ахлагч К.Брэтт Натрэсс бидэнд дотроо тунгаан бодох чухал асуултуудыг тавьсан.

Тэнгэрлэг Эцэг биднийг үргэлж санадаг, Тэр биднийг төгс хайрладаг гэдгийг би гэрчилж байна. Би нэг зүйл асууя. Бид Түүнийг санадаг уу? Бид Түүнд хайртай юу? (“Би үнэхээр өршөөгдсөн үү?,” Лиахона, 2023 оны 5-р сар, 67–70)

Нэмэлт эх сурвалж

Бурханыг хайрлах хайр нь хэрхэн Аврагчид цагаатгагч золиослолоо тэсэн гарахад тусалсан бэ?

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Хэрэв бид Бурханыг бүхий л зүрх сэтгэл, бодгаль, оюун ухаан, хүч чадлаараа хайрлах юм бол энэ амьдралдаа Түүний тааллыг гүйцэлдүүлэхэд анхаарах болно. Мэдээж хэн ч үүнийг бидний үлгэр дуурайл болох Есүс Христээс илүү бүрэн бүүрэн, төгс хийгээгүй. Тэр нэгэнтээ “Би үргэлж Түүнд тааламжтай зүйлсийг үйлддэг учир Тэр Намайг ганцааранг минь орхисонгүй” гэжээ. Түүний эн тэргүүнд тавьдаг зүйл нь Эцэгийг алдаршуулах явдал байсан мөн байсаар ирсэн.

Эн тэргүүнд тавьдаг тэр зүйл болох хамгаас илүү үнэнч байдал нь Есүст Цагаатгалаа гүйцэлдүүлж, хамгаас гашуун аяганаас ганц дусал үлдээлгүй уух боломжийг олгосон юм. …

Христийг загалмай дээр байх үед бидний хувь заяа, үхэшгүй байдал, мөнх амьдрал утасны үзүүр дээр дэнсэлж байсан бөгөөд энэ амь амьдрал маань утга учиртай болох эсэхийг бидний талд шийдэгдэхэд хүргэсэн зүйл бол Есүс Христ Эцэгийг бүхий л зүрх сэтгэл, бодгаль, оюун ухаан, хүч чадлаараа хайрладаг байсан явдал юм. (“The First Commandment First” [Brigham Young University devotional, Mar. 22, 2022])

“Аль нь агуу тушаал вэ?” (Maтай 22:36)

Тэргүүн зөвлөлийн ерөнхийлөгч Даллин Х.Өүкс ийн тайлбарласан.

Есүсээс аль нь хамгийн агуу зарлиг вэ гэж асуухад Тэрээр хоёр зарлигийг өгсөн байдаг. Нэг дэх нь Бурханыг хайрлах. Бид зарлигуудыг нь сахиснаар хайраа харуулдаг. Хоёр дахь нь хөршөө хайрлах. Бид хоёуланг нь сахих ёстой ба энэ нь тийм ч амар биш юм. Биднээс олон нь хөршөө хайрлахад бага ач холбогдол өгч, хуулийг (зарлигуудыг) сахихад хэт өндөр ач холбогдол өгдөг хандлагатай байдаг. Би хууль, эрх зүйн боловсролтой тул ийм хандлага гаргах гээд байдаг нь үнэн. Эцсийн эцэст, Бурханыг хайрлаж, Түүний зарлигуудыг сахих замаар Түүнийг хайрлах хайраа харуулах нь хамгийн анхны агуу зарлиг юм. Мэдээж хуулийг дагаж байна уу юу үгүй юү хэмээн өөрсдийгөө болон бусдыг шүүх амархан. Гэхдээ бидний хүн нэг бүр Есүс биднийг хайрладаг шиг хөршүүдээ түүний “адил” хайрлах гэсэн хоёр дахь зарлигийг сахих нь амин чухал. (“Үнэний төлөө зогс” [залуучуудад зориулсан дэлхий даяарх онцгой цугларалт, 2023 оны 5-р сарын 21], Gospel Library)

Бурханыг илүү гүн гүнзгий хайрлахын тулд бид юу хийж болох вэ?

“Бурханыг чин сэтгэлээсээ хайрлах 3 арга” гэсэн гарчигтай нийтлэлд цаг хугацаа өнгөрөхийн хэрээр Бурханыг хайрлах хайраа гүнзгийрүүлэх санаанууд бий.

Нэмэлт суралцах үйл ажиллагаа

Дэд хууль номын хам сэдвийг ойлгоход нь суралцагчдад туслахын тулд хичээлийг эхлүүлэх өөр хувилбар

Та Мосегийн хайртай хүмүүстээ өгсөн сүүлчийн зөвлөгөөг суралцагчдад ойлгуулах замаар хичээлээ эхлүүлж болно. Энэ нь мөн өөрсдөд нь юу хамгийн чухал болохыг эргэцүүлэн бодоход суралцагчдад тусална.

Үүний тулд та дараах зааврыг үзүүлээд, тунгаан бодох эсвэл бичих хоёроос гурван минутыг суралцагчдад өгч болно. Дараа нь хэт хувийн биш бол бодол санаагаа хуваалцахад хэдэн суралцагчийг урь.

Та нар хайртай хүмүүсээсээ удаан хугацаагаар эсвэл үүрд хол байна гээд төсөөлөөд үз. Та нар явахаасаа өмнө тэдэнд зориулж нэгэн богино зурвас үлдээж болно.

Тэдэнд ямар зөвлөгөө өгөх байсан бэ? (Та тэднийг ирээдүйд юу хийгээсэй эсвэл хийхгүй байгаасай, амьдралдаа юуг эн тэргүүнд тавиасай гэж найдаж эсвэл Есүс Христийн тухай болон Түүний сайн мэдээний талаар ямар бодолтой байгаагаа хэлж болно.)

Дараа нь Дэд хууль номын хам сэдвийг ойлгоход нь суралцагчдад туслахын тулд “Дуулгавартай байдал бол хайрын илрэл” гэсэн гарчгийн доорх хичээлийн хам сэдвийн догол мөрийг хуваалцаж болно.

Бурханыг амьдралдаа эн тэргүүнд тавих жишээ

Арван хоёр төлөөлөгчийн чуулгын ахлагч Д.Тодд Кристоффэрсон өөрийн хэлсэн “The First Commandment First” (Эхний тушаалыг нэгдүгээрт) үгэндээ Бурханы хайрыг амьдралдаа нэгд тавих гэдэг нь ямар утгатай болохын хэд хэдэн жишээг өгсөн (Brigham Young University devotional, Mar. 22, 2022).

Түүний хэлсэн үгийн хэсгүүдийг дараах дөрвөн гарчигтайгаар хэвлэн гаргах тухай бод. Жижиг бүлгүүд дотроо тус бүр нэг нэг хэсгийг судлаад, Бурханыг гэх хайраа хэрхэн амьдралдаа нэгдүгээрт тавих талаар бодол санаагаа хуваалцахад урь.

Эхний тушаалыг нэгдүгээрт тавих: “Тушаалуудыг минь сахь”

Эхний тушаалыг нэгдүгээрт тавих: “Хоньдыг минь тэжээ”

Эхний тушаалыг нэгдүгээрт тавих: Түүнийг дууд. Түүний үгэн дээр найрла

Эхний тушаалыг нэгдүгээрт тавих: Бурханы өмнө хүлээх хариуцлага

Матай 22:36–39: “Агуу тушаал”

Дэд хууль 6:5-ыг ач холбогдлыг нь ойлгогдохуйц арга замаар суралцагчдад танилцуулахын тулд дараах ангиллуудаар (эсвэл өөрийн сонгосон өөр ангиллаар) аль нь хамгийн агуу вэ гэдгийг хамтрагчтайгаа хурдхан хуваалцахыг тэднээс хүс.

Кино

Амралтын газар

Амттан

Дуулал

Дараа нь Maтай 22:36–39-ийг уншаад, Есүс Христ үүнтэй адил асуултад хэрхэн хариулсныг олж мэдэхэд суралцагчдыг урь.

Есүсийн хэлсэн эхний агуу тушаалыг хаанаас олохоо мэдэж байгаа эсэхийг суралцагчдаас асуу. Тэднийг Дэд хууль 6:5-ыг тэмдэглээд, үүнийг Матай 22:36–39-ийн холбогдох эшлэл болгох юм уу холбоход урь.