Eperu 11, Part 1
Faatuatua ia Iesu Keriso
E toatele tagata e talanoa e uiga i le i ai o le faatuatua—ia i latou lava, i isi, ma e oo lava i mea e tutupu po o mea faitino. O lea la, o le a le mea e avea ai le i ai o le faatuatua ia Iesu Keriso ma se faasili malosi ma le taua? I le Eperu 11 tatou te faitau ai i aoaoga a le Aposetolo o Paulo i le atinaeina o le faatuatua ia Iesu Keriso. O lenei lesona o le a fesoasoani e te malamalama ai po o le a le faatuatua ia Iesu Keriso ma pe aisea e taua ai ia te oe lava ia.
O le faamautinoa o le faatuatua ia Iesu Keriso
-
O le a sau tala e fai pe a fesili atu se tasi ia te oe po o le a le faatuatua?
Tusi lau faauigaga i lau api faamaumau mo suesuega po o se faamatalaga faatekonolosi. Mafaufau e fai ni suiga po o ni faaopoopoga i lenei faauigaga ma tusifaamaumau isi manatu ma uunaiga a o e suesue i le asō.
Faitau le Eperu 11:1 ma maka pe na faapefea ona faauigaina e le Aposetolo o Paulo le faatuatua. Atonu e fesoasoani le iloa o le Faaliliuga a Iosefa Samita o lenei fuaiupu, na suia ai e le Perofeta le upu faalagolago i le mautinoa, o se upu o lona uiga o le mautinoa po o le talitonu (tagai Eperu 11:1, vaefaamatalaga e).
-
O le a sou manatu i le uiga o le i ai o le mautinoa po o le talitonu i mea e te faamoemoe i ai?
-
E mafai faapefea ona i ai se faamaoniga o mea e le mafai ona e vaaia?
-
E faavae i lenei fuaiupu, e ono faapefea ona e suia pe faaopoopo i lau faauigaga o le faatuatua?
O se tasi o upumoni faigofie o loo aoao mai i le Eperu 11:1 e faapea, o le faatuatua o le faalagolago lea i mea ua faamoemoe i ai, o le mautinoa lea o mea e le o vaaia.
Faitau le Alema 32:21 ma le Mataupu Faavae o le Faatuatua 1:4, ma vaavaai mo malamalamaaga faaopoopo e uiga i le faatuatua. Atonu e te manao e fefaasinoa’i pe faafesootai fuaiupu nei e lua i le Eperu 11:1.
-
O le a se isi mea na e aoaoina e uiga i le faatuatua?
-
E ono faapefea ona e suia pe faaopoopo i lau faauigaga o le faatuatua ona o mea ua e aoaoina?
O se tasi o auala e fetuunai ai le faamatalaga talu ai o le upumoni o le faatuatua ia Iesu Keriso o le mautinoa lea o mea ua faamoemoe i ai, o le faamaoniga o mea e le o vaaia ae moni.
-
O le a sou manatu e faapefea ona ese le i ai o le faatuatua ia Iesu Keriso nai lo le i ai o le faatuatua i se tasi tagata po o se isi mea?
-
E mafai faapefea e lou faatuatua ia Iesu Keriso ona fesoasoani ia te oe e faatuatuaina ai o Ia pe a e feagai ma fesili po o le le mautonu?
Faaloloto atili lou malamalama i le faatuatua ia Iesu Keriso.
Toe manatunatu i ou lagona e uiga i lou lava faatuatua ia Iesu Keriso. O a ni auala e te lagona ai o loo malosi lou faatuatua ia te Ia? O a ni auala e te lagona e mafai ona malosi atili ai lou faatuatua ia te Ia?
Ua aoao mai Elder Neil L. Andersen o le Korama a Aposetolo e Toasefululua:
O le faatuatua e le faafuasei ona oo mai i o tatou luga pe e tumau foi ia i tatou e ala i se tofi tuufaasolo. … O le faatuatua ia Iesu Keriso o se meaalofa mai le lagi lea e oo mai, a o tatou filifili e talitonu ma a o tatou sailia ma uumau i ai. O lou faatuatua a le o tuputupu malosi pe faasolo ina vaivai. O le faatuatua o se mataupu faavae o le mana, e taua e le gata i lenei olaga, ae faapea foi i lo tatou alualu i luma i talaatu o le veli. E ala i le alofa tunoa o Keriso, o le a i ai se aso e laveaiina ai i tatou e ala i le faatuatua i Lona suafa [tagai i le Efeso 2:8]. O le lumanai o lou faatuatua e le tupu faafuasei ae e ala i filifiliga.
(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Nov. 2015, 65)
-
O le a se mea sa tumatila ia te oe mai upu a Elder Andersen?
-
O le a se mea ua ia fesoasoani ia te oe e malamalama ai e uiga i le faatuatua ia Iesu Keriso?
Faaalu se taimi e aoao atili ai e uiga i le faatuatua ia Iesu Keriso e ala i le suesueina o nisi o punaoa nei. Faamaumau ou manatu i lau api faamaumau mo suesuega. Ia magafagafa, ma valaaulia le Agaga Paia e fesoasoani ia te oe e aoao mea e te manaomia i le aso.
Faamaea le gaoioiga lenei, ma uta i luga se aotelega i ni fuaiupu se tolu-i le-lima o le mea sa anoa ia te oe.
1. Faamaea le gaoioiga lenei, ma ia faaaofia i lau api faamaumau mo suesuega se aotelega i ni fuaiupu se tolu-i le-lima o mea e anoa ia te oe.
Atonu e te manao e mafaufau e uiga i fesili nei po o ni au lava fesili a o e suesue:
-
O le a le uiga ia te au o le faatuatua ia Iesu Keriso?
-
Aisea e taua ai lo‘u atinae o le faatuatua ia te Ia?
-
O le a se mea e mafai ona ou faia e faateleina ai loʻu faatuatua ia Iesu Keriso?
O mau fautuaina ma fesoasoaniga mo suesuega
-
Bible Dictionary po o le Taiala i Tusitusiga Paia, “ Faatuatua ”
E mafai ona e maua isi punaoa i tusitusiga paia po o le polokalama o le Potutusi o le Talalelei e ala i le sailia o le faaupuga “Faatuatua ia Iesu Keriso.”
Manatu fautuaina mai taitai o le Ekalesia
-
Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–4
-
Neil L. Andersen, “O Le Faatuatua E Le Tupu Faafuasei, ae e ala i Filifiliga,” Liahona, Nov. 2015, 65–68
-
Richard C. Edgley, “Faatuatua—o le Filifiliga e A Oe Lea,” Ensign po o le Liahona, Nov. 2010, 31–33
Tuu i le faitalia: O e Manao e Aoao Atili?
Aisea e taua ai le tuu atu o lo‘u faatuatua ia Iesu Keriso?
Na fautua mai Peresitene Russell M. Nelson:
Pe a tatou talanoa e uiga i le faatuatua—le faatuatua lea e mafai ona aveesea ai mauga—tatou te le o talanoa i le faatuatua i se tulaga lautele ae o le faatuatua i le Alii o Iesu Keriso. …
Tatou te ono fesili ia i tatou lava taitoatasi, po o fea lo tatou faatuatua? O i ai i se au [taalo]? O i ai i se ituaiga o oloa? O i ai i se tagata lauiloa? E oo lava i au [taalo] e silisili ona lelei e mafai ona toilalo. E mafai ona mou ese atu tagata lauiloa. Ua na o le Tasi lava le tagata e saogalemu ai i taimi uma lou faatuatua, o le Alii o Iesu Keriso.
(Russell M. Nelson, “Ia Faaali Atu Lou Faatuatua,” Liahona, Me 2014, 29)
Aisea e tatau ai ona ou taumafai e faateleina lo’u faatuatua ia Iesu Keriso?
Na aoao mai Peresitene Russell M. Nelson:
O la‘u valaau ia te outou … o le ia amata i le asō ona faateleina lou faatuatua. E ala i lou faatuatua, o le a faateleina ai e Iesu Keriso lou gafatia e aveese ai mauga i lou olaga, [tagai i le 1 Nifae 7:12], e ui ina faamalumalu ifo ni ou lu’itau patino e pei le tetelē o le Mauga o Everesi.
O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga ae o le tali i ou lu’itau taitasi o le faateleina lea o lou faatuatua. E manaomia ai galuega. …
O le faatuatua ia Iesu Keriso o le mana silisili lea ua avanoa mo i tatou i lenei olaga. E mafaia mea uma ia i latou o ē talitonu [tagai i le Mareko 9:23].
(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 102–3, 104)
O le a se mea e manaomia ona ou faia e aoao ai e ala i le faatuatua?
Na saunoa Elder David A.Bednar o le Korama a Aposetolo e Toasefululua:
O aafiaga [o le olaga] ua mafai ai ona ou malamalama o se tali e aumai i se isi tagata e masani lava e le umi se taimi e manatua ai, pe afai lena e manatua. Peitai o se tali tatou te iloaina pe mauaina e ala i le faatinoina o le faatuatua, e masani lava ona tumau i le olaga atoa. O aoaoga aupito taua o le olaga e puemauina—e le aotauina.
O le malamalama faaleagaga ua faamanuiaina ai oe ma au e maua, ma ua faamautuina ai e moni i o tatou loto, e le mafai lava ona tuuina atu i se isi tagata. O le pili o le filiga ma le aoao e ala i le faatuatua, e tatau ona totogi ina ia maua ai ma “onaina” totino sea malamalama. E na o le pau lea o le auala e mafai ai e se mea ua iloa i le mafaufau ona liua e avea o se mea ua lagonaina i le loto. E na o le pau lea o le ala e mafai ai e se tagata ona siitia i talaatu o le faalagolago i le malamalama faaleagaga ma aafiaga o isi tagata ae latou tapā ai na faamanuiaga mo i latou lava. E na o le pau lea o le auala e mafai ai ona tatou saunia faaleagaga mo le mea o le a oo mai. E tatau ona tatou “saili i le aoaoga, e faapea foi i le suesue ma le faatuatua” (MF&F 88:118).
(David A. Bednar, “Saili e Aoao e Ala i le Faatuatua,” Ensign, Sept. 2007, 67)
E mafai faapefea e le faatuatua ia Iesu Keriso ona aafia ai lo‘u olaga i aso taitasi?
Matamata le vitio “Campfires of Faith” (3:25), lea na faasoa mai ai e Elder Gerrit W. Gong o le Korama a Aposetolo e Toasefululua ma isi mea ua latou aoaoina e uiga i le faatuatua ia Iesu Keriso. O loo maua lenei vitiō i le ChurchofJesusChrist.org.