Tusi Lesona a le Faiaoga Seminare o le Feagaiga Tuai

Anotusi
Itulau Autu
Faatomuaga i le Tusi Lesona a le Faiaoga
Lesona o le Feagaiga Tuai
- Faafeiloai Atu Mai le Feagaiga Tuai
- Mose 1; Aperaamo 3
- Kenese 1–2; Mose 2–3; Aperaamo 4–5
- Kenese 3–4; Mose 4–5
- Kenese 5; Mose 6
- Mose 7
- Kenese 6–11; Mose 8
- Kenese 12–17; Aperaamo 1–2
- Kenese 18–23
- Kenese 24–33
- Kenese 37–41
- Kenese 42–50
- Esoto 1–6
- Eseta
- Esoto 7–13
- Esoto 14–18
- Esoto 19–20; 24; 31–34
- Esoto 35–40; Levitiko 1; 4; 16; 19
- Numera 11–14; 20–24; 27
- Teuteronome 6–8; 15; 18; 29–30; 34
- Iosua 1–8; 23–24
- Faamasino 2–4; 6–8; 13–16
- Ruta; 1 Samuelu 1–7
- 1 Samuelu 8–10; 13; 15–16
- 1 Samuelu 17–18; 24–26; 2 Samuelu 5–7
- 2 Samuelu 11–12; 1 Tupu 3; 6–9; 11
- 1 Tupu 12–13; 17–22
- 2 Tupu 2–7
- 2 Tupu 16–25
- 2 Nofoaiga a Tupu 14–20; 26; 30
- Esera 1; 3–7; Neemia 2; 4–6; 8
- Eseta
- Iopu 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Fa’ataoto 1–4; 15–16; 22; 31; Failauga 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Ieremia 1–3; 7; 16–18; 20
- Ieremia 31–33; 36–38; Auega 1; 3
- Esekielu 1–3; 33–34; 36–37; 47
- Tanielu 1–7
- Hosea; Ioelu
- Amosa; Opetaia; Iona
- Mika; Nauma; Sapakuka; Sefanaia
- Hakai 1–2; Sakaria 1–4; 7–14
- Malaki
Lesona o Sauniuniga mo le Olaga
- Atamai i Aoaoga Faavae: Mauaina o Tali i A’u Fesili
- Tomai i Suesuega o Tusitusiga Paia
- Taiala Mo Le Malosi o le Autalavou
- Atinaega o le Ola Tutoatasi o le Tagata Lava Ia
- Soifua Maloloina Faaletino ma Faalelagona
- Sauniuni mo Aoaoga ma Galuega i le Lumanai
- Faamanuiaina i le Aoga
- Sauniuniga Faafaifeautalai
- Sauniuniga mo le Malumalu
- Aoaoga a Taitai o le Ekalesia
Faaopoopoga

Mose 7:22–47: Faaaliga a Enoka

“Mose 7:22–47: Faaaliga a Enoka,” Tusi Lesona a le Faiaoga Seminare o le Feagaiga Tuai (2026)

“Mose 7:22–47: Faaaliga a Enoka,” Tusi Lesona a le Faiaoga Seminare o le Feagaiga Tuai

Mose 7: Lesona 17

Mose 7:22–47

Faaaliga a Enoka

Illustration depicting the City of Enoch being taken up.

O anafea na e lagonaina ai le alofa mutimutivale o le Atua i lou olaga? Na faaali atu e le Alii ia Enoka se faaaliga o le talafaasolopito o le lalolagi mai lona lava aso seia oo i le Meleniuma. Sa aoao Enoka i se auala loloto e uiga i le alofa patino o le Tama Faalelagi mo Ana fanau. O lenei lesona e mafai ona fesoasoani i tagata aoga ia lagonaina le alofa mutimutivale ma le alofa o le Atua mo Ana fanau uma.

Sauniuniga a le tagata aoga: Valaaulia tagata aoga e mafaufau i aafiaga ma mau e fesoasoani latou te iloa ai pe faape’ī le Tama Faalelagi. E mafai foi ona latou fesili atu i matua po o taitai faatuatuaina po o uo e faasoa mai ni aafiaga po o ni mau ia i latou. Valaaulia tagata aoga e o mai sauniuni e fefaasoaa’i.

Gaoioiga E Ono Mafai Ona Aoao Ai

Tauivi ia lagona le alofa mutimutivale ma le alofa o le Atua

Ina ia saunia tagata aoga e aoao atili e uiga i le Atua ma Ona uiga, faitau pe faaali atu tulaga faataitai nei:

Ua taumanatunatu Caleb pe e popole le Atua tau lava o tagata o loo faia le mea sao.

Ua popole Zoe atonu e toatamai le Atua e uiga i filifiliga o loo faia e se tasi e valalata ma ia. Ua popole o ia atonu e finagalo o Ia e faasala i latou.

E le manatu Olivia ua iai se taimi na ia lagonaina ai le alofa o le Atua.

Aisea e ono faapea ai lagona o nei tagata?

Filifili se tasi o nei tulaga faataitai e mafaufau loloto i ai a o e faaauauina lenei lesona.

Ina ia fesoasoani i tagata aoga ia gauai atu i le uunaiga a le Agaga Paia i lenei lesona atoa, uunaia i latou e mafaufau loloto i fesili nei:

O le a se mea ua e iloa e uiga i le Tama Faalelagi e mafai ona fesoasoani ia te oe pe afai o ia te oe ni atugaluga talitutusa?
O a ni fesili o ia te oe e uiga i le Tama Faalelagi?

Saili se fesoasoani mai le Alii ia iloa ma lagona Lona alofa mo oe ma Ana fanau uma.

O le faaaliga a Enoka ia i latou o e sa lei aveina a’e i le lagi

Mafaufau e aotele mea nei i au lava upu:

Manatua e ala i le fesoasoani ma le taitaiga a le Alii, na faatuina ai e Enoka le nuu o Siona. Sa autasi tagata o Siona i le Alii, sa ola i le amiotonu, ma tausia e le tasi le isi (tagai Mose 7:16–19). I se faaaliga vaaia, sa faaali atu ai e le Alii ia Enoka o le a Ia aveina ae le nuu o Siona i le lagi ona o lo latou faatuatua ma le amiotonu (tagai Mose 7:20–21). Sa “vaai [foi] Enoka i e na totoe o le nuu” (Mose 7:22), e faatatau i na tagata o e na tuua i luga o le fogaeleele ona sa latou le mulimuli i le Faaola.

Faitau le Mose 7:23–26, ma vaavaai mo mea na vaai i ai Enoka.

O le a se mea ua e aoaoina e uiga ia Satani?
Aisea e te manatu e taua ai le malamalama i nei mea e uiga ia Satani?

Ua vaai Enoka i le ala e tali ai le Atua i le amioleaga

Ona maua lea e Enoka se aafiaga agamalu a o ia vaavaai atu i le Atua o silasila atu i tagata o e na filifili e le usiusitai ia te Ia.

Atonu e te manao e faamalamalama atu na vaai Enoka ia Ieova, po o Iesu Keriso. Talu mai lava le Pa’ū o Atamu, o Ieova o lē e faaali mai ma talanoa ma perofeta. I nei tulaga, e masani ona Ia fetalai e peiseai o Ia lava o le Tama. O le autasi o le Tama ma le Alo o se mea e faapea ai o lagona o le Faaola e avea ma sui foi i le Tama. O le mea lea, o mea o le a suʻesuʻeina e tagata aʻoga e uiga i lenei faʻaaliga i le va o Enoka ma Ieova e mafai foi ona fesoasoani ia i latou e aʻoaʻo ai e uiga i le Tama Faalelagi.

A o faitau e tagata aoga fuaiupu nei, atonu e te uunaia i latou e faitau lemu, faatali e mafaufau loloto i mea latou te faitauina, ma atonu e faitau fuaiupu e sili atu ma le faa-tasi . O le faitau ai i lenei auala e mafai ona fesoasoani i tagata aoga e valaaulia ai le Agaga e aoao atili ia i latou e uiga i lo latou Tama Faalelagi.

Faitau le Mose 7:28–33 ma faailoga upu po o fasifuaitau e fesoasoani e te iloa ai ma malamalama lelei atili ai i le Tama Faalelagi.

O le a se mea ua e aoaoina e uiga i le Atua mai nei fuaiupu?

Mafaufau e tusi le “Atua …” i luga o le laupapa ma fai i le vasega e faauma le faamatalaga lenei i mea sa latou aoaoina. Uunaia ni tali eseese. O nisi o tali e ono aofia ai:

alofa loloto ia i tatou (fuaiupu 28–33).
foafoaina le atulaulau ae o loo avanoa mo i tatou (fuaiupu 30).
e tonu, alofa mutimutivale, ma agalelei (fuaiupu 30).
tuuina mai ia i tatou le faitalia (fuaiupu 32).
finagalo ia tatou fealofani (fuaiupu 33).
finagalo ia tatou filifilia o Ia (fuaiupu 33).

A o faasoa mai e tagata aoga mea na latou maua, mafaufau e fai atu fesili tulitatao e pei o le:

Aisea e anoa ai lena upumoni e uiga i le Tama Faalelagi ia te oe?
E mafai faapefea e le iloaina o lena upumoni ona fesoasoani i le tagata i le tulaga faataitai na e filifilia? E mafai faapefea ona fesoasoani lena mea ia te oe?

I le faaaogaina o le aafiaga o Enoka, na aoao mai ai Peresitene Jeffrey R. Holland o le Korama a Aposetolo e Toasefululua e faapea, ua faaali mai e le Faaola ia i tatou pe faapei le Tama Faalelagi ma le tele o Lona alofa ia i tatou. Sa ia faasoa mai lenei malamalamaaga e uiga i le Tama Faalelagi:

I le totonugalemu o se faaaliga maoae o tagata ola na tatalaina e le lagi i lana vaai, na maitauina ai e Enoka faamanuiaga ma luitau o le olaga nei, na liliu atu ai lana vaai i le Tama ma ua faateia i le vaai atu ia te Ia o loo tutulu. Na ia fai ane ma le ofo ma le maofa i lenei Tagata pito sili ona mamana i le atulaulau: “Pe ua mafai faapefea ona e tutulu?” …

O lena vaaiga maoae e tasi, ua sili atu ona aoao mai ai le natura moni o le Atua nai lo soo se isi lava tusitusiga faalelotu e mafai ona faailoa mai. …

O se faatusa e le mafaagaloina o le aafiaga o le Atua i o tatou olaga! O se mea tiga tele i se matua pe afai e le filifilia e Lana fanau o Ia po o le “talalelei a le Atua” na Ia auina mai! [Roma 1:1]. E maeu le faigofie ona alofa i se tasi o le ua faapito le alofa ia i tatou! …

Ou te tuuina atu i lenei aso le molimau patino i se Atua soifua, o le ua silafia o tatou igoa, e faafofoga ma tali mai i talosaga, ma e faapelepele ia i tatou e faavavau o fanau a Lona agaga. (”O Le Silisiliese o le Atua,” Liahona, Nov. 2003, 72)

Valaaulia tagata aoga e faasoa mai se mea na tūmātila ia i latou mai lenei faamatalaga a Peresitene Holland.

Mafaufau e tusi fesili nei i luga o le laupapa. Valaaulia tagata aoga e talanoaina fesili nei i ni vaega toalaiti. Valaaulia foi i latou e talanoaina pe faapefea ona faatatau nei manatu i tulaga faataitai na latou filifilia i le amataga o le lesona. A o tali mai tagata aoga, savalivali solo i le potu ma faalogologo i nisi o a latou tali.

Aisea e te manatu ai e tutulu le Tama Faalelagi mo i tatou pe a tatou le fealofani?
Aisea e ono tutulu ai o Ia mo i tatou pe a tatou le filifili e mulimuli ma alolofa ia te Ia?
O a nisi o pepelo e manao Satani tatou te talitonu i ai e uiga i lagona o le Atua ia i tatou?

A uma ona talanoaina e tagata aoga nei fesili, mafaufau e fesili atu po o a mea na latou faalogo i ai mai se isi tagata aoga o le a aoga ona faasoa mai i le vasega atoa. O lenei mea e mafai ai e tagata aoga ona iloilo ia tali a o faamalo atu foi le tasi i le isi mo a latou tali. E mafai foi ona e faailoa atu ni tali aoga na e faalogo i ai.

Ua vaai Enoka i le soifuaga ma le misiona a le Faaola

Ona faaali atu lea e le Alii ia Enoka e faapea o tagata na totoe i le lalolagi o e o le a le salamo o le a fano i se lolo (tagai Mose 7:34–44). I le tali atu i ai, sa tagi Enoka. Ona faamafanafanaina lea e le Alii o Enoka, ma fetalai atu, “Ia sii a’e lou loto, ma fiafia; ma vaai” (Mose 7:44).

Faitau le Mose 7:44–47, ma vaavaai po o a mea na faaali e le Alii ia Enoka e faamafanafana ai o ia. Atonu e fesoasoani le iloa o “le Amiotonu” (fuaiupu 45 ma 47) o se suafa mo Iesu Keriso.

Aisea e te manatu ai o le vaaia ai o nei mea o le a mafua ai ona olioli le agaga o Enoka? (fuaiupu 47).
E faapefea e le auina mai o Iesu Keriso ona faaalia ai le alofa mutimutivale ma le alofa o le Tama?

Afai e aoga, e mafai ona tou talanoaina pe faapefea ona fesoasoani le Faaola i fanau uma a le Atua, e oo lava i tagata na amioleaga ma maliliu i le Lolo. Fesoasoani ia malamalama tagata aoga e ui ina fano e amioleaga i le Lolo ma o le a puapuagatia mo a latou agasala i le lalolagi o agaga, ae e mafai lava ona latou salamo e ala i le Faaola (tagai Mose 7:38–39; 1 Peteru 3:18–20).

Lagonaina o le alofa o le Atua

Ina ia faaiu, valaaulia tagata aoga e saili le fesoasoani e ala i le Agaga Paia a o latou faia le gaoioiga lenei. I se isi foi faiga, e mafai e tagata aoga ona tusi atu i se tasi i o latou olaga atonu e manaomia ona lagonaina le alofa mutimutivale ma le alofa o le Tama Faalelagi.

Tusi se tusi e fesoasoani ai i le tagata i le tulaga faataitai na e filifilia i le amataga o le lesona. I le avea ai ma se vaega o lau tusi, faaaofia ai mea nei:

O mea na e aoaoina mai le Mose 7 e uiga i le alofa mutimutivale ma le alofa o le Tama Faalelagi. Ia aofia ai ni fasifuaitau po o ni fuaiupu patino e te lagona o le a faapitoa le anoa.
O isi mau po o aafiaga na fesoasoani ia te oe e lagona ai le alofa mutimutivale ma le alofa o le Atua.
O manatu faaopoopo e te manatu e mafai ona fesoasoani i lenei tagata ia lagona ai le alofa o le Atua.

Faaiu i le valaaulia o tagata aoga e faasoa mai o latou manatu, aafiaga, ma lagona. Mafaufau e faaopoopo atu lau oe lava molimau e uiga i le alofa o le Atua.

Punaoa Faaopoopo

O ai na vaai i ai Enoka?

Na vaai Enoka ia Ieova, po o Iesu Keriso, o suitulaga mo le Tama. O se tasi o taunuuga o le Pa’ū o le tuliesea lea o tagata mai luma o le Tama (tagai Mose 4:29, 31; 5:1, 4). Seia vagana ai le faalauiloaina o Lona Alo, o [taimi uma e] faaali mai ai le Tama i le tagata o le a ala mai lea i le Alo (tagai i le Joseph Fielding Smith, Doctrines of Salvation, 1:27). E na o le galuega lava a le Alo, o Iesu Keriso o le a ala ona mafai ai e tagata ona toe maua le afioaga o le Tama (tagai Alema 11:44; Helamana 14:15–17; Faaliliuga a Iosefa Samita, Ioane 1:19).

Sa faamalamalama mai e Peresitene Jeffrey R. Holland o le Korama a Aposetolo e Toasefululua:

I lalo o le taitaiga ma faatasi ai ma le pule na tuuina atu e le Tama (Elohima), mafai ai ona suitulaga le Alo (Ieova/Iesu) i le Tama…. E mafai e Keriso i soo se taimi ma i soo se nofoaga ona fetalai ma suitulaga mo le Tama e ala i le mana o le “faauiina paia o le pule” ua tuuina atu e le Tama ia te ia. (Christ and the New Covenant: The Messianic Message of the Book of Mormon [1997], 183–184)

Mose 7:28. Aisea e tutulu ai le Atua?

Na aoao mai Peresitene M. Russell Ballard (1928–2023) o le Korama a Aposetolo e Toasefululua:

O i tatou o fanau a le Atua. E taua i tatou taitoatasi i le tulaga o le aumaia o le Alii le Atua Silisiliese i se atoatoaga o le olioli pe afai tatou te faamaoni, po o loifofoga pe afai tatou te le [faamaoni]. (“O le Togiola ma le Taua o le Agaga e Tasi,” Liahona, Me 2004, 87)

O le a le tele o le alofa o le Atua ia i tatou?

Sa aoao mai Peresitene Dieter F. Uchtdorf, a o i ai i le Au Peresitene Sili:

Mafaufau i le alofa sili ona mama, sili ona aoao-tetele e mafai ona e mafaufauina. Ia faatele lena alofa e ala i se aofaiga e le iu—o le fuataga lena o le alofa o le Atua mo oe [tagai Isaia 54:10; Ieremia 31:3].

… E ui tatou te le atoatoa, ae alofa atoatoa le Atua ia i tatou. E ui lava tatou te le atoatoa, ae e alofa atoatoa o Ia ia i tatou. E ui atonu tatou te lagona ua tatou se ma leai se tapasā, ae siomia atoa lava i tatou i le alofa o le Atua.

E alofa o Ia ia te i tatou aua ua tumu o Ia i se fuataga e le uma o le alofa paia, mama, ma le le mafaamatalaina. E tāua i tatou i le Atua e lē ona o a tatou ausiaga ae ona o i tatou o Lana fanau. E alofa o Ia ia i tatou uma, e oo lava ia i latou o e sese, teenaina, faafaigata, faanoanoa, pe nutimomoia. E maoae tele le alofa o le Atua lea e alofa ai o Ia e oo lava i e faamaualuga, manatu faapito, o e faasausili, ma e amioleaga.

O le uiga o lenei mea e faapea, e tusa lava po o le a lo tatou tulaga o i ai nei, o loo i ai le faamoemoe mo i tatou. E tusa lava po o le a lo tatou puapuaga, e tusa lava po o le a lo tatou faanoanoa, e tusa lava po o a a tatou mea sese, e finagalo lo tatou Tama Faalelagi alofa le mavae, ia tatou faalatalata atu ia te Ia ina ia mafai ai ona Ia faalatalata mai ia i tatou [tagai Mataupu Faavae ma Feagaiga 88:63]. (“O Le Alofa o le Atua,” Liahona, Nov. 2009, 22–23)

Mose 7:30. O le a le uiga o le fasifuaitau “ae peitai o loo i ai oe iina”?

Na faamalamalama mai e Elder Neal A.Maxwell (1926–2004) o le Korama a Aposetolo e Toasefululua:

O Enoka, o le sa faaali i ai e le Alii le tele o mea, sa viia le Atua i le lotolotoi o Ana foafoaga tetele, ma alaga atu ma le mautinoa, “Peitai o loo i ai oe iina” (Mose 7:30; tagai foi Ieremia 10:12).

O lenei lava faamautinoaga faapitoa e tasi e mafai ona vaaia ai i tatou taitoatasi i vaitau uma ma tulaga o o tatou olaga. O se Atua o le atulaulau o loo aofia moni i o tatou aafiagalaiti ma i vaipanoa taitoatasi! I le lotolotoi o Ana puleaga tetele, ae e faitauina e Ia o i tatou, silafia i tatou, ma alofa atoatoa ia i tatou (tagai Mose 1:35; Ioane 10:14). (“Yet Thou Art There,” Ensign, Nov. 1987, 30)

Gaoioiga Faaopoopo e Aoao Ai

O se siata e faatusatusa ai Satani ma le Atua

Afai o le a manuia tagata aoga mai le vaaia o le eseesega i le va o Satani ma le Atua, mafaufau e fai se siata e pei o lenei. A o faasolo e tagata aoga i le lesona, e mafai ona latou faatumuina mea ua latou aoaoina e uiga ia Satani ma le Atua.

Satani	Atua

E mafai ona e valaaulia tagata aoga e faatusatusa ia koluma ua faatumuina ma faasoa mai le eseesega e faia e lena mea i o latou olaga ia malamalama ai i nei mea e uiga ia Satani ma le Tama Faalelagi.

Faalagiga o le Faaola

Valaaulia tagata aoga e sue ia faalagiga o le Faaola i le Mose 7:39, 45, 47 ma suesue pe mafaufau loloto pe o a o latou uiga. Fesili i tagata aoga po o a mea na latou aoaoina e uiga i le Faaola ma pe aisea e taua ai ia i latou.

Alualu i luma o Enoka

Valaaulia tagata aoga e faasoa mai pe aisea latou te mananao ai ia avea atili e faapei o le Tama Faalelagi ma Iesu Keriso. Faamalamalama atu a o vaai ma talanoa Enoka ma Iesu Keriso, po o Ieova, o le sa fetalai ma fai ma sui o le Tama Faalelagi, sa avea atili Enoka e pei o i Laua. Faitau le Mose 7:28–52, ma vaavaai mo auala na amata ona lagona ma faia e Enoka e faapei o le Tama Faalelagi ma Iesu Keriso. O nisi malamalamaaga e aofia ai le, e faapei o le Atua, sa tagi Enoka mo tagata na agasala (tagai Mose 7:41, 44) ma olioli i le Togiola a Iesu Keriso (tagai Mose 7:45–47). Sa ia aioi atu foi mo le alofa mutimutivale mo tagata ma ole atu i le Atua e aua nei auina mai se isi lolo i le mavae ai o Noa. Sa matua finagalo malie i ai le Atua (tagai Mose 7:50–51).