Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 6–8: “Naʻe Fai ʻe Noa … [ʻa Ia] Kotoa Pē Naʻe Fekau ʻe [he ʻEikí]”

“Sēnesi 6–8: ʻNaʻe Fai ʻe Noa … [ʻa Ia] Kotoa Pē Naʻe Fekau ʻe [he ʻEikí]’” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 6–8: ʻNaʻe Fai ʻe Noa … [ʻa Ia] Kotoa Pē Naʻe Fekau ʻe [he ʻEikí]’” Fuakava Motuʻá – Tohi Lēsoni ʻa e Faiako Seminelí

Sēnesi 6–11; Mōsese 8: Lēsoni 20

Sēnesi 6–8

“Naʻe Fai ʻe Noa … [ʻa Ia] Kotoa Pē Naʻe Fekau ʻe [he ʻEikí]”

The Old Testament prophet Noah standing on a log as he preaches to a group of assembled people. The people are laughing and mocking Noah. The partially completed ark is visible in the background.

ʻOku kole mai ʻe he ʻOtuá ʻi he ʻofa ke tau talangofua ki Heʻene ngaahi fekaú. Mahalo ʻe faingataʻa ke mahino ha ngaahi fekau ʻe niʻihi, ka ʻoku nau hoko maʻu pē ko ha meʻa ke tau lelei ai. Naʻe fakahaofi e fāmili ʻo Noá mei ha lōmaki fakaofo taʻe-hano-tatau koeʻuhí ko ʻenau talangofua ki he fekau ʻa e ʻOtuá ke foʻu ha ʻaʻaké. ʻE lava ke tokoni e lēsoni ko ʻení ki he kau akó ke fakatupulaki ʻenau loto-holi ke talangofua ki he ngaahi fekau ʻa e ʻOtuá.

Teuteu ʻa e tokotaha akó: Fakaafeʻi e kau akó ke fakalaulauloto pea haʻu mateuteu ke vahevahe e founga ʻoku fakahaaʻi ai ʻe ha fekau pau e ʻofa ʻa e Tamai Hēvaní kiate kitautolú mo ʻEne finangalo ke maluʻi kitautolú.

Ngaahi ʻEkitivitī Ako ʻOku Ala Fakahokó

Ngaahi fekau ʻa e ʻOtuá

Fakakaukau ke kamata e lēsoní ʻaki hono poupouʻi e kau akó ke fakalaulauloto ki he ʻuhinga ʻoku ʻomi ai ʻe heʻetau Tamai Hēvani ʻofá ha ngaahi fekau kiate kitautolú. Ko e founga ʻe taha ke fai ai ʻení ko hano fakaʻaliʻali e ʻū fakatātā ko ʻení pea faʻu ha fealēleaʻaki ʻo fakaʻaongaʻi e ngaahi fehuʻi ʻi laló. Ko ha founga ʻe taha ko hono ʻai ke vahevahe ʻe he kau akó ʻa e ngaahi tuʻutuʻuni kuo fokotuʻu ʻe heʻenau mātuʻá ke maluʻi ʻaki ʻena fānaú.

A young man Starting a campfire at Burraston Ponds, Utah

A group of little boys and girls play together outside.

Fakakaukauloto ʻokú ke tokangaʻi ha kulupu tokolahi ʻo ha fānau kei iiki ʻi he feituʻu faiʻanga kemi ko ʻení.

Ko e hā ha ngaahi lao pau te ke lava ʻo ʻoange ki he fānaú ke nau malu ai?
Kapau naʻe ʻita atu ʻa e fānaú kiate koe ʻi hono fokotuʻu ha ngaahi laó, ko e hā e meʻa te ke fakamatalaʻi kiate kinautolú?

Fakaafeʻi e kau akó ke vahevahe mo ha hoa ʻa e founga te nau ala fakafehoanaki ai ʻa e tūkunga ko ʻení ki he ngaahi fekau ʻa e Tamai Hēvaní maʻatautolú.

Fakaafeʻi leva e kau akó ke lekooti ʻenau ngaahi ongo fakataautaha fekauʻaki mo e ʻOtuá mo ʻEne ngaahi fekaú ʻi heʻenau tohinoa akó ʻo fakaʻaongaʻi ha ngaahi ueʻi hangē ko ʻení. ʻE lava ke ke fakaafeʻi ha niʻihi te nau loto-fiemālie ke vahevahe ʻa e meʻa ne nau tohí.
ʻOkú ke pehē ko e hā e ‘uhinga ʻoku finangalo ai e ʻOtuá ke ke tauhi fakataautaha ʻEne ngaahi fekaú?
ʻOkú ke loto-fiemālie fēfē ke talangofua ki he meʻa ʻoku kole mai ʻe he ʻOtuá, neongo kapau ʻoku ʻikai mahino kiate koe ʻa e ʻuhinga ʻo e fekaú? Ko e hā hono ʻuhingá?

Ko e kakai ʻi he kuonga ʻo Noá

Fakakaukau ke fakaʻaliʻali e fakatātā ʻo Noa ‘i he kamataʻanga ‘o e lēsoní. Kole ki he kau akó ke vahevahe ʻa e meʻa kuo nau ʻosi ʻilo fekauʻaki mo e ngaahi fakakaukau ko ʻení. Fakaafeʻi kinautolu ke fakaʻaongaʻi e ngaahi potufolofola ʻoku fokotuʻu atú ʻo ka fiemaʻu.

Ko e tuʻunga fakalaumālie ʻo e kakai ʻi he kuonga ʻo Noá pea mo e meʻa naʻe fai ʻe he ʻOtuá ko hono olá (vakai, Mōsese 8:17, 20, 22, 28–29)
Ko e meʻa naʻe fekau ʻe he ʻOtuá kia Noa ke ne fai ke fakahaofi ʻa e kau talangofuá (vakai, Mōsese 7:43)

ʻI he hokohoko atu e ako ʻa e kau akó, poupouʻi kinautolu ke fekumi ki he tākiekina ʻa e Laumālie Māʻoniʻoní ke mahino kiate kinautolu ʻa e ʻofa ʻa e ʻOtuá kiate kitautolú. Ko e meʻa kotoa pē ʻoku fai ʻe he ʻOtuá, kau ai ʻa e Lōmakí, ʻoku fakaʻaiʻai ia ʻe he ʻofá (vakai, 2 Nīfai 26:24). Tokoni ke ʻiloʻi ʻe he kau akó naʻe mamahi ʻa Sīsū Kalaisi koeʻuhí ko e ngaahi angahala ʻa e kakai naʻe mate ʻi he Lōmakí koeʻuhí ke nau lava ʻo ako mo fakatomala ʻi he maama tataliʻanga ʻo e ngaahi laumālié (vakai, Mōsese 7:38–40; 1 Pita 3:18–20). ʻIkai ngata aí, naʻe hoko foki e fili ʻa e ʻOtuá ke tuku mai ʻa e Lōmakí ke maluʻi ai ʻEne fānau fakalaumālie kehé mei hano fanauʻi ki ha ngaahi tūkunga fakatuʻutāmaki mo kovi pehē (vakai, John Taylor, ʻi he Journal of Discourses, 19:158–59).

Ko e ʻaʻaké

Fakakaukau ke ʻoange ha laʻipepa ki ha fanga kiʻi kulupu iiki ʻo e kau akó pea ʻoange ha kiʻi taimi nounou ke nau fakakakato fakataha ai ʻa e ʻekitivitī ko ʻení. (Tokanga ke tuku ha taimi hili e ʻekitivitī ko ʻení ke aleaʻi ʻe he kau akó e meʻa ʻoku nau akó pea fakafekauʻaki ia ki heʻenau moʻuí.)

Lau ʻa e Sēnesi 6:14–22; 7:1–12, 23; 8:13–17, ʻo kumi ʻa e meʻa ʻoku akoʻi ʻe he fakamatala ko ʻení fekauʻaki mo e ʻOtuá mo e meʻa te tau lava ʻo ako meia Noá.
Tā ha fakatātā faingofua ʻo e meʻa naʻe hokó.
Fakakau ʻi hoʻo fakatātaá ha meʻa ʻe taha naʻá ke ako fekauʻaki mo e ʻOtuá pea mo ha meʻa ʻe taha naʻá ke ako mei he sīpinga ʻa Noá.

Fakaafeʻi ha ngaahi kulupu ke nau fakaʻaliʻali mo fakamatalaʻi ʻenau ʻū fakatātaá (tatau ai pē kapau ʻoku ʻikai kakato) ki ha kulupu ʻe taha. Hili iá, fakaafeʻi ha ngaahi kulupu ke nau vahevahe mo e kalasí ʻa e meʻa ne nau ako fekauʻaki mo e ʻOtuá mo e meʻa ne nau ako mei he sīpinga ʻa Noá.

Ko e moʻoni ʻe taha ʻe lava ke ʻiloʻi ʻe he kau akó mei he talanoa ko ʻení ko e taimi ʻoku tau talangofua ai ki he ʻEikí ʻi he tuí, te Ne tāpuakiʻi mo maluʻi kitautolu.

Fakakaukau ke fakaʻaliʻali e fakamatala ko ʻení mo fakaafeʻi e ngaahi kulupú ke nau lau mo aleaʻi e founga ʻoku ʻaonga ai kiate kitautolu he ʻaho ní.

Naʻe vahevahe ʻe Palesiteni Sipenisā W. Kimipolo (1895–1985) ha niʻihi ʻo e ngaahi ʻuhinga naʻe fiemaʻu ai ke tui ʻa Noa mo hono fāmilí kia Kalaisi ke fakahoko ʻa e fekau ke foʻu ʻa e ʻaʻaké.

Naʻe teʻeki ke hā mai ha fakaʻilonga ʻe ʻuha mo tāfea. Naʻe lumaʻi [ʻa Noa] ʻe hono kakaí ʻo lau ko e vale. Naʻe ʻikai fie fanongo ha taha ki heʻene malangá. Naʻe lau ʻoku taʻeʻuhinga ʻene ngaahi fakatokangá. Naʻe teʻeki hoko ha meʻa pehē kimuʻa; ne teʻeki ai ʻilo ʻe ha taha ia ʻe lava ʻe ha lōmaki ʻo ʻufiʻufi kotoa ʻa māmani. Meʻa ngalivale moʻoni ke foʻu ha vaka ʻi he funga fonua mōmoá, lolotonga ʻoku ulo lelei ʻa e laʻaá pea hokohoko atu pē mo e moʻuí ʻi he founga angamahení! (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 175)

Ko e hā ha niʻihi ʻo e ngaahi fekau ʻa e ʻEikí ʻoku tukunoaʻi pe manukiʻi ʻe he kakaí he ʻaho ní?
Ko e hā ha meʻa ʻokú ke ʻilo fekauʻaki mo e ʻOtuá mo ʻEne kau palōfitá ʻe lava ʻo tokoni ke tau talangofua ki he ʻEikí neongo e fakafepakí?

Fakaafeʻi e kau akó ke vahevahe ha ngaahi fekau ʻoku nau tui ko ha ngaahi maluʻi ʻofa mei he ʻOtuá.

Talangofua ki he ʻOtuá ʻi heʻetau moʻuí

Fakakaukau ke fakaʻaliʻali ʻa e fakamatala ko ʻení fakataha mo e ngaahi fakakaukau fakataautaha ʻoku hā atu ʻi laló.

Naʻe vahevahe ʻe Palesiteni Tōmasi S. Monisoni (1927–2018) ha taha ʻo e ngaahi lēsoni maʻongoʻonga taha te tau lava ʻo ako ʻi heʻetau moʻuí.

Naʻe maʻu ʻe Noa ha tui taʻeueʻia ke muimui he ngaahi fekau ʻa e ʻOtuá. ʻOfa ke tau fai pehē maʻu ai pē. ʻOfa ke tau manatuʻi ʻoku hā ngalivale maʻu pē e poto ʻo e ʻOtuá ki he tangatá; ka ko e meʻa maʻongoʻonga taha te tau lava ʻo ako ʻi he moʻui fakamatelié, ʻi he taimi ʻoku folofola ai e ʻOtuá pea tau talangofuá, te tau tonu maʻu pē. (“Models to Follow,” Liahona, Nov. 2002, 61)

Lekooti ʻi hoʻo tohinoa akó:

ʻA e ongo ʻokú ke maʻu fekauʻaki mo e fakamatala ʻa Palesiteni Monisoní ʻa ia ʻoku felāveʻi mo e ngaahi tūkunga pe ngaahi fekau ʻi hoʻo moʻuí.
Ko e meʻa naʻá ke ako pe ongoʻi he ʻahó ni fekauʻaki mo e Tamai Hēvaní mo ʻEne ngaahi fekaú.
Ko e meʻa ʻokú ke tui ʻe finangalo ʻa e Tamai Hēvaní ke ke fai ke muimui ki he sīpinga talangofua faivelenga ʻa Noá.

Te ke lava ʻo fakaʻosi e lēsoní ʻaki hono fakaafeʻi e kau akó ke fakaʻilongaʻi e sīpinga ʻa Noá ʻi he Sēnesi 7:5 pea fakafekauʻaki ia mo e sīpinga ʻa e Fakamoʻuí ʻi he maama fakalaumālié ʻi he Mōsese 4:2. Fakakaukau ke ke fakamoʻoniʻi ʻe tāpuakiʻi ʻe he ʻOtuá hoʻo kau akó ʻi heʻenau feinga faivelenga ke muimui ki he sīpinga talangofua ʻa e Fakamoʻuí.

Ngaahi Maʻuʻanga Tokoni Kehé

ʻE lava fēfē ke fakafehoanaki ʻa e ngaahi tūkunga ʻo e māmaní he ʻaho ní ki ha lōmaki?

Naʻe fakamatalaʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e meʻá ni ki he kau faiako seminelí mo e ʻinisititiutí:

ʻOku liliu vave ʻa e māmani ʻoku nofo ai ʻa e toʻu tupú. ʻI he taimi ʻoku foki mai ai honau ngaahi tokoua mo e tuofāfine lalahí ke ʻaʻahi ki he ngaahi akoʻanga mo e ngaahi ʻapiako tatau ne nau ako aí, ʻoku nau fakatokangaʻi ai ha ʻātakai kehe ʻo e moʻuí. Kuo kovi ange ʻa e lea ʻoku fakaʻaongaʻi ʻi he holó mo e ngaahi loki fetongí. ʻIkai molumalu ʻa e valá. Kuo fakahāhā pē ʻa e ponokalafí. ʻIkai ngata pē ʻi he fakautuutu hono fakaoleoleʻi ʻo e angahalá, ka ko e konga lahi ʻo e ngaahi meʻa naʻe ui ʻoku halá, ʻoku ʻikai toe fakahalaiaʻi ia pea iku pē, naʻa mo ʻetau toʻu tupu ʻo e Siasí, ke nau tali lelei kinautolu. …

… ʻOku fuʻu tokolahi [ʻa e toʻu tupú], ʻoku nau pehē kiate kinautolu: “… Te u ʻalu pē mo e ākengá.”

Sai, kuo hoko ʻa e ākengá ko ha tāfea pea ʻe vavé ni pē haʻane hoko ko ha fakatafenga mālohi. ʻE hoko ia ko ha fakatafenga mālohi ʻo e ngaahi fasí mo e anga ʻo e vakaí mo e ngaahi ongo ʻokú ne fakaafea ʻa e filí ka ne tuli e Laumālie ʻo e ʻOtuá. (“We Must Raise Our Sights” Ensign, Sept. 2004, 14)

Ko e hā ha meʻa te tau lava ʻo ako mei hono fakafisingaʻi ʻe he kakaí ʻa e ngaahi fakatokanga ʻa Noá?

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí:

Ko ha fehalaaki ia ke tui ko e fili ke tali pe taʻe tali ʻa e akonaki ʻa e palōfitá, ʻoku ʻikai lahi hake ia ʻi he fili ke te tali ha faleʻi lelei mo maʻu hono ngaahi leleí pe nofo maʻu ʻi he meʻa ʻokú te ʻi aí. Ka ko e fili ke ʻoua ʻe fakaʻaongaʻi e akonaki fakapalōfitá, ʻokú ne liliu e fakavaʻe ʻoku tau langa aí. ʻOku fakatuʻutāmaki ange ia. ʻOku holoki hotau mālohi ke tali ʻa e faleʻi fakalaumālie ʻi he kahaʻú, ʻi he ʻikai ke tau tokanga ki he enginaki fakaepalōfitá. Ko e taimi lelei taha ke fai ai ʻa e fili ke tokoni kia Noa ʻi hono foʻu ʻo e ʻaʻaké ʻa e fuofua taimi naʻá ne fai ai ʻa e kolé. Ko e taimi kotoa pē naʻá ne kole ai hili iá, pea ʻi he taimi kotoa pē naʻe ʻikai ke nau tali aí, naʻá ne holoki ʻenau tuʻunga malava ke ongoʻi ʻa e Laumālié. Pea ko e taimi kotoa pē, ʻe hangē ʻoku ngalivalé ʻene kolé, kae ʻoua ke tō mai ʻa e ʻuhá. Pea fuʻu tōmui leva. (“Finding Safety in Counsel,” Ensign, May 1997, 25)

Ko e hā e meʻa naʻe hoko ʻa e ʻumatá ko hano fakaʻilonga hili ʻa e Lōmakí?

Ko e “ʻumatá” ko ha fakaʻilonga ia he ʻikai toe lōmakiʻi ʻe he ʻOtuá ʻa e māmaní kotoa (vakai, Sēnesi 9:13–15). Ka, naʻe ope atu ai ʻa e fuakava naʻe fai ʻe he ʻOtuá mo Noá. ʻOku tokoni e Liliu ʻa Siosefa Sāmitá ke mahino kiate kitautolu naʻe fakafoʻou ʻe he ʻOtuá e fuakava tatau naʻá Ne fai mo ʻĪnoké (vakai, Liliu ʻa Siosefa Sāmitá, Sēnesi 9:21–25, ʻi he Fakahinohino ki he Ngaahi Folofolá). Naʻe kau ʻi he fuakavá ni ha talaʻofa, ʻi he taimi naʻe talangofua ai e hako ʻo Noá ki he ngaahi fekau kotoa pē ʻa e ʻOtuá, ʻe fiefia ʻa e ngaahi langí pea ʻe toe ʻomi e kolo ʻo ʻĪnoke ko Saioné, ki he māmaní.

Ko e hā e fua ʻo e ʻaʻaké?

ʻOku fua ʻe he folofolá ʻa e ʻaʻaké ʻi he kiupite. ʻOku fakafuofua ʻa e kiupite ʻe tahá ki ha ʻinisi ʻe 18 ki he 22 (senitimita ʻe 46–56). Ka fakaʻaongaʻi ʻa e ʻinisi ʻe 18 ko ha kiupite ia ʻe taha,naʻe fute ʻe 450 e lōloa ʻo e ʻaʻaké (mita nai ʻe 138), fute ʻe 75 hono maokupú (mita nai ʻe 23), pea fute leva ʻe 45 hono māʻolungá (mita nai ʻe 14). Mahalo ʻe tokoni ke fakafehoanaki e lahi ʻo e ʻaʻaké ki ha meʻa ʻokú ke maheni mo ia. Hangē ko ʻení, ko e malaʻe soka fakapalofesinalé ʻoku fute ʻe 330–360 hono lōloá (mita nai ʻe 100–110) pea fute ʻe 210–240 hono fālahi (mita nai ʻe 64–73). ʻE lōloa ange ʻa e ʻaʻaké ʻi ha malaʻe soka ka ʻoku meimei ke fālahi ʻaki ha vahe tolu ʻe taha.

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Ke tokoni ke nofotaha e tokanga ʻa e kau akó ʻi he founga ʻe lava ke maluʻi ai kinautolu ʻe he Fakamoʻuí mo ʻEne ongoongoleleí mei he faiangahala ʻo e ngaahi ʻaho kimui ní, fakakaukau ke kamata e lēsoní ʻaki hano fakaʻaliʻali e ʻuluaki fakamatala ʻa Palesiteni ʻAealingi ʻi he konga “Ngaahi Maʻuʻanga Tokoni Kehé.” Kole ki he kau akó ke vahevahe ʻa e meʻa ʻoku nau fakakaukau ki ai fekauʻaki mo e fakamatalá. ʻE lava ke nau vahevahe ha ngaahi founga ʻoku hangē ai e faiangahala mo e ʻahiʻahi ʻoku nau fehangahangai mo iá ko ha lōmakí.

Fakaafeʻi e kau akó ke nau fekumi ki ha ueʻi fakalaumālie he ʻahó ni ki he meʻa te nau lava ʻo fai ke maʻu ai e ngaahi tāpuaki mo e maluʻi ʻa e ʻOtuá mei he lōmaki fakaonopooni ʻo e faiangahalá mo e ngaahi ʻahiʻahí.

Sēnesi 6:14. “Vali ʻaki ia ʻa e pulu ʻi loto mo tuʻa”

ʻE ala ʻaonga ki he kau akó hono ako e founga ʻe lava ai ʻe he ʻOtuá ʻo maluʻi kitautolu mei he ngaahi ʻahiʻahi mo e ngaahi angahala ʻokú ne ʻākilotoa kitautolú. Te ke lava ʻo fakaafeʻi kinautolu ke lau ʻa e ngaahi fakahinohino naʻe ʻoange ʻe he ʻOtuá ki he ongo palōfita ko ʻení ke maluʻi hona ongo fāmilí mei he hū ʻa e vaí ki hona ongo vaká. Hili iá pea fakaafeʻi e kau akó ke aleaʻi e ngaahi fehuʻi ʻi laló mo hanau hoa.

Noa – Sēnesi 6:14 (Fakatokangaʻi ange: Ko e pulú ko ha meʻa ia hangē ha valitaá ʻoku fakaʻaongaʻi ki hono silaʻi ha meʻa ke hao mei he vaí.)
Ko e Tokoua ʻo Sēletí – ʻEta 2:17
- ʻOkú ke pehē ʻe tokoni fēfē ʻa e ngaahi fakahinohino ʻa e ʻOtuá ki he ongo palōfita ko ʻení, ki ha taha ʻoku feinga ke taʻofi ʻa e angahalá mei heʻene hū ki heʻenau moʻuí?
- Ko e hā ha ngaahi founga te tau lava fakalaumālie ai ʻo “vali [ʻetau moʻuí] ʻi loto mo tuʻa” ke taʻofi ʻa e angahalá mei heʻene maʻu kitautolú?

Te ke lava foki ʻo fakaafeʻi ʻa e kau akó ke lau ʻa e maau ko ʻení, naʻe lau ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá. Te ke lava ʻo ʻai ke nau lekooti ʻa e foʻi māú ʻi heʻenau folofolá ʻo ofi ki he Sēnesi 6:14. Kole ange ke nau vahevahe ʻa e founga ʻoku nau tui ai ʻoku ʻaonga ia ki heʻenau moʻuí.

Ko e vai kotoa pē ʻi he māmaní,

Neongo hono mālohí,

Naʻa mo ha kiʻi vaka he ʻikai ngoto ai

Tukukehe ka ne lōmekina ai.

Pea ko e kovi kotoa pē ʻi he māmaní,

ʻA e angahala fulikivanu mamahí,

He ʻikai ke ke teitei mamahi ai

Tukukehe ka ke tukulolo ki ai.

(ʻIkai ke ʻiloʻi ʻa e tokotaha naʻá ne faʻú. Lea ʻaki ʻe Boyd K. Packer, “The Spirit of Revelation,” Ensign, Nov. 1999, 24)

Fakataipe ʻo e Lōmakí

Mahalo te ke fie tokoniʻi e kau akó ke nau ʻahiʻahi ako ke mahino ʻa e fakataipe ʻi he folofolá ʻaki hono fai ha ngaahi fakafehoanaki. Te ke lava ʻo fakaafeʻi e kau akó ke fakafonu ʻa e konga ʻoku fakaʻatā ko ʻení mo hanau hoa.

“ʻE lava ke fakafehoanaki ʻa e Lōmakí ki he papitaisó koeʻuhí ___________.”

“ʻOku fakamanatu mai ʻe he ʻaʻake naʻe langa ʻe Noá ʻa Sīsū Kalaisi koeʻuhí_____________.”

Hili iá, te ke lava ʻo kole ki he kau akó ke nau mohu founga pea ke vahevahe ʻa e founga ʻe lava ke akoʻi ai kinautolu ʻe he fakamatala kia Noa mo e ʻaʻaké fekauʻaki mo ha toe ngaahi tefitoʻi moʻoni kehe ʻo e ongoongoleleí hangē ko e tuí, fakatomalá, moihū ʻi he temipalé, ngāue fakafaifekaú, kau palōfitá, mo e ngaahi meʻa peheé.

Te ke lava ʻo fakaafeʻi e kau akó ke vahevahe ʻa e meʻa ʻoku nau ako mei he ngaahi akonaki ʻa Sīsū Kalaisí, ʻa ia naʻá ne fakafehoanaki ʻa e teuteu ki he Lōmaki ʻi he kuonga ʻo Noá ki he teuteu ki he Hāʻele ʻAnga Ua Maí (vakai, Mātiu 24:36–39).