Eperu 12

“O Le Ua Alofagia e le Alii, e Aoai Atu o Ia ia te Ia”

O se aiga talavou i Niu Sila o loo taaalo ma taliē ma a latou fanau i fafo o lo latou fale. O loo latou taaalo pasiketipolo, sii tamaiti ma talie ma matamata i se tamaitiiti laitiiti o tietie i se uila pa’utolu.

O le a le taimi mulimuli na aoaiina pe faasa‘oina ai oe e se tasi? Na faapefea ona e tali atu i ai? Pe na e faafetai ea mo aoaiga na e mauaina? Sa tusi atu Paulo i le Au Paia i Eperu ma faamatala atu ia i latou e masani ona faaali mai e lo tatou Tama Faalelagi Lona alofa e ala i le faasa’oina o i tatou. O lenei lesona e mafai ona fesoasoani ia te oe e aoao ai o le ua’i atu ma le lotomaualalo i le faasa’oga mai le Tama Faalelagi e mafai ona fesoasoani e te maua ai le filemu ma avea atili ai e faapei o Ia.

O le tausinioga o le olaga

Auala mo Tagata Afeleti po o le Auala Tamoe faatasi ma se vaaiga manaia

I lau api faamaumau mo suesuega, fai se lisi o auala e pei ai lou olaga faaletino o se tuugatamoe mamao. Mo se faataitaiga, e mafai ona e tali fesili nei:

O le a se mea e te lagona ai le lelavā po o le vaivai?
O a nisi o auala o loo lelei ai lau [tamoe] i le tuuga ma ni auala e mafai ona e faaleleia atili?
O le a le tini o loo e tamoe agai i ai? Aisea e manaomia ai?
Aisea e te manaomia ai le fesoasoani i le faamae’aina o le tausinioga o le olaga?

“Taufetuli ma le onosai”

Sa faatusaina e le Aposetolo o Paulo o tatou olaga i se tuugatamoe. Faitau le Eperu 12:1–2, ma vaavaai mo mea na aoao mai e Paulo e uiga i le ala e mafai ai ona tatou tamomoe ma le manuia i le taufetuliga o le olaga. Maitau o le “faapotopotoga o e matamata mai” o loo ta‘ua i le fuaiupu 1 e faasino i faataitaiga o le faatuatua o loo tusia i le Eperu 11.

O le a se mea e tumatila ia te oe i nei fuaiupu?
E faapefea e le mulimuli i le fautuaga a Paulo ona fesoasoani ia i tatou e tamomoe ai ma le manuia i le taufetuliga o le olaga?

Na tusia e Paulo i le fuaiupu 2 e faapea, na onosaia e le Faaola le luitau o le faasatauroga e ala i le taulai atu i “le olioli sa tuu i Ona luma” (Eperu 12:2). Na faamatala mai e Peresitene Russell M. Nelson:

17:1

O le a le olioli lea sa tuu i Ona luma? E mautinoa lava na aofia ai le olioli i le faamamaina, faamaloloina, ma le faamalosia o i tatou; o le olioli i le togisalaina o agasala a tagata uma o le a salamo; o le olioli o le a mafai ai e oe ma a’u ona toe foi atu i le aiga—i le mama ma le agavaa—e nonofo ma o tatou Matua Faalelagi ma aiga.

(Russell M. Nelson, “O Le Olioli ma le Ola ai Faaleagaga,” Liahona, Nov. 2016, 83)

O le a se mea o aoao mai ia te oe e le taulaiga a le Faaola i le taimi o Lona Faasatauroga e uiga i Ona lagona e faatatau ia te oe?
E mafai faapefea e le iloaina o lenei mea e uiga ia Iesu Keriso ona fesoasoani ia te oe e lagona ai le olioli e oo lava i taimi faigata?
O a nisi o olioliga e mafai ona e taulai atu i ai i taimi faigata i lou olaga?

Onosaia o aoaiga mai le Alii

Mafaufau i se taimi na faasa’o ai oe e se tasi ma pe na faapefea ona e tali atu i lena faasa’oga.

O a nisi o mafuaaga na faasa’oina ai oe e tagata?
Aisea e faigata ai i nisi o taimi ona faasa’oina e isi?
O anafea na e faafetai ai mo nisi o faasa’oga na e mauaina? Aisea?

Faitau le Eperu 12:5–7, 9–11, ma vaavaai mo mea na aoao mai e Paulo e uiga i le aoaiga po o lefaasa‘oga.

O leEperu 12:9 o se fuaitau o le atamai i aoaoga faavae. Mafaufau e faailoga fuaitau o mau o le atamai i aoaoga faavae i se auala iloga ina ia mafai ai ona e maua gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

O a mea o loo aoao mai e nei fuaiupu e uiga i le faamoemoega o le Tama Faalelagi mo le aoaiina o i tatou?

Toe faamanatu le Eperu 12:10–11 ma vaavaai pe mafai faapefea ona e faamae’aina le upumoni lenei:

Afai tatou te gauai atu i le aoaiga mai le Tama Faalelagi …

O se tasi nei o auala e mafai ona e faauma ai lenei upumoni: Afai tatou te gauai atu i le aoaiga mai le Tama Faalelagi, o le a avea atili i tatou e faapei o Ia ma maua le filemu lea e oo mai mai le amiotonu.

Na tuuina mai e Elder D. Todd Christofferson o le Korama a Aposetolo e Toasefululua ia malamalamaaga nei e uiga i aoaiga tatou te maua mai le Alii:

E tolu faamoemoega o aoaiga faalelagi: (1) ia faaoleole i tatou ia salamo, (2) ina ia faamamaina ma faapaiaina i tatou, ma le lona (3) i taimi e toe faatonutonu ai o tatou ala o le olaga i le mea ua silafia e le Atua o se ala e sili atu ona lelei. …

… Afai tatou te naunau e talia, o aoaiga manaomia o le a oo mai i le tele o foliga ma mai le tele o auala. Atonu e oo mai i le ala o a tatou tatalo, a o fetalai mai le Atua i o tatou mafaufau ma loto e ala i le Agaga Paia [tagai i le Mataupu Faavae ma Feagaiga 8:2]. Atonu e oo mai e ala i le tatalo ua taliina i le leai pe ese foi nai lo le mea na tatou faamoemoeina. Atonu e oo mai aoaiga a o tatou suesue i tusitusiga paia, ma faamanatu mai ai le le atoatoa, le le usiusitai, po o mea ua tatou faatamala ai.

(D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Liahona, Me 2011, 98, 100)

E faavae i le saunoaga a Elder Christofferson, o a nisi o auala e ono aoai pe faasa’o ai i tatou e le Tama Faalelagi?

A mafai, matamata i le “The Will of God” (3:01) e vaai pe na faapefea ona fesoasoani ia Peresitene Hugh B. Brown (1883–1975) o le Au Peresitene Sili le aoaiga a le Atua. E mafai ona maua lenei vitio i le ChurchofJesusChrist.org.

2:59

O a ni ou mafaufauga po o ni lagona a o e matamata i lenei vitio e mafai ona fesoasoani ia te oe i lou olaga?
E mafai faapefea e le gauai atu i le aoaiga mai le Tama Faalelagi ona aumaia le filemu ma fesoasoani ia te oe ia avea atili e faapei o Ia?
O a ni aafiaga na oo ia te oe lea na fesoasoani ai le aoaiga a le Tama Faalelagi e te maua ai le filemu pe avea atili ai e faapei o Ia?
Na faapefea e lenei aafiaga ona tosina ai ou lagona mo Ia?

Tusitusi i luga o se fasipepa i se peni po o se penitala.

Tuu i le faitalia: O e Manao e Aoao Atili?

Ae a pe afai ou te lagona ua ou pa‘ū i tua mai o isi i le tausinioga o le olaga?

Sa faamalamalama mai e Elder Jeffrey R. Holland o le Korama a Aposetolo e Toasefululua:

Tatou te le o i ai i se tū’uga e faasaga le tasi i le isi e iloa ai pe o ai ua sili ona mauoa pe sili ona talenia pe sili ona aulelei pe sili foi ona faamanuiaina. O le tuuga lea tatou te i ai moni lava, o le tuuga e faasaga i le agasala.

(Jeffrey R. Holland, “O Le Au Faigaluega i le Tovine,” Liahona, Me 2012, 31)

E faapefea ona faaalia e le aoaiga a le Tama Faalelagi Lona alofa mo i tatou?

Na faamatalaina e Elder Taniela B. Wakolo o le Fitugafulu ni faataitaiga mai lona lava olaga ma le soifuaga o Iosefa Samita na faaalia ai le alofa o le Atua i le aoaiga.

Matamata i le “E Alofa le Atua i Ana Fanau” mai le faailotaimi 5:23 i le 8:04 e vaai ai i nei faataitaiga.

8:40

Ua faamaonia mai e tusitusiga paia faamoemoega e tele mo aoaiga a le Alii. I le Eperu 12:10, o loo aoao mai ai Paulo faapea e faasa’o i tatou e le Alii “e aoga ia i tatou, ina ia tofusia i tatou i lana amio lelei.” O Lana aoaiga “e fua mai ai le fua o le amiotonu e manuia ai e ua aoaoina ai” (Eperu 12:11). O le aoaiga a le Alii e mafai ona faia i ni auala se tele, ma o taimi uma e fesoasoani e aoao ai tagata taitoatasi faapea foi ona aumaia ai faasaoga e tatau ai. E fesoasoani le aoaiga i tagata e manatua ai le Alii, salamo, maua le faamagaloga ma le laveaiga, aoao le usiusitai, ma faamamaina e pei o le auro (tagai i le Helamana 12:3; Mataupu Faavae ma Feagaiga 1:27; 95:1; 105:6; Iopu 23:10).

Na saunoa mai Elder D. Todd Christofferson o le Korama a Aposetolo e Toasefululua e uiga i le aoaiga a le Alii:

E taua tele aoa’iga pe afai o le a tatou suia o tatou olaga “ina ia fai ma tagata matua, [o lona uiga] ia oo i le fua o le ua matua, e faatatau ma le tumu o Keriso” (Efeso 4:13). Na fai mai Paulo e uiga i le faasaoga faalelagi po o le aoa’iina, “Aua o le ua alofagia e le Alii, ua aoai atu o ia ia te ia” (Eperu 12:6). E ui lava e masani ona faigata ona onosaia, ae o le mea moni e tatau ona tatou olioli ua manatu mai le Atua ia i tatou lea ua aoga ai le taimi ma le onosaiga e faasa’o ai.

(D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Liahona, Me 2011, 97–98)