Eperu 1–10
“O Se Suafa Silisili Ese”
O soo uma o Iesu Keriso o le a oo i ai tofotofoga o lo latou faatuatua. E faapena le tulaga mo le toatele o Kerisiano Iutaia. I lalo o le mamafatu o sauaga eseese, e toatele na faamaamulu mai i le Ekalesia ma toe foi atu i le saogalemu o tapuaiga faa-Iutaia i le sunako. Na manao Paulo e faailoa atu i nei Kerisiano Iutaia o Iesu Keriso e sili atu nai lo Mose ma o Lana galuega na aumaia ai se feagaiga fou e maualuga atu i lo le feagaiga tuai i lalo o le tulafono a Mose. O lenei lesona e mafai ona fesoasoani e faamalosia ai lou faatuatua i le Faaola a o e aoao i Lona mana i luga o mea uma e ala i le faailoaina ma le suesueina o nisi o Ona faalagiga ma matafaioi.
Faalagiga o Iesu Keriso
Faaaoga se minute se tasi ma lisi i lau api faamaumau mo suesuega le tele o upu po o fasifuaitau e mafai ona e mafaufau i ai e faamatalaina ai lou tagata.
-
Aisea na e faaaogaina ai upu ma fasifuaitau na e faaaogaina?
E pei lava ona i ai ni au upu po o fasifuaitau e faamatala ai oe, e tele foi suafa po o faalagiga o Iesu Keriso o loo faamatalaina ai o Ia. A oo ina tatou iloa atoatoa nei faalagiga, o le a tatou malamalama lelei ai po o ai o Ia atoa ma le tele o Lona alofa mo i tatou.
I lau api faamaumau mo suesuega, lisi ai nisi o faalagiga ua uma ona e iloa mo le Faaola.
-
E faapefea e le iloaina ma le malamalama ai i nei faalagiga o Iesu Keriso ona aafia ai lau vaai atu ia te Ia?
Na aoao mai e Peresitene Russell M. Nelson ni auala e mafai ona faamanuiaina ai i tatou a o tatou aoao atili e uiga i le Faaola:
O le tele o lou a’oa’o e uiga i le Faaola, o le faigofie foi lena o le faalagolago i Lona alofa mutimutivale, Lona alofa lēmafuatia, ma Lona mana faamalosi’au, faamalolo, ma laveai.
(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103)
-
O a ni auala e te manaomia ai le fesoasoani mai le Faaola lea na faamatalaina e Peresitene Nelson?
E pei lava ona tatou manaomia le Faaola, sa faapena foi i Kerisiano Iutaia o e sa lei auai i sauniga a le Ekalesia ona o sauaga ma isi ituaiga o taotaomiaga. Na latou toe foi ai i mea na masani ai ma le saogalemu o tapuaiga masani faa-Iutaia, lea sa lei aofia ai se talitonuga ia Iesu Keriso (tagai i le Eperu 10:25, 38–39). E mafai ona e aoao atili e uiga i lenei tusi e ala i le suesueina o le “ Eperu, Tusi i Tagata” i le Taiala i Tusitusiga Paia.
O le sailia o faalagiga ma matafaioi o Iesu Keriso
Sa faasoa atu e Paulo le tele o faalagiga ma matafaioi a le Faaola atonu na fesoasoani i le Au Paia e iloa ai lo latou manaomia o Ia. Mo se faataitaiga, o le Eperu 1:2 o loo faamamafa mai ai le faalagiga o le Faaola o le “Alo,” lea e faatatau ia te Ia o le “e fai mea uma lava mona tofi.” O leEperu 1:2, 10 o loo faamatala mai ai le matafaioi a Iesu o Lē Foafoa o le lagi ma le lalolagi.
O lea la ua e vaai i nisi o faataitaiga o faalagiga o le Faaola, faitau fuaiupu nei ma vaavaai mo faalagiga ma matafaioi faaopoopo a Iesu Keriso. Mafaufau e faailoga mea e te maua.
-
Eperu 1:1–3, 10
-
Eperu 2:9–10, 17
-
Eperu 3:1
-
Eperu 5:8–10
-
Eperu 9:11–16
-
O le a se upumoni na e faailoa mai e uiga i le Faaola mai se tasi pe sili atu o Ona faalagiga ma matafaioi?
1. Faamaea le mea lenei i totonu o lau api faamaumau mo suesuega: Ia mautinoa e faaaofia ai au tali i fesili e lua i le faaiuga o le lesona.
Filifili se faalagiga po o se matafaioi e faaalia ai se faatinoga e te manaomia ona faia e Iesu Keriso i lou olaga, ma tusi i le ogatotonu o se fasipepa. I le faaaogaina o tusitusiga paia, o le polokalama o le Gospel Library, po o le ChurchofJesusChrist.org, vaavaai mo ni isi malamalamaaga i faalagiga o Iesu Keriso na e filifilia. O se tasi o auala e amata ai lau suesuega o le sailia lea o le faamatalaga “Iesu Keriso” i le Taiala i Tusitusiga Paia po o le Topical Guide. Ona mafai lea ona e sueina ni mau eseese o loo taulai atu i le Faaola.
Tusi faataamilo i le faalagiga ou manatu e uiga ia Iesu Keriso ma pe aisea e taua ai lena faalagiga ia te oe. O manatu nei e mafai ona aofia ai
-
fasifuaitau mai fuaiupu po o upusii e te faitauina,
-
manatu i le auala e mafai ai e le faataunuuina e le Faaola o lena matafaioi ona fesoasoani ia te oe i lou olaga,
-
o ou malamalamaaga e uiga i le auala e mafai ai e le malamalama i lena faalagiga ona faamalosia lou faatuatua ia Iesu Keriso, ma
-
soo se fesili o ia te oe e uiga i lena faalagiga.
Ona o lea ua e faataitaiina le faailoaina o suafa ma faalagiga o Iesu Keriso, faaaoga sina taimi e mafaufau ai po o le a le lelei o loo e faaaogaina ai lenei tomai i lau suesuega o tusitusiga paia.
-
Na faapefea e le sueina o faalagiga o Iesu Keriso ona fesoasoani e te iloa atili ai o Ia?
-
E mafai faapefea ona e faaaofiaina le suesueina o faalagiga o Iesu Keriso i au suesuega masani o tusitusiga paia?
Vaavaai mo faalagiga o Iesu Keriso i au suesuega faaletagata lava ia ma faatasi ai ma lou aiga a o faaauau pea ona e suesue i le Feagaiga Fou ma isi tusitusiga paia.
Tuu i le faitalia: O e Manao e Aoao Atili?
Aisea e ao ai ona ou aoao e uiga ia Iesu Keriso?
Na aoao mai Peresitene Russell M. Nelson:
Afai e faaauau ona e aoao mea uma e te mafaia e uiga ia Iesu Keriso, ou te folafola atu ia te oe o lou alofa mo Ia, ma mo tulafono a le Atua, o le a tuputupu ae i talaatu o mea o loo e mafaufauina i le taimi nei. Ou te folafola atu foi ia te outou o le a faateleina lo outou gafatia e liliu ese ai mai agasala. O lou naunau e tausi poloaiga o le a siitia. O le a e iloa ai ua sili atu ona mafai ona e savali ese mai faafiafiaga ma faalavefau a i latou o e faatauemu i soo o Iesu Keriso. …
Suesue i mea uma e uiga ia Iesu Keriso e ala lea i le saili ma le agaga tatalo ma le filiga ia malamalama po o a uiga o Ona faalagiga ma suafa taitasi eseese mo oelava ia .
(Russell M. Nelson, “O Perofeta, Taitaiga, ma le Tulafono Faalelagi” [faigalotu i le lalolagi atoa mo le talavou matutua, Ian. 8, 2017], ChurchofJesusChrist.org; ua faaopoopoina le faamamafa)
Eperu 1:2, 10. E mafai faapefea e le matafaioi a Iesu o Lē Foafoa ona aafia ai lo’u olaga?
Na faamalamalama mai e Chad H. Webb, taitai o Seminare ma Inisitituti o Mataupu Faalelotu:
Atonu tou te manatuaina o Peresitene Boyd K. Packer o se tufuga atamai na fiafia i le vaneina o manulele laupapa. I se tasi aso, sa tietie ai o se pasese i le taavale na aveina e Elder A. Theodore Tuttle, ma sa taatia se tasi o ana [ata] vane i le nofoa pito i tua o le taavale. I se fetaulaiga o ala, sa taofi faafuasei ai e Elder Tuttle le taavale ma patatū ai i lalo le faatusa vane laupapa i luga o le fola ma nuti ai. Sa matua faanoanoa Elder Tuttle, ae sa lei faapena lagona o Peresitene Packer. Sa na ona ia fai mai lava, “Faagalo ia. O a’u na faia. E mafai ona ou toe faaleleia.” Ma sa faapena ona ia faia. Na ia toe faia ia malosi atu nai lo le mea sa i ai ma sa faaleleia atili foi. Na faamalamalama mai e Peresitene Packer, “O ai na faia oe? O ai lou Foafoa? E leai se mea e uiga i lou olaga ua gausia pe malepelepe e le mafai ona Ia le toe faaleleia ma o le a toe faaleleia lava.”
(Chad H Webb, “We Talk of Christ, We Rejoice in Christ,” Faasalalauga Faaletausaga o Aoaoga mo Seminare ma Inisitituti o Mataupu Faalelotu, 12 Iuni, 2018, ChurchofJesusChrist.org)
E mafai faapefea e le iloaina o Iesu Keriso ona aumaia ia te au le faamoemoe?
O le aafiaga lenei na faasoa mai e Elder Ronald A. Rasband e mafai ona fesoasoani ia tatou malamalama ai pe mafai faapefea e le iloaina o faalagiga ma matafaioi a Iesu Keriso ona maua ai le faamoemoe.
Eperu 2:10. O a ni auala ua avea ai Iesu ma “le taimua o lo [tatou] faaolataga”?
O le vaega lenei o le faasalalauga o loo faasoa mai ai ni malamalamaga i le ala ua avea ai Iesu Keriso ma taimua o lo tatou faaolataga: