« វាយតម្លៃរៀនសូត្ររបស់អ្នកទី ២ ៖ លោកុប្បត្តិ ១២–៥០; អ័ប្រាហាំ ១–២ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« វាយតម្លៃការរៀនសូត្ររបស់អ្នកទី ២ ៖ លោកុប្បត្តិ ១២–៥០; អ័ប្រាហាំ ១–២ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ៤២–៥០ ៖ មេរៀនទី ៣៧
វាយតម្លៃការរៀនសូត្ររបស់អ្នកទី ២
លោកុប្បត្តិ ១២–៥០; អ័ប្រាហាំ ១–២
ការពិចារណា និងការវាយតម្លៃពីការរៀនសូត្រខាងវិញ្ញាណរបស់យើង អាចជួយយើងឲ្យខិតទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ គោលបំណងនៃមេរៀននេះគឺដើម្បីជួយសិស្សគិតពិចារណាអំពីគោលដៅដែលពួកគេបានដាក់ និងការរីកចម្រើនដែលពួកគេបានទទួល ក្នុងអំឡុងពេលសិក្សា លោកុប្បត្តិ ១២–៥០ និង អ័ប្រាហាំ ១–២ ។
ការរៀបចំសិស្ស ៖ សូមអញ្ជើញសិស្សឲ្យមកដោយត្រៀមខ្លួនដើម្បីចែកចាយពីរបៀបដែលពួកគេបានរីកចម្រើនខាងវិញ្ញាណមកពីការសិក្សាព្រះគម្ពីរសញ្ញាចាស់ និងមុក្ដាដ៏មានតម្លៃមហិមានៅក្នុងឆ្នាំនេះ ។ អ្នកអាចផ្ដល់យោបល់ឲ្យពួកគេពិនិត្យមើលកំណត់ហេតុការសិក្សារបស់ពួកគេឡើងវិញ ឬកំណត់ចំណាំរបស់ពួកគេនៅក្នុងព្រះគម្ពីររបស់ពួកគេ ដើម្បីជួយពួកគេឲ្យមើលឃើញពីការរីកចម្រើន និងការរៀនសូត្ររបស់ពួកគេ ។
សកម្មភាពរៀនសូត្រដែលអាចមាន
ការសិក្សាក្នុងថ្នាក់របស់អ្នកអំពី អ័ប្រាហាំ ១–២ និង លោកុប្បត្តិ ១២–៥០ អាចនឹងផ្តោតលើលទ្ធផលផ្សេងៗជាងលទ្ធផលដែលបានវាយតម្លៃនៅក្នុងមេរៀននេះ ។ បើដូច្នេះមែន សូមបត់បែនតាមសកម្មភាពទាំងឡាយ ដើម្បីវាយតម្លៃការរីកចម្រើនដែលសិស្សទទួលបានពីលទ្ធផលដែលថ្នាក់របស់អ្នកផ្តោតលើ ។
នៅក្នុងមេរៀននេះ សិស្សនឹងមានឱកាសវាយតម្លៃការរីកចម្រើនរបស់ពួកគេលើផ្នែកបីដូចខាងក្រោម ៖
-
សូមពន្យល់ពីសារៈសំខាន់នៃអាពាហ៍ពិពាហ៍ដ៏នៅអស់កល្បជានិច្ចនៅក្នុងផែនការរបស់ព្រះវរបិតាសួគ៌ ។ ( ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ៩ ៖ « លោកុប្បត្តិ ១:២៨–២:២៥ » និងមេរៀនទី ២៩ ៖ « លោកុប្បត្តិ ២៤ » )
-
ទទួលអារម្មណ៍កាន់តែចង់ធ្វើ និងរក្សាសេចក្ដីសញ្ញាជាមួយព្រះ ។ ( ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ២៣ ៖ « លោកុប្បត្តិ ១២:១៧ » និងមេរៀនទី ៣១ ៖ « លោកុប្បត្តិ ២៨ » )
-
សូមចូលរួមក្នុងការប្រមូលផ្តុំសាសន៍អ៊ីស្រាអែល ។ ( ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ២៤ ៖ « អ័ប្រាហាំ ២:៩–១១ ) ។
ការប្រែក្លាយកាន់តែដូចជាព្រះយេស៊ូវគ្រីស្ទ
ការស្វែងយល់ថាតើពួកគេកំពុងរីកចម្រើនខាងវិញ្ញាណយ៉ាងដូចម្ដេច អាចជួយសិស្សក្នុងការខិតខំរបស់ពួកគេដើម្បីក្លាយជាសិស្សរបស់ព្រះយេស៊ូវគ្រីស្ទ ។ ដើម្បីជួយពួកគេធ្វើដូចនេះ សូមពិចារណាបង្ហាញរូបភាពខាងក្រោមនេះ ។ ម្យ៉ាងទៀត សិស្សអាចគូររូបភាពដើមឈើពីរដើមនៅក្នុងសៀវភៅកំណត់ហេតុការសិក្សារបស់ពួកគេ ៖ កូនដើមឈើ និងដើមឈើចាស់ ។
សូមស្រមៃថា ទាំងនេះគឺជារូបភាពដើមឈើតែមួយដែលថតក្នុងពេលឃ្លាតពីគ្នាពីរបីឆ្នាំ ។ នៅក្នុងសៀវភៅកំណត់ហេតុការសិក្សារបស់អ្នក សូមរាយជាបញ្ជីនូវរាល់ភស្តុតាងដែលអ្នកឃើញថា ដើមឈើកំពុងលូតលាស់ ។
សិស្សអាចសហការគ្នាជាគូ ឬក្រុមតូចៗ ដើម្បីចែកចាយបញ្ជីរបស់ពួកគេ និងឆ្លើយសំណួរខាងក្រោមនេះ ។
-
តើយើងអាចប្រៀបធៀបរូបភាពទាំងនេះនៃដើមឈើមួយដើម ទៅនឹងការលូតលាស់ខាងវិញ្ញាណរបស់យើង ដើម្បីក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?
-
តើយើងអាចសម្គាល់ថាតើយើងកំពុងរីកចម្រើនខាងវិញ្ញាណ និងប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទតាមវិធីណាខ្លះ ?
សូមពន្យល់ថា យើងអាចស្វែងរកការរីកចម្រើនខាងវិញ្ញាណបានដោយការពិនិត្យមើលអ្វីដែលយើងបានសិក្សាអំពីព្រះវរបិតាសួគ៌ និងព្រះយេស៊ូវគ្រីស្ទ និងរបៀបដែលវាបានជួយយើងកែលម្អទំនាក់ទំនងរបស់យើងជាមួយនឹងទ្រង់ទាំងទ្វេ ។
សូមអញ្ជើញសិស្សឲ្យចំណាយពេលប៉ុន្មាននាទី ដើម្បីពិនិត្យមើលអ្វីដែលពួកគេបានរៀន និងអនុវត្តពីបទពិសោធន៍មកពីថ្នាក់សិក្ខាសាលារបស់ពួកគេនៅក្នុងឆ្នាំនេះ ។ ពួកគេអាចធ្វើដូច្នេះបានដោយរកមើលបទគម្ពីរ និងកំណត់ចំណាំរបស់ពួកគេ ។
-
តើអ្នករៀនសូត្រអ្វីខ្លះនៅក្នុងថ្នាក់សិក្ខាសាលា ដែលជួយអ្នករីកចម្រើនខាងវិញ្ញាណ និងប្រែក្លាយកាន់តែដូចជាព្រះយេស៊ូវគ្រីស្ទ ?
-
តើភស្ដុតាងនៃការរីកចម្រើនខាងវិញ្ញាណអ្វីខ្លះដែលអ្នកបានសង្កេតឃើញនៅក្នុងជីវិតរបស់អ្នក ?
សូមពន្យល់ពីសារៈសំខាន់នៃអាពាហ៍ពិពាហ៍ដ៏អស់កល្បជានិច្ចនៅក្នុងផែនការរបស់ព្រះវរបិតាសួគ៌
លំហាត់នេះអាចជួយសិស្សពន្យល់ពីសារៈសំខាន់នៃអាពាហ៍ពិពាហ៍ដ៏នៅអស់កល្បជានិច្ចនៅក្នុងផែនការរបស់ព្រះវរបិតាសួគ៌បាន ។ សូមអញ្ជើញសិស្សឲ្យបើកទៅមើលរូបភាពដែលប្រហែលជាពួកគេបានគូរនៅក្នុងមេរៀនទី ២៩ ៖ « លោកុប្បត្តិ ២៤ » ។ សូមផ្តល់ពេលវេលាឲ្យសិស្សពិនិត្យមើលអ្វីដែលពួកគេបានសិក្សាអំពីអាពាហ៍ពិពាហ៍ នៅក្នុងមេរៀនទី ៩ ៖ « លោកុប្បត្តិ ១:២៨–២:២៥ » និងមេរៀនទី ២៩ ៖ « លោកុប្បត្តិ ២៤ » ។
សិស្សអាចពិនិត្យមើលកំណត់ចំណាំ ឬការយល់ដឹងណាមួយដែលពួកគេបានកត់ត្រានៅក្នុងសៀវភៅកំណត់ហេតុការសិក្សារបស់ពួកគេ ។ ពួកគេក៏អាចពិនិត្យមើលខគម្ពីរខាងក្រោម និងអ្វីទាំងអស់ដែលពួកគេអាចសង្កេតឃើញនៅក្នុងខគម្ពីរទាំងនោះផងដែរ ៖
លោកុប្បត្តិ ១:២៧–២៨
លោកុប្បត្តិ ២:១៨, ២១–២៤
គោលលទ្ធិ និងសេចក្ដីសញ្ញា ៤៩:១៥–១៧
គោលលទ្ធិ និងសេចក្ដីសញ្ញា ១៣១:១–៤
ដើម្បីជួយសិស្សពន្យល់ពីការយល់ដឹងរបស់ពួកគេអំពីអាពាហ៍ពិពាហ៍ដ៏នៅអស់កល្បជានិច្ច សូមចែកចាយសាច់រឿងដូចតទៅនេះ ។ អ្នកអាចកែសម្រួលសាច់រឿងនេះ ដើម្បីបំពេញតម្រូវការសិស្សរបស់អ្នក ។
ថ្ងៃនេះនៅសាលា អ្នកបាននិយាយអំពីផែនការអនាគតជាមួយមិត្តភក្តិមួយចំនួន ។ អ្នកបានលើកឡើងថា អាពាហ៍ពិពាហ៍គឺជាផ្នែកមួយនៃផែនការជាច្រើនរបស់អ្នក ។ មិត្តភក្តិរបស់អ្នកម្នាក់បានសួរថា « ឯងជាមនុស្សមានសក្តានុពលជាច្រើនសម្រាប់អាជីពការងារ ។ ហេតុអ្វីបានជាឯងចង់រៀបការទៅវិញ ? »
-
ដោយប្រើអ្វីដែលអ្នកបានរៀនអំពីអាពាហ៍ពិពាហ៍ដ៏នៅអស់កល្បជានិច្ចនៅក្នុងផែនការរបស់ព្រះវរបិតាសួគ៌ តើអ្នកនឹងឆ្លើយតបទៅមិត្តភក្តិរបស់អ្នកយ៉ាងដូចម្ដេច ?
សិស្សអាចចំណាយពេលពីរបីនាទី ដើម្បីរៀបចំផែនការឆ្លើយតបរបស់ពួកគេ ។ សូមលើកទឹកចិត្តសិស្សឲ្យស្វែងរកបទគម្ពីរមួយចំនួនដែលពួកគេបានសិក្សា នៅក្នុងព្រះគម្ពីរសញ្ញាចាស់ ឬកន្លែងផ្សេងទៀត ។ សូមសុំពួកគេឲ្យចែកចាយបទគម្ពីរទាំងនោះ ជាផ្នែកមួយនៃការពន្យល់របស់ពួកគេ ។
សូមពិចារណាឲ្យសិស្សសហការគ្នាជាគូៗ ។ សូមអញ្ជើញសិស្សម្នាក់ៗឲ្យអនុវត្តពន្យល់អ្វីដែលពួកគេនឹងនិយាយទៅកាន់មិត្តរបស់ពួកគេ ។
ទទួលអារម្មណ៍កាន់តែចង់ធ្វើ និងរក្សាសេចក្ដីសញ្ញាជាមួយព្រះ
សិស្សអាចគូររូបភាពពីសុបិនរបស់យ៉ាកុប ដែលជាផ្នែកមួយនៃមេរៀនទី ៣១ ៖ « លោកុប្បត្តិ ២៨ » ។ ពួកគេអាចយោងទៅលើរូបភាពរបស់ពួកគេ ជាផ្នែកមួយនៃការរំឭកសេចក្ដីសញ្ញារបស់ពួកគេ ។ អ្នកក៏អាចបង្ហាញរូបភាពដូចខាងក្រោមនេះផងដែរ ។ សូមអញ្ជើញសិស្សឲ្យរកនឹកពីអ្វីដែលពួកគេចងចាំពីព្រឹត្តិការណ៍ដែលបានពិពណ៌នាអំពីការធ្វើ និងរក្សាសេចក្ដីសញ្ញា ( សូមមើលផងដែរមេរៀនទី ២៣ ៖ « លោកុប្បត្តិ ១២, ១៧ » ) ។ ប្រសិនបើមានអត្ថប្រយោជន៍ សិស្សអាចពិនិត្យមើល លោកុប្បត្តិ ២៨:១០–២១ ។
អ្នកអាចរំឭកសិស្សថា យ៉ាកុបបានធ្វើសេចក្ដីសញ្ញាជាមួយនឹងព្រះ បន្ទាប់ពីបានចាកចេញពីផ្ទះឪពុកម្ដាយរបស់គាត់ ហើយចាប់ផ្ដើមជីវិតដោយខ្លួនឯង ។ ដោយជាផ្នែកនៃមេរៀនទី ៣១ ៖លោកុប្បត្តិ ២៨ សិស្សបានគិតពិចារណាពីឱកាសដែលពួកគេនឹងត្រូវធ្វើសេចក្តីសញ្ញាជាមួយព្រះនៅក្នុងព្រះវិហារបរិសុទ្ធ ។ សិស្សអាចសរសេរនៅក្នុងសៀវភៅកំណត់ហេតុការសិក្សារបស់ពួកគេនូវចម្លើយចំពោះសំណួរដូចខាងក្រោម ៖
-
តើអ្នកបានទទួលពរជ័យដែលបានសន្យាអ្វីខ្លះពីការព្យាយាមគោរពតាមសេចក្ដីសញ្ញារបស់អ្នកជាមួយនឹងព្រះ ឬតាមរយៈការបម្រើក្នុងព្រះវិហារបរិសុទ្ធ ?
-
តើស្ថានភាពអ្វីខ្លះដែលអ្នកអាចនឹងប្រឈមមុខនាពេលអនាគត ដែលអ្នកនឹងទទួលបានអត្ថប្រយោជន៍ពីការគោរពតាម និងការពារដែលព្រះបានសន្យាប្រទានដល់បុគ្គលដែលធ្វើសេចក្ដីសញ្ញាជាមួយនឹងទ្រង់ ?
បើទាក់ទង សូមអញ្ជើញសិស្សឲ្យពិនិត្យមើលចម្លើយដែលពួកគេបានកត់ត្រា ។ បន្ទាប់ពីមានពេលគ្រប់គ្រាន់ហើយ សូមផ្តល់ឲ្យក្រដាស និងស្រោមសំបុត្រដល់សិស្ស សម្រាប់សកម្មភាពខាងក្រោម ។
ដោយប្រើអ្វីដែលអ្នកបានរៀនអំពីការធ្វើ និងគោរពតាមសេចក្ដីសញ្ញាជាមួយនឹងព្រះ សូមសរសេរសំបុត្រមួយច្បាប់ឲ្យខ្លួនឯង ដែលអ្នកអាចបើកមើលបាននៅពេលរៀនចប់ថ្នាក់វិទ្យាល័យ ។ សូមសរសេរអំពីមូលហេតុដែលអ្នកទទួលអារម្មណ៍ថា វាមានសារៈសំខាន់ក្នុងការធ្វើ និងរក្សាសេចក្តីសញ្ញាជាមួយនឹងព្រះ នៅក្នុងព្រះវិហារបរិសុទ្ធ និងពេញមួយជីវិតរបស់អ្នក ។ សូមបញ្ចូលនូវរបៀបដែលការធ្វើសេចក្តីសញ្ញាជាមួយនឹងព្រះអាចបង្កើនលទ្ធភាពរបស់អ្នកដើម្បីទទួលបានការណែនាំ ការយកចិត្តទុកដាក់ និងការការពាររបស់ទ្រង់ ។
ចូលរួមក្នុងការប្រមូលផ្តុំសាសន៍អ៊ីស្រាអែល
នៅក្នុងមេរៀនទី ២៤ ៖ « អ័ប្រាហាំ ២:៩–១១ » សិស្សប្រហែលជាបានបង្កើតផែនការមួយដើម្បីចូលរួមក្នុងការប្រមូលផ្ដុំសាសន៍អ៊ីស្រាអែល ។ បើដូច្នេះមែន សូមទុកពេលឲ្យសិស្សមើលឡើងវិញនូវផែនការរបស់ពួកគេ ។ ផែនការរបស់ពួកគេអាចរួមបញ្ចូលវិធីចែកចាយដំណឹងល្អ ដើម្បីជួយអ្នកដទៃឲ្យធ្វើ ឬរក្សាសេចក្ដីសញ្ញាជាមួយនឹងព្រះអម្ចាស់ ឬដើម្បីផ្ដល់ពរដល់អ្នកដទៃតាមរយៈកិច្ចការព្រះវិហារបរិសុទ្ធ និងពង្សប្រវត្តិ ។ សិស្សដែលមិនទាន់បានបង្កើតផែនការ អាចប្រើរូបភាពខាងក្រោមដើម្បីចាប់ផ្តើមបង្កើតផែនការមួយបាន ។
អ្នកប្រហែលជាបានបង្កើតផែនការមួយ ដើម្បីចូលរួមក្នុងការប្រមូលផ្ដុំសាសន៍អ៊ីស្រាអែល ។ សូមគិតពិចារណាអំពីផែនការទាំងនេះដោយបំពេញក្រាហ្វិកខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។
សូមអញ្ជើញសិស្សពីរបីនាក់ដែលស្ម័គ្រចិត្តឲ្យចែកចាយបទពិសោធន៍ទាំងឡាយដែលពួកគេធ្លាប់មាន ក្នុងការអនុវត្តផែនការរបស់ពួកគេ និងរបៀបដែលបទពិសោធន៍ទាំងនោះបានជះឥទ្ធិពលដល់ពួកគេ ។ សូមសុំឲ្យសិស្សចែកចាយពីរបៀបដែលការចូលរួមក្នុងការប្រមូលផ្ដុំសាសន៍អ៊ីស្រាអែលបានជះឥទ្ធិពលលើអារម្មណ៍របស់ពួកគេចំពោះព្រះវរបិតាសួគ៌ និងព្រះយេស៊ូវគ្រីស្ទ ។
សូមអញ្ជើញសិស្សឲ្យបន្តស្វែងរកជំនួយពីព្រះវិញ្ញាណបរិសុទ្ធ ដើម្បីដឹងពីរបៀបដែលពួកគេអាចចូលរួមក្នុងការប្រមូលផ្ដុំសាសន៍អ៊ីស្រាអែលបាន ។ សូមលើកទឹកចិត្តសិស្សដែលប្រហែលជាមិនទាន់បានអនុវត្តផែនការ ឲ្យចាប់ផ្តើមឥឡូវនេះ ។ សូមថ្លែងទីបន្ទាល់អំពីពរជ័យដែលព្រះអម្ចាស់នឹងប្រទានដល់ពួកគេ និងអ្នកដទៃ នៅពេលពួកគេអនុវត្តផែនការរបស់ពួកគេ ។