Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

Moises 7:22–47: Pangitain ni Enoc

“Moises 7:22–47: Pangitain ni Enoc,” Manwal ng Titser ng Seminary para sa Lumang Tipan (2026)

“Moises 7:22–47: Pangitain ni Enoc,” Manwal Titser ng Seminary para sa Lumang Tipan

Moises 7: Lesson 17

Moises 7:22–47

Pangitain ni Enoc

Illustration depicting the City of Enoch being taken up.

Kailan mo nadama ang awa ng Diyos sa iyong buhay? Ipinakita ng Panginoon kay Enoc ang isang pangitain ng kasaysayan ng daigdig mula sa sarili niyang panahon hanggang sa Milenyo. Natutuhan ni Enoc sa natatanging paraan ang personal na pagmamahal ng Ama sa Langit para sa Kanyang mga anak. Ang lesson na ito ay makatutulong sa mga estudyante na madama ang awa at pagmamahal ng Diyos para sa lahat ng Kanyang anak.

Paghahanda ng estudyante: Anyayahan ang mga estudyante na mag-isip ng mga karanasan at banal na kasulatan na tumutulong sa kanila na malaman kung ano ang katangian ng Ama sa Langit. Maaari din nilang hilingin sa mga magulang o pinagkakatiwalaang lider o kaibigan na magbahagi ng mga karanasan o banal na kasulatan sa kanila. Sabihin sa mga estudyante na maghandang magbahagi.

Mga Posibleng Aktibidad sa Pag-aaral

Nahihirapang madama ang awa at pagmamahal ng Diyos

Upang maihanda ang mga estudyante na mas makilala ang Diyos at ang Kanyang pagkatao, basahin o ipakita ang mga sumusunod na sitwasyon:

Iniisip ni Caleb kung ang mga tao lang ba na gumagawa ng tama ang pinagmamalasakitan ng Diyos.

Nag-aalala si Zoe na maaaring nagagalit ang Diyos sa mga pasiyang ginagawa ng isang taong malapit sa kanya. Nag-aalala siya na baka parusahan Niya ito.

Sa palagay ni Olivia ay hindi pa niya nadama ang pagmamahal ng Diyos.

Bakit maaaring ganito ang nadarama ng mga taong ito?

Pumili ng isa sa mga sitwasyong ito na pagninilayan habang ipinagpapatuloy ninyo ang lesson na ito.

Upang matulungan ang mga estudyante na maging bukas sa impluwensya ng Espiritu Santo sa buong lesson na ito, hikayatin sila na pagnilayan ang mga sumusunod na tanong:

Ano ang alam mo tungkol sa Ama sa Langit na makatutulong sa iyo kung mayroon kang mga katulad na alalahanin?
Ano ang mga tanong mo tungkol sa Ama sa Langit?

Humingi ng tulong sa Panginoon upang malaman at madama ang Kanyang pagmamahal para sa inyo at para sa lahat ng Kanyang anak.

Ang pangitain ni Enoc tungkol sa mga taong hindi dinala sa langit

Maaari mong ibuod ang sumusunod sa sarili mong mga salita:

Alalahanin na sa pamamagitan ng tulong at patnubay ng Panginoon, itinatag ni Enoc ang lungsod ng Sion. Ang mga tao ng Sion ay nagkaisa sa Panginoon, namuhay sa kabutihan, at nagmalasakit sa isa’t isa (tingnan sa Moises 7:16–19). Sa isang pangitain, ipinakita ng Panginoon kay Enoc na dadalhin Niya ang mga tao ng Sion sa langit dahil sa kanilang pananampalataya at kabutihan (tingnan sa Moises 7:20–21). “Namalas din ni Enoc ang labi ng mga tao” (Moises 7:22), na tumutukoy sa mga taong naiwan sa mundo dahil ayaw nilang sundin ang Tagapagligtas.

Basahin ang Moises 7:23–26, at alamin ang nakita ni Enoc.

Ano ang nalaman ninyo tungkol kay Satanas?
Sa inyong palagay, bakit mahalagang maunawaan ang mga bagay na ito tungkol kay Satanas?

Nakita ni Enoc kung paano tumugon ang Diyos sa kasamaan

Pagkatapos ay nagkaroon ng nakakaantig na karanasan si Enoc nang mamalas niya ang Diyos na minamasdan ang mga tao na pinili ang hindi sumunod sa Kanya.

Maaari mong ipaliwanag na nakita ni Enoc si Jehova, o si Jesucristo. Mula pa noong Pagkahulog ni Adan, si Jehova ang nagpapakita at nakikipag-usap sa mga propeta. Sa mga pangyayaring ito, madalas Siyang magsalita na parang Siya ang Ama. Ang pagkakaisa ng Ama at ng Anak ay ganap kaya ang nadarama ng Tagapagligtas ay naglalarawan din sa nadarama ng Ama. Samakatwid, ang pag-aaralan ng mga estudyante tungkol sa pangitaing ito sa pagitan nina Enoc at Jehova ay makatutulong din sa kanila na makilala ang Ama sa Langit.

Habang binabasa ng mga estudyante ang mga sumusunod na talata, maaari mo silang hikayatin na magbasa nang dahan-dahan, tumigil sandali upang pagnilayan ang nabasa nila, at marahil ay basahin nang mahigit isang beses ang mga talata. Ang pagbabasa sa ganitong paraan ay makatutulong sa mga estudyante na maanyayahan ang Espiritu na dagdagan ang kanilang kaalaman tungkol sa kanilang Ama sa Langit.

Basahin ang Moises 7:28–33 at markahan ang mga salita o parirala na tumutulong sa inyo na mas makilala at maunawaan ang Ama sa Langit.

Ano ang natutuhan ninyo tungkol sa Diyos mula sa mga talatang ito?

Maaari mong isulat sa pisara ang “Ang Diyos …” at sabihin sa mga estudyante na tapusin ang pahayag na ito batay sa natutuhan nila. Maghikayat ng iba’t ibang sagot. Maaaring kasama sa mga sagot ang mga sumusunod:

ay mahal na mahal tayo (talata 28–33).
ang lumikha ng sansinukob ngunit ito ay nagagamit natin (talata 30).
ay makatarungan, maawain, at mabait (talata 30).
ang nagbigay sa atin ng kalayaang pumili (talata 32).
ay nagnanais na mahalin natin ang isa’t isa (talata 33).
ay nagnanais na piliin natin Siya (talata 33).

Habang ibinabahagi ng mga estudyante ang nalaman nila, maaari mong itanong pa ang mga sumusunod:

Bakit makabuluhan sa inyo ang katotohanang iyon tungkol sa Ama sa Langit?
Paano makatutulong na nalaman ninyo ang katotohanang iyon sa tao sa sitwasyong pinili ninyo? Paano kayo nito matutulungan?

Gamit ang karanasan ni Enoc, itinuro ni Pangulong Jeffrey R. Holland ng Korum ng Labindalawang Apostol na ipinapakita sa atin ng Tagapagligtas kung ano ang katangian ng Ama sa Langit at kung gaano Niya tayo kamahal. Ibinahagi niya ang sumusunod na pananaw tungkol sa Ama sa Langit:

Sa gitna ng magandang pangitain ng sangkatauhan na ipinakita ng langit kay Enoc, habang minamasdan ang mga biyaya at hamon ng mortalidad, lumingon siya sa Ama at nagulat na makita Siyang nananangis. Nagtataka at gulat niyang sinabi sa pinakamakapangyarihang Nilikha sa buong sansinukob: “Paanong kayo ay nananangis?” …

Mas malaki ang nagawa ng kaisa-isang nakaaantig na tagpong iyon sa pagtuturo ng tunay na katangian ng Diyos kaysa sa anumang naisulat sa relihiyon. …

Di malilimutan ang paglalarawang ito ng pagmamalasakit ng Diyos sa ating buhay! Napakasakit sa isang magulang kapag hindi Siya pinili ng Kanyang mga anak ni “ang ebanghelyo ng Diyos” na Kanyang ipinadala! [Mga Taga Roma 1:1]. Kaydaling mahalin ang taong lubos na nagmamahal sa atin! …

Pinatototohanan ko sa araw na ito ang isang buhay na Diyos, na nakaaalam sa ating pangalan, nakikinig at sumasagot sa mga dalangin, at walang hanggan tayong minamahal bilang mga anak ng Kanyang espiritu. (“Ang Kadakilaan ng Diyos,” Liahona, Nob. 2003, 72)

Anyayahan ang mga estudyante na ibahagi kung ano ang pinakanapansin nila mula sa pahayag ni Pangulong Holland.

Maaari mong isulat sa pisara ang mga sumusunod na tanong. Anyayahan ang mga estudyante na talakayin ang mga sumusunod na tanong sa maliliit na grupo. Sabihin din sa kanila na talakayin kung paano maiaangkop ang mga ideyang ito sa mga sitwasyong pinili nila sa simula ng lesson. Habang sumasagot ang mga estudyante, lumibot sa silid at pakinggan ang ilan sa kanilang mga tugon.

Sa inyong palagay, bakit nananangis ang Ama sa Langit para sa atin kapag hindi natin minamahal ang isa’t isa?
Bakit kaya tumatangis Siya para sa atin kapag hindi natin pinipiling sundin at mahalin Siya?
Ano ang ilang kasinungalingan na gusto ni Satanas na paniwalaan natin tungkol sa mga nadarama ng Diyos sa atin?

Matapos talakayin ng mga estudyante ang mga tanong na ito, maaari mong itanong kung ano ang narinig nila mula sa isa pang estudyante na makatutulong na ibahagi sa buong klase. Dahil dito muling napag-iisipang mabuti ng mga estudyante ang kanilang mga sagot habang pinupuri ang isa’t isa para sa kanilang mga sagot. Maaari mo ring banggitin ang mga kapaki-pakinabang na sagot na narinig mo.

Nakita ni Enoc ang buhay at misyon ng Tagapagligtas

Pagkatapos ay ipinakita ng Panginoon kay Enoc na ang mga taong naiwan sa lupa na hindi magsisisi ay masasawi sa isang baha (tingnan sa Moises 7:34–44). Bilang tugon, nanangis si Enoc. Pagkatapos ay inalo ng Panginoon si Enoc at sinabing, “Pasiglahin ang iyong puso, at magalak; at tumingin” (Moises 7:44).

Basahin ang Moises 7:44–47, at alamin ang ipinakita ng Panginoon kay Enoc upang aluin siya. Maaaring makatulong na malaman na ang pariralang “ang Mabuti” (talata 45 at 47) ay isang titulo para kay Jesucristo.

Sa inyong palagay, bakit magagalak ang kaluluwa ni Enoc kapag nakita niya ang mga bagay na ito? (talata 47).
Paano ipinapakita ang awa at pagmamahal ng Ama sa pamamagitan ng pagpapadala kay Jesucristo?

Kung makatutulong, maaari mong talakayin kung paano tutulungan ng Tagapagligtas ang lahat ng anak ng Diyos, maging ang mga taong masama at namatay sa Baha. Tulungan ang mga estudyante na maunawaan na bagama’t nasawi ang masasama sa Baha at kailangang magdusa para sa kanilang mga kasalanan sa daigdig ng mga espiritu, maaari pa rin silang magsisi sa pamamagitan ng Tagapagligtas (tingnan sa Moises 7:38–39; 1 Pedro 3:18–20).

Pagdama sa pagmamahal ng Diyos

Sa katapusan ng lesson, sabihin sa mga estudyante na humingi ng tulong sa pamamagitan ng Espiritu Santo habang ginagawa nila ang sumusunod na aktibidad. Bilang alternatibo, maaaring sumulat ang mga estudyante sa isang tao sa kanilang buhay na maaaring nangangailangang makadama ng awa at pagmamahal ng Ama sa Langit.

Sumulat ng liham para matulungan ang tao sa sitwasyong pinili ninyo sa simula ng lesson. Bilang bahagi ng inyong liham, ilagay ang sumusunod:

Ang natutuhan ninyo mula sa Moises 7 tungkol sa awa at pagmamahal ng Ama sa Langit. Isama ang ilang parirala o talata na sa palagay ninyo ay magiging partikular na makabuluhan.
Iba pang banal na kasulatan o karanasan na nakatulong sa inyo na madama ang awa at pagmamahal ng Diyos.
Mga karagdagang ideya na sa palagay ninyo ay maaaring makatulong sa taong ito na madama ang pagmamahal ng Diyos.

Tapusin ang lesson sa pamamagitan ng pag-anyaya sa mga estudyante na magbahagi ng kanilang mga naiisip, karanasan, at nadarama. Maaari mong idagdag ang iyong sariling patotoo tungkol sa pagmamahal ng Ama.

Karagdagang Resources

Sino ang nakita ni Enoc?

Nakita ni Enoc si Jehova, o Jesucristo, na kumikilos para sa Ama. Isa sa mga ibinunga ng Pagkahulog ay pinalayas ang tao sa kinaroroonan ng Ama (tingnan sa Moises 4:29, 31; 5:1, 4). Maliban sa pagpapakilala sa Kanyang Anak, ang mga pagpapakita ng Ama sa tao ay sa pamamagitan ng Anak (tingnan sa Joseph Fielding Smith, Doctrines of Salvation, 1:27). Sa pamamagitan lamang ng gawain ng Anak na si Jesucristo, muling makababalik ang tao sa kinaroroonan ng Ama (tingnan sa Alma 11:44; Helaman 14:15–17; Pagsasalin ni Joseph Smith, Juan 1:19).

Ipinaliwanag ni Pangulong Jeffrey R. Holland ng Korum ng Labindalawang Apostol:

Sa ilalim ng pamamahala at gamit ang awtoridad na ibinigay ng Ama (Elohim), ang Anak (si Jehova/Jesus) ay maaaring kumilos bilang Ama…. Si Cristo ay maaaring magsalita at kumilos para sa Ama sa anumang oras at lugar sa pamamagitan ng bisa ng “banal na pagkakaloob ng awtoridad” na ibinigay sa kanya ng Ama. (Christ and the New Covenant: The Messianic Message of the Book of Mormon [1997], 183–184)

Moises 7:28. Bakit nananangis ang Diyos?

Itinuro ni Pangulong M. Russell Ballard (1928-2023) ng Korum ng Labindalawang Apostol:

Tayo’y mga anak ng Diyos. Ang bawat isa sa atin ay mahalaga kung kaya’t nagagalak nang lubos ang Panginoong Diyos na Makapangyarihan kapag tayo’y matapat, at lumuluha, kung tayo’y di-tapat. (“Ang Pagbabayad-sala at ang Kahalagahan ng Isang Kaluluwa,” Liahona, Mayo 2004, 87)

Gaano tayo kamahal ng Diyos?

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Isipin ang pinakadalisay, pinakamatinding pag-ibig na mawawari ninyo. Ngayo’y paramihin nang husto ang pag-ibig na iyan—at ganyan kalaki ang pag-ibig ng Diyos sa inyo [tingnan sa Isaias 54:10; Jeremias 31:3].

… Kahit nagkukulang tayo, lubos tayong mahal ng Diyos. Kahit hindi tayo perpekto, sakdal ang pag-ibig Niya sa atin. Kahit nadarama nating naligaw tayo at walang gabay, yakap tayo ng pag-ibig ng Diyos.

Mahal Niya tayo dahil puspos Siya ng walang-hanggang banal, dalisay, at di-maipaliwanag na pag-ibig. Mahalaga tayo sa Diyos hindi dahil sa ating résumé kundi dahil tayo ay Kanyang mga anak. Mahal Niya tayong lahat, maging ang mga taong nagkasala, itinakwil, asiwa, malungkutin, o sawi. Napakalaki ng pag-ibig ng Diyos kaya mahal Niya kahit ang hambog, sakim, mayabang, at masama.

Ibig sabihin nito, anuman ang ating katayuan ngayon, ay may pag-asa tayo. Gaano man ang ating pangamba, kalungkutan, mga pagkakamali, hangad ng ating napakamahabaging Ama sa Langit na lumapit tayo sa Kanya para makalapit Siya sa atin [tingnan sa Doktrina at mga Tipan 88:63]. (“Ang Pag-ibig ng Diyos,” Liahona, Nob. 2009, 22–23)

Moises 7:30. Ano ang ibig sabihin ng pariralang “at gayon pa man kayo ay naroon”?

Ipinaliwanag ni Elder Neal A. Maxwell (1926–2004) ng Korum ng Labindalawang Apostol:

Si Enoc, na siyang binigyan ng Panginoon ng maraming paghahayag, ay pinapurihan ang Diyos para sa Kanyang hindi mabilang na nilikha, buong tiwalang ipinahayag, “Gayon pa man kayo ay naroon,” (Moises 7:30; tingnan din sa Jeremias 10:12).

Ang ganito ring pagtitiwala ay makatutulong sa bawat isa sa atin sa lahat ng panahon at kalagayan ng ating buhay. Ang Diyos ng buong sansinukob ay nagmamalasakit sa ating maliliit at personal na sansinukob ng karanasan! Sa gitna ng Kanyang napakalawak na mga kaharian, bilang Niya tayo, nakikilala Niya tayo, at minamahal Niya tayo nang lubusan (tingnan sa Moises 1:35; Juan 10:14). (“Yet Thou Art There,” Ensign, Nob. 1987, 30)

Mga Karagdagang Aktibidad sa Pag-aaral

Isang chart na pinaghahambing si Satanas at ang Diyos

Kung makikinabang ang mga estudyante kapag nakita nila ang pagkakaiba ni Satanas at ng Diyos, maaari kang gumawa ng chart na tulad ng sumusunod. Habang pinag-aaralan ng mga estudyante ang lesson, maaari nilang ilagay ang nalaman nila tungkol kay Satanas at sa Diyos.

Satanas	Diyos

Maaari mong sabihin sa mga estudyante na paghambingin ang mga column na napunan na at ibahagi ang pagbabagong naidudulot ng pag-unawa sa mga bagay na ito tungkol kay Satanas at sa Ama sa Langit.

Mga Titulo ng Tagapagligtas

Anyayahan ang mga estudyante na hanapin ang mga titulo ng Tagapagligtas sa Moises 7:39, 45, 47 at pag-aralan o pagnilayan ang kahulugan ng mga ito. Itanong sa mga estudyante kung ano ang natutuhan nila tungkol sa Tagapagligtas at kung bakit ito makabuluhan sa kanila.

Pag-unlad ni Enoc

Sabihin sa mga estudyante na ibahagi kung bakit gusto nila na maging higit na katulad ng Ama sa Langit at ni Jesucristo. Ipaliwanag na nang makita at makausap ni Enoc si Jesucristo, o Jehova, na nangungusap at kumakatawan sa Ama sa Langit, si Enoc ay naging higit na katulad Nila. Basahin ang Moises 7:28–52, at alamin ang mga paraan na nagsimulang makadama at kumilos si Enoc na tulad ng Ama sa Langit at ni Jesucristo. Kabilang sa ilang kabatiran ay na tulad ng Diyos, tumangis si Enoc para sa mga taong nagkasala (tingnan sa Moises 7:41, 44) at nagalak sa Pagbabayad-sala ni Jesucristo (tingnan sa Moises 7:45–47). Nagsumamo rin siya na kaawaan ang mga tao at hiniling sa Diyos na huwag magpadala ng isa pang baha pagkatapos ng kay Noe. Lubos na pumayag ang Diyos (tingnan sa Moises 7:50–51).