« លោកុប្បត្តិ ២៤ ៖ ពរជ័យនៃអាពាហ៍ពិពាហ៍ក្នុងសេចក្ដីសញ្ញា » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ២៤ ៖ ពរជ័យនៃអាពាហ៍ពិពាហ៍ក្នុងសេចក្ដីសញ្ញា » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ២៤–៣៣ ៖ មេរៀនទី ២៩
លោកុប្បត្តិ ២៤
ពរជ័យនៃអាពាហ៍ពិពាហ៍ក្នុងសេចក្ដីសញ្ញា
ខណៈពេលដែលការរំពឹងទុកនៃអាពាហ៍ពិពាហ៍ដ៏នៅអស់កល្បជានិច្ច ហាក់ហួសពីសមត្ថភាពរបស់អ៊ីសាកដើម្បីសម្រេចបាន នោះព្រះអម្ចាស់បានរៀបចំផ្លូវមួយសម្រាប់លោក ។ យើងក៏អាចពឹងផ្អែកលើព្រះអម្ចាស់ និងទុកចិត្តថា ទ្រង់អាចជួយយើងរៀបចំខ្លួន ហើយថ្ងៃណាមួយទទួលបានពរជ័យនៃអាពាហ៍ពិពាហ៍ដ៏អស់កល្បជានិច្ចបានដែរ ។ មេរៀននេះអាចជួយសិស្សឲ្យយល់ពីសារៈសំខាន់នៃអាពាហ៍ពិពាហ៍ក្នុងសេចក្ដីសញ្ញាដ៏នៅអស់កល្បជានិច្ចក្នុងផែនការរបស់ព្រះវរបិតាសួគ៌ ។
ការរៀបចំសិស្ស ៖ សូមអញ្ជើញសិស្សឲ្យសរសេរសំណួរដែលពួកគេ ឬនរណាម្នាក់ដែលពួកគេស្គាល់អាចមានអំពីអាពាហ៍ពិពាហ៍ក្នុងព្រះវិហារបរិសុទ្ធ ហើយមករៀនប្រកបដោយការអធិស្ឋានដើម្បីស្វែងរកចម្លើយចំពោះសំណួរនោះ ។
សកម្មភាពរៀនសូត្រដែលអាចមាន
អាពាហ៍ពិពាហ៍ក្នុងព្រះវិហារបរិសុទ្ធ
ខណៈដែលអាពាហ៍ពិពាហ៍អាចជារឿងពិបាកសម្រាប់សិស្សមួយចំនួនដើម្បីធ្វើការពិភាក្សា សូមពិចារណាប្រកបដោយការអធិស្ឋានអំពីវិធីដើម្បីរៀបចំ និងបង្រៀនប្រធានបទនេះដោយយកចិត្តទុកដាក់ និងដោយសេចក្ដីស្រឡាញ់ ។
ដើម្បីរៀបចំសិស្សឲ្យពិភាក្សាប្រធានបទអំពីអាពាហ៍ពិពាហ៍ សូមពិចារណាដាក់បង្ហាញរូបភាពនៅដើមមេរៀននេះរួមជាមួយនឹងសាច់រឿងដូចខាងក្រោមនេះ ។
សូមស្រមៃថា មិត្តម្នាក់និយាយ ៖ « តើការរៀបការនៅក្នុងព្រះវិហារបរិសុទ្ធពិតជាសំខាន់មែនឬ ? ខ្ញុំពិបាកនឹងស្រមៃឃើញខ្លួនឯងរៀបការនៅទីនោះណាស់ ខ្ញុំមានអារម្មណ៍ថាវាហួសពីសមត្ថភាពរបស់ខ្ញុំ ។ ខ្ញុំគ្រាន់តែចង់រកឃើញមនុស្សម្នាក់ដែលខ្ញុំស្រឡាញ់ប៉ុណ្ណោះ » ។
-
តើការសន្មតអ្វីខ្លះដែលមិត្តរបស់អ្នកអាចមានអំពីអាពាហ៍ពិពាហ៍នៅក្នុងព្រះវិហារបរិសុទ្ធ ?
-
តើសេចក្ដីពិតអ្វីខ្លះដែលមិត្តរបស់អ្នកមិនបានយល់អំពីព្រះ និងអាពាហ៍ពិពាហ៍នៅក្នុងព្រះវិហារបរិសុទ្ធ ?
សូមអញ្ជើញសិស្សឲ្យឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកផ្ទាល់មានអារម្មណ៍យ៉ាងណាចំពោះអាពាហ៍ពិពាហ៍នៅក្នុងព្រះវិហារបរិសុទ្ធ ?
-
តើអ្នកមានសំណួរ ឬកង្វល់អ្វីខ្លះអំពីអាពាហ៍ពិពាហ៍នៅក្នុងព្រះវិហារបរិសុទ្ធ ?
ពេលអ្នកសិក្សា លោកុប្បត្តិ ២៤ សូមអញ្ជើញយាងព្រះវិញ្ញាណជួយអ្នកឲ្យយល់ពីសារៈសំខាន់នៃអាពាហ៍ពិពាហ៍នៅក្នុងព្រះវិហារបរិសុទ្ធ ។ ស្វែងរកការយល់ដឹងអំពីរបៀបដែលព្រះអម្ចាស់អាចជួយអ្នកឲ្យទទួលបាននូវអាពាហ៍ពិពាហ៍នៅក្នុងព្រះវិហារបរិសុទ្ធដ៏នៅអស់កល្បជានិច្ច ។
ដំណើរដ៏សំខាន់មួយ
ដើម្បីជួយសិស្សឲ្យយល់កាន់តែច្បាស់ពីបរិបទនៃ លោកុប្បត្តិ ២៤ សូមអញ្ជើញពួកគេឲ្យមើលផែនទីខាងក្រោមនេះ ។ ប្រសិនបើពួកគេមានកំណែស្ដេចជេមស៍នៃព្រះគម្ពីរប៊ីបរបស់ពួកបរិសុទ្ធថ្ងៃចុងក្រោយ នោះពួកគេអាចរកវានៅលើផែនទី ៩ « ពិភពលោកនៅសម័យព្រះគម្ពីរសញ្ញាចាស់ » នៅក្នុងផ្នែកផែនទីព្រះគម្ពីរប៊ីប ។ សូមអាន ឬសង្ខេបកថាខណ្ឌខាងក្រោម ហើយអញ្ជើញសិស្សឲ្យស្វែងរកកន្លែងដែលអ្នកបានលើកឡើងនៅលើផែនទី ។ បើចាំបាច់ សូមបង្ហាញសិស្សពីទីតាំងកាណាន ( លេខ ១៣ ) និងហារ៉ាន ( លេខ ៨ ) ។
អ័ប្រាហាំ និងគ្រួសាររបស់លោកបានរស់នៅកាណាន ក្នុងចំណោមមនុស្សដែលបានថ្វាយបង្គំរូបព្រះ និងបានចូលរួមប្រព្រឹត្តអំពើបាបផ្សេងទៀត ។ អ័ប្រាហាំមានសាច់ញាតិរស់នៅក្នុងហារ៉ាន ជាកន្លែងដែលអ័ប្រាហាំធ្លាប់រស់នៅពីមុន ។
មុននឹងអានខគម្ពីរខាងក្រោមនេះ សូមពន្យល់ថា ការបកប្រែដោយ យ៉ូសែប ស្ម៊ីធ ប្តូរពាក្យ « ភ្លៅ » ទៅ « ដៃ » នៅក្នុង ខទី ២ និង ៩ ។ នេះមានន័យថាអ័ប្រាហាំ និងអ្នកបម្រើរបស់លោកបានធ្វើសេចក្តីសញ្ញា ។
សូមអាន លោកុប្បត្តិ ២៤:១–៤, ៧–៩ ដោយរកមើលការណែនាំដែលអ័ប្រាហាំបានផ្តល់ឲ្យអ្នកបម្រើរបស់លោកទាក់ទងនឹងអ៊ីសាក កូនប្រុសរបស់លោក ។
-
តើអ្នកបម្រើរបស់អ័ប្រាហាំបានណែនាំឲ្យធ្វើអ្វីខ្លះ ?
-
តើអ្នកឃើញអ្វីខ្លះនៅក្នុង ខទី ៧ ដែលបង្ហាញថា ព្រះអម្ចាស់យកព្រះទ័យទុកដាក់អំពីនរណាដែលអ៊ីសាកត្រូវរៀបការជាមួយ ?
សូមឲ្យសិស្សប្រើមាត្រដ្ឋាននៅលើផែនទីដើម្បីកំណត់ថាតើការធ្វើដំណើរនេះនឹងមានចម្ងាយប៉ុន្មានម៉ាយល៍ ឬគីឡូម៉ែត្រ ។ សូមជួយសិស្សឲ្យឃើញថា អ័ប្រាហាំបានសុំឲ្យអ្នកបម្រើរបស់លោកធ្វើដំណើរទៅវិញទៅមកជិត ១,២០០ ម៉ាយល៍ ( ១,៩៣១ គីឡូម៉ែត្រ ) ដើម្បីស្វែងរកប្រពន្ធឲ្យអ៊ីសាក ។
-
តើអ្នកគិតថា ហេតុអ្វីវាមានតម្លៃក្នុងការធ្វើការលះបង់បែបនេះ ដើម្បីកុំឲ្យអ៊ីសាករៀបការជាមួយកូនស្រីម្នាក់ក្នុងចំណោមកូនស្រីរបស់ពួកកាណាន ?
បើចាំបាច់ សូមពន្យល់ថា នៅពេលព្រះបានបង្កើតសេចក្ដីសញ្ញារបស់ទ្រង់ជាមួយអ័ប្រាហាំ និងសារ៉ា ទ្រង់បានមានព្រះបន្ទូលថា កូនចៅរបស់អ័ប្រាហាំនឹងរក្សាសេចក្ដីសញ្ញាដ៏សំខាន់នេះជាមួយទ្រង់បាន លើកលែងតែពួកគេបានរៀបការតាមក្រឹត្យវិន័យរបស់ទ្រង់ប៉ុណ្ណោះ ។ ពួកគេនឹងត្រូវចូលទៅក្នុង « សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ » ( សូមមើល គោលលទ្ធិ និងសេចក្តីសញ្ញា ១៣១:១–៤ ) ។ សព្វថ្ងៃនេះ យើងចូលទៅក្នុងសេចក្ដីសញ្ញានេះ នៅពេលយើងរៀបអាពាហ៍ពិពាហ៍នៅក្នុងព្រះវិហារបរិសុទ្ធរបស់ព្រះអម្ចាស់ ។
គ្មាននរណាម្នាក់នៅស្រុកកាណាន ដែលអ៊ីសាកអាចរៀបការនៅក្នុងសេចក្តីសញ្ញានោះទេ ។ សេចក្ដីសញ្ញានេះអាចត្រូវបានរក្សាទុកតែជាមួយមនុស្សម្នាក់មកពីគ្រួសាររបស់អ័ប្រាហាំ នៅហារ៉ានប៉ុណ្ណោះ ។
ជំនួយរបស់ព្រះអម្ចាស់
សូមដាក់បង្ហាញរូបភាពខាងក្រោម ហើយអញ្ជើញសិស្សឲ្យចែកចាយអ្វីដែលពួកគេបានដឹងអំពីដំណើររឿងនៅក្នុងរូបភាព ។ អ្នកអាចអាន ឬសង្ខេបកថាខណ្ឌខាងក្រោមនេះប្រសិនបើចាំបាច់ ។
អ្នកបម្រើរបស់អ័ប្រាហាំបានធ្វើដំណើរយ៉ាងឆ្ងាយទៅកាន់ហារ៉ាន ដើម្បីស្វែងរកភរិយាឲ្យ អ៊ីសាក ។ ពេលកំពុងរង់ចាំនៅក្បែរអណ្តូងទឹកមួយ លោកបានអធិស្ឋាន ហើយបានសូមឲ្យព្រះប្រទានសមត្ថភាពឲ្យលោកដឹងពីនារីដែលព្រះអម្ចាស់ចង់ឲ្យលោកស្វែងរក ។
អ្នកអាចអញ្ជើញសិស្សឲ្យអានខគម្ពីរខាងក្រោមនេះដោយផ្ទាល់ជាដៃគូ ឬទាំងអស់គ្នា ។
ចំពោះសកម្មភាពខាងក្រោម វាអាចមានអត្ថប្រយោជន៍ក្នុងការពន្យល់ថាឈ្មោះ « ព្រះយេហូវ៉ា » នៅក្នុងកំណែស្ដេច ជេមស៍ នៃព្រះគម្ពីរប៊ីប ជាទូទៅបានគូសបញ្ជាក់ដោយពាក្យព្រះអម្ចាស់ ជាអក្សរធំទាំងអស់ ។ ម្យ៉ាងទៀត ពាក្យ « ព្រះអម្ចាស់ » ឬ « ចៅហ្វាយ » វិញគឺអាចសំដៅទៅលើនរណាម្នាក់ដែលកាន់អំណាច មានសិទ្ធិអំណាច ឬឥទ្ធិពលដូចជាលោកគ្រូ ឬអ្នកគ្រប់គ្រង ។ ( សូមមើល Bible Dictionary « Jehovah » )
សូមអាន លោកុប្បត្តិ ២៤:១២–២៧ ដោយរកមើលរបៀបដែលព្រះអម្ចាស់បានជួយអ្នកបម្រើរបស់អ័ប្រាហាំ ស្វែងរកភរិយាឲ្យអ៊ីសាក ។ វាប្រហែលជាមានប្រយោជន៍ដើម្បីគូសចំណាំនៅពេលអ្នកឃើញពាក្យព្រះអម្ចាស់ដែលមានអក្សរធំ ។
-
តើអ្នកបានរកឃើញអ្វីខ្លះ ?
សូមពិចារណាសង្ខេបផ្នែកនៅសល់នៃ លោកុប្បត្តិ ២៤ ដោយចែកចាយកថាខណ្ឌដូចខាងក្រោមនេះ ។
អ្នកបម្រើរបស់អ័ប្រាហាំបានជួបបងប្រុស និងឪពុករបស់រេបិកា ។ គាត់បានណែនាំខ្លួន និងពន្យល់ពីរបៀបដែលព្រះអម្ចាស់បានជួយគាត់ជួបរេបិកា ។ នៅថ្ងៃបន្ទាប់ រេបិកាបានជ្រើសរើសត្រឡប់ទៅវិញជាមួយអ្នកបម្រើរូបនោះយ៉ាងក្លាហាន ហើយបានផ្សារភ្ជាប់នឹងអ៊ីសាក នៅក្នុងសេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ច ( សូមមើល លោកុប្បត្តិ ២៤:២៩–៦៧ ) ។
-
តើអ្នករៀនអ្វីខ្លះអំពីព្រះអម្ចាស់តាមរយៈដំណើររឿងរបស់អ៊ីសាក និងរេបិកា ព្រមទាំងអាពាហ៍ពិពាហ៍ដ៏នៅអស់កល្បជានិច្ចរបស់ពួកគេ ?
សិស្សអាចឆ្លើយតបដោយសេចក្ដីពិតផ្សេងៗ ប៉ុន្តែសូមប្រាកដថា ពួកគេយល់ថា ព្រះអម្ចាស់នឹងជួយយើងនៅពេលយើងព្យាយាមចូលទៅក្នុងសេចក្ដីសញ្ញានៃអាពាហ៍ពិពាហ៍ដ៏នៅអស់កល្បជានិច្ច ។
-
តើព្រះអម្ចាស់អាចជួយមនុស្សម្នាក់ដែលកំពុងខិតខំដើម្បីមានអាពាហ៍ពិពាហ៍ដ៏នៅអស់កល្បជានិច្ច ប៉ុន្តែព្រួយបារម្ភថា ពួកគេប្រហែលជាមិនដែលទទួលបានពរនេះយ៉ាងដូចម្ដេច ?
-
ហេតុអ្វីអ្នកគិតថា អាពាហ៍ពិពាហ៍ដ៏នៅអស់កល្បជានិច្ចមានសារៈសំខាន់យ៉ាងខ្លាំងចំពោះព្រះអម្ចាស់ ?
ហេតុអ្វីត្រូវមានអាពាហ៍ពិពាហ៍ដ៏នៅអស់កល្បជានិច្ច ?
ដើម្បីជួយសិស្សឲ្យយល់កាន់តែច្បាស់ពីសារៈសំខាន់នៃអាពាហ៍ពិពាហ៍ដ៏នៅអស់កល្បជានិច្ច សូមអញ្ជើញពួកគេឲ្យគូររូបភាពដ៏សាមញ្ញមួយអំពីព្រះវិហារបរិសុទ្ធដូចជាគំនូរខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
នៅក្រោមគំនូរព្រះវិហារបរិសុទ្ធរបស់អ្នក សូមសរសេរសំណួរមួយដែលអាចជួយអ្នកឲ្យយល់កាន់តែច្បាស់ពីសេចក្ដីពិតដែលអ្នកបានរៀននៅថ្ងៃនេះ ។ នេះអាចជាសំណួរផ្ទាល់ខ្លួនរបស់អ្នក សំណួរមកពីនរណាម្នាក់ដែលអ្នកស្គាល់ ឬសំណួរមួយដូចខាងក្រោមនេះ ៖
-
ហេតុអ្វីអាពាហ៍ពិពាហ៍ដ៏នៅអស់កល្បជានិច្ចមានសារៈសំខាន់ ?
-
តើខ្ញុំអាចទទួលបានពរជ័យអ្វីខ្លះដោយការរៀបអាពាហ៍ពិពាហ៍នៅក្នុងព្រះវិហារបរិសុទ្ធ ហើយបន្ទាប់មកខិតខំគោរពតាមសេចក្ដីសញ្ញាទាំងនោះ ?
-
តើព្រះអម្ចាស់អាចជួយខ្ញុំនៅថ្ងៃណាមួយឲ្យទទួលបានពរជ័យនៃអាពាហ៍ពិពាហ៍ដ៏នៅអស់កល្បជានិច្ចយ៉ាងដូចម្ដេច ?
សូមអញ្ជើញសិស្សឲ្យចំណាយពេល ៥–៨ នាទីដើម្បីបញ្ចប់សកម្មភាពខាងក្រោមនេះដោយផ្ទាល់ ឬជាមួយដៃគូ ។ អ្នកអាចអញ្ជើញពួកគេឲ្យសរសេរនៅក្នុងសៀវភៅកំណត់ហេតុការសិក្សារបស់ពួកគេនូវចម្លើយដែលពួកគេរកឃើញ ។ សូមជួយសិស្សឲ្យយល់ថា ពួកគេប្រហែលជារកចម្លើយច្បាស់លាស់ចំពោះសំណួររបស់ពួកគេមិនឃើញឡើយ ទោះជាយ៉ាងណា ការខិតខំចោទសួរសំណួរ និងខិតខំយល់ដឹងគឺជាផ្នែកដ៏សំខាន់មួយនៃការធ្វើសកម្មភាពដោយសេចក្ដីជំនឿលើព្រះ ។
សូមចែកសំណៅមេរៀនដែលមានចំណងជើងថា « អាពាហ៍ពិពាហ៍ដ៏នៅអស់កល្បជានិច្ច » ទៅកាន់សិស្សដែលចង់សិក្សាអំពីវា ។
ដើម្បីជួយអ្នកឆ្លើយសំណួររបស់អ្នក សូមស្វែងរកធនធានផ្សេងៗរបស់សាសនាចក្រ ដូចខាងក្រោម ៖
-
វគ្គចំណេះចំណានខាងគោលលទ្ធិ ( លោកុប្បត្ដិ ២:២៤; កូរិនថូស ទី១ ១១:១១; គោលលទ្ធិ និងសេចក្តីសញ្ញា ១៣១:១–៤ )
-
សំណៅមេរៀនដែលមានចំណងជើងថា « អាពាហ៍ពិពាហ៍ដ៏នៅអស់កល្បជានិច្ច »
-
« អាពាហ៍ពិពាហ៍ » និងប្រធានបទដែលទាក់ទងនៅក្នុងសេចក្ដីណែនាំដល់បទគម្ពីរទាំងឡាយ ឬប្រធានបទ និងសំណួរ នៅក្នុងបណ្ណាល័យដំណឹងល្អ
-
ឃ្លាដូចជា « អាពាហ៍ពិពាហ៍ក្នុងសេចក្ដីសញ្ញា » ឬ« អាពាហ៍ពិពាហ៍ក្នុងព្រះវិហារបរិសុទ្ធ » នៅក្នុងការស្រាវជ្រាវនៃបណ្ណាល័យដំណឹងល្អ
សូមអញ្ជើញសិស្សឲ្យចែកចាយជាមួយសិស្សក្នុងថ្នាក់នូវអ្វីដែលពួកគេបានរៀន ។
ការពិចារណាផ្ទាល់ខ្លួន
សូមជញ្ជឹងគិតពីសាច់រឿងចាប់តាំងពីដើមមេរៀន ។ នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរខាងក្រោមនេះ ៖
-
តើអ្នកនឹងឆ្លើយតបយ៉ាងណាចំពោះសំណួររបស់មិត្តអ្នកអំពីមូលហេតុដែលអាពាហ៍ពិពាហ៍នៅក្នុងព្រះវិហារបរិសុទ្ធមានសារៈសំខាន់ ?
-
តើអ្នកបានរៀនអ្វីខ្លះនៅថ្ងៃនេះអំពីព្រះវរបិតាសួគ៌ ឬព្រះយេស៊ូវគ្រីស្ទដែលអាចផ្ដល់សេចក្ដីសង្ឃឹមដល់អ្នកក្នុងកិច្ចខិតខំរបស់អ្នកដើម្បីអញ្ជើញពរជ័យនៃអាពាហ៍ពិពាហ៍ក្នុងព្រះវិហារបរិសុទ្ធ ?
សូមអញ្ជើញសិស្សដែលស្ម័គ្រចិត្តឲ្យឡើងចែកចាយអ្វីដែលពួកគេបានសរសេរ ។
សូមពិចារណាចែកចាយទីបន្ទាល់របស់អ្នកអំពីសារៈសំខាន់នៃអាពាហ៍ពិពាហ៍ក្នុងសេចក្ដីសញ្ញា ហើយលើកទឹកចិត្តសិស្សរបស់អ្នកឲ្យចាប់ផ្ដើមឥឡូវនេះដើម្បីត្រៀមខ្លួនទទួលពរជ័យនេះ ។