Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 7:22–47: Mata Meʻa-Hā-Mai ʻa ʻĪnoké

“Mōsese 7:22–47: Mata Meʻa-Hā-Mai ʻa ʻĪnoké,” Fuakava Motuʻá – Tohi Lēsoni ʻa e Faiako Seminelí (2026)

“Mōsese 7:22–47: Mata Meʻa-Hā-Mai ʻa ʻĪnoké,” Fuakava Motuʻá – Tohi Lēsoni ʻa e Faiako Seminelí

Mōsese 7; Lēsoni 17

Mōsese 7:22–47

Mata Meʻa-Hā-Mai ʻa ʻĪnoké

Illustration depicting the City of Enoch being taken up.

Ko e fē ha taimi kuó ke ongoʻi ai e ʻofa ʻa e ʻOtuá ʻi hoʻo moʻuí? Naʻe fakahā ʻe he ʻEikí kia ʻĪnoke ha meʻa-hā-mai ʻo e hisitōlia ʻo e māmaní mei hono kuongá ki he Nofo Tuʻí. Naʻe ako ʻa ʻĪnoke ʻi ha founga maʻongoʻonga fekauʻaki mo e ʻofa fakataautaha ʻa e Tamai Hēvaní ki Heʻene fānaú. ʻE lava ke tokoni ʻa e lēsoni ko ʻení ke ongoʻi ʻe he kau akó e ʻaloʻofa mo e ʻofa ʻa e ʻOtuá ki Heʻene fānaú kotoa.

Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi aʻusia mo ha ngaahi potufolofola ʻe tokoni ke nau ʻiloʻi ʻa e tuʻunga ʻo e Tamai Hēvaní. Te nau lava foki ʻo kole ki he mātuʻá pe kau taki pe ngaahi kaungāmeʻa falalaʻangá ke vahevahe ha ngaahi aʻusia pe ngaahi potufolofola mo kinautolu. Fakaafeʻi ʻa e kau akó ke omi mateuteu ke vahevahe.

Ngaahi ʻEkitivitī Ako ʻOku Ala Fakahokó

Fāifeinga ke ongoʻi e ʻaloʻofa mo e ʻofa ʻa e ʻOtuá

Ke teuteuʻi e kau akó ke ako lahi ange fekauʻaki mo e ʻOtuá mo Hono ʻulungāngá, lau pe fakaʻaliʻali ʻa e ngaahi tūkunga ko ʻení:

ʻOku fifili ʻa Kēlepi pe ʻoku tokanga pē ʻa e ʻOtuá ki he kakai ʻoku nau fai e meʻa ʻoku totonú.

ʻOku hohaʻa ʻa Souī naʻa ʻoku houhau ʻa e ʻOtuá ʻi he ngaahi fili ʻoku fai ʻe ha taha ʻoku ofi kiate ia. ʻOkú ne hohaʻa naʻa fiemaʻu ke Ne tauteaʻi kinaua.

ʻOku ʻikai fakakaukau ʻa ʻOlivia kuó ne ʻosi ongoʻi e ʻofa ʻa e ʻOtuá.

Ko e hā e ʻuhinga ka ongoʻi pehē ai ʻa e kakaí ni?

Fili ha taha ʻo e ngaahi tūkunga ko ʻení ke fakalaulauloto ki ai ʻi hoʻo hoko atu e lēsoni ko ʻení.

Ke tokoni ki he kau akó ke nau ongoʻingofua ʻa e ivi tākiekina ʻo e Laumālie Māʻoniʻoní ʻi he kotoa ʻo e lēsoni ko ʻení, poupouʻi kinautolu ke nau fakalaulauloto ki he ongo fehuʻi ko ʻení:

Ko e hā ha meʻa ʻokú ke ʻilo fekauʻaki mo e Tamai Hēvaní ʻe lava ʻo tokoni atu kapau naʻá ke maʻu ha ngaahi hohaʻa tatau?
Ko e hā ha ngaahi fehuʻi ʻokú ke maʻu fekauʻaki mo e Tamai Hēvaní?

Fekumi ki ha tokoni mei he ʻEikí ke ke ʻiloʻi mo ongoʻi ʻEne ʻofa kiate koé pea mo ʻEne fānaú kotoa.

Ko e mata meʻa-hā-mai ʻa ʻĪnoke fekauʻaki mo kinautolu naʻe ʻikai ʻave ki he langí

Fakakaukau ke fakamatalaʻi fakanounou ʻeni ʻi he lea pē ʻaʻau:

Fakamanatu ange, naʻe fokotuʻu ʻe ʻĪnoke ʻa e kolo ko Saioné ʻo fakafou ʻi he tokoni mo e tataki ʻa e ʻEikí. Naʻe uouangataha ʻa e kakai ʻo Saioné ʻi he ʻEikí, naʻa nau moʻui ʻi he māʻoniʻoni, mo fetauhiʻaki (vakai, Mōsese 7:16–19). ʻI ha mata meʻa-hā-mai, naʻe fakahā ʻe he ʻEikí kia ʻĪnoke te Ne ʻave ʻa e kakai ʻo Saioné ki he langí koeʻuhí ko ʻenau tuí mo e māʻoniʻoní (vakai, Mōsese 7:20–21). Naʻe “mamata foki ʻa ʻĪnoke ki hono toe ʻo e kakaí” (Mōsese 7:22), ʻo ʻuhinga ki he kakai naʻe toe ʻi he māmaní koeʻuhí naʻe ʻikai ke nau muimui ki he Fakamoʻuí.

Lau ʻa e Mōsese 7:23–26, ʻo kumi e meʻa naʻe mamata ki ai ʻa ʻĪnoké.

Ko e hā e meʻa ʻokú ke ako fekauʻaki mo Sētané?
ʻOkú ke pehē ko e hā ʻoku mahuʻinga ai ke mahino kiate kitautolu e ngaahi meʻá ni fekauʻaki mo Sētané?

Ko e mamata ʻa ʻĪnoke ki he founga ʻoku tali ʻaki ʻe he ʻOtuá ʻa e faiangahalá

Naʻe maʻu ʻe ʻĪnoke ha aʻusia ongo moʻoni ʻi heʻene mamata ki he ʻafio ʻa e ʻOtuá ki he kakai kuo nau fili ke talangataʻa kiate Iá.

Mahalo te ke fie fakamatalaʻi ange naʻe mamata ʻa ʻĪnoke kia Sihova, pe ko Sīsū Kalaisi. Talu mei he Hinga ʻa ʻĀtamá, ko Sihova ʻoku hā mo fefolofolai mo e kau palōfitá. ʻI he ngaahi meʻa ko ʻení, ʻokú Ne faʻa folofola ai ʻo hangē ko Ia ʻa e Tamaí. ʻOku pehē ʻa e uouangataha ʻa e Tamaí mo e ʻAló ʻoku hanga ʻe he ngaahi ongo ʻa e Fakamoʻuí ʻo fakafofongaʻi foki ʻa e Tamaí. Ko ia ai, ʻe lava foki ʻe he meʻa ʻe ako ʻe he kau akó fekauʻaki mo e meʻa-hā-mai ko ʻeni ʻi he vahaʻa ʻo ʻĪnoke mo Sihová, ʻo tokoniʻi kinautolu ke nau ako fekauʻaki mo e Tamai Hēvaní.

ʻI hono lau ʻe he kau akó ʻa e ngaahi veesi ko ʻení, mahalo te ke fie poupouʻi kinautolu ke nau lau māmālie, kiʻi taʻofi ʻo fakalaulauloto ki he meʻa ne nau laú, pea lau tuʻo lahi ʻa e ngaahi vēsí. ʻE lava ke tokoni ʻa e laukonga ʻi he founga ko ʻení ke fakaafeʻi ʻe he kau akó ʻa e Laumālié ke akoʻi lahi ange kinautolu fekauʻaki mo ʻenau Tamai Hēvaní.

Lau ʻa e Mōsese 7:28–33 pea fakaʻilongaʻi ʻa e ngaahi foʻi lea pe kupuʻi lea ʻoku tokoni atu ke ke ʻiloʻi pea mahino lelei ange ai kiate koe ʻa e Tamai Hēvaní.

Ko e hā ha meʻa ʻokú ke ako fekauʻaki mo e ʻOtuá mei he ngaahi veesi ko ʻení?

Fakakaukau ke hiki ʻa e “Ko e ʻOtuá …” ʻi he palakipoé pea kole ki he kau akó ke fakaʻosi ʻa e fakamatala ko ʻení ʻaki e meʻa ne nau akó. Poupouʻi ha ngaahi tali kehekehe. ʻE lava ke kau ʻi ha ngaahi tali ʻe niʻihi ʻa e:

ʻoku ʻofa moʻoni ʻiate kitautolu (veesi 28–33).
naʻá Ne fakatupu ʻa e ʻunivēsí pea ʻoku ʻatā ia kiate kitautolu (veesi 30).
ʻoku angatonu, ʻaloʻofa mo angaʻofa (veesi 30).
naʻá Ne ʻomai ʻa e tauʻatāina ke filí (veesi 32).
ʻoku finangalo ke tau feʻofaʻaki (veesi 33).
ʻoku finangalo ke tau fili Ia (veesi 33).

ʻI hono vahevahe ʻe he kau akó ʻa e meʻa ne nau maʻú, ʻe lava ke ke ʻeke ha ngaahi fehuʻi vakaiʻi hangē ko e:

Ko e hā e ʻuhinga ʻoku ʻuhingamālie ai kiate koe ʻa e foʻi moʻoni ko ia fekauʻaki mo e Tamai Hēvaní?
ʻE tokoni fēfē hono ʻiloʻi e moʻoni ko iá ki he tokotaha ʻi he tūkunga naʻá ke filí? ʻE lava fēfē ke ne tokoniʻi koé?

ʻI hono fakaʻaongaʻi e aʻusia ʻa ʻĪnoké, naʻe akoʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku fakahaaʻi mai ʻe he Fakamoʻuí kiate kitautolu ʻa e tuʻunga moʻoni ʻo e Tamai Hēvaní mo e lahi ʻo ʻEne ʻofa ʻiate kitautolú. Naʻá ne vahevahe ʻa e ngaahi fakakaukau ko ʻení fekauʻaki mo e Tamai Hēvaní:

ʻI he lotolotonga ʻo ha mata meʻa-hā-mai fakaofo ʻo e faʻahinga ʻo e tangatá ʻa ia ne fakaava ai ʻa e langí ki heʻene vakaí, ʻi he mamata ʻa ʻĪnoke ki he ngaahi tāpuaki mo e ngaahi faingataʻa ʻo e moʻui fakamatelié, naʻá ne tafoki ʻo hanga ki he Tamaí peá ne ofo ke vakai atu ʻokú Ne tutulu. Naʻá ne pehē ʻi he fifili mo e ofo ki he Tokotaha mālohi taha ʻi he ʻunivēsí: “Ko e hā ʻa e meʻa ʻokú ke lava ai ke tangí?” …

ʻOku akoʻi lahi ange ʻe he fakatātā mālie ʻe taha ko iá ʻa e natula moʻoni ʻo e ʻOtuá ʻo laka hake ʻi hano toe lava ʻe ha faʻahinga feinga faka-teolosia ke fakamatalaʻi ia. …

He toki ʻīmisi fakangalongataʻa moʻoni ia ʻo e kau mai ʻa e ʻOtuá ʻi heʻetau moʻuí! He toki mamahi lahi moʻoni ia ʻi ha mātuʻa ʻi he ʻikai fili ʻe Heʻene fānaú Ia pe “ko e ongoongolelei ʻo e ʻOtuá” kuó Ne ʻomí! [Loma 1:1]. He toki meʻa faingofua ke ʻofa ʻi ha taha ʻoku ʻofa fakataautaha mai kiate kitautolu! …

‘Oku ou fakamoʻoni fakataautaha ʻi he ʻahó ni ki ha ʻOtua moʻui ʻoku tokaimaʻananga fakataautaha, ʻokú Ne ʻafioʻi hotau hingoá, fanongo mo tali e ngaahi lotú, mo mataʻi koloa ʻaki kitautolu ʻo taʻengata ko e fānau ʻo Hono laumālié. (”The Grandeur of God,” Liahona, Nov. 2003, 72)

Fakaafeʻi e kau akó ke vahevahe ʻa e meʻa naʻe makehe kiate kinautolu mei he lea ʻa Palesiteni Hōlaní.

Fakakaukau ke hiki e ngaahi fehuʻi ko ʻení ʻi he palakipoé. Fakaafeʻi e kau akó ke aleaʻi e ngaahi fehuʻí ʻi ha fanga kiʻi kulupu iiki. Fakaafeʻi foki kinautolu ke aleaʻi e founga ʻe lava ke fakaʻaongaʻi ai e ngaahi fakakaukau ko ʻení ki he ngaahi tūkunga ne nau fili ʻi he kamataʻanga ʻo e lēsoní. ʻI he tali ʻa e kau akó, lue takai ʻi he lokí pea fanongo ki ha niʻihi ʻo ʻenau ngaahi talí.

ʻOkú ke pehē ko e hā e ʻuhinga ʻoku tutulu ai ʻa e Tamai Hēvaní maʻatautolu ʻi he taimi ʻoku ʻikai ke tau feʻofaʻaki aí?
Ko e hā e ʻuhinga ka Ne tutulu ai maʻatautolu ʻi he taimi ʻoku ʻikai ke tau fili ai ke muimui mo ʻofa ʻiate Iá?
Ko e hā ha ngaahi loi ʻoku fiemaʻu ʻe Sētane ke tau tui ki ai fekauʻaki mo e ngaahi ongo ʻa e ʻOtuá kiate kitautolú?

Hili hono aleaʻi ʻe he kau akó e ngaahi fehuʻi ko ʻení, fakakaukau ke fehuʻi ange pe ko e hā ne nau fanongo ai mei ha tokotaha ako ʻe taha ʻe ʻaonga ke vahevahe mo e kalasí kotoa. ʻOku lava heni ke toe vakaiʻi ʻe he kau akó ʻa e ngaahi talí mo fepoupouʻaki foki ʻi heʻenau ngaahi talí. Te ke lava foki ʻo fakamahinoʻi ange ha ngaahi tali ʻaonga naʻá ke fanongo ki ai.

Ko e mamata ʻa ʻĪnoke ki he moʻui mo e misiona ʻo e Fakamoʻuí

Naʻe fakahā leva ʻe he ʻEikí kia ʻĪnoke ko e kakai ʻi he māmaní ʻa ia he ʻikai ke nau fakatomalá, te nau mate kinautolu ʻi ha lōmaki (vakai, Mōsese 7:34–44). Naʻe tangi ʻa ʻĪnoke. Naʻe fakafiemālieʻi leva ʻe he ʻEikí ʻa ʻĪnoke ʻo folofola ange, “Hanga hake ho lotó, peá ke fiefia, ʻo mamata” (Mōsese 7:44).

Lau ʻa e Mōsese 7:44–47, ʻo kumi ʻa e meʻa naʻe fakahā ʻe he ʻEikí kia ʻĪnoke ke fakafiemālieʻi ʻaki iá. Mahalo ʻe tokoni ke ʻiloʻi ko e “Tokotaha Māʻoniʻoní” (veesi 45 mo e 47) ko ha huafa ia ʻo Sīsū Kalaisi.

ʻOkú ke pehē ko e hā e ʻuhinga ʻe hoko ai e mamata ki he ngaahi meʻá ni ke fiefia ai e laumālie ʻo ʻĪnoké? (veesi 47).
ʻOku hanga fēfē ʻe hono fekauʻi mai ʻo Sīsū Kalaisí ʻo fakahaaʻi ʻa e ʻaloʻofa mo e ʻofa ʻa e Tamaí?

Kapau ʻe tokoni, te mou lava ʻo aleaʻi ʻa e founga ʻe tokoniʻi ai ʻe he Fakamoʻuí ʻa e fānau kotoa ʻa e ʻOtuá, naʻa mo e kakai naʻe faiangahala pea mate ʻi he Lōmakí. Tokoni ke mahino ki he kau akó neongo naʻe mate ʻa e kau faiangahalá ʻi he Lōmakí pea pau ke nau mamahi koeʻuhí ko ʻenau ngaahi angahalá ʻi he maama tataliʻanga ʻo e ngaahi laumālié, ka te nau kei lava pē ʻo fakatomala ʻo fakafou ʻi he Fakamoʻuí (vakai, Mōsese 7:38–39; 1 Pita 3:18–20).

Ongoʻi e ʻofa ʻa e ʻOtuá

Ke fakaʻosí, fakaafeʻi e kau akó ke fekumi ki ha tokoni ʻo fakafou ʻi he Laumālie Māʻoniʻoní ʻi heʻenau fai ʻa e ʻekitivitī ko ʻení. Pe, ko e fai ʻe he kau akó ha tohi ki ha taha ʻi heʻenau moʻuí ʻoku fiemaʻu ke ne ongoʻi ʻa e ʻaloʻofa mo e ʻofa ʻa e Tamai Hēvaní.

Fai ha tohi ke tokoni ki he tokotaha ʻi he tūkunga naʻá ke fili ʻi he kamataʻanga ʻo e lēsoní. Fakakau ʻa e ngaahi meʻá ni ʻi hoʻo tohí:

Meʻa naʻá ke ako mei he Mōsese 7 fekauʻaki mo e ʻaloʻofa mo e ʻofa ʻa e Tamai Hēvaní. Fakakau ha ngaahi kupuʻi lea pau pe ngaahi veesi ʻokú ke ongoʻi ʻe mātuʻaki mahuʻingamālie.
Ngaahi potufolofola kehe pe aʻusia kuó ne tokoniʻi koe ke ke ongoʻi e ʻaloʻofa mo e ʻofa ʻa e ʻOtuá.
Ngaahi fakakaukau kehe ʻokú ke pehē ʻe ala tokoni ki he tokotaha ko ʻení ke ne ongoʻi e ʻofa ʻa e ʻOtuá.

Fakaʻosi ʻaki hano fakaafeʻi e kau akó ke vahevahe ʻenau ngaahi fakakaukaú, aʻusiá mo e ngaahi ongó. Fakakaukau ke tānaki atu hoʻo fakamoʻoni ki he ʻofa ʻa e ʻOtuá.

Ngaahi Maʻuʻanga Tokoni Kehé

Ko hai naʻe mamata ki ai ʻa ʻĪnoké?

Naʻe mamata ʻa ʻĪnoke kia Sihova, pe ko Sīsū Kalaisi, ʻi Heʻene ngāue maʻá e Tamaí. Ko e taha ʻo e ngaahi nunuʻa ʻo e Hingá ko hono kapusi ʻo e faʻahinga ʻo e tangatá mei he ʻao ʻo e Tamaí (vakai, Mōsese 4:29, 31; 5:1, 4). Makehe mei hono fakafeʻiloaki ʻe he Tamaí Hono ʻAló, naʻe fakafou ʻa e hā ʻa e Tamaí ki he tangatá ʻi he ʻAló (vakai, Joseph Fielding Smith, Doctrines of Salvation, 1:27). ʻE toki lava pē ʻa e faʻahinga ʻo e tangatá ʻo toe tuʻu ʻi he ʻao ʻo e Tamaí ʻo fakafou ʻi he ngāue ʻa e ʻAlo ko Sīsū Kalaisí (vakai, ʻAlamā 11:44; Hilamani 14:15–17; Liliu ʻe Siosefa Sāmita, Sione 1:19).

Naʻe fakamatala ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Fakatatau mo e fakahinohino mo e mafai naʻe foaki ʻe he Tamaí (ʻElohimi), ʻe lava ke ngāue ʻa e ʻAló (Sihova/Sīsū) ʻo hangē ko e Tamaí…. ʻE lava ʻe Kalaisi ʻi ha faʻahinga taimi mo ha faʻahinga feituʻu pē ke folofola mo ngāue maʻá e Tamaí ʻi he mālohi ʻo e “fakanofo fakalangi ʻo e mafai” kuo foaki ʻe he Tamaí kiate Iá. (Christ and the New Covenant: The Messianic Message of the Book of Mormon [1997], 183–184)

Mōsese 7:28. Ko e hā e ʻuhinga ʻoku tutulu ai ʻa e ʻOtuá?

Naʻe akoʻi ʻe Palesiteni M. Lāsolo Pālati (1928–2023) ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e fānau kitautolu ʻa e ʻOtuá. ʻOku tau mahuʻinga kotoa pē ʻo aʻu ki he tuʻunga ʻo hono maʻu ʻe he ʻEiki ko e ʻOtua Māfimafí ha fiefia kakato kapau te tau faivelenga, pe tutulu kapau he ʻikai. (“The Atonement and the Value of One Soul,” Liahona, Mē 2004, 87)

ʻOku lahi fēfē e ʻofa ʻa e ʻOtuá ʻiate kitautolú?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, ʻo pehē:

Fakakaukau ki he ʻofa haohaoa mo kānokato taha te ke lava ʻo mafakakaukauʻí. Liunga e ʻofa ko iá ʻaki ha fika kilukilua—ko e lahi ia ʻo e ʻofa ʻa e ʻOtuá kiate koé [vakai, ʻĪsaia 54:10; Selemaia 31:3].

… Neongo ʻetau taʻe kakató, ka ʻoku kakato e ʻofa ʻa e ʻOtuá kiate kitautolú. Neongo ʻoku ʻikai ke tau haohaoa, ka ʻokú Ne ʻofa haohaoa ʻiate kitautolu. Neongo te tau ongoʻi hē mo [taumuʻa valea], ka ʻoku [fālute] kakato kitautolu ʻe he ʻofa ʻa e ʻOtuá.

ʻOkú Ne ʻofaʻi kitautolu he ʻokú Ne fonu ʻi ha ʻofa ʻoku māʻoniʻoni, maʻa mo taʻefakangatangata ʻoku ʻikai lava ke fakamatalaʻi. ʻOku tau mahuʻinga ki he ʻOtuá ʻo ʻikai koeʻuhí ko hotau ongoongó, ka koeʻuhí ko ʻEne fānau kitautolu. ʻOkú Ne ʻofa ʻiate kitautolu ʻo aʻu kiate kinautolu ʻoku tōnounoú, liʻekiná, faingatāmaki, mamahi pe loto-laveá. ʻOku lahi fau e ʻofa ʻa e ʻOtuá ʻa ia ʻoku aʻu ai ʻEne ʻofá ki he hīkisiá, siokitá, fiemeʻá mo e angahalá.

ʻOku ʻuhinga ʻeni, neongo pe ko e hā hotau tuʻunga lolotongá, ka ʻoku ʻi ai ha ʻamanaki lelei maʻatautolu. Tatau ai pē pe ko e hā hotau faingataʻaʻiá, tatau ai pē pe ko e hā hotau mamahí, tatau ai pē pe ko e hā ʻetau fehalaākí, ʻoku finangalo ʻetau Tamai Hēvani ʻofa taʻe-fakangatangatá ke tau ʻunuʻunu ke ofi kiate Ia koeʻuhí ka Ne lava ʻo ʻunuʻunu mai ke ofi kiate kitautolu [vakai, Tokāteline mo e Ngaahi Fuakava 88:63]. (“Ko e ʻOfa ʻa e ʻOtuá,” Liahona, Nōvema 2009, 22–23)

Mōsese 7:30. ʻOku ʻuhinga ki he hā ʻa e kupuʻi lea “ka ʻokú ke ʻi hena pē”?

Naʻe fakamatala ʻa ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

Ko ʻĪnoke, ʻa ia ne fakahā ki ai ʻe he ʻEikí e meʻa lahi, naʻá ne fakafetaʻi ki he ʻOtuá mo ʻEne fakatupu taʻefaʻalauá, ʻo fakahā ʻi he ʻilo pau “Ka ʻokú ke ʻi hena pē” (Mōsese 7:30; vakai foki, Selemaia 10:12).

ʻE lava ke poupouʻi kitautolu ʻe he fakapapau makehe ko ʻení ʻi he kotoa ʻo e ngaahi taimi mo e ngaahi tūkunga ʻo ʻetau moʻuí. ʻOku kau moʻoni ʻa e ʻOtua ʻo e ʻunivēsí ʻi heʻetau fanga kiʻi aʻusia iiki mo fakafoʻituituí! ʻI he lotolotonga ʻo ʻEne pule aoniu māʻongoʻongá, ʻokú Ne tokaimaʻananga, ʻafioʻi, mo ʻofa haohaoa ʻiate kitautolu (vakai, Mōsese 1:35; Sione 10:14). (“Yet Thou Art There,” Ensign, Nov. 1987, 30)

Ngaahi ʻEkitivitī Fakalahi ki he Akó

Ko ha saati ʻokú ne fakafehoanaki ʻa Sētane mo e ʻOtuá

Kapau ʻe lelei ki he kau akó ke nau sio ki he faikehekehe ʻo Sētane mo e ʻOtuá, fakakaukau ke faʻu ha saati hangē ko ʻení. ʻI he ako ʻa e kau akó ʻi he lēsoní, te nau lava ʻo fakafonu ki ai ʻa e meʻa ʻoku nau ako fekauʻaki mo Sētane mo e ʻOtuá.

Sētane	ʻOtua

Te ke lava ʻo fakaafeʻi e kau akó ke fakafehoanaki ʻa e ongo kōlomu naʻe fakafonú pea vahevahe ʻa e faikehekehe ʻoku hoko ʻi heʻenau moʻuí ke mahino kiate kinautolu ʻa e ngaahi meʻa ko ʻeni fekauʻaki mo Sētane mo e Tamai Hēvaní.

Ko e Ngaahi Huafa ʻo e Fakamoʻuí

Fakaafeʻi e kau akó ke kumi e ngaahi huafa ʻo e Fakamoʻuí ʻi he Mōsese 7:39, 45, 47 pea ako pe fakalaulauloto ki honau ʻuhingá. ʻEke ki he kau akó pe ko e hā ha meʻa ne nau ako fekauʻaki mo e Fakamoʻuí pea mo e ʻuhinga ʻoku mahuʻingamālie ai kiate kinautolú.

Tupulaki ʻa ʻĪnoké

Fakaafeʻi e kau akó ke vahevahe e ʻuhinga ʻoku nau fie hoko ai ʻo hangē ko e Tamai Hēvaní mo Sīsū Kalaisí. Fakamatalaʻi ange ʻi he mamata mo fefolofolai ʻa ʻĪnoke mo Sīsū Kalaisi, pe ko Sihová, ʻa ia naʻe folofola mo fakafofongaʻi ʻa e Tamai Hēvaní, naʻe hoko ʻa ʻĪnoke ʻo hangē ko Kinauá. Lau ʻa e Mōsese 7:28–52, ʻo kumi e ngaahi founga naʻe kamata ke ongoʻi mo ngāue ai ʻa ʻĪnoke ʻo hangē ko e Tamai Hēvaní mo Sīsū Kalaisí. ʻOku kau ʻi he ngaahi fakakaukaú ʻa e meʻá ni, hangē ko e ʻOtuá, naʻe tangi ʻa ʻĪnoke koeʻuhí ko e kakai naʻe faiangahalá (vakai, Mōsese 7:41, 44) pea fiefia ʻi he Fakalelei ʻa Sīsū Kalaisí (vakai, Mōsese 7:45–47). Naʻá ne tautapa foki ki ha ʻaloʻofa maʻá e kakaí mo kole ki he ʻOtuá ke ʻoua naʻa toe ʻomi ha lōmaki hili ʻa Noa. Naʻe hōifua ki ai ʻa e ʻOtuá (vakai, Mōsese 7:50–51).