“Esoto 7–11: Iloaina o le Mana o le Alii,” Tusi Lesona a le Faiaoga Seminare o le Feagaiga Tuai (2026)
“Esoto 7–11: Iloaina o le Mana o le Alii,” Tusi Lesona a le Faiaoga Seminare o le Feagaiga Tuai
Esoto 7–13: Lesona 41
Esoto 7–11
Iloaina o le Mana o le Alii
E mafai ona faigata ona iloa le mana o le Alii i o tatou olaga. Na filifilia e le Alii ia Mose ma Arona e faaalia Lona mana i luma o Farao. Na le talia e Farao le mana o le Alii. O lenei mea na faaosofia ai nisi faailoaga o le mana o le Alii e ala i mala na oo mai i Aikupito. O le faamoemoega o lenei lesona o le fesoasoani lea i tagata aoga ia malamalama i le auala e iloa ai le mana o le Alii ma talitonu ia te Ia.
Sauniuniga a le tagata aoga: Valaaulia tagata aoga e saili mo faamaoniga o le mana o le Alii i o latou olaga i le va o le taimi nei ma le isi vasega.
Gaoioiga E Ono Mafai Ona Aoao Ai
O le mana o le Atua o loo siomia ai i tatou
Mafaufau e amata le vasega i le fai atu o fesili nei pe fai atu i tagata aoga e talanoaina i ni vaega.
-
A o e agai atu i le seminare i le asō, o a mea na e vaaia, maitauina, pe iloaina?
-
I se fua o le 1–5 (1 e leai lava, 5 e matua tele lava), e faapefea ona e fuaina lou iloaina o mea o loo siomia ai oe i le asō?
-
O a nisi o mafuaaga atonu tatou te matua mataala ai pe le mataala ai foi?
Faamalamalama atu faapea, i se auala talitutusa, e mafai ona tatou mafaufau loloto i le auala tatou te mataala ai i mea sa faia pe o loo faia foi e le Alii mo i tatou. Mafaufau e fai atu fesili nei:
-
O le a se faamaoniga e ono maitauina ai e se tasi le mana o le Atua i se aso masani?
O se tasi o auala e valaaulia ai le Agaga Paia e aoao taitoatasi tagata aoga o le faatagaina lea o tagata aoga e iloilo e i latou lava o latou lagona i le tulaga o loo latou tausia ai mataupu faavae patino o le talalelei. E mafai ona e fesoasoani ia i latou e faia lenei mea e ala i le faaali atu o mea nei:
Faatulaga oe lava i se fua o le 1–5 (1 aupito maualalo, 5 aupito maualuga) i le lelei o le faamatalaina ai o oe e mea nei:
-
Ou te lagona le mautinoa i lo’u gafatia e iloa ai le mana po o le uunaiga a le Atua i lo’u olaga.
A o e aoao i le asō, valaaulia le Agaga Paia e fesoasoani ia te oe e faateleina lou tomai e iloa ai le mana ma le faatosinaga a le Atua i lou olaga.
Talitonu i le Alii
I le Esoto 6–7, na folafola atu ai e le Alii ia Mose o le a Ia aumaia le fanauga a Isaraelu mai le nofopologa. Sa Ia tautino faapea, o le a Ia faaali atu Lona mana ia Farao ma tagata Aikupito ma o le a leai se isi mea latou te filifili i ai ae ia faasaolotoina tagata Isaraelu.
Faitau le Esoto 6:7; 7:5, ma vaavaai mo mea o le a faamautinoa e le Alii o le a iloa uma e tagata Isaraelu ma Aikupito. Atonu e mananao tagata aoga e faailoga mea latou te maua.
-
O le a se mea o le a iloa e tagata Isaraelu ma Aikupito ona o faaaliga o le mana o le Alii?
-
O le a se mea e mafai ona tatou aoaoina e uiga i le Alii mai nei tautinoga?
Fesoasoani i tagata aoga e faailoa mai se upumoni e talitutusa i le, o le Alii e tuuina mai ia i tatou avanoa e talitonu ai ia te Ia ma iloa ai Lona mana i o tatou olaga.
O mala
O le gaoioiga lenei e mafai ona tuuina atu ai i tagata aoga le avanoa e faamasani ai i nisi o mala o Aikupito. E mafai foi ona fesoasoani ia i latou e vaai ai i tali eseese atu i faaaliga o le mana o le Atua. Ia faaeteete ia aua nei faaaluina se taimi tele i lenei vaega ina nei aveesea ai [le taulaiga] mai le vaega o totoe o le lesona.
Mafaufau e faaali atu le siata ma fesili nei.
I le Esoto 7–11, na faaalia ai e le Alii Lona mana e ala i se faasologa o mala. Vaai i le siata lenei ma filifili ni mala se lua pe tolu e suesue i ai, ma vaavaai mo ni tali i fesili o loo sosoo mai.
O nisi fuaiupu o loo faapea mai na faamaaa e le Alii le loto o Farao. O le Faaliliuga a Iosefa Samita ua tuuina mai ai se faamaninoga taua faapea na faamaaa e Farao lona lava loto (tagai i le Faaliliuga a Iosefa Samita, vaefaamatalaga i le Esoto 7:3, 13; 9:12; 10:1, 20, 27; 11:10).
|
Mala |
Fuaiupu e suesue i ai |
|---|---|
Mala 1. Ua liua le vai i le toto | Fuaiupu e suesue i ai Esoto 7:19–25 |
Mala 2. Ua oo mai lane i luga o le laueleele | Fuaiupu e suesue i ai Esoto 8:5–15 (Manatua: “Mapu” o lona uiga o le malologa po o le toomaga) |
Mala 3. ’Utu | Fuaiupu e suesue i ai Esoto 8:16–19 |
Mala 4. Lago (vao garova) | Fuaiupu e suesue i ai Esoto 8:20–25, 29–32 |
Mala 5. Manu mamate | Fuaiupu e suesue i ai Esoto 9:1–7 |
Mala 6. Ma’i fulafula | Fuaiupu e suesue i ai Esoto 9:8–12 |
Mala 7. O le uato’a ma le afi mai le lagi | Fuaiupu e suesue i ai Esoto 9:22–29, 33–35 |
Mala 8. Se akerise | Fuaiupu e suesue i ai Esoto 10:12–20 |
Mala 9. Pouliuli | Fuaiupu e suesue i ai Esoto 10:21–27 |
-
O a ni auala na faaalia ai le mana o le Alii?
-
Aisea e te manatu ai na talitonu tagata taitoatasi pe le talitonu foi i le Alii ma Lona mana?
A ua lava se taimi, mafaufau pe valaaulia tagata aoga e faasoa mea na latou maua i ni paga pe i ni vaega toalaiti.
Atonu e fesoasoani le faamanino o nisi o mea nei: Atonu na māitauina e tagata a’oga e faapea, o le ’au faataulāitu a Farao, a lē o le taufaasese po o le mana o le fili, na mafai ai ona latou toe faia nisi o vaega o mala muamua e lua. Peita’i, sa lē mafai ona latou toe faatino atoatoa pe taofia foi mala. Ma le isi, e foliga mai na mafatia tagata Isaraelu i nisi o mala, ae na puipuiamai mala lona fā, lima, ma le fitu.
Afai e aoga, e mafai ona e uunaia tagata aoga e faailoga ni fasifuaitau faaopoopo i le Esoto 8:10, 22; 10:2 lea na molimau mai ai le Alii o le a iloa e tagata o Ia o le Alii.
-
Aisea e te manatu na finagalo ai le Alii ia aoao tagata Aikupito ma tagata Isaraelu e uiga ia te Ia?
-
O a mafuaaga e talitonu ai tagata i nisi taimi i le Atua ma Lona mana ae mulimuli ane ua i ai masalosaloga?
O le mana o le Faaola i o tatou olaga
E mafai ona fesoasoani le faasoa atu i tagata aoga e faapea, o le mana o le Alii ua faaalia i le tele o auala i aso nei. O mea nei e ono mafai ona fesoasoani i tagata aoga e mafaufau ai pe na faapefea ona latou vaai pe maua lena mana.
Vaai faalemafaufau e i ai sau uo e le o mautinoa pe na i ai se taimi na latou maua ai se aafiaga ma le Tama Faalelagi pe na lagonaina foi Lona mana. A o faaauau lau suesuega, mafaufau i le mea e te fai atu ai i lenei tagata.
Atonu e aoga le tuu atu i tagata aoga o se taimi e mafaufau loloto ai pe tusi o latou manatu i le fesili lenei ae latou te lei faasoaina atu i le vasega.
-
O a ni auala ua oo ai ina e talitonu i le mana o le Alii? Po o a ni mea e mafai ona fesoasoani ia te oe e talitonu ai?
-
O a ni faataitaiga mai tusitusiga paia po o le talafaasolopito o le Ekalesia ia na faaali atu ai i tagata le mana o le Alii?
E mafai ona faasoa mai e tagata aoga ni faataitaiga e pei o le lagonaina o le mafanafana po o le filemu mai le tatalo po o se faamanuiaga faaleperisitua, mauaina o le faamagaloga, lagonaina o le taitaiga patino mai le Agaga Paia, ma isi mea faapena.
Fesoasoani i tagata aoga ia malamalama o aafiaga ma le mana o le Alii e masani lava ona mafua mai i le faatinoina o uiga faaalia po o amioga faamaoni.
Na aoao mai e Peresitene Russell M. Nelson le mea lenei e uiga i mea e mafai ona tatou faia e valaaulia ai aafiaga ma le Tama Faalelagi:
Ia malamalama o le aunoa ai o ni aafiaga ma le Atua, e mafai ai e se tasi ona masalosalo i le i ai moni o le Atua. O lea la, tuu oe lava ia i se tulaga e amata ai ona maua aafiaga faatasi ma Ia. Faalotomaualalo oe lava ia. Tatalo ina ia i ai mata e vaaia ai le aao o le Atua i lou olaga ma i le lalolagi o siomia oe. Ōle atu ia te Ia e ta’u atu ia te oe pe o i ai moni lava o Ia iina—pe Na te silafia oe. Ōle atu ia te Ia po o a ni Ona lagona e uiga ia te oe. Ona e faalogo lea. (“Sau, Mulimuli Mai,” Liahona, Me 2019, 90)
-
O le a se mea e mafai ona fai e se tagata e amata ai ona vaai i le aao ma le mana o le Atua i o latou olaga?
E mafai ona e valaaulia tagata aoga e fai se tala-faatino pe faapefea ona latou tali atu i le tulaga faataitai o loo i luga. Tuu atu ia i latou e fautuaina la latou uo e le o mautinoa pe na latou maua se aafiaga ma le Alii pe lagonaina foi Lona mana.
Mafaufau e tuuina atu le molimau i le Tama Faalelagi ma Iesu Keriso ma le taua o le iloaina o Lo Laua mana i o tatou olaga.