« និក្ខមនំ ១៥; ១៧ ៖ ការស្វែងរកសេចក្តីពិតមកពីព្រះនៅក្នុងបទគម្ពីរទាំងឡាយ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« និក្ខមនំ ១៥; ១៧ ៖ ការស្វែងរកសេចក្តីពិតមកពីព្រះនៅក្នុងបទគម្ពីរទាំងឡាយ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ជារឿយៗ ព្រះតែងប្រើបទពិសោធន៍ខាងសាច់ឈាម ដើម្បីបង្រៀនមេរៀនខាងវិញ្ញាណសំខាន់ៗ ។ ឧទាហរណ៍ ព្រះបានប្រើសេចក្តីត្រូវការទឹករបស់ពួកសាសន៏អ៊ីស្រាអែល និងជំនួយធ្វើការប្រយុទ្ធ ដើម្បីបង្រៀនពួកគេ និងពួកយើង ។ តាមរយៈការអនុវត្ត និងការដឹកនាំពីព្រះវិញ្ញាណ នោះយើងអាចរៀនសម្គាល់ និងប្រើសេចក្តីពិតខាងវិញ្ញាណនៅក្នុងដំណើររឿងនៃបទគម្ពីរទាំងឡាយចំពោះជីវិតរបស់យើង ។ មេរៀននេះអាចជួយសិស្សអនុវត្តការស្វែងរកសេចក្តីពិតមកពីព្រះនៅក្នុងដំណើររឿងនៃបទគម្ពីរទាំងឡាយ និងភ្ជាប់សេចក្តីពិតទាំងនោះទៅនឹងជីវិតរបស់ពួកគេ ។
ការរៀបចំសិស្ស ៖ អញ្ជើញសិស្សឲ្យជញ្ជឹងគិតអំពីដំណើររឿងដែលពួកគេបានសិក្សានៅក្នុងព្រះគម្ពីរសញ្ញាចាស់ និងមុក្ដាដ៏មានតម្លៃមហិមាមកដល់ត្រីមាសនេះ ។ សុំឲ្យពួកគេរៀបចំខ្លួនមកថ្នាក់រៀនដើម្បីចែកចាយពីរបៀបដែលពួកគេនឹងបំពេញឃ្លាដូចតទៅនេះ ៖ « ខ្ញុំចូលចិត្តដំណើររឿងអំពី ដោយសារវាបង្រៀនខ្ញុំថា » ។
សកម្មភាពរៀនសូត្រដែលអាចមាន
ការស្វែងរកសេចក្ដីពិតនៃដំណឹងល្អនៅក្នុងបទគម្ពីរទាំងឡាយ
នៅក្នុងមេរៀននេះ សិស្សនឹងមានឱកាសរកឃើញ និងចែកចាយសេចក្តីពិតនៃដំណឹងល្អផ្សេងៗទៀត ។ វាអាចជាប្រយោជន៍ក្នុងការរំឭកសិស្សថា ព្រះវរបិតាសួគ៌ និងព្រះយេស៊ូវគ្រីស្ទ គឺជាប្រភពនៃសេចក្ដីពិតនៃដំណឹងល្អទាំងអស់ ។ សូមពន្យល់ថា ការដឹងអំពីរបៀបស្វែងរក និងប្រើប្រាស់សេចក្ដីពិតនៃដំណឹងល្អ អាចជួយយើងខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។
ដើម្បីចាប់ផ្តើមមេរៀននេះ សូមពិចារណាសួរសិស្សអំពីរបៀបដែលពួកគេនឹងបំពេញចន្លោះនៅក្នុងប្រយោគខាងក្រោម ។ ប្រសិនបើរូបភាពរំឭកអំពីដំណើររឿងមួយចំនួនដែលអ្នកបានសិក្សាអាចមានអត្ថប្រយោជន៍ នោះអ្នកអាចបង្ហាញរូបភាពទាំងឡាយដូចខាងក្រោម ។ ឬសូមអញ្ជើញសិស្សឲ្យមើលរូបភាពទាំងឡាយនៃ ព្រះគម្ពីរសញ្ញាចាស់ នៅក្នុង សៀវភៅរូបភាពដំណឹងល្អ [ ឆ្នាំ២០០៩ ] ដែលអាចរកបាននៅក្នុងបណ្ណាល័យដំណឹងល្អ នៅក្រោម « វីដេអូ និងរូបភាព » ។
សូមបំពេញប្រយោគខាងក្រោមជាមួយនឹងដំណើររឿងបទគម្ពីរដែលអ្នកជ្រើសរើស ៖
« ខ្ញុំចូលចិត្តដំណើររឿងនៃ ព្រោះវាបង្រៀនខ្ញុំថា » ។
នៅពេលអ្នកស្ម័គ្រចិត្តកំពុងចែកចាយជាមួយសិស្សក្នុងថ្នាក់ ពួកគេអាចសរសេរសេចក្ដីពិតដែលពួកគេរកឃើញនៅលើក្ដារខៀន ។ សេចក្តីពិតដែលពួកគេចែកចាយអាចត្រូវបានថ្លែងជាគោលលទ្ធិដូចជា « យើងជាបុត្រាបុត្រីរបស់ព្រះ » ( សូមមើល ម៉ូសេ ១:១–៧ ) ។ ឬពួកគេអាចលើកឡើងជាគោលការណ៍ដែលអាចអនុវត្តបាន ដូចជា « ប្រសិនបើយើងស្ម័គ្រចិត្តឲ្យព្រះដឹកនាំ នោះទ្រង់នឹងបង្កើនសមត្ថភាពរបស់យើងដើម្បីសម្រេចកិច្ចការរបស់ទ្រង់ » ( សូមមើល ម៉ូសេ ៦:៣១–៣៦ ) ។ អ្នកក៏អាចសុំសិស្សដែលចែកចាយ ឲ្យពន្យល់ពីមូលហេតុដែលសេចក្ដីពិតដែលពួកគេបានសរសេរមានសារៈសំខាន់នៅក្នុងជីវិតរបស់ពួកគេ ។
ក្នុងនាមជាគ្រូបង្រៀន សូមព្យាយាមកុំផ្ដល់ការឆ្លើយតបរបស់អ្នកផ្ទាល់ចំពោះយោបល់របស់សិស្សគ្រប់រូបឡើយ ។ វាអាចមានអត្ថប្រយោជន៍ក្នុងការសុំសិស្សក្នុងថ្នាក់ឲ្យចែកចាយអ្វីដែលពួកគេបានរៀនសូត្រចេញពីយោបល់របស់សិស្សម្នាក់ទៀត ។ ការណ៍នេះអាចជួយសិស្សស្វែងយល់អំពីគំនិត និងអារម្មណ៍របស់ពួកគេផ្ទាល់តាមរយៈឥទ្ធិពលនៃព្រះវិញ្ញាណបរិសុទ្ធ ។ សម្រាប់ការបំពាក់បំប៉នបន្ថែមលើចំណុចនេះ សូមមើល « ជួយសិស្សឲ្យទទួលខុសត្រូវលើការរៀនសូត្ររបស់ពួកគេ » នៅក្នុង ជំនាញអភិវឌ្ឍន៍គ្រូបង្រៀន [ ឆ្នាំ ២០២២ ] ។
នៅពេលសិស្សចែកចាយ អ្នកអាចចង្អុលបង្ហាញថា មានភាពខុសគ្នាដ៏សំខាន់មួយរវាងការចូលចិត្តដំណើររឿងបទគម្ពីរមួយ និងការស្វែងរកសេចក្ដីពិតដែលទាក់ទងអំពីព្រះនៅក្នុងដំណើររឿងនោះ ។ សូមពន្យល់ថា នៅពេលពួកគេស្វែងរកការណែនាំពីព្រះវិញ្ញាណដោយអធិស្ឋាននៅក្នុងការសិក្សាបទគម្ពីររបស់ពួកគេ ព្រះវរបិតាសួគ៌នឹងជួយពួកគេស្វែងរកសេចក្ដីពិតដែលទាក់ទងចំពោះពួកគេបំផុត ។
បន្ទាប់ពីសិស្សបានចែកចាយចប់ហើយ សូមអញ្ជើញពួកគេឲ្យជញ្ជឹងគិតអំពីការខិតខំរបស់ពួកគេស្វែងរកសេចក្ដីពិតនៅក្នុងការសិក្សាបទគម្ពីររបស់ពួកគេផ្ទាល់ ។ អ្នកអាចប្រើការបំផុសខាងក្រោម ។
សូមកត់ត្រាចម្លើយរបស់អ្នកចំពោះសំណួរខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។
-
តើការសិក្សាបទគម្ពីររបស់អ្នកផ្ទាល់ជួយអ្នកឲ្យកាន់តែជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទដែរឬទេ ? ហេតុអ្វីជួយ ឬហេតុអ្វីមិនជួយ ?
-
តើអ្នកផ្អាកញឹកញាប់ប៉ុនណាក្នុងអំឡុងពេលសិក្សាបទគម្ពីររបស់អ្នក ដើម្បីស្វែងរកសេចក្ដីពិតដែលអ្នកមានអារម្មណ៍ថា ព្រះវរបិតាសួគ៌ចង់ឲ្យអ្នកផ្ដោតលើ ?
-
តើអ្នកព្យាយាមយល់អំពីរបៀបដែលដំណើររឿងបទគម្ពីរអនុវត្តចំពោះជីវិតរបស់អ្នកដែរឬទេ ?
នៅពេលអ្នកសិក្សាដំណើររឿងពី និក្ខមនំ ១៥ និង ១៧ នៅថ្ងៃនេះ សូមយកចិត្តទុកដាក់ចំពោះគំនិត និងអារម្មណ៍ដែលព្រះវិញ្ញាណបំផុសគំនិត ។ សូមរកមើលចំណាប់អារម្មណ៍ដែលអាចជួយអ្នកឲ្យទទួលបានកាន់តែច្រើនមកពីការសិក្សាបទគម្ពីររបស់អ្នកផ្ទាល់ ។
ការស្វែងរកសេចក្ដីពិតដំណឹងល្អចេញពី និក្ខមនំ ១៥, ១៧
នៅក្នុងមេរៀនផ្នែកនេះ សិស្សនឹងមានឱកាសកំណត់ និងស្វែងរកសេចក្ដីពិតដែលទាក់ទងពីដំណើររឿងរបស់ព្រះអម្ចាស់ដែលខ្វល់ខ្វាយអំពីពួកសាសន៏អ៊ីស្រាអែលនៅទីរហោស្ថាន ។
សូមពិចារណាបែងចែកសិស្សទៅជាគូៗ ។ សូមចាត់តាំងចំនួនគូស្រដៀងៗគ្នា ដើម្បីសិក្សាដំណើររឿងនីមួយៗនៅក្នុងសំណៅមេរៀននេះ ។ អ្នកអាចចាត់តាំងសិស្សដែលមានបទពិសោធន៍តិចក្នុងការសិក្សាបទគម្ពីរឲ្យធ្វើការជាមួយសិស្សដែលមានបទពិសោធន៍ច្រើន ។
សូមប្រាកដថា ផ្តល់ពេលវេលាគ្រប់គ្រាន់ដល់ដៃគូទាំងឡាយ ដើម្បីពិភាក្សា និងរៀបចំ ។ អ្នកអាចដើរចុះឡើង និងជួយសិស្សដែលអាចត្រូវការការណែនាំបន្ថែម ។
បន្ទាប់ពីមានពេលសិក្សា ពិភាក្សា និងរៀបចំគ្រប់គ្រាន់ហើយ សូមផ្តល់ឱកាសដល់ដៃគូទាំងឡាយដើម្បីចែកចាយអ្វីដែលពួកគេបានរៀន ។ ខាងក្រោមនេះគឺជាវិធីដែលសិស្សអាចចែកចាយ អាស្រ័យលើពេលវេលាដែលមាន ៖
-
គូនីមួយៗចែកចាយជាមួយគូដែលបានសិក្សាដំណើររឿងផ្សេង ។ បន្ទាប់មកពួកគេឆ្លាស់វេនគ្នាចែកចាយជាមួយដៃគូដែលបានសិក្សាដំណើររឿងដែលនៅសេសសល់ ។
-
ដៃគូដំបូងត្រូវរួមគ្នា ហើយចែកចាយជាមួយអ្នកផ្សេងទៀតដែលបានសិក្សាដំណើររឿងដូចគ្នា ។ ( ការណ៍នេះអាចផ្តល់ឲ្យសិស្សនូវការយល់ដឹងបន្ថែមអំពីដំណើររឿងរបស់ពួកគេផ្ទាល់ ) ។ បន្ទាប់មក សិស្សមកជួបជុំគ្នា ហើយចែកចាយនៅក្នុងក្រុមដែលមានគ្នាប្រាំមួយនាក់ ដោយដៃគូនីមួយៗបានសិក្សាដំណើររឿងខុសៗគ្នា ។
-
ដៃគូទាំងឡាយឆ្លាស់វេនគ្នាបង្ហាញពីអ្វីដែលពួកគេបានរៀបចំដល់ថ្នាក់ទាំងមូល ។
ការធ្វើឲ្យមេរៀនមានទំនាក់ទំនងផ្ទាល់ខ្លួន
ដើម្បីបញ្ចប់មេរៀននេះ សូមពិចារណាប្រើការបំផុសគំនិតដូចតទៅនេះ ដើម្បីជួយសិស្សធ្វើឲ្យអ្វីដែលពួកគេបានរៀនទំនាក់ទំនងផ្ទាល់ខ្លួន ។
សូមកត់ត្រាគំនិតរបស់អ្នកអំពីសំណួរដូចខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកមានអារម្មណ៍ថាព្រះវរបិតាសួគ៌ចង់ឲ្យអ្នកចងចាំអ្វីខ្លះចេញពីមេរៀននេះ ? ហេតុអ្វី ?
-
តើអ្នកអាចប្រើជំនាញស្វែងរកសេចក្តីពិតចេញពីដំណើររឿងបទគម្ពីរនៅក្នុងការសិក្សាបទគម្ពីររបស់អ្នកផ្ទាល់ដោយរបៀបណា ? តើការប្រើជំនាញនេះអាចមានឥទ្ធិពលលើបទពិសោធន៍របស់អ្នកពីបទគម្ពីរយ៉ាងដូចម្ដេច ?
អ្នកអាចអញ្ជើញអ្នកស្ម័គ្រចិត្តឲ្យចែកចាយអ្វីដែលពួកគេបានសរសេរនៅក្នុងសៀវភៅសិក្សារបស់ពួកគេមួយផ្នែក ។
សូមពិចារណាស្វែងរកឱកាសនៅក្នុងមេរៀនខាងមុខ ដើម្បីអញ្ជើញសិស្សឲ្យចែកចាយសេចក្តីពិតដែលពួកគេរៀនពីការសិក្សាបទគម្ពីររបស់ពួកគេផ្ទាល់ផងដែរ ។