Toefaamanatu 22 o le Atamai i Aoaoga Faavae

Tauloto Mau Faasino ma Fasifuaitau Autu o Mau

Aiga i Niu Sila o loo saofafai i le potu malolo e faitau faatasi tusitusiga paia.

Pe na i ai se taimi na e mafaufau ai pe aisea e taua ai le taulotoina o mau? O le taulotoina o mau e mafai ona fesoasoani ia te oe e maua ai musumusuga, manatua ai le Faaola, ma aoao atu ai le talalelei i isi. Ua faamoemoeina lenei lesona e fesoasoani ia te oe e tauloto ni nai tusi faasino o mau ma fasifuaitau autu o mau mai fuaitau o le atamai i aoaoga faavae i le Feagaiga Fou.

Aisea e tauloto ai mau?

Vaai faalemafaufau faapea o loo e auai i se sailiiliga mo le mekasini o le Mo Le Malosi o le Autalavou . E faapefea ona e tali pe afai e fesili atu ia te oe le fesili lenei?

O a mafuaaga pito maualuga e lima mo le taulotoina o mau?

E tele mafuaaga lelei e tauloto ai mau. O mau ua taulotoina e mafai ona pei o ni uo e mafai ona aumaia ia i tatou musumusuga, faamafanafanaga, ma uunaiga i taimi e manaomia ai (tagai Richard G. Scott, “O Le Mana o Tusitusiga Paia,” Liahona, Nov. 2011, 6). O le taulotoina o mau e mafai ona fesoasoani ia i tatou e “vaai atu ai i [le Faaola] i mafaufauga uma” ( Mataupu Faavae ma Feagaiga 6:36). O le taulotoina o mau e mafai ona fesoasoani ia i tatou e “maua ai le afioga [a le Atua]” ina ia mafai ai ona tatou aoao atu isi ( Mataupu Faavae ma Feagaiga 11:21).

E mafai faapefea e le taulotoina o mau ona aafia ai lau sootaga ma Iesu Keriso?

Tauloto fuaitau

Faaaoga ni nai minute e tauloto pe toe faamanatu ai tusi faasino o mau ma fasifuaitau autu o mau nei o le atamai i aoaoga faavae o le Feagaiga Fou. O le taimi lava e te lagona ai le mautinoa ua e iloa nei tusi faasino ma fasifuaitau autu, filifili se tasi pe sili atu o gaoioiga nei e suesue ai lou manatua.

Atamai i Aoaoga Faavae mo le Feagaiga Fou: 1 Korinito–Faaaliga

1 Korinito 6:19–20	“O lo outou tino o le malumalu lea o le Agaga Paia.”
1 Korinito 11:11	“E leai se tane pe a le o i ai le fafine, e leai foi se fafine pe a le o i ai le tane, i le Alii”
1 Korinito 15:20–22	“Aua faapei ona oti uma ia Atamu, e faapea foi ona faaolaina uma ia Keriso.”
1 Korinito 15:40–42	I le Toetutu, e i ai tikeri e tolu o le mamalu.
Efeso 1:10	“Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.”
Efeso 2:19–20	O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”
2 Tesalonia 2:1–3	“O le aso o Keriso … e le oo mai lena aso, seia muai ona taunuu o le tete’a ese.”
2 Timoteo 3:15–17	“O Tusi Paia, e mafaia ona faapoto ai ia te oe e iu ai i le ola i le faatuatua.”
Eperu 12:9	O le Tama Faalelagi o “le Tamā o tatou agaga.”
Iakopo 1:5–6	“A e afai ua leai se poto i so outou, ina ole atu ia i le Atua.”
Iakopo 2:17–18	“O le faatuatua, pe afai e le i ai galuega, e mate lava.”
1 Peteru 4:6	“[Na] folafola atu foi le talalelei i e ua oti.”
Faaaliga 20:12	“Ona faamasinoina ai lea o e ua oti … e tusa ai ma a latou amio.”

Faamaea mai se tasi pe sili atu o galuega nei.

Filifiliga 1: Tusi se ata

Fai atu i se uo po o se tagata o le aiga e fesoasoani ia te oe e fai le gaoioiga lenei. Tuu atu i le tagata o le aiga po o se uo e filifili se fuaitau o le atamai i aoaoga faavae mai le lisi ae aua le ta‘u atu ia te oe po o le fea fuaitau na latou filifilia. Ona tuu atu lea ia i latou e tusi ni ata faailoilo i le fuaitau e aunoa ma le faaaogaina o mataitusi po o fuainumera seia oo ina e ta‘ua le mau sa’o ma le fasifuaitau autu. E mafai ona e toe faia lenei faagasologa mo nai nisi fuaitau.

O le a sou manatu e mafai faapefea ona avea se mau ua taulotoina e pei o se uo e mafai ona tuuina atu ia te oe musumusuga, faamafanafanaga, ma uunaiga i taimi o faigata?

Filifiliga 2: Ia tusia

Filifili se mau faasino mai le lisi ma tusi i lalo le fasifuaitau autu e fetaui i ai. Faataitai ona tusia faafa pe faalima le fasifuaitau lava e tasi. Taumafai e tusi fasifuaitau autu o mau mo ni nai fuaitau. Faaopoopo ni faiga eseese e ala i le tusia i le faatusilima po o mataitusi lapopoa . E mafai foi ona e taimiina oe lava ma vaai po o le a le tele e mafai ona e faaleleia ai lau taimi.

O le a sou manatu e mafai faapefea e le taulotoina o mau ona fesoasoani ia te oe e “vaai atu ai i [le Faaola] i mafaufauga uma”? (Mataupu Faavae ma Feagaiga 6:36).

Filifiliga 3: Faaigoa le tusi faasino o le mau

Fai atu i se uo po o se tagata o le aiga e fesoasoani ia te oe e toe faamanatu fuaitau o le atamai i aoaoga faavae. Tau atu i lenei tagata pe fia ni upu e faitau atu ia te oe mai se fasifuaitau autu o le mau, ma fai atu ia i latou e faitau leotele lena aofaiga o upu. Taumafai e faailoa mai le mau faasino sa‘o. Toe fai le gaoioiga lenei i le tele o taimi e te fiafia ai ma taumafai e talosaga le aofai eseese o upu.

O le a sou manatu e mafai faapefea e le taulotoina o mau ona fesoasoani ia te oe e saunia ai e faasoa atu le talalelei i isi?